យោងតាមរបាយការណ៍របស់មន្ទីរទេសចរណ៍ខេត្តសៀមរាប ក្នុងរយៈពេល៤ថ្ងៃមកនេះ គឺចាប់ពីថ្ងៃទី១៣ ដល់ទី១៦ ខែមេសា ឆ្នាំ២០២៤ មានភ្ញៀវជាតិ និងអន្តរជាតិ បានចូលមកកម្សាន្តនៅខេត្តសៀមរាបចំនួនប្រមាណ១ ២៣៩ ៨០៨នាក់ ដែលបានធ្វើដំណើរកម្សាន្តជាលក្ខណៈគ្រួសារទៅតាមរមណីយដ្ឋានវប្បធម៌ ធម្មជាតិ ប្រវត្តិសាស្ត្រ និងទៅទស្សនានៅតាមសហគមន៍ទេសចរណ៍-អេកូទេសចរណ៍ និងតំបន់ផ្សេងៗទៀតក្នុងខេត្តសៀមរាប។ របាយការណ៍ បានឱ្យដឹងទៀត ថា ភ្ញៀវទេសចរជាតិ និងប្រជាពលរដ្ឋមានចំនួនប្រមាណ១ ២២៣ ០០០នាក់ ដែលក្នុងនោះ ភ្ញៀវទេសចរជាតិមានចំនួនប្រមាណ៦៦០ ០០០នាក់ ប្រជាពលរដ្ឋចំនួនប្រមាណ៥៦៣ ០០០នាក់ និងភ្ញៀវទេសចរបរទេសចំនួន១៦ ៨០៨នាក់។

លំហូរភ្ញៀវទេសចរណ៍ជាតិ និងអន្តរជាតិ មានដំណើរការឡើងវិញនៅខេត្តសៀមរាប ក្នុងឱកាសបុណ្យចូលឆ្នាំថ្មីប្រពៃណីខ្មែរ បានធ្វើឱ្យប្រតិបត្តិករទេសចរណ៍ សប្បាយរីករាយ។ ជាមួយគ្នានេះ ស្ថិតក្រោមដំបូលសន្តិភាព ប្រជាពលរដ្ឋ មន្ត្រីរាជការ កងកម្លាំង បានថ្លែងអំណរគុណដល់ស្មារតីជ័យជម្នះ ៧មករា អរគុណនយោបាយឈ្នះឈ្នះ អរគុណសន្តិភាព អរគុណស្ថាបនិកប្រតិបត្តិករសន្តិភាព ដែលបានធ្វើឱ្យមហាគ្រួសារខ្មែរ មានភាពសុខក្សេមក្សាន្ត ក្នុងឱកាសចូលឆ្នាំថ្មីប្រពៃណីខ្មែរ ក្នុងដំណើរកម្សាន្តគ្រប់ទីកន្លែង ពិសេសនៅលើទឹកដីប្រវត្តិសាស្រ្តខេត្តសៀមរាប ប្រកបដោយសុវត្ថិភាព។

ប្រជាពលរដ្ឋ ក៏បានសម្តែងការដឹងគុណចំពោះសន្តិភាព ដែលបង្កលក្ខណៈដល់រដ្ឋបាលខេត្ត មន្ទីរពាក់ព័ន្ធ និងពលរដ្ឋខេត្តសៀមរាប បានរៀបចំកម្មវិធីសប្បាយៗកម្សាន្តនានា ដែលជាការបង្ហាញពីកិច្ចខិតខំប្រឹងប្រែងថែរក្សាសម្បត្តិវប្បធម៌ និងរតនៈសម្បត្តិដ៏មានតម្លៃក្នុងជម្រៅវប្បធម៌ អរិយធម៌ខ្មែរ បានស្ថិតស្ថេរគង់វង្ស តាមពាក្យស្លោក «វប្បធម៌រលត់ ជាតិរលាយ វប្បធម៌ពណ្ណរាយ ជាតិថ្កើងថ្កាន»។

សូមបញ្ជាក់ដែរថា ក្នុងថ្ងៃទី១ និងទី២ ភ្ញៀវដែលចូលមកទស្សនាកម្សាន្ត ក្នុងសៀមរាបសង្ក្រាន្ត មានចំនួនប្រមាណ ៤៦៣ ៥៤០នាក់ ក្នុងនោះភ្ញៀវទេសចរបរទេសមានចំនួន៧ ៨០៧នាក់ ភ្ញៀវទេសចរជាតិ និងប្រជាពលរដ្ឋមានចំនួនប្រមាណ៤៥៨​ ០០០នាក់។ ចំពោះនៅថ្ងៃទី១៦ ខែមេសា ភ្ញៀវទេសចរសរុបមានចំនួនប្រមាណ២៨៣ ៨១៧នាក់ ក្នុងនោះភ្ញៀវទេសចរបរទេសមានចំនួន៣ ៨១៧នាក់ និងប្រជាពលរដ្ឋមានចំនួនប្រមាណ២៨០ ០០០នាក់៕

អត្ថបទ៖ គឿន វេត

The post ឱកាសចូលឆ្នាំថ្មី មានភ្ញៀវជាតិ-អន្តរជាតិ មកលេងខេត្តសៀមរាបប្រមាណជាង១លាន២០ម៉ឺននាក់ appeared first on Kampuchea Thmey Daily.

លោក វរសេនីយ៍ឯក ឡុង ម៉េនសុយ៉ាលី បាន​មាន​ប្រសាសន៍​ឲ្យ​ដឹង​ថា​ កម្លាំង​សមត្ថកិច្ច​របស់​ស្នង​ការនគរបាល​ខេត្ត​សៀមរាប បាន​ត្រៀម​ខ្លួន​រួច​ជា​ស្រេច ​រួម​ទាំង​មធ្យោបាយ និង​សម្ភារ​ បម្រើ​លើ​កិច្ច​ការពារ​សន្តិសុខ សណ្តាប់​ធ្នាប់ ​សុវត្ថិភាព ជូន​ដល់​ប្រជាពលរដ្ឋ និង​ភ្ញៀវ​ទេសចរណ៍ជាតិ អន្តរាជាតិ ដែល​ទៅ​កម្សាន្តសប្បាយរីករាយនៅ​ក្នុង​ភូមិសាស្ត្រ​នៃ​ខេត្តសៀមរាប ទាំងមូល។

លោក​បានបញ្ជាក់​ថា ​នៅ​ក្នុងពិធីនេះបានប្រើប្រាស់កម្លាំងទាំង៣ប្រភេទប្រមាណជាង ២០០០នាក់ ដែល​បំពាក់​ទៅ​ដោយ​ឧបករណ៍ សម្ភារ​ដែល​បម្រើ​ឱ្យ​កិច្ចការពារសន្តិសុខ ក្នុង​នោះ​មាន​កម្លាំង​ល្បាត​ត្រួត​ពិនិត្យជាប្រចាំ ប្រើប្រាស់កម្លាំងប្រចាំបញ្ជា កម្លាំងការពារគោលដៅទីតាំងសប្បាយ វត្តអារាម ទីផ្សារ​តូចធំ រមណីដ្ឋាន និងប្រាសាទ ផ្សេងៗ ប្រើប្រាស់​កម្លាំង​រក្សា​សន្តិសុខ​សម្រួល​ដោះស្រាយ​ចរាចរណ៍​នៅ​ក្នុងភូមិសាស្ត្រផ្លួវចេញចូលខេត្តសៀមរាប ជាដើម។

ជាមួយ​គ្នា​នោះ​ក៏​បាន​បញ្ជាឱ្យ​អធិការ​នគរបាលក្រុង.​ស្រុក​ទាំង​១២ ត្រូវតាមដានត្រួត​ពិនិត្យ​មុខ​សញ្ញាចាស់​ពាក់ព័ន្ធ​នឹង​អំពើ ​ឆក់ លួច គាស់ផ្ទះ ប្លន់និងក្មេងទំនើង ត្រូវធ្វើ​ការទប់​ស្កាត់​ឱ្យ​បាន​ជា​ដាច់ខាតមិន ឱ្យមានករណីបែបនេះធ្វើឱ្យខាតបង់ទ្រព្យសម្បត្តិប្រជាពលរដ្ឋនោះទេ។

លោកឧត្តមសេនីយ៍ទោ តេង ច័ន្ទណាត បានបញ្ជាក់ថា ចំណុច​ដែល​គួរ​ឱ្យ​យក​ចិត្តទុកដាក់​មួយ​ទៀត​គឺ ​ពង្រឹងកិច្ចការពារនៅទីតាំងរៀបចំ សៀមរាបសង្ក្រាន្ត ដែលមានប្រជាពលរដ្ឋ​ច្រើន​កុះករ​ទៅ​លេង​កម្សាន្តសប្បាយរីករាយ ដោយចាត់ចែងឱ្យការពារទីតាំងខាងលើ សំដៅធ្វើយ៉ាង​ណា​ឱ្យ​ប្រជាពលរដ្ឋ​ដែលទៅលេងកម្សាន្តឱ្យមានភាពសប្បាយរីករាយ និងសុខសុវត្ថិភាព ជាពិសេស​ទប់​ស្កាត់​ឱ្យបានអំពើលួច ឆក់នៅក្នុងតំបន់ខាងលើឱ្យមានប្រសិទ្ធភាពខ្ពស់។

ជាមួយគ្នានោះ លោកស្នងការ ក៏បានណែនាំឱ្យការដោះស្រាយសម្រួលចរាចរណ៍ ដោយ​សង្កេត​ឃើញ​ថា ជារៀងរាល់ឆ្នាំមានប្រជាពលរដ្ឋធ្វើដំណើរចេញចូលខេត្តសៀមរាប ច្រើនមានការ​កក​ស្ទះ។ ក្នុងនោះក៏មានការត្រៀម​កម្លាំងបង្កាពន្លត់អគ្គិភ័យ​សម្រាប់ជួយចេញ​សង្គ្រោះឱ្យបានទាន់​ពេលវេលា​នៅពេលដែលមានគ្រោះអគ្គិភ័យកើតឡើងជាយថាហេតុ៕

ដោយ៖ជុន កុសល

The post កម្លាំង​សមត្ថកិច្ច​ចម្រុះ​ជាង​២០០០​នាក់ ​បាន​ដាក់​​ពង្រាយ​ការពារ​ក្នុង​ភូមិសាស្ត្រ​ខេត្តសៀមរាប ក្នុង​ឱកាស​ពិធីបុណ្យចូលឆ្នាំថ្មី appeared first on Kampuchea Thmey Daily.

ក្នុងពិធីបួងសួងនេះបានប្រព្រឹត្តទៅក្រោមវត្តមានរបស់ លោក អ៊ាន ឃុន ប្រធានក្រុមប្រឹក្សាខេត្ត និង លោក ប្រាក់ សោភ័ណ អភិបាល នៃគណៈអភិបាលខេត្ត សមាជិកក្រុមប្រឹក្សាខេត្ត អស់លោក លោកស្រីជាអាជ្ញាធរជាតិអប្សរា ថ្នាក់ដឹកនាំមន្ទីរ អង្គភាព អាជ្ញាធរក្រុង ស្រុក និង មន្ត្រីរាជការ ប្រជាពលរដ្ឋផងដែរ ។ កម្មវិធីសាសនា បួងសួងបារមីវត្ថុស័ក្តិសិទ្ធិនេះ ដើម្បីសុំសេចក្តីសុខ នៃកិច្ចដំណើរការព្រឹត្តិការណ៍សៀមរាបសង្ក្រាន្តឆ្នាំ២០២៤ ឲ្យប្រកបដោយជោគជ័យ សេរីមង្គលដ៏បវរ ប្រកបតាមសេចក្តីប៉ងប្រាថ្នា នៃប្រជាពលរដ្ឋខ្មែរ ព្រមជាមួយភ្ញៀវជាតិ និងអន្តរជាតិ។

តាមសេចក្តីប្រកាសរបស់លោកតាអាចារ្យ ដែលបានប្រសិទ្ធីពិធីការ នាក្នុងឱកាសនោះ ពិធីបួងសួងសុំនូវសេចក្តីសុខ គឺជាពិធីនេះដែលត្រូវបានរៀបចំប្រាព្ធឡើងតាមបែបព្រហ្មញ្ញសាសនាសុទ្ធសាធ ។ តាមរយៈនៃការប្រារព្ធពិធីបួងសួងនេះផងដែរ គឺបានបង្ហាញ អំពីវប្បធម៌ ប្រពៃណីរស់នៅរបស់ប្រជាជនខ្មែរ ដែលបានបង្កប់ជ្រៅនៅក្នុងជំនឿនិងសង្គម ។

ពិធីបួងសួង ក៏ដូចជាពិធីក្រុងពាលីផងនោះ គឺជាពិធីដែលស្ថិតក្នុងជំនឿតាមបែបព្រលឹងដែល  ប្រជាជនខ្មែរយើង មានជំនឿជឿថា នៅលើលោកនេះ អ្នកខ្លាំងពូកែដែលបានចែកស្ថានទៅ ពិតជាបានប្រើប្រាស់ព្រលឹងរបស់ខ្លួន នៅតាមថែរក្សាកូនចៅជំនាន់ក្រោយៗ នឹងមើលការខុសត្រូវ ជួយគាំទ្រកូនចៅដែលប្រព្រឹត្តិតែអំពើល្អ និង មានមនសិការស្នេហាជាតិ ស្រឡាញ់ការពារទឹកដីមាតុភូមិ កេរដំណែលដូនតាដោយពិតប្រាកដ។  ការប្រារព្ធពិធីនេះ ក៏បានបង្ហាញអំពីបេះដូងដ៏ទូលំទូលាយរបស់ប្រជាជនខ្មែរ  ដែលបានរក្សាប្រពៃណីជំនឿនៃជាតិសាសន៍របស់ខ្លួនតាំងតែពីសម័យកាលដ៏រុងរឿងនៃអាណាចក្រអង្គរ ដែលជាសម័យកាលនៃព្រះមហាក្សត្រខ្មែរដ៏ខ្លាំងពូកែ បានធ្វើសមាហរណកម្មរវាងព្រហ្មសាសនា និង ការហូរចូលព្រះពុទ្ធសាសនាមកកាន់កម្ពុជា។  

ប្រជាជនខ្មែរ ពិតជាមានមោទនភាពក្រៃលែងតាមរយៈនៃព្រឹត្តិការណ៍សៀមរាបសង្ក្រាន្ត បានបង្ហាញនូវពិធីសាសនាជាច្រើនដែលទាក់ទងទៅនឹងព្រហ្មញ្ញសាសនា នឹងពិធីផ្សេងៗទៀត ដូចជាពិធីពូនភ្នំខ្សាច់ជាដើម ដែលត្រូវបានប្រារព្ធឡើងតាមគន្លងប្រពៃណីព្រះពុទ្ធសាសនា ហើយទាំងនេះ គឺជាការបញ្ជាក់ដល់ កូនចៅខ្មែរជំនាន់ក្រោយឲ្យនៅតែគោរពថែរក្សាវប្បធម៌ ប្រពៃណី ជំនឿសាសនាយ៉ាងខ្ជាប់ខ្ជួនបំផុត ៕          

 ដោយ៖ គឿនវេត

The post ខេត្តសៀមរាបធ្វើពិធីបួងសួងសុំសេចក្តីសុខ មុនព្រឹត្តិការណ៍សៀមរាបសង្រ្កាន្តឆ្នាំថ្មីនេះ appeared first on Kampuchea Thmey Daily.

កិច្ចប្រជុំនេះ ធ្វើឡើងកាលពីរសៀលថ្ងៃទី១០ ខែមេសា ឆ្នាំ២០២៤ ដើម្បីធ្វើការពិនិត្យ ពិភាក្សាការងារ និងភារៈកិច្ច ដែលបានបែងចែកទៅតាមក្រុមការងារ ទទួលខុសត្រូវរៀងៗខ្លួន ជាមួយថ្នាក់ដឹកនាំមន្ទីរអង្គភាពពាក់ព័ន្ធធ្វើឱ្យព្រឹត្តិការណ៍ “សៀមរាបសង្ក្រាន្ត” ប្រព្រឹត្តិទៅដោយរលូន។

លោក នាក់ ណេរ៉ុន បានបញ្ជាក់ថា ព្រឹត្តិការណ៍ “សៀមរាបសង្ក្រាន្ត” មានកម្មវិធិធំៗ ចំនួន៥ រួមមាន នៅព្រឹកថ្ងៃទី១២ ខែមេសា មានពិធីក្រុងពាលីបើកព្រឹត្តិការណ៍ “សៀមរាបសង្ក្រាន្ត”។ ចំណែក នៅព្រឹកថ្ងៃទី១៣ ខែមេសា ពិធីបើកព្រឹត្តិការណ៍ “សៀមរាបសង្ក្រាន្ត” ក្រោមអធិបតីភាព នាយឧត្តមសេនីយ៍ ទៀ សីហា ឧបនាយករដ្ឋមន្ត្រី មន្ត្រីក្រសួងការពារជាតិ។ រីឯនៅថ្ងៃទី១៤ ខែមេសា ដំណើរការកម្មវិធីក្នុងភូមិ និង សកម្មភាពតាមតំបន់នានា មានល្បែងរបាំប្រជាប្រិយប្រពៃណីខ្មែរ។ លុះនៅថ្ងៃទី១៥ ខែមេសា កម្មវិធីប្រកួតវាយកូនគោល “សៀមរាបសង្ក្រាន្ត” ឆ្នាំ២០២៤ កម្មវិធីសាសនា ពូនភ្នំខ្សាច់ និង នៅថ្ងៃទី១៦ ខែមេសា កម្មវិធីសាសនា ពិធីស្រង់ព្រះជាដើម។

លោក នាក់ ណេរ៉ុន បានបន្តថា មកទល់ពេលនេះក្រុមការងារបាននឹងកំពុងរៀបចំតុបតែងកែលម្អភ្លើង និងរៀបចំកន្លែងកម្សាន្តជាច្រើនក្នុងក្រុងសៀមរាប ដើម្បីត្រៀមទទួលភ្ញៀវទេសចរជាតិ និងអន្តរជាតិឱ្យមកទស្សនាកម្សាន្ដ ដើម្បីលើកស្ទួយវប្បធម៌ ទំនៀមទម្លាប់ និងប្រពៃណីជាតិ ក៏ដូចជាផ្តល់ឱកាសជូនប្រជាពលរដ្ឋ ព្រមទាំងការទាក់ទាញភ្ញៀវទេសចរជាតិ និងអន្តរជាតិ បានចូលរួមកម្សាន្តសប្បាយៗ ក្នុងឱកាសពិធីបុណ្យចូលឆ្នាំថ្មី ប្រពៃណីជាខ្មែរ។ ជាមួយគ្នានោះ លោកក៏បានជំរុញឱ្យមន្ទីរព័ត៌មានខេត្តសៀមរាប និងរដ្ឋបាលខេត្ត ធ្វើយ៉ាងណាត្រូវចូលរួមផ្សព្វផ្សាយព័ត៌មានឱ្យបានទូលំទូលាយ ជុំវិញព្រឹត្តិការណ៍“សៀមរាបសង្ក្រាន្ត” ចាប់ពិថ្ងៃទី១៣-១៦ ខែមេសា ឆ្នាំ២០២៤ ខាងមុខនេះ។

សូមបញ្ជាក់ថា ព្រឹត្តិការណ៍ “សៀមរាបសង្ក្រាន្ត” ឆ្នាំ២០២៤ នេះ មានគោលបំណងផ្តល់ឱកាសឱ្យយុវជន ក៏ដូចជាសាធារណជនខ្មែរទូទៅ បានចូលរួមអបអរសាទរពិធីបុណ្យចូលឆ្នាំថ្មី ប្រពៃណីជាតិនៅលើទឹកដីប្រវត្តិសាស្ត្រសៀមរាបអង្គរ ជាលក្ខណៈមហាគ្រួសារខ្មែរតែមួយ។ ព្រឹត្តិការណ៍នេះ ក៏នឹងបានផ្តល់ឱកាសឱ្យកម្ពុជា ជាពិសេស ខេត្តសៀមរាប បានផ្សព្វផ្សាយលើកតម្កើងពីអរិយធម៌វប្បធម៌ ទំនៀមទម្លាប់ ប្រពៃណីដ៏ផូរផង់របស់ប្រជាពលរដ្ឋខ្មែរ ជូនភ្ញៀវជាតិ និងអន្តរជាតិ ដើម្បីស្វែងយល់ព្រមទាំងពង្រីកកិត្យានុភាពនៅក្នុងតំបន់ នឹងទៅលើពិភពលោកជាដើម៕

អត្ថបទ៖ គឿន វេត

The post ខេត្តសៀមរាប កំពុងរៀបចំតុបតែងកែលម្អភ្លើង និងរៀបចំកន្លែងកម្សាន្តជាច្រើន សម្រាប់ព្រឹត្តិការណ៍ “សៀមរាបសង្ក្រាន្ត” appeared first on Kampuchea Thmey Daily.

ព្រឹត្តិការណ៍នេះ មានកម្មវិធីកម្សាន្តជាច្រើន រួមមាន៖ កម្មវិធីជិះទូកកម្សាន្ត តំបន់ត្រជាក់ស្រស់ស្រាយ ល្បែងប្រជាប្រិយខ្មែរ ពិធីសាសនា ពិព័រណ៍ម្ហូបអាហារ ការសម្តែងសិល្បៈបុរាណ ការប្រគំតន្ត្រី និងកម្មវិធីជាច្រើនផ្សេងៗទៀត។

ដើម្បីរក្សាបាននូវសន្តិសុខ សុវត្ថិភាព សណ្តាប់ធ្នាប់ក៏ដូចជារក្សាបាននូវប្រពៃណីជាតិ និងសេចក្តីថ្លៃថ្នូររដ្ឋបាលខេត្តសៀមរាបបានណែនាំចំណុចមួយចំនួនរួមមាន៖

១. រដ្ឋបាលក្រុង ស្រុក មន្ទីរ-អង្គភាពពាក់ព័ន្ធ និងសមត្ថកិច្ចគ្រប់លំដាប់ថ្នាក់ ត្រូវរៀបចំដាក់ចេញនូវផែនការជាក់ស្តែងនៅតាមមូលដ្ឋានរៀងៗខ្លួន និងណែនាំដល់អង្គភាពពាក់ព័ន្ធក្រោម ឱវាទដើម្បីធានាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ព្រមទាំងទីតាំងចំណត ផ្លូវថ្មើរជើង និងការបញ្ចៀសចរាចរណ៍នៅតាមបណ្តាផ្លូវនានា អំឡុងពេលប្រារព្ធពិធី។

២. ត្រូវគោរពច្បាប់ស្តីពីចរាចរណ៍ផ្លូវគោក និងមិនត្រូវបើកបរក្នុងស្ថានការរាស្ត្រវឹង ដើម្បីចៀសវៀងគ្រោះថ្នាក់ផ្សេងៗ។

៣. ត្រូវចូលរួម និងផ្ដល់កិច្ចសហការជាមួយអាជ្ញាធរមានសមត្ថកិច្ចគ្រប់លំដាប់ថ្នាក់ឱ្យបានល្អប្រសើរ។

៤. ហាមដាច់ខាតលេងល្បែងស៊ីសងខុសច្បាប់គ្រប់ប្រភេទ។

៥. ហាមឃាត់ការនាំចូល ចែកចាយ ទិញលក់ និងអុជផាវ ឬគ្រឿងផ្ទុះគ្រប់ប្រភេទដែលអាច បង្កឱ្យមានការគ្រោះថ្នាក់ និងភ្ញាក់ផ្អើល បង្កអសន្តិសុខ និងប៉ះពាល់សណ្តាប់ធ្នាប់ សាធារណៈ។

៦. ចូលរួមទប់ស្កាត់គ្រោះអគ្គិភ័យ ដោយប្រុងប្រយ័ត្ន និងម្ចាស់ការខ្ពស់ចំពោះភ្លើងទៀន ធូបភ្លើងចង្ក្រាន ចរន្តអគ្គិសនី ដើម្បីរក្សាបាននូវទ្រព្យសម្បត្តិ អាយុជីវិតផ្ទាល់ខ្លួន និងអ្នកដ៏ទៃ។

៧. ហាមឃាត់ការលេងល្បែងជះទឹក ការជះទឹកមានពណ៌ ឬទឹកកខ្វក់ គប់ស្បោងទឹក លាបធ្យូង ឬប៉ាតម្សៅ និងការវាយដោយរំពាត់ ឬឧបករណ៍ផ្សេងៗចំពោះបងប្អូនប្រជាពលរដ្ឋដែល កំពុងធ្វើដំណើរគ្រប់ប្រភេទក្រៅពីតំបន់ដែលបានអនុ​ញ្ញាត​។

៨. ត្រូវពិនិត្យលទ្ធភាពតុបតែងលម្អទាំងផ្នែកខាងក្នុង និងខាងក្រៅគេហដ្ឋាន ឬអាជីវកម្ម របស់ខ្លួន ដោយបង្ហាញពីវប្បធម៌ខ្មែរ អត្តសញ្ញាណខ្មែរ ឬអត្តសញ្ញាណពិសេសរបស់ ខេត្តសៀមរាប ឬចងពាក្យស្លោកជាដើម។

៩. ចំពោះទីតាំងអាជីវកម្មនានា ឬការលក់ដូរ ឬតាំងបង្ហាញផលិតផលផ្សេងៗ ឬផ្ទាំងផ្សព្វផ្សាយ ពាណិជ្ជកម្ម ដែលមានការតបណ្តាញអគ្គិសនីតុបតែង ឬក្នុងគោលបំណងប្រើប្រាស់ ជាក់ស្តែងលើទីតាំងរបស់ខ្លួន ត្រូវបង្កើនការយកចិត្តទុកដាក់ឱ្យបានខ្ពស់នូវលក្ខណៈ បច្ចេកទេស ជាពិសេសក្នុងអំឡុងពេលរៀបចំដំណើរការព្រឹត្តិការណ៍កម្មវិធីនានាក្នុងឱកាស បុណ្យចូលឆ្នាំថ្មីប្រពៃណីជាតិ ឬពិនិត្យលទ្ធភាពផ្តាច់ចរន្តអគ្គិសនីជាបណ្តោះអាសន្ន ដើម្បីចៀសវាងការកើតឡើងហេតុការណ៍ផ្សេងៗជាយថាហេតុ ឬឆ្លងចរន្តអគ្គិសនី។

១០. ហាមដាច់ខាតការដាក់តាំងបង្ហាញផលិតផលអាជីវកម្មរបស់ខ្លួន នៅលើគំនូសផ្លូវថ្មើរជើង តាមបណ្តាផ្លូវនានាក្នុងក្រុងសៀមរាប។

១១-លើកទឹកចិត្តដល់បងប្អូនប្រជាពលរដ្ឋ និងយុវជន យុវនារី ចូលរួមលេងល្បែងប្រជាប្រិយខ្មែរឱ្យបានច្រើនកុះករ៕

The post ខេត្តសៀមរាបរៀបចំ «សៀមរាបសង្ក្រាន្ត» មានកម្មវិធីកម្សាន្តជាច្រើនអំឡុងពេលបុណ្យចូលឆ្នាំខ្មែរ appeared first on Kampuchea Thmey Daily.