សមិទ្ធផលខេត្តត្បូងឃ្មុំ Archives - Kampuchea Thmey Daily

ខេត្តត្បូងឃ្មុំជាប់លេខ ១ មានផ្ទៃដីដាំដុះដំណាំកៅស៊ូច្រើនជាងគេទូទាំងប្រទេស

Dy Bunnara — Thu, 28 May 2026 08:19:38 +0000

ខេត្តត្បូងឃ្មុំជាខេត្តដីក្រហមមានសក្តានុពលលើការដាំដុះដំណាំកសិឧស្សាហកម្ម។ ខេត្តដែលទើបបង្កើតថ្មី បំបែកចេញពីខេត្តកំពង់ចាមកាលពីឆ្នាំ ២០១៣ មានផ្ទៃដីដាំដុះដំណាំកៅស៊ូប្រមាណជាង ៨ ម៉ឺនហិកតា គឺច្រើនជាងបណ្តាខេត្តផ្សេងទៀតទូទាំងប្រទេស។ នេះបើតាមរបាយការណ៍របស់រដ្ឋបាលខេត្តត្បូងឃ្មុំ។

លោក ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំបានឲ្យដឹងថា ខេត្តត្បូងឃ្មុំជាខេត្តមួយសម្បូរទៅដោយដីក្រហម ជាប្រភេទដីមានជីជាតិសម្រាប់ដំណាំកសិ-ឧស្សាហកម្ម ជាពិសេសកៅស៊ូដែលមានប្រវត្តិដាំជាងមួយសតវត្ស។

លោកថា ខេត្តនៅតំបន់ខ្ពស់រាបភាគបូព៌ានេះមានសក្តានុលលើការដាំដុះដំណាំកៅស៊ូ ខណៈផ្ទៃដីដាំដុះកៅស៊ូក៏មានចំនួនច្រើនជាងគេមកដល់បច្ចុប្បន្ននេះ។

ជាក់ស្តែងផ្ទៃដីដំណាំកៅស៊ូក្នុងខេត្តមានប្រមាណ ៨៨,១៤៥ ហិកតា ដែលក្នុងនោះកៅស៊ូគ្រួសារមានប្រមាណជា ៦៦% នៃផ្ទៃដីសរុប។

ក្រៅពីមានផ្ទៃដីអំណោយផល ផលកៅស៊ូដាំក្នុងខេត្តដីក្រហមនេះក៏ទទួលបានទិន្នផលល្អប្រសើរដោយទទួលបានរង្វង់ ១,៥ តោន/ហិកតា ធៀបនឹងខេត្តផ្សេងទៀតដែលទិន្នផលកៅស៊ូទទួលបានប្រមាណ ១,១ ឬ ១,៣ តោន/ហិកតា។

លោក ប៉ែន កុសល្យ បានបញ្ជាក់ថា ក្នុងឆ្នាំ២០២៥ ខេត្តត្បូងឃ្មុំមានផ្ទៃដីកៅស៊ូចៀរជ័រប្រមាណ ៦៦ ០៣៦ ហិកតា ជាមួយបរិមាណផលជ័រកៅស៊ូប្រមាណ ៩៩ ០៥៤ តោន ដែលចាក់បញ្ចូលក្នុងតម្លៃសេដ្ឋកិច្ចបានប្រមាណ ១៧៦ លានដុល្លារអាមេរិក។

ខេត្តត្បូងឃ្មុំមានអំណោយផលដល់ការបើករោងចក្រ ដោយសារមានផ្ទៃដីធំទូលាយ រួមទាំងមានច្រកព្រំដែន និងកំពង់ផែទឹកសាប (ទន្លេបិទ) សម្រាប់ការដឹកជញ្ជូនបានងាយស្រួល។

កាលពីពេលថ្មីៗនេះ ខេត្តក៏ទទួលបានការវិនិយោគសាងសង់រោងចក្រផលិតកែច្នៃកៅស៊ូរបស់ក្រុមហ៊ុន គីមស៍ រ៉ាប់ប៊ើរ ក្រោមទុនវិនិយោគប្រមាណ ៣០ លានដុល្លារ ដែលមានសមត្ថភាពផលិតជ័រកៅស៊ូ ១០ ម៉ឺនតោនក្នុងមួយឆ្នាំ។

ថ្លែងនៅក្នុងពិធីសម្ពោធរោងចក្រផលិតកែច្នៃកៅស៊ូរបស់ក្រុមហ៊ុន គីមស៍ រ៉ាប់ប៊ើរ (ខេមបូឌា) នៅខេត្តត្បូងឃ្មុំ សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជាបានមើលឃើញថា ការសម្រេចវិនិយោគសាងសង់រោងចក្រផលិតកែច្នៃជ័រកៅស៊ូធំទំនើបរបស់ក្រុមហ៊ុន គីមស៍ រ៉ាប់ប៊ើរ (ខេមបូឌា) ដែលជាបុត្រសម្ព័ន្ធរបស់ក្រុមហ៊ុន Mainland Group បានរួមចំណែកយ៉ាងសំខាន់ក្នុងការលើកកម្ពស់វិស័យដំណាំកៅស៊ូនៅកម្ពុជា។

សម្តេចធិបតីបានគូសបញ្ជាក់ថា តាមរយៈរោងចក្រផលិតកែច្នៃជ័រកៅស៊ូកម្រិតអន្តរជាតិនេះ នឹងជួយពង្រីកទីផ្សារជ័រកៅស៊ូក្នុងប្រទេសកម្ពុជា បង្កើតការងារ និងកាត់បន្ថយការពឹងផ្អែកលើឈ្មួញកណ្តាល។ ជាក់ស្ដែង ចំណូលសរុបពីការលក់ផលិតផលកៅស៊ូក្នុងឆ្នាំ ២០២៥ មានប្រមាណ ៨៣៣ លានដុល្លារ ដែលមានការកើនឡើងប្រមាណ ២៤% ធៀបនឹងឆ្នាំ២០២៤ ខណៈចំណូលពីការលក់ក្នុងស្រុកមានទំហំប្រមាណ ២២៣ លានដុល្លារ កើនឡើងរហូតដល់ ១៣១% ដែលឆ្លើយតបនឹងគោលដៅបំពេញតម្រូវការផលិតកម្មក្នុងស្រុកជាជាងការនាំចេញវត្ថុធាតុដើម៕

The post ខេត្តត្បូងឃ្មុំជាប់លេខ ១ មានផ្ទៃដីដាំដុះដំណាំកៅស៊ូច្រើនជាងគេទូទាំងប្រទេស appeared first on Kampuchea Thmey Daily.

រោងចក្រកែច្នៃជ័រកៅស៊ូតម្លៃ ៣០ លានដុល្លារ បើកដំណើរការនៅខេត្តត្បូងឃ្មុំ

deth leng — Wed, 27 May 2026 02:54:51 +0000

រោងចក្រផលិតកែច្នៃកៅស៊ូរបស់ក្រុមហ៊ុន គីមស៍ រ៉ាប់ប៊ើរ តម្លៃ ៣០ លានដុល្លារ សាងសង់នៅលើផ្ទៃដីជិត ១៥ ហិកតា និងមាសមត្ថភាពផលិត ១០ ម៉ឺនតោ ក្នុងមួយឆ្នាំ បើកសម្ពោធដាក់ឱ្យដំណើរការនៅព្រឹកថ្ងៃទី ២៧ ឧសភា ២០២៦ នៅស្រុកត្បូងឃ្មុំ ខេត្តត្បូងឃ្មុំ។

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ នៅក្នុងពិធីសម្ពោធរោងចក្រ គីមស៍ រ៉ាប់ប៊ើរថា ការសម្រេចវិនិយោគ សាងសង់រោងចក្រផលិតកែច្នៃជ័រកៅស៊ូនេះ បានឆ្លុះបញ្ចាំងអំពីសារសំខាន់ នៃកត្តាសុខសន្តិភាពដែលជាមូលដ្ឋានគ្រឹះ នៃការអភិវឌ្ឍន៍សង្គម សេដ្ឋកិច្ចជាតិឱ្យរីកចម្រើនឆាប់រហ័ស ព្រមទាំងបង្ហាញពីទំនុកចិត្ត និងភាពជឿជាក់របស់វិនិយោគិនទាំងខ្មែរ និងបរទេសមកលើបរិយាកាសធុរកិច្ចអំណោយផលរបស់កម្ពុជា។

ក្រុមហ៊ុន គីមស៍ រ៉ាប់ប៊ើរ បានបោះទុនវិនិយោគ ៣០ លានដុល្លារ សាងសង់រោងចក្រផលិតកែច្នៃជ័រកៅស៊ូ នៅលើផ្ទៃដីជិត ១៥ ហិកតា និងមាសមត្ថភាពផលិតជ័រកៅស៊ូ ១០ ម៉ឺនតោ ក្នុងមួយឆ្នាំ ព្រមទាំងផ្ដល់ការងារផ្ទាល់ប្រមាណ ៣០០ កន្លែង និងការងារប្រយោលប្រមាណជាង ៥ ម៉ឺននាក់។

សម្ដេច ហ៊ុន ម៉ាណែត បានបញ្ជាក់ថា នៅក្នុងឆ្នាំ ២០២៥ ចំណូលសរុបបានពីការលក់ផលិតផលជ័រកៅស៊ូចំនួន ៨៣៣ លានដុល្លារ កើនឡើងប្រមាណ ២៤% ធៀបនឹងឆ្នាំ ២០២៤ មួយផ្នែកដោយសារតម្លៃកៅស៊ូកើនឡើង និងផ្ទៃដីកើន។

សម្រាប់ចំណូលពីការនាំចេញប្រមាណ ៦០៤ លានដុល្លារ ថយចុះ ៩,១% ប៉ុន្តែចំណូលពីការលក់ជ័រកៅស៊ូក្នុងស្រុក ប្រមាណ ២២៣ លានដុល្លារ កើនឡើង ១៣១% ពោលគឺលក់ក្នុងស្រុកដើម្បីបំពេញតម្រូវការ ច្រើនជាងនាំចេញ។

សម្ដេច ហ៊ុន ម៉ាណែត បន្ថែមថា ការអភិវឌ្ឍន៍វិស័យកសិកម្ម ដំបូងឡើយគឺការផលិត និងនាំចេញនូវត្ថុធាតុដើម បន្ទាប់មកគឺការនាំចេញផលិតផលពាក់កណ្ដាលសម្រេច និងផលិតផលសម្រេច ដែលជំរុញឱ្យមានកសិឧស្សាហកម្ម ដែលនេះគឺជាគោលដៅសំខាន់ណាស់ ដើម្បីរក្សាតម្លៃបន្ថែមនៅក្នុងប្រទេស។

សម្ដេច ហ៊ុន ម៉ាណែត បញ្ជាក់ថា៖ «បើយើងផលិតនាំចេញតែវត្ថុធាតុដើមទៅក្រៅ ទៅដល់ប្រទេសផ្សេងគេយកទៅ វៃក្នុង កែច្នៃមួយចំនួន ច្រកបៅវៃផ្លាក ស្រុកគេ តម្លៃវាទៅដល់នោះ អញ្ចឹងផល និងតម្លៃទៅដល់កសិករក៏វាតិច តែបើយើងរក្សានៅក្នុងស្រុករបស់យើង តាមរយៈការកែច្នៃជាវត្ថុពាក់កណ្ដាលសម្រេច ឬផលិតផលសម្រេច គឺជាគោលដៅធំសម្រាប់យើង ហើយបើយើងអាចជំរុញការកែច្នៃឱ្យបាននៅនឹងកន្លែង មិនត្រឹមតែ កសិកម្មទេ គឺកសិឧស្សាហកម្ម បានន័យថា មិនមែនតែកសិករ ឬមួយម្ចាស់ចម្ការ ម្ចាស់ស្រែនោះទេ ប៉ុន្តែអ្នកដែលធ្វើការនៅក្នុងរោងចក្រកែច្នៃ បង្កើតការងារដឹកជញ្ជូនផ្សេងៗ គឺជាខ្សែច្រវាក់ផលិតកម្មដែលយើងចង់បាន»។

លោក ម៉ែន សុភក្តិ ប្រធានសមាគមអភិវឌ្ឍន៍កៅស៊ូ ប្រាប់កម្ពុជាថ្មីថា ថ្វីត្បិតស្ថានភាពសេដ្ឋកិច្ច នយោបាយ នៅលើពិភពលោកជួបបញ្ហា ប៉ុន្តែការនាំចេញនៅក្នុងវិស័យកៅស៊ូកម្ពុជា បន្តមានស្ថិរភាពល្អ ខណៈតម្លៃក៏បានខ្ពស់គួរសម ឆ្លុះបញ្ចាំងពីការរក្សាបាននូវស្ថិរភាពទីផ្សារតម្លៃជ័រកៅស៊ូ។

យោងតាមក្រសួងកសិកម្ម រុក្ខាប្រមាញ់ និងនេសាទ គិតមកដល់ពេលនេះ កម្ពុជាមានផ្ទៃដីដាំដុះកៅស៊ូជិត ៤៥ ម៉ឺន ហិកតា ផ្ដល់ទិន្នផលប្រមាណ ៤២ ម៉ឺនតោន ក្នុងមួយឆ្នាំ ដែលពីមុនជ័រកៅស៊ូមានការនាំចេញទាំងស្រុង ខណៈបច្ចុប្បន្ន កម្ពុជាមានលទ្ធភាពកែច្នៃ និងលក់ក្នុងស្រុក៕

អត្ថបទ៖ ឡេង ដេត

The post រោងចក្រកែច្នៃជ័រកៅស៊ូតម្លៃ ៣០ លានដុល្លារ បើកដំណើរការនៅខេត្តត្បូងឃ្មុំ appeared first on Kampuchea Thmey Daily.

ផ្លូវជនបទប្រវែងជិត ៣០០ គីឡូម៉ែត្រផ្លាស់ប្តូរមុខមាត់ជនបទខេត្តក្រចេះ កំពង់ចាម ត្បូងឃ្មុំ កាន់តែរីកចម្រើន

Dy Bunnara — Sat, 14 Feb 2026 04:03:13 +0000

ផ្លូវជនបទប្រវែងជិត ៣០០ គីឡូម៉ែត្រ ត្រូវបានស្ថាបនាលើកកម្ពស់ជាផ្លូវកៅស៊ូគ្របណ្តប់លើខេត្តចំនួន ៣ មានខេត្តក្រចេះ កំពង់ចាម និងខេត្តត្បូងឃ្មុំ។

លោកជំទាវ ឡាយ វីរៈបុត្រ អនុរដ្ឋលេខាធិការក្រសួងអភិវឌ្ឍន៍ជនបទកាលពីពេលថ្មីៗនេះ បានដឹកនាំក្រុមការងារបច្ចេកទេសចុះតាមដាន ត្រួតពិនិត្យ និងវាយតម្លៃវឌ្ឍនភាពគម្រោងកែលម្អការតភ្ជាប់ហេដ្ឋារចនាសម្ព័ន្ធផ្លូវថ្នល់ (RCIP) ដែលស្ថិតនៅក្នុងខេត្តចំនួន ៣ ដែលសម្រេចបានលទ្ធផលដូចខាងក្រោម៖

1. ខេត្តកំពង់ចាម (CW2): មានចំនួន ៧ ខ្សែ ប្រវែងសរុប ៧៥,៣០ គ.ម សម្រេចបាន ១០០%។

2. ខេត្តត្បូងឃ្មុំ (CW3): មានចំនួន ៦ ខ្សែ ប្រវែងសរុប ៧៦,៧៤ គ.ម សម្រេចបាន ៩៣,៩៤%។

3. ខេត្តក្រចេះ (CW1-Lot2): មានចំនួន ៦ ខ្សែ ប្រវែងសរុប ៥៨,៣០គ.ម សម្រេចបាន ៩០,២៤% និង ខេត្តក្រចេះ (CW1-Lot1) : មានចំនួន ៨ ខ្សែ ប្រវែងសរុប ៧២,៩០ គ.ម សម្រេចបាន ២៧% ។

បន្ទាប់ពីបានចុះពិនិត្យវឌ្ឍនភាពការងាររួចមក មន្រ្តីក្រសួងអភិវឌ្ឍន៍ជនបទ និងក្រុមការងារបេសកកម្មរបស់ធនាគារពិភពលោក (WB) បានផ្តល់ការណែនាំមួយចំនួនលើចំណុចខ្វះខាតដល់ក្រុមហ៊ុនទទួលការសាងសង់ សំដៅធានាបានប្រសិទ្ធភាព និងការអនុវត្តគម្រោងឲ្យទាន់ផែនការដែលបានគ្រោងទុក៕

The post ផ្លូវជនបទប្រវែងជិត ៣០០ គីឡូម៉ែត្រផ្លាស់ប្តូរមុខមាត់ជនបទខេត្តក្រចេះ កំពង់ចាម ត្បូងឃ្មុំ កាន់តែរីកចម្រើន appeared first on Kampuchea Thmey Daily.

ផ្លូវលំជនបទ ៩ ខ្សែ ប្រវែងជាង ៧០ គ.ម ក្នុងខេត្តត្បូងឃ្មុំ លើកកម្ពស់ពីផ្លូវដី ស្ថាបនាប្រែក្លាយជាផ្លូវកៅស៊ូ

Dy Bunnara — Tue, 25 Nov 2025 02:56:07 +0000

ខ្សែផ្លូវជនបទចំនួន ៩ ខ្សែ ដែលមានប្រវែងសរុប ៧០,៤គ.ម បានស្ថាបនារួចរាល់ តាមរយៈគម្រោងកែលម្អការតភ្ជាប់ហេដ្ឋារចនាសម្ព័ន្ធផ្លូវថ្នល់ (RCIP) ដែលផ្តល់ផលយោជន៍ដោយផ្ទាល់ដល់ប្រជាពលរដ្ឋចំនួន ១២ ឃុំក្នុងខេត្តត្បូងឃ្មុំ។

លោកស្រី ហូ សុវណ្ណិកា រដ្ឋលេខាធិការ និងជានាយកគម្រោងបានគូសបញ្ជាក់ថា គម្រោងកែលម្អការតភ្ជាប់ហេដ្ឋារចនាសម្ព័ន្ធផ្លូវថ្នល់ (RCIP) ទទួលបានថវិកាហិរញ្ញប្បទានឥណទានពីធនាគារពិភពលោក ដែលអនុវត្តដោយក្រសួងចំនួន ២ គឺ៖ ក្រសួងសាធារណៈការនិងដឹកជញ្ជូន និងក្រសួងអភិវឌ្ឍន៍ជនបទ ក្នុងរយៈពេល ៩ ឆ្នាំ (ឆ្នាំ២០២០-២០២៩) សម្រាប់ធ្វើការកែលម្អផ្លូវជាតិ ផ្លូវខេត្ត និងផ្លូវជនបទ។ ក្នុងនោះក្រសួងអភិវឌ្ឍន៍ជនបទត្រូវសាងសង់ផ្លូវក្រាលកៅស៊ូពីរជាន់ (DBST) និងផ្លូវក្រាលបេតុង ដែលមានប្រវែងសរុប ២៧៧ គ.ម ស្ថិតក្នុងខេត្តគោលដៅចំនួន ៣ រួមមាន ខេត្តកំពង់ចាម ត្បូងឃ្មុំ និងខេត្តក្រចេះ។

ក្នុងពិធីសម្ពោធដាក់ឲ្យប្រើប្រាស់ខ្សែផ្លូវជនបទចំនួន ៩ ខ្សែ រួមទាំងពិធីបើកការដ្ឋានសាងសង់ផ្លូវជនបទប្រវែង ៦,៣០ គ.ម ក្នុងខេត្តត្បូងឃ្មុំ លោក ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទបានលើកឡើងអំពីគោលនយោបាយអភិវឌ្ឍន៍ជនបទ ដែលមានចក្ខុវិស័យ “កសាងសង្គមជនបទកម្ពុជាឱ្យមានវិបុលភាពប្រកបដោយបរិយាបន្ន និងចីរភាពទាំងផ្នែកសេដ្ឋកិច្ច សង្គមកិច្ច និងវប្បធម៌” ក្នុងនោះក្រសួងកំពុងយកចិត្តទុកដាក់លើការលើកកម្រិតគុណភាពហេដ្ឋារចនាសម្ព័ន្ធ និងគមនាគមន៍ជនបទដូចពាក្យស្លោក “មានផ្លូវគឺមានក្តីសង្ឃឹម”។

ជាក់ស្ដែង ពិធីសម្ពោធដាក់ឱ្យប្រើប្រាស់ជាផ្លូវការខ្សែផ្លូវជនបទចំនួន ៩ ខ្សែ ដែលមានប្រវែងសរុប ៧០,៤គ.ម ដែលផ្តល់ផលយោជន៍ដោយផ្ទាល់ដល់ប្រជាពលរដ្ឋចំនួន ១២ ឃុំ សរុបចំនួន ១៧៤ ៦១០ នាក់ ស្មើជាង ១៥ ០០០ គ្រួសារ តាមរយៈការជួយគាំទ្រ និងសម្រួលដល់ការប្រកបការងារប្រចាំថ្ងៃ ចំណេញពេលវេលា និងថវិកា ជាពិសេសធានាបាននូវការប្រើប្រាស់ផ្លូវបានគ្រប់រដូវកាល។

បន្ថែមពីនេះក៏បានបើកការដ្ឋានសាងសង់ផ្លូវ ១ ខ្សែ ប្រវែង ៦,៣០គ.ម បន្ថែមទៀត ដែលនឹងផ្តល់ផលប្រយោជន៍ដល់ប្រជាជនចំនួន ២ ០២០គ្រួសារ ស្មើនឹងប្រជាជនសរុបជិត ១ ម៉ឺននាក់ ក្នុងភូមិចំនួន ១០ នៃឃុំគងជ័យ ស្រុកអូររាំងឪ ខេត្តត្បូងឃ្មុំ។

ពិធីសម្ពោធដាក់ឱ្យប្រើប្រាស់ជាផ្លូវការផ្លូវជនបទចំនួន ៩ ខ្សែនៅក្នុងខេត្តត្បូងឃ្មុំ និងពិធីបើកការដ្ឋានសាងសង់ផ្លូវជនបទប្រវែង ៦, ៣០គ.ម បានធ្វើឡើងកាលពីម្សិលមិញនេះក្រោមវត្តមានលោក ឆាយ ឫទ្ធិសែន រដ្ឋមន្ដ្រីក្រសួងអភិវឌ្ឍន៍ជនបទ លោក អ៊ាង សុផល្លែត រដ្ឋមន្រ្តីក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ ប្រធានក្រុមប្រឹក្សាខេត្ត អភិបាលនៃគណៈអភិបាលខេត្តត្បូងឃ្មុំ មន្រ្តីពាក់ព័ន្ធរួមទាំងតំណាងមកពីធនាគារពិភពលោក៕

The post ផ្លូវលំជនបទ ៩ ខ្សែ ប្រវែងជាង ៧០ គ.ម ក្នុងខេត្តត្បូងឃ្មុំ លើកកម្ពស់ពីផ្លូវដី ស្ថាបនាប្រែក្លាយជាផ្លូវកៅស៊ូ appeared first on Kampuchea Thmey Daily.

ខេត្តចំនួន ៣ ទទួលបានការកែលម្អផ្លូវជនបទប្រវែងជាង ២៧៧ គីឡូម៉ែត្រ សម្រេចបាន ៥៣%

Dy Bunnara — Mon, 30 Jun 2025 03:59:55 +0000

“មានផ្លូវ មានសង្ឃឹម” ក្រសួងអភិវឌ្ឍន៍ជនបទ បានកំពុងស្ថាបនានិងកែលម្អផ្លូវជនបទប្រវែងជាង ២៧៧ គីឡូម៉ែត្រ ស្ថិតក្នុងខេត្តគោលដៅចំនួន ៣ រួមមាន៖ ខេត្តកំពង់ចាម ត្បូងឃ្មុំ និងក្រចេះ គិតមកដល់ពេលនេះ វឌ្ឍនភាពនៃការងារស្ថាបនាផ្លូវសម្រេចបានប្រមាណ ៤៦%។

ក្រសួងអភិវឌ្ឍន៍ជនបទបានបង្ហាញលទ្ធផលការងារគម្រោងកែលម្អស្ថាបនាផ្លូវជនបទ ចាប់ពី ឆ្នាំ២០២១ ដល់ ឆ្នាំ២០២៩ គិតត្រឹមដំណាក់កាលវាយតម្លៃពាក់កណ្តាលការអនុវត្តគម្រោង ផ្លូវជនបទចំនួន ២៨ ខ្សែ មានប្រវែងសរុបជាង ២៧៧ គ.ម ស្ថិតក្នុងខេត្តគោលដៅចំនួន៣ រួមមាន ខេត្តកំពង់ចាម ត្បូងឃ្មុំ និងក្រចេះ ការអនុវត្តគម្រោងសម្រេចបានប្រមាណ ៥៣.១១% ក្នុងនោះការងារស្ថាបនាផ្លូវសម្រេចបានប្រមាណ ៤៦%។

គម្រោងកែលម្អការតភ្ជាប់ផ្លូវថ្នល់ (Road Connectivity Improvement Project) មានគោលបំណងសំខាន់ក្នុងការកែលម្អផ្លូវជនបទ ដោយបង្កើនភាពធន់ ជាមួយការប្រែប្រួលអាកាសធាតុ និងធានាការទទួលបាន សេវាសេដ្ឋកិច្ច និងការអភិវឌ្ឍន៍ធនធានមនុស្ស ដើម្បីអភិវឌ្ឍន៍សេដ្ឋកិច្ចតំបន់ជនបទ និងកែលម្អជីវភាពរបស់ប្រជាជនឱ្យកាន់តែល្អប្រសើរ៕

default

The post ខេត្តចំនួន ៣ ទទួលបានការកែលម្អផ្លូវជនបទប្រវែងជាង ២៧៧ គីឡូម៉ែត្រ សម្រេចបាន ៥៣% appeared first on Kampuchea Thmey Daily.

សមិទ្ធផលខេត្តត្បូងឃ្មុំ Archives - Kampuchea Thmey Daily

ខេត្ត​ត្បូង​ឃ្មុំ​ជាប់​លេខ ១ មានផ្ទៃដី​ដាំ​ដុះ​ដំណាំ​កៅស៊ូ​ច្រើន​ជាង​គេ​ទូទាំង​ប្រទេស

​រោងចក្រ​កែច្នៃ​ជ័រកៅស៊ូ​តម្លៃ ​៣០ ​លានដុល្លារ ​បើក​ដំណើរការ​នៅ​ខេត្តត្បូងឃ្មុំ​

ខេត្ត​ចំនួន ៣ ​ទទួលបាន​ការ​កែលម្អ​ផ្លូវ​ជនបទ​ប្រវែងជាង ២៧៧ គីឡូម៉ែត្រ សម្រេចបាន ៥៣%

ខេត្តត្បូងឃ្មុំជាប់លេខ ១ មានផ្ទៃដីដាំដុះដំណាំកៅស៊ូច្រើនជាងគេទូទាំងប្រទេស

រោងចក្រកែច្នៃជ័រកៅស៊ូតម្លៃ ៣០ លានដុល្លារ បើកដំណើរការនៅខេត្តត្បូងឃ្មុំ

ខេត្តចំនួន ៣ ទទួលបានការកែលម្អផ្លូវជនបទប្រវែងជាង ២៧៧ គីឡូម៉ែត្រ សម្រេចបាន ៥៣%