ឆ្លងតាមការសិក្សាស្រាវជ្រាវក្រសួងបានពិនិត្យឃើញថាបទចម្រៀងចំនួន៤២បទ ដែលជាស្នាដៃនិពន្ធបទភ្លេង និងទំនុកច្រៀងដោយ លោក កែវ ឯម (ដូចមានភ្ជាប់ជូននូវបញ្ជីចំណងជើងបទចម្រៀងក្នុងឧបសម្ព័ន្ធ)។ ក្រសួងវប្បធម៌និងវិចិត្រសិល្ប:នឹងប្រគល់ជូនលោកស្រី សូ សាវឿន ដើម្បីទទួលបានសិទ្ធិគ្រប់គ្រងបទចម្រៀងចំនួន៤២ បទតាមសំណើនាពេលខាងមុខ ប្រសិនបើគ្មានការជំទាស់ពីមជ្ឈដ្ឋានពាក់ព័ន្ធ។

ក្នុងន័យនេះ គឺសំដៅដល់ការទុកពេលដល់មជ្ឈដ្ឋានពាក់ព័ន្ធ រយៈពេល១ខែ សម្រាប់ការដាក់បណ្តឹងតវ៉ាជំទាស់នឹងសំណើរខាងលើ។

ក្នុងនោះក្រសួងសូមប្រកាសជូនដំណឹងថា រាល់ភាគីពាក់ព័ន្ធទាំងអស់ដែលមានបំណងចង់ប្តឹងជំទាស់នឹងការស្នើសុំសិទ្ធិគ្រប់គ្រងបទចម្រៀងខាងលើ អាចដាក់ពាក្យបណ្តឹងដោយភ្ជាប់នូវភស្តុតាងរឹងមាំមកជាមួយ រួចផ្ញើមកក្រសួងវប្បធម៌និងវិចិត្រសិល្ប: ដែលមានអាសយដ្ឋានលេខ២២៧ មហាវិថីព្រះនរោត្តមសង្កាត់ទន្លេបាសាក់ ខណ្ឌចំការមន រាជធានីភ្នំពេញ ដើម្បីក្រសួងពិនិត្យនិងដោះស្រាយករណីនៃការជំទាស់នេះ។ សម្រាប់រយៈពេលនៃការដាក់ពាក្យប្តឹងជំទាស់ មានរយៈពេលមួយខែ គិតចាប់ពីថ្ងៃជូនដំណឹងនេះតទៅ៕ អត្ថបទ៖ ចាន់រ៉ា

The post ក្រសួងវប្បធម៌ នឹងប្រគល់សិទ្ធិគ្រប់គ្រងស្នាដៃចម្រៀង ៤២បទ របស់កវីនិពន្ធ កែវ ឯម ទៅភរិយាលោក បើគ្មានបណ្តឹងជំទាស់ appeared first on Kampuchea Thmey Daily.

ប្រាក​ដណាស់​អ្នក​ស្រី សូ សាវឿន គឺជា​តារា​ចម្រៀង​ជើងចាស់​ល្បី​ឈ្មោះ​មួយរូបតាំង​ពីជំនាន់​លោក ស៊ីន ស៊ីសាមុត, អ្នកស្រី រស់ សេរីសុទ្ធា , អ្នកស្រី ប៉ែន រ៉ន មកម្លេះ។ អ្នកស្រីមាន​បទ​ចម្រៀង​ល្បីៗ​ជាច្រើន​បទ​ ដូចជា​បទ “ស្ពានកំពង់ហ្លួង” បទ “ស្ទឹងសែនប៉ារីស, បទ “លលកវាយំ” បទ “ស្នេហា​ក្នុងពេលរាត្រី” ជាដើម។

យ៉ាង​ណាមិញ​អ្នកស្រី សូ សាវឿន ថ្វី​ត្បិតតែ​ធ្លាប់​មាន​ឈ្មោះបោះសំឡេងល្បីល្បាញជាច្រើនឆ្នាំមកហើយ​ក្ដី​តែ​គេ​សង្កេត​ឃើញ​ថា រហូត​មកដល់ពេលនេះ មានទស្សនិកជនមួ​យចំនួន​ក៏ស្ទើរ​តែភ្លេចមុខអ្នកស្រីបាត់​ទៅហើយ ជា​ពិសេស​ក្មេងៗ​ជំនាន់​ក្រោយ​ហើយ​សូម្បី​តែតារាចម្រៀង​ខ្លះ​ដែល​យក​បទចម្រៀងរបស់​អ្នកស្រី​ទៅច្រៀង​ឡើវិញក៏ស្ទើរតែមិនចាំមុខអ្នកស្រីផង​ក៏មាន។

ទោះបីបែបជានេះក្តីថ្មីៗនេះអ្នក​ស្រី សូ សាវឿន ក៏បាន​លេចវត្តមាន​នៅ​លើទឹកដី​ប្រទេសកំណើត​កម្ពុជា​ជា​មួយរូប​សម្រស់​ស្រស់​ស្អាត និង​នៅ​តែ​រក្សា​ភាព​ក្មេង​ជាងវ័យសុខ​ភាពរឹងមាំ។ ចំណែកឯទឹក​ដម​សំនៀង​ក៏​នៅតែពិរោះដូចដើម។ តួយ៉ាង​មុន​នេះ​អ្នក​ច្នៃ​ម៉ូដ ឯម រៀម បាន​បញ្ចេញ​វីដេអូ​នៃ​ការ​បង្ហើរ​សំនៀង​របស់អ្នកស្រី សូ សាវឿន ក្នុង​ការជួប​ជុំដោ​យ​ភាពស​ប្បាយរីករាយ។

លោក ឯម រៀម បានលើកឡើងថា «អ្នកស្រី សូ សាវឿន អាយុ ៨០ឆ្នាំជាង​ហើយ​នៅ​តែ​ស្ទាវ​ តោះ​មកស្តាប់​ការរៀបរាប់​របស់​អ្នកស្រី សូ សាវឿន មុនក្លាយជាតារាចំរៀង, អ្នកស្រី សូ សាវឿន គឺជាតារា​ចំរៀងជើងចាស់ជំនាន់​អ្នកស្រី រស់ សេរីសុទ្ធា ,អ្នកស្រី ប៉ែន រ៉ន ដែល​ជារាជនី​សំឡេង​ប្រចាំប្រទេស​កម្ពុជា​នាឆ្នាំ១៩៦០ និ ង១៩៧០»។

ជាការ​ពិត​បើ​និយាយ​ពី​តារា​ចម្រៀង​ផ្នែក​នារី​កាល​ពី​ជំនាន់​ទសវត្សរ៍​ឆ្នាំ៦០-៧០ ពោល​តាំង​ពី​សម័យ​សង្គមរាស្រ្ត​និយម​មក​នោះ​ច្បាស់​ណាស់​គេ​នឹង​គិត​មុនគេទៅ​ដល់អ្នកស្រី រស់ សេរីសុទ្ធា អ្នក​ស្រីប៉ែន រ៉ន ជាដើម រីឯអ្នកស្រី សូ សាវឿន ក៏ស្ថិត​ក្នុងចំណោម​នោះដែរ ដែល​អ្នកស្រីបាន​មាន​ភាពល្បីល្បាញ​ខ្លាំង​មិនចាញ់​អ្នកចម្រៀងល្បីទាំង ២រូបនេះឡើយ៕

អត្ថបទ៖ ចាន់រ៉ា

The post ម្ចាស់បទ “ស្ទឹងសែនប៉ារីស” អ្នកស្រី សូ សាវឿន ទោះបីមានវ័យជិត ៨០ឆ្នាំ ក៏ទឹកដមសំឡេងនៅតែពីរោះ appeared first on Kampuchea Thmey Daily.

​អ្នកស្រី សូ សាវឿន កើតនៅថ្ងៃទី១ ខែមិថុនា ឆ្នាំ១៩៤៥ នៅឃុំបឹងងោង ស្រុកគងពិសី ខេត្តកំពង់ស្ពឺ។ ឪពុកឈ្មោះសូ ប៉ុក អតីតទាហានជំនាន់ខ្មែរឥស្សរៈ និងម្ដាយឈ្មោះ តាត វិល។ អ្នកស្រីមាន​បងប្អូនបង្កើតតែ២នាក់ប៉ុណ្ណោះ។

ដោយមានឪពុកធំស្នាក់នៅដំណាក់លោក ឃុន តាក ដែលជាថៅកែល្ខោនបាសាក់នោះ អ្នកស្រី សូ សាវឿន បានចាកចេញពីស្រុកកំណើតទៅរស់នៅទីនោះដែរ។ អ្នកស្រីបានចូលជាសមាជិកក្រុមល្ខោនបាសាក់ផ្សារស៊ីឡឹប នៅរាជធានីភ្នំពេញ។

លោក កែវ ឯម ជាតន្ត្រីករ និងជាអ្នកសម្រួលតន្ត្រីមានឈ្មោះល្បីមួយរូប បានពេញចិត្តចំពោះទឹកដមសំឡេងរបស់អ្នកស្រី សូ សាវឿន ហើយលោកក៏ជួយបង្ហាត់បង្រៀនបណ្តុះបណ្តាលផ្នែកសិល្បៈចម្រៀងសម័យដល់អ្នកស្រី។ ដោយមានទឹកដមសំឡេងល្អពីធម្មជាតិអ្នកស្រីបានប្រែក្លាយជីវិតសិល្បៈពីវង់ល្ខោនបាសាក់ទៅជាអ្នកចម្រៀងសម័យ។

អ្នកស្រី សូ សាវឿន បានឱកាសចូលរួមនៅក្នុងក្រុមតន្ត្រីយោធាភិរម្យ។ នៅក្នុងក្រុមតន្ត្រីនេះស្រករគ្នានឹងអ្នកស្រី សាវឿន មានអ្នកម្នាងសៀង ឌី, អ្នកស្រីឈួន ម៉ាឡៃ, អ្នកស្រីឈុន វណ្ណា និងអ្នកស្រី ម៉ៅ សារ៉េត។

ក្នុងជីវិតជាតារាចម្រៀងសម័យអ្នកស្រី សូ សាវឿន មានប្រជាប្រិយភាពប្រហាក់ប្រហែលអ្នកចម្រៀងផ្សេងៗនាជំនាន់ជាមួយគ្នានោះដែរ។

បទចម្រៀងពេញនិយមរបស់អ្នកស្រី សូ សាវឿន មានដូចជា បទស្ពានកំពង់ហ្លួង, ឱ្យផ្កាយលើមេឃ, ឱដើមគគីរ, ម្លប់ដូង, បងអើយស្តាប់ផ្គរ, សារ៉ាវ៉ាន់ស្លៀកខ្យល់, លលកវាយំ, ស្នេហាក្នុងពេលរាត្រី, គេលេងភ្លេងហើយ, វាលវែងឆ្ងាយ, សុវិទ្យា, អ្នកបម្រើតាមយន្តហោះ, ក្លិនស្នេហ៍, ល្ងាចអូនទៅដល់, ជូនអូនទៅម៉ែ, ទឹកលិចភូមិអូន, រាត្រីរាំវង់, ផ្កាក្រវាន់ព្រៃ, និងបទចម្រៀងជាច្រើនទៀត៕

The post តារាស្រីជើងចាស់​អ្នកស្រី សូ សាវឿន ចេញពីប្រភពណា មុនក្លាយជាតារាចម្រៀងសម័យ? appeared first on Kampuchea Thmey Daily.