ព័ត៌មានជាតិ

កម្លាំងសមត្ថកិច្ចចម្រុះជាង២០០០នាក់ បានដាក់ពង្រាយការពារក្នុងភូមិសាស្ត្រខេត្តសៀមរាប ក្នុងឱកាសពិធីបុណ្យចូលឆ្នាំថ្មី

បានផុស

១៧ នាទី មុន

នៅ

ថ្ងៃសៅរ៍ ១៣ មេសា ២០២៤

ដោយ

សមត្ថកិច្ចគ្រោងប្រើប្រាស់កម្លាំងចម្រុះប្រមាណជាង ២០០០នាក់ សម្រាប់ការពារក្នុងភូមិសាស្ត្រនៃខេត្តសៀមរាប ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ រយៈពេល៤ថ្ងៃ ចាប់ពីថ្ងៃទី១៣ ដល់ថ្ងៃទី១៧ ខែមេសា ឆ្នាំ២០២៤។ នេះបើយោងតាមការឱ្យដឹងពី លោក វរសេនីយ៍ឯក ឡុង ម៉េនសុយ៉ាលី អ្នកនាំពាក្យស្នងការដ្ឋាននគរបាលខេត្តសៀមរាប នៅរសៀលថ្ងៃទី១៣ ខែមេសា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក វរសេនីយ៍ឯក ឡុង ម៉េនសុយ៉ាលី បានមានប្រសាសន៍ឲ្យដឹងថា កម្លាំងសមត្ថកិច្ចរបស់ស្នងការនគរបាលខេត្តសៀមរាប បានត្រៀមខ្លួនរួចជាស្រេច រួមទាំងមធ្យោបាយ និងសម្ភារ បម្រើលើកិច្ចការពារសន្តិសុខ សណ្តាប់ធ្នាប់ សុវត្ថិភាព ជូនដល់ប្រជាពលរដ្ឋ និងភ្ញៀវទេសចរណ៍ជាតិ អន្តរាជាតិ ដែលទៅកម្សាន្តសប្បាយរីករាយនៅក្នុងភូមិសាស្ត្រនៃខេត្តសៀមរាប ទាំងមូល។

លោកបានបញ្ជាក់ថា នៅក្នុងពិធីនេះបានប្រើប្រាស់កម្លាំងទាំង៣ប្រភេទប្រមាណជាង ២០០០នាក់ ដែលបំពាក់ទៅដោយឧបករណ៍ សម្ភារដែលបម្រើឱ្យកិច្ចការពារសន្តិសុខ ក្នុងនោះមានកម្លាំងល្បាតត្រួតពិនិត្យជាប្រចាំ ប្រើប្រាស់កម្លាំងប្រចាំបញ្ជា កម្លាំងការពារគោលដៅទីតាំងសប្បាយ វត្តអារាម ទីផ្សារតូចធំ រមណីដ្ឋាន និងប្រាសាទ ផ្សេងៗ ប្រើប្រាស់កម្លាំងរក្សាសន្តិសុខសម្រួលដោះស្រាយចរាចរណ៍នៅក្នុងភូមិសាស្ត្រផ្លួវចេញចូលខេត្តសៀមរាប ជាដើម។

ជាមួយគ្នានោះក៏បានបញ្ជាឱ្យអធិការនគរបាលក្រុង.ស្រុកទាំង១២ ត្រូវតាមដានត្រួតពិនិត្យមុខសញ្ញាចាស់ពាក់ព័ន្ធនឹងអំពើ ឆក់ លួច គាស់ផ្ទះ ប្លន់និងក្មេងទំនើង ត្រូវធ្វើការទប់ស្កាត់ឱ្យបានជាដាច់ខាតមិន ឱ្យមានករណីបែបនេះធ្វើឱ្យខាតបង់ទ្រព្យសម្បត្តិប្រជាពលរដ្ឋនោះទេ។

លោកឧត្តមសេនីយ៍ទោ តេង ច័ន្ទណាត បានបញ្ជាក់ថា ចំណុចដែលគួរឱ្យយកចិត្តទុកដាក់មួយទៀតគឺ ពង្រឹងកិច្ចការពារនៅទីតាំងរៀបចំ សៀមរាបសង្ក្រាន្ត ដែលមានប្រជាពលរដ្ឋច្រើនកុះករទៅលេងកម្សាន្តសប្បាយរីករាយ ដោយចាត់ចែងឱ្យការពារទីតាំងខាងលើ សំដៅធ្វើយ៉ាងណាឱ្យប្រជាពលរដ្ឋដែលទៅលេងកម្សាន្តឱ្យមានភាពសប្បាយរីករាយ និងសុខសុវត្ថិភាព ជាពិសេសទប់ស្កាត់ឱ្យបានអំពើលួច ឆក់នៅក្នុងតំបន់ខាងលើឱ្យមានប្រសិទ្ធភាពខ្ពស់។

ជាមួយគ្នានោះ លោកស្នងការ ក៏បានណែនាំឱ្យការដោះស្រាយសម្រួលចរាចរណ៍ ដោយសង្កេតឃើញថា ជារៀងរាល់ឆ្នាំមានប្រជាពលរដ្ឋធ្វើដំណើរចេញចូលខេត្តសៀមរាប ច្រើនមានការកកស្ទះ។ ក្នុងនោះក៏មានការត្រៀមកម្លាំងបង្កាពន្លត់អគ្គិភ័យសម្រាប់ជួយចេញសង្គ្រោះឱ្យបានទាន់ពេលវេលានៅពេលដែលមានគ្រោះអគ្គិភ័យកើតឡើងជាយថាហេតុ៕

ដោយ៖ជុន កុសល