សង្គ្រាមមីយ៉ាន់ម៉ា Archives - Kampuchea Thmey Daily

របបយោធាមីយ៉ាន់ម៉ា វាយបកទៅអន្តរជាតិចំពោះការរិះគន់ការបោះឆ្នោត

Minea Neu — Wed, 17 Dec 2025 09:16:07 +0000

ចាប់តាំងពីពេលដែលសង្គ្រាមរវាងប្រទេសថៃនិងកម្ពុជាដែលស្ថិតនៅក្នុងប្លុកអាស៊ានដូចគ្នា សម្ពាធលើរបបសឹកមីយ៉ាន់ម៉ាហាក់បានធ្លាក់ថយ ស្របពេលដែលប្រទេសនេះបានរៀបចំការបោះឆ្នោតតាមការគ្រោងទុកដើម្បីធ្វើយ៉ាងណាធ្វើឲ្យស្របច្បាប់នៅរបបកើតចេញពីរដ្ឋប្រហារកាលពីជិត៦ឆ្នាំមុន។

មេដឹកនាំរបបយោធា លោក Min Aung Hlaing ពេលទៅទស្សនកិច្ចនៅរុស្ស៊ី។ Myanmar News

រដ្ឋាភិបាលយោធាមីយ៉ាន់ម៉ាកាលពីពេលថ្មីៗនេះ បានបរិហារតបតចំពោះការរិះគន់របស់អន្តរជាតិ ដែលចាត់ទុកការបោះឆ្នោតរបស់ខ្លួននាពេលខាងមុខថាមិនសេរី និងគ្មានអព្យាក្រិត ប៉ុន្តែក៏បានណែនាំដល់មេដឹកនាំរបបយោធា លោក Min Aung Hlaing ឱ្យមានភាពជាអ្នកដឹកនាំក្រោយការបោះឆ្នោត។

ការប្រើប្រាស់វោហាស័ព្ទធ្ងន់ៗរបស់អ្នកដឹកនាំរបបសឹកមីយ៉ាន់ម៉ា ដែលត្រូវបានគេមើលឃើញថា ជម្លោះរវាងថៃនិងកម្ពុជា បានធ្វើឲ្យតំបន់អាស៊ានញាំញីដោយវិបត្តិដែលលើសពីវិបត្តិនៅមីយ៉ាន់ម៉ាដែលអន្តរជាតិដាក់សម្ពាធយ៉ាងខ្លាំងទៅលើរបបសឹកមីយ៉ាន់ម៉ា។

រដ្ឋាភិបាលយោធាកំពុងត្រួតពិនិត្យការបោះឆ្នោតជាដំណាក់កាល ដែលគ្រោងនឹងចាប់ផ្តើមនៅថ្ងៃទី២៨ខែធ្នូ ដោយសន្យាថានឹងវិលទៅរកលទ្ធិប្រជាធិបតេយ្យ និងមានឱកាសដើម្បីបញ្ចប់ការប្រយុទ្ធគ្នា។

អ្នកនាំពាក្យរបបយោធា លោក Zaw Min Tun បានប្រាប់សន្និសីទសារព័ត៌មានដ៏កម្រមួយនៅទីក្រុងយ៉ាំងហ្គូនថា៖ «ការបោះឆ្នោតត្រូវបានធ្វើឡើងសម្រាប់ប្រទេសមីយ៉ាន់ម៉ា។ វាមិនមែនធ្វើឡើងសម្រាប់សហគមន៍អន្តរជាតិទេ។ អ្នកដែលចង់រិះគន់អាចរិះគន់បាន ប៉ុន្តែយើងនឹងនៅតែបន្តសម្រេចគោលបំណងរបស់យើងដដែល គឺការវិលទៅរកប្រព័ន្ធប្រជាធិបតេយ្យពហុបក្សវិញ»។

ទោះជាយ៉ាងណាក៏ដោយ អ្នកឃ្លាំមើលអន្តរជាតិបាននិយាយថា ការបោះឆ្នោតនេះជាសមយុទ្ធមួយក្នុងការប្តូរឈ្មោះការគ្រប់គ្រងយោធា ខណៈដែលអង្គការសហប្រជាជាតិ ចក្រភពអង់គ្លេស និងថៃបាននិយាយថាវានឹងមិនសេរី ហើយយុត្តិធម៌នោះទេ។ នេះបើយោងតាមការចេញផ្សាយរបស់ទីភ្នាក់ងារព័ត៌មានបារាំង AFP។

របបយោធាបានកាន់កាប់អំណាចរដ្ឋប្រហារក្នុងឆ្នាំ២០២១ ដោយបានផ្តួលរំលំរដ្ឋាភិបាលស៊ីវិល និងចាប់មេដឹកនាំរបស់ខ្លួនដាក់គុក ហើយបង្កឱ្យមានសង្រ្គាមស៊ីវិលដ៏អាក្រក់ ដែលបានគ្រប់គ្រងប្រទេស។ ប្រមុខរដ្ឋាភិបាលរបបយោធាមីយ៉ាន់ម៉ា លោកឧត្តមសេនីយ៍ Min Aung Hlaing បានប្រកាសច្បាប់អាជ្ញាសឹក និងបានគ្រប់គ្រងប្រទេសក្នុងឋានៈជាប្រមុខយោធាចាប់តាំងពីរដ្ឋប្រហារនោះ។

លោក បានបញ្ចប់តួនាទីរបស់របស់ខ្លួនយ៉ាងតក់ក្រហល់ ដោយបានផ្ទេរអំណាចទៅឱ្យអ្នកផ្សេងទៀតដែលមានតួនាទីប្រហាក់ប្រហែល ដើម្បីបន្តការបោះឆ្នោត ដែលបានសន្យាជាយូរកន្លងមក ហើយរូបលោកក៏កាន់តំណែងជាប្រមុខរដ្ឋស្តីទីផងដែរ។

ចំណែក លោក Zaw Min Tun អនុរដ្ឋមន្ត្រីក្រសួងព័ត៌មានមីយ៉ាន់ម៉ា បាននិយាយថា នៅពេលដែលគេសួរថា យោធាអាចមានការប៉ងធ្វើនយោបាយបន្ទាប់ពីការបោះឆ្នោតដែរឬទេ វាត្រូវការពេលប្រហែលមួយខែ។ លោកបានលើកឡើងពីបទពិសោធន៍ក្នុងកាតព្វកិច្ចរដ្ឋ របស់លោក។

លោកបានបន្តថា៖«មានសេចក្តីថ្លែងការណ៍ដែលបាននិយាយកន្លងមកថា ប្រសិនបើរដ្ឋប្រគល់ភារកិច្ចឱ្យ ខ្ញុំនឹងអនុវត្តបទពិសោធន៍ដែលមានទាំងឡាយសម្រាប់ប្រទេសជាតិជានិច្ច»។

គួរឱ្យដឹងផងដែរថា យោធាបានអនុវត្តច្បាប់ថ្មីដ៏តឹងរ៉ឹងនៅក្នុងមូលដ្ឋានដែលខ្លួនគ្រប់គ្រង ដោយដាក់ទណ្ឌកម្មលើការតវ៉ា ឬការនិយាយប្រឆាំងនឹងការបោះឆ្នោតដោយជាប់ពន្ធនាគាររហូតដល់មួយទសវត្សរ៍។

គណបក្សសម្ព័ន្ធជាតិដើម្បីប្រជាធិបតេយ្យ ដែលបានឈ្នះការបោះឆ្នោតចុងក្រោយក្នុងឆ្នាំ២០២០ និងមានអ្នកគាំទ្រភ្លូកទឹកភ្លូកដីត្រូវបានរំលាយចោលដោយរបបសឹកក្រោយរដ្ឋប្រហារ។ ចំណែកមេដឹកនាំ លោកស្រី អ៊ុងសាន ស៊ូជី (Aung San Suu Kyi) ដែលទទួលបានជ័យលាភីរង្វាន់ណូបែលសន្តិភាព នៅតែស្ថិតក្នុងការឃុំឃាំងដោយរបបយោធាមីយ៉ាន់ម៉ា នៅឡើយ៕

ណឺ មិនា

The post របបយោធាមីយ៉ាន់ម៉ា វាយបកទៅអន្តរជាតិចំពោះការរិះគន់ការបោះឆ្នោត appeared first on Kampuchea Thmey Daily.

ប្រធានាធិបតីស្តីទីមីយ៉ាន់ម៉ា Myint Swe មរណភាពក្នុងវ័យ៧៤ឆ្នាំ

Rann Reuy — Thu, 07 Aug 2025 06:27:26 +0000

បណ្តាញផ្សព្វផ្សាយបរទេស បានផ្សាយថា លោក Myint Swe ប្រធានាធិបតីស្តីទីរបស់ប្រទេសមីយ៉ាន់ម៉ា បានទទួលមរណភាពនៅថ្ងៃព្រហស្បតិ៍នេះ ក្នុងវ័យ៧៤ឆ្នាំ។ លោក Myint Swe ដែលលើកបន្តុបដោយរបបសឹកក្រោមការដឹកនាំធ្វើរដ្ឋប្រហាររបស់លោក ឧត្តមសេនីយ៍ មីន អ៊ុនឡាំង (Min Aung Hlaing) ឲ្យឡើងកាន់តំណែងប្រធានាធិបតីស្តីទី កាលខែកុម្ភៈឆ្នាំ២០២១ ក្រោមកាលៈទេសៈដ៏ចម្រូងចម្រាស។

លោក Myint Swe។ AP

តាមការផ្សាយសារព័ត៌មាន AP ដោយដកស្រង់ប្រភពពីការផ្សព្វផ្សាយរបស់របបសឹកមីយ៉ាន់ម៉ា លោក Myint Swe បានស្លាប់នៅមន្ទីរពេទ្យយោធាក្នុងរដ្ឋធានីណៃពិដោរ (Naypyitaw) នៅព្រឹកថ្ងៃព្រហស្បតិ៍។

យោងតាមសេចក្តីថ្លែងការណ៍របស់ការិយាល័យព័ត៌មានយោធារបស់ប្រទេសមីយ៉ាន់ម៉ា ការស្លាប់របស់ លោក Myint Swe បានកើតឡើងជាងមួយឆ្នាំ បន្ទាប់ពីគាត់បានប្រកាសផ្ទេរភារកិច្ចមុខងារប្រធានាធិបតី ទៅឲ្យ លោក មីន អ៊ុងឡាំង ដោយសារតែមានបញ្ហាសុខភាព។

សេចក្តីថ្លែងការណ៍ដាច់ដោយឡែកពីការិយាល័យព័ត៌មានយោធាបាននិយាយថា ពិធីបុណ្យសពរបស់លោកនឹងធ្វើឡើងនៅកម្រិតរដ្ឋ ប៉ុន្តែកាលបរិច្ឆេទមិនត្រូវបានបង្ហាញឱ្យដឹងនោះទេ។

ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃអង្គារថា គាត់បានស្ថិតក្នុងស្ថានភាពធ្ងន់ធ្ងរ និងទទួលបានការថែទាំយ៉ាងយកចិត្តទុកដាក់ចាប់តាំងពីថ្ងៃទី ២៤ខែកក្កដានៅឯមន្ទីរពេទ្យយោធាក្នុងទីក្រុង Naypyitaw ។

ប្រព័ន្ធផ្សព្វផ្សាយរដ្ឋបានប្រកាសកាលពីខែកក្កដាឆ្នាំមុនថា Myint Swe មានជម្ងឺសរសៃប្រសាទ និងជំងឺសរសៃប្រសាទគ្រឿងកុំព្យូទ័រ ដែលធ្វើឱ្យគាត់មិនអាចធ្វើសកម្មភាពប្រចាំថ្ងៃធម្មតាបាន រួមទាំងការហូបចុកផងដែរ។ សេចក្តីរាយការណ៍បាននិយាយថា ប៉ុន្មានថ្ងៃក្រោយមក លោកបានអនុញ្ញាតឱ្យឧត្តមសេនីយ៍ មីន អ៊ុងឡាំង ប្រមុខរដ្ឋាភិបាលយោធា ចូលកាន់តំណែងជាប្រធានាធិបតីរបស់លោក ខណៈដែលលោកកំពុងសម្រាកព្យាបាល៕

រ៉ាន់ រើយ

The post ប្រធានាធិបតីស្តីទីមីយ៉ាន់ម៉ា Myint Swe មរណភាពក្នុងវ័យ៧៤ឆ្នាំ appeared first on Kampuchea Thmey Daily.

ទាហានយោធាមីយ៉ាន់ម៉ា៦២នាក់បាក់ទ័ព រត់ចូលទឹកដីថៃ មានទាំងរបួសនិងស្លាប់ច្រើនទៀត

Rann Reuy — Sat, 24 May 2025 08:34:45 +0000

ទាហានរដ្ឋាភិបាលរបបសឹកមីយ៉ាន់ម៉ាចំនួន ៦២នាក់បានបាក់ទ័ពរត់ភៀសខ្លួនចូលទឹកដីថៃ ពីក្រុមតស៊ូជនជាតិការ៉ែន Karen នៅជាប់ព្រំដែនថៃ។ យោងបណ្តាញសង្គមសារព័ត៌មានថៃ Khaosod

រូបភាពយោធាមីយ៉ាន់ម៉ាបាក់ទ័ពរត់ចូលទឹកដីថៃ។ Khaosod

ទាហានរបស់របបសឹកមីយ៉ាន់ម៉ានទាំងនោះ ត្រូវបានអនុញ្ញាតឱ្យឆ្លងចូលទៅផ្នែកខាងព្រំដែនទឹកដីថៃ ដើម្បីស្វែងរកជនភៀសខ្លួន ហើយត្រូវបានដកហូតអាវុធកាលពីថ្ងៃសៅរ៍។ ឧប្បត្តិហេតុនេះបានកើតឡើងបន្ទាប់ពីបន្ទាយយោធារបស់ពួកគេនៅជិតព្រំដែនថៃក្នុងស្រុក Phop Phra ខេត្ត Tak នៅទឹកដីមីយ៉ាន់ម៉ា ត្រូវបានកងកម្លាំងសហភាពរួបរួមជាតិការ៉ែន (KNU) និង កងទ័ពរំដោះជាតិការ៉េន (KNLA)កាន់កាប់។

ក្នុងចំណោមទាហានទាំង ៦២នាក់ មានរបួស១១នាក់ របួសធ្ងន់៤នាក់ ។ ពួកគេបាននិយាយថា មនុស្ស១៨នាក់ក្នុងចំណោមកងកម្លាំងរបស់ពួកគេត្រូវបានគេសម្លាប់។

សហភាពជាតិការ៉ែន (KNU) និងសម្ព័ន្ធមិត្តរបស់ខ្លួន តាមសេចក្តីរាយការណ៍ បានរឹបអូសយកមូលដ្ឋានយោធាមួយ នៅជិតព្រំដែនថៃ ក្នុងរដ្ឋការ៉ែនកាលពី៤ថ្ងៃមុនផងដែរ។ យោងសារព័ត៌ាមាន មីយ៉ាន់ម៉ា irrawaddy ដែលបានផ្សាយកាលថ្ងៃទី២០ឧសភា។

កងទ័ពរំដោះជាតិ Karen (KNLA) ដែលជាស្លាបប្រដាប់អាវុធរបស់ KNU និងសម្ព័ន្ធមិត្តរបស់ខ្លួនបានដណ្តើមយកមូលដ្ឋាន Maw Phoe Kay នៅ Paingkyon ស្រុក Hpa-an កាលពីថ្ងៃចន្ទសប្តាហ៍នេះ។

KNLA បានប្រាប់ប្រព័ន្ធផ្សព្វផ្សាយ Karen ថា ទាហានរបបនេះបានបោះបង់ចោលបន្ទាយ ហើយប្រព័ន្ធផ្សព្វផ្សាយថៃបានរាយការណ៍ថាទាហាន ២៧នាក់បានឆ្លងទន្លេ Moei ចូលទៅក្នុងប្រទេសថៃ៕

ដោយ រ៉ាន់ រើយ

ការង្រមូលផ្តុំទាហានបាក់ទ័ពរបស់មីយ៉ាន់ម៉ានៅទឹកដីថៃនៅថ្ងៃសៅរ៍នេះ។ Khaosod

The post ទាហានយោធាមីយ៉ាន់ម៉ា៦២នាក់បាក់ទ័ព រត់ចូលទឹកដីថៃ មានទាំងរបួសនិងស្លាប់ច្រើនទៀត appeared first on Kampuchea Thmey Daily.

ប្រជាជនមីយ៉ាន់ម៉ា៤០០នាក់ភៀសខ្លួនចូលទឹកដីថៃ ខណៈការប្រយុទ្ធគ្នាក្បែរព្រំដែនកើនឡើង

Rann Reuy — Fri, 16 May 2025 02:49:48 +0000

សារព័ត៌មានថៃ MGR online បានរាយការណ៍ថា ពលរដ្ឋមីយ៉ាន់ម៉ាប្រមាណជាង៤០០នាក់បាននាំគ្នាភៀសខ្លួនពីក្នុងប្រទេសមីយ៉ាន់ម៉ាចូលទៅកាន់ប្រទេសថៃនៅថ្ងៃទី១៥ខែឧសភា បន្ទាប់ពីក្រុមប្រដាប់អាវុធជនជាតិភាគតិចមីយ៉ាន់ម៉ា ពោលគឺកងទ័ពរំដោះជាតិការ៉ែន (Karen) បានបើកការវាយប្រហារដោយប្រើដ្រូនលើមូលដ្ឋានយោធារបស់រដ្ឋាភិបាលមីយ៉ាន់ម៉ា។

ជនជាតិមីយ៉ាន់ម៉ាជិះទូកឆ្លងព្រំដែនចូលប្រទេសថៃ ក្រោយការប្រយុទ្ធគ្នាខ្លាំងកើតឡើង។ MGR online

សេចក្តីរាយការណ៍ បានបន្តថា របបសឹកយោធាមីយ៉ាន់ម៉ា បានបញ្ឆេះសង្រ្គាមស៊ីវិលចាប់តាំងពីរដ្ឋប្រហារដណ្តើមអំណាចពីរដ្ឋាភិបាលស៊ីវិលក្នុងឆ្នាំ២០២១ ហើយបច្ចុប្បន្ននេះកំពុងតស៊ូប្រយុទ្ធជាមួយកងកម្លាំងប្រដាប់អាវុធដែលគាំទ្រលទ្ធិប្រជាធិបតេយ្យនិងក្រុមប្រដាប់អាវុធជនជាតិភាគតិច ដែលធ្វើសកម្មភាពប្រឆាំងនៅតាមតំបន់ព្រំដែននៃប្រទេសមីយ៉ាន់ម៉ាជាយូរណាស់មកហើយ។

ការប្រយុទ្ធគ្នាភាគច្រើនផ្តោតលើការដណ្តើមគ្នាដើម្បីគ្រប់គ្រងតំបន់ឆ្លងកាត់ព្រំដែន ជាទីតាំងដែលក្រុមប្រយុទ្ធអាចរកប្រាក់ចំណូលបានដើម្បីប្រើប្រាស់ក្នុងការធ្វើសង្រ្គាមប្រឆាំងរបស់ពួកគេពីការបង្កើតច្រកទ្វារឆ្លងដែនដែលគ្រប់គ្រងលើផ្លូវដឹកជញ្ជូនពាណិជ្ជកម្ម និងការរត់ពន្ធទំនិញរវាងប្រទេសថៃ។

ប្រភពពីយោធាថៃ បាននិយាយថា កងទ័ពរំដោះជាតិការ៉ែន (Karen) បានប្រើដ្រូនបើកការវាយប្រហារដោយទម្លាក់គ្រាប់បែកលើមូលដ្ឋានយោធារបស់រដ្ឋាភិបាលរបបសឹកមីយ៉ាន់ម៉ាដែលស្ថិតនៅជិតព្រំដែនថៃកាលពីរសៀលថ្ងៃទី១៤ ខែឧសភា បណ្តាលឱ្យជនជាតិមីយ៉ាន់ម៉ាចំនួន៤១៤នាក់ភៀសខ្លួនឆ្លងព្រំដែនចូលក្នុងប្រទេសថៃស្ថិតក្នុងតំបន់មួយនៅជិតភូមិសាស្ត្រស្រុក Mae La ខេត្តតាក (Tak) ប្រទេសថៃ។

គួររំលឹកថា អង្គភាពក្រុមប្រដាប់អាវុធពួកឧទ្ទាមដែលបានកេណ្ឌពួកជនជាតិភាគតិចការ៉ែន (Karen) ធ្វើសកម្មភាពប្រយុទ្ធប្រឆាំងនឹងរដ្ឋាភិបាលមីយ៉ាន់ម៉ាអស់រយៈពេលជាច្រើនទសវត្សរ៍មកហើយ និងបានក្លាយជាបញ្ហាប្រឈមធំចំពោះរដ្ឋាភិបាលរបបសឹកយោធាមីយ៉ាន់ម៉ាដែលគ្រប់គ្រងតំបន់ឆ្លងដែនជាមួយប្រទេសថៃ។

បន្ទាប់ពីរដ្ឋប្រហារឆ្នាំ២០២១ ប្រទេសមីយ៉ាន់ម៉ាបាននិងកំពុងធ្លាក់ក្នុងសង្គ្រាមស៊ីវិលជាថ្មី បណ្តាលឱ្យប្រជាជនមីយ៉ាន់ម៉ាភៀសខ្លួនចេញពីលំនៅឋាននិងរត់ភៀសខ្លួនដើម្បីស្វែងរកសិទ្ធិជ្រកកោនជាង៨១ពាន់នាក់ពីមីយ៉ាន់ម៉ាចូលទៅប្រទេសថៃ។ នេះបើយោងតាមរបាយការណ៍របស់អង្គការសហប្រជាជាតិ៕

ដោយ ភ្នាក់ងារ

ជំរំបណ្តោះអាសន្នសម្រាប់ប្រជាជនមីយ៉ាន់ម៉ារត់ភៀសខ្លួនពីសង្គ្រាមស៊ីវិល។ kyotoreview.org

The post ប្រជាជនមីយ៉ាន់ម៉ា៤០០នាក់ភៀសខ្លួនចូលទឹកដីថៃ ខណៈការប្រយុទ្ធគ្នាក្បែរព្រំដែនកើនឡើង appeared first on Kampuchea Thmey Daily.

អាមេរិកដាក់ទណ្ឌកម្មមេទ័ពរំដោះជាតិការ៉ែនមីយ៉ាន់ម៉ា ពាក់ព័ន្ធកាងឧក្រិដ្ឋកម្មអនឡាញ

Rann Reuy — Tue, 06 May 2025 03:16:30 +0000

ក្រសួងរតនាគារសហរដ្ឋអាមេរិកបានប្រកាសកាលពីថ្ងៃទី៥ខែឧសភាថា សហរដ្ឋអាមេរិកបានសម្រេចដាក់ទណ្ឌកម្មលើមេដឹកនាំកងទ័ពរំដោះជាតិការ៉ែន (Karen) លោក Saw Chit Thu និងកូនប្រុស២នាក់ទៀត និងកងកម្លាំងប្រដាប់អាវុធដែលស្ថិតក្រោមការគ្រប់គ្រងរបស់លោក ដោយសារតែពួកគេជាអ្នកបង្កភាពងាយស្រួលដល់ក្រុមឧក្រិដ្ឋជនឆបោកតាមអនឡាញ ការជួញដូរមនុស្ស និងការរត់ពន្ធឆ្លងព្រំដែន។

លោក Saw Chit Thu មេដឹកនាំកងទ័ពរំដោះជាតិការ៉ែន (Karen) នៅជាប់ព្រំដែនថៃ។ Online

ក្រសួងរតនាគារសហរដ្ឋអាមេរិក បាននិយាយតាមរយៈសេចក្តីថ្លែងការណ៍មួយថា លោកឧត្តមសេនីយ៍ Saw Chit Thu គឺជាមេខ្លោងដ៏សំខាន់នៅក្នុងបណ្តាញឆបោកតាមអនឡាញដែលប្រព្រឹត្តអំពើឆបោកបានលុយយ៉ាងច្រើនមហាសាល ដោយមានជនជាតិអាមេរិកជាគោលដៅ។ ក្នុងរយៈពេលប៉ុន្មានឆ្នាំចុងក្រោយនេះ មានមនុស្សរាប់សែននាក់បានក្លាយជាអ្នករងគ្រោះដោយសារការជួញដូរមនុស្សពីក្រុមឧក្រិដ្ឋជននៅទូទាំងតំបន់អាស៊ីអាគ្នេយ៍ ហើយអ្នករងគ្រោះទាំងនោះត្រូវបានគេបង្ខំឱ្យចូលរួមក្នុងក្រុមឧក្រិដ្ឋកម្មឆបោករបស់ពួកគេ។

សារព័ត៌មានថៃ MGR online បានរាយការណ៍ថា តាមវិធានការដាក់ទណ្ឌកម្មរបស់ក្រសួងរតនាគារសហរដ្ឋអាមេរិកនេះ នឹងមានការដាក់ទណ្ឌកម្មផ្នែកហិរញ្ញវត្ថុលើលោកឧត្តមសេនីយ៍ Saw Chit Thu និងកងទ័ពរំដោះជាតិការ៉ែន (Karen) ដែលពួកគេគឺជាមេខ្លោងនៅពីក្រោយអំពើឆបោកទាំងនោះ រួមទាំងកូនប្រុសរបស់គាត់២នាក់ទៀត គឺ Saw To Ae Moo និង Saw Chit Chit ដោយក្រសួងរតនាគារសហរដ្ឋអាមេរិកបានបង្កកទ្រព្យសម្បត្តិទាំងអស់ដែលពួកគេកាន់កាប់ និងហាមជនជាតិអាមេរិកមិនឱ្យធ្វើអាជីវកម្មជាមួយពួកគេទៀតផង។ នេះគឺជាការប្រកាសដាក់ទណ្ឌកម្មលើកដំបូងរបស់ក្រសួងរតនាគារជាតិសហរដ្ឋអាមេរិកពាក់ព័ន្ធនឹងប្រទេសមីយ៉ាន់ម៉ាចាប់តាំងពីប្រធានាធិបតីសហរដ្ឋអាមេរិក ដូណាល់ ត្រាំ ឡើងកាន់តំណែង។

កន្លងមក ចក្រភពអង់គ្លេស និងសហភាពអឺរ៉ុបក៏បានប្រកាសដាក់ទណ្ឌកម្មលើលោកឧត្តមសេនីយ៍ Saw Chit Thu នេះផងដែរ។

កងទ័ពរំដោះជាតិការ៉ែន (Karen) មានមូលដ្ឋានរបស់ខ្លួននៅក្រុង «Shwe Kokko» ដែលត្រូវបានគេហៅឈ្មោះថា «ជាតំបន់សេដ្ឋកិច្ចពិសេស» នៅតាមបណ្តោយព្រំដែនថៃ-មីយ៉ាន់ម៉ា ដែលកងទ័ពរំដោះជាតិការ៉ែនបានជួលទីតាំងនិងផ្តល់ការការពារដល់ក្រុមឧក្រិដ្ឋជនឆបោកតាមអនឡាញនិងការជួញដូរមនុស្ស។

លោកឧត្តមសេនីយ៍ Saw Chit Thu មានទំនាក់ទំនងល្អជាមួយមេដឹកនាំយោធាមីយ៉ាន់ម៉ាលោកឧត្តមសេនីយ៍ មីន អ៊ុងឡាំង (Min Aung Hlaing) ដែលត្រូវបានគេមើលឃើញតាមរយៈការទទួលបានពានរង្វាន់កិត្តិយសសម្រាប់ «សមិទ្ធផលការងារឆ្នើម» ដែលផ្តល់ជូនដោយលោកឧត្តមសេនីយ៍ Min Aung Hlaing កាលពីខែវិច្ឆិកា ឆ្នាំ២០២២កន្លងទៅ៕

ភ្នាក់ងារ

លោកឧត្តមសេនីយ៍ Saw Chit Thu។ mpapress.com

The post អាមេរិកដាក់ទណ្ឌកម្មមេទ័ពរំដោះជាតិការ៉ែនមីយ៉ាន់ម៉ា ពាក់ព័ន្ធកាងឧក្រិដ្ឋកម្មអនឡាញ appeared first on Kampuchea Thmey Daily.

យន្តហោះចម្បាំងយោធាមីយ៉ាន់ម៉ាមិនអើពើនឹងការព្រមានរបស់ថៃ ដោយទម្លាក់គ្រាប់បែករាប់សិបគ្រាប់ក្បែរព្រំដែន

Rann Reuy — Tue, 22 Apr 2025 07:40:06 +0000

អាជ្ញាធរថៃខេត្តកាន់ចាណាបូរី (Kanchanaburi) បាននិងកំពុងតាមដានវឌ្ឍនភាពនៃស្ថានការណ៍ចលាចលនៅព្រំដែនថៃ-មីយ៉ាន់ម៉ា បន្ទាប់ពីយន្តហោះចម្បាំងរបស់យោធាមីយ៉ាន់ម៉ា បានទម្លាក់គ្រាប់បែករាប់សិបគ្រាប់នៅជិតព្រំដែនថៃធ្វើឱ្យអ្នកភូមិភ័យស្លន់ស្លោនិងរត់ភៀសខ្លួនដើម្បីសុវត្ថភាព។

ឧទ្ធម្ភាគចក្រដែលហោះត្រួតពិនិត្យតាមព្រំដែនថៃ។ Khaosod

ហេតុការណ៍យន្តហោះចម្បាំងរបស់យោធាមីយ៉ាន់ម៉ាទម្លាក់គ្រាប់បែកនេះត្រូវបានគេរាយការណ៍នៅថ្ងៃទី២១ខែមេសាថា នៅចំណុចឆ្លងដែនអចិន្ត្រៃយ៍ស្ថិតនៅភូមិភូណាំរ៉ន (PhuNamRon) ស្រុកនិងខេត្តកាន់ចាណាបូរី (Kanchanaburi)។ ក្នុងការតាមដានហេតុការណ៍នេះ លោក Wuttipong Suphakwanich អភិបាលរងខេត្តកាន់ចាណាបូរី បានចុះត្រួតពិនិត្យនៅតំបន់កើតហេតុ ដើម្បីតាមដានស្ថានការណ៍ជនភៀសខ្លួនមីយ៉ាន់ម៉ារាប់រយនាក់ដែលបានភៀសខ្លួនមកជិតព្រំដែនថៃដើម្បីសុវសត្ថិភាព។

ជុំវិញហេតុការណ៍ទម្លាក់គ្រាប់បែកនេះដោយសារស្ថានការណ៍ចលាចលនៅក្នុងប្រទេសមីយ៉ាន់ម៉ាមានការប៉ះទង្គិចគ្នារវាងយោធាមីយ៉ាន់ម៉ា និងកងទ័ពរំដោះជាតិការ៉ែន (ក្រុមប្រដាប់អាវុធជនជាតិភាគតិច) ដែលមានចម្ងាយប្រហែល១០គីឡូម៉ែត្រពីចំណុចឆ្លងដែន (ថៃ-មីយ៉ាន់ម៉ា) ស្ថិតនៅភូមិណាំរ៉នធ្វើឱ្យប្រជាជនមីយ៉ាន់ម៉ានៅតំបន់នោះមានការភ័យស្លន់ស្លោដោយសារការប៉ះទង្គិចគ្នារវាងកងកម្លាំងរបស់ភាគីទាំងពីរ និងបាននាំគ្នាភៀសខ្លួនរាប់រយនាក់ចូលក្បែរព្រំដែនថៃនៅភូមិភូណាំរ៉នស្រុកនិងខេត្តកាន់ចាណាបូរីនៅពេលថ្ងៃ ប៉ុន្តែនៅពេលយប់ពួកគេភាគច្រើនបាននាំគ្នាត្រឡប់ទៅផ្ទះសម្បែងវិញជាបណ្តើរៗ។

ទន្ទឹមគ្នានេះ កងសន្តិសុខខេត្តកាន់ចាណាបូរីនិងអង្គភាពពាក់ព័ន្ធថៃក៏បានត្រៀមផែនការគាំទ្រក្នុងករណីមានហេតុការណ៍ហិង្សាកើតឡើងដែលអាចមានពលរដ្ឋមីយ៉ាន់ម៉ាភៀសខ្លួនចូលទឹកដីថៃ ពោលគឺបានត្រៀមខ្លួនដើម្បីទទួលជនភៀសខ្លួនមីយ៉ាន់ម៉ាក្នុងករណីមានហេតុការណ៍ហិង្សាកើតឡើងចំនួន៤ទីតាំងដូចខាងក្រោម៖

ទីតាំងទី១៖ សម្រាប់ទទួលជនភៀសខ្លួននៅបរិវេណចំណុចឆ្លងដែនភូមិភូណាំរ៉ន។

ទីតាំងទី២៖ ត្រៀមជម្រក ឬកន្លែងសុវត្ថិភាពបណ្តោះអាសន្ននៅបរិវេណផ្សារសហគមន៍ភូណាំរ៉នដើម្បីផ្តល់សេវាសុខាភិបាល។

ទីតាំងទី៣៖ បង្កើតចំណុចទប់ស្កាត់និងត្រួតពិនិត្យមើលអ្នកពាក់ព័ន្ធនៅចំណុចប្រសព្វមណ្ឌលសុខភាពភូមិភូណាំរ៉នដើម្បីទប់ស្កាត់ការរត់គេចពីការត្រួតពិនិត្យរបស់សមត្ថកិច្ច ពោលគឺអ្នកឆ្លៀតឱកាសលួចឆ្លងដែនខុសច្បាប់។

និងទីតាំងទី៤៖ ជាតំបន់ប្រមូលផ្តុំជនស៊ីវិល (ក្នុងករណីពលរដ្ឋថៃដែលរស់នៅតាមព្រំដែនហើយរងផលប៉ះពាល់) ដោយអាជ្ញាធរថៃបានត្រមជម្រកសម្រាប់ប្រជាពលរដ្ឋថៃដែលអាចប្រឈមនឹងការភៀសខ្លួនចេញពីតំបន់ទាំងនោះជាបណ្តោះអាសន្ន។

សេចក្តីរាយការណ៍បានបន្តថា បច្ចុប្បន្ននេះប្រជាពលរដ្ឋមីយ៉ាន់ម៉ានៅតែស្ថិតនៅក្នុងតំបន់ព្រំដែនថៃ-មីយ៉ាន់ម៉ាដោយមិនទាន់មានការអនុញ្ញាតឱ្យចូលក្នុងទឹកដីថៃនៅឡើយទេ ប៉ុន្តែយ៉ាងណាក៏ដោយ ជំនួយនឹងនៅតែត្រូវធ្វើឡើងស្របតាមគោលការណ៍សិទ្ធិមនុស្ស។

គួររំលឹកថា យោធាមីយ៉ាន់ម៉ាបញ្ជូនយន្តហោះចម្បាំងទៅទម្លាក់គ្រាប់បែកលើក្រុមប្រដាប់អាវុធភាគតិចការ៉ែននេះ គឺជាការបំពានកិច្ចព្រមព្រៀងបទឈប់បាញ់ដែលខ្លួនបានប្រកាសជាឯកតោភាគីដើម្បីបើកផ្លូវសម្រាប់ការជួយសង្គ្រោះជនរងគ្រោះក្នុងហេតុការណ៍គ្រោះរញ្ជួយដីកាលពីថ្ងៃទី២៨ ខែមីនាកន្លងទៅ៕

ដោយភ្នាក់ងារ

កងទ័ពថៃឈរជើងនៅព្រំដែនជាមួយមីយ៉ាន់ម៉ា។ dailynews

The post យន្តហោះចម្បាំងយោធាមីយ៉ាន់ម៉ាមិនអើពើនឹងការព្រមានរបស់ថៃ ដោយទម្លាក់គ្រាប់បែករាប់សិបគ្រាប់ក្បែរព្រំដែន appeared first on Kampuchea Thmey Daily.

[អត្ថបទវិភាគ] ការបោះឆ្នោតរបស់មីយ៉ាន់ម៉ា គឺជាច្រកចេញរបបសឹកយោធាដើម្បីត្រួសត្រាយផ្លូវបង្កើតរដ្ឋាភិបាលចម្រុះ និងការទទួលស្គាល់

Rann Reuy — Sat, 12 Apr 2025 09:39:33 +0000

អត្ថបទវិភាគស៊ីជម្រៅ របស់សារព័ត៌មាន naewna ដែលមានមូលដ្ឋាននៅក្នុងប្រទេសថៃ ជុំវិញការបោះឆ្នោតរបស់មីយ៉ាន់ម៉ា ដែលនឹងបើកវាំងននបើកពន្លឺផ្តល់សង្ឃឹមរបស់របបសឹកយោធាដើម្បីត្រួសត្រាយផ្លូវសម្រាប់រដ្ឋាភិបាលចម្រុះដោយសម្រុះសម្រួលជាមួយភាគីតស៊ូ ប៉ុន្តែអំណាចនៅតែស្ថិតក្រោមការគ្រប់គ្រងរបស់យោធា។

លោក មីន អ៊ុងឡាំង ប្រមុខរដ្ឋមីនយ៉ាន់ម៉ា ដែលឡើងកាន់អំណាចតាមរយៈរដ្ឋប្រហារកាលខែកុម្ភៈ២០២១។ Reuters

របបសឹកយោធាមីយ៉ាន់ម៉ាបានធ្វើសកម្មភាពនយោបាយធំៗចាប់តាំងពីរដ្ឋប្រហារខែកុម្ភៈឆ្នាំ២០២១ ដោយប្រកាសប្តេជ្ញារៀបចំការបោះឆ្នោតដែលគ្រោងនឹងប្រព្រឹត្តទៅនៅចុងឆ្នាំ២០២៥ និងដើមឆ្នាំ២០២៦ ហើយការបោះឆ្នោតដែលរបបសឹកយោធាគ្រោងនឹងធ្វើឡើងនេះខុសប្លែកពីការបោះឆ្នោតដែលធ្លាប់ធ្វើមុនៗ ដោយត្រូវបែងចែកជា៤ដំណាក់កាល ពោលគឺនៅសប្តាហ៍ទី៣ និងសប្តាហ៍ទី៤ នៃខែធ្នូ ឆ្នាំ២០២៥ និងនៅសប្តាហ៍ទី១ និងសប្តាហ៍ទី២ នៃខែមករា ឆ្នាំ២០២៦។

បើទោះបីជា មីយ៉ាន់ម៉ា បានជួបបញ្ហាគ្រោះរញ្ជួយដីជាប្រវត្តិសាស្ត្រក៏ដោយ ប៉ុន្តែតាមទស្សនៈរបស់អ្នកវិភាគនយោបាយនៅតែមានជំនឿថា ការបោះឆ្នោតរបស់មីយ៉ាន់ម៉ាលើកនេះនឹងមិនជាបញ្ហាអ្វីនោះទេ ដោយសារតែរបបសឹកយោធាមីយ៉ាន់ម៉ាមានការត្រៀមខ្លួនរួចជាស្រេច និងមានក្តីសង្ឃឹមលើការឈ្នះនយោបាយរួចទៅហើយ។

អ្នកវិភាគនយោបាយ លោកសាស្ត្រាចារ្យបណ្ឌិត Dulyapak Preecharat ប្រធានសមាគមសិក្សាថ្នាក់តំបន់និងជាសាស្ត្រាចារ្យមកពីមហាវិទ្យាល័យអាស៊ីអាគ្នេយ៍នៃសាកលវិទ្យាល័យធម្មសាស្ត្រក្នុងប្រទេសថៃ មានជំនឿថា បើទោះបីជាប្រទេសមីយ៉ាន់ម៉ាកំពុងប្រឈមមុខនឹងគ្រោះរញ្ជួយដីដែលបានបង្កការខូចខាតដល់អាយុជីវិតនិងទ្រព្យសម្បត្តិរបស់ប្រជាជនយ៉ាងធ្ងន់ធ្ងរក៏ដោយ ប៉ុន្តែវានឹងមិនប៉ះពាល់ដល់ផែនការ ឬពេលវេលានៃការបោះឆ្នោតរបស់របបសឹកយោធាមីយ៉ាន់ម៉ានៅចុងឆ្នាំ២០២៥ និងដើមឆ្នាំ២០២៦ឡើយ ដោយសារតែរបបសឹកយោធាចង់នាំមកនូវការផ្លាស់ប្តូរ នយោបាយដើម្បីទទួលបានការទទួលស្គាល់ពីអន្តរជាតិ និងកាត់បន្ថយសម្ពាធពីសហគមន៍អន្តរជាតិ។

ទោះជាយ៉ាងណាក៏ដោយ ការផ្លាស់ប្តូរនយោបាយនៅក្នុងប្រទេសមីយ៉ាន់ម៉ាតាមរយៈការបោះឆ្នោតនោះ លោកជឿថា នឹងស្ថិតក្នុងលក្ខខណ្ឌមួយដែលយោធាមីយ៉ាន់ម៉ានៅតែអាចចាត់ចែងគ្រប់គ្រងបានដដែល ហើយអ្វីដែលរបបសឹកយោធាមីយ៉ាន់ម៉ាចង់ឱ្យកើតឡើងនោះគឺជាអ្វីដែលហៅថា៖ “លទ្ធិប្រជាធិបតេយ្យសេរីពហុបក្សប៉ុណ្ណោះ” បើទោះបីជាមានការប្រកួតប្រជែងពីគណបក្សនយោបាយជាច្រើនចូលរួមក៏ដោយ ប៉ុន្តែនឹងមិនមានគណបក្សនយោបាយណាមួយដែលលេចធ្លោខ្លាំងរហូតអាចគ្រប់គ្រងអំណាចផ្តាច់មុខបានឡើយ ដែលអាចនិយាយបានថា វានឹងមិនដូចដែលធ្លាប់កើតឡើងចំពោះគណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) ដែលដឹកនាំដោយលោកស្រី អ៊ុងសាន ស៊ូជី(Aung San Suu Kyi)នាពេលកន្លងមកនោះទេ។

-ការបោះឆ្នោតមីយ៉ាន់ម៉ាអាចបន្ធូរបន្ថយភាពតានតឹង ប៉ុន្តែមិនមែនបន្ធូរបន្ថយជម្លោះនោះទេ៖

លោកសាស្ត្រាចារ្យបណ្ឌិត Dulyapak Preecharat បានបន្តថា ការសិក្សានយោបាយដែលប្រៀបធៀបជាមួយប្រទេសជាច្រើននៅជុំវិញពិភពលោកបានរកឃើញថា ការបោះឆ្នោតអាចជួយបន្ធូរបន្ថយភាពតានតឹង និងផ្តល់អត្ថប្រយោជន៍ដល់គណបក្សនយោបាយក្នុងករណីជាច្រើន។ ដូច្នេះការបោះឆ្នោតនៅមីយ៉ាន់ម៉ានៅចុងឆ្នាំ២០២៥នេះ ក៏នឹងជួយបន្ធូរបន្ថយភាពតានតឹងដែលអូសបន្លាយចាប់តាំងពីរដ្ឋប្រហារខែកុម្ភៈ ឆ្នាំ២០២១ បានខ្លះ ប៉ុន្តែនោះមិនមានន័យថា ជម្លោះនឹងត្រូវបានដោះស្រាយទាំងស្រុងនោះទេ។

លោកបានពន្យល់ថា ប្រសិនបើយើងគិតលើមូលដ្ឋាននៃការបោះឆ្នោតនេះថា ជាការបិទល្បែង (Game) នយោបាយ ដែលអាចបញ្ចប់អ្វីៗបានទាំងអស់នោះ វាមិនអាចទៅរួចទេ ហើយការបោះឆ្នោតក៏មិនមែនជាកត្តាគ្រប់គ្រាន់ដែលជួយដោះស្រាយជម្លោះបានដែរ ពីព្រោះប្រសិនបើចង់បញ្ចប់ជម្លោះពិតមែននោះ គឺនៅមានភារកិច្ចជាច្រើនទៀតដែលត្រូវធ្វើ ទាំងការអភិវឌ្ឍដំណើរការសន្តិភាព និងការដោះស្រាយមូលដ្ឋានបញ្ហានានា ដែលជាឫសគល់នៃបញ្ហាក្នុងប្រទេស។ ប៉ុន្តែការបោះឆ្នោតនេះអាចជាមូលហេតុនៃភាពតានតឹងពីជម្លោះដែលអូសបន្លាយ ហើយក៏នៅមិនទាន់មានអ្នកឈ្នះ-ចាញ់ច្បាស់លាស់ឡើយ ពោលគឺគ្រាន់តែអាចបន្ធូរបន្ថយភាពតានតឹងបានខ្លះប៉ុណ្ណោះ។

-ក្តីសង្ឃឹមរដ្ឋាភិបាលចម្រុះថា ការបោះឆ្នោតនេះនឹងធ្វើឱ្យបក្សប្រឆាំងចុះខ្សោយ៖

លោកសាស្ត្រាចារ្យបណ្ឌិត Dulyapak Preecharat បានបន្តថា អ្វីដែលមេដឹកនាំរបបសឹកយោធាមីយ៉ាន់ម៉ាព្យាករណ៍ពីការបោះឆ្នោតនេះ គឺរំពឹងថា គណបក្សប្រឆាំងនឹងត្រូវបែកខ្ញែកជាពីរ ពោលគឺនឹងមានក្រុមប្រឆាំងមួយចំនួននឹងផ្លាស់ប្តូរចិត្តទទួលស្គាល់ការបោះឆ្នោតនេះនិងមកឈរនៅខាងយោធា ហើយនឹងធ្វើឱ្យបក្សប្រឆាំងដែលនៅសេសសល់កាន់តែចុះខ្សោយ។

លោកថា របបសឹកយោធាចង់បានរដ្ឋាភិបាលចម្រុះ ប៉ុន្តែមិនមែនចម្រុះជាមួយបក្ស (NLD) នោះទេ ពោលគឺអាចចម្រុះជាមួយគណបក្សរួបរួមនិងការអភិវឌ្ឍន៍ (Union Solidarity and Development Party) របស់យោធាចម្រុះជាមួយគណបក្សរបស់ជនជាតិភាគតិច ហើយទទួលស្គាល់ការបោះឆ្នោតតាមបែបប្រជាធិបតេយ្យ ប៉ុន្តែយោធានៅតែគ្រប់គ្រងអំណាចដដែល។

ជាងនេះទៅទៀត លោកថា ប្រសិនបើបក្សប្រឆាំង គឺរដ្ឋាភិបាលបង្រួបបង្រួមជាតិ (NUG) ដែលបានរួមកម្លាំងជាមួយក្រុមប្រដាប់អាវុធជនជាតិភាគតិចមួយចំនួនចង់រារាំងការបោះឆ្នោតនេះ ដោយសារពួកគេមើលឃើញថា ជាមធ្យោបាយមួយដើម្បីជម្រះជាមួយរបបសឹកយោធាដើម្បីរក្សាអំណាចរបស់ខ្លួន ពេលនោះបក្សប្រឆាំងខ្លួនឯងត្រូវតែបង្កើនយុទ្ធសាស្ត្រក្នុងការដណ្តើមកាន់កាប់តំបន់ ឬក្រុងសំខាន់ៗបន្ថែមទៀត មុននឹងឈានដល់ការបោះឆ្នោតនៅដំណាច់ឆ្នាំនេះដើម្បីបង្កើតតំបន់រំដោះ និងកសាងទីក្រុងថ្មីដើម្បីធ្វើជាមជ្ឈមណ្ឌលរដ្ឋបាលរបស់ខ្លួន (រដ្ឋាភិបាលបង្រួបបង្រួមជាតិ-NUG)។

លោកថា ត្រង់ចំណុចទាំងនេះនឹងបង្កើតឱ្យមានអំណាចក្នុងការគ្រប់គ្រងប្រទេសជាពីរប៉ូលដែលប្រកួតប្រជែងគ្នា ពោលគឺប៉ូលមួយស្ថិតនៅក្នុងទីក្រុង Naypyidaw ដែលជារបស់រដ្ឋាភិបាលរបបសឹកយោធាមីយ៉ាន់ម៉ា និងប៉ូលមួយទៀតអាចនឹងស្ថិតនៅទីក្រុង Mandalay ឬក្រុង Magway ដែលភាគីប្រឆាំងដណ្តើមកាន់កាប់បាន និងកំណត់គោលការណ៍អនុវត្តគោលនយោបាយសាធារណៈប្រកួតប្រជែងជាមួយរដ្ឋាភិបាលរបបសឹកយោធា។

បើធ្វើដូច្នេះ វានឹងធ្វើឱ្យភាគីប្រឆាំងមានអំណាចក្នុងការបែងចែកដែនដីអធិបតេយ្យភាពរបស់ខ្លួននៅក្នុងប្រទេសមីយ៉ាន់ម៉ាបាន ហើយនឹងធ្វើឱ្យមានការទទួលស្គាល់នៅលើឆាកអន្តរជាតិកាន់តែខ្លាំងឡើង។ ប៉ុន្តែដែលភាគីប្រឆាំងធ្វើយ៉ាងដូច្នេះទៅបាននោះ គឺត្រូវតែមានសក្ដានុពល និងកម្លាំងខ្លាំងជាងពេលបច្ចុប្បន្នទើបអាចនៅឈរជើងបាន។

សំណួរសួរថា តើរដ្ឋាភិបាលរបបសឹកយោធាមីយ៉ាន់ម៉ានឹងរៀបចំការបោះឆ្នោតនៅចុងឆ្នាំនេះបានជោគជ័យដែរឬទេ ព្រោះរបបសឹកយោធាគ្រប់គ្រងទឹកដីបានត្រឹមតែពាក់កណ្តាលនៃប្រទេសប៉ុណ្ណោះ?។

អ្នកវិភាគនយោបាយរូបនេះ បានបង្ហាញការយល់ឃើញថា ប្រសិនបើរាប់រយៈពេលពីនេះទៅ រហូតដល់ចុងឆ្នាំ២០២៥ ហើយបើគ្មានការលើកកម្ពស់យុទ្ធសាស្ត្រណាមួយពីភាគីប្រឆាំងទេនោះ នឹងមានលទ្ធភាពខ្ពស់ដែលភាគីយោធាអាចរៀបចំការបោះឆ្នោតបានជោគជ័យ។ ប៉ុន្តែទោះជាយ៉ាងណាក៏ដោយ ប្រសិនបើពិនិត្យមើលពីយុទ្ធសាស្ត្រក្នុងការបោះឆ្នោតវិញ ត្រូវបានបែងចែកជា៤ដំណាក់កាល ពោលគឺនៅសប្តាហ៍ទី៣ និងសប្តាហ៍ទី៤ នៃខែធ្នូ ឆ្នាំ២០២៥ និងនៅសប្តាហ៍ទី១ និងសប្តាហ៍ទី២ នៃខែមករា ឆ្នាំ២០២៦។ លោកថា ការបែងចែកការបោះឆ្នោតបែបនេះ គឺជាអ្វីដែលមិនធ្លាប់មានក្នុងប្រវត្តិសាស្ត្រនយោបាយរបស់មីយ៉ាន់ម៉ាឡើយ ហើយក៏គ្មានប្រទេសណាធ្វើបែបនេះដែរ ប៉ុន្តែផ្លូវច្បាប់ក៏គ្មានការហាមប្រាមដែរ។

ដូច្នេះ របបសឹកយោធាមីយ៉ាន់ម៉ារៀបចំការបោះឆ្នោតនេះបានជោគជ័យ ឬមិនជោគជ័យ ដើម្បីត្រួសត្រាយផ្លូវបង្កើតរដ្ឋាភិបាលចម្រុះបាន ឬមិនបាននោះ គឺអាស្រ័យលើភាគីប្រឆាំង បង្កើនការប្រយុទ្ធឬមិនប្រយុទ្ធក្នុងយុទ្ធសាស្ត្ររបស់ខ្លួនប៉ុណ្ណោះ៕

ប្រែសម្រួលដោយភ្នាក់ងារ

លោក មីន អ៊ុងឡាំង ចូលរួមវេទិកាថ្នាក់តំបន់លើកដំបូងក្នុងការដណ្តើមអំណាចជាង៤ឆ្នាំ។ REUTERS

The post [អត្ថបទវិភាគ] ការបោះឆ្នោតរបស់មីយ៉ាន់ម៉ា គឺជាច្រកចេញរបបសឹកយោធាដើម្បីត្រួសត្រាយផ្លូវបង្កើតរដ្ឋាភិបាលចម្រុះ និងការទទួលស្គាល់ appeared first on Kampuchea Thmey Daily.

លោកស្រី ផែថងថាន មេដឹកនាំថៃដំបូងដែលអញ្ជើញ មីន អ៊ុនឡាំង ចូលវេទិកាតំបន់

Rann Reuy — Mon, 07 Apr 2025 03:18:37 +0000

លោកស្រី ផែថងថាន ស៊ីណាវ៉ាត្រា (Paethongtarn Shinawatra) ជានាយករដ្ឋមន្ត្រីថៃដំបូងដែលបានអញ្ជើញមេដឹកនាំរបបសឹកយោធាមីយ៉ាន់ម៉ា លោក មីន អ៊ុងឡាំង (Min Aung Hlaing) ឲ្យចូលរួមកិច្ចប្រជុំកម្រិតតំបន់លើកដំបូង បន្ទាប់ពីលោកស្រីកាន់អំណាចមិនដល់១ឆ្នាំ ខណៈមេដឹកនាំមីយ៉ាន់ម៉ារូបនេះមានបំណងបង្កើនការទទួលស្គាល់មុនការបោះឆ្នោតដែលខ្លួនប្រកាសនៅសល់ប្រហែល៧ខែទៀតប៉ុណ្ណោះ។

ប្រមុខរដ្ឋរបស់របបសឹកមីយ៉ាន់ម៉ាលោក មីន អ៊ុងឡាំង បានចូលរួមវេទិកាតំបន់ជាលើកដំបូង បន្ទាប់ពីដឹកនាំមីយ៉ាន់ម៉ាអស់រយៈពេលជាង៤ឆ្នាំដោយគ្មានការបោះឆ្នោត និងប្រឈមសង្គ្រាមបង្ហូរឈាមដោយសង្គ្រាមស៊ីវិលដ៏ខ្លាំង និងបន្ទាប់ពីប្រទេសនេះរងនៅមហន្តរាយដ៏អាក្រក់បំផុតពីគ្រោះរញ្ជូយដីដ៏មហាបំផ្លិចបំផ្លាញ។

លោកស្រី ផែថងថាន ចាប់ដៃជាមួយ លោក មីន អ៊ុងឡាំង ។ Reuters

វេទិកាតំបន់ (BIMSTEC) ដែលមកពីពាក្យពេញ «គំនិតផ្តួចផ្តើមឈូងសមុទ្របេងហ្គាល់សម្រាប់កិច្ចសហប្រតិបត្តិការបច្ចេកទេសនិងសេដ្ឋកិច្ចពហុវិស័យ (Bay of Bengal Initiative for Multi-Sectoral Technical and Economic Cooperation)» គឺជាវេទិកាធំមួយសម្រាប់ប្រទេសភាគច្រើននៅអាស៊ីខាងត្បូងនិងអាស៊ីអាគ្នេយ៍ពីប្រទេស រួមមានសមាជិកចំនួន៧ ប្រទេស ដូចជា បង់ក្លាដែស ប៊ូតាន ឥណ្ឌា មីយ៉ាន់ម៉ា នេប៉ាល់ ស្រីលង្កា និងថៃ។

សារព័ត៌មាន nationtv របស់ថៃ បានដកស្រង់ការលើកឡើងរបស់អ្នកជំនាញផ្នែកវិទ្យាសាស្ត្រនយោបាយថៃ ដែលបានព្រមាននាយករដ្ឋមន្ត្រី ផែថងថាន ស៊ីណាវ៉ាត្រា (Paethongtarn Shinawatra) ឱ្យនៅឆ្ងាយពីមេដឹកនាំរបបសឹកយោធាមីយ៉ាន់ម៉ា លោក មីន អ៊ុងឡាំង (Min Aung Hlaing) នៅអំឡុងកិច្ចប្រជុំកំពូលមេដឹកនាំប្រទេសសមាជិក «BIMSTEC» ដោយខ្លាចក្រែងមានការបកស្រាយ ឬយល់ថា មេដឹកនាំថៃផ្តល់ភាពសំខាន់ចំពោះរបបសឹកយោធាមីយ៉ាន់ម៉ា។

កាលពីថ្ងៃទី២ខែមេសា ឆ្នាំ២០២៥ អ្នកជំនាញផ្នែកវិទ្យាសាស្ត្រនយោបាយថៃ លោកសាស្ត្រាចារ្យបណ្ឌិត Dulyapak Preecharat ប្រធានសមាគមសិក្សាក្នុងតំបន់ និងជាសាស្រ្តាចារ្យប្រចាំនៅនាយកដ្ឋានសិក្សាអាស៊ីអាគ្នេយ៍ នៃសាកលវិទ្យាល័យធម្មសាស្ត្របានលើកឡើងថា អ្វីដែលត្រូវតាមដានក្នុងកិច្ចប្រជុំកំពូលមេដឹកនាំប្រទេសសមាជិក «BIMSTEC» កាលពីថ្ងៃទី ២-៤ ខែមេសា ឆ្នាំ២០២៥នៅទីក្រុងបាងកក គឺជាដំណើរទស្សនកិច្ចមកកាន់ប្រទេសថៃជាផ្លូវការជាលើកដំបូងរបស់លោក មីន អ៊ុងឡាំង។

ប្រមុខរដ្ឋថៃ ឥណ្ឌា និងមីយ៉ាន់ម៉ា ក្នុងកិច្ចប្រជុំកាលពីសប្តាហ៍មុន។ Reuters

ការលើកឡើងរបស់អ្នកជំនាញនយោបាយ បានបន្ថថា៖«មេដឹកនាំរដ្ឋាភិបាលរបបសឹកយោធាមីយ៉ាន់ម៉ា ដែលភាគីជាច្រើនមើលឃើញថា នេះគឺជាសកម្មភាពមួយដើម្បីបង្ហាញ និងទាមទារឱ្យមានការទទួលស្គាល់ភាពស្របច្បាប់របស់ខ្លួនតាមរយៈសហគមន៍អន្តរជាតិ នៅមុនពេលដែលមីយ៉ាន់ម៉ារៀបចំការបោះឆ្នោតនៅចុងឆ្នាំ២០២៥នេះ»។

អ្នកជំនាញរូបនេះបានបន្តថា បើទោះបីជាកិច្ចប្រជុំកំពូល «BIMSTEC» ដែលមានប្រទេសជាសមាជិកចំនួន៧គឺ៖ បង់ក្លាដែស ប៊ូតាន ឥណ្ឌា មីយ៉ាន់ម៉ា នេប៉ាល់ ស្រីលង្កា និងថៃ មានគោលបំណងដើម្បីពង្រឹងកិច្ចសហប្រតិបត្តិការសេដ្ឋកិច្ចអន្តរជាតិដែលតភ្ជាប់ទៅឈូងសមុទ្រ “Bengal” ក៏ដោយ ប៉ុន្តែអ្វីដែលនាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រា (Paetongtarn Shinawatra) គួរផ្តល់ភាពសំខាន់ខ្លាំងនោះ គឺការរក្សាគម្លាតនិងសកម្មភាពការទូតជាមួយលោក មីន អ៊ុងឡាំង ពីព្រោះប្រសិនបើមានលេចធ្លាយរូបភាព នាយករដ្ឋមន្ត្រីថៃជួបជជែកជាមួយលោក មីន អ៊ុងឡាំង ក្នុងលក្ខណៈស្និទ្ធស្នាលនិងជាឯកជននោះ វានឹងធ្វើឱ្យប្រទេសជាច្រើនបកស្រាយថា នាយករដ្ឋមន្ត្រីថៃផ្តល់ភាពសំខាន់និងទទួលស្គាល់មេដឹកនាំរបបសឹកយោធាមីយ៉ាន់ម៉ារូបនេះ។

លោកសាស្ត្រាចារ្យបណ្ឌិត Dulyapak Preecharat ត្រូវបានស្រង់សម្តីដោយសារព័ត៌មានថៃ The Nations ដូចបាននិយាយថា៖«ក្នុងឱកាសនេះ ការជួបជជែកគ្នាជាមួយមេដឹកនាំប្រទេសផ្សេងៗទៀត ឬថតរូបជាមួយលោក មីន អ៊ុងឡាំង ដោយបង្ហាញពីការព្រួយបារម្ភចំពោះការគ្រប់គ្រងគ្រោះមហន្តរាយក្នុងប្រទេសមីយ៉ាន់ម៉ា ឬសម្តែងការអរគុណទាក់ទងនឹងការដោះលែងក្រុមអ្នកនេសាទថៃ៤នាក់ថ្មីៗនេះ គឺជារឿងដែលគួរធ្វើទៅបាន ប៉ុន្តែត្រូវមានការប្រុងប្រយ័ត្នមិនគួរបង្ហាញការគាំទ្រដំណើរការបោះឆ្នោតនៅមីយ៉ាន់ម៉ាច្បាស់ពេកនោះទេ។ ក្រៅពីនេះ ប្រសិនបើលោក មីន អ៊ុងឡាំង ចូលរួមកិច្ចប្រជុំនេះតាមរយៈប្រព័ន្ធអនឡាញពីចម្ងាយ ក៏ជាការល្អផងដែរ ដែលបានកាត់បន្ថយរូបភាពឈុតឆាកជួបជជែកគ្នាដែលអាចមានជ្រុងមួយចំនួនត្រូវបានប្រព័ន្ធផ្សព្វផ្សាយអន្តរជាតិយកទៅធ្វើការបកស្រាយ ឬយល់ថា រដ្ឋាភិបាលថៃអាចនឹងផ្តល់ការគាំទ្ររដ្ឋាភិបាលរបបសឹកយោធាមីយ៉ាន់ម៉ា»។

អ្នកជំនាញរូបនេះបានបន្ថែមថា រដ្ឋាភិបាលថៃគួរប្រើឱកាសកិច្ចប្រជុំ “BIMSTEC” ដែលប្រទេសថៃធ្វើជាម្ចាស់ផ្ទះលើកនេះ ដើម្បីលើកកម្ពស់មុខមាត់របស់ប្រទេសថៃក្នុងឋានៈជាអ្នកតភ្ជាប់ទំនាក់ទំនងរវាងអាស៊ាននិងតំបន់អាស៊ីខាងត្បូង តាមរយៈការបង្ហាញខ្លួនជាតួអង្គសំខាន់ក្នុងការដោះស្រាយវិបត្តិក្នុងប្រទេសមីយ៉ាន់ម៉ា ហើយក៏ជាឱកាសល្អដើម្បីនាំយកគោលនយោបាយរបស់ខ្លួនទៅកាន់ប្រទេសលោកខាងលិចជាថ្មីម្តងទៀតផងដែរ។

លោកថា ថៃគួរតែប្រើវេទិកានេះ ដើម្បីពង្រឹងទំនាក់ទំនងរវាងថៃជាមួយឥណ្ឌា ហើយយើងក៏ត្រូវតែមានគោលនយោបាយលោកខាងលិចផងដែរ ដែលនឹងផ្តោតលើយុទ្ធសាស្ត្រនេះឱ្យកាន់តែខ្លាំងក្លាឡើង។ លើសពីនេះ ឥណ្ឌាក្រោមការដឹកនាំរបស់លោកនាយករដ្ឋមន្ត្រី Narendra Modi បានប្រកាសយ៉ាងច្បាស់នៅមុនពេលបោះឆ្នោតថា ឥណ្ឌាចង់ចូលមកគ្រប់គ្រងការអភិវឌ្ឍដោយសន្តិវិធីនៅក្នុងប្រទេសមីយ៉ាន់ម៉ា។ ដូច្នេះរដ្ឋាភិបាលថៃគួរតែចរចារអំពីគោលនយោបាយលោកខាងលិចព្រមគ្នាជាមួយនឹងការដើរតួនាទីជាអ្នកសម្របសម្រួលដំណើរសន្តិភាពនៅក្នុងប្រទេសមីយ៉ាន់ម៉ា៕

ដោយ ភ្នាក់ងារ

The post លោកស្រី ផែថងថាន មេដឹកនាំថៃដំបូងដែលអញ្ជើញ មីន អ៊ុនឡាំង ចូលវេទិកាតំបន់ appeared first on Kampuchea Thmey Daily.

សង្គ្រាម​មីយ៉ាន់ម៉ា Archives - Kampuchea Thmey Daily

​​របបយោធា​មីយ៉ាន់ម៉ា ​វាយ​បក​ទៅ​អន្តរជាតិ​​ចំពោះការ​រិះគន់​ការ​​បោះ​ឆ្នោត​​​

​ប្រធានាធិបតីស្តីទី​មីយ៉ាន់​ម៉ា Myint Swe មរណភាព​ក្នុង​វ័យ​​៧៤​ឆ្នាំ​

​ទាហាន​​យោធា​មីយ៉ាន់ម៉ា​៦២​នាក់បាក់​ទ័ព​​ រត់ចូល​ទឹកដីថៃ​​ ​មានទាំង​របួស​និងស្លាប់ច្រើន​​ទៀត​

​ប្រជាជនមីយ៉ាន់​ម៉ា​៤០០​នាក់​ភៀសខ្លួន​ចូល​ទឹកដីថៃ ខណៈ​​ការ​ប្រយុទ្ធ​គ្នា​ក្បែរព្រំដែន​កើន​ឡើង​

​អាមេរិក​ដាក់​ទណ្ឌកម្មមេទ័ព​រំដោះ​ជាតិការ៉ែន​មីយ៉ាន់​ម៉ា ពាក់ព័ន្ធ​​​កាង​ឧក្រិដ្ឋកម្ម​​អនឡាញ​