ស្ថានទូតកម្ពុជាប្រចាំប្រទេសម៉ាឡេស៊ី Archives - Kampuchea Thmey Daily

ស្ថានទូតខ្មែរនៅប្រទេសម៉ាឡេស៊ី រៀបចំកម្មវិធីផ្សព្វផ្សាយអាហារកម្ពុជា នៅទីក្រុងគូឡាឡាំពួ

Kang Tola — Wed, 24 Nov 2021 10:25:15 +0000

លោក ចើយ វិចិត្រ ឯកអគ្គរដ្ឋទូតប្រចាំប្រទេសម៉ាឡេស៊ី កាលពីថ្ងៃអង្គារ ទី២៣ ខែវិច្ឆិកា ម្សិលមិញ បានរៀបចំកម្មវិធីផ្សព្វផ្សាយម្ហូបអាហាររបស់កម្ពុជា នៅទីក្រុងគូឡាឡាំពួ ប្រទេសម៉ាឡេស៊ី ដើម្បីពង្រឹងបន្ថែមទៀតនូវចំណងមិត្តភាព និងកិច្ចសហប្រតិបត្តិការដ៏ល្អ និងយូរអង្វែង រវាងប្រទេសទាំងពីរ ដែលជាផ្នែកមួយនៃគ្រួសារអាស៊ាន។

ថ្លែងនៅក្នុងពិធីនោះ លោក ជ័យ វិចិត្រ បានលើកឡើងថា អាហារ គឺជាមធ្យោបាយភ្ជាប់មនុស្សដោយមិនគិតពីភាពខុសគ្នានៃវប្បធម៌ ជាតិសាសន៍ ឬសាសនាឡើយ។ លោកថា ព្រឹត្តិការណ៍នេះ ជាកម្មវិធីដំបូងគេក្នុងគោលបំណង “មិនត្រឹមតែលើកកម្ពស់ពាណិជ្ជកម្ម វិនិយោគ និងទេសចរណ៍ទ្វេភាគីរវាងកម្ពុជា និងម៉ាឡេស៊ីប៉ុណ្ណោះទេ ប៉ុន្តែថែមទាំងពង្រឹងបន្ថែមទៀតនូវចំណងមិត្តភាព និងកិច្ចសហប្រតិបត្តិការដ៏ល្អ និងយូរអង្វែងរវាងប្រទេសយើងទាំងពីរដែលជាផ្នែកមួយនៃគ្រួសារអាស៊ាន”។

នៅក្នុងឱកាសនោះដែរ លោកឯកអគ្គរដ្ឋទូតក៏បានចុះហត្ថលេខាលើអនុស្សរណៈ នៃការយោគយល់គ្នាចំនួន៤ ដើម្បីផ្សព្វផ្សាយអាហារកម្ពុជានៅក្នុងទីផ្សារប្រទេសម៉ាឡេស៊ី។ ដែលការចុះហត្ថលេខានេះ គឺដើម្បីត្រួសត្រាយផ្លូវសម្រាប់កិច្ចសហការ និងស្វែងរកឱកាសក្នុងការអភិវឌ្ឍ និងគាំទ្រកម្មវិធី ដែលនឹងមានអត្ថប្រយោជន៍ទៅវិញទៅមកដល់ភាគីពាក់ព័ន្ធ។

អនុស្សរណៈនៃការយោគយល់នេះ ត្រូវបានចុះជាមួយសមាគមខ្សែសង្វាក់លក់រាយម៉ាឡេស៊ី សមាគមសិទ្ធិផ្តាច់មុខម៉ាឡេស៊ី សមាគមសហគ្រាសធុនតូច និងមធ្យមនៃប្រទេសម៉ាឡេស៊ី និង GenYouth Sdn.Bhd។

លោក ជ័យ វិចិត្រ បានបញ្ជាក់ថា “យើងនឹងព្យាយាមជួយ និងគាំទ្រគ្នាទៅវិញទៅមក ដើម្បីផ្សព្វផ្សាយ និងបង្កើតការយល់ដឹងអំពីម្ហូបខ្មែរដ៏ឆ្ងាញ់ពិសានៅក្នុងប្រទេសម៉ាឡេស៊ី និងសម្រួលដល់ការផ្គូផ្គងអាជីវកម្មរវាងសមាជិកក្រុមហ៊ុននៃសមាគមម៉ាឡេស៊ី និងសហគ្រិននៅកម្ពុជា”។ លោកថា វាជាជោគជ័យដ៏អស្ចារ្យមួយ ពីព្រោះមានអ្នកខ្លះបានបង្ហាញពីចំណាប់អារម្មណ៍ក្នុងការបើកភោជនីយដ្ឋានខ្មែរ ឬបន្ថែមមុខម្ហូបខ្មែរទៅក្នុងបញ្ជីមុខម្ហូបរបស់ពួកគេ។

ចំណែកអ្នកស្រី Shirley Tay ប្រធានសមាគមខ្សែសង្វាក់លក់រាយម៉ាឡេស៊ី ចង់ធ្វើការជាមួយស្ថានទូត ដើម្បីនាំយកក្រុមសហគ្រិនម៉ាឡេស៊ីចំនួន៣០នាក់មកទស្សនានៅកម្ពុជា ដើម្បីស្វែងរកឱកាសសម្រាប់ពាណិជ្ជកម្ម និងការវិនិយោគទ្វេភាគីក្នុងត្រីមាសទី១ ឆ្នាំ២០២២ ខាងមុខ៕

ដោយ ៖ កោះកែវ

The post ស្ថានទូតខ្មែរនៅប្រទេសម៉ាឡេស៊ី រៀបចំកម្មវិធីផ្សព្វផ្សាយអាហារកម្ពុជា នៅទីក្រុងគូឡាឡាំពួ appeared first on Kampuchea Thmey Daily.

ស្ថានទូតកម្ពុជា ប្រចាំប្រទេសម៉ាឡេស៊ី បានអន្តរាគមន៍ជួយបញ្ជូនពលរដ្ឋខ្មែរចំនួន០៤នាក់ ត្រឡប់មកកម្ពុជាវិញ

Kang Tola — Fri, 17 Sep 2021 11:49:19 +0000

អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា លោក កុយ គួង បានឲ្យដឹងនៅរសៀលថ្ងៃទី១៧ ខែកញ្ញា នេះថា ស្ថានទូតកម្ពុជាប្រចាំប្រទេសម៉ាឡេស៊ី បានអន្តរាគមន៍ជួយបញ្ជូនពលរដ្ឋខ្មែរចំនួន០៤នាក់ត្រឡប់មកកម្ពុជាវិញ តាមរយៈជើងយន្តហោះអាកាសចរណ៍សិង្ហបូរីលេខ SQ158 នាថ្ងៃទី១៧ ខែកញ្ញា ឆ្នាំ២០២១ វេលាម៉ោង៥ និង៣០នាទីល្ងាច នៅព្រលានយន្តហោះភ្នំពេញ។

បើតាមលោក កុយ គួង ដោយសារពលរដ្ឋខាងលើមានជីវភាពក្រីក្រខ្លាំង ពុំមាន លទ្ធភាពទិញសំបុត្រយន្តហោះ ស្ថានទូតបានសហការជាមួយអង្គការ IOM Malaysia ដើម្បីផ្តល់សំបុត្រយន្តហោះជូនពួកគាត់ត្រឡប់ទៅកម្ពុជាវិញ។

ក្នុងនោះ ស្ថានទូតបានជួយចេញលិខិតធ្វើដំណើរបណ្តោះអាសន្ន និងសម្រប សម្រួលជាមួយមន្ត្រីអន្តោប្រវេសន៍ម៉ាឡេស៊ី ព្រមទាំងបានចាត់មន្ត្រីជូន ដំណើរពលរដ្ឋខាងលើ នៅអាកាសយានដ្ឋានអន្តរជាតិ KLIA ផងដែរ៕

ដោយ ៖ កោះកែវ

The post ស្ថានទូតកម្ពុជា ប្រចាំប្រទេសម៉ាឡេស៊ី បានអន្តរាគមន៍ជួយបញ្ជូនពលរដ្ឋខ្មែរចំនួន០៤នាក់ ត្រឡប់មកកម្ពុជាវិញ appeared first on Kampuchea Thmey Daily.

ទូតខ្មែរនៅម៉ាឡេស៊ីថា ការពឹងពាក់ទីភ្នាក់ងារឯកជន និងការព្រមព្រៀងបង់កម្រៃសេវាផ្សេងៗមិនមែនជាការបង់ឲ្យស្ថានទូតទេ

Kang Tola — Wed, 25 Aug 2021 11:53:37 +0000

ស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំប្រទេសម៉ាឡេស៊ីបានប្រាប់ឲ្យពលករ ក៏ដូចជាប្រជាពលរដ្ឋខ្មែរទាំងអស់ថា ការពឹងពាក់ទីភ្នាក់ងារឯកជន ឬមេខ្យល់ ហើយព្រមព្រៀងបង់កម្រៃសេវាផ្សេងៗមិនមែនជាការបង់ឲ្យស្ថានទូតទេ ប៉ុន្តែប្រសិនបើមានបុគ្គលណាប្រើឈ្មោះស្ថានទូតទារប្រាក់កម្រៃសេវាផ្សេងៗ សូមប្រាប់ទៅស្ថានទូត នេះបើតាមការបញ្ជាក់របស់ស្ថានទូតនៅថ្ងៃទី២៥ ខែសីហា នេះ។

ការលើកឡើងរបស់ស្ថានទូតកម្ពុជាប្រចាំប្រទេសម៉ាឡេស៊ី បន្ទាប់ពីវិទ្យុអាស៊ីសេរី (RFA) បានចុះផ្សាយកាលពីថ្ងៃទី២៤ ខែសីហា ឆ្នាំ២០២១ថា “ពលករខ្មែរនៅម៉ាឡេស៊ីចោទប្រកាន់មន្ត្រីស្ថានទូតថា កេងយកផលប្រយោជន៍ក្នុងគ្រាជំងឺកូវីដ-១៩ រាតត្បាត”។ ស្ថានទូតបានហៅការផ្សាយនេះថា មានចរិតជាការផ្សាយញុះញង់ គ្មានមូលដ្ឋានត្រឹមត្រូវ និងមានចេតនា ធ្វើឱ្យប៉ះពាល់ដល់កិត្តិយសស្ថានទូត។

ស្ថានឯកអគ្គរាជទូតបានបញ្ជាក់ថា ប្រជាពលរដ្ឋ និងពលករ ពលការិនី ទោះបីមកស្នាក់នៅ និងធ្វើការដោយស្របច្បាប់ ឬគ្មានឯកសារស្នាក់នៅស្របច្បាប់ ហើយមានបំណងវិលត្រឡប់ទៅប្រទេសកម្ពុជាវិញ អាចវិលត្រឡប់ទៅវិញបានដោយខ្លួនឯង។ ចំពោះប្រជាពលរដ្ឋ ពលករ និងពលការិនី ដែលពុំមានឯកសារស្របច្បាប់ អាចវិលត្រឡប់ទៅកម្ពុជាវិញដោយខ្លួនឯង តាមរយៈកម្មវិធី Recalibration Programme របស់អន្តោប្រវេសន៍ម៉ាឡេស៊ី។ ចំពោះអ្នកដែលមានលិខិតឆ្លងដែនហួសសុពលភាព ខូច ឬបាត់ អាចស្នើសុំលិខិតធ្វើដំណើរ បណ្ដោះអាសន្ននៅស្ថានឯកអគ្គរាជទូត “ដោយឥតគិតថ្លៃ”។

ទោះជាយ៉ាងណាស្ថានទូតអះអាងថា នៅមានបងប្អូនពលរដ្ឋ ពលករ និងពលការិនី មួយចំនួននៅតែស្វែងរកការពឹងពាក់ពីភ្នាក់ងារឯកជន ឬមេខ្យល់ក្នុងការរៀបចំឯកសារ ដោយបានព្រម ព្រៀងផ្តល់កម្រៃសេវាសម្រាប់ថ្លៃសំបុត្រយន្តហោះ តេស្តកូវីដ-១៩ ការផាកពិន័យរបស់អន្តោប្រវេសន៍ម៉ាឡេស៊ី ថ្លៃស្នាក់នៅបណ្ដោះអាសន្ន ពេលមកកាន់អាកាសយានដ្ឋាន និងថ្លៃចំណាយផ្សេងៗ ហើយបងប្អូន ប្រជាពលរដ្ឋ ពលករ និងពលការិនី តែងតែយល់ថា ការបង់ប្រាក់ទៅឱ្យភ្នាក់ងារឯកជនទាំងនោះ គឺបង់មកឱ្យស្ថានទូត ដែលនេះជាការយល់ច្រឡំ និងធ្វើឲ្យប៉ះពាល់ដល់ស្ថានទូត។

ស្ថានទូតបញ្ជាក់ថា ក្នុងករណីដែលមានបុគ្គលណាប្រើប្រាស់ឈ្មោះមន្ត្រីស្ថានទូត ទៅទាមទារប្រាក់កម្រៃសេវារៀបចំ ឯកសារសម្រាប់វិលត្រឡប់ទៅកម្ពុជាវិញ ឬមានការចាំបាច់បន្ទាន់ បងប្អូនប្រជាពលរដ្ឋ ពលករ និងពលការិនី អាចទាក់ទងមកស្ថានទូតតាមលេខទូរសព្ទ ឬបញ្ជូនសារតាម WhatsApp មកកាន់លេខ៖ កិច្ចការកុងស៊ុល (+60) 177942368 – កិច្ចការពលករ៖ (+60) 1126263390 និង (+60) 163685386 ៕

ដោយ ៖ កោះកែវ

The post ទូតខ្មែរនៅម៉ាឡេស៊ីថា ការពឹងពាក់ទីភ្នាក់ងារឯកជន និងការព្រមព្រៀងបង់កម្រៃសេវាផ្សេងៗមិនមែនជាការបង់ឲ្យស្ថានទូតទេ appeared first on Kampuchea Thmey Daily.

ស្ថានទូតអន្តរាគមន៍ពលករខ្មែរនេសាទខុសច្បាប់នៅរដ្ឋ Perak មកដល់កម្ពុជាវិញនៅល្ងាចនេះ

KC Virak — Sun, 15 Aug 2021 09:05:04 +0000

លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជាបានឱ្យដឹងនារសៀល ថ្ងៃអាទិត្យ ទី១៥ ខែសីហា នេះថា ស្ថានឯកអគ្គរាជទូតកម្ពុជាប្រចាំនៅប្រទេសសិង្ហបុរី បានជួយអន្តរាគមន៍ពលករខ្មែរមួយរូប ដែលធ្វើការនៅលើទូកនេសាទដោយខុសច្បាប់នៅរដ្ឋ Perak ហើយពលករខ្មែររូបនោះ នឹងមកដល់កម្ពុជាវិញ នៅល្ងាចនេះ។

បើតាមលោក កុយ គួង ពលករខ្មែររូបនោះ ឈ្មោះ ប៉ិ ពឿន អាយុ៤១ឆ្នាំ មកពីភូមិត្រឡាចស ឃុំត្របែក ស្រុកកំចាយមារ ខេត្តព្រៃវែង បានទៅធ្វើការនៅលើទូកនេសាទដោយខុសច្បាប់នៅតំបន់ Panchor រដ្ឋ Perak តាមរយៈមេខ្យល់ កាលពីដើមឆ្នាំ២០២០។ លោកបន្តថា ដោយដឹងថា មានពលករបរទេសផ្សេងទៀត ដែលធ្វើការលើទូកនេសាទជាមួយគ្នា មានបំណងធ្វើបាបខ្លួន ពលកររូបនេះបានសម្រេចចិត្តលោតពីលើទូក ដោយបណ្តែតខ្លួនជាមួយពោងរយៈពេល៤ថ្ងៃ ទើបត្រូវប៉ូលីសជើងទឹកប្រចាំតំបន់ Lumut រដ្ឋ Perak ជួយសង្រ្គោះ នៅថ្ងៃទី២៦ ខែមិថុនា ឆ្នាំ២០២១។

លោក កុយ គួង បានបញ្ជាក់ថា ស្ថានទូតបានសហការជាមួយមន្រ្តីប៉ូលីសជើងទឹកប្រចាំតំបន់ ឱ្យភ្នាក់ងារស្ម័គ្រចិត្តនៅរដ្ឋ Perak ទៅទទួលពលកររងគ្រោះ ពីការិយាល័យប៉ូលីសជើងទឹក និងផ្តល់ការហូបចុក កន្លែងស្នាក់នៅជាបណ្តោះអាសន្ននៅរដ្ឋ Penang (ព្រំប្រទល់ជាប់រដ្ឋ Perak)។ លោកអះអាងថា ពលករមិនមានព័ត៌មានអ្វីទាំងអស់ ពាក់ព័ន្ធនឹងថៅកែទូក ហើយស្នើសុំស្ថានទូតជួយអន្តរាគមន៍ បានត្រឡប់ទៅកម្ពុជាវិញ។

អ្នកនាំពាក្យរូបនោះបញ្ជាក់ថា ពលកររូបនេះ នឹងត្រឡប់ទៅកម្ពុជាវិញតាមរយៈកម្មវិធី Repatriation Recalibration Plan ហើយនឹងទៅដល់អាកាសយានដ្ឋានអន្តរជាតិភ្នំពេញ តាមជើងយន្តហោះអាកាសចរណ៍សិង្ហបូរី លេខ SQ158 ថ្ងៃទី១៥ ខែសីហា ឆ្នាំ២០២១ វេលាម៉ោង៥ និង៣០ នាទីល្ងាច។

ស្ថានទូតបានចេញលិខិតធ្វើដំណើរបណ្តោះអាសន្ន និងសម្របសម្រួលជាមួយមន្រ្តីអន្តោប្រវេសន៍ម៉ាឡេស៊ី ព្រមទាំងបានចាត់មន្រ្តីជូនដំណើរពលករខាងលើ នៅអាកាសយានដ្ឋានអន្តរជាតិ KLIA ផងដែរ៕

អត្ថបទ៖ កោះកែវ

The post ស្ថានទូតអន្តរាគមន៍ពលករខ្មែរនេសាទខុសច្បាប់នៅរដ្ឋ Perak មកដល់កម្ពុជាវិញនៅល្ងាចនេះ appeared first on Kampuchea Thmey Daily.

ស្ថានទូតខ្មែរនៅម៉ាឡេស៊ី បន្តចុះចែកស្បៀងដល់ពលករខ្មែរ ដែលកំពុងជួបការលំបាក

KC Virak — Thu, 22 Jul 2021 08:40:27 +0000

លោក កុយ គួង រដ្ឋលេខាធិការ និងជាអ្នកនាំពាក្យក្រសួងការបរទេស និងសហប្រតិបត្តិការអន្តរជាតិបានឱ្យដឹងថា ក្នុងរយៈពេល៣សប្ដាហ៍ ក្នុងខែកក្កដានេះ ស្ថានទូតកម្ពុជាប្រចាំប្រទេសម៉ាឡេស៊ី បានសហការជាមួយអង្គការក្នុងស្រុក សប្បុរសជនម៉ាឡេស៊ី និងភ្នាក់ងារស្ម័គ្រចិត្ត បន្តចុះចែកស្បៀងអាហារដល់ពលករខ្មែរ ក៏ដូចជាប្រជាពលរដ្ឋខ្មែរ ដែលកំពុងជួបការលំបាកខ្លាំង នៅក្នុងអំឡុងពេល នៃការរាតត្បាតជំងឺកូវីដ-១៩ ធ្ងន់ធ្ងរ នៅតាមបណ្តារដ្ឋមួយចំនួន នៅប្រទេសម៉ាឡេស៊ី។

បើតាមលោក កុយ គួង នៅថ្ងៃទី០១ ខែកក្កដា ឆ្នាំ២០២១ បានសហការជាមួយអង្គការ Elshaddai Center នាំយកជំនួយជាស្បៀងអាហារជូនប្រជាជនខ្មែរកំពុងជួបការលំបាក ចំនួន១០គ្រួសារ នៅ Kuala Terrenganu រដ្ឋ Terrenganu។

នៅថ្ងៃទី០៦ ខែកក្កដា ឆ្នាំ២០២១ បានសហការជាមួយអង្គការ Makan4Migrants យកជំនួយជាស្បៀងអាហារជូនប្រជាជនខ្មែរកំពុងជួបការលំបាកចំនួន ០៤គ្រួសារ នៅ Rawang រដ្ឋ Selangor។

នៅថ្ងៃទី០៧ ខែកក្កដា ឆ្នាំ២០២១ បានសហការជាមួយអង្គការ Youth With A Mission Malaysia យកជំនួយជាស្បៀងអាហារជូនប្រជាជនខ្មែរកំពុងជួបការលំបាក ចំនួន១០គ្រួសារ នៅ Ipoh រដ្ឋPerak។

នៅថ្ងៃទី១៤ ខែកក្កដា ឆ្នាំ២០២១ បានសហការជាមួយក្រុមសប្បុរសជនម៉ាឡេស៊ីយកជំនួយជាស្បៀងអាហារជូនប្រជាជនខ្មែរកំពុងជួបការលំបាក ចំនួន៤៤គ្រួសារ នៅ Sungai Tiram និង Kota Tinggi រដ្ឋ Johor។

នៅថ្ងៃទី១៥ ខែកក្កដា ឆ្នាំ២០២១ បានសហការជាមួយក្រុមសប្បុរសជនម៉ាឡេស៊ីយកជំនួយជាស្បៀងអាហារជូនប្រជាជនខ្មែរកំពុងជួបការលំបាក ចំនួន១១គ្រួសារ នៅរដ្ឋ Penang។

នៅថ្ងៃទី២១ ខែកក្កដា ឆ្នាំ២០២១ ស្ថានទូតបាននាំយកជំនួយជាស្បៀងអាហារជូនប្រជាជនខ្មែរកំពុងជួបការលំបាក ចំនួន១០គ្រួសារ នៅ Kampong Pandan ទីក្រុងគូឡាឡាំពួរ។

លោក កុយ គួង បានអះអាងថា ស្ថានទូតនឹងបន្តជួយដោះស្រាយការលំបាកទាំងនេះ ជាបន្តទៀតរហូតដល់ស្ថានភាពកូវីដ-១៩ ធូស្រាលឡើងវិញ៕

អត្ថបទ៖ កោះកែវ

The post ស្ថានទូតខ្មែរនៅម៉ាឡេស៊ី បន្តចុះចែកស្បៀងដល់ពលករខ្មែរ ដែលកំពុងជួបការលំបាក appeared first on Kampuchea Thmey Daily.

ស្ថានទូតជួយពលករខ្មែរចំនួន១១នាក់ និងទារកម្នាក់ផង ពីប្រទេសម៉ាឡេស៊ី

Kang Tola — Sat, 13 Feb 2021 11:00:16 +0000

លោក កុយ គួង រដ្ឋលេខាធិការ និងជាអ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា បានឲ្យដឹងនារសៀលថ្ងៃទី១៣ ខែកុម្ភៈ ឆ្នាំ២០២១មុននេះបន្តិចថា ពលករ ពលការិនីខ្មែរចំនួន១១នាក់ ដែលចេញធ្វើការខុសច្បាប់នៅម៉ាឡេស៊ី នឹងមកដល់កម្ពុជាវិញ នៅល្ងាចនេះ ក្រោយពីមានការសម្របសម្រួលពីស្ថានទូត។

លោក កុយ គួង បញ្ជាក់យ៉ាងនេះថា “ដោយមានកិច្ចអន្តរាគមន៍របស់ស្ថានទូតកម្ពុជាប្រចាំប្រទេសម៉ាឡេស៊ី ពលករ ពលការិនីខ្មែរចំនួន១១នាក់ និងទារិកាម្នាក់ ដែលបានមកធ្វើការដោយខុសច្បាប់នៅប្រទេសម៉ាឡេស៊ី នឹងទៅដល់អាកាសយានដ្ឋានអន្តរជាតិភ្នំពេញ តាមជើងយន្តហោះលេខSQ5008 នៅថ្ងៃទី១៣ ខែកុម្ភៈ ឆ្នាំ២០២១ វេលាម៉ោង៥ និង៣៥នាទីល្ងាច “។

បើតាមលោក កុយ គួង ពលករ ពលការិនីខ្មែរទាំងនោះ ត្រូវបានមន្ត្រីស្ថានទូតបានជួយសម្របសម្រួលឯកសារ នាំទៅអគ្គនាយកដ្ឋានអន្តោប្រវេសន៍ម៉ាឡេស៊ី និងជូនទៅធ្វើតេស្តកូវីដ-១៩ ព្រមទាំងជូនទៅអាកាសយានដ្ឋានអន្តរជាតិ KLIA ផងដែរ។

សូមបញ្ជាក់ថា កាលពីថ្ងៃទី០៦ ខែកុម្ភៈ ឆ្នាំ២០២១ ស្ថានទូតកម្ពុជាប្រចាំប្រទេសម៉ាឡេស៊ី ក៏បានជួយអន្តរាគមន៍ឱ្យពលករពលការិនីខុសច្បាប់ចំនួន១៨នាក់ បានវិលត្រឡប់ទៅកម្ពុជាវិញផងដែរ ហើយពួកគេបានមកដល់អាកាសយានដ្ឋានអន្តរជាតិភ្នំពេញ តាមជើងយន្តហោះលេខSQ5008 នៅថ្ងៃទី០៦ ខែកុម្ភៈ ឆ្នាំ២០២១ វេលាម៉ោង៥ និង៣៥នាទីល្ងាចហើយការវិលត្រឡប់របស់ពលករ ពលការិនីខ្មែរខាងលើ គឺធ្វើឡើងតាមរយៈកម្មវិធី Undocumented Migrant Recalibration Plan របស់អគ្គនាយកដ្ឋានអន្តោប្រវេសន៍ម៉ាឡេស៊ី។

ជាមួយគ្នានោះ ស្ថានទូតកម្ពុជាប្រចាំប្រទេសម៉ាឡេស៊ី បានអំពាវនាវឲ្យប្រជាពលរដ្ឋ បញ្ឈប់ការធ្វើចំណាកស្រុកដោយខុសច្បាប់ផងដែរ៕

ដោយ ៖ កោះកែវ

The post ស្ថានទូតជួយពលករខ្មែរចំនួន១១នាក់ និងទារកម្នាក់ផង ពីប្រទេសម៉ាឡេស៊ី appeared first on Kampuchea Thmey Daily.

ស្ថានទូតខ្មែរនៅម៉ាឡេស៊ី ជួយពលករ ពលការិនីខ្មែរចំនួន៦នាក់ បានត្រឡប់កម្ពុជាវិញ

Kang Tola — Wed, 27 Jan 2021 10:33:20 +0000

លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជាបានឲ្យដឹងនៅរសៀលថ្ងៃទី២៧ ខែមករា នេះថា ដោយមានកិច្ចអន្តរាគមន៍របស់ស្ថានទូត ពលករ ពលការិនីខ្មែរចំនួន០៦នាក់ និងទារិកា០១នាក់ នឹងមកដល់អាកាសយានដ្ឋានអន្តរជាតិភ្នំពេញ តាមជើងយន្តហោះអាកាសចរណ៍សឹង្ហបូរីលេខ SQ5008 នៅល្ងាចថ្ងៃទី២៧ ខែមករា ឆ្នាំ២០២១នេះ។

បើតាមលោក កុយ គួង ស្ថានទូតបានជួយរៀបចំឯកសារទៅអគ្គនាយកដ្ឋានអន្តោប្រវេសន៍ម៉ាឡេស៊ីជូនទៅធ្វើតេស្តកូវីដ១៩ ព្រមទាំងបានចាត់មន្ត្រីជូនពលករ ពលការិនី និងទារិកាខាងលើទៅអាកាសយានដ្ឋានអន្តរជាតិ KLIA ផងដែរ។

សូមបញ្ជាក់ថា កាលពីថ្ងៃទី២២ ខែមករា កន្លងមកថ្មីៗនេះ ស្ថានឯកអគ្គរាជទូតកម្ពុជាប្រចាំប្រទេសម៉ាឡេស៊ី ក៏បានជួយសម្របសម្រួលដល់ពលករ ពលការិនីកម្ពុជាចំនួន១៨នាក់ ឲ្យបានវិលត្រឡប់ទៅកម្ពុជាវិញផងដែរ តាមជើងយន្តហោះសឹង្ហបូរី៕

ដោយ ៖ កោះកែវ

The post ស្ថានទូតខ្មែរនៅម៉ាឡេស៊ី ជួយពលករ ពលការិនីខ្មែរចំនួន៦នាក់ បានត្រឡប់កម្ពុជាវិញ appeared first on Kampuchea Thmey Daily.

ស្ថានទូតកម្ពុជាប្រចាំប្រទេសម៉ាឡេស៊ី Archives - Kampuchea Thmey Daily

ស្ថានទូត​ខ្មែរ​នៅ​ប្រទេស​ម៉ាឡេស៊ី រៀបចំ​កម្មវិធី​ផ្សព្វផ្សាយ​អាហារ​កម្ពុជា នៅ​ទីក្រុង​គូ​ឡា​ឡាំ​ពួ

​ស្ថានទូតអន្តរាគមន៍​​ពលករ​ខ្មែរនេសាទខុសច្បាប់នៅ​រដ្ឋ Perak​ ​មកដល់កម្ពុជាវិញនៅល្ងាច​នេះ

ស្ថានទូតខ្មែរនៅម៉ាឡេស៊ី បន្តចុះចែកស្បៀងដល់ពលករខ្មែរ ដែលកំពុងជួបការលំបាក

ស្ថានទូត​ជួយ​ពលករ​ខ្មែរ​ចំនួន​១១​នាក់ និង​ទារក​ម្នាក់​ផង ពី​ប្រទេស​ម៉ាឡេស៊ី​

ស្ថានទូត​ខ្មែរ​នៅ​ម៉ាឡេស៊ី ជួយ​ពលករ ពល​ការិនី​ខ្មែរ​ចំនួន​៦​នាក់ បាន​ត្រឡប់​កម្ពុជា​វិញ​

ស្ថានទូតខ្មែរនៅប្រទេសម៉ាឡេស៊ី រៀបចំកម្មវិធីផ្សព្វផ្សាយអាហារកម្ពុជា នៅទីក្រុងគូឡាឡាំពួ

ស្ថានទូតអន្តរាគមន៍ពលករខ្មែរនេសាទខុសច្បាប់នៅរដ្ឋ Perak មកដល់កម្ពុជាវិញនៅល្ងាចនេះ

ស្ថានទូតជួយពលករខ្មែរចំនួន១១នាក់ និងទារកម្នាក់ផង ពីប្រទេសម៉ាឡេស៊ី

ស្ថានទូតខ្មែរនៅម៉ាឡេស៊ី ជួយពលករ ពលការិនីខ្មែរចំនួន៦នាក់ បានត្រឡប់កម្ពុជាវិញ