សម្តេចក្រឡាហោម ស ខេង បានលើកឡើងថា កាលនៅក្នុងរបបប្រល័យពូជសាសន៍ ប៉ុល ពត សេរីភាពជំនឿ និងសាសនាទាំងអស់ត្រូវបានលុបបំបាត់ចោលទាំងស្រុង។ ទើបតែក្រោយថ្ងៃរំដោះ ៧មករា ១៩៧៩ បានធ្វើឱ្យប្រជាពលរដ្ឋដែលនៅសេសសល់ពីការកាប់សម្លាប់ បែរមកជាមានសិទ្ធិរស់រានមានជីវិត ហើយមានសេរីភាព ជំនឿ និងសាសនាឡើងវិញ។ ព្រមជាមួយគ្នានេះ ទីវត្តអារាម និងវិហារ សាសនាផ្សេងៗ ក៏ដូចជាសមិទ្ធផលនានា ត្រូវបានរាជរដ្ឋាភិបាលដឹកនាំដោយគណបក្សប្រជាជនកម្ពុជា ស្តារឡើងវិញពីចំណុចសូន្យ ហើយបច្ចុប្បន្ននេះមានការរីកចម្រើនលើគ្រប់វិស័យគួរទីមោទនៈ។

បន្ថែមពីនេះ សម្តេចក្រឡាហោម ស ខេង បានមានមតិផ្តាំផ្ញើ ឱ្យបន្តចូលរួមអភិរក្ស និងអភិវឌ្ឍវិស័យសាសនា ដោយគោរពសេរីភាពខាងជំនឿ និងធ្វើប្រណិប័តន៍ខាងផ្លូវសាសនា ចូលរួមលើកស្ទួយព្រះពុទ្ធសាសនា ដែលជាសាសនារបស់រដ្ឋ។ ជាពិសេស បន្តប្រឆាំងការធ្វើអាជីវកម្មលើសាសនា ការរើសអើង និងការបែងចែកក្នុងចំណោមប្រជាជនដែលបណ្តាលមកពីភាពខុសគ្នាខាងជំនឿ និងសាសនា ដោយប្រែក្លាយសក្តានុពលរបស់សាសនាទាំងអស់ ទៅជាកម្លាំងសាមគ្គីជាតិតែមួយ សំដៅចូលរួមលើកស្ទួយវិស័យសាសនានៅកម្ពុជាឱ្យកាន់តែមានភាពរីកចម្រើន និងសុខដុមនីយកម្មបន្ថែមទៀត។

លើសពីនេះ សូមបន្តចូលរួមថែរក្សាមរតក ប្រពៃណី និងទំនៀមទម្លាប់ ក្នុងវិស័យពុទ្ធចក្រ បណ្តុះបណ្តាលធនធានមនុស្សក្នុងវិស័យសាសនា ព្រមទាំងបណ្តុះបណ្តាលធនធានព្រះសង្ឃប្រកបដោយចំណេះដឹង ជំនាញ និងគុណធម៌ ប្រកាន់ធម៌វិន័យឱ្យបានខ្ជាប់ខ្ជួនតាមពុទ្ធបញ្ញាត្តិ៕

The post សម្តេច ស ខេង អំពាវនាវឱ្យបន្តប្រឆាំងការធ្វើអាជីវកម្មលើសាសនា និងការបែងចែកភាពខុសគ្នាខាងជំនឿ និងសាសនា appeared first on Kampuchea Thmey Daily.

សម្តេច ស ខេង លើកឡើងបែបនេះនៅក្នុងពិធីបុណ្យបញ្ចុះខណ្ឌសីមា ពុទ្ធាភិសេក និងសម្ពោធឆ្លងសមិទ្ធផលនានាវត្តមុនីរង្ស៊ីរតនារាម (ហៅវត្តម្រុំខាងជើង) សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ ព្រឹកថ្ងៃទី០៤ ខែមីនា ឆ្នាំ២០២៤ នេះ។ ត្រង់ចំណុចខាងលើ សម្តេចបានបញ្ជាក់ថា ក្នុងរដ្ឋធម្មនុញ្ញកម្ពុជា គឺគោរពលើសិទ្ធិសេរីភាពក្នុងការជ្រើសរើសជំនឿ ដូច្នេះ ព្រះពុទ្ធសាសនា គឺជាសាសនារបស់រដ្ឋ ហើយក៏ពលរដ្ឋក៏មានការគោរពពុទ្ធសាសនាច្រើនផងដែរ។ ទន្ទឹមនោះ ក៏មានពលរដ្ឋមួយចំនួនបានគោរពចំពោះសាសនាដទៃដូចគ្នា ត្រង់ចំណុចនេះ សម្តេចស្នើឱ្យមានការគោពគ្នាទៅវិញទៅមក នាំឱ្យសង្គមកម្ពុជាមានភាពសុខដុមរមនាជាមួយគ្នា។

ក្រៅពីការស្នើឱ្យពលរដ្ឋមិនមានការបែងចែក រើសអើង និងនិន្ទាគ្នាផ្នែកសាសនានេះ សម្តេច ស ខេង ក៏ស្នើឱ្យមានការចូលរួមប្រឆាំងលើការធ្វើអាជីវកម្មលើសាសនា។ បន្តពង្រឹង និងពង្រីកការអប់រំផ្នែកសាសនា ព្រមទាំងធ្វើការបណ្តុះបណ្តាលធនធានមនុស្សក្នុងវិស័យពុទ្ធសាសនា ព្រមទាំងបណ្តុះបណ្តាលធនធានព្រះសង្ឃប្រកបដោយចំណេះដឹង ជំនាញ និងគុណធម៌ វិន័យឱ្យបានខ្ជាប់ខ្ជួន។

បន្ថែមពីនេះ សម្តេច ក៏បានស្នើឱ្យបន្តថែរក្សាសាមគ្គីភាពផ្ទៃក្នុងឱ្យបានរឹងមាំរវាងព្រះសង្ឃ និងពុទ្ធបរិស័ទ ពុទ្ធបរិស័ទ និងពុទ្ធបរិស័ទដោយចេះស្រឡាញ់ គោរពរាប់អានគ្នាទៅវិញទៅមក ដោយប្រកាន់នូវព្រហ្មវិហារធម៌ទាំង៤ និងត្រូវប្រកាន់នូវសីលធម៌រស់នៅសមរម្យ ថ្លៃថ្នូរ ដើម្បីធ្វើជាគម្រូដល់មនុស្សជំនាន់ក្រោយគោរព និងរៀនសូត្រតាម៕

The post សម្តេច ស ខេង អំពាវនាវឱ្យគោរពពុទ្ធសាសនាបានត្រឹមត្រូវ និងមិនឱ្យមានការរើសអើងសាសនាដទៃឡើយ appeared first on Kampuchea Thmey Daily.

សម្តេចជំរុញបែបនេះនៅក្នុងពិធីសម្ពោធដាក់ឲ្យប្រើប្រាស់ជាផ្លូវការនូវអគារសិក្សា ១ខ្នង ៤ជាន់ មាន៣០បន្ទប់ នៃវិទ្យាល័យព្រះមុនីវង្ស ស្ថិតនៅភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង និងជូនរង្វាន់ដល់សិស្សប្រឡងជាប់និទ្ទេស A ចំនួន ៧៧រូប នៅថ្ងៃទី២៤ ខែធ្នូ ឆ្នាំ២០២៣។ នេះបើតាមការផ្សព្វផ្សាយតាមទំព័រហ្វេសប៊ុករបស់រដ្ឋបាលខេត្តបាត់ដំបង។ សម្តេចក្រឡាហោម បានជំរុញការអនុវត្តគោលនយោបាយ ភូមិ ឃុំ សង្កាត់មានសុវត្ថិភាព ដើម្បីលើកកម្ពស់ការចូលរួមរបស់ប្រជាពលរដ្ឋក្នុងការបង្ការ ទប់ស្កាត់ និងបង្ក្រាបបទល្មើសនានា ពិសេស សកម្មភាពជួញដូរចែកចាយប្រើប្រាស់គ្រឿងញៀន បទល្មើសលួច ឆក់ ប្លន់ ល្បែងស៊ីសងខុសច្បាប់តាមមូលដ្ឋាន អំពើហិង្សាក្នុងគ្រួសារ និងក្រុមក្មេងទំនើងជាដើម។

សម្តេចក៏បានណែនាំឱ្យអាជ្ញាធរបន្តជំរុញសកម្មភាពត្រួតពិនិត្យ និងផ្សព្វផ្សាយអប់រំឱ្យបានទូលំទូលាយពីការជួញដូរ និងការប្រើប្រាស់គ្រឿងញៀនតាមគោលការណ៍ «បីកុំ មួយរាយការណ៍»។ បន្ថែមពីនេះ សម្តេចស្នើឳ្យអាជ្ញាធរពាក់ព័ន្ធ និងកងកម្លាំងមានសមត្ថកិច្ច បង្កើនវិធានការអប់រំដោយដើរទន្ទឹមនឹងការរឹតបន្តឹងការអនុវត្តច្បាប់ចរាចរណ៍ផ្លូវគោក សំដៅធ្វើយ៉ាងណាកាត់បន្ថយអត្រាគ្រោះថ្នាក់ចរាចរណ៍ឱ្យនៅក្នុងកម្រិតអប្បបរមា ខណៈបញ្ហាគ្រោះថ្នាក់ ចរាចរណ៍នៅតែជាបញ្ហាប្រឈមក្នុងសង្គមដែលបណ្ដាលឱ្យមានមនុស្សស្លាប់ និងរងរបួសជារៀងរាល់ថ្ងៃ។ ត្រូវយកចិត្តទុកដាក់ និងត្រៀមជួយប្រជាពលរដ្ឋរងគ្រោះដោយគ្រោះធម្មជាតិ និងគ្រោះថ្នាក់ផ្សេងៗ ប្រជាពលរដ្ឋដែលមានការខ្វះខាត និងជនងាយរងគ្រោះនានា ដើម្បីលើកកម្ពស់សមធម៌ និងសុខុមាលភាពល្អប្រសើរ។

ជុំវិញនឹងអនាម័យប្រចាំថ្ងៃវិញ សម្តេចក្រឡាហោម ជំរុញឱ្យមានការផ្សព្វផ្សាយអប់រំឱ្យប្រជាពលរដ្ឋ ថែរក្សាសុខភាព អនាម័យ ហូបស្អាត ផឹកស្អាត និងរស់នៅស្អាត ឱ្យបានជាប់ជាប្រចាំក្នុងជីវភាពរស់នៅប្រចាំថ្ងៃ ដើម្បីទទួលបាននូវសុខភាពល្អ ចៀសវាងជំងឺផ្សេងៗ។ ក្នុងនាមជាតំណាងរាត្រនៅខេត្តបាត់ដំបង សម្តេចក្រឡាហោម ស ខេង បានកោតសរសើរយ៉ាងខ្លាំងពីកិច្ចខិតខំពីមន្ត្រី អាជ្ញាធរគ្រប់ជាន់ថ្នាក់ កងកម្លៃងប្រដាប់អាវុធ ដែលបានដឹកនាំ និង បំពេញតួនាទីភារកិច្ចប្រកបដោយការទទួលខុសត្រូវខ្ពស់ រួមគ្នារក្សាបាននូវសន្តិសុខ សណ្តាប់ធ្នាប់ និងសុវត្ថិភាព បានល្អប្រសើរ រហូតសម្រេច បាននូវសមិទ្ធផលជាច្រើនក្នុងមូលដ្ឋានខេត្តបាត់ដំបង និងធ្វើឱ្យប្រជាពលរដ្ឋអាច រស់នៅប្រកបដោយសុខដុមរមនា និងសាមគ្គីភាព។

ជាមួយគ្នានេះ ក្នុងឱកាសសម្ពោធអគារសិក្សា និងការប្រគល់រង្វាន់ដល់សិស្សនិទ្ទេសA ចំនួន ៧៧រូបនេះ សម្តេចក្រឡាហោម ស ខេង ជាតំណាងរាស្ត្រខេត្តបាត់ដំបង បានប្រគល់ម៉ូតូ១គ្រឿង និងបណ្ណសរសើរចំនួន១ ជូនដល់សិស្សដែលទទួលបាននិទ្ទេស A នៃការប្រឡងបាក់ឌុប ឆ្នាំ២០២៣ សម្រាប់ខេត្តបាត់ដំបង។ សម្តេចបានមានប្រសាសន៍ថា វិស័យអប់រំ បានដើរតួនាទីយ៉ាងសំខាន់ក្នុងការអភិវឌ្ឍធនធានមនុស្សឱ្យមានចំណេះដឹង មានសមត្ថភាព ភាពច្នៃប្រឌិត និងក្រមសីលធម៌ល្អ ដែលជាការរួមចំណែក ជួយបង្កើននូវកំណើនសេដ្ឋកិច្ចតាមរយៈការពង្រឹងភាពប្រកួតប្រជែង និងការលើកកម្ពស់ផលិតភាពដើម្បីអភិវឌ្ឍឧស្សាហកម្ម៕

The post សម្តេច ស ខេង ជំរុញអាជ្ញាធរអនុវត្តគោលនយោបាយ ភូមិ ឃុំ សង្កាត់មានសុវត្ថិភាព ដើម្បីពលរដ្ឋ appeared first on Kampuchea Thmey Daily.

ការ​ថ្លែង​គោរព​អរគុណ​ប្រមុខ​រាជរដ្ឋាភិបាល​នេះ ខណៈ​ដែល សម្ដេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ បាន​អញ្ជើញ​ជួប​សំណេះសំណាល​ជាមួយ​ស្ថាបត្យករ វិស្វករ កម្មករ កម្មការិនី សាងសង់​អគារ​ទីស្ដីការ​ក្រសួងមហាផ្ទៃ កាលពី​ព្រឹក​ថ្ងៃ​ទី ១៨ ខែ​សីហា ឆ្នាំ ២០២៣ នេះ។

សម្ដេច​ក្រឡាហោម ស ខេង ឧបនាយករដ្ឋមន្ត្រី ក្នុង​នាម​ថ្នាក់ដឹកនាំ​ក្រសួងមហាផ្ទៃ ក៏ដូចជា​មន្ត្រីរាជការ​គ្រប់​ផ្នែក គ្រប់​ថ្នាក់ ទាំង​មន្ត្រី​រដ្ឋបាល​ស៊ីវិល ក្រុម​កងកម្លាំង​នគរបាល​ជាតិ មន្ត្រី​ពន្ធនាគារ បាន​គោរព​ថ្លែងអំណរគុណ​យ៉ាង​ជ្រាលជ្រៅ​ចំពោះ «សម្ដេច​អគ្គ​មហា​សេនាបតី​តេ​ជោ ហ៊ុន សែន ប្រមុខ​រាជរដ្ឋាភិបាល ដែល​ផ្ដល់​ការ​ឯកភាព គាំទ្រ ក៏ដូចជា​ផ្ដល់​ធនធាន ក្នុង​ការ​កសាង​អគារ​ទីស្ដីការ​ក្រសួងមហាផ្ទៃ»។

សម្ដេច​ក្រឡាហោម ស ខេង មាន​ប្រសាសន៍​ថា រូប​សម្ដេច​ផ្ទាល់ ក៏​ដូច​ថ្នាក់ដឹកនាំ​ក្រសួង និង​មន្ត្រី​ពាក់ព័ន្ធ បាន​ខិតខំ​ចាត់ចែង​អនុវត្ត​ការ​សម្រេច​ចិត្ត​ប្រកបដោយ​ការ​ទទួល​ខុសត្រូវ ដោយ​ជ្រើសរើស ក្រុមហ៊ុន​ដៃគូ ដើម្បី​សាងសង់ ដូច​បាន​បញ្ជាក់​នៅ​ក្នុង​របាយការណ៍​តំណាង​ក្រុមហ៊ុន​ហើយ​ថា ជា​មោទនភាព​មួយ ដ្បិត​កន្លងមក​ខ្មែរ​តែង​គិត​ថា​មានតែ​បរទេស​ទេ​ដែល​អាច​សាងសង់​អគារ​ខ្ពស់​នេះ​បាន។

នា​ឱកាស​នោះ សម្ដេច ស ខេង បាន​ថ្លែងអំណរគុណ និង​កោតសរសើរ​អស់ពីដួងចិត្ត ចំពោះ​ក្រុមហ៊ុន​ទាំងពីរ ទាំង​ក្រុមហ៊ុន​សាងសង់ និង​ក្រុមហ៊ុន​ត្រួតពិនិត្យ ដែល​ធ្វើការ​ប្រកប​ដោយ​ការ​ទទួល​ខុសត្រូវ តាំងពី​ការ​ចាប់ផ្ដើម រហូត​មក​ទល់​ពេលនេះ គឺ ក្រុមហ៊ុន​បាន​សហការ​គ្នា សាមគ្គីភាព ឯកភាព ធ្វើការ​ជាមួយគ្នា​យ៉ាង​ល្អ។

ជាមួយ​គ្នា​នេះ សម្ដេច​ក្រឡាហោម ក៏បាន​ថ្លែងអំណរគុណ និង​កោតសរសើរ​ដោយ​ស្មោះ​អស់​ពី​ដួង​ចិត្ត​ផង​ដែរ ចំពោះ​អ្នក​ជំនាញ កម្មករ កម្មការិនី ទាំងអស់ ដែល​បាន​ចូលរួម​ក្នុង​ការ​កសាង​សំណង់​នេះ ជាពិសេស​ចូលរួម​អនុវត្ត​វិន័យ​ការងារ ធ្វើ​គ្មាន​ករណី​គ្រោះថ្នាក់​ណាមួយ​កើតឡើង។

សម្ដេច​ក្រឡាហោម បន្ថែម​ថា លទ្ធផល​នេះ ដោយសារ​កត្តា​ពីរ​យ៉ាង គឺ កត្តា​ក្រុមហ៊ុន​ដែល​មាន​មធ្យោបាយ មាន​បទបញ្ញត្តិ បទបញ្ជាផ្ទៃក្នុង​ច្បាស់លាស់ ដើម្បី​ធានា​សុវត្ថិភាព និង​ទី​ពីរ គឺ​ការ​ចូលរួម​របស់​កម្មករ កម្មការិនី។

ជា​ចុង​ក្រោយ សម្ដេច ស ខេង បាន​ថ្លែងអំណរគុណ​ដល់​ក្រសួង​ស្ថាប័ន​មាន​ការ​ពាក់ព័ន្ធ ដែល​បាន​គាំទ្រ​គម្រោង​សាងសង់​អគារ​នេះ តាំងពី​ដើម​រហូត​បញ្ចប់​គម្រោង​ផង​ដែរ៕

អត្ថបទ ៖ ពិសី

The post សម្ដេច ស ខេង គោរពអរគុណ សម្ដេចតេជោ ហ៊ុន សែន ដែលឯកភាព គាំទ្រ ផ្ដល់ធនធាន ក្នុងការកសាងអគារទីស្ដីការក្រសួងមហាផ្ទៃ appeared first on Kampuchea Thmey Daily.

លោក សក់ សេដ្ឋា​ បាន​បញ្ជាក់​ថា ក្នុងរយៈពេលជាង ៣០ ឆ្នាំ សម្តេច​ក្រឡាហោម ស ខេង បាន​ដឹកនាំក្រសួងមហាផ្ទៃ ឱ្យក្លាយទៅជាស្ថាប័នមួយដែលរឹងមាំ អាចរ៉ាប់រងអនុវត្តសម្រេចបាននូវសមិទ្ធផលជាច្រើនជូនជាតិនិងប្រជាជន។

លោករដ្ឋលេខាធិការ​បាន​រំលេចស្នាដៃ​ធំៗ​ចំនួន ៨ របស់​សម្តេច​ក្រឡាហោម ស ខេង រួមមាន៖

១. ដឹកនាំកសាង ពង្រឹងកងកម្លាំងនគរបាលជាតិប្រកបដោយជំនាញវិជ្ជាជីវៈ សីលធម៌ ដើម្បីធ្វើជាកម្លាំងបង្អែកដ៏រឹងមាំរបស់ប្រជាជន ក្នុងការចូលរួមថែរក្សា ពង្រឹងសុខសន្តិភាព និងការពារបាននូវសន្តិសុខ សណ្តាប់ធ្នាប់ សុវត្ថិភាពរបស់សង្គមជាតិទាំងមូលគ្រប់កាលៈទេសៈ សំដៅចូលរួមបន្តបរិយាកាសអនុគ្រោះសម្រាប់ការអភិវឌ្ឍសេដ្ឋកិច្ចសង្គមលើគ្រប់វិស័យ។
២. ដឹកនាំកងកម្លាំងនគរបាលជាតិសហការយ៉ាងជិតស្និទ្ធជាមួយកងកម្លាំង និងអាជ្ញាធរមានសមត្ថកិច្ចនានា ដើម្បីរក្សាការពារបានយ៉ាងរឹងមាំនូវបូរណភាពទឹកដី អធិបតេយ្យភាពជាតិ ការពារសន្តិសុខ សណ្តាប់ធ្នាប់តាមបណ្តោយព្រំដែនកម្ពុជា ជាមួយប្រទេសជិតខាង និងចូលរួមអភិវឌ្ឍ ប្រែក្លាយតំបន់ព្រំដែនពីអតីតសមរភូមិ តំបន់ដាច់ស្រយាល ទៅជាតំបន់ដែលកំពុងមានការរីកចម្រើន ប្រកបដោយភាពទាក់ទាញ។
៣. ដឹកនាំការកែសម្រួល និងបំពេញរចនាសម្ព័ន្ធ ប្រព័ន្ធគ្រប់គ្រងជនបរទេស និងជនអន្តោប្រវេសន៍ នៅព្រះរាជាណាចក្រកម្ពុជា ប្រកបដោយប្រសិទ្ធភាពខ្ពស់់ ដើម្បីចូលរួមពង្រឹងសន្តិសុខជាតិ និងការអភិវឌ្ឍប្រទេសជាតិប្រកបដោយចីរភាព។
៤. ដឹកនាំការកែសម្រួល និងពង្រឹងរចនាសម្ព័ន្ធ ដើម្បីចូលរួមរក្សាសន្តិសុខ សណ្តាប់ធ្នាប់សារធារណៈ ចូលរួមរក្សាការពារសិទ្ធិ និងផលប្រយោជន៍ប្រជាពលរដ្ឋ ដែលចូលរួមលើកកម្ពស់ការផ្ដល់សេវាសាធារណៈ សេវាសង្គម និងចូលរួមលើកកម្ពស់ប្រសិទ្ធភាពការងារតាមវិស័យនានា។
៥. ដឹកនាំសម្របសម្រួល ជំរុញ និងកែទម្រង់រដ្ឋបាលថ្នាក់ក្រោមជាតិ ពីប្រព័ន្ធគ្រប់គ្រងតាមបែបមជ្ឈការ មកជាប្រព័ន្ធគ្រប់គ្រងរដ្ឋបាលតាមបែបប្រជាធិបតេយ្យវិសហមជ្ឈការ ធ្វើឱ្យរដ្ឋបាលថ្នាក់ក្រោមជាតិទទួលបានមុខងារ និងធនធានកាន់តែច្រើនឡើងជារៀងរាល់ឆ្នាំ ដើម្បីពង្រឹងភាពជាម្ចាស់នៅរដ្ឋបាលថ្នាក់ក្រោមជាតិ ក្នុងការចូលរួមលើកកម្ពស់ការអភិវឌ្ឍសាធារណៈ និងការអភិវឌ្ឍមូលដ្ឋាន សំដៅឆ្លើយតបសេចក្តីត្រូវការតាមមូលដ្ឋាន ដែលជាការពង្រឹងលើកកម្ពស់គុណភាពជីវិតរបស់ប្រជាពលរដ្ឋតាមសហគមន៍នានា ទូទាំងប្រទេស។
៦. ដឹកនាំរៀបចំច្បាប់ លិខិតបទដ្ឋាន នីតិវិធី សម្រាប់ប្រជាពលរដ្ឋ និងការរៀបចំចុះបញ្ជីគណបក្សនយោបាយ សមាគមន៍ អង្គការក្រៅរដ្ឋាភិបាល ដើម្បីធានា ការពារ និងលើកស្ទួយសិទ្ធិ សេរីភាពរបស់ប្រជាពលរដ្ឋ និងលើកកម្ពស់លទ្ធិប្រជាធិបតេយ្យ សេរីពហុបក្ស និងការពារប្រជាពលរដ្ឋ ស្របតាមរដ្ឋធម្មនុញ្ញ និងច្បាប់ជាធរមាន នៃព្រះរាជាណាចក្រកម្ពុជា។
៧. ផ្អែកតាមគោនយោបាយរបស់ព្រះរាជាណាចក្រកម្ពុជា សម្តេចក្រឡាហោមបានដឹកនាំក្រសួងមហាផ្ទៃ ដើម្បីលើកកម្ពស់កិច្ចសហប្រតិបត្តិការក្នុងភាពជាដៃគូរជាមួយអង្គការអន្តរជាតិ និងប្រទេសនានាទាំងក្នុងតំបន់ និងសកលលោក ចូលរួមយ៉ាងសកម្ម ក្នុងការប្រយុទ្ធប្រឆាំងអំពើភេរវកម្ម ឧក្រិដ្ឋកម្មឆ្លងដែន អំពើជួញដូរមនុស្ស ការងារសម្អាតប្រាក់ ការចូលរួមប្រយុទ្ធប្រឆាំងការរីកសាយភាយនៃអាវុធមហាប្រល័យ និងការងារជាច្រើនទៀតដែលស្ថិតនៅក្នុងដែនសមត្ថកិច្ចរបស់ក្រសួងមហាផ្ទៃ។
៨. សម្តេចក្រឡាហោម ស ខេង បានផ្តួចផ្តើមដឹកនាំកសាងអគារថ្មី នៃទីស្តីការក្រសួងមហាផ្ទៃដ៏ធំស្កឹមស្កៃ ដែលកសាងឡើងដោយក្បូរក្បាច់រចនាបែបខ្មែរយ៉ាងល្អ ហើយសម្តេចតែងតែយកចិត្តទុកដាក់ត្រួតពិនិត្យ ដឹកនាំណែនាំដោយផ្ទាល់ សម្រាប់ឱ្យមន្ត្រីបំពេញការងារប្រកបដោយប្រសិទ្ធភាព។

លោក សក់ សេដ្ឋា​បានបន្ថែមថា ក្រៅពីសមិទ្ធផលខាងលើ ក៏មានសមិទ្ធិផលជាច្រើនទៀតដែលក្រសួងមហាផ្ទៃសម្រេចបាន ក្រោមការដឹកនាំ ប្រឹងប្រែង ពុះពាររបស់សម្តេចក្រឡាហោមផងដែរ។

ថ្លែងក្នុងពិធី​​ជួបសំណេះសំណាលជាមួយថ្នាក់ដឹកនាំ និងមន្ត្រីរាជការ នៃក្រសួងមហាផ្ទៃកាលពីម្សិលមិញនេះ សម្ដេចក្រឡាហោម ស ខេង បានគូសបញ្ជាក់ថា សមិទ្ធផលនិងស្នាដៃដែលក្រសួងមហាផ្ទៃសម្រេចបានមិនមែនកើតឡើងដោយ​រូបសម្ដេចផ្ទាល់ម្នាក់ឯងនោះឡើយ ពោលគឺមានការចូលរួមខិតខំប្រឹងប្រែងពីគ្រប់ភាគីពាក់ព័ន្ធ។

សម្ដេចក្រឡាហោមក៏​ថ្លែងអំណរគុណចំពោះថ្នាក់ដឹកនាំនិងមន្ដ្រីគ្រប់ជំនាន់ ដែលបានចូលរួមទទួលខុសត្រូវជាមួយសម្ដេច​ក្នុងការដឹកនាំនិងចូលរួមបំពេញតួនាទី របស់ក្រសួងឱ្យសម្រេចបាននូវស្នាដៃជាច្រើនជូនជាតិនិងប្រជាជនកម្ពុជា៕

The post រំលេច​ស្នាដៃ​ធំៗ​​សម្តេច​ ស ខេង ដឹកនាំ​ជាង​ ៣០ ឆ្នាំ​​នៅ​ក្រសួង​មហាផ្ទៃ appeared first on Kampuchea Thmey Daily.

សម្ដេច​ក្រឡាហោម ស ខេង ឧបនាយករដ្ឋមន្ត្រី បង្ហាញ​ជំនឿ​ចិត្ត​បែបនេះ ខណៈ សម្ដេច បាន​អញ្ជើញ​ជា​អធិបតី​ក្នុង​ពិធី​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​វិមានឯករាជ្យ សួន​សម្ដេច​ក្រឡាហោម វិមានឯករាជ្យ សួន​ធ្នង់ ៥៣ និង​ផ្លូវ​ចាក់​កៅស៊ូ​បេ​ទីម នៅ​បរិវេណ​វិមានឯករាជ្យ ក្រុង​បាត់ដំបង ខេត្ត​បាត់ដំបង កាលពី​ព្រឹក​ថ្ងៃ​ទី ១៦ ខែ​សីហា ឆ្នាំ ២០២៣ នេះ។

សម្ដេច​ក្រឡាហោម ស ខេង បង្ហាញ​ជំនឿ​ចិត្ត​ថា «វិមានឯករាជ្យ ព្រមទាំង​សមិទ្ធផល​សម្ពោធ នា​ថ្ងៃនេះ នឹង​រួមចំណែក​ទាក់ទាញ​ទេសចរ​ក្នុង​ខេត្ត​បាត់ដំបង ហើយ​ធ្វើ​ឲ្យ​ចំណូល​ក្នុង​ខេត្ត កាន់តែ​កើន​ឡើង»។ សម្ដេច​ក្រឡាហោម មាន​ជំនឿ​ថា ទីតាំង​នេះ នឹង​ទាក់ទាញ​ទាំង​ពលរដ្ឋ​មក​ដើរ​កម្សាន្ត និង​ហាត់​ប្រាណ។ ជាមួយ​នោះ សម្ដេច ក៏បាន​អំពាវនាវ​ពលរដ្ឋ និង​ភ្ញៀវ​ទេសចរ ចូលរួម​ថែរក្សា​បរិស្ថាន និង​អនាម័យ ហើយ​បន្ត​រួមគ្នា​ដាំ​ដើមឈើ​ឲ្យ​បាន​ច្រើន​បន្ថែម​ទៀត។

ក្នុង​នាម​រាជរដ្ឋាភិបាល ក្រោម​ការ​ដឹកនាំ​របស់ សម្ដេច​តេ​ជោ ហ៊ុន សែន និង​ក្នុង​នាម​ក្រុម​ការងារ​ចុះ​មូលដ្ឋាន​ខេត្ត​បាត់ដំបង សម្ដេច​ក្រឡាហោម ស ខេង បាន​កោតសរសើរ និង​វាយតម្លៃ​ខ្ពស់​ចំពោះ​រដ្ឋបាល​ខេត្ត​បាត់ដំបង ដែល​ខិតខំ​ប្រឹងប្រែង​កែ​លម្អ​សោភណភាព​ក្រុង​បាត់ដំបង​ជា​បន្តបន្ទាប់ ជាក់ស្ដែង វិមានឯករាជ្យ និង​សមិទ្ធផល​នានា ដែល​ប្រារព្ធ​ពិធី​សម្ពោធ​ថ្ងៃនេះ ធ្វើ​ឲ្យ​ខេត្ត​កាន់តែ​មាន​ភាព​ទាក់ទាញ។

ជាមួយ​គ្នា​នេះ សម្ដេច​ក្រឡាហោម ស ខេង ក៏បាន​កោតសរសើរ​ចំពោះ​ថ្នាក់ដឹកនាំ និង​មន្ត្រីរាជការ​ខេត្ត​បាត់ដំបង ដែល​ពេញ​មួយ​នីតិកាល​ទី ៦ មកនេះ បាន​ខិតខំ​បំពេញភារកិច្ច​ចូលរួម​ថែរក្សា​សុខ​សន្តិភាព និង​ស្ថិរភាព​ជាតិ ជាពិសេស​ការ​ផ្ដល់​សេវា​សាធារណៈ​ជូន​ប្រជាពលរដ្ឋ​យ៉ាង​ល្អ​ប្រសើរ ទាំង​កម្រិត​ខេត្ត ក្រុង ស្រុក និង​ឃុំ សង្កាត់ ធ្វើ​ឲ្យ​ពលរដ្ឋ​មាន​ភាព​កក់ក្ដៅ ជឿជាក់ និង​គាំទ្រ​លើ​ការ​ដឹកនាំ​របស់​រាជរដ្ឋាភិបាល។

សម្ដេច ស ខេង សង្ឃឹម​ជឿជាក់​ថា រដ្ឋបាល​ខេត្ត ក្រុង ស្រុក និង​ឃុំ សង្កាត់ ទូទាំង​ខេត្ត​បាត់ដំបង និង​ជា​រួម​ទូទាំង​ប្រទេស នឹង​បន្ត​ខិតខំ​បំពេញ​តួនាទី និង​ភារកិច្ច​ដ៏​ល្អ​នេះ ឲ្យ​បាន​កាន់តែ​ល្អ​ប្រសើរ​ទៀត នៅ​នីតិកាល​ថ្មី។ ក្នុង​នោះ សម្ដេច បាន​ណែនាំ​ឲ្យ​យកចិត្តទុកដាក់​ការពារ​សិទ្ធិ និង​ផល​ប្រយោជន៍​ប្រជាពលរដ្ឋ, យកចិត្តទុកដាក់​ប្រមូល​សំណើ សំណូមពរ និង​បញ្ហា​ប្រឈម​របស់​ពលរដ្ឋ ហើយ​ខិតខំ​រួមគ្នា​ដោះស្រាយ​ឲ្យ​ទាន់​ពេលវេលា។

នា​ឱកាស​នោះ សម្ដេច ស ខេង បាន​រម្លឹក​អំពី​សាវតារ​ដែល​រដ្ឋាភិបាល​សាធារណរដ្ឋ​ប្រជាមានិត​កម្ពុជា បាន​បែងចែក​ថ្នាក់ដឹកនាំ​ចុះ​លើកទឹកចិត្ត និង​គាំទ្រ​ថ្នាក់ដឹកនាំ​មូលដ្ឋាន ជាពិសេស​កងទ័ព​កំពុង​ការពារ​មិន​ឲ្យ​របប​ខ្មែរក្រហម​វិលត្រឡប់​មកវិញ។ សម្ដេច សង្កត់​ធ្ងន់​ថា ចាប់ពី​ពេលនោះ​ហើយ​ដែល គណបក្ស និង​រាជរដ្ឋាភិបាល បាន​បន្ត​ចាត់ចែង​បង្កើត​ក្រុមការងារ​ចុះ​មូលដ្ឋាន​រហូតមកដល់​សព្វថ្ងៃ។

សម្ដេច​ក្រឡាហោម គូស​បញ្ជាក់​ថា ក្រុមការងារ​រាជរដ្ឋាភិបាល និង​ក្រុមការងារ​គណបក្ស ក្នុង​ក្របខណ្ឌ​គណបក្ស​ប្រជាជន​កម្ពុជា បាន​រួម​ចំណែក​បរិច្ចាគ​ថវិកា​ផ្ទាល់ខ្លួន កសាង​សមិទ្ធផល​បម្រើ​ផលប្រយោជន៍​សាធារណៈ​គ្រប់​វិស័យ នៅ​គ្រប់​មូលដ្ឋាន ធ្វើ​ឲ្យ​ជីវភាព​រស់នៅ​របស់​ប្រជាពលរដ្ឋ​មាន​ភាព​ល្អ​ប្រសើរ ពី​មួយ​អាណត្តិ​ទៅ​មួយ​អាណត្តិ ជាក់ស្ដែង​ក្នុង​ខេត្ត​បាត់ដំបង មាន​សមិទ្ធផល​ជាច្រើន​បាន​បង្កើត​ឡើង និង​កំពុង​បម្រើ​សេចក្ដី​ត្រូវការ​ប្រជាពលរដ្ឋ៕

អត្ថបទ ៖ ពិសី

The post សម្ដេច ស ខេង ជឿជាក់ថា វិមានឯករាជ្យខេត្តបាត់ដំបង និងសមិទ្ធផលមួយចំនួនទៀត នឹងរួមចំណែកទាក់ទាញទេសចរ appeared first on Kampuchea Thmey Daily.

ការ​បង្ហាញ​សុទិដ្ឋិនិយម​បែប​នេះ នា​ឱកាស​ដែល សម្ដេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ បាន​អញ្ជើញ​ជា​សហ​អធិបតី​ក្នុង​សន្និបាត​បូកសរុប​ការងារ​បោះឆ្នោត​ជ្រើស​តាំង​តំណាងរាស្ត្រ នីតិកាល​ទី ៧ ឆ្នាំ ២០២៣ ជាមួយ លោក ប្រាជ្ញ ចន្ទ ប្រធាន​គណៈកម្មាធិការ​ជាតិ​រៀបចំ​ការ​បោះឆ្នោត (​គ​.​ជ​.​ប​) កាលពី​ព្រឹក​ថ្ងៃ​ទី ១៥ ខែ​សីហា ឆ្នាំ ២០២៣ នេះ។

សម្ដេច​ក្រឡាហោម ស ខេង បាន​បង្ហាញ​សុទិដ្ឋិនិយម​ថា «ការ​បោះឆ្នោត​នា​ពេល​ខាងមុខ នៅ​កម្ពុជា នឹង​កាន់តែ​មាន​លក្ខណៈ​ល្អ​ប្រសើរ​ថែមទៀត»។ សម្ដេច បន្ថែម​ថា នៅ​ក្រោយ​ការ​បោះឆ្នោត ២០២៣ នេះ តំណាង​គណបក្ស​នយោបាយ និង​អង្គការ​ជាតិ-អន្តរជាតិ បាន​ចេញ​សេចក្ដីថ្លែងការណ៍​វាយ​តម្លៃ​ខ្ពស់​ចំពោះ​ដំណើរការ​បោះឆ្នោត និង​មាន​ចំណាប់អារម្មណ៍​យ៉ាង​ខ្លាំង​អំពី​បរិយាកាស​យ៉ាង​ល្អ​ប្រសើរ នៃ​ការបោះឆ្នោត ដោយ​លើក​ឡើង​ថា ការ​បោះឆ្នោត​នេះ មាន​សុវត្ថិភាព ឯករាជ្យ មិន​លម្អៀង មាន​វិជ្ជាជីវៈ មាន​តម្លាភាព និង​ស្របតាម​ស្តង់ដារ​អន្តរជាតិ។

សម្ដេច ស ខេង បញ្ជាក់​ថា ការ​វាយតម្លៃ​ខាងលើ​នេះ ជា​សូចនាករ​វាយតម្លៃ​ការ​បោះឆ្នោត និង​ជា​សមិទ្ធផល​ថ្មី​មួយ​ទៀត នៃ​ការ​អនុវត្ត​លទ្ធិប្រជាធិបតេយ្យ និង​ការ​កែទម្រង់​ការ​បោះឆ្នោត​នៅ​កម្ពុជា។

សម្ដេច សង្កត់​ធ្ងន់​ថា «សមិទ្ធផល​ទាំងអស់​នេះ កើតឡើង​អាស្រ័យ​ដោយ​គ្រប់​ភាគី បាន​ខិតខំ​រួមគ្នា​កែ​លម្អ​ដំណើរការ​បោះឆ្នោត ទាំង​ក្របខណ្ឌ​ច្បាប់ និង​បច្ចេកទេស ពី​ការ​បោះឆ្នោត​មួយ​ទៅ​ការ​បោះឆ្នោត​មួយ ដោយ​ឈរ​លើ​មូលដ្ឋាន នៃ​ការ​ប្រមូល​អនុសាសន៍ ធាតុ​ចូល ការ​តាំងចិត្ត និង​ចូលរួម​ដោយ​ស្មោះសរ​ពី​គ្រប់​ភាគី ដើម្បី​រួមគ្នា​លើ​កម្ពស់​ដំណើរការ​បោះឆ្នោត។

សម្ដេច​ក្រឡាហោម ស ខេង មាន​ប្រសាសន៍​ថា ការ​បោះឆ្នោត​នេះ បាន​ប្រព្រឹត្ត​ទៅ​ដោយ​សេរី ត្រឹម​ត្រូវ និង​យុត្តិធម៌ ស្រប​តាម​គោលការណ៍ នៃ​លទ្ធិប្រជាធិបតេយ្យ ក្រោម​បរិយាកាស​សន្តិភាព មាន​ស្ថិរភាព​នយោបាយ សន្តិសុខ សណ្ដាប់ធ្នាប់ និង​មាន​សុវត្ថិភាព​យ៉ាង​ល្អ​ប្រសើរ។

សម្ដេច​ក្រឡាហោម មាន​ប្រសាសន៍​បន្ត​ថា ចាប់ពី​ការ​បោះឆ្នោត​ជាតិ ឆ្នាំ ១៩៩៣ រហូត​ដល់​ការ​បោះឆ្នោត ២០២៣ នេះ កម្ពុជា បាន​រៀបចំ​ការ​បោះឆ្នោត​ចំនួន ១៨ លើក រួច​មក​ហើយ ហើយ​ការ​បោះឆ្នោត​ចុងក្រោយ​នេះ ប្រព្រឹត្ត​ទៅ​យ៉ាង​ល្អ​ប្រសើរ ធៀប​នឹង​ការ​បោះឆ្នោត​មុនៗ ជាពិសេស​មាន​អត្រា​អ្នក​បោះឆ្នោត​ខ្ពស់។

ក្នុង​នាម​រាជរដ្ឋាភិបាល​កម្ពុជា និង​ក្នុងនាម​ក្រសួងមហាផ្ទៃ សម្ដេច​ក្រឡាហោម ស ខេង បាន​កោតសរសើរ និង​វាយតម្លៃ​ខ្ពស់ ចំពោះ​ថ្នាក់ដឹកនាំ និង​មន្ត្រី គ​.​ជ​.​ប គ្រប់​លំដាប់​ថ្នាក់ អាជ្ញាធរ​គ្រប់​មូលដ្ឋាន តំណាង​គណបក្ស​នយោបាយ អ្នកសង្កេតការណ៍​ជាតិ និង​អន្តរជាតិ អ្នក​ពាក់ព័ន្ធ​នានា ព្រម​ទាំង​ប្រជាពលរដ្ឋ​ដែល​ចូលរួម​អនុវត្ត​យ៉ាង​ខ្ជាប់ខ្ជួន​ស្រប​តាម​ច្បាប់ បទបញ្ជា នីតិវិធី នៃ​ការ​បោះឆ្នោត ប្រកប​ដោយ​ស្មារតី​ទទួលខុសត្រូវ និង​ភាព​ថ្លៃថ្នូរ ក្នុងនាម​ជា​ប្រជាជាតិ​ខ្មែរ ធ្វើ​ឲ្យ​ការ​បោះឆ្នោត​ទទួល​បាន​លទ្ធផល​ល្អ​ប្រសើរ ទាំង​លើ​ទិដ្ឋភាព​ច្បាប់ និង​បច្ចេកទេស។

គួរ​ជម្រាប​ថា ការ​បោះឆ្នោត​ជ្រើសតាំង​តំណាងរាស្ត្រ បាន​ប្រព្រឹត្តទៅ​កាលពី​ថ្ងៃ​ទី ២៣ ខែ​កក្កដា ឆ្នាំ ២០២៣ ដោយ​មាន​គណបក្ស​នយោបាយ​ចូលរួម​ប្រកួតប្រជែង​ចំនួន ១៨ គណបក្ស។

ចំពោះ​លទ្ធផល​ផ្លូវការ ត្រូវ​បាន​បង្ហាញ​ថា «គណបក្ស​ប្រជាជន​កម្ពុជា» ទទួល​បាន​អាសនៈ​ចំនួន ១២០ អាសនៈ និង​គណបក្ស​ហ្វ៊ុនស៊ិនប៉ិច ទទួល​បាន​ចំនួន ៥ អាសនៈ ក្នុង​ចំណោម​អាសនៈ​សភា​សរុប​ចំនួន ១២៥។

រដ្ឋសភា បាន​ប្រកាស​បើក​កិច្ចប្រជុំ​ដំបូង​នៅ​ថ្ងៃ​ទី ២១ ខែ​សីហា និង​បន្ត​កិច្ចប្រជុំ​អនុម័ត​រចនាសម្ព័ន្ធ​ថ្នាក់​ដឹកនាំ​សភា និង​ផ្ដល់​សេចក្ដីទុកចិត្ត​រាជរដ្ឋាភិបាល​នីតិកាល​ថ្មី នៅ​ថ្ងៃ​ទី ២២ ខែ​សីហា ឆ្នាំ ២០២៣។​

ជាមួយ​គ្នា​នេះ កម្ពុជា ក៏បាន​រៀបចំ​ការ​បោះឆ្នោត​នីតិកាល​ទី ១ ដោយ​អង្គការ​សហប្រជាជាតិ កាលពី​ឆ្នាំ ១៩៩៣ និង​បាន​រៀបចំ​ការ​បោះឆ្នោត​ដោយ​ខ្លួនឯង នៅ​នីតិកាល​ទី ២ ឆ្នាំ ១៩៩៨។ កម្ពុជា រៀបចំ​ការ​បោះឆ្នោត​ជ្រើសតាំង​តំណាងរាស្ត្រ ៧ លើក​ហើយ និង​រៀបចំ​ការ​បោះឆ្នោត​ជ្រើសរើស​ក្រុម​ប្រឹក្សា​ឃុំ សង្កាត់ ៥ លើក រួច​មក​ហើយ។ ក្រៅពី​នេះ ក៏​មាន​ការ​បោះឆ្នោត​ព្រឹទ្ធសភា និង​ការ​បោះឆ្នោត​ក្រុមប្រឹក្សា​រាជធានី ខេត្ត ក្រុង ស្រុក ខណ្ឌ ធ្វើឡើង​ដោយ​អ​សាកល​ផង​ដែរ។ ការ​បោះឆ្នោត​ដោយ​សេរី ត្រឹមត្រូវ និង​យុត្តិធម៌ គឺជា​ជម្រើស​តែមួយគត់ ធ្វើឲ្យ កម្ពុជា មាន​សុខ​សន្តិភាព និង​ស្ថិរភាព​នយោបាយ ព្រមទាំង​បញ្ចៀស​បាន​ទាំងស្រុង​នូវ​សង្គ្រាម និង​ការ​បែកបាក់​ជាតិ៕

អត្ថបទ ៖ ពិសី

The post សម្ដេច ស ខេង បង្ហាញសុទិដ្ឋិនិយមថា ការបោះឆ្នោតពេលខាងមុខ កម្ពុជា នឹងកាន់តែមានលក្ខណៈល្អប្រសើរថែមទៀត appeared first on Kampuchea Thmey Daily.

សម្ដេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ បាន​គូស​បញ្ជាក់​បែបនេះ ខណៈ សម្ដេច អញ្ជើញ​ជា​អធិបតី​ក្នុង​ពិធី​សម្ពោធ​ឆ្លង​ដាក់​ឲ្យ​ប្រើប្រាស់​ជា​ផ្លូវការ​ស្ថានីយ​ទឹក​ស្អាត ឃុំ​ក្របៅ ឃុំ​ជាច ផ្លូវ​ចាក់​បេតុង​ឃុំ​ក្របៅ និង​សមិទ្ធផល​នានា ក្នុង​ស្រុក​កំចាយមារ ខេត្ត​ព្រៃវែង នៅ​ថ្ងៃ​ទី ១០ ខែ​សីហា ឆ្នាំ ២០២៣នេះ។

សម្ដេច​ក្រឡាហោម ស ខេង បាន​គូស​បញ្ជាក់​ថា «កិត្តិយស កិត្យានុភាព សេចក្ដីថ្លៃថ្នូរ​របស់​ជាតិ​យើង​នៅ​លើ​ឆាក​អន្តរជាតិ កាន់តែ​បាន​លើកកម្ពស់ នៅ​ពេល​ដែល​កម្ពុជា​បាន​អនុវត្ត​តួនាទី​ជា​ប្រធាន ដឹកនាំ​សម្របសម្រួល​កិច្ចប្រជុំ​កំពូល​អាស៊ាន​លើក​ទី ៤០-៤១ កិច្ចប្រជុំ​ពាក់ព័ន្ធ​នានា ការ​ធ្វើជា​ម្ចាស់​ផ្ទះ នៃ​ព្រឹត្តិការណ៍​កីឡា​អាស៊ីអាគ្នេយ៍​លើក​ទី ៣២ (SEA GAME) និង​អាស៊ាន​ប៉ារ៉ាហ្គេម លើក​ទី ១២ (ASEAN PARA GAME) ជាមួយ​លទ្ធផល​ល្អ​ប្រសើរ និង​ជោគជ័យ​ដ៏​ត្រចះត្រចង់ ព្រមទាំង​ទទួល​បាន​នូវ​ការ​កោតសរសើរ​ពី​បណ្ដា​ភ្ញៀវ​អន្តរជាតិ ក៏ដូចជា​ការ​គាំទ្រ និង​អបអរសាទរ​ពី​ប្រជាជន​ខ្មែរ​នៅ​ទូទាំង​ប្រទេស»។

នា​ឱកាស​នោះ សម្ដេច​ក្រឡាហោម ស ខេង បាន​មាន​ប្រសាសន៍​ថា ក្រោម​ការ​ដឹកនាំ​ប្រកប​ដោយ​គតិបណ្ឌិត​របស់ សម្ដេច​អគ្គ​មហា​សេនា​បតី​តេ​ជោ ហ៊ុន សែន នាយករដ្ឋមន្ត្រី នៃ​កម្ពុជា រក្សា​បាន​យ៉ាង​ល្អ​ប្រសើរ​នូវ​សុខ​សន្តិភាព ស្ថិរភាព​នយោបាយ លទ្ធិប្រជាធិបតេយ្យ ជំរុញ​ដំណើរការ​អភិវឌ្ឍ​សង្គម សេដ្ឋកិច្ច និង​សម្រេច​បាន​សមិទ្ធផល​ថ្មីៗ ប្រកប​ដោយ​មោទនភាព បើ​ទោះបីជា​ត្រូវ​ជួបប្រទះ​បញ្ហា​ប្រឈម​ជាច្រើន ជាពិសេស​ការ​ឆ្លង​រាតត្បាត នៃ​ជំងឺ​កូវីដ-១៩ និង​ការវិវត្តន៍​ដ៏​ស្មុគស្មាញ នៃ​សភាពការណ៍​នយោបាយ សេដ្ឋកិច្ច​អន្តរជាតិ ដែល​ពិបាក​ប៉ាន់ស្មាន​ក្ដី។

សម្ដេច ស ខេង បាន​រំលឹក​ថា កាលពី​ពេល​កន្លងទៅ​ថ្មីៗ​នេះ កម្ពុជា ក៏​ទទួល​បាន​ជោគជ័យ​ជា​ប្រវត្តិសាស្ត្រ​ថ្មី​មួយទៀត គឺ​ការ​រៀបចំ​ការ​បោះឆ្នោត​ជ្រើសតាំង​តំណាងរាស្ត្រ​នីតិកាល​ទី ៧ នៃ​រដ្ឋសភា ដែល​បាន​ប្រព្រឹត្តទៅ កាលពី​ថ្ងៃ​ទី ២៣ ខែ​កក្កដា ឆ្នាំ ២០២៣។ ជាមួយ​នោះ សម្ដេច ស ខេង ក៏បាន​ថ្លែងអំណរគុណ​ចំពោះ​ប្រជាពលរដ្ឋ​ដែល​មាន​ឈ្មោះ​ក្នុង​បញ្ជី​បោះឆ្នោត បាន​ប្រើប្រាស់​សិទ្ធិ​សម្ដែង​នូវ​ឆន្ទៈ​ក្នុង​នាម​ជា​ពលរដ្ឋ​ល្អ​ចូលរួម​ទៅ​បោះឆ្នោត​ជ្រើសតាំង​តំណាងរាស្ត្រ​នីតិកាល​ទី ៧ នៃ​រដ្ឋសភា បាន​រហូតដល់ ៨៤,៥៨% ធៀប​ទៅ​នឹង​អ្នក​មាន​ឈ្មោះ​ក្នុង​បញ្ជី​បោះឆ្នោត សរុប​ចំនួន ៩.៧១០.៦៥៥ នាក់។

សម្ដេច​ក្រឡាហោម ស ខេង បន្ថែម​ថា ជោគជ័យ​ដ៏​ត្រចះត្រចង់​នេះ ពិតជា​មិន​អាច​កាត់ផ្ដាច់​បាន​ពី​ការ​ខិតខំ​ប្រឹងប្រែង​របស់​អាជ្ញាធរ​មាន​សមត្ថកិច្ច កងកម្លាំងប្រដាប់អាវុធ​គ្រប់​លំដាប់​ថ្នាក់ ដែល​បាន​បំពេញ​ការងារ​ប្រកប​ដោយ​ការ​យកចិត្តទុកដាក់ និង​ការ​ទទួល​ខុសត្រូវ​ខ្ពស់ ធ្វើ​ឲ្យ​ដំណើរការ​រៀបចំ​ការ​បោះឆ្នោត​ជ្រើសតាំង​តំណាងរាស្ត្រ​នីតិកាល​ទី ៧ នៃ​រដ្ឋសភា បាន​ប្រព្រឹត្តទៅ​ដោយ​រលូន ស្ថិត​ក្នុង​បរិយាកាស​សន្តិសុខ សណ្ដាប់ធ្នាប់​ល្អ​ប្រសើរ ប្រកប​ដោយ​សុវត្ថិភាព គ្មាន​ភាព​ភ័យខ្លាច គ្មាន​ការ​គំរាមកំហែង និង​គ្មាន​អំពើ​ហិង្សា។

ជាមួយ​គ្នា​នោះ​ដែរ សម្ដេច​ក្រឡាហោម បាន​បន្ត​ថា សមិទ្ធផល​ដាក់​សម្ពោធ​នា​ពេលនេះ គឺជា​ចំណង​ដៃ​ថ្មី​មួយ​ទៀត​សម្រាប់​អ្នកស្រុក​កំចាយមារ ហើយ​ចំណាយ​អស់​ថវិកា​ជាច្រើន ដែល​បាន​មកពី​ការ​ចូលរួម​បរិច្ចាគ​ធនធាន​ផ្ទាល់ខ្លួន​របស់ ឯកឧត្ដម លោកជំទាវ ជា​ថ្នាក់​ដឹកនាំ​ក្រុម​ការងារ​រាជរដ្ឋាភិបាល​ចុះ​ជួយ​មូលដ្ឋាន​ខេត្ត​ព្រៃវែង ក៏ដូចជា​ក្រុម​ការងារ​រាជរដ្ឋាភិបាល​ចុះ​មូលដ្ឋាន​ស្រុក​កំចាយមារ និង​ការ​ចូលរួម​បរិច្ចាគ​ពី​សប្បុរសជន​នានា។

ក្នុង​នាម​ក្រុម​ការងារ​រាជរដ្ឋាភិបាល​ចុះ​ជួយ​មូលដ្ឋាន​ខេត្ត​ព្រៃវែង សម្ដេច​ក្រឡាហោម ស ខេង បាន​កោតសរសើរ និង​វាយតម្លៃ​ខ្ពស់ ចំពោះ​ថ្នាក់​ដឹកនាំ​ក្រុម​ការងារ​ស្រុក ក្រុង ឃុំ សង្កាត់ អាជ្ញាធរ​មាន​សមត្ថកិច្ច​គ្រប់​លំដាប់​ថ្នាក់ និង​កងកម្លាំងប្រដាប់អាវុធ​គ្រប់​ប្រភេទ ដែល​បាន​ខិតខំ​អស់កម្លាំង​កាយ​ចិត្ត និង​បញ្ញា​ស្មារតី ចូលរួម​ថែរក្សា​សន្តិសុខ សណ្ដាប់ធ្នាប់​សាធារណៈ និង​សុវត្ថិភាព​សង្គម បាន​ល្អ​ប្រសើរ ធ្វើ​ឲ្យ​ជីវភាព​រស់នៅ​របស់​ប្រជាពលរដ្ឋ​ប្រព្រឹត្ត​ទៅ​ប្រកប​ដោយ​បរិយាកាស សុខដុមរមនា និង​ពោរពេញ​ដោយ​សាមគ្គីភាព។

សម្ដេច ស ខេង ក៏បាន​ថ្លែងអំណរគុណ និង​វាយតម្លៃ​ខ្ពស់​ជូន​ចំពោះ ឯកឧត្ដម លោកជំទាវ ក៏ដូចជា​ក្រុម​ការងារ​រាជរដ្ឋាភិបាល​ចុះ​មូលដ្ឋាន​ស្រុក​កំចាយមារ និង​សប្បុរសជន​ទាំងអស់ ដែល​បាន​បរិច្ចាគ​នូវ​ធនធាន​ជាច្រើន និង​លះបង់​កម្លាំងកាយ​ចិត្ត បញ្ញា​ស្មារតី ក្នុង​ការ​ចូលរួម​អភិវឌ្ឍន៍​វិស័យ​ទឹក​ស្អាត និង​វិស័យ​ផ្សេងៗ ជាច្រើន​ទៀត សំដៅ​ធ្វើ​យ៉ាង​ណា​ឲ្យ​ប្រជាពលរដ្ឋ​មាន​ទឹក​ស្អាត​ប្រើប្រាស់​គ្រប់​គ្រាន់ ដោយ​រស់នៅ​ស្អាត ហូប​ស្អាត ផឹក​ស្អាត និង​មាន​អនាម័យ​ល្អ ស្រប​តាម​គោលនយោបាយ របស់​រាជរដ្ឋាភិបាល​កម្ពុជា និង​រួមចំណែក​អភិវឌ្ឍន៍​មូលដ្ឋាន​ស្រុក​កំចាយមារ ខេត្ត​ព្រៃវែង៕

អត្ថបទ ៖ ពិសី

The post សម្ដេច ស ខេង ៖ កិត្តិយស កិត្យានុភាព សេចក្ដីថ្លៃថ្នូររបស់កម្ពុជា លើឆាកអន្តរជាតិ កាន់តែបានលើកកម្ពស់ appeared first on Kampuchea Thmey Daily.