សម្តេច ស ខេង អំពាវនាវឱ្យគោរពពុទ្ធសាសនាបានត្រឹមត្រូវ និងមិនឱ្យមានការរើសអើងសាសនាដទៃឡើយ

សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ បានអំពាវនាវឱ្យសាធារណជនគ្រប់រូបមានការគោរព និងចូលរួមលើកស្ទួយព្រះពុទ្ធសាសនាឱ្យបានត្រឹមត្រូវ និងគាំទ្រការគោរពសាសនាផ្សេងៗ ហើយមិនត្រូវមើលស្រាលសាសនាដដទៃឡើយ។

សម្តេច ស ខេង លើកឡើងបែបនេះនៅក្នុងពិធីបុណ្យបញ្ចុះខណ្ឌសីមា ពុទ្ធាភិសេក និងសម្ពោធឆ្លងសមិទ្ធផលនានាវត្តមុនីរង្ស៊ីរតនារាម (ហៅវត្តម្រុំខាងជើង) សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ ព្រឹកថ្ងៃទី០៤ ខែមីនា ឆ្នាំ២០២៤ នេះ។ ត្រង់ចំណុចខាងលើ សម្តេចបានបញ្ជាក់ថា ក្នុងរដ្ឋធម្មនុញ្ញកម្ពុជា គឺគោរពលើសិទ្ធិសេរីភាពក្នុងការជ្រើសរើសជំនឿ ដូច្នេះ ព្រះពុទ្ធសាសនា គឺជាសាសនារបស់រដ្ឋ ហើយក៏ពលរដ្ឋក៏មានការគោរពពុទ្ធសាសនាច្រើនផងដែរ។ ទន្ទឹមនោះ ក៏មានពលរដ្ឋមួយចំនួនបានគោរពចំពោះសាសនាដទៃដូចគ្នា ត្រង់ចំណុចនេះ សម្តេចស្នើឱ្យមានការគោពគ្នាទៅវិញទៅមក នាំឱ្យសង្គមកម្ពុជាមានភាពសុខដុមរមនាជាមួយគ្នា។

ក្រៅពីការស្នើឱ្យពលរដ្ឋមិនមានការបែងចែក រើសអើង និងនិន្ទាគ្នាផ្នែកសាសនានេះ សម្តេច ស ខេង ក៏ស្នើឱ្យមានការចូលរួមប្រឆាំងលើការធ្វើអាជីវកម្មលើសាសនា។ បន្តពង្រឹង និងពង្រីកការអប់រំផ្នែកសាសនា ព្រមទាំងធ្វើការបណ្តុះបណ្តាលធនធានមនុស្សក្នុងវិស័យពុទ្ធសាសនា ព្រមទាំងបណ្តុះបណ្តាលធនធានព្រះសង្ឃប្រកបដោយចំណេះដឹង ជំនាញ និងគុណធម៌ វិន័យឱ្យបានខ្ជាប់ខ្ជួន។

បន្ថែមពីនេះ សម្តេច ក៏បានស្នើឱ្យបន្តថែរក្សាសាមគ្គីភាពផ្ទៃក្នុងឱ្យបានរឹងមាំរវាងព្រះសង្ឃ និងពុទ្ធបរិស័ទ ពុទ្ធបរិស័ទ និងពុទ្ធបរិស័ទដោយចេះស្រឡាញ់ គោរពរាប់អានគ្នាទៅវិញទៅមក ដោយប្រកាន់នូវព្រហ្មវិហារធម៌ទាំង៤ និងត្រូវប្រកាន់នូវសីលធម៌រស់នៅសមរម្យ ថ្លៃថ្នូរ ដើម្បីធ្វើជាគម្រូដល់មនុស្សជំនាន់ក្រោយគោរព និងរៀនសូត្រតាម៕