ការអភិរក្ស និងការរៀបចំទុកដាក់សមុច្ច័យវត្ថុបុរាណ និងវត្ថុសិល្បៈក្នុងសារមន្ទីរ គឺជាកិច្ចការសង្គ្រោះ និងថែទាំ ដើម្បីបន្តអាយុកាលឱ្យវត្ថុទាំងនោះមានភាពរឹងមាំ និងគង់វង្សយូរអង្វែងសម្រាប់អនាគត។ ជាក់ស្តែង សារមន្ទីរខេត្តកំពង់ឆ្នាំង បានរក្សាទុកសមុច្ច័យជាច្រើនប្រភេទ រួមមាន វត្ថុធ្វើពីថ្មភក់ វត្ថុលោហៈដូចជា មាស សំរឹទ្ធ ប្រាក់ និងស្ពាន់ កុលាលភាជន៍ វត្ថុធ្វើពីឈើ ជ័រ ប្រមរ សាស្រ្តាស្លឹករឹត ព្រមទាំងសៀវភៅចាស់ៗជាច្រើនផងដែរ។

ក្រៅពីការរៀបចំដាក់តាំងវត្ថុបុរាណ និងវត្ថុសិល្បៈ សម្រាប់សាធារណជនចូលទស្សនា សារមន្ទីរខេត្តកំពង់ឆ្នាំង ក៏បានអនុវត្តការអភិរក្សសមុច្ច័យជាប្រចាំ តាមសមត្ថភាព និងលទ្ធភាពដែលមន្ត្រីជំនាញអាចអនុវត្តបាន។

មន្ត្រីជំនាញនៃសារមន្ទីរខេត្តកំពង់ឆ្នាំង បានទទួលការបណ្តុះបណ្តាលពីមន្ត្រីមានបទពិសោធន៍នៅរោងជាងនៃសារមន្ទីរជាតិកម្ពុជា ជាច្រើនលើកច្រើនសារ ដើម្បីពង្រឹងជំនាញក្នុងការអភិរក្ស និងថែទាំវត្ថុបុរាណឱ្យបានត្រឹមត្រូវតាមបច្ចេកទេស។

សម្រាប់ការងារអភិរក្សប្រចាំថ្ងៃ មន្ត្រីសារមន្ទីរបានធ្វើការជូតសម្អាតធូលីដី ស្នាមប្រលាក់ និងស្នឹមតិចតួចលើសមុច្ច័យ ដោយប្រើវិធីសម្អាតទាំងស្ងួត និងសម្អាតសើម ដើម្បីរក្សាសភាពដើម និងការពារការខូចខាតនៃវត្ថុបុរាណ៕

The post សារមន្ទីរខេត្តកំពង់ឆ្នាំង បន្តអភិរក្ស និងថែរក្សាវត្ថុបុរាណជាច្រើនប្រភេទ appeared first on Kampuchea Thmey Daily.

ជាទូទៅ សង្គ្រាមត្រូវបានកត់ត្រាត្រឹមតែកាលបរិច្ឆេទនៅក្នុងសៀវភៅសិក្សា ឈុតឆាកផ្ទុះឆេះក្នុងភាពយន្ត ឬអារម្មណ៍ទុក្ខសោកក្នុងប្រលោមលោក។ ទោះជាយ៉ាងណាក៏ដោយ សង្គ្រាមអាចត្រូវបានពន្យល់ផ្សេងៗគ្នា តាមទស្សនវិស័យផ្សេងគ្នា។ យើងឃើញចំណុចនេះនៅក្នុងសារមន្ទីរពាក់ព័ន្ធនឹងសង្គ្រាមវៀតណាម៖ នៅវៀតណាម គេរៀបរាប់ថា ជាការតស៊ូដើម្បីរំដោះប្រទេសពីចក្រពត្តិនិយម ប៉ុន្តែនៅអូស្ត្រាលី គេបកស្រាយថា ជាការតស៊ូដើម្បីការពារសណ្ដាប់ធ្នាប់ពិភពលោក។ ជម្លោះ និងសង្រ្គាមរវាងកម្ពុជានិងថៃ ក៏សមនឹងទទួលបានការចងក្រងឯកសារយ៉ាងល្អិតល្អន់បែបនេះដែរ ដែលជាការកត់ត្រានូវទុក្ខវេទនារបស់មនុស្សជាតិ និងការរីកចម្រើនផ្នែកបច្ចេកវិទ្យា ស្របពេលដែលសង្គ្រាមនេះត្រូវតែពន្យល់នៅក្នុងបរិបទនៃសណ្ដាប់ធ្នាប់ពិភពលោកដែលជិតដួលរលំ និងដែនអំណាចនៃច្បាប់អន្តរជាតិ និងសន្ធិសញ្ញានានារបស់អង្គការសហប្រជាជាតិត្រូវបានចោទជាសំណួរ។

ឈរនៅចំណុចរបត់នៃឆ្នាំ ២០២៦ នេះ យើងត្រូវទទួលស្គាល់ថា សន្តិភាពមិនមែនគ្រាន់តែជាអវត្តមាននៃសំឡេងកាំភ្លើង និងគ្រាប់បែកនោះទេ ប៉ុន្តែវាគឺជាវត្តមាននៃការចងចាំ។ ខាងក្រោមនេះគឺជាវិធីដែលគម្រោងសារមន្ទីរនេះនឹងបម្រើជាស្ពានដ៏សំខាន់រវាងភាពអរូបីនៃប្រវត្តិសាស្ត្រ និងបទពិសោធន៍ជាក់ស្តែងរបស់មនុស្សជាតិ៖

១. ការរក្សានូវវត្ថុតាងជាក់ស្តែង៖ លើសពីទិន្នន័យ

សង្គ្រាមច្រើនតែត្រូវបានកត់ត្រាជាតួលេខបែបស្ថិតិ ចំនួនមនុស្សស្លាប់ ចំនួនជនរងគ្រោះ និងហេដ្ឋារចនាសម្ព័ន្ធដែលត្រូវបានបំផ្លាញ។ យើងត្រូវប្រមូលទិន្នន័យពីរបាយការណ៍នានារបស់ប្រព័ន្ធផ្សព្វផ្សាយ មន្ទីរពេទ្យ និងអង្គការមនុស្សធម៌ ដើម្បីចងក្រងឯកសារតួលេខបែបស្ថិតិខាងលើ ដោយសារការបាញ់បោះ គ្រាប់ផ្លោង គ្រាប់បែក ផ្សែងពុល ឬមីន។ ទោះជាយ៉ាងណាក៏ដោយ កាតព្វកិច្ចរបស់ សារមន្ទីរគឺ៖

• ធ្វើបញ្ជីជនរងគ្រោះប្រកបដោយភាពជាមនុស្ស៖ តាមរយៈអ្វីដែលនៅសេសសល់ សារមន្ទីរត្រូវតែ “ពង្រីក” ឱ្យឃើញនូវទំហំនៃជនរងគ្រោះដែលបានរាយការណ៍។ ស្បែកជើងចាស់មួយគូ   ខោអាវប្រឡាក់ដោយឈាម ឆ្នាំងបាយដែលបែកបាក់ សំបុត្រផ្ទាល់ខ្លួន ឬស្នាដៃសិល្បៈ ធ្វើឱ្យទំហំនៃសង្គ្រាមអាចយល់បាននៅកម្រិតបុគ្គល។
• ការចងក្រងឯកសារអំពីបច្ចេកវិទ្យា៖ ជម្លោះចាប់តាំងពីសតវត្សរ៍ទី ១៣​ រវាងខ្មែរ​/កម្ពុជា និងសៀម/ថៃ យើងបានឃើញការវិវត្តនៃបច្ចេកវិទ្យា ចាប់ពីថ្នាំបុរាណ និងកញ្ចប់វេជ្ជសាស្ត្រសាមញ្ញ គ្រឿងសព្វាវុធបុរាណដូចជាដាវ លំពែង ធ្នូ និងព្រួញ រហូតដល់ការទំលាក់គ្រាប់បែកពីយន្តហោះចម្បាំងទំនើបៗជាលើកដំបូងក្នុងលោកដូចជា Gripen និង T-50។ តាមរយៈការរក្សាទុកវត្ថុទាំងនេះ យើងបង្ហាញពីរបៀបដែលភាពច្នៃប្រឌិតត្រូវបានជម្រុញ និងត្រូវបានប្រើប្រាស់ក្នុងផ្លូវងងឹត ដោយសារគំនិតជាតិនិយមជ្រុលនិយម និងភូមិសាស្ត្រនយោបាយដ៏ស្មុគស្មាញ ដែលបង្កើតទៅជាទុក្ខវេទនារបស់មនុស្សជាតិ និងការអាចឈានទៅដល់ការប្រកាន់ពូជសាសន៍។

២. ការអប់រំក្រៅសៀវភៅសិក្សា៖ ថ្នាក់រៀននៃតថភាពពិត

សារមន្ទីរសង្គ្រាម គឺជាថ្នាក់រៀនអំពីសង្រ្គាមដែលមានឥទ្ធិពលបំផុតក្នុងលោក។ ពួកគេជំរុញឱ្យមនុស្សជំនាន់ក្រោយឈានហួសពីសំណួរថា «តើនរណាជាអ្នកឈ្នះ?» ហើយសួរថា «ហេតុអ្វីបានជាវាកើតឡើង?» និង «តើត្រូវបង់ខាតអ្វីខ្លះ?»

• ការរៀនសូត្រតាមរយៈបរិយាកាសថតចម្លង៖ ការប្រើប្រាស់រូបភាពតាំងបង្ហាញ សម្លេង និង     បច្ចេកវិទ្យានិម្មិត ក៏ដូចជាស្នាដៃសិល្បៈ ដើម្បីបង្កើតឡើងវិញនូវភាពតានតឹងក្នុងពេលសង្រ្គាម និងក្រោយសង្រ្គាមនឹងជួយបង្កើតឱ្យមានសមានចិត្ត ដែលការអានសៀវភៅធម្មតាមិនអាច     បណ្តុះឲ្យមាន។
• ការព៌ណនាប្រកបដោយពហុទស្សនវិស័យ៖ ដើម្បីចៀសវាងត្រឹមតែជា «សាលឃោសនា»សារមន្ទីរត្រូវតែបញ្ចូលសម្លេងរបស់ប្រជាជនស៊ីវិល អ្នកទោសសង្គ្រាម ការយល់ឃើញពីសំណាក់អ្នកប្រាជ្ញ និងសារព័ត៌មានបរទេស និងសូម្បីតែពីអតីតសត្រូវ។ តាមរយៈការបង្ហាញការពិតពីច្រើនជ្រុងនេះ យើងលើកទឹកចិត្តឱ្យប្រជាពលរដ្ឋចេះគិតពិចារណាឱ្យបានហ្មត់ចត់អំពីការឃោសនា និងភាពស្មុគស្មាញនៃល្បែងនយោបាយ និងភូមិសាស្ត្រនយោបាយ          សកលលោកនាដើមសតវត្សរ៍ទី២១។

៣. វត្តអារាមលោកិយសម្រាប់ការចងចាំ

សម្រាប់ប្រជាជនកម្ពុជាជាច្រើន សារមន្ទីរនេះនឹងដើរតួជា «វត្តអារាមលោកិយ» ជាទីកន្លែងសម្រាប់ឧទ្ទិសកុសល ដែលប្រជាជាតិអាចរួមគ្នាគោរពវិញ្ញាណក្ខន្ធ កសាងស្មារតីនៃភាពជាសហគមន៍ និងសាមគ្គីភាព។

• សាលនៃបញ្ជីឈ្មោះ៖ សម្រាប់ក្រុមគ្រួសារដែលគ្មានចេតីយ៍/ផ្នូរជាក់លាក់ សម្រាប់ការគោរពវិញ្ញាណក្ខន្ធ ឬសម្រាប់អ្នកដែលបាត់ខ្លួនក្នុងអំឡុងពេលសង្គ្រាម ជញ្ជាំងអនុស្សាវរីយ៍នេះនឹងធានាថា មនុស្សជាទីស្រឡាញ់របស់ពួកគេមិនត្រូវបានគេបំភ្លេចចោលឡើយ។
• ជាពំនឹងសម្រាប់វីរៈកងទ័ព៖ ប្រហែលជាគ្មាននរណាម្នាក់យល់ពីតថភាពពិតនៃការបម្រើជាតិរបស់វីរៈកងទ័ពនោះទេ ប៉ុន្តែសារមន្ទីរនេះនឹងផ្តល់ជាកន្លែងមួយដើម្បីឲ្យសាធារណជនទូទៅទទួលស្គាល់ និងមើលឃើញពីការលះបង់ទាំងជីវិត កាយ និងចិត្តរបស់ពួកគាត់។

៤. ជាការព្រមាន៖ ភាពផុយស្រួយនៃសន្តិភាព

តួនាទីដ៏សំខាន់បំផុតមួយទៀតនៃគម្រោងសារមន្ទីរសង្គ្រាមនេះ គឺការរួមចំណែកដល់ការសិក្សាអំពីជម្លោះ និងការអប់រំសន្តិភាព។

• តាមរយៈការបង្ហាញតថភាពពិតនៃអំពើហិង្សា និងភាពសាហាវឃោឃៅ រួមទាំងផលវិបាកនៃរបួសផ្លូវចិត្ត និងជនភៀសសឹក សារមន្ទីរនេះមានតួនាទីយ៉ាងសកម្មក្នុងការដាស់តឿនស្មារតី      មនុស្ស។ វាបញ្ជាក់ថា ទោះបីជាបទឈប់បាញ់ គឺជាការធូរស្រាល ប៉ុន្តែផ្លូវឆ្ពោះទៅរកអនាគតប្រកបដោយសន្តិភាព ទាមទារឱ្យមានការរំលឹកជានិច្ចអំពីការបំផ្លិចបំផ្លាញដែលយើងទើបតែបានគេចផុត។
• ឃ្លាដ៏ល្បីល្បាញរបស់លោក George Santayana បានបង្រៀនយើងថា៖ “អ្នកដែលមិនអាចចងចាំពីអតីតកាលបាន នឹងត្រូវបណ្តាសាឱ្យដើរជាន់ដានចាស់ឡើងវិញ។”

សារមន្ទីរសង្គ្រាមកម្ពុជា-ថៃ ត្រូវតែបដិសេធមិនបណ្តោយឱ្យអតីតកាលប្រែជាស្ងប់ស្ងាត់ ឡើយ។ វាត្រូវតែផ្លាស់ប្តូរទិន្នន័យប្រវត្តិសាស្ត្រដ៏ត្រជាក់នេះ ឱ្យទៅជាកិច្ចសន្ទនាដែលរស់រវើកអំពីអត្ថន័យនៃភាពជាមនុស្សក្នុងគ្រាមានវិបត្តិ។ តាមរយៈការរក្សាវត្ថុតាងនៃគ្រាដ៏ខ្មៅងងឹតបំផុតរបស់យើងចាប់តាំងពីសតវត្សរ៍ទី ១៣ យើងកំពុងផ្តល់ពន្លឺចាំបាច់ដើម្បីតម្រង់ទិស មិនត្រឹមតែឆ្ពោះទៅរកអនាគតដែលពេញដោយសន្តិភាពប៉ុណ្ណោះទេ ប៉ុន្តែថែមទាំងជាការរំលឹកខ្លួនឯងអំពីភាពធន់ និងគម្រោងដែលផ្ដោតលើអនាគតសម្រាប់ប្រជាជាតិរបស់យើង៕

ដោយ៖ សាស្រ្តាចារ្យ អ៊ុន លាង

ព្រឹទ្ធបុរស​ មហាវិទ្យាល័យសង្គមសាស្រ្ត-មនុស្សសាស្រ្តនៃសាកលវិទ្យាល័យភូមិន្ទភ្នំពេញ

The post ហេតុអ្វីចាំបាច់មានគម្រោងសារមន្ទីរសង្គ្រាមកម្ពុជា-ថៃ? appeared first on Kampuchea Thmey Daily.

ថ្ងៃនេះ កម្ពុជាថ្មី សូមណែនាំពីសារមន្ទីរ ៤ទីតាំង នៅក្នុងខេត្តសៀមរាប ដែលដកស្រង់ចេញពី App Visit Angkor របស់អាជ្ញាធរជាតិអប្សរា ដើម្បីអាចឱ្យភ្ញៀវទេសចរជាតិ និងអន្តរជាតិ បានស្គាល់ពីវប្បធម៌ខ្មែរ។

១.សារមន្ទីរព្រះនរោត្តមសីហនុ-អង្គរ

សារមន្ទីរព្រះនរោត្តមសីហនុ-អង្គរ មានទីតាំងនៅភូមិបឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប បើកដំណើរការទទួលភ្ញៀវទេសចរចូលទស្សនានៅឆ្នាំ២០០៨។ សារមន្ទីរនេះ កសាងឡើងក្រោមកិច្ចសហប្រតិបត្តិការរវាងអាជ្ញាធរជាតិអប្សរា និងសាកលវិទ្យាល័យសូហ្វីយ៉ា។ បច្ចុប្បន្ន សារមន្ទីរនេះមានពិព័រណ៍អចិន្ត្រៃយ៍ចំនួន៣ ដែលសុទ្ធសឹងតែជាលទ្ធផលនៃកំណាយស្រាវជ្រាវក្នុងតំបន់អង្គរ។ ពិព័រណ៍វត្ថុដែលមាននៅក្នុងសារមន្ទីរនេះ អាចឱ្យភ្ញៀវទេចរយល់កាន់តែច្បាស់ពីប្រាសាទ និងវត្ថុនោះ។

សារមន្ទីរខាងលើ​ បើកពីថ្ងៃអង្គារ ដល់ថ្ងៃអាទិត្យ ចាប់ពីម៉ោង ៨ៈ៣០នាទីព្រឹក ដល់ម៉ោង ៤៖៣០នាទីល្ងាច។ សម្រាប់ថ្ងៃចន្ទ និងរាល់ថ្ងៃបុណ្យជាតិធំៗដូចជា បុណ្យចូលឆ្នាំខ្មែរ បុណ្យភ្ជុំបិណ្ឌ និងព្រះរាជពិធីបុណ្យអុំទូក សារមន្ទីរមិនបើកដំណើរការនោះទេ។ ចំពោះសំបុត្រចូលទស្សនាវិញ ភ្ញៀវជាតិ តម្លៃ ១០០០រៀល រីឯ ភ្ញៀវអន្តរជាតិ តម្លៃ ៣ដុល្លារ។ ជាងនេះ សារមន្ទីរ មិនគិតថ្លៃលើកុមារអាយុក្រោម១២ឆ្នាំនោះទេ រីឯ ព្រះសង្ឃ និងកងកម្លាំងប្រដាប់អាវុធ អាចនិមន្ត និងចូលទស្សនាបានដោយឥតគិតថ្លៃ។ ទន្ទឹមនោះ ភ្ញៀវជាតិ អាចមានឱកាសចូលទស្សនាដោយឥតគិតថ្លៃរៀងរាល់ថ្ងៃសៅរ៍ ដើមខែផងដែរ។

២.សារមន្ទីរគ្រាប់មីនកម្ពុជា និងមូលនិធិសង្គ្រោះ

សារមន្ទីរគ្រាប់មីនកម្ពុជា និងមូលនិធិសង្គ្រោះ ត្រូវបានបង្កើតឡើងនៅឆ្នាំ១៩៩៧ ដោយលោក អាគីរ៉ា អតីតអ្នកដោះមីនស្ម័គ្រចិត្ត សព្វថ្ងៃមានទីតាំងនៅ ភូមិខ្នារ ឃុំខ្នារសណ្តាយ ស្រុកបន្ទាយស្រី ខេត្តសៀមរាប។ បើតាម App Visit Angkor បានបញ្ជាក់ថា សំបកគ្រាប់មីន និងគ្រាប់យុទ្ធភ័ណ្ឌដែលគ្មានសារធាតុរំសេវផ្ទុះ ត្រូវបានប្រមូល និងយកដាក់តាំងពិព័រណ៍ឱ្យភ្ញៀវទេសចរទស្សនាដោយឥតគិតថ្លៃនៅទីតាំងដំបូងរបស់សារមន្ទីរ ដែលស្ថិតនៅមាត់ស្ទឹងក្រុងសៀមរាប។ រហូតដល់ឆ្នាំ២០០៧ សារមន្ទីរមួយនេះបានចូលជាប្រភេទអង្គការក្រៅរដ្ឋាភិបាលក្នុងស្រុក និងត្រូវបានផ្លាស់ប្តូរទីតាំងមកកាន់ស្រុកបន្ទាយស្រី និងប្តូរឈ្មោះជា សារមន្ទីរគ្រាប់មីនកម្ពុជា និងមូលនិធិសង្គ្រោះ ដើម្បីស្វែងរកជំនួយ និងលក់សំបុត្រ ដើម្បីជួយឧបត្ថម្ភដល់ក្រុមការងារបោសសម្អាតមីន ជនមានពិការភាព និងគាំទ្រដល់ការសិក្សារបស់សិស្សនៅតាមជនបទ។

សារមន្ទីរនេះ បើកពីថ្ងៃចន្ទ ដល់ថ្ងៃអាទិត្យ ចាប់បីម៉ោង៧៖៣០នាទីព្រឹក ដល់ម៉ោង ៥៖៣០នាទីល្ងាច និងបិទរាល់បុណ្យជាតិ។ សម្រាប់ភ្ញៀវជាតិ​ អាចចូលទស្សនាសារមន្ទីរនេះដោយឥតគិតថ្លៃ ចំណែក ភ្ញៀវអន្តរជាតិ សំបុត្រមានតម្លៃ ៥ដុល្លារ សម្រាប់មនុស្សម្នាក់ ហើយសម្រាប់ Audio Guide គឺមិនគិតប្រាក់ឡើយ។

៣.សារមន្ទីរវាយនភណ្ឌប្រពៃណីអាស៊ី

សារមន្ទីរវាយនភណ្ឌប្រពៃណីអាស៊ី បើកដំណើរការនៅឆ្នាំ២០១៤ មានទីតាំងនៅភូមិបឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប។ សារមន្ទីរនេះ បង្កើតឡើងដើម្បីឱ្យសាធារណជនស្គាល់ពីប្រពៃណីនៃការផលិតវាយនភណ្ឌជាច្រើនពីប្រទេសឥណ្ឌា និងតំបន់ដីសណ្តទន្លេមេគង្គ ដោយមានបង្ហាញពីផលិតផលវាយនភណ្ឌដ៏ល្អឯកពីប្រទេសជុំវិញទន្លេមេគង្គ និងទន្លេគង្គា មានដូចជា ប្រទេសកម្ពុជា ឡាវ ភូមា ថៃ និងឥណ្ឌា។

សារមន្ទីរវាយនភណ្ឌប្រពៃណីអាស៊ី បើកពីថ្ងៃពុធ ដល់ថ្ងៃចន្ទ ចាប់បីម៉ោង ៨៖៣០នាទីព្រឹក ដល់ម៉ោង ៤៖៣០នាទីព្រឹក និងបិទរាល់ថ្ងៃអង្គារ និងថ្ងៃបុណ្យជាតិផ្សេងៗដូចជា បុណ្យចូលឆ្នាំខ្មែរ ព្រះរាជពិធីចម្រើនព្រះជន្ម បុណ្យភ្ជុំបិណ្ឌ និងព្រះរាជពិធីបុណ្យអុំទូក។ ភ្ញៀវជាតិចូលទស្សនាអស់ម្នាក់ ១០០០រៀល ឯ អន្តរជាតិ ៣ដុល្លារ។

៤.សារមន្ទីរវិមានសុខា

សារមន្ទីរវិមានសុខា កើតចេញពីការស្រឡាញ់សម្ភារៈចាស់ៗរបស់ លោក លី ប៉េងហេង ហើយលោកក៏បានបើកសារមន្ទីរនេះឡើងមក ដោយយកឈ្មោះមនុស្សជាទីស្រឡាញ់២រូបមកដាក់ គឺកូនប្រុសឈ្មោះ វិមាន និងភរិយាឈ្មោះ សុខា បង្កើតបានឈ្មោះសារមន្ទីរ វិមានសុខា។ សារមន្ទីរនេះ ស្ថិតនៅផ្លូវ២២ ភូមិត្រពាំងសេះ សង្កាត់គោកចក ក្រុងសៀមរាប ខេត្តសៀមរាប។

សារមន្ទីរវិមានសុខា ដាក់តាំងបង្ហាញសុទ្ធសឹងតែជាសម្ភារៈដែលប្រើអំឡុងទស្សវត្សឆ្នាំ៤០ ដល់៦០ និងមួយចំនួនទៀតផលិតតាំងពីឆ្នាំ១៧៥៧មក។ សម្ភារៈក្នុងសារមន្ទីរមានដូចជា ម៉ូតូ កង់ នាឡិកា ម៉ាស៊ីនថត ជាដើម។ សារមន្ទីរនេះ បើករៀងរាល់ថ្ងៃ ចាប់បីម៉ោង៨ព្រឹក ដល់ម៉ោង៥ល្ងាច សម្រាប់ភ្ញៀវជាតិ សំបុត្រតម្លៃ ១ម៉ឺនរៀល ឯ បរទេស តម្លៃ ៥ដុល្លារ៕

The post ក្រៅពីប្រាសាទអង្គរវត្ត ភ្ញៀវទេសចរអាចទស្សនាសារមន្ទីរចំនួន ៤ទីតាំង នៅខេត្តសៀមរាប appeared first on Kampuchea Thmey Daily.

សារមន្ទីរខេត្តកំពង់ឆ្នាំង ជាមណ្ឌលប្រមូលផ្តុំបុរាណវត្ថុជាច្រើន ចាប់ពីសម័យបុរេប្រវត្តិសាស្រ្ត រហូតដល់សម័យបច្ចុប្បន្ន ដែលបានមកពីបុរាណដ្ឋាន និងរមណីដ្ឋានប្រាសាទនានាក្នុងខេត្តកំពង់ឆ្នាំង។ សូមជម្រាបថា សារមន្ទីរខេត្តកំពង់ឆ្នាំង ជាតួអគារមួយខ្នងលាបពណ៌ក្រហម ដែលសង់ជាទម្រង់មានកំពូលបុស្បុកលំអក្បាច់ជ្វាដងក្តារ ដោយចម្លងតាមលំនាំតួកណ្ដាលរបស់សារមន្ទីរជាតិកម្ពុជា(ភ្នំពេញ)។

សារមន្ទីរនេះ សាងសង់ឡើងចាប់តាំងពីថ្ងៃទី៣ ខែវិច្ឆិកា ឆ្នាំ២០០៧ នៅក្នុងដីឡូតិ៍របស់មន្ទីរវប្បធម៌ខេត្ត ដែលស្ថិតនៅចំពីមុខសួនកុមារនៃសាលាខេត្តកំពង់ឆ្នាំង ជាប់ផ្លូវជាតិលេខ៥ ក្នុងភូមិទី១ សង្កាត់ខ្សាម ក្រុងកំពង់ឆ្នាំង ដោយចំណាយថវិកាជាតិអស់ចំនួន ៨១,៣៦២.០៣ ដុល្លារអាមេរិក។ មុនបង្កើតសារមន្ទីរនេះ រាល់សមុច្ច័យទាំងអស់ ស្ថិតនៅក្រោមការគ្រប់គ្រងរបស់ការិយាល័យបេតិកភណ្ឌ។

គួរជម្រាបដែរថា សារមន្ទីរមានតាំងវត្ថុសិល្បៈអំពីថ្ម ជាផ្តែរទ្វារ សិលាចារឹក សសរពេជ្រ និងវត្ថុមួយចំនួន ដែលទើបបានមកពីការសិក្សាស្រាវជ្រាវរបស់ក្រុម (NARA) នៅលើទីតាំងវត្តបឹងខ្នារ ឃុំខ្នារឆ្មា ស្រុកសាមគ្គីមានជ័យ ដែលវត្ថុទាំងនោះជារបស់ទាក់ទងទៅនឹងជាតិពិន្ទុវិទ្យា៕

The post លោកគ្រូ អ្នកគ្រូ និងសិស្សានុសិស្សសាលាមួយកន្លែង ចូលទស្សនាស្វែងយល់ពីសារមន្ទីរខេត្តកំពង់ឆ្នាំង appeared first on Kampuchea Thmey Daily.

អ្នកស្រី តូច រដ្ឋា អាយុ៦០ឆ្នាំ និងអ្នកស្រី គង់ សុភ័ក្រ ប្រជាពលរដ្ឋរស់នៅភូមិបឹងដូនប៉ា សង្កាត់ស្លក្រាម ក្រុងសៀមរាប ដែលបានបរិច្ចាគសំពត់ហូល ជូនសារមន្ទីរវាយនភណ្ឌប្រពៃណីអាស៊ីបានឱ្យដឹងថា ពួកគាត់សប្បាយរីករាយ ក្រោយពេលបានប្រគល់សំពត់ហូល ជារបស់មានតម្លៃក្នុងគ្រួសារ ថែរក្សាទុកជាយូរមកហើយ ជូនមកកាន់សារមន្ទីរ ដោយមានជំនឿថា សារមន្ទីរអាចថែរក្សាវត្ថុមានតម្លៃទាំងនោះ បន្តទុកឱ្យកូនខ្មែរជំនាន់ក្រោយ បានឃើញនិងស្គាល់នូវសំពត់ ជាស្នាដៃរបស់ចាស់ៗពីដើម ដែលត្បាញដោយផ្ទាល់ដៃ។ ក្នុងពេលអញ្ជើញមកទទួលលិខិតថ្លែងអំណរគុណ ពីអាជ្ញាធរជាតិអប្សរា អ្នកស្រី រួមទាំងបងប្អូនសប្បុរសជនដទៃទៀត សប្បាយរីករាយ ដែលបានឃើញសារមន្ទីរតាំងបង្ហាញ នូវសមិទ្ធផលដែលពួកគាត់បានប្រគល់មក ជូនភ្ញៀវទេសចរជាតិ និងអន្តរជាតិបានទស្សនា។

លោក សែន គឹមស៊ុន នាយកស្ដីទីសារមន្ទីរវាយនភណ្ឌប្រពៃណីអាស៊ី នៃអាជ្ញាធរជាតិអប្សរា មានប្រសាសន៍ថា សមុច្ច័យទទួលបានពីសប្បុរសជន ទាំងនៅក្នុងខេត្ត និងបណ្តាខេត្តនានា សរុបចំនួន២១សមុច្ច័យ មានជាប្រភេទ ហូល អន្លួញ ស៊ឹង សំពត់ចរបាប់ អាវកកុតត្រង់ និងប្រភេទសម្លៀកបំពាក់របស់បងប្អូនជនជាតិដើមភាគតិច រស់នៅខេត្តរតនគិរី ដោយសមុច្ច័យទាំងនោះ មានអាយុកាលចន្លោះពី១០ឆ្នាំ ទៅ៥០ឆ្នាំ ភាគច្រើនជារបស់ត្បាញដោយដៃ។ សារមន្ទីរវាយនភណ្ឌប្រពៃណីអាស៊ី ពិតជាមានសេចក្តីរីករាយយ៉ាងក្រៃលែង ចំពោះ ប្រជាពលរដ្ឋទាំងអស់ ដែលបានស្ម័គ្រចិត្តបរិច្ចាគសមុច្ច័យ មកកាន់សារមន្ទីរ។ ទាំងនេះជាការបង្ហាញឲ្យឃើញនូវការស្រឡាញ់ ចូលរួមថែរក្សាអត្តសញ្ញាណរបស់ជាតិខ្មែរ ព្រោះថាបើសិនទុកនៅក្នុងផ្ទះ មិនបានថែរក្សាឲ្យបានត្រឹមត្រូវ សមុច្ច័យទាំងនោះនិងមានការបាត់បង់។ លោកបញ្ជាក់ថា ក្រោយទទួលបានការបរិច្ចាគពីសប្បុរសជន សារមន្ទីរនឹងយកសមុច្ច័យទាំងនោះមកថែរក្សា ជួសជុល និងដាក់តាំងពិព័រណ៍ ជូនសាធារណៈជនបានទស្សនា និងឈ្វេងយល់៕

ដោយ៖ គឿនវេត

The post ពលរដ្ឋបរិច្ចាគ២១សមុច្ច័យ ដល់សារមន្ទីរ វាយនភណ្ឌប្រពៃណីអាស៊ី ដើម្បីទុកសម្រាប់កូនខ្មែរឈ្វេងយល់ appeared first on Kampuchea Thmey Daily.

យោង​តាម​សេចក្ដីជូនដំណឹង​របស់​មន្ទីរ​វប្ប​ធម៌ និង​វិចិត្រ​សិល្បៈ​ខេត្ត​បាត់ដំបង​ បានឲ្យដឹងថា តម្លៃ​សំបុត្រ​ចូល​ទស្សនា​​​សារមន្ទីរ​ខេត្ត​បាត់ដំបង សម្រាប់​ភ្ញៀវ​ជនជាតិ​ខ្មែរ មិន​មានការគិត​ថ្លៃ​នោះ​ទេ​។ ហើយ​ភ្ញៀវ​បរទេស​អាយុ​ក្រោម​ ១០​ឆ្នាំ ខាង​មន្ទីរ​ ក៏​មិន​គិត​ថ្លៃ​សំបុត្រ​ដូច​គ្នា ប៉ុន្តែ​ជនបរទេស​ដែល​មាន​​អាយុ​ចាប់ពី​​ ១០​ឆ្នាំ​ ឡើង​ទៅ​ តម្លៃ​​សំបុត្រ ១២,០០០​រៀល ​ក្នុង ​១ ​​នាក់​ (​មាន​សុពលភាព​០១​ថ្ងៃ​)​។

សេចក្ដី​ជូន​ដំណឹងដដែលបាន​បញ្ជាក់​ថា សម្រាប់​ជនបរទេស មាន​អាយុ​ក្រោម​ ១០​ឆ្នាំ​ ​មិន​តម្រូវ​ឲ្យ​ទិញ​សំបុត្រ តែ​ត្រូវ​បង្ហាញ​ឯកសារ​ពាក់ព័ន្ធ ឬ​លិខិត​ឆ្លង​ដែន​ទៅ​កាន់​បញ្ជរ​លក់​សំបុត្រ ឬ​មន្ត្រី​ឆែក​សំបុត្រ។ ​ករណី​ពុំ​មាន​ឯក​សារ​បញ្ជាក់​ច្បាស់លាស់ ភ្ញៀវ​ត្រូវ​បង់​ប្រាក់​ចូល​ទស្សនា​តាម​ការ​កំណត់​ដូច​ក្នុង​សេចក្ដីជូនដំណឹង​។

ជា​មួយ​គ្នា​នេះ មន្ត្រី​ នៃ​មន្ទីរ​វប្ប​ធ​ម៏​ និង​វិចិត្រ​សិល្បៈ​ខេត្ត​បាត់ដំបង​ បាន​លើក​ឡើង​ដែរថា សារមន្ទីរ​ ជា​កន្លែង​ប្រមូល​ផ្តុំ​នូវ​គ្រប់​ផ្ទាំង​ទស្សនីយភាព​ដែល​រួម​បញ្ចូល​នូវ​ផ្នែក​វប្បធម៌ សិល្បៈ ចម្លាក់ ក្បូរក្បាច់រចនា និង​សំណង់​ស្ថាបត្យកម្ម​ដ៏​ល្អ​ឯក​។ ​ហើយសារមន្ទីរ​ខេត្ត​បាត់ដំបង​ ត្រូវ​បាន​ដាក់​សម្ពោធ​ឲ្យ​ប្រើប្រាស់ កាលពី​ថ្ងៃទី២៩ ខែ​តុលា ឆ្នាំ១៩៦៨ ដោយ​ស្ថាបត្យករ យាង (Yieng) ដែល​ជា​ស្ថាបត្យករ​ប្រចាំ​ខេត្ត​បាត់ដំបង និង​ធ្វើ​ការ​នៅ​មន្ទីរ​សាធារណការ​ និង​ដឹក​ជញ្ជូន​ នា​សម័យ​នោះ​ផង​ដែរ​។

យ៉ាង​ណា​មិញ ​សារមន្ទីរ និង​សាល​តាំង​ពិព័រណ៍​វត្ថុ​បុរាណ​ខេត្ត​បាត់ដំបង ក៏​ត្រូវ​បាន​ជួសជុល​ឡើង​ក្រោម​ការ​ឧបត្ថម្ភ​គាំទ្រ​ពី​អង្គការ​មិត្ត​វប្បធម៌​ខ្មែរ FOKCI ដោយ​​ចំណាយ​ថវិកា​ជាង ២៧ម៉ឺន​ដុល្លារ​អាមេរិក និង​ដាក់​សម្ពោធ​ឲ្យ​ប្រើប្រាស់​ជា​ផ្លូវ​​ការម្ដង​ទៀត​ កាលពីថ្ងៃទី១១ ខែ​មករា ឆ្នាំ២០១៩ ក្រោម​អធិបតីភាព​លោក​ស្រី​ ភឿង សកុណា រដ្ឋមន្ត្រី​ក្រសួង​វប្បធម៌ និង​វិចិត្រសិល្បៈ និង លោក ងួន រតនៈ កាល​ដែល​លោក​នៅ​ជា​អភិបាល​ខេត្ត​​បាត់ដំបង។

ទន្ទឹមនោះដែរ លោក គឹ​ម សោភ័ណ ប្រធាន​មន្ទីរ​វប្បធម៌ និង​វិចិត្រ​សិល្បៈខេត្តបាត់ដំបង បាន​ឲ្យដឹងថា រូប​ចម្លាក់ និង​វត្ថុ​បុរាណ​ផ្សេង​ៗ​ ទៀត ដែល​មាន​ក្នុង​សារមន្ទីរ​ខេត្ត​បាត់ដំបង សព្វថ្ងៃ​នេះ​មាន​ប្រមាណ ១,៥០០​រូប​ ក្នុង​នោះ​មាន​រូបចម្លាក់ ឬ​វត្ថុ​បុរាណ សាងសង់​ពី​ថ្ម ឈើ មាស សំរឹទ្ធ ស្ព័ន ដី​ដុត​។ ហើយ​រូប​ចម្លាក់ ឬ​វត្ថុ​បុរាណ​ខ្លះ​​ ក៏​មាន​អាយុកាល​រហូត​ដល់​ទៅ​ជាង​ ៧​ម៉ឺន​ឆ្នាំ​មក​ហើយ​ដែរ ដែល​បាន​កសាង​តាំងពី​សម័យ​បុរេប្រវត្តិ​មក​ម្ល៉េះ។

គួរ​ជម្រាបថា សារមន្ទីរ​ខេត្ត​បាត់ដំបង ​មាន​ទីតាំង​ស្ថិត​នៅ​តាម​ដង​ផ្លូវ​លេខ​០១ ខាងជើងវិមានឯករាជ្យប្រហែល ​១០០​ម៉ែត្រ​ ចំកណ្ដាល​ក្រុង​បាត់ដំបង​៕

អត្ថបទ ៖ សៅ សារិទ្ធ

The post សារមន្ទីរខេត្តបាត់ដំបង នឹងលក់សំបុត្រសម្រាប់ភ្ញៀវបរទេសចូលទស្សនា ចាប់ពីដើមខែមករា តទៅ appeared first on Kampuchea Thmey Daily.

សារមន្ទីរបុរាណវិទ្យា Catalonia សហការជាមួយក្លឹប Catalan Naturism បានរៀបចំព្រឹត្តិការណ៍ដ៏ពិសេសមួយក្នុងសារមន្ទីររយៈពេល ៩០ នាទី ដើម្បីឲ្យអ្នកទស្សនាបានមើលការតាំងពិពណ៌រូបថតរបស់ Luigi Spina ។

Luigi Spina គឺជារូបសំណាកអ្នកចម្បាំងអាក្រាតក្រិកធ្វើពីសំរឹទ្ធ ពីសតវត្សទី ៥ មុនគ.ស ហើយត្រូវបានរកឃើញនៅឆ្នាំ ១៩៧២ ជិតសហគមន៍ Riace នៃប្រទេសអ៊ីតាលី ។

បើតាមមគ្គុទ្ទេសក៍ឈ្មោះ Edgard បានឲ្យដឹងថា គាត់​ចង់​ធ្វើ​ឱ្យ​វាក្លាយ​ជាដំណើរ​កម្សាន្ត​ចម្រុះ​​ ហើយ​មិន​មែន​ជា​ដំណើរ​ទេសចរណ៍​ដែល​មាន​មគ្គុទ្ទេសក៍​ធម្មតា​នោះ​ទេ ។ ខាងសារមន្ទីរ​ចង់​ឱ្យ​អ្នក​​មក​ទស្សនា មាន​អារម្មណ៍​ដូចរូបសំណាកដែលពួកគេកំពុងមើលដែរ ៕

ប្រែសម្រួល៖ វារី

ប្រភព៖ asianone

ចុចអាន៖ មនុស្សប្រហែល ១៣០០ នាក់ ហែលទឹកទាំងអាក្រាតកាយក្នុងពិធីបុណ្យមួយនៅ អង់គ្លេស

The post សារមន្ទីរនៅទីក្រុង Barcelona បើកទ្វារទទួលភ្ញៀវអាក្រាតកាយ appeared first on Kampuchea Thmey Daily.

លោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកស៊ីម៉ាក់ បានឱ្យដឹងពេលចុះពិនិត្យទីតាំងសាងសង់” សារមន្ទីរតេជោសន្តិភាព”នៅថ្ងៃទី០៥​ តុលានេះថា “សារមន្ទីរតេជោសន្តិភាព”ដែលមានទីតាំ​ងស្ថិតនៅឃុំត្រពាំងធំ​ ស្រុកបាគង​ ខេត្តសៀមរាប​ នៅក្បែរផ្លូវទៅព្រលានយន្តហោះថ្មី និងផ្លូវជាតិ៦A នឹងដំណើរការសាងសង់ ចាប់ពីខែវិច្ឆិកា​ ឆ្នាំ២០២៣និងបញ្ចប់នៅពាក់កណ្តាលឆ្នាំ ២០២៥ ខាងមុខនេះ។

លោកអគ្គនាយកស៊ីម៉ាក់ បានបន្តថា មរតករឿងរ៉ាវប្រវត្តិសាស្ត្រសង្គ្រាម ​និងសន្តិភាពនៃព្រះរាជាណាចក្រដ៏កំសត់នេះ​ នឹងត្រូវបានរៀបចំចងក្រង និងដាក់តាំងបង្ហាញនៅសារមន្ទីរតេជោសន្តិភាពនេះ​ សម្រាប់សាធារណជនជាតិ និងអន្តរជាតិ​ ជាពិសេសសម្រាប់យុវជនកម្ពុជា ជំនាន់ក្រោយៗទៀត បានសិក្សាស្វែងយល់ពីគុណតម្លៃដ៏មហាសាល នៃសន្តិភាព និងស្អប់ខ្ពើមសង្គ្រាម។

ក្រៅពីនេះសារមន្ទីរនេះ នឹងក្លាយជាមរតកជាតិមួយបង្ហាញឱ្យពិភពលោកនូវការតស៊ូរបស់ សម្ដេចតេជោក្នុងការបញ្ចប់ សង្គ្រាម នៅកម្ពុជា និងក្លាយជាឃ្លាំងចំណេះដឹង និងព័ត៌មានចងចាំពីទុក្ខសោកវេទនារបស់ប្រជាជនកម្ពុជា ឆ្លងកាត់ សង្គ្រាម និងសំណល់យុទ្ធភណ្ឌសង្គ្រាម និងស្វែងយល់ព្រមទាំងតម្កល់តម្លៃសន្តិភាពជាមរតកដ៏មហាសាលផងដែរ។

លោកអគ្គនាយកស៊ីម៉ាក់បានបន្ថែមថា”សារមន្ទីរតេជោសន្តិភាព”នេះនឹងសាងសង់នៅលើផ្ទៃដី១២ហិតតានៅ​ខេត្តសៀមរាបជាជំនួយហិរញ្ញប្បទានឥតសំណងរបស់រដ្ឋាភិបាលជប៉ុន។

គួរបញ្ជាក់ថា គម្រោងសាងសង់ អគារផ្សព្វផ្សាយអប់រំយល់ដឹងពីសង្គ្រាម(សារមន្ទីរសន្តិភាព)និងអគារហ្វឹកហ្វឺន​ត្រូវបានចុះហត្ថលេខាកាលពីថ្ងៃទី១២ ខែវិចិ្ឆកាឆ្នាំ២០២២ កន្លងទៅក្រោមអធិបតីភាពសម្តេចតេជោ ហ៊ុន សែន និងលោកនាយករដ្ឋមន្ត្រីជប៉ុន ដែលមានទឹកប្រាក់ចំនួន២,៤៥១ លានយ៉េនស្មើនឹងប្រមាណ ១៧១៧លានដុល្លារ ក្នុងឱកាសដែលលោកនាយករដ្ឋមន្ត្រីជប៉ុនអញ្ជើញមកចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនានា​នៅកម្ពុជា៕

អត្ថបទ ៖ សំអឿន

The post កម្ពុជា នឹងសង់«សារមន្ទីរតេជោសន្តិភាព» នៅចុងឆ្នាំនេះទុកជាមរតក​សម្រាប់ក្មេងជំនាន់ក្រោយ appeared first on Kampuchea Thmey Daily.