ស៊ិន ស៊ីសាមុត Archives - Kampuchea Thmey Daily

តន្ត្រីទសវត្សរ៍ទី៦០-៧០ និងក្រុមព្រះសុរិយា សហការរំលឹកថ្ងៃកំណើតអធិរាជសំឡេងមាស ស៊ិន ស៊ីសាមុត

Din Thary — Tue, 27 Aug 2024 02:17:21 +0000

ដើម្បីជាការគោរពដឹងគុណដល់លោកតាអធិរាជសំឡេង មាស ស៊ិន ស៊ីសាមុត ដែលបានបន្សល់ទុកនូវស្នាដៃបទចម្រៀងល្បីល្បាញជាច្រើននោះ តន្ត្រីទសវត្សរ៍ទី៦០-៧០ និងក្រុមព្រះសុរិយាបានសហការគ្នាធ្វើពិធីរំលឹកថ្ងៃកំណើគម្រប់អាយុ ៩១ឆ្នាំ ជូនដល់វិរៈសិល្បករជើងចាស់ដ៏ល្បីល្បាញរូបនេះ។

ក្រុមព្រះសុរិយាបានបញ្ជាក់ឲ្យដឹងថា ឆ្នាំនេះក្រុមព្រះសុរិយាបានទទួលសេចក្តីទុកចិត្តពីតន្ត្រីទសវត្សរ៍ទី៦០-៧០ រៀបចំនូវពិធីរំលឹកថ្ងៃកំណើតជូនលោកអធិរាជសំឡេងមាស ស៊ិន ស៊ីសាមុត គម្រប់ ៩១ឆ្នាំ (២៣ សីហា ១៩៣៣-២០២៤)។ ពិធីនេះក៏មានវត្តមានកំពូលតារាភាពយន្តខ្មែរ ផ្ការីកគ្រប់រដូវលោកស្រី ឌី សាវ៉េត ,លោកគ្រូ អ៊ុក សំអាត កវី ,ឯកឧត្តម បណ្ឌិត ហ៊ឹម សុភី ,លោក មាស សាវ៉ាន់ តារាចម្រៀង និងក្មួយៗលោកអធិរាជសំឡេងមាស ស៊ិន ស៊ីសាមុត និងអ្នកគាំទ្រផងដែរ។

ក្រុមព្រះសុរិយាបានបន្តទៀតថា នេះគឺជា កិត្តិយសដែលក្រុមព្រសុរិយាបានសហការរៀបចំកម្មវិធីនេះជាមួយតន្ត្រី ទសវត្សរ៍ទី៦០-៧០ ដែលនេះជាបេសកកម្មមួយរបស់ក្រុមព្រះសុរិយា។ គេចងចាំថា តារាចម្រៀងលោកតា ស៊ិន ស៊ីសាមុត គឺជា អ្នកនិពន្ធបទចម្រៀង និងអ្នកចម្រៀងខ្មែរដ៏ល្បីល្បាញនាអំឡុងទស្សវត្ស ៥០ ដល់ ៧០។ គាត់មានរហស្សនាមថា អធិរាជសំឡេងមាស។

សូមជម្រាបជូនថា តន្ត្រីទសវត្សរ៍ទី៦០-៧០ តែងតែប្រារព្ធកម្មវិធីនេះជូនដល់លោកអធិរាជសំឡេងមាស ស៊ិន ស៊ីសាមុត ជារៀងរាល់ឆ្នាំផងដែរ ដើម្បីជាការគោរពដឹងគុណដល់លោកអធិរាជសំឡេងមាស ដែលបានបន្សល់ទុកនូវបទចម្រៀងដ៏ល្អឯកគ្មានពីររាប់ពាន់បទជូនមកដល់ជនានុជនតាំងពីសម័យសង្គមរាស្ត្រនិយម រហូតមកដល់សម័យតេជោសន្តិភាពនេះ។

លោកតា ស៊ិន ស៊ីសាមុត ទទួលមរណៈភាពក្នុងរបបប្រល័យពូជសាសន៍ខ្មែរក្រហមនៅក្នុងឆ្នាំ១៩៧៦។ លោកតា ស៊ិន ស៊ីសាមុត ជាវរជនតែមួយគត់ដែលបានបន្សល់ទុកនូកេរិ៍្តឈ្មោះដ៏ល្អសម្រាប់ជាតិខ្មែរនៅសតវត្សទី២០។ វិស័យសិល្បៈសំឡេងចម្រៀងរបស់លោកសមជាអធិរាជសំឡេងមាសស្ថិតដក់ជាប់ក្នុងអារម្មណ៍អ្នកចម្រៀងខ្មែរក្រោយៗមក៕

អត្ថបទ៖ ចាន់រ៉ា

The post តន្ត្រីទសវត្សរ៍ទី៦០-៧០ និងក្រុមព្រះសុរិយា សហការរំលឹកថ្ងៃកំណើតអធិរាជសំឡេងមាស ស៊ិន ស៊ីសាមុត appeared first on Kampuchea Thmey Daily.

អ្នកគាំទ្រចាំមិនភ្លេច! ថ្ងៃនេះខួបកំណើត ៩១ឆ្នាំ អធិរាជសំឡេងមាសលោកតា ស៊ិន ស៊ីសាមុត

Din Thary — Fri, 23 Aug 2024 03:35:52 +0000

ជាការពិត នៅពេលរម្លឹកដល់ឈ្មោះវីរៈសិល្បករជើងចាស់ដ៏ល្បីល្បាញលោកតា ស៊ិន ស៊ីសាមុត មហានជនពិតជានៅស្គាល់ និងចង់ចាំបានយ៉ាងច្បាស់ទោះបីជាលោកបានចែកឋានទៅហើយក្តី។ ប៉ុន្តែអ្វីដែលមិនអាចបំភ្លេចបាននោះគឺ កេរ្តិ៍ឈ្មោះ និងទឹកដមសំនៀងដ៏ផ្អែមពីរោះរណ្តុំចិត្ត។

គេចងចាំថា តារាចម្រៀងលោកតា ស៊ិន ស៊ីសាមុត គឺជា អ្នកនិពន្ធបទចម្រៀង និងជាអ្នកចម្រៀងខ្មែរម្នាក់ដ៏ល្បីល្បាញនាអំឡុងទស្សវត្សឆ្នាំ ៥០ ដល់ឆ្នាំ ៧០។ គាត់មានរហស្សនាមថា អធិរាជសំឡេងមាស។ យ៉ាងណាមិញ ថ្ងៃនេះក៏ត្រូវបានគេដឹងថា ជាថ្ងៃគម្រប់ខួបកំណើត ៩១ឆ្នាំ របស់លោកតា ស៊ិន ស៊ីសាមុត ផងដែរ។

ទន្ទឹមគ្នានៃការរម្លឹកដល់ថ្ងៃកំណើតរបស់លោកតា ស៊ិន ស៊ីសាមុត នេះដែរ គេឃើញមានទស្សនិកជន និងអ្នកគាំទ្រជាច្រើនបានបង្ហោះខ្លឹមសារ ភ្ជាប់រូបភាពនឹករលឹកដល់អធិរាជសំឡេងមាសលោកតា ស៊ិន ស៊ីសាមុត ។

តួយ៉ាងនៅលើទំព័រហ្វេសប៊ុកផេករបស់ “ក្រុមព្រះសុរិយា បានសរសេរថា រីករាយថ្ងៃរំលឹកកំណើតលោកអធិរាជសំឡេងមាស ស៊ិន ស៊ីសាមុត ថ្ងៃទី២៣ ខែសីហា ឆ្នាំ១៩៣៣–២០២៤ មកដល់ថ្ងៃនេះទើបកាន់តែច្បាស់ថា ជនានុជនខ្មែរគ្រប់ស្រទាប់វណ្ណៈក្នុងសម័យសង្គមរាស្ត្រនិយម និងសម័យតេជោសន្តិភាពពិតជាមិនអាចខ្វះនូវ សំឡេងច្រៀងបំពេសណ្ដំមនោរម្មណ៍នៃអស់សន្តករឲ្យនិទ្រាលង់លក់ស្កប់ស្កល់ ប្រាសចាក ភាពសោកសៅល្ហែល្ហើយពីទុក្ខកង្វល់បង្កបរិយាកាសសប្បាយរីករាយ រំភើបឥតឧបមា“។

សូមជម្រាបដែរថា លោកតា ស៊ិន ស៊ីសាមុត បានទទួលមរណៈភាពនៅក្នុងរបបប្រល័យពូជសាសន៍ខ្មែរក្រហម ក្នុងឆ្នាំ១៩៧៦។ លោកតា ស៊ិន ស៊ីសាមុត ជាវរជនតែមួយគត់ដែលបានបន្សល់ទុកនូវកេរ្តិ៍ឈ្មោះដ៏ល្អសម្រាប់ជាតិខ្មែរនៅសតវត្សទី២០។ វិស័យសិល្បៈសំឡេងចម្រៀងរបស់លោកសមជាអធិរាជសំឡេងមាសស្ថិតដក់ជាប់ក្នុងអារម្មណ៍អ្នកចម្រៀងខ្មែរក្រោយៗមក៕

អត្ថបទ៖ ចាន់រ៉ា

The post អ្នកគាំទ្រចាំមិនភ្លេច! ថ្ងៃនេះខួបកំណើត ៩១ឆ្នាំ អធិរាជសំឡេងមាសលោកតា ស៊ិន ស៊ីសាមុត appeared first on Kampuchea Thmey Daily.

បទចម្រៀងរបស់លោក ស៊ីន ស៊ីសាមុត ត្រូវបានក្រុមហ៊ុន Smart និង Pleng យកមកកែច្នៃគុណភាព ប្រសើរជាងមុន

Sorn Phanith — Thu, 25 Aug 2022 09:28:57 +0000

ក្រុមហ៊ុន Smart និង Pleng បានចូលរួម និងឧបត្ថម្ភលើការកែច្នៃគុណភាពចម្រៀងឲ្យមានភាពប្រសើរជាងមុន ដែលជាភាពអង់គ្លេសគេហៅថា Remastered Songs ទៅលើចម្រៀង 120 បទរបស់លោកតា ស៊ីន ស៊ីសាមុត ដោយមិនរាប់បញ្ចូល 10 ទៀតដែលគ្រួសារលោកតាបានធ្វើរួចឡើយ។ ទាំងនេះធ្វើឡើង ដើម្បីរម្លឹកដល់ថ្ងៃកំណើតរបស់លោកតា ស៊ីន ស៊ីសាមុត ដែលត្រូវនឹងថ្ងៃទី 23 ខែ សីហា ឆ្នាំ 1933 និងឧទ្ទិសគោរព ព្រមទាំងនឹករឭកដល់ស្នាដៃរបស់លោកតា ដោយវាជាការផ្ដួចផ្ដើមគំនិតរបស់ក្រុមគ្រួសាររបស់លោកតាផ្ទាល់ក្នុងការយកបទចាស់ៗរបស់លោកតា ទៅកែច្នៃគុណភាពចម្រៀងឲ្យមានភាពប្រសើរជាងមុន។

វាជាមោទកភាពរបស់ក្រុមហ៊ុន Smart និង Pleng ដែលបានចូលរួមក្នុងគម្រោងការកែច្នៃគុណភាពចម្រៀងឲ្យមានភាពប្រសើរជាងមុន និងបានដាក់ចូលក្នុងកម្មវិធីចម្រៀង Pleng app សម្រាប់ប្រជាជនកម្ពុជាដែលស្រឡាញ់បទពីដើម ដើម្បីការស្ដាប់កម្សាន្តផងដែរ។ បទចម្រៀងរបស់លោកតា ស៊ីន ស៊ីសាមុត 130 បទ មានស្ដាប់នៅក្នុង Pleng app តែប៉ុណ្ណោះ។

ដូចដែលបានដឹងមកហើយថា លោកតា ស៊ីន ស៊ីសាមុត ជាអធិរាជសំឡេងមាសប្រចាំប្រទេសកម្ពុជា ដែលជាមោទកភាពក្នុងវិស័យសិល្បៈរបស់ពួកយើង ដោយសារស្នាដៃតែងនិពន្ធទំនុកច្រៀង និងសម្លេងដែលមានទឹកដមដ៏ក្រអួនក្រអៅ ពីរោះរណ្ដំចិត្តគ្រប់ប្រភេទបទចម្រៀង និងជាពិសេសការច្រៀងរបស់លោកផ្ទាល់ធ្វើឲ្យអ្នកស្ដាប់អន្លង់អន្លោច កម្សត់ខ្លោចផ្សា ឬសប្បាយរីករាយទៅតាមបទចម្រៀងតែម្ដង។

គួរបញ្ជាក់បន្ថែមផងដែរ រាល់ការស្ដាប់បទចម្រៀងរបស់លោកតា ស៊ីន ស៊ីសាមុត ទាំងអស់ក្នុង Pleng app នោះ មិនត្រឹមតែជាការជួយគាំទ្រ និងថែរក្សាស្នាដៃដ៏អស្ចារ្យរបស់អធិរាជសំឡេងមាសប្រចាំប្រទេសកម្ពុជានោះទេ តែក៏ផ្នែកមួយនៃការជួយរកចំណូលដល់គ្រួសាររបស់លោកតាផងដែរ ព្រោះចំនួនដងនៃការស្ដាប់ទាំងអស់នឹងក្លាយជាប្រាក់កម្រីពី Pleng app ជូនម្ចាស់កម្មសិទ្ធិបទចម្រៀង។

ចូលរួមគាំទ្រ និងស្ដាប់បទដែលបានកែច្នៃគុណភាពចម្រៀងឲ្យមានភាពប្រសើរជាងមុនទាំងអស់នៅក្នុង Pleng app ឥឡូវនេះ៖ https://pleng.smart.com.kh/album/sinn-sisamouth-new-collection/92108313/

The post បទចម្រៀងរបស់លោក ស៊ីន ស៊ីសាមុត ត្រូវបានក្រុមហ៊ុន Smart និង Pleng យកមកកែច្នៃគុណភាព ប្រសើរជាងមុន appeared first on Kampuchea Thmey Daily.