ស្ថានទូតកម្ពុជាប្រចាំប្រទេសថៃ Archives - Kampuchea Thmey Daily

ស្ថានទូតកម្ពុជានៅបាងកក បើកដំណើរការជាធម្មតា បើទោះមានពលរដ្ឋថៃធ្វើបាតុកម្ម

Thoeun Vansong — Fri, 06 Jun 2025 07:27:32 +0000

នៅរសៀលថ្ងៃទី៦ ខែមិថុនានេះ លោក ហ៊ុន សារឿន ឯកអគ្គរាជទូតកម្ពុជាប្រចាំប្រទេសថៃ បានអះអាងថា ស្ថានទូតកម្ពុជានៅទីក្រុងបាងកក កំពុងបើកដំណើរការជាធម្មតា បើទោះបីមានពលរដ្ឋថៃបានប្រមូលផ្ដុំធ្វើបាតុកម្មនៅស្ថានទូតក៏ដោយ។

បើតាមលោកឯកអគ្គរាជទូត នៅវេលាម៉ោង ១០ៈ០០នាទីព្រឹក នៅថ្ងៃទី៦ ខែមិថុនា ឆ្នាំ២០២៥នេះ ក្រុមបាតុករដែលហៅខ្លួនឯងថា «បណ្តាញនិស្សិត និងប្រជាជន ដើម្បីកែទម្រង់ប្រទេសថៃ» បានប្រមូលផ្តុំគ្នាប្រមាណ២០០នាក់ នៅទីតាំងដងផ្លូវម្ខាងទៀត ទល់មុខស្ថានទូតកម្ពុជា ដើម្បីធ្វើបាតុកម្ម ថ្លែងញត្តិទាមទារឱ្យកម្ពុជាគោរពអធិបតេយ្យជាតិថៃ។ តែបាតុកម្មនេះ បានរំសាយទៅវិញនៅវេលាម៉ោង ១១ៈ១៥នាទីព្រឹក ថ្ងៃដដែល។

លោក ហ៊ុន សារឿន បានបញ្ជាក់លើបណ្ដាញហ្វេសប៊ុករបស់លោក ថា សមត្ថកិច្ចនគរបាលថៃ បានដាក់កម្លាំងការពារសុវត្ថិភាពជូនស្ថានទូត និងមន្ត្រីបុគ្គលិករបស់ស្ថានទូតយ៉ាងហ្មត់ចត់ល្អប្រសើរ ហើយមន្ត្រី បុគ្គលិកនៃស្ថានទូតទាំងអស់ មានសុវត្ថិភាព និងបាននិងកំពុងបន្តបំពេញការងាររបស់ខ្លួនជាប្រក្រតី។

លោក អះអាងថា «ស្ថានទូតកំពុងបើកដំណើរការផ្តល់សេវានានាជូនបងប្អូនប្រជាពលរដ្ឋខ្មែរ និងបរទេសជាធម្មតា»។

ការចេញមកអះអាងខាងលើ បានកើតឡើងគឺបន្ទាប់ពីមានពលរដ្ឋខ្មែរជាច្រើនបានសម្តែងក្តីបារម្ភចំពោះសុវត្ថិភាពមន្ត្រីទាំងអស់នៃស្ថានទូតកម្ពុជាប្រចាំប្រទេសថៃ បន្ទាប់ពីទទួលបានដំណឹងអំពីការប្រមូលផ្តុំធ្វើបាតុកម្មរបស់បណ្តាញនិស្សិត និងប្រជាជនថៃ នៅមុខស្ថានទូតកម្ពុជា ក្នុងទីក្រុងបាងកក កាលពីព្រឹកមិញ៕

ដោយ៖ ធឿន វ៉ាន់សុង

The post ស្ថានទូតកម្ពុជានៅបាងកក បើកដំណើរការជាធម្មតា បើទោះមានពលរដ្ឋថៃធ្វើបាតុកម្ម appeared first on Kampuchea Thmey Daily.

ថៃ ផ្ដល់អាហារូបករណ៍ ៦៨ កន្លែង ដល់និស្សិតបរទេសក្នុងឆ្នាំសិក្សា ២០២៣

Din Thary — Wed, 01 Mar 2023 08:13:26 +0000

ក្រសួងឧត្ដមសិក្សា វិទ្យាសាស្ត្រ ស្រាវជ្រាវ និងនវានុវត្តន៍ នៃប្រទេសថៃ (MHESI) នឹងផ្តល់អាហារូបករណ៍ចំនួន ៦៨កន្លែង សម្រាប់ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត សម្រាប់ឆ្នាំសិក្សា២០២៣-២០២៤។

យោងតាមស្ថានទូតថៃប្រចាំព្រះរាជាណាចក្រកម្ពុជា ក្រសួងឧត្ដមសិក្សា វិទ្យាសាស្ត្រ ស្រាវជ្រាវ និងនវានុវត្តន៍ នៃប្រទេសថៃ (MHESI) ដោយមានការសហការជាមួយបណ្ដាសាកលវិទ្យាល័យ នៅក្នុងព្រះរាជាណាចក្រថៃចំនួន ១២សម្រេចផ្ដល់អាហារូបករណ៍ចំនួន ៦៨ កន្លែង (International Program) ដល់និស្សិតសាស្ត្រាចារ្យ មហាវិទ្យាល័យ និងសាធារណជនទូទៅ។

សម្រាប់អាហារូបករណ៍ទាំង ៦៨ កន្លែង ផ្ដល់ឱ្យបេក្ខជនដែលមកពីប្រទេសមួយចំនួនដូចជា ប្រទេសឡាវ, មីយ៉ាន់ម៉ា, វៀតណាម រួមទាំងកម្ពុជាក្នុងកម្មវិធី «Thailand Scholarship ( Year 2023) សម្រាប់ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត ឆ្នាំសិក្សា២០២៣-២០២៤»។

សម្រាប់អត្ថប្រយោជន៍ដែលសិស្ស និស្សិត បេក្ខជន អាចទទួលបានពីអាហារូបករណ៍ ដោយខាងភាគីតថៃនឹងរ៉ាប់រងទៅលើថ្លៃសិក្សា, ប្រាក់អាហារូបករណ៍ប្រចាំខែ, ការចំណាយលើការធ្វើដំណើរ, ការស្នាក់នៅ និងការធានារ៉ាប់រងគ្រោះថ្នាក់ និងសុខភាពជាដើម។

ព័ត៌មានបន្ថែមពីកម្មវិធីអាហារូបករណ៍ខាងលើ ក៏ដូចជាការណែនាំពីការបំពេញសំណុំបែបបទ និងតារាងបញ្ជីកម្មវិធីអាហារូបករណ៍ (Application Guideline and List of Scholarship Program) អាចចូលតាមរយៈលីង http://bit.ly/3wsAGIN ឬស្កេន QR code និងដាក់ពាក្យឲ្យបានមុនថ្ងៃទី៣១ ខែមីនា ឆ្នាំ២០២៣ ខាងមុខនេះ។ សម្រាប់ព័ត៌មានលម្អិត អាចទាក់ទងតាមលេខទូរស័ព្ទ+6626105423 ឬអ៊ីមែល tsohec@gmail.com 9 da.។

ដោយ៖ ថារី

The post ថៃ ផ្ដល់អាហារូបករណ៍ ៦៨ កន្លែង ដល់និស្សិតបរទេសក្នុងឆ្នាំសិក្សា ២០២៣ appeared first on Kampuchea Thmey Daily.

ស្ថានទូតកម្ពុជានៅថៃ នាំយកជំនួយ ជូនពលករខ្មែរ៦០គ្រួសារ កំពុងជួបការលំបាកខ្លាំង

KC Virak — Wed, 22 Sep 2021 08:57:04 +0000

នៅព្រឹកថ្ងៃទី២២ ខែកញ្ញា ឆ្នាំ២០២១នេះ ស្ថានទូតកម្ពុជាប្រចាំប្រទេសថៃ ដឹកនាំដោយ លោក អ៊ូក សោភ័ណ ឯកអគ្គរាជទូត និងមន្ត្រីការទូត បាននាំយកអំណោយជាគ្រឿងឧបភោគបរិភោគរួមមាន អង្ករ ត្រីខ បន្លែ និងសាច់ស្រស់ ចុះចែកដល់បងប្អូនពលករខ្មែរចំនួន៦០គ្រួសារ ដែលកំពុងជួបការលំបាកខ្លាំងដោយសារការរីករាតត្បាតជំងឺកូវីដ-១៩ នៅស្រុកប៉្លែងយ៉ាវ ខេត្តឆាក់ឈើងសៅ។ នេះបើតាមការផ្ដល់ព័ត៌មានពីលោក កុយ គួង អ្នកនាំពាក្យក្រសួងការបរទេស និងសហប្រតិបត្តិកាអន្តរជាតិកម្ពុជា។

សូមបញ្ជាក់ថា កាលពីថ្ងៃទី១៣ ខែកញ្ញា ឆ្នាំ២០២១ នេះ លោក អ៊ូក សោភ័ណ ឯកអគ្គរាជទូតកម្ពុជា ប្រចាំព្រះរាជាណាចក្រថៃឡង់ដ៍ បានចាត់ក្រុមការងារនាំយក អង្ករ ត្រីខ បន្លែ ត្រី សាច់ ទៅប្រគល់ជូនតំណាងរបស់បងប្អូនពលករខ្មែរចំនួន ៦ ក្រុម នៅផ្លូវពហុយោធិន១ សង្កាត់ផៈយ៉ាថៃ ខណ្ឌផៈយ៉ាថៃ រាជធានីបាងកក ដើម្បីនាំយកទៅចែកជូនបន្តដល់បងប្អូនពលករសរុប ១១៣ គ្រួសារផងដែរ។ ក្នុងនោះពួកគាត់រស់នៅ៖

ទី១. ផ្លូវសុខសៈវ៉ាត់ឌី ១២ ឃុំប៉ាកខ្លងប្លាកាត់ ស្រុកផ្រៈសមុទ្រចេឌី ខេត្តសមុទ្រប្រាកាន ចំនួន ២៤ គ្រួសារ។

ទី២. តំបន់ ៩/១៥៥ អ៊ីមភើរៀល ឃុំឡាកូណា ស្រុកបាងបួថង ខេត្តនុនថៈប៊ុរី ចំនួន ៥ គ្រួសារ។

ទី៣. ក្រុមទី ៥ ផ្លូវសុខសុវត្ថិ ២ សង្កាត់ចោមថង ខណ្ឌចោមថង ទីក្រុងបាងកក ចំនួន ២៣ គ្រួសារ។

ទី៤. គម្រោងការស៊ិនថានី ៨៨ ឃុំបានកៅ ស្រុកផានថង ខេត្តឈុនប៊ុរី ចំនួន ២២ គ្រួសារ។

ទី៥. តំបន់កៈសេតណៈវ៉ៈមីន ទីក្រុងបាងកក ចំនួន ១៧ គ្រួសារ។

ទី៦. តំបន់តៈឡាតថៃ ស្រុកខ្លងហ្លួង ខេត្តប៉ៈធុមថានី ២២ គ្រួសារ។

ប្រជាជនទាំងនេះ សុទ្ធសឹងជាអ្នកជួបការលំបាកខ្លាំង ខ្លះបាត់បង់ការងារ ខ្លះមានឆ្លងជំងឺកូវីដ-១៩ និងមួយភាគធំជាអ្នកដែលជាប់ធ្វើចត្តាឡីស័ក មិនអាចទៅធ្វើការបាន៕

អត្ថបទ៖ កោះកែវ

The post ស្ថានទូតកម្ពុជានៅថៃ នាំយកជំនួយ ជូនពលករខ្មែរ៦០គ្រួសារ កំពុងជួបការលំបាកខ្លាំង appeared first on Kampuchea Thmey Daily.

ស្ថានទូតកម្ពុជានៅ ថៃ នាំយកស្បៀងអាហារចែកជូនពលករខ្មែរ ៩៩ គ្រួសារ ដែលកំពុងជួបការលំបាក

សាង ស្រីល័ក្ខ — Sun, 12 Sep 2021 08:43:04 +0000

នៅព្រឹកថ្ងៃទី ១២ ខែ កញ្ញា ឆ្នាំ ២០២១ នេះ ឯកអគ្គរាជទូតកម្ពុជា និងមន្ត្រីស្ថានទូតកម្ពុជា ប្រចាំប្រទេសថៃ បាននាំយក អង្ករ ត្រីខ បន្លែ និង ត្រីសាច់ ទៅចែកជូនបងប្អូនពលករខ្មែរ ចំនួន ៩៩ គ្រួសារ នៅផ្លូវពហុយោធិន១ សង្កាត់ផៈយ៉ាថៃ ខ័ណ្ឌផៈយ៉ាថៃ រាជធានីបាងកក។

លោក កុយ គួង រដ្ឋលេខាធិការ និងជាអ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា បានឲ្យដឹងថា បងប្អូនទាំងនេះ សុទ្ធសឹងជាអ្នកដែលជួបការលំបាកខ្លាំង និងមួយភាគធំ ជាអ្នកដែលជាប់ធ្វើចត្តាឡីស័ក។

លោកថា ការចែកជូនគ្រឿងឧបភោគបរិភោគនេះ ត្រូវបានផ្ដល់ជូនទៅតំណាងរបស់ពួកគាត់ដើម្បីយកទៅចែកជូនបន្តដល់ដៃគ្រួសារនីមួយៗ ដោយសារពួកគាត់ពុំអាចមកទទួលដោយផ្ទាល់បាន និងដើម្បីបង្ការការរាតត្បាតនៃជំងឺកូវីដ-១៩ ផង៕

អត្ថបទ៖ កោះកែវ

The post ស្ថានទូតកម្ពុជានៅ ថៃ នាំយកស្បៀងអាហារចែកជូនពលករខ្មែរ ៩៩ គ្រួសារ ដែលកំពុងជួបការលំបាក appeared first on Kampuchea Thmey Daily.

ឯកអគ្គរាជទូតកម្ពុជា ស្នើឲ្យអាជ្ញាធរថៃ ជួយព្យាបាល និងចាក់វ៉ាក់សាំងដល់បងប្អូនពលរដ្ឋខ្មែរឲ្យបានទាន់ពេល

Kang Tola — Mon, 06 Sep 2021 13:59:45 +0000

ការស្នើរបស់ឯកអគ្គរាជទូតកម្ពុជាប្រចាំប្រទេសថៃនេះ បានធ្វើឡើងនៅក្នុងកិច្ចប្រជុំជាមួយអភិបាលខេត្តខេត្តរ៉ៈយ៉ង ខណៈលោកដឹកនាំក្រុមការងារ នាំយកអំណោយចែកជូនបងប្អូនពលករខ្មែរចំនួន៨០ គ្រួសារ ដែលជួបការលំបាកខ្លាំង ដោយសារការរាតត្បាតជំងឺកូវីដ១៩ នេះបើតាមការបញ្ជាក់ពីអ្នកនាំពាក្យ។

លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជាបានឲ្យដឹងនារសៀលនេះថា ឯកអគ្គរាជទូតកម្ពុជាប្រចាំប្រទេសថៃ និងក្រុមការងារស្ថានទូត នៅថ្ងៃទី០៦ ខែកញ្ញា ឆ្នាំ២០២១ នេះ បានសួរសុខទុក្ខ និងយកអំណោយ ចុះចែកដល់បងប្អូនពលករខ្មែរចំនួន ៨០គ្រួសារ ដែលជួបការលំបាកខ្លាំងដោយសារការរាតត្បាតជំងឺកូវីដ១៩ នៅឃុំថាងក្វៀន ស្រុកក្លែង ខេត្តរ៉ៈយ៉ង ដែលឱកាសនោះ ក៏មានការចូលរួមពីអភិបាលខេត្តរ៉ៈយ៉ង មន្ទីរការងារ មន្ទីរអន្តោប្រវេសន៍ លោកអភិបាលស្រុក ក្រុមប្រឹក្សាស្រុក ក្រុមប្រឹក្សាឃុំ និងអាជ្ញាធរពាក់ព័ន្ធ របស់ថៃផងដែរ។

បើតាមលោក កុយ គួង នៅក្នុងឧកាសនោះ ក្រោយពីសំណេះសំណាល និងចែកអំណោយ ឯកអគ្គរាជទូតបានជួបប្រជុំការងារជាមួយលោកអភិបាលខេត្ត ដែលក្នុងនោះលោកបានថ្លែងអំណរគុណដល់ភាគីថៃ និងស្នើឲ្យលោកអភិបាលខេត្ត និងអាជ្ញាធរពាក់ព័ន្ធ បន្តជួយមើលថែ ធ្វើតេស្ត ព្យាបាល និងចាក់វ៉ាក់សាំងដល់បងប្អូនពលរដ្ឋខ្មែរឲ្យបានទាន់ពេលវេលា។

ជាការឆ្លើយតប លោកអភិបាលខេត្តរ៉ៈយ៉ង បានបញ្ជាក់ថា នៅខេត្តរ៉ៈយ៉ង មានពលរដ្ឋខ្មែរកំពុងរស់នៅ និងធ្វើការច្រើនម៉ឺននាក់ ហើយក្នុងនោះ លោកអភិបាលខេត្តបានជម្រាបបន្ថែមអំពីវិធានការក្នុងការទប់ស្កាត់ជំងឺកូវីដ១៩ របស់ខេត្តរ៉ៈយ៉ងថា ប្រសិនបើមានពលករកម្ពុជាកំពុងបម្រើការងារឆ្លងកូវីដ នៅក្នុងរោងចក្រ សហគ្រាស ត្រូវទទួលការព្យាបាលត្រឹមត្រូវ។

លោកអះអាងថា បើមានអ្នកវិជ្ជមានកូវីដ១៩ គឺយកទៅរក្សាព្យាបាលនៅក្នុងរោងចក្រតែម្តង ហើយនៅពេលជាសះស្បើយ គឺត្រឡប់ទៅធ្វើការដូចដើម និងទទួលការចាក់វ៉ាក់សាំង ចំណែកអ្នកអវិជ្ជមានធ្វើការធម្មតា នេះបើតាមគំនិតផ្តួចផ្តើមថ្មី “Bubble & Seal Procedure” ។ ជាមួយគ្នានោះ លោកបានផ្តែផ្តាំពលករខ្មែរកុំឲ្យភ័យខ្លាច កុំរត់គេចខ្លួន ហើយគំនិតផ្តួចផ្តើម(Bubble & Seal Procedure) នេះ បានទទួលការគាំទ្រពីម្ចាស់រោងចក្រ សហគ្រាស យ៉ាងពេញទំហឹង។

សូមបញ្ជាក់ថា នៅថ្ងៃទី០៦ ខែកញ្ញា ឆ្នាំ២០២១ ស្ថានអគ្គកុងស៊ុលកម្ពុជាប្រចាំខេត្តសាកែវ ក៏បានអន្តរាគមន៍សម្របសម្រួលបញ្ជូនពលករខ្មែរចំនួន២៣នាក់ ដែលមកពីតំបន់នានា ក្នុងប្រទេសថៃ ឲ្យវិលត្រឡប់មកកម្ពុជាវិញ តាមច្រកទ្វារព្រំដែនអន្តរជាតិខ្លងលឹក-ប៉ោយប៉ែត ដោយប្រគល់ជូនអាជ្ញាធរកម្ពុជា ដើម្បីដំណើរការតាមនីតិវិធីសុខាភិបាលផងដែរ៕

ដោយ ៖ កោះកែវ

The post ឯកអគ្គរាជទូតកម្ពុជា ស្នើឲ្យអាជ្ញាធរថៃ ជួយព្យាបាល និងចាក់វ៉ាក់សាំងដល់បងប្អូនពលរដ្ឋខ្មែរឲ្យបានទាន់ពេល appeared first on Kampuchea Thmey Daily.

ស្ថានទូតកម្ពុជានៅថៃ នាំយកគ្រឿងឧបភោគបរិភោគចែកដល់បងប្អូនពលករខ្មែរ ដែលកំពុងជួបការលំបាកចំនួន៦០គ្រួសារ

Kang Tola — Wed, 18 Aug 2021 13:31:24 +0000

ស្ថានទូតនៃព្រះរាជាណាចក្រកម្ពុជា ប្រចាំប្រទេសថៃ ដឹកនាំដោយលោក ធុច ដាលីន តំណាងឱ្យលោក អ៊ូក សោភ័ណ ឯកអគ្គរាជទូត នៅថ្ងៃទី១៨ ខែសីហា ឆ្នាំ២០២១នេះ បាននាំយកគ្រឿងឧបភោគបរិភោគ ដែលមានបន្លែ និងសាច់ ចុះចែកដល់បងប្អូនពលករខ្មែរ ដែលកំពុងជួបការលំបាកខ្លាំងដោយសារការរាតត្បាតជំងឺកូវីដ១៩ នៅ២កន្លែងផ្សេងគ្នា ចំនួន៦០គ្រួសារ ស្ថិតតំបន់ផ្លូវប្រះឆាស៊ុងខ្រោះ និងរាចាដា ខណ្ឌហ៊ួយខ្វាង ទីក្រុងបាងកក។

បើតាមស្ថានទូតកម្ពុជាប្រចាំប្រទេសថៃបានឲ្យដឹងដែរថា ប្រទេសថៃបានសម្រេចបន្តការរឹតត្បិតតំបន់ត្រួតពិនិត្យខ្ពស់បំផុត និងតឹងរ៉ឹងបំផុតចំនួន២៩ ខេត្ត ចាប់ពីថ្ងៃទី១៨ ដល់ថ្ងៃទី៣១ ខែសីហា ឆ្នាំ២០២១។ ជាមួយគ្នានោះ ស្ថានទូតបានអំពាវនាវឲ្យបងប្អូនខ្មែរ ដែលកំពុងមានវត្តមាននៅប្រទេសថៃ មេត្តាចូលរួមអនុវត្តតាមវិធានការរបស់រាជរដ្ឋាភិបាលថៃ និងវិធានការ ៣ ការពារ ៣ កុំ ឲ្យបានខ្ជាប់ខ្ជួន។

សូមបញ្ជាក់ថា ស្ថានភាពជំងឺកូវីដ-១៩ នៅក្នុងប្រទេសថៃ គិតត្រឹមថ្ងៃទី១៦ ខែសីហា ឆ្នាំ២០២១ មានអ្នកឆ្លងសរុបចំនួន៩២៨៣១៤ករណី និងមានអ្នកស្លាប់សរុប៧៧៣៤នាក់ ហើយសម្រាប់ថ្ងៃទី១៦ ខែសីហា ឆ្នាំ២០២១ មានអ្នកឆ្លងថ្មីចំនួន២១១៥៧ និងមានអ្នកស្លាប់ចំនួន១៨២នាក់៕

ដោយ ៖ កោះកែវ

The post ស្ថានទូតកម្ពុជានៅថៃ នាំយកគ្រឿងឧបភោគបរិភោគចែកដល់បងប្អូនពលករខ្មែរ ដែលកំពុងជួបការលំបាកចំនួន៦០គ្រួសារ appeared first on Kampuchea Thmey Daily.

ស្ថានទូតកម្ពុជានៅថៃរៀបចំជំនួយ៥,០០០កញ្ចប់ បន្តចែកជូនពលករជួបការលំបាក

KC Virak — Mon, 02 Aug 2021 03:43:37 +0000

លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជាបានឱ្យដឹងនៅព្រឹកថ្ងៃទី០២ ខែសីហា ឆ្នាំ២០២១នេះថា ក្រុមការងារស្ថានទូតកម្ពុជា ប្រចាំនៅប្រទេសថៃ បាន និងកំពុងបន្តសហការជាមួយក្រុមការងារទឹកចិត្តពលករនៅថៃ រៀបចំជំនួយ ចំនួន៥,០០០កញ្ចប់ ដែលមានអង្ករ មី ត្រីខកំប៉ុង ថ្នាំពេទ្យ ដើម្បីបន្តចុះចែកជូនដល់បងប្អូនពលករខ្មែរ ដែលជួបការលំបាកខ្លាំងនៅតាមបណ្តាខេត្តនានា នៅក្នុងប្រទេសថៃ ខណៈដែលប្រទេសនេះកំពុងជួបវិបត្តិធ្ងន់ធ្ងរ ដោយសារការរីករាល នៃជំងឺកូវីដ១៩។

គួរបញ្ជាក់ថា កាលពីថ្មីៗនេះ ស្ថានទូតក៏បាននាំយកអំណោយ ដែលមានគ្រឿងឧបភោគបរិភោគ ចុះចែកជូនដល់បងប្អូនពលករខ្មែរចំនួន១៣០គ្រួសារ នៅទីតាំងចំនួន២ផងដែរ ដែលរួមមាន ទី១ ការដ្ឋានសំណង់ ស្ថិតនៅសង្កាត់ចមភុន ខណ្ឌចតុចក្រ ក្រុងបាងកក ដែលនៅទីនោះ មានបងប្អូនពលករខ្មែរចំនួន ៩០គ្រួសារ និងទី២ ការដ្ឋានសំណង់ ស្ថិតនៅឃុំបាងភ្លីយ៉ៃ ស្រុកបាងភ្លី ខេត្តសមុទ្រប្រាកាន មានពលករខ្មែរចំនួន៤០គ្រួសារ។

ការចុះចែកអំណោយដល់បងប្អូនពលករខ្មែរនេះ គឺតែងទទួលបានការចូលរួមសហការ និងជួយសម្រួលពីអាជ្ញាធរពាក់ព័ន្ធរបស់ថៃ រួមមានតំណាងខាងសុខាភិបាលថៃ និងក្រសួងការងារថៃ ដោយអនុវត្តតាមវិធានការរបស់សុខាភិបាល ក្នុងការការពារ និងទប់ស្កាត់ការចម្លងជំងឺកូវីដ-១៩ យ៉ាងខ្ជាប់ខ្ជួន៕

អត្ថបទ៖ កោះកែវ

The post ស្ថានទូតកម្ពុជានៅថៃរៀបចំជំនួយ៥,០០០កញ្ចប់ បន្តចែកជូនពលករជួបការលំបាក appeared first on Kampuchea Thmey Daily.

ស្ថានទូតកម្ពុជានៅថៃរៀបចំ kits ចំនួន ៥ ពាន់កញ្ចប់ បន្តចែកជូនដល់បងប្អូនពលករខ្មែរ

deth leng — Mon, 02 Aug 2021 03:40:45 +0000

លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជាបានឱ្យដឹងនៅព្រឹកថ្ងៃទី០២ ខែសីហា ឆ្នាំ២០២១នេះថា ក្រុមការងារស្ថានទូតកម្ពុជា ប្រចាំនៅប្រទេសថៃ បាននិងកំពុងបន្តសហការជាមួយក្រុមការងារក្រុមការងារទឹកចិត្តពលករនៅថៃ រៀបចំ kits ចំនួន៥០០០ កញ្ចប់ ដែលមានអង្ករ មី ត្រីខកំប៉ុង ថ្នាំពេទ្យ ដើម្បីបន្តចុះចែកជូនដល់បងប្អូនពលករខ្មែរ ដែលជួបការលំបាកខ្លាំងនៅតាមបណ្តាខេត្តនានា នៅក្នុងប្រទេសថៃ ខណៈដែលប្រទេសនេះ កំពុងជួបវិបត្តិធ្ងន់ធ្ងរ ដោយសារការរីករាល នៃជំងឺកូវីដ១៩។

កាលពីថ្មីៗនេះ ស្ថានទូតក៏បាននាំយកអំណោយ ដែលមានគ្រឿងឧបភោគបរិភោគចុះចែកជូនដល់បងប្អូនពលករខ្មែរចំនួន១៣០គ្រួសារ នៅទីតាំងចំនួន២ផងដែរដែលរួមមាន ការដ្ឋានសំណង់ ស្ថិតនៅសង្កាត់ចមភុន ខណ្ឌចតុចក្រ ក្រុងបាងកក ទីនោះមានពលករខ្មែរ ៩០គ្រួសារ និង ទី១-ការដ្ឋានសំណង់ ស្ថិតនៅសង្កាត់ចមភុន ខណ្ឌចតុចក្រ ក្រុងបាងកក ដែលនៅទីនោះ មានបងប្អូនពលករខ្មែរចំនួន ៩០គ្រួសារ និងទី២- ការដ្ឋានសំណង់ ស្ថិតនៅឃុំបាងភ្លីយ៉ៃ ស្រុកបាងភ្លី ខេត្តសមុទ្រប្រាកាន មានពលករខ្មែរចំនួន៤០គ្រួសារ។

The post ស្ថានទូតកម្ពុជានៅថៃរៀបចំ kits ចំនួន ៥ ពាន់កញ្ចប់ បន្តចែកជូនដល់បងប្អូនពលករខ្មែរ appeared first on Kampuchea Thmey Daily.