សហភាពសូវៀត Archives - Kampuchea Thmey Daily

ដំណើរដើមទងបុរសម្នាក់ទៀតធ្លាប់បញ្ចៀសពិភពលោកពីភ្លើងសង្រ្គាមនុយក្លេអ៊ែរ

Mean Ratana — Thu, 25 Jan 2024 09:58:36 +0000

កាលពីអត្ថបទមុន ប្រិយមិត្តបានស្គាល់រួចមកហើយ អំពីបុរសម្នាក់ដែលបានជួយពិភពលោក ចេញពីការផ្ទុះសង្គ្រាមនៃអាវុធប្រល័យលោក ។ ក្នុងការសម្រេចចិត្តធំៗក្នុងនាមជាថ្នាក់ដឹកនាំ មានមនុស្សតិចនាក់ណាស់ ដែលមានចិត្តធ្ងន់ ស្ងប់មិនតបតទោទន់តាមកំហឹង ដែលលទ្ធផលអាចក្លាយជាវិប្បដិសារីផ្សេងៗ។ អត្ថបទនេះ យើងនឹងនាំប្រិយមិត្តអ្នកអាន ឲ្យស្គាល់មនុស្សសំខាន់ម្នាក់ទៀតបានបញ្ចៀសពិភពលោកពីភ្លើងសង្គ្រាមអាវុធនុយក្លេអ៊ែរដែលហៀបនឹងផ្ទុះឡើង ពីសម័យកាលតានតឹងរវាងមនោគមវិជ្ជាប្លុកសេរី និងកុម្មុយនីស្ត គឺវិបត្តិមីស៊ីលនៅប្រទេសគុយបា ។

ប្រទេសគុយបាស្ថិតនៅក្នុងការប្រទាញប្រទង់ពីប្លុកសេរី និងកុម្មុយនីស្តដែលគេហៅថា “វិបត្តិមីស៊ីលគុយបា” ។ ត្រឡប់ទៅខែតុលា ឆ្នាំ១៩៦២ គឺជាស្ថានការណ៍តានតឹងនៃវិបត្តិនេះ ពោលគឺមាននាវាមុជទឹកមួយគ្រឿងរបស់អតីតសហភាពសូវៀត (B-59) មុជនៅក្នុងឈូងសមុទ្រ Caribbean ក្នុងគោលដៅចូលទៅកាន់ប្រទេសគុយបា ដើម្បីផ្តល់សព្វាវុធ ឬជំនួយផ្សេងៗក្នុងន័យនយោបាយមនោគមវិជ្ជា ។ ស្ថានភាពការណ៍ពេលនោះ ប្លុកសេរីមានសហរដ្ឋអាមេរិកប្រឆាំងខ្លាំងទៅនឹងការសាយភាពមនោគមវិជ្ជាកុម្មុយនីស្ត ដោយបិទច្រកចេញចូលគ្រប់ផ្លូវដែលក្នុងប្រទេសនេះ។

នាវាមុជទឹករបស់អតីតសហភាពសូវៀត (B-59)

ពេលនោះ ទ័ពជើងទឹកអាមេរិក ចាប់ព័ត៌មានបានថាមាននាវាមុជទឹក ដែលលាក់ខ្លួនយ៉ាងជ្រៅក្នុងមហាសមុទ្រ ដើម្បីត្រៀមចូលគុយបា។ ប៉ុន្តែខាងសហរដ្ឋអាមេរិក ក្នុងអាណត្តិដឹកនាំដោយលោកប្រធានាធិបតី John F. Kennedy បានសម្រេចទម្លាក់ Depth-charge (គ្រាប់បែកក្នុងទឹក ដែលអាចបញ្ជាបំផ្ទុះបាន ) ក្នុងន័យឲ្យសញ្ញាពួកគេឡើងមកលើផ្ទៃទឹក។ តែយ៉ាងណា អាមេរិកពុំដឹងថា នាវាមុជទឹកនោះ មានបំពាក់ក្បាលគ្រាប់នុយក្លេអ៊ែរ ដែល មេបញ្ជាការសូវៀតអាចសម្រេចបាញ់នូវពេលស្ថានការណ៍អាសន្នប្រកាសសង្រ្គាមណាមួយកើតឡើងនោះឡើយ ។

ចំពេលដែល នាវាមុជទឹកសូវៀតដែលមុជយ៉ាងជ្រៅរាប់ខែ បានដាច់ទំនាក់ទំនងពីក្រុងមូស្គូ មិនអាចទទួលព័ត៌មានអ្វីពីផ្ទៃទឹកខាងលើ។ បរិក្ខារខាងក្នុងនាវាមួយផ្នែកធំបានខូច ម៉ាស៊ីនត្រជាក់ក៏ខូច ពិសេសសីតណ្ហភាពក្នុងនាវាក៏ឡើងកម្តៅ ទន្ទឹមនឹងពេលអាមេរិកបានទម្លាក់គ្រាប់បែកបញ្ជា Depth-charge ជាច្រើន មិនដឹងថាផ្ទៃទឹកខាងលើជាការប្រកាសសង្រ្គាម ឬមួយសង្គ្រាមបានផ្ទុះឡើងហើយ? ដែលការណ៍នេះធ្វើឲ្យការសម្រេចចិត្តរបស់មេបញ្ជាការនាវា គឺលោក Valentin Savitsky កាន់តែឡើងកម្តៅ។

រូបលោកប្រធានាធិបតី John F. Kennedy លើក្របកាសែត

“យើងគួរតែបាញ់ពួកគេតែម្តងទៅ!” នេះជាការបញ្ជារឲ្យត្រៀមរួចរាល់សម្រាប់ការបាញ់អាវុធនុយក្លេអ៊ែររបស់មេបញ្ជាការនាវាសហភាពសូវៀត។ អាវុធនុយក្លេអ៊ែរបំពាក់លើនាវាសូវៀតនេះ ដែលមានកម្លាំងស្មើការទម្លាក់គ្រាប់បែកបរមណូរបស់អាមេរិកលើទីក្រុងហ៊ីរ៉ូស៊ីម៉ា។ ខណៈពេលដែលសីតណ្ហភាពក្នុងនាវាកើនកម្តៅខ្លាំងឡើងៗ ទន្ទឹមនឹងពេលដែលនាវាមិនអាចមុជបន្តបាន បើមិនងើបឡើងទៅផ្ទៃទឹកខាងលើ។

ទោះយ៉ាងណា នីតិវិធីបាញ់អាវុធនុយក្លេអ៊ែរចេញពីនាវាគឺតម្រូវឲ្យមានការឯកភាពបីសម្លេងនៃមេបញ្ជាការក្នុងនាវាទាំងបីរូប។ ចំពេលដែលអនុបញ្ជាការមួយទៀត គឺលោក Ivan Semyonovich Maslennikov យល់ស្របនឹងមតិបាញ់អាវុធនុយក្លេអ៊ែរនេះ។

លោក Vasili Alexandrovich Arkhipov

មតិពីរសម្លេងមិនអាចអនុវត្តបាញ់ចេញនូវអាវុធនុយក្លេអ៊ែរចេញពីនាវានោះបានឡើយ ពោលគឺបុរសម្នាក់ក្នុងឋានៈជាអនុបញ្ជាការទី២ គឺ លោក Vasili Alexandrovich Arkhipov ដែលបានបដិសេធមិនស្របតាម។ លោកជាមនុស្សម្នាក់ដែលបានជំទាស់ ប៉ុន្តែលោកបានផ្តល់យោបល់ទៅមេបញ្ជាការដោយភាពស្ងប់ស្ងៀមថាគួរឡើងទៅផ្ទៃទឹកខាងលើ ដើម្បីឲ្យច្បាស់ថាមានរឿងអ្វីកើតឡើងនៅខាងលើ។

ពិតជាដូចការលើកឡើងរបស់ លោក Arkhipov នៅខាងលើ ពុំមានការវាយប្រហារពីសហរដ្ឋអាមេរិកនោះទេ ពោលគឺការទម្លាក់គ្រាប់ Depth-charge ធ្វើឡើងក្នុងបំណងមុជគ្រាប់ដែលមានសមត្ថភាពទៅដល់ជម្រៅជ្រៅនៃបាតសមុទ្រនេះ ដើម្បីផ្តល់ជាសញ្ញា ឲ្យនាវាដែលគេចាប់ព័ត៌មានបាន ឡើងមកផ្ទៃទឹកខាងលើ ដើម្បីចរចារ។

លោកប្រធានាធិបតី Kennedy

នៅក្នុងស្ថានការណ៍នោះដែរ សារព័ត៌មានអាមេរិកជាច្រើនបានបង្ហាញពីក្តីបារម្ភរបស់លោកប្រធានាធិបតី Kennedy ព្រោះការសម្រេចចិត្តរបស់លោកអាចនឹងឲ្យភាគីសូវៀតយល់ច្រលំថាជាការវាយប្រហារ នឹងមានការបាញ់តបត ធ្វើឲ្យសង្គ្រាមនុយក្លេអ៊ែរផ្ទុះឡើងនៅគ្រប់ពេលនោះ។

យ៉ាងណាសម្រាប់ស្ថានការណ៍នោះ លោកអនុបញ្ជាការ Vasili Alexandrovich Arkhipov ត្រូវបានមនុស្សជាច្រើនពិព័ណ៌នាថាជាតួសំខាន់ក្នុងការបញ្ចៀសពិភពលោក ពីការផ្ទុះតបតអាវុធនុយក្លេអ៊ែរ។ ព្រោះហេតុថា បើមានអាវុធនុយក្លេរអ៊េរផ្ទុះឡើងមែន សហរដ្ឋអាមេរិកក៏មិនមែនឈរអោបដៃមើលនោះឡើយ ដែលសង្គ្រាមប្រល័យលោកធំមួយអាចកើតមានរវាងភាគីទាំងពីរនោះ៕

ដោយ៖ មាន រតនា

The post ដំណើរដើមទងបុរសម្នាក់ទៀតធ្លាប់បញ្ចៀសពិភពលោកពីភ្លើងសង្រ្គាមនុយក្លេអ៊ែរ appeared first on Kampuchea Thmey Daily.

មកស្គាល់ បុរសជួយពិភពលោក បញ្ចៀសមិនឲ្យផ្ទុះសង្គ្រាមនុយក្លេអ៊ែរ តែគ្រប់គ្នាមិនសូវបានដឹង

Mean Ratana — Wed, 10 Jan 2024 08:06:33 +0000

លោក Stanislav Petrov ឋានៈជាវីរសេនីយ៍ទោ (សក្តិ៤កន្លះ) នៅក្នុងអតីតកងទ័ពការពារដែនអាកាសនៃអតីតសហភាពសូវៀត ត្រូវបានសារព័ត៌មានអង់គ្លេស BBC គាស់កកាយរំឭកពីហេតុការណ៍ពិសេសមួយដែលត្រូវបានគេចាត់ទុកថាជាការសម្រេចដ៏ត្រឹមត្រូវរបស់អតីតវីរសេនីយ៍រូបនេះ ហើយក៏ជាការជួយពិភពលោកទាំងមូលចៀសផុតពីភ្លើងសង្គ្រាមអាវុធនុយក្លេអ៊ែរផងដែរ ។

សារព័ត៌មានខាងលើបានរៀបរាប់ជាសង្ខេប ដោយត្រឡប់ទៅកាន់ព្រឹត្តិការណ៍ព្រឹកព្រលឹមថ្ងៃទី២៦ ខែកញ្ញា ឆ្នាំ១៩៨៣ លោកវីរសេនីយ៍ Petrov មានតួនាទីប្រចាំការពិនិត្យតាមដានព័ត៌មានពីប្រព័ន្ធកុំព្យូរទ័រ ដែលពេលនោះសញ្ញាប្រកាសអាសន្នបានលោតឡើង បង្ហាញថា សហរដ្ឋអាមេរិកបានបាញ់ចេញមីស៊ីលអាវុធនុយក្លេអ៊ែរអន្តរទ្វីបចំនួន ៥ គ្រាប់មកហើយ ។

“សំឡេងស៊ីរ៉ែនបានបន្លឺឡើង ប៉ុន្តែខ្ញុំនៅអង្គុយទីនោះប៉ុន្មានវិនាទី ហើយមើលទៅអេក្រង់លោតសញ្ញាក្រហមព្រមាន និងមានពាក្យ បាញ់ នៅលើនោះ” ។ នេះជាសម្តីរបស់លោក Petrov ប្រាប់ទៅសារព័ត៌មាន ។

លោកបន្ថែមថា វាជាខណៈពេលភាពតានតឹងនៃសង្គ្រាមត្រជាក់ លោកត្រូវតែធ្វើសកម្មភាពណាមួយជាបន្ទាន់ បើមិនដូច្នោះទេ មីស៊ីលរបស់អាមេរិកអាចមកដល់ទឹកដីសូវៀតត្រឹមតែពេល ២០ នាទីប៉ុណ្ណោះ ។

អតីតកងទ័ពអាកាសរូបនេះបានបន្ថែមថា “យើងគ្មានពេលគិតច្រើននោះទេ នៅពេលដែលយើងត្រូវរាយការណ៍អំពីការវាយប្រហារ ។ ប៉ុន្តែយើងដឹងថា រាល់វិនាទីនៃការពន្យារពេល ឬយឺតពេលណាមួយ ស្មើនឹងធ្វើឲ្យបាត់បង់ឱកាសការសម្រេចដ៏សំខាន់ៗ ព្រោះថាមន្ត្រីសូវៀត និងថ្នាក់ដឹកនាំត្រូវការការរាយការណ៍ជាចាំបាច់ ដោយគ្មានការយឺតយាវ។ អ្វីដែលខ្ញុំត្រូវធ្វើគឺហៅទូរសព្ទផ្ទាល់ទៅមេបញ្ជាការ តែពេលនោះ ខ្ញុំសឹងតែមិនអាចកម្រើកបាន ខ្ញុំមានអារម្មណ៍ថាដូចឈរលើខ្ទះក្តៅអីចឹង” ។

ប៉ុន្តែភ្លាមនោះ លោកទទួលអារម្មណ៍ថា មានអ្វីម្យ៉ាងមិនប្រក្រតី មិនគ្រប់គ្រាន់។ តាមធម្មតា លោកមានបទពិសោធ និងត្រូវបានបណ្តុះបណ្តាលដឹងរាល់តាកតិច នៃការបំពារបំពានសកម្មភាពអាវុធនុយក្លេអ៊ែរពីសហរដ្ឋអាមេរិក ប៉ុន្តែវាដូចជាប្លែក ដែលរ៉ាដាផ្កាយរណបចាប់ទិន្នន័យចាប់បានត្រឹមតែមីស៊ីលប៉ុន្មានគ្រាប់ លើសពីនោះ ប្រព័ន្ធរ៉ាដាចាប់នោះ ជាប្រព័ន្ធថ្មី ដែលស្ថិតនៅក្នុងភាពមិនទាន់ច្បាស់នៅឡើយ។

វិនាទីចុងក្រោយ លោកវីរសេនីយ៍ទោ សម្រេចមិនផ្ញើសញ្ញាអាសន្នភ្លាមទៅមេបញ្ជាការឡើយ ប៉ុន្តែលោកខំរកមើលព័ត៌មានបញ្ជាក់ពីអ្វីដែលប្រព័ន្ធថ្មីអាចនឹងមានបញ្ហា។

ជាភ័ព្វសំណាង លោកបានសម្រេចចិត្តពិតជាត្រឹមត្រូវ ។ ២៣ នាទីក្រោយមក គឺគ្មានអ្វីកើតឡើងនោះទេ គ្មានការបាញ់អាវុធណាមួយដូចដែលម៉ាស៊ីនរ៉ាដាបង្ហាញនោះទេ។

លោកបានបន្ថែមថា៖ “ប្រសិនបើហេតុការណ៍បាញ់ពិតមែន តាមបទពិសោធខ្ញុំប្រាកដជាដឹង។ តែពេលនោះគ្មានការបាញ់នោះទេ វាពិតជាដោះបន្ទុកធូរស្បើយពីក្នុងខួរក្បាលមែន”។

បើគិតមកវិញ វិនាទីដែលអតីតវេរសេនីយ៍រូបនេះបានសម្រេចចិត្តនោះ គឺបានជួយសង្គ្រោះដល់ពិភពលោកជាការពិត ដោយបានបញ្ចៀសនូវការតបតបំផ្ទុះឡើងជាសង្គ្រាមនុយក្លេអ៊ែររវាងអាមេរិក និងសហភាពសូវៀតពីពេលនោះមក។ ប៉ុន្តែយ៉ាងណាអតីតមន្រ្តីទ័ពអាកាសរូបនេះ នៅតែអះអាងថា ខ្លួនពុំមែនជាវីរបុរសឡើយ៖ “វាជាភារកិច្ចរបស់ខ្ញុំ ខ្ញុំគ្រាន់តែនៅកន្លែងត្រូវ និងចំពេលវេលាស្ថានភាពត្រូវប៉ុណ្ណោះ”។

ទោះយ៉ាងណា លោក Petrov បានស្លាប់បាត់បង់ជីវិតទៅហើយក្នុងឆ្នាំ ២០១៧ ក្នុងវ័យ ៧៧ ឆ្នាំ យ៉ាងណាមិញ រឿងរបស់លោកវរសេនីយ៍មិនត្រូវបានដឹងជាសាធារណឡើយ ពោលគឺក្រោយពេលដែលសហភាពសូវៀតដួលរលំ ទើបបានផ្ទុះឡើង ។

ទន្ទឹមនោះ មានការចាប់អារម្មណ៍ជាច្រើនទៅលើហេតុការណ៍ដែលលោកបានសម្រេចចិត្តមួយនេះ ដោយក្នុងនោះ លោកអតីតវរសេនីយ៍ក៏បានទទួលនូវពានរង្វាន់អន្តរជាតិជាច្រើនផងដែរ អំឡុងពេលចុងក្រោយនៃជីវិតរបស់លោក ដែលនៅឆ្នាំ២០១៥ គេក៏បានលើកឡើងពីរឿងរបស់លោកថតជាភាពយន្តឯកសារផងដែរដែលមានចំណងជើង “បុរសជួយសង្គ្រោះពិភពលោក ឬ The Man Who Saved The World” ។

គួររំឭកផងដែរថា លោក Stanislav Petrov ត្រូវបានចាត់ទុកជាមនុស្សទីពីរដែលបានជួយសង្រ្គោះផែនដីចៀសផុតពីភ្លើងសង្គ្រាមកម្រិតពិភពលោក ពោលគឺអាវុធនុយក្លេអ៊ែរ ក្នុងសម័យសង្គ្រាមត្រជាក់ ដែលលើកទីមួយក៏មានវរមន្ត្រីនៃអតីតសហភាពសូវៀតមួយរូបផងដែរ បានបញ្ចៀសពិភពលោកពីសង្គ្រាមលោកនុយក្លេអ៊ែរដោយការអត់ធ្មត់ និងសម្រេចចិត្តដ៏ត្រឹមត្រូវ កាលពីព្រឹត្តិការណ៍វិបត្តិមីស៊ីលនៅគុយបាក្នុងឆ្នាំ១៩៦២ ៕

ប្រែសម្រួល៖ មាន រតនា

ប្រភព៖ NPR , Vox

The post មកស្គាល់ បុរសជួយពិភពលោក បញ្ចៀសមិនឲ្យផ្ទុះសង្គ្រាមនុយក្លេអ៊ែរ តែគ្រប់គ្នាមិនសូវបានដឹង appeared first on Kampuchea Thmey Daily.

មេដឹកនាំសូវៀតចុងក្រោយបំផុត ទទួលមរណភាពក្នុងអាយុ ៩១ ឆ្នាំ (មានវីដេអូ)

Sok Sovann — Wed, 31 Aug 2022 00:29:49 +0000

លោក Mikhail Gorbachev អតីតមេដឹកនាំសូវៀត ដែលនាំសង្រ្គាមត្រជាក់ឲ្យដល់ទីបញ្ចប់ដោយសន្តិភាព បានទទួលមរណភាពក្នុងអាយុ ៩១ ឆ្នាំ។

លោក Mikhail Gorbachev

លោក Gorbachev ដែលចូលកាន់អំណាចក្នុងឆ្នាំ១៩៨៥ បានបង្ហាញមុខមាត់សហភាពសូវៀតទៅកាន់ពិភពលោក ហើយបានណែនាំនូវកំណែទម្រង់មួយចំនួនក្នុងសហភាពនេះ។ ប៉ុន្តែគាត់មិនអាចទប់ស្កាត់ការដួលរលំនៃសហភាពសូវៀត ពីការលេចឡើងនូវប្រទេសរុស្ស៊ីសម័យទំនើបបានទេ។

មន្ទីរពេទ្យប្រកាសថា គាត់មានជំងឺរ៉ាំរ៉ៃ និងធ្ងន់ធ្ងរ។ ក្នុងរយៈពេលប៉ុន្មានឆ្នាំចុងក្រោយនេះ សុខភាពរបស់គាត់បានធ្លាក់ចុះ ខ្លាំងមែនទែន។

កាលពីខែមិថុនា ប្រព័ន្ធផ្សព្វផ្សាយអន្តរជាតិបានរាយការណ៍ថា គាត់ត្រូវបានគេបញ្ជូនទៅមន្ទីរពេទ្យ ដោយសារជំងឺក្រលៀន ថ្វីបើជាមូលហេតុនៃការស្លាប់របស់គាត់ មិនត្រូវបានប្រកាសក៏ដោយ។

លោក Gorbachev នៅមន្ទីរពេទ្យ

លោក Gorbachev បានក្លាយជាអគ្គលេខាបក្សកុម្មុយនិស្តសូវៀត និងជាមេដឹកនាំប្រទេសនៅអាយុ៥៤ឆ្នាំ។

នៅពេលនោះ គាត់គឺជាសមាជិកក្មេងជាងគេនៃក្រុមប្រឹក្សាកាន់អំណាច ដែលគេស្គាល់ថាជាការិយាល័យនយោបាយ។ អ្នកស្នងតំណែងមុនរបស់គាត់គឺលោក Konstantin Chernenko បានទទួលមរណភាពក្នុងអាយុ ៧៣ ឆ្នាំបន្ទាប់ពីកាន់តំណែងបានជាងមួយឆ្នាំ។

នៅឆាកអន្តរជាតិ គាត់បានឈានដល់កិច្ចព្រមព្រៀងគ្រប់គ្រងអាវុធ ជាមួយសហរដ្ឋអាមេរិក ហើយបានបដិសេធធ្វើអន្តរាគមន៍ ពេលដែលប្រទេសនៅអឺរ៉ុបខាងកើត បានក្រោកឡើងប្រឆាំងនឹងមេដឹកនាំកុម្មុយនិស្តរបស់ពួកគេ។

លោក Gorbachev ចុះហត្ថលេខាលើកិច្ចព្រមព្រៀងគ្រប់គ្រងអាវុធជាមួយប្រធានាធិបតីអាមេរិកលោក Ronald Reagan ក្នុងឆ្នាំ១៩៨៧

នៅលោកខាងលិច គាត់ត្រូវបានគេមើលឃើញថា ជាស្ថាបត្យករនៃកំណែទម្រង់ ដែលបានបង្កើតលក្ខខណ្ឌសម្រាប់ការបញ្ចប់សង្រ្គាមត្រជាក់ក្នុងឆ្នាំ១៩៩១ ដែលជាពេលវេលានៃភាពតានតឹងយ៉ាងជ្រាលជ្រៅរវាងសហភាពសូវៀត និងប្រទេសលោកខាងលិច រួមទាំងសហរដ្ឋអាមេរិក និងចក្រភពអង់គ្លេសផងដែរ។

គាត់បានទទួលពានរង្វាន់ណូបែលសន្តិភាពក្នុងឆ្នាំ ១៩៩០ “សម្រាប់តួនាទីឈានមុខគេរបស់គាត់ ក្នុងការផ្លាស់ប្តូររ៉ាឌីកាល់នៅក្នុងទំនាក់ទំនងខាងកើត – ខាងលិច”។

ប៉ុន្តែនៅក្នុងប្រទេសរុស្ស៊ីសម័យថ្មីដែលបានលេចឡើងក្រោយឆ្នាំ១៩៩១ គាត់បានហាក់ដូចជាថមថយឥទ្ធិពល នៅក្នុងនយោបាយដែលផ្តោតលើគម្រោងអប់រំនិងមនុស្សធម៌។

លោក Gorbachev បានប៉ុនប៉ងវិលត្រលប់ទៅជីវិតនយោបាយវិញក្នុងឆ្នាំ១៩៩៦ ប៉ុន្តែទទួលបានសំឡេងគាំទ្រត្រឹមតែ ០,៥% ប៉ុណ្ណោះ នៅក្នុងការបោះឆ្នោតប្រធានាធិបតី។

គួរបញ្ជាក់ថា សពរបស់លោក Gorbachev នឹងត្រូវបញ្ចុះនៅទីបញ្ចុះសព Novodevichy ក្នុងទីក្រុងមូស្គូ នៅក្បែរភរិយារបស់គាត់ឈ្មោះ Raisa ដែលទទួលមរណភាពដោយសារជំងឺមហារីកឈាមក្នុងឆ្នាំ១៩៩៩៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ ទង់ជ័យជម្នះសម័យសង្គ្រាមលោកលើកទី ២ របស់ សូវៀត លេចឡើងនៅ ទូទាំងផ្នែកនៃ អ៊ុយក្រែន កាន់កាប់ដោយ រុស្ស៊ី

The post មេដឹកនាំសូវៀតចុងក្រោយបំផុត ទទួលមរណភាពក្នុងអាយុ ៩១ ឆ្នាំ (មានវីដេអូ) appeared first on Kampuchea Thmey Daily.

ដឹងទេ! «ណាតូ»របស់លោកសេរី ក៏មានគូប្រជែងដែរ គឺ«វ៉ាសូវី»របស់លោកកុម្មុយនីស្ត

vann sokunthea — Fri, 03 Jun 2022 04:00:19 +0000

ក្រោយសង្គ្រាមលោកលើកទី២ ពិភពលោកបែងចែកនយោបាយជា២ប្លុក គឺប្លុកមូលធននិយម( មនោគមវិជ្ជាសេរីលោកខាងលិច ) ដឹកនាំដោយ សហរដ្ឋអាមេរិក អង់គ្លេស និងបារាំង ខណៈប្លុកសង្គមនិយម(មនោគមវិជ្ជាកុម្មុយនិស្ត លោកខាងកើត) វិញ ដឹកនាំដោយ សហភាពសូវៀត។ ដើម្បីទប់ទល់នឹងការគំរាមរបស់«អង្គការណាតូ»របស់លោកសេរី សហភាពសូវៀត និងសាធារណរដ្ឋសង្គមនិយមទិសបូព៌ា បានរួមគ្នាបង្កើតសម្ព័ន្ធមិត្តយោធារួមមួយ ហៅថាអង្គការសន្ធិសញ្ញាវ៉ាសូវី។

តើអ្វីទៅជាអង្គការសន្ធិសញ្ញាវ៉ាសូវី?

នៅថ្ងៃទី១៤ ខែឧសភា ឆ្នាំ១៩៥៥ សហភាពសូវៀត អាល់បានី ប៉ូឡូញ រូម៉ានី ហុងគ្រី អាល្លឺម៉ង់ខាងកើត ឆេកូស្លូវ៉ាគី និងប៊ុលការី បានរួមគ្នាចុះកតិកាសញ្ញាវ៉ាសូវី នៅទីក្រុងវ៉ាសូវី ប្រទេសប៉ូឡូញ។ អង្គការយោធាមួយនេះ ស្ថិតនៅក្រោមការបញ្ជាគ្រប់គ្រងរបស់សហភាពសូវៀតដែលមានទីស្នាក់ការនៅក្រុងមូស្គូ។ អង្គការសន្ធិសញ្ញាវ៉ាសូវី មានឈ្មោះជាផ្លូវការថា «សន្ធិសញ្ញាមិត្តភាពកិច្ចសហប្រតិបត្តិការ និងជំនួយទៅវិញទៅមក ឬត្រូវបានគេស្គាល់ជាទូទៅថា កតិកាសញ្ញាវ៉ាសូវី(Warsaw Pact)»។

នៅឆ្នាំ១៩៥៥ ប្រទេសអាល្លឺម៉ង់ខាងលិច បានចូលរួមជាមួយ«សម្ព័ន្ធអាត្លង់ទិកខាងជើង»ដែលធ្វើឱ្យសហភាពសូវៀតមានការព្រួយបារម្ភចំពោះការពង្រឹងអំណាច និងគាំទ្ររបស់«អង្គការណាតូ»ចំពោះអាល្លឺម៉ង់ខាងលិច ទើបនៅឆ្នាំដដែលសហភាពសូវៀតរួមជាមួយប្រទេសជាសមាជិកផ្សេងទៀតរួមគ្នាបង្កើត«អង្គការសន្ធិសញ្ញាវ៉ាសូវី»ឡើង ដោយសង្ឃឹមថា អាចនឹងទប់ទល់ជាមួយអាល្លឺម៉ង់ខាងលិចបាន ព្រមទាំងអាចចរចាដោយស្មើភាពជាមួយ«អង្គការសន្ធិសញ្ញាអាត្លង់ទិកខាងជើង»។

«សន្ធិសញ្ញាវ៉ាសូវី» មានគោលដៅក្នុងការបង្រួបបង្រួមកងកម្លាំងយោធា និងពង្រឹងការគ្រប់គ្រងរបស់សហភាពសូវៀតទៅលើប្រទេសដែលជាសមាជិកផ្សេងទៀត។ «សន្ធិសញ្ញាវ៉ាសូវី» បានបំពេញបន្ថែមផ្នែកយោធាទៅដល់ក្រុមប្រឹក្សាជំនួយសេដ្ឋកិច្ចដែលជាអង្គការសេដ្ឋកិច្ចក្នុងតំបន់សម្រាប់រដ្ឋកុម្មុយនិស្តនៃអឺរ៉ុបកណ្ដាល និងខាងកើត។ កងកម្លាំងយោធារបស់«អង្គការសន្ធិសញ្ញាវ៉ាសូវី» បានប្រើប្រាស់ជាទូទៅសម្រាប់គ្រប់គ្រងកុម្មុយនីស្តនៅក្នុងប្លុកបូព៌ា។ ចំណុចស្នូលនៃកតិកាសញ្ញានេះគឺ ការចូលរួមជួយអន្តរាគមន៍ពីរដ្ឋជាសមាជិក ប្រសិនបើប្រទេសមួយហាក់ដូចជាកំពុងតែបំពានលើគំនិតស្នូល និងមុខងាររបស់បក្សកុម្មុយនីស្តដែលមានចែងយ៉ាងច្បាស់ក្នុងគោលលទ្ធិ Brezhnev ។ ម្យ៉ាងទៀត កតិកាសញ្ញានេះ ក៏មាននាទីជាគន្លឹះមួយ ដើម្បីបង្កើនការចរចារបស់សហភាពសូវៀតក្នុងទំនាក់ទំនងអន្តរជាតិផងដែរ។ ទោះបីជាមានសមូហភាពនៃគំនិតក៏ដោយ ក៏សហភាពសូវៀត បានដើរតួនាទីធំជាងគេនៅក្នុងការសម្រេចចិត្តនៅក្នុងកតិកាសញ្ញានេះ។ សហភាពសូវៀតបានប្រើប្រាស់កតិកាសញ្ញានេះ ក្នុងការអំពាវនាវកងកម្លាំងយោធា ដើម្បីទប់ស្កាត់ប្រទេសណាដែលមិនពេញចិត្តនឹងការគ្រប់គ្រងរបស់ខ្លួន។

កតិកាសញ្ញានេះ រដ្ឋជាសមាជិកបានព្រមព្រៀងគ្នាក្នុងការស្វែងរកដំណោះស្រាយដោយសន្តិវិធីចំពោះជម្លោះអន្តរជាតិ និងសហការជាមួយរដ្ឋផ្សេងទៀតក្នុងការគ្រប់គ្រងសកម្មភាពអន្តរជាតិ។ បន្ថែមលើនេះ ពិគ្រោះយោបល់គ្នាទៅវិញទៅមកលើបញ្ហាអន្តរជាតិទាំងអស់ដែលប៉ះពាល់ដល់ផលប្រយោជន៍រួមរបស់ពួកគេ និងការពារគ្នាទៅវិញទៅមក ប្រសិនបើរដ្ឋសមាជិកមួយ ឬច្រើនត្រូវបានវាយប្រហារ។ កតិកាសញ្ញានេះ បង្កើតបញ្ជាការរួម និងគណៈកម្មាធិការពិគ្រោះយោបល់នយោបាយ។ រដ្ឋជាសមាជិកបានសន្យាថា នឹងបដិសេធមិនចូលរួមសម្ព័ន្ធភាព និងកិច្ចព្រមព្រៀងណា ដែលមានគោលបំណងផ្ទុយទៅនឹងកតិកាសញ្ញានេះ និងអនុញ្ញាតឱ្យរដ្ឋផ្សេងទៀត អាចចូលជាសមាជិកផងដែរ ដោយមិនគិតពីប្រព័ន្ធសង្គម និងនយោបាយរបស់ពួកគេ។

យ៉ាងណាមិញ នៅឆ្នាំ១៩៥៦ ប្រទេសហុងគ្រីបានដកខ្លួនចេញពី«កតិកាសញ្ញាវ៉ាសូវី»នេះ បន្ទាប់ពីមានការធ្វើបដិវត្តន៍ដែលនាំឱ្យប្រជាជនហុងគ្រីចំនួន២៥០០ត្រូវបាត់បង់ជីវិតនៅប្រទេសឆែក(សាធារណរដ្ឋ) ក្នុងឆ្នាំ ១៩៦៨ និងប៉ូឡូញ ក្នុងឆ្នាំ១៩៨១។ ក្រោយមក មានការដកខ្លួនពីប្រទេសមួយចំនួន ដូចជា អាល់បានី(១៩៦៨) និងការដកខ្លួនរបស់អាល្លឺម៉ង់ខាងកើត(១៩៩០) ដើម្បីរួបរួមជាមួយអាល្លឺម៉ង់ខាងលិចវិញ។

នៅថ្ងៃទី០១ ខែកក្កដា ឆ្នាំ១៩៩១ មេដឹកនាំ«សន្ធិសញ្ញាវ៉ាសូវី» បានប្រកាសបិទសន្ធិសញ្ញានេះថា«លែងមាន»នៅឯកិច្ចប្រជុំកំពូលចុងក្រោយរបស់មេដឹកនាំកតិកាសញ្ញាវ៉ាសូវីនៅទីក្រុងប្រាក ប្រទេសឆេកូស្លូវ៉ាគី។ កងទ័ពសហភាពសូវៀតដែលបានដាក់ពង្រាយនៅតាមប្រទេសជាសមាជិកទាំងអស់ត្រូវបានដកចេញជាបណ្ដើរៗ។ ក្រៅពីប្រទេសរុស្សីដែលជារដ្ឋរបស់សូវៀត ប្រទេសដែលធ្លាប់ជាសមាជិកផ្សេងៗទៀតនៃ«សន្ធិសញ្ញាវ៉ាសូវី»បានចូលរួមជាមួយ«អង្គការសន្ធិសញ្ញាអាត្លង់ទិក»ខាងជើងហៅកាត់ថាណាតូជាបន្តបន្ទាប់។ ចំណែកអង្គការណាតូ នៅមានជីវិតមកដល់បច្ចុប្បន្ននេះ៕

ដោយ ៖ សេម វាសនា

The post ដឹងទេ! «ណាតូ»របស់លោកសេរី ក៏មានគូប្រជែងដែរ គឺ«វ៉ាសូវី»របស់លោកកុម្មុយនីស្ត appeared first on Kampuchea Thmey Daily.

មកមើលរូបភាពសំណល់យោធាក្នុងមូលដ្ឋានទ័ពសូវៀតដែលគេបោះបង់ចោលរាប់សិបឆ្នាំមកហើយ

Sok Sovann — Sat, 28 Nov 2020 09:30:50 +0000

អ្នកថតរូបម្នាក់បានចាប់យករូបភាពមិនគួរឲ្យជឿនៃសំណល់យោធាដែលធ្លាប់តែអស្ចារ្យរបស់សហភាពសូវៀត។

រូបថតពីលើអាកាសបានបង្ហាញរថក្រោះយ៉ាងតិចមួយពាន់គ្រឿងដែលត្រូវបានគេបោះបង់ចោលនៅចុងភាគខាងកើតប្រទេសរុស្ស៊ីបន្ទាប់ពីការដួលរលំ សហភាពសូវៀត។

រូបភាពមួយទៀតបានបង្ហាញពីយន្ដហោះចម្បាំងធុន MiG-23 ចំនួនពីរគ្រឿងដែលត្រូវបានទុកចោលអស់រយៈពេល២៥ឆ្នាំនៅឯអតីតមូលដ្ឋានសូវៀតដែលគេបោះបង់ចោល។

យន្ដហោះទាំងនោះត្រូវបានទុកចោលក្នុងឃ្លាំងនៅឯមូលដ្ឋានទ័ពអាកាស Sakhalin។

រូបភាពផ្សេងទៀតបានបង្ហាញពីជួរឧទ្ធម្ភាគចក្រដែលគេបោះបង់ចោល ដោយស្លាបនិងគ្រឿងមានតម្លៃផ្សេងទៀតត្រូវបានគេរុះរើ។

ឧទ្ធម្ភាគចក្រត្រូវបានទុកឲ្យច្រេះស៊ីបន្ទាប់ពីហិរញ្ញប្បទានរដ្ឋសម្រាប់សាលាហោះហើរបានបញ្ចប់។

រូបភាពទាំងនេះត្រូវបានថតដោយអ្នកថតរូបទីក្រុងមូស្គូឈ្មោះ Lana Sator នៅពេលនាងធ្វើដំណើរពាសពេញប្រទេសដោយរកឃើញវត្ថុសម័យដើមដែលត្រូវបានគេបំភ្លេចចោលក្នុងរដ្ឋកុម្មុយនិស្តដែលបានដួលរលំ។

ស្រ្តីអាយុ៣១ឆ្នាំរូបនេះបាននិយាយថា “ខ្ញុំកំពុងព្យាយាមធ្វើឲ្យមនុស្សមានអារម្មណ៍បែបសិល្បៈនិងបរិយាកាសនិងថាមពលនៃទីកន្លែងដែលត្រូវគេបោះបង់ចោល។ រូបថតដែលខ្ញុំបានថតពីលើអាកាសមើលទៅពិតជាអស្ចារ្យនិងមានថាមពលណាស់”៕

ប្រែសម្រួលដោយ៖ Vann Vann

ប្រភព៖ The Sun