សារមន្ទីរខេត្តកំពង់ឆ្នាំង បន្តអភិរក្ស និងថែរក្សាវត្ថុបុរាណជាច្រើនប្រភេទ

សារមន្ទីរ ជាស្ថាប័នមួយដែលមានភារកិច្ចសំខាន់ក្នុងការថែរក្សា និងអភិរក្សសមុច្ច័យវត្ថុបុរាណ និងរបស់របរផ្សេងៗដែលមានតម្លៃផ្នែកសិល្បៈ វប្បធម៌ ប្រវត្តិសាស្ត្រ និងវិទ្យាសាស្ត្រ ដើម្បីដាក់តាំងបង្ហាញជូនសាធារណជនតាមរយៈពិព័រណ៍អចិន្រ្តៃយ៍ ឬពិព័រណ៍មានកាលកំណត់។

ការអភិរក្ស និងការរៀបចំទុកដាក់សមុច្ច័យវត្ថុបុរាណ និងវត្ថុសិល្បៈក្នុងសារមន្ទីរ គឺជាកិច្ចការសង្គ្រោះ និងថែទាំ ដើម្បីបន្តអាយុកាលឱ្យវត្ថុទាំងនោះមានភាពរឹងមាំ និងគង់វង្សយូរអង្វែងសម្រាប់អនាគត។ ជាក់ស្តែង សារមន្ទីរខេត្តកំពង់ឆ្នាំង បានរក្សាទុកសមុច្ច័យជាច្រើនប្រភេទ រួមមាន វត្ថុធ្វើពីថ្មភក់ វត្ថុលោហៈដូចជា មាស សំរឹទ្ធ ប្រាក់ និងស្ពាន់ កុលាលភាជន៍ វត្ថុធ្វើពីឈើ ជ័រ ប្រមរ សាស្រ្តាស្លឹករឹត ព្រមទាំងសៀវភៅចាស់ៗជាច្រើនផងដែរ។

ក្រៅពីការរៀបចំដាក់តាំងវត្ថុបុរាណ និងវត្ថុសិល្បៈ សម្រាប់សាធារណជនចូលទស្សនា សារមន្ទីរខេត្តកំពង់ឆ្នាំង ក៏បានអនុវត្តការអភិរក្សសមុច្ច័យជាប្រចាំ តាមសមត្ថភាព និងលទ្ធភាពដែលមន្ត្រីជំនាញអាចអនុវត្តបាន។

មន្ត្រីជំនាញនៃសារមន្ទីរខេត្តកំពង់ឆ្នាំង បានទទួលការបណ្តុះបណ្តាលពីមន្ត្រីមានបទពិសោធន៍នៅរោងជាងនៃសារមន្ទីរជាតិកម្ពុជា ជាច្រើនលើកច្រើនសារ ដើម្បីពង្រឹងជំនាញក្នុងការអភិរក្ស និងថែទាំវត្ថុបុរាណឱ្យបានត្រឹមត្រូវតាមបច្ចេកទេស។

សម្រាប់ការងារអភិរក្សប្រចាំថ្ងៃ មន្ត្រីសារមន្ទីរបានធ្វើការជូតសម្អាតធូលីដី ស្នាមប្រលាក់ និងស្នឹមតិចតួចលើសមុច្ច័យ ដោយប្រើវិធីសម្អាតទាំងស្ងួត និងសម្អាតសើម ដើម្បីរក្សាសភាពដើម និងការពារការខូចខាតនៃវត្ថុបុរាណ៕