លោក​វេជ្ជបណ្ឌិត លី សូ​វ៉ាន់ ប្រធាន​នាយកដ្ឋាន​ប្រយុទ្ធ​នឹង​ជំងឺឆ្លង នៃ​ក្រសួងសុខាភិបាល បានឱ្យ​ដឹង​ថា ជំងឺ ៧ មុខ ដែល​តែងតែ​កើតឡើង​នៅក្នុង​រដូវភ្លៀង​រួមមាន ជំងឺគ្រុនឈាម គ្រុនចាញ់ ជំងឺ​គ្រុន​ផ្តាសាយ ជំងឺ​គ្រុនក្តៅ ជំងឺ​ចម្លង​ពី​ចំណីអាហារ ជំងឺ​ចម្លង​ពី​ទឹក ជំងឺ​អាសន្នរោគ និង​ជំងឺ​លិ​ប​តូ​ឆ្លង​ពី​ទឹកនោម​សត្វ​កណ្តុរ។

លោក​វេជ្ជបណ្ឌិត ក៏បាន​ណែនាំ​ឱ្យ​ប្រជាពលរដ្ឋ​ពេលធ្វើ​ដំណើរ​ត្រូវមាន​អាវ​ភ្លៀង ឆត្រ និង​ស្បែក​ជើង​លុយ​ទឹក បរិភោគ​ទឹក​ក្តៅ​អ៊ុនៗ ទឹក​ស៊ុប​ក្តៅៗ អនាម័យ​ខ្លួនប្រាណ បរិភោគ​ចំណីអាហារ​ណា​មាន​អនាម័យ និង​មាន​ជីវជាតិ និង​បន្លែ​ពណ៌​បៃតង​ចាស់​ដូចជា ​ផ្ទី ស្លឹក​ងប់ ស្លឹក​បាស ខាត់ណា សណ្ដែកកួរ និង​ប៉េងប៉ោះ​ជាដើម។

លោក​វេជ្ជបណ្ឌិត បាន​បន្ថែមទៀតថា ជាងនេះទៅទៀត ត្រូវ​ចូលរួម​លុបបំបាត់​ដង្កូវទឹក និង​ជម្រក​សត្វ​មូស​ខ្លា​ដូចជា​ សំបក​កង់ សំបក​កង់ឡាន ត្រឡោក​ដូង និង​វត្ថុ​ដែល​អាច​ដក់​ទឹកបាន ដើម្បី​ការពារ​កុមារ​ពី​ជំងឺគ្រុនឈាម។

លោក​វេជ្ជបណ្ឌិត បានឱ្យដឹង​ទៀតថា នៅក្នុង​រដូវភ្លៀង​ធ្លាក់​នេះ ក៏មាន​ឃើញ​ការ​កើនឡើង​ករណី​ជំងឺ​កូ​វីដ​-១៩ និង​ជំងឺ​ផ្តាសាយធំ​ផង​ដែរ។ ដូចនេះ សូម​ប្រជាពលរដ្ឋ​ត្រូវ​បន្ត​ពាក់​ម៉ាស រក្សា​គម្លាត ត្រូវ​ឧស្សាហ៍​លាងដៃ​ជាមួយនឹង​សាប៊ូ និង​ទឹក ដើម្បី​ចៀសវាង​ការ​ចម្លង​ជំងឺ​ទៅ​សមាជិក​គ្រួសារ និង​អ្នកដទៃ និង​ហាម​ក្អក​ដាក់​បាតដៃ ព្រោះ​វា​អាច​ឆ្លង​ទៅ​អ្នកដទៃ​ទៀត​បាន​តាមរយៈ​ការ​ចាប់ដៃ ឬ​ចាប់​របស់​ផ្សេងៗ។

យោងតាម​សេចក្ដីជូនដំណឹង​របស់​ក្រសួង​ធនធានទឹក និង​ឧតុនិយម បានឱ្យដឹងថា ដោយមាន​សម្ពាធ​ទាប​គ្របដណ្ដប់​មកលើ​ឈូង​សមុទ្រ​ថៃ អាង​ទន្លេមេគង្គ និង​សមុទ្រ​ចិន​ខាងត្បូង ស្ថានភាព​បែបនេះ នឹង​ធ្វើឱ្យ​រាជធានី​-​ខេត្ត​ភាគច្រើន នៃ​ប្រទេស​កម្ពុជា អាចមាន​ភ្លៀង​ផ្គរ​រន្ទះ និង​ខ្យល់​កន្ត្រាក់ គ្រប់​ដណ្ដប់​លើ​ផ្ទៃដី ២៥ ​ដល់ ​៣៥ ​ភាគរយ ចាប់ពី​ថ្ងៃទី​ ២៣​ ដល់​ ថ្ងៃទី ​២៥ ខែឧសភា ឆ្នាំ ២០២៥៕

អត្ថបទ ៖ សំអឿន

The post មន្ត្រីជំនាញសុខាភិបាល ណែនាំពលរដ្ឋប្រុងប្រយ័ត្នជំងឺឆ្លង ៧ មុខ តែងតែកើតញឹកញាប់ក្នុងរដូវភ្លៀង appeared first on Kampuchea Thmey Daily.

ពិធីបើកនេះ ប្រព្រឹត្តិឡើងក្រោមអធិបតីភាព ឧបនាយករដ្ឋមន្ត្រីលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងមានការអញ្ជើញចូលរួមពីសំណាក់ លោក Danish Rahman នាយកគ្រប់គ្រងទូទៅក្រុមហ៊ុន Danone ប្រចាំតំបន់អាស៊ីអាគ្នេយ៍ កាលពីថ្ងៃទី ៧ ខែឧសភា ឆ្នាំ ២០២៥ ។ យុទ្ធនាការសុវត្ថិភាពចំណីអាហារក្នុងសាលារៀន ក្រោមប្រធានបទ «សុខភាពកុមារ និងជាតិដែក» គឺជាគំនិតផ្តួចផ្តើមរួមគ្នាដោយក្រសួងអប់រំ យុវជន និងកីឡា និងក្រុមហ៊ុន Danone ប្រចាំតំបន់អាស៊ីអាគ្នេយ៍ ដើម្បីរួមគ្នាកាត់បន្ថយភាពស្លេកស្លាំងដោយសារកង្វះជាតិដែកលើកុមារ និងផ្សព្វផ្សាយការអនុវត្តសុវត្ថិភាពចំណីអាហារតាមសាលារៀននៅប្រទេសកម្ពុជា។

លោក ហង់ជួន ណារ៉ុន ជឿជាក់ថា យុទ្ធនាការសុវត្ថិភាពចំណីអាហារតាមសាលារៀន នឹងក្លាយជាវេទិកាមួយយ៉ាងសំខាន់ នៃការលើកកម្ពស់ការយល់ដឹងរបស់សិស្សលើផ្នែកសុវត្ថិភាពចំណីអាហារ សម្រាប់ការវិនិយោគរយៈពេលវែងលើការអភិវឌ្ឍធនធានមនុស្ស។ លោកបញ្ជាក់ថា៖«យុទ្ធនាការនេះនឹងដើរតួនាទីយ៉ាងសំខាន់ក្នុងការលើកកម្ពស់សុខភាពកុមារ និងជាតិដែក ការប្រយុទ្ធប្រឆាំងនឹងបញ្ហាកង្វះអាហារូបត្ថម្ភ ភាពស្លេកស្លាំង និងការជំរុញភាពលូតលាស់ ក្នុងគោលដៅកសាងមូលធនមនុស្សជំនាន់ក្រោយប្រកបដោយសុខភាព ការអប់រំ»។

ក្នុងឱកាសនេះ លោក Danish Rahman បានលើកឡើងពីបេសកកម្មរបស់ក្រុមហ៊ុន Danone ក្នុងការផ្តល់អាហារតាមរយៈសុខភាពទៅកាន់មនុស្សកាន់តែច្រើនតាមដែលអាចធ្វើទៅបាន។ លោកថា៖«ដូចនេះហើយ ក្រុមហ៊ុន Danone កម្ពុជា គាំទ្រ និងបន្តកិច្ចសហការជាមួយក្រសួងអប់រំ ក្នុងការចូលរួមកាត់បន្ថយភាពស្លេកស្លាំង ដោយសារកង្វះជាតិដែក ដើម្បីធានាបានថា កុមារទទួលបានអ្វីដែលល្អបំផុត តាមរយៈការបង្កើនចំណេះដឹង ការត្រួតពិនិត្យភាពស្លេកស្លាំង និងការផ្តល់អាហារូបត្ថម្ភមានជាតិដែក និងវីតាមីនស៊ី ជាដំណោះស្រាយសុខភាព ដែលអាចជួយឱ្យកុមារលូតលាស់បានយ៉ាងពេញលេញ»។

តាមរយៈយុទ្ធនាការសុវត្ថិភាពចំណីអាហារតាមសាលារៀន នឹងផ្តល់ការអប់រំទៅដល់គណៈគ្រប់គ្រងសាលារៀន លោកគ្រូ អ្នកគ្រូ មាតាបិតា សិស្សនុសិស្ស និងសាធារណជនឱ្យកាន់តែយល់ដឹងអំពី ការបង្កើតទម្លាប់បរិភោគអាហារប្រចាំថ្ងៃ ៣ក្រុម អាហារថាមពល អាហារសាងសង់ និងអាហារការពារ (តិចខ្លាញ់ តិចអំបិល តិចស្ករ ) អាហារូបត្ថម្ភមានជាតិដែក និងវីតាមីនស៊ី និងការចៀសវាងភេសជ្ជៈផ្អែម។

​កន្លងទៅ ក្រសួងបានដាក់ចេញនូវគោលនយោបាយជាច្រើន រួមមាន គោលនយោបាយស្តីពី “សុខភាពសិក្សា” “អាហារូបត្ថម្ភ” និង “ការផ្តល់អាហារតាមសាលារៀន ឆ្នាំ២០២៤-២០៣៥” ដោយប្រើប្រាស់កសិផលក្នុងសហគមន៍ ​ស្របតាម “ក្របខ័ណ្ឌគោលនយោបាយជាតិគាំពារសង្គមឆ្នាំ២០២៥” ដើម្បីធានាបានសុវត្ថិភាពចំណីអាហារ និងអាហារូបត្ថម្ភ ព្រមទាំងគាំទ្រការអភិវឌ្ឍសេដ្ឋកិច្ចសហគមន៍មូលដ្ឋាន សំដៅឆ្លើយតបទៅនឹងបញ្ហាកង្វះអាហារូបត្ថម្ភ អសន្តិសុខស្បៀងក្នុងគ្រួសារនិងសហគមន៍ ការជំរុញភាពលូតលាស់ និងដើម្បីលើក​កម្ពស់​ការសិក្សា​របស់​កុមារ៕

The post ក្រសួងអប់រំ បើកយុទ្ធនាការសុវត្ថិភាពចំណីអាហារក្នុងសាលារៀន ដើម្បីសុខភាពកុមារ appeared first on Kampuchea Thmey Daily.

​បង្គា​ស្រស់ ត្រី​ផ្ទុ​ង មឹក ត្រី​កា​ម៉ុង ស្ពៃខៀវ ស្ពៃបូកគោ សាឡា​ត់ ស​ណ្តែ​ង​បណ្តុះ និង​ខ្ញី​ហាន់ ត្រូវ​កំណត់​ជា​សំណាក​មក​ធ្វើតេស្ត​រក​សារធាតុ​ហាមឃាត់ បូករួម​ទាំង​សរសៃ​គុយទាវ នំ​បញ្ចុក បាញ់ហយ ផងដែរ​។

បន្លែ អាហារ​សមុទ្រ​ស្រស់ៗ អាហារ​កំប៉ុង និង​ទំនិញ​វេច​ខ្ចប់​រក្សាទុក​បានយូរ​មួយចំនួនទៀត ត្រូវបាន​មន្ត្រី​សាខា​ការពារ​អ្នកប្រើប្រាស់ កិច្ចការ​ប្រកួតប្រជែង និង​បង្ក្រាប​ការ​ក្លែងបន្លំ​ខេត្តកោះកុង យក​សំណាក​មក​ធ្វើតេស្ត ដើម្បី​រក​សារធាតុ​ហាមឃាត់ ឬ​ហួស​កាលកំណត់​ប្រើប្រាស់​ដែល​បង្ក​ផលប៉ះពាល់​ដល់​សុខភាព​ប្រជាពលរដ្ឋ​។

លោក សាំង សេង​ឃី ប្រធាន​សាខា​សាខា​ការពារ​អ្នកប្រើប្រាស់ កិច្ចការ​ប្រកួតប្រជែង និង​បង្ក្រាប​ការ​ក្លែងបន្លំ​ខេត្តកោះកុង បានឱ្យដឹងថា សុខភាព​សាធារណៈ​ជា​រឿង​សំខាន់​ណាស់​ដែល​ត្រូវ​បង្កើន​ការតាមដាន​ពិនិត្យ​ពី​គុណភាព​អោយបាន​ច្បាស់លាស់ ចៀសវាង​មានការ​លក់ដូរ​ធ្វើឱ្យប៉ះពាល់​ដល់​សុខភាព​ពលរដ្ឋ​ដែលជា​អតិថិជន​យកទៅ​ប្រើប្រាស់​។

លោក សាំង សេង​ឃី គូស​បញ្ជាក់​ទៀត​ថា បើតាម​លទ្ធផល​តេស្ត ក្នុងចំណោម​១១​នៃ​មុខ​អាហារ​ស្រស់ និង​ទំនិញ​ដែល​រក្សាទុក​បាន​យូរ គឺ​រក​មិន​ឃើញថា​បន្ទុក​នូវ​សារ​ធាតុ​ហាមឃាត់​នោះទេ​ដែល​នេះ​សរ​បញ្ជាក់​ឱ្យ​ឃើញ​ថា ក្រុម​អាជីវករ​មានកា​រ​យល់ដឹង​ច្រើន​ពី​ការ​មិន​ដាក់​តាំង​លក់​ចំណីអាហារ​ណា​ដែល​គ្មាន​គុណភាព ឬ​ហួស​សុពលភាព​ប្រើប្រាស់​នោះទេ​។

ជា​លើកទឹកចិត្ត ក្រុមមន្ត្រី​ជំនាញ​ដដែល បន្ត​ផ្សព្វផ្សាយ​អប់រំ​ណែនាំ​បន្ថែម​ដល់​អាវ​ជីករ​ទាំងអស់ ត្រូវ​ចូលរួម​ទិញ​លក់ដូរ​ទំនិញ​ណា​ដែល​មានគុណ​ភាព​ល្អ មាន​ស្លាក​សញ្ញា​សម្គាល់ និង​មាន​សុពលភាព​ប្រើប្រាស់ ករណី​សង្ស័យ​ថា ​មាន​អា​វជីករ ឬ​ទីតាំង​ណាមួយ​លួចលាក់​ផលិតផល​ក្លែងក្លាយ​មេត្តា​សូម​រាយការណ៍​មកកាន់​មន្ត្រី​របស់លោក ដើម្បី​មាន​វិធានការ​ពិនិត្យ​ឱ្យបាន​ទាន់ពេលវេលា​បំផុត​។

លោក ចាន់ សាន់ និង​អ្នកស្រី ចាន់ ស្រី​លក្ខណ៍ ជា​ពលរដ្ឋ​រស់​នៅ​ក្នុង​ក្រុង​ខេមរ​ភូមិន្ទ មើលឃើញថា វិធានការ​ពិនិត្យ​គុណភាព​ចំណីអាហារ​នៅតាម​ផ្សារ និង​កន្លែង​លក់ដូរ​ផ្សេងៗ​ទៀត​ជា​យន្ត​ការល្អ​ដើម្បី​អាច​ដឹង​ពី​កន្លែង​ណា​លក់ដូរ​ទំនិញ​មានគុណ​ភាព ឬ​គ្មាន​គុណភាព​ដែល​ធ្វើឱ្យប៉ះពាល់​ដល់​សុខភាព​អ្នកប្រើប្រាស់​ដែល​មិនដឹង​អស់​ប្រភេទ​ទំនិញ​ទាំងនោះ​។

ក្រុម​ពលរដ្ឋ​ដដែល ស្នើសុំ​ដល់​មន្ត្រី​ជំនាញ​ពាក់ព័ន្ធ​ចុះ​ពិនិត្យ​ទីតាំង​ផលិតផល ឬ​ចែកចាយ​ទំនិញ​ដែល​ងាយ​ប្រឈម​ធ្វើឱ្យប៉ះពាល់​ដល់​សុខភាព​ក្នុងភូមិ​សាស្ត្រ​ខេត្តកោះកុង មិន​សំដៅ​តែ​នៅតាម​បណ្តា​ផ្សារ តូប​លក់ដូរ​បន្តិចបន្តួច និង​ហាង​ម៉ា​ត​ទំនើបៗ​នោះទេ​៕

​អត្ថប​ទ ៖ សិរី​វឌ្ឍនៈ

The post សំណាក​ចំណីអាហារ​១២​មុខ ត្រូវ​បាន​មន្ត្រី​ជំនាញ​ពិនិត្យ​រក​សារធាតុ​ហាមឃាត់ appeared first on Kampuchea Thmey Daily.

ក្នុងនាមរដ្ឋាភិបាល លោក ព្រាប កុល បានស្វាគមន៍ចំពោះការចូលរួមចំណែកគាំទ្រយ៉ាង សកម្មរបស់តួអ​ង្គ​ពាក់ព័ន្ធ​ទាំងអស់រួមមាន អង្គការសង្គមស៊ីវិល ដៃគូអភិវឌ្ឍន៍ ក្រុមហ៊ុន សាជីវកម្ម សហគមន៍ និងអ្នក​សិក្សា​ស្រាវជ្រាវទាំង​អស់ក្នុងបំណងរួមចំណែកដោះស្រាយបញ្ហាខាងលើ តាមរយៈកិច្ចសហការល្អជាមួយ ក្រសួងកសិកម្ម រុក្ខាប្រមាញ់ និងនេសាទ ដែលជា សេនាធិការរបស់រាជរដ្ឋាភិបាល និងជាមួយស្ថាប័នពាក់ព័ន្ធ ផ្សេងៗទៀត​របស់រាជរដ្ឋាភិបាល​ក្នុងការពង្រឹងសមត្ថភាពរបស់មន្ត្រីជំនាញ និងក្រុមជនបង្គោល ការអប់រំផ្សព្វ ផ្សាយ សិក្សាស្រាវជ្រាវ ប្រមូលព័ត៌មាន​ត្រឹមត្រូវតាមបទដ្ឋានបច្ចេកទេស និងកិច្ចពិភាក្សាពហុភាគី រួមទាំងការការ ផ្តល់ធាតុចូលសម្រាប់ជាជំនួយដល់ការរៀបចំ និងតាក់តែងនូវគោលនយោបាយ ផែនការយុទ្ធសាស្ត្រ និងការ អនុវត្តឲ្យកាន់តែមានគុណភាព និងប្រសិទ្ធិភាព​ថែមមួយកម្រិតទៀត។

លោក សឿង សារឿន នាយកប្រតិបត្តិវេទិកានៃអង្គការមិនមែនរដ្ឋាភិបាលស្តីពីកម្ពុជា បានលើកឡើងថា ដើម្បីលើក​កម្ពស់​សុវត្ថិភាពចំណីអាហារ ត្រូវពិចារណា និងធ្វើសកម្មភាពជាដៃគូរគ្រប់ភាគី និងគ្រប់កម្រិត លើដំណើរការតាក់​តែងច្បាប់ គោលនយោបាយ ផែនការយុទ្ធសាស្ត្រ ការកៀរគរធនធាន ការអនុវត្ត និងការត្រួត ពិនិត្យ នៃចំណុចពាក់​ព័ន្ធសំខាន់ៗ រួមមាន ទឹក ទុន ទីតាំងផលិត ទីផ្សារ និងទទួលទាន ឬ អាចនិយាយបានថា ផលិតកម្មដែលរាប់​ពីធាតុ​ចូលផលិតកម្ម ការប្រមូលផល ការស្តុក ថែរក្សា ការកែឆ្នៃវេចខ្ចប់ ទីផ្សារ រហូតមកដល់ ផ្ទះបាយ និងទទួលទាន។

ចំណែកលោកស្រី ងិន ណាវីរៈ មន្ត្រីជាតិសម្រប សម្រួលកម្មវិធីជំនួយខ្នាតតូចនៃមូលនិធិបរិស្ថានពិភព​លោករបស់កម្មវិ​ធីអភិវឌ្ឍន៍សហប្រជាជាតិ បានពន្យល់ថា “សុវត្ថិភាពចំណីអាហារ គឺជាចំណីដែលយើងញាំទៅមិនឈឺពោះ និងមិនមានផលប៉ះពាល់ដល់សុខភាពទៅថ្ងៃក្រោយ។ លោកស្រីបន្ថែមថា អ្នកផលិតពូជ (សត្វ ដំណាំ) អ្នកដាំដុះ អ្នកប្រមូលទិញ អ្នកកែឆ្នៃផលិតម្ហូបអាហារ អ្នកដឹកជញ្ជូន អ្នកលក់ និងអ្នកបរិភោគ អ្នករៀបចំគោលនយោបាយ អ្នកត្រួតពិនិត្យម្ហូបអាហារ និងអ្នកថែរក្សា ឬស្តូកម្ហូបអាហារ ជាអ្នកទទួលខុសត្រូវលើចំណីអាហារដែលយើងផលិត និងបរិភោគ។

តាមរយៈវេទិកាកសិករលើកទី១២នេះ គ្រោងសម្រេចបានគឺ ១) អ្នកពាក់ព័ន្ធ និងកសិករបានយល់យ៉ាងច្បាស់​អំពីស្តង់ដារសុវត្ថិភាពចំណីអាហារ គោលការណ៍ណែនាំ គោលការណ៍ និងច្បាប់នៅ កម្ពុជា, ២) ភាគីពាក់ព័ន្ធ និងកសិករបានចែករំលែក និងសិក្សាពីការអនុវត្តល្អៗជាច្រើនអំពីសុវត្ថិភាពចំណីអាហារ នៅក្នុងខ្សែច្រវាក់តម្លៃ​កសិកម្មនីមួយៗ ដែលអនុវត្តដោយបុគ្គល និងសហករណ៍កសិកម្ម, ៣) ចងក្រងឲ្យមានឯកសារស្តីពីការអនុវត្តល្អ​នៅក្នុងខ្សែច្រវាក់តម្លៃនីមួយៗសម្រាប់ការលើកកម្ពស់សុវត្ថិភាពម្ហូបអាហារប្រកបដោយនិរន្តរភាពនៅកម្ពុជា។

យោងតាមសេចក្ដីប្រកាសព័ត៌មាន “ដល់ពេលដែលយើងត្រូវគិតគូរអំពីសុវត្ថិភាពចំណីអាហារ” បានបង្ហាញថា មានជំងឺ ៦០០លានករណី និងមនុស្សប្រមាណ៤២០ពាន់នាក់ ត្រូវបានបាត់បង់ជីវិតនៅទូទាំងសកលលោកជារៀងរាល់ឆ្នាំ ដោយសារតែបញ្ហាអាហារគ្មានសុវត្ថិភាព។ ម៉្យាងវិញទៀត អត្រាមរណៈភាពកុមារអាយុ ក្រោម៥ឆ្នាំមានប្រមាណ៤០% បង្កឡើងដោយម្ហូបអាហារគ្មានសុវត្ថិភាព។ នេះបើតាមអង្គការស្បៀងនិងកសិកម្ម នៃសហប្រជាជាតិប្រចាំកម្ពុជា(FAO)។ បញ្ហានេះបានរារាំងកំណើនសេដ្ឋកិច្ច និងការបាត់បង់ផលិតភាពប្រចាំ ឆ្នាំរហូតដល់ ៩៥ពាន់លានដុល្លារ នៅក្នុងប្រទេស ដែលមានចំណូលទាប និងមធ្យម៕

The post លោក ព្រាប កុល ៖ សុវត្ថិភាពចំណីអាហារ គឺជាអាទិភាពខ្ពស់ ក្នុងយុទ្ធសាស្ត្របញ្ចកោណ​របស់រាជរដ្ឋាភិបាល appeared first on Kampuchea Thmey Daily.

តប​នឹង​ការ​ណែនាំ​របស់​ក្រសួង និង​មន្ទីរអប់រំ យុវជន និង​កីឡា​ខេត្ត​កោះកុង គេ​សង្កេត​ឃើញ​មាន​គ្រឹះស្ថាន​សិក្សា​រដ្ឋ​មួយ​ចំនួន​ក្នុង​ភូមិសាស្ត្រ​ខេត្ត បាន​បំផុស​ស្មារតី​លក់ដូរ​ចំណីអាហារ​ណា​ដែល​មាន​សុវត្ថិភាព​ខ្ពស់​ចំពោះ​សុខភាព​កុមារ និង​សិស្សានុសិស្ស ជំនួស​ឲ្យ​មិន​លក់ដូរ​ចំណីអាហារ ឬ ភេសជ្ជៈ​ធ្វើ​ឲ្យ​ខូច​សុខភាព​នោះ​ឡើយ។ ចំណោម​សាលារៀន​ទាំងនោះ មាន​សាលាបឋមសិក្សា និង​វិទ្យាល័យ​កោះ​ស្តេច បាន​និង​កំពុង​អនុវត្ត​ជា​គំរូ​មុនគេ។

លោក ភោគ ហឿន នាយក​វិទ្យាល័យ​កោះ​ស្តេច បាន​ឲ្យ​ដឹង​នៅ​ថ្ងៃ​ទី ២៣ ខែ​សីហា ឆ្នាំ ២០២៣ នេះ​ថា លោក និង​អ្នកគ្រូ លោកគ្រូ កំពុង​ជំរុញ​ធ្វើ​យ៉ាងណា​អ្នក​លក់ដូរ​ក្នុង​សាលារៀន​ត្រូវ​ធ្វើ​នំចំណី​អាហារ​ផលិត​ដោយ​ផ្ទាល់ដៃ​តែម្ដង ដើម្បី​លក់​ជូន​សិស្សានុសិស្ស​សម្រាប់​បរិភោគ​ប្រចាំថ្ងៃ។

នាយក​វិទ្យាល័យ​កោះ​ស្តេច បន្ថែម​ទៀត​ថា ចំណាត់​ការ​លក់​ចំណីអាហារ​បែប​ខ្មែរ​នេះ ធ្វើឡើង​ជិត ១ សប្តាហ៍​ហើយ រីឯ​ការ​ហាម​លក់​ភេសជ្ជៈ​កំប៉ុង ឬ ប្រហុក និង​ចំណីអាហារ​មិន​សមប្រកប បាន​បិទ​ផ្អាក​តាំងពី​ខែ​កុម្ភៈ ឆ្នាំ ២០២៣ មក​ម្ល៉េះ។

បើ​តាម​លោក ភោគ ហឿន ការ​ផ្ដើម​ធ្វើ​គំរូ​ល្អ​លក់​ចំណីអាហារ​ដែល​មិន​ប៉ះពាល់​ដល់​សុខភាព​កុមារ និង​សិស្ស​តាម​សាលារៀន ត្រូវ​បាន​មាតាបិតា​អាណាព្យាបាល​សិស្ស ពេញចិត្ត​គាំទ្រ​យ៉ាង​ខ្លាំង​នូវ​សកម្មភាព​ដ៏​ល្អ​ប្រពៃ​នេះ។ ចំណីអាហារ​ដែល​កំពុង​លក់​ជូន​សិស្ស មាន​ដូចជា ៖ នំក្រូច នំពុម្ព នំ​ទ្រាប នំចាក់ក្រចាន់ នំចេកក្រឡុក ទឹកដោះគោ​ជូរ និង​គុយទាវ ជាដើម…។

លោក ង៉ែត ឡឹង ប្រធាន​មន្ទីរអប់រំ យុវជន និង​កីឡា​ខេត្ត​កោះកុង កាលពី​ថ្ងៃ​ទី ៨ ខែ​សីហា ឆ្នាំ ២០២៣ កន្លងទៅ តាមរយៈ​លិខិត​របស់​ខ្លួន​គឺ​បាន​ជូនដំណឹង​ទៅកាន់​លោក លោកស្រី អភិបាល​ក្រុង​ស្រុក អប់រំ​ហាមប្រាម​មិន​ឲ្យ​លក់ដូរ​នំចំណី​អាហារ​ណា​មិន​មាន​ការ​ត្រួតពិនិត្យ ឬ ចំណីអាហារ​ចម្អិន​មិនបាន​ល្អ​ត្រឹមត្រូវ ចំណីអាហារ​មិនបាន​ត្រួតពិនិត្យ​ច្បាស់លាស់ និង​ចំណីអាហារ​ដែល​មាន​រសជាតិ​ផ្អែម ឬ ប្រៃ​ខ្លាំង​ដែល​ដាក់​លក់​នៅតាម​គ្រឹះស្ថានសិក្សា។

លោក ង៉ែត ឡឹង ក៏​ជំរុញ​ដល់​លោក​ប្រធាន​ការិយាល័យ​អប់រំ យុវជន និង​កីឡា នៃ​រដ្ឋបាល​ក្រុង​ស្រុក​ជុំវិញ​ខេត្ត​កោះកុង ត្រូវ​ចុះ​ត្រួតពិនិត្យ​ការលក់ដូរ​នំចំណី​អាហារ និង​ធ្វើ​អនាម័យ​តាម​គ្រឹះស្ថានសិក្សា​សាធារណៈ និង​ឯកជន​ដូច​តាម​សេចក្ដីណែនាំ​របស់​ក្រសួង​អប់រំ យុវជន និង​កីឡា កាលពី​ថ្ងៃ​ទី ២ ខែ​ឧសភា ឆ្នាំ ២០១៩។

ចំណីអាហារ និង​ភេសជ្ជៈ​ដែល​ក្រសួង​អប់រំ ហាមឃាត់​មិន​ឲ្យ​តាំង​លក់ដូរ​ក្នុង​សាលារៀន រួមមាន ៖ ទី​១-​ចំណីអាហារ​គ្រប់​ប្រភេទ​ដែល​ហួសកំណត់​កាលបរិច្ឆេទ។

ទី២-គ្រឿង​ស្រវឹង និង​ផលិតផល​ថ្នាំជក់​គ្រប់​ប្រភេទ។

ទី៣-ចំណីអាហារ​ដែល​មិន​មាន​ប្រភព​ច្បាស់លាស់។

ទី៤-ភេសជ្ជៈ​ប៉ូវ​កម្លាំង ភេសជ្ជៈ​ផ្អែម​ខ្លាំង កាហ្វេ ការ៉េម ទឹក​ស៊ីរ៉ូប៍​គ្រប់​ប្រភេទ។

ទី៥-ស្ករ​សូកូឡា ស្ករ​គ្រាប់ និង​ស្ករ​កៅស៊ូ​គ្រប់​ប្រភេទ និង​ទី​-៦. ចាហួយ​គ្រប់​ប្រភេទ នំ​ដូ​ណាត់ នំ​ផ្អែម​ខ្លាំង៕

អត្ថបទ ៖ សិរីវឌ្ឍនៈ

The post គ្រឹះស្ថានសិក្សារដ្ឋនៅឃុំកោះស្ដេច កំពុងអនុវត្តការលក់ចំណីអាហារមានសុវត្ថិភាពចំពោះសិស្ស appeared first on Kampuchea Thmey Daily.