តាមរយៈការសន្សំសំចៃជាបន្តបន្ទាប់ និងការគ្រប់គ្រងថវិកាប្រកបដោយប្រសិទ្ធភាព រហូតមកដល់ឆ្នាំ ២០២០ រដ្ឋាភិបាលអាចសន្សំថវិកាបានក្នុងទំហំរាប់ពាន់លានដុល្លារអាមេរិក សម្រាប់ការស្តារ និងអភិវឌ្ឍហេដ្ឋារចនាសម្ព័ន្ធផ្លូវថ្នល់ទូទាំងប្រទេស។ ទោះជាយ៉ាងណា រលកនៃជំងឺកូវីដ-១៩ ដែលបានរីករាលដាលនៅទូទាំងពិភពលោក រួមទាំងកម្ពុជាផង បានធ្វើឱ្យផែនការអភិវឌ្ឍន៍មួយចំនួនរបស់រដ្ឋាភិបាលត្រូវជួបការរាំងស្ទះ និងពន្យារពេល។

ក្នុងឱកាសអញ្ជើញទស្សនាអគារទីស្នាក់ការកណ្តាលថ្មីនៃអគ្គនាយកដ្ឋានពន្ធដារ នាថ្ងៃទី២ ខែមិថុនា ឆ្នាំ២០២៦ សម្តេចតេជោ ហ៊ុន សែន ប្រមុខរដ្ឋស្តីទី បានមានប្រសាសន៍រំលឹកអំពីដំណើរតស៊ូ និងកិច្ចខិតខំប្រឹងប្រែងរបស់រាជរដ្ឋាភិបាល ចាប់តាំងពីគ្រាដែលប្រទេសជាតិជួបការលំបាកខ្លាំង ទាំងខ្វះខាតថវិកា ហើយពេលខ្លះសូម្បីតែប្រាក់បៀវត្សរ៍សម្រាប់មន្ត្រីរាជការក៏មិនមានគ្រប់គ្រាន់ផងដែរ។ ទោះបីជាប្រឈមនឹងឧបសគ្គជាច្រើនក្តី ក្រោមការដឹកនាំរបស់សម្តេច និងថ្នាក់ដឹកនាំកម្ពុជា ប្រទេសកម្ពុជាបានបន្តអភិវឌ្ឍឥតឈប់ឈរ ព្រមទាំងអនុវត្តការគ្រប់គ្រង និងការសន្សំសំចៃថវិកាប្រកបដោយប្រសិទ្ធភាព ដែលបានរួមចំណែកយ៉ាងសំខាន់ដល់ការរីកចម្រើនរបស់ប្រទេសជាតិ។

សម្តេចតេជោ បានទម្លាយឱ្យដឹងថា៖«ពេលនោះយើងសន្សំប្រាក់ បានប្រមាណជា ៤ពាន់លានដុល្លារ ប៉ុន្តែកូវីដ បានធ្វើបាបយើង ធ្វើឱ្យស្រុតផែនការមិនបានសម្រេច»។ បើសិនមិនមានកូវីដ ១៩ ធ្វើបាបយើង ខ្ញុំនិយាយបានថា ​ពេលនោះយើងដកត្រឹមតែ ២ពាន់លានដុល្លារ ឬ ២៥០០ ដុល្លារយកមកធ្វើហេដ្ឋារចនាសម្ព័ន្ធឱ្យខ្លាំងដោយមិនពឹកពាក់បរទេស»។

ក្រៅពីមានផែនការដកប្រាក់សន្សំមកអភិវឌ្ឍហេដ្ឋារចនាសម្ព័ន្ធ សម្តេចបង្ហើបថាបានត្រៀមគម្រោង ១ពាន់លានដុល្លារ សម្រាប់ទិញម៉ាស៊ីនភ្លើង ៤០០ មេកាវ៉ាត់ ដាក់នៅជិតក្រុងភ្នំពេញ ដើម្បីត្រៀមសង្គ្រោះ ក្នុងករណីមានការដាច់ចរន្តអគ្គិសនីផងដែរ។ ប៉ុន្តែយ៉ាងណាក៏ដោយ បន្ទាប់ពីកូវីដ ១៩ សម្តេចតេជោអះអាងថា កម្ពុជាបានស្តារសេដ្ឋកិច្ចប្រទេសឡើងវិញ និងមានសន្ទុះកំណើនជាបន្តបន្ទាប់។ តួយ៉ាង គិតត្រឹមរយៈពេល ៥ ខែ ឆ្នាំ ២០២៦ នៃចំណូលពន្ធដារសម្រេចបានជាង៥៣% គិតជាទំហំទឹកប្រាក់ជាង ២ពាន់លានដុល្លារ។

កាលពី​ឆ្នាំ ២០១៩ រដ្ឋាភិបាល​បាន​ទម្លាក់​ថវិកា​ជាតិដ៏ច្រើន​ប្រមាណ​ជិត ៣០០ លាន​ដុល្លារ ស្ថាបនា​ផ្លូវ​ចំនួន ៣៧ ខ្សែ​​មាន​ប្រវែង ៨៤ គីឡូម៉ែត្រ ក្នុង​គោលដៅ​ប្រែក្លាយ​ក្រុងព្រះសីហនុ ទៅ​ជាទីក្រុង​ទំនើប​ដែល​មាន​សោភណភាព បរិស្ថាន​ល្អ សម្រាប់​ការ​រស់នៅ ទេសចរណ៍ និង​ធុរកិច្ច៕

The post សម្តេចតេជោ រំឮកថារដ្ឋត្រៀមថវិកាខ្ទង់ពាន់លានដុល្លារសម្រាប់ស្តារហេដ្ឋារចនាសម្ព័ន្ធទ្រង់ទ្រាយធំ ប៉ុន្តែកូវីដបង្អាក់គម្រោង appeared first on Kampuchea Thmey Daily.

គម្រោង​ហេដ្ឋារចនាសម្ព័ន្ធ​ដែលកំពុង​ដំណើរការសាងសង់​ ហើយ​គ្រោង​បញ្ចប់​បន្តបន្ទាប់​ទាំង​នោះ​​រួមមាន៖

-ផ្លូវជាតិលេខ ៤ (ភ្នំពេញ-ក្រុងព្រះសីហនុ)

ផ្លូវ​ជាតិ​លេខ​ ៤​ ជា​​ខ្សែផ្លូវជាតិ​​ដ៏​​មាន​សារៈសំខាន់​បំផុត​​ ព្រោះ​ផ្លូវ​មួយ​ខ្សែ​នេះ​ជា​បណ្តាញ​ត​ភ្ជាប់ពី​​រាជធានី​ភ្នំពេញ​ដែល​ជា​តំបន់​អភិវឌ្ឍ​ ជា​មជ្ឈមណ្ឌល​សេដ្ឋកិច្ច​ហិរញ្ញវត្ថុនិង​ឧស្សាហកម្ម​ទៅ​ខេត្ត​​ព្រះសីហនុ ដែល​ជា​ទី​ក្រុង​កំពង់ផែ​សមុទ្រ​ទឹក​ជ្រៅ​តែ​មួយ​គត់​របស់​ប្រទេស​កម្ពុជា​។

ដោយ​ប្រើប្រាស់​ហិរញ្ញប្បទានពីធនាគារពិភពលោក ផ្លូវ​ជាតិលេខ ៤ ដែលកំពុង​ដំណើរការ​ស្ថាបនា​កែលម្អ រហូត​មក​ដល់ពេលនេះ​​សម្រេច​បានប្រមាណ ៩០%។ ការ​​ស្ថាបនា​ត្រូវ​បាន​​​ពង្រី​កពី ២ គន្លង ទៅ​ ៤ គន្លង មាន​ប្រវែង​ ៤៥ គីឡូម៉ែត្រ​ និងពង្រីក​ពី​ទទឹង ៧ ម៉ែត្រ ទៅ​ទទឹង ១០​ ម៉ែត្រ មាន​​​​ប្រវែង ១៥១ គីឡូម៉ែត្រ​។

ផ្លូវ​ជាតិ​លេខ ​៤ មុន​ពេល​ក្រសួងសាធារណការនិងដឹកជញ្ជូន​​ យក​ដាក់ក្នុងផែនការការស្ថាបនាកែលម្អឡើងវិញ​ គឺ​មាន​សភាព​ខូចខាត​​ដែល​ធ្វើ​​ឱ្យ​ការ​ដឹក​ជញ្ជូន​ទៅ​មក​មាន​ការ​លំបាក​ខ្លាំង។ កន្លង​មក​ផ្លូវ​មួយ​ខ្សែ​នេះ​លិច​ទឹក​ ១ ​ឆ្នាំ​ ៥ ទៅ ៦ ​ដង​ នៅ​ពេល​ដែល​​មាន​ភ្លៀង​ធ្លាក់​ខ្លាំង ធ្វើ​ឱ្យ​មាន​ការ​លំបាក​ដល់​ប្រជាពលរដ្ឋ​នៅ​ក្នុង​ការ​រស់​នៅ​មិន​អាច​ទៅ​សាលា ទៅ​ផ្សារ ឬ​ទៅ​មន្ទីរ​ពេទ្យ ហើយ​​ឡាន​ដឹក​ទំនិញ​ត្រូវ​រង់​​ចាំ​រហូត​ដល់​ទឹក​ស្រក ពេល​ខ្លះ​ដឹក​ទំនិញ​ទៅ​ដល់​​កប៉ាល់​មិន​ទាន់​ជា​ដើម​។

-កំណាត់ផ្លូវជាតិលេខ ៥ ភាគកណ្តាល (សិរីសោភ័ណ-ប៉ោយប៉ែត)

គិតត្រឹមសប្តាហ៍ទី១ ខែមេសា ឆ្នាំ២០២៦ កំណាត់ចុងក្រោយនៃគម្រោងស្តារនិងលើកកម្រិតគុណភាពផ្លូវជាតិ​លេខ​ ៥ (សិរីសោភ័ណ-ប៉ោយប៉ែត) ខេត្តបន្ទាយមានជ័យ ស្ថាបនា​សម្រចបានលទ្ធផលជារួមបានប្រមាណ ៥១,០៧%។

តាមផែនការ គម្រោងស្តារនិងលើកកម្រិតគុណភាពផ្លូវជាតិលេខ ៥ (សិរីសោភ័ណ-ប៉ោយប៉ែត) ដែលមាន​ប្រវែង ៣៥,១៤ គីឡូម៉ែត្រ គ្រោងបញ្ចប់នៅអំឡុងឆ្នាំ២០២៧។

-កំណាត់ផ្លូវជាតិលេខ ៧ (ស្គន់-កំពង់ចាម)

គម្រោងពង្រីក​ និង​លើកកម្រិតផ្លូវជាតិលេខ ៧ ​ចាប់ពីទីប្រជុំជនស្គន់រហូតដល់​​ក្រុង​កំពង់​ចាម ​ស្ទើរ​តែឈាន​បញ្ចប់ ១០០% ខណៈ​គម្រោងនឹងបញ្ចប់​នៅអំឡុង​ឆ្នាំ​២០២៦ ​នេះ។​

ផ្លូវជាតិលេខ ៧ ​បាន​បើកការដ្ឋាន​សាង​សង់កាល​ពី​ថ្ងៃទី ០៩ ខែមករា ឆ្នាំ ២០២៣ ក្រោមកម្ចីសម្បទានជាង ១០០ លាន​ដុល្លារ​ពី​​រដ្ឋាភិបាល​ចិន។ ​កំណាត់ផ្លូវជាតិលេខ ៧ ត្រូវ​បាន​សាងសង់​​ពង្រីកពី ២ គន្លងទៅ ៤ គន្លង ​មានប្រវែង ៤៥ គីឡូម៉ែត្រ។ តាមរយៈ​កំណាត់ផ្លូវនេះ​ជួយ​សម្រួល​ដល់​ការធ្វើដំណើរ, ​ការ​ដឹកជញ្ជូនផលិតផលកសិកម្ម, កសិឧស្សាហកម្ម ព្រមទាំងលើក​កម្ពស់​ការអភិវឌ្ឍ និងសកម្មភាពសេដ្ឋកិច្ច-សង្គមជាតិ។​

–ផ្លូវ​ល្បឿនលឿន​ភ្នំពេញ-បាវិត

កាលពីអំឡុង​ខែធ្នូ ឆ្នាំ២០២៥​ លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បាន​ដឹកនាំកិច្ចប្រជុំ​​ពិភាក្សាពី “វឌ្ឍនភាព និងបញ្ហាប្រឈមនៃការអនុវត្តគម្រោងសាងសង់​ផ្លូវល្បឿន​លឿន​ភ្នំពេញ-ក្រុងបាវិត”។

កិច្ចប្រជុំ​នេះ​ក៏​មានការចូលរួមពីលោក ស៊ុន ចាន់ថុល ឧបនាយករដ្ឋមន្រ្តី អនុប្រធានទីមួយក្រុមប្រឹក្សាអភិវឌ្ឍន៍កម្ពុជា និង​លោក ប៉េង ពោធិ៍នា រដ្ឋមន្រ្តីក្រសួង​សាធារណការ និងដឹកជញ្ជូន។

ផ្លូវល្បឿនលឿនភ្នំពេញ-បាវិត បាន​បើកការដ្ឋានសាងសង់​កាលពី​ខែមិថុនា ឆ្នាំ២០២៣ ក្រោមអធិបតីភាពសម្តេចតេជោ ហ៊ុន សែន អតីត​នាយករដ្ឋមន្ត្រីនៃកម្ពុជា ដែលចំណាយថវិកាសាងសង់​សរុបប្រមាណ ១,៣៥ ពាន់​លាន​ដុល្លារ ក្រោម​ទម្រង់​វិនិយោគ​សាងសង់-ប្រតិបត្តិការ-ផ្ទេរ (BOT) ដែលមានរយៈពេលប្រតិបត្តិការចំនួន ៥០ ឆ្នាំ។

ពាក់ព័ន្ធ​វឌ្ឍនភាព​នៃ​ការអនុវត្តគម្រោងផ្លូវល្បឿន​លឿន​ភ្នំពេញ-ក្រុងបាវិត ​មន្រ្តីអ្នកនាំពាក្យក្រសួងសាធារណការ និងដឹកជញ្ជូនមិន​បានបញ្ជាក់​មក​ដល់ពេលនេះសម្រេច​បាន​វឌ្ឍនភាព​យ៉ាងណា ខណៈ​បើ​តាមផែនការ​គ្រោង​បញ្ជប់នៅឆ្នាំ ២០២៧​​។

-ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា)

គិតត្រឹមថ្ងៃទី ២០ ខែមេសា ឆ្នាំ២០២៦ ដំណើរការ​ស្ថាបនា​ស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) ​​​​សម្រេចបានប្រមាណ ៦៨% ដែលផ្អែកតាមលទ្ធផលនេះ​ការសាងសង់គឺ​​លឿនជាងផែនការ ៦%។

ស្ពានឆ្លង​ទន្លេ​​ (ចាក់អង្រែក្រោម-ព្រែកប្រា) ដែលកំពុងដំណើរការ​សាងសង់​​មានប្រវែងសរុប ១ ៦៥០ ម៉ែត្រ (ប្រវែងស្ពាន ៨៤៥,៧០ ម៉ែត្រ, ទទឹងផ្លូវ​ ២៧ ម៉ែត្រ ផ្លូវតភ្ជាប់ក្បាលស្ពានប្រវែង ៨០៤,៣០ ម៉ែត្រ ទទឹងធម្មតាផ្លូវ ២០ម៉ែត្រ)។

ស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) បាន​បើកការដ្ឋានកាលពី​ខែកុម្ភៈ ឆ្នាំ២០២៤ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោក វ៉ាង វិនធៀន ឯកអគ្គរដ្ឋទូតចិនប្រចាំកម្ពុជា។

នៅពេលស្ថាបនា​បញ្ចប់​ដាក់​ឲ្យដំណើរការ នឹងជួយកាត់បន្ថយការកកស្ទះចរាចរណ៍លើស្ពានព្រះមុនីវង្ស ក៏ដូចជា​​ជួយពង្រឹងដល់ទំនាក់ទំនងសេដ្ឋកិច្ចសង្គមរវាងរាជធានីភ្នំពេញប៉ែកខាង​ត្បូង ព្រលាន​​យន្តហោះអន្តរជាតិតេជោក្រុងតាខ្មៅ កាត់បន្ថយការកកស្ទះចរាចរណ៍នៅតាមដងទន្លេបាសាក់ និង​ជួយ​ពន្លឿនការអភិវឌ្ឍតំបន់នោះ ជាពិសេសធ្វើឱ្យប្រសើរឡើងដល់ប្រសិទ្ធភាពនៃការដឹកជញ្ជូន និងភស្តុភារកម្មនៅក្នុងតំបន់រាជធានីភ្នំពេញ។

-ស្ពានឆ្លងកាត់ទន្លេមេគង្គ នៅខេត្តក្រចេះ

ដូចការគ្រោងទុក “ស្ពានមិត្តភាពកម្ពុជា-ចិន មេគង្គក្រចេះ” បានបើកឲ្យប្រជាពលរដ្ឋឆ្លងកាត់ជាអចិន្ត្រៃយ៍នៅថ្ងៃទី១ ខែមេសា ឆ្នាំ២០២៦។

ស្ពានមិត្តភាពកម្ពុជា-ចិន មេគង្គក្រចេះ បានបើកការដ្ឋានសាងសង់កាលពីថ្ងៃទី ០២ ខែមករា ឆ្នាំ២០២៣ ក្រោមអធិបតីភាពសម្តេចតេជោ ហ៊ុន សែន អតីតនាយករដ្ឋមន្ត្រី និងលោក វ៉ាង វិនធៀន អតីតឯកអគ្គរដ្ឋទូតចិនប្រចាំកម្ពុជា។

ស្ពានមិត្តភាពកម្ពុជា-ចិន មេគង្គក្រចេះ ជាស្ពានយុទ្ធសាស្ត្រភ្ជាប់ពីស្រុកចិត្របុរីនៅត្រើយខាងកើត ទៅ​ស្រុកព្រែកប្រសព្វ នៅត្រើយខាងលិច។

​“ស្ពានមិត្តភាពកម្ពុជា-ចិន មេគង្គក្រចេះ” ជាគម្រោងហេដ្ឋារចនាមសម្ព័ន្ធ​យុទ្ធសាស្រ្តមួយដ៏សំខាន់ ដែល​នឹងចូលរួមបង្កើន​ប្រសិទ្ធភាពនៃវិស័យដឹកជញ្ជូន ពិសេសការដឹកជញ្ជូនទិន្នផលកសិ-ឧស្សាហកម្ម ភ្ជាប់ទីប្រជុំជន​ខេត្តក្រចេះទៅខេត្តកំពង់ធំ រួមទាំងការតភ្ជាប់វិស័យទេសចរណ៍ទៅកាន់ខេត្ត​ភូមិភាគឦសាន​ដែលមាន​ខេត្តស្ទឹងត្រែង រតនគិរី និង​មណ្ឌលគិរី​ជាមួយបណ្តាញ​ផ្លូវជាតិសំខាន់ៗផ្សេងទៀត។

-ស្ពានឆ្លងកាត់ទន្លេមេគង្គ “ដីឥដ្ឋ-ថ្មគរ”

ស្ពានដីឥដ្ឋ-ថ្មគរ ដែលបើកការដ្ឋានសាងសង់ស្របជាមួយគម្រោងផ្លូវល្បឿនលឿនភ្នំពេញ-បាវិត គិតត្រឹមថ្ងៃទី ២២ ខែមេសា ឆ្នាំ២០២៦ សាងសង់​សម្រេចវឌ្ឍនភាពការងារ​បានប្រមាណ ៤៧,៦ % លឿនជាងផែនការ ២,៦០%។

ស្ពានដីឥដ្ឋ-ថ្ម​គរ បាន​បើកការដ្ឋាន​សាងសង់​កាលពី​ថ្ងៃទី ៧ ខែមិថុនា ឆ្នាំ២០២៣ ក្រោមអធិបតីភាពសម្តេចតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភា និងលោក វ៉ាង វិនធៀន អតីតឯកអគ្គរដ្ឋទូតចិនប្រចាំកម្ពុជា។

គិតត្រឹមថ្ងៃទី២២ ខែមេសា ឆ្នាំ២០២៦ ការដ្ឋាន​សាងសង់ស្ពានដីឥដ្ឋ-ថ្ម​គរ សម្រេចបានវឌ្ឍនភាពការងារ ៤៧,៦ % ខណៈ​តាមផែនការ​គ្រោង​បញ្ចប់នៅ​ឆ្នាំ ២០២៧ ទន្ទឹម​ការដ្ឋាន​សាងសង់​ផ្លូវល្បឿនលឿន​ភ្នំំពេញ​បាវិត។

ស្ពាន​នេះជាគម្រោងដ៏សំខាន់សម្រាប់ការតភ្ជាប់សេដ្ឋកិច្ច ការដឹកជញ្ជូន ពីភាគខាងត្បូងនិងខាងកើត រាជធានីភ្នំពេញ ដោយ​ភា្ជប់មហាវិថី ស៊ី ជីនពីង (ក្រវាត់ក្រុងទី៣) ត្រង់ចំណុចផ្លូវជាតិលេខ ១ និងត្រើយខាងកើតភ្ជាប់ទៅផ្លូវល្បឿន​លឿន​ភ្នំពេញ-បាវិត៕

The post ផ្លូវ​ និង​ស្ពានចំនួន ៧ ​គម្រោង​ធំៗ​ចាយទុន​ខ្ទង់​ពាន់លាន​ដុល្លារកំពុង​ដំណើរការ​សាងសង់​ គ្រោង​បញ្ចប់​ឆាប់ៗ​នេះ appeared first on Kampuchea Thmey Daily.

បើយោងតាមលោក ធន សារី ប្រធានមន្ទីរអភិវឌ្ឍន៍ជនបទខេត្តមណ្ឌលគិរី បានប្រាប់ «កម្ពុជាថ្មី» នៅថ្ងៃទី១ ខែមេសា ឆ្នាំ២០២៦ ថា គម្រោងសាងសង់ស្ពាននេះមានប្រវែង ៣៦ ម៉ែត្រ ទទឹង ២.៥ ម៉ែត្រ (ប្រើសសរបេតុង ធ្នឹមដែក និងកម្រាលឈើ) ស្ថិតនៅភូមិទួល ឃុំមេម៉ង់ ស្រុកកែវសីមា។ គិតត្រឹមថ្ងៃទី១ ខែមេសា ការសាងសង់សម្រេចបានប្រមាណ ៦០% បន្ទាប់ពីបានចាប់ផ្ដើមកាលពីដើមខែកុម្ភៈ ឆ្នាំ២០២៦។

លោកបានបញ្ជាក់ថា គម្រោងនេះធ្វើឡើងដើម្បីឆ្លើយតបទៅនឹងតម្រូវការចាំបាច់របស់ប្រជាពលរដ្ឋក្នុងតំបន់ជនបទ ជាពិសេសក្នុងរដូវវស្សា ដោយមានការសហការជាមួយក្រុមហ៊ុនរ៉ែមាស Renaissance Minerals Cambodia Limited ដែលផ្គត់ផ្គង់ថវិកាទាំងស្រុង។ គម្រោងនេះគ្រោងនឹងបញ្ចប់ ១០០% នៅចុងខែឧសភាខាងមុខ។

មុនពេលមានស្ពាននេះ ប្រជាពលរដ្ឋត្រូវធ្វើដំណើរឆ្លងកាត់អូរធំដោយប្រើខ្សែរ៉ត ដែលមានហានិភ័យខ្ពស់ ជាពិសេសសម្រាប់សិស្សានុសិស្សដែលត្រូវឆ្លងទៅសាលារៀន។ ដោយហេតុនេះ មន្ទីរជំនាញបានធ្វើការផ្សព្វផ្សាយ និងអប់រំជាមួយអាជ្ញាធរមូលដ្ឋាន ដើម្បីបញ្ឈប់សកម្មភាពឆ្លងតាមវិធីគ្រោះថ្នាក់នេះ។ លោកអះអាងថា ស្ពានថ្មីនេះនឹងជួយសម្រួលដល់ការធ្វើដំណើររបស់ប្រជាពលរដ្ឋឲ្យមានសុវត្ថិភាព និងងាយស្រួលជាងមុន ព្រមទាំងជួយលើកស្ទួយការដឹកជញ្ជូនកសិផលទៅកាន់ទីផ្សារ ផងដែរ។

គម្រោងស្ពាននេះត្រូវបានរំពឹងថា នឹងក្លាយជាសមិទ្ធផលថ្មីសំខាន់មួយបន្ថែមទៀត ក្នុងការជំរុញការធ្វើដំណើរ និងការដឹកជញ្ជូនឲ្យកាន់តែងាយស្រួល ជាពិសេសសម្រាប់ប្រជាពលរដ្ឋដែលរស់នៅតំបន់ជនបទ ក៏ដូចជាសិស្សានុសិស្ស ដែលភាគច្រើនជាជនជាតិដើមភាគតិច ដែលធ្លាប់ប្រឈមនឹងបញ្ហាក្នុងការធ្វើដំណើរនៅរដូវវស្សា៕

 ដោយ៖ រៀម សុខហេង

The post ស្ពានគ្រឹះថ្មប្រវែងជិត ៤០ ម៉ែត្រ នៅស្រុកកែវសីមា សម្រេចបាន ៦០% គ្រោងបញ្ចប់ចុងខែឧសភា appeared first on Kampuchea Thmey Daily.

លោក ហៀ សុផាន អភិបាលក្រុងសែនមនោរម្យ បានប្រាប់កម្ពុជាថ្មីឱ្យដឹងថា ក្នុងរយៈពេល១ឆ្នាំ នៃឆ្នាំ២០២៥ ក្រុងសែនមនោរម្យបានសម្រេចសមិទ្ធផលជាច្រើន ពាក់ព័ន្ធនឹងការអភិវឌ្ឍហេដ្ឋារចនាសម្ព័ន្ធ ដែលកំពុងបម្រើសេវាធារណៈជូនប្រជាពលរដ្ឋ។ ក្នុងនោះ រដ្ឋបាលក្រុងបានដំឡើងបង្គោលអំពូលភ្លើងសូឡាតាមដងផ្លូវ នៅសង្កាត់ទាំងបួន សរុបចំនួន ១,២៦៦ បង្គោល ដើម្បីលើកកម្ពស់សោភ័ណភាពក្រុង និងបង្កើនសុខសុវត្ថិភាពក្នុងការធ្វើដំណើររបស់ប្រជាពលរដ្ឋនៅពេលយប់។

ចំពោះការអភិវឌ្ឍផ្លូវថ្នល់ បច្ចុប្បន្នក្រុងសែនមនោរម្យមានផ្លូវទើបអភិវឌ្ឍរួចថ្មីចំនួន ១០ ខ្សែ សរុបប្រវែង ៨,២៤៩ ម៉ែត្រ។ ក្នុងនោះ រួមមានផ្លូវបេតុងអា៧មករា ប្រវែង ៧៨៥ ម៉ែត្រ និងផ្លូវបេតុងចំនួន ២ ខ្សែទៀត ជាគម្រោងមូលនិធិក្រុង ប្រវែងសរុប ២៣៥ ម៉ែត្រ។ បន្ថែមពីនេះ ផ្លូវចំនួន ៧ ខ្សែ ជាគម្រោងមូលនិធិរបស់រដ្ឋបាលសង្កាត់ទាំងបួន មានផ្លូវបេតុងអាមេ ប្រវែង ២,០៧៩ ម៉ែត្រ និងផ្លូវក្រាលក្រួសក្រហម ប្រវែង ៥,១៥០ ម៉ែត្រ។

ជាមួយគ្នានេះផងដែរ រដ្ឋបាលក្រុងសែនមនោរម្យ បានសហការជាមួយអង្គការបូដាក ដែលជាដៃគូអភិវឌ្ឍ សាងសង់ប្រឡាយមុខទឹកនៅទំនប់សែនសុខដុម ដើម្បីគាំទ្រដល់ការគ្រប់គ្រងទឹក និងបរិស្ថាន។

លោកអភិបាលក្រុងបានបញ្ជាក់ថា សមិទ្ធផលទាំងនេះ គឺជាលទ្ធផលនៃការខិតខំប្រឹងប្រែងរយៈពេល ១២ ខែ នៃឆ្នាំ២០២៥ ហើយរដ្ឋបាលក្រុងនឹងបន្តលើកទិសដៅការងារក្នុងឆ្នាំ២០២៦ បន្ថែមទៀត ដើម្បីបង្កើតសមិទ្ធផលថ្មីៗ ឆ្លើយតបនឹងតម្រូវការរបស់ប្រជាពលរដ្ឋ ទាំងផ្នែកហេដ្ឋារចនាសម្ព័ន្ធ និងសោភ័ណភាពក្រុង ដែលរំពឹងថានឹងអាចទាក់ទាញភ្ញៀវទេសចរមកកម្សាន្តនៅខេត្តមណ្ឌលគិរីបានកាន់តែច្រើន៕

ដោយ៖ រៀម សុខហេង

The post សមិទ្ធផលធំៗជាច្រើន ត្រូវបានសម្រេចឡើងនៅខេត្តមណ្ឌលគិរី ឆ្នាំ ២០២៥ appeared first on Kampuchea Thmey Daily.

លោក សៀក មុន្នី អភិបាលស្រុកអូររាំង ប្រាប់កម្ពុជាថ្មីថា ក្រុមការងារជំនាញបានចាប់ផ្តើមស្ថាបនាផ្លូវនេះ តាំងពីថ្ងៃទី ២៥ ខែវិច្ឆិកា ឆ្នាំ ២០២៥ ដោយគិតមកដល់ថ្ងៃទី ១ ខែធ្នូនេះ បានលេចចេញជារូបរាងផ្លូវបេតុងបណ្តើរៗហើយ។ លោកបញ្ជាក់ថា វឌ្ឍនភាពហេដ្ឋារចនាសម្ព័ន្ធសមិទ្ធផលថ្មីៗជាច្រើននេះ គឺជាការខឹតខំប្រមុខរាជដ្ឋាភិបាល ក៏ជាថ្នាក់ដឹកនាំខេត្ត ដើម្បីផ្ដល់ភាពងាយស្រួល និងតម្រូវការជូនប្រជាពលរដ្ឋក្នុងការធ្វើដំណើរ ក៏ដូចជាដឹកកសិផលផ្សេងៗទៅកាន់ទីផ្សារប្រកបដោយសុខសុវត្ថិភាព។

ទន្ទឹមនេះ លោកបានក្រើនរំលឹកដល់ក្រុមហ៊ុនទទួលបានសិទ្ធិសាងសង់ត្រូវគោរពទៅតាមកិច្ចសន្យា សាងសង់ផ្លូវទៅតាមស្តង់ដាបច្ចេកទេសប្រកបដោយគុណភាព។ លោកបញ្ជាក់ថា៖«បើអាជ្ញាធរពិនិត្យ​មើល ឃើញថាសាងសង់ផ្ទុយពីអ្វីដែលជាកិច្ចព្រមព្រៀង រដ្ឋបាលស្រុកនឹងបញ្ឈប់ការសាងសង់ភ្លាម ហើយនឹងរកក្រុមហ៊ុនថ្មីមកសាងសង់ជំនួសវិញ»។

កញ្ញា ធឿន ធីដា ជាពលរដ្ឋរស់នៅភូមិពូទ្រូក្រោម ឃុំសែនមនោរម្យ ស្រុកអូររាំង បានឱ្យដឹងផងថា កន្លងមកផ្លូវនេះមានស្ថានភាពលំបាកខ្លាំងណាស់ជាពិសេសនារដូវវស្សាដែលធ្វើឱ្យប្រជាពលរដ្ឋធ្វើដំណើរ ក៏ដូចជាដឹកកសិផលប្រឈមនឹងគ្រោះថ្នាក់។ យុវតីបញ្ជាក់ថា៖« ក្នុងនាមពលរដ្ឋរស់ក្នុងភូមិពិតជាសប្បាយចិត្តពេលឃើញអាជ្ញាធរយកចិត្តទុកដាក់លើកកម្ពស់គុណភាពផ្លូវ ព្រោះកន្លងមកពលរដ្ឋធ្វើដំណើរតាមផ្លូវនេះពិបាក ជាពិសេសនៅរដូវវស្សា»។

ទន្ទឹមនេះ ធឿន ធីដា បានថ្លែងអំណរគុណទៅដល់រាជរដ្ឋាភិបាលជាពិសេសថ្នាក់ដឹកនាំខេត្តអាជ្ញាធរគ្រប់លំដាប់ថ្នាក់ ដែលតែងតែគិតគូរយកចិត្តទុកដាក់ដល់សុខទុក្ខរបស់ប្រជាពលរដ្ឋតាមទីជនបទ និងបានប្រែក្លាយជាផ្លូវដីលំបាកឱ្យទៅជាផ្លូវក្រាលក្រួសក្រហមពីផ្លូវក្រាលក្រួសក្រហមទៅជាផ្លូវបេតុងធ្វើឱ្យប្រជាពលរដ្ឋធ្វើដំណើរប្រកបដោយសុខសុវត្ថិភាព និងលើកស្ទួយជីវភាពរស់នៅពលរដ្ឋក្នុងមូលដ្ឋានថែមមួយកម្រឹតទៀតផង៕

អត្ថបទ៖ រៀម សុខហេង

The post អាជ្ញាធរខេត្តមណ្ឌលគិរី លើកកម្ពស់គុណភាពផ្លូវភូមិពីផ្លូវក្រួសក្រហមទៅជាផ្លូវបេតុង សម្រួលការធ្វើដំណើរ appeared first on Kampuchea Thmey Daily.

ផ្លូវ​ជាតិ​ទាំង ៦ ខ្សែ​នោះ​​​រួមមាន កំណាត់ផ្លូវជាតិ​លេខ ៧ (ស្រុកស្នួល-ក្រុងក្រចេះ) ផ្លូវជាតិលេខ​ ១០ (សំឡូត -វាលវែង- កោះកុង) ផ្លូវជាតិលេខ ៤៨ (ស្រែអំបិល-ទីរួមខេត្តកោះកុង) ផ្លូវជាតិលេខ ៧៣ (ពីផ្លូវបំបែកប្រធាតុ -ទៅ​ដល់​ស្ពានកំពង់រាំង​) ខេត្តត្បូងឃ្មុំ ផ្លូវខេត្តលេខ ៣៧៧ និង ៣៧៧អា (​រង្វង់មូលព្រាបស-ក្រុងក្រចេះ- ឃុំសណ្ដាន់-ខេត្តក្រចេះ)។

ក្រៅពី​បណ្តាញ​ផ្លូវ​ជាតិ​សំខាន់ៗ​ទាំង​ ៦ ​ដែល​បានបញ្ចប់​ការ​សាងសង់ទាំងស្រុង​ មាន​ហេដ្ឋារចនាសម្ព័ន្ធ​ធំៗ​​ចំនួន ៩ គម្រោង​ទៀត​កំពុង​ដំណើរការ​សាងសង់​បន្ត ​ក្រោមកិច្ចសហការជាមួយដៃគូអភិវឌ្ឍដែលនឹង​ឈាន​ទៅ​បញ្ចប់នៅពេល​ខាងមុខ។ គម្រោងហេដ្ឋារចនាសម្ព័ន្ធ​សំខាន់ៗទាំង​ ៨ កំពុងដំណើរការសាងសង់រួមមាន៖

-ផ្លូវជាតិលេខ ៤ (ភ្នំពេញ-ក្រុងព្រះសីហនុ) ប្រវែង ១៩៦,១០ គីឡូម៉ែត្រ សម្រេចបាន ៨៣,៣២%
-កំណាត់ផ្លូវជាតិលេខ ៥ ភាគកណ្តាល (សិរិសោភណ ប៉ោយប៉ែត) ប្រវែង ៣៥,១៤ គីឡូម៉ែត្រ សម្រេចបាន ១៩,៨០ ភាគរយ
-កំណាត់ផ្លូវជាតិលេខ ៧ (ស្គន់ -កំពង់ចាម) ប្រវែង ៤៥,៤៨ គីឡូម៉ែត្រ សម្រេចបាន ៦៣,៥០%
-ផ្លូវជាតិលេខ ២៣ (ស្ពានកោះធំ-ដល់​ស្រុកលើកដែក​ផ្លូវជាតិលេខ ១៤) ប្រវែង ១៩,៨៣ គីឡូម៉ែត្រ សម្រេចបាន ៩៨,៦០%
-ផ្លូវខេត្តលេខ ៣១២ (បំបែកពីផ្លូវជាតិលេខ ១ -ដល់ព្រំប្រទល់កម្ពុជាវៀតណាម) ប្រវែង ២៨,៣៧ គីឡូម៉ែត្រ សម្រេចបាន ៩៩,៦៦%
-ស្ពានឆ្លងកាត់ទន្លេបាសាក់ (ចាក់អង្រែក្រោម -ព្រែកប្រា) ប្រវែង ៨៤៥,៧០ ម៉ែត្រ និងផ្លូវតភ្ជាប់ប្រវែង ២,៣៤៥ គីឡូម៉ែត្រ សម្រេចបាន ៤០,១៨%
-ស្ពានឆ្លងកាត់ទន្លេមេគង្គខេត្តក្រចេះប្រវែង ១ ៧៦១ ម៉ែត្រ និងផ្លូវតភ្ជាប់ទៅក្រុងក្រចេះប្រវែង ៣១,៦៩ គីឡូម៉ែត្រ សម្រេចបាន ៨៥,២២%
-ស្ពានឆ្លងកាត់ទន្លេមេគង្គដីឥដ្ឋថ្មគរ (ឃុំដីឥដ្ឋ ស្រុកកៀនស្វាយ ដល់​ ឃុំថ្មគរស្រុកល្វាឯម) ប្រវែង ១៦០០ ម៉ែត្រ និងផ្លូវតភ្ជាប់ប្រវែង ២ ១០០ ម៉ែត្រ សម្រេចបាន ១៩,២៣%៕

The post ផ្លូវ​ជាតិធំៗ​ ៦ ខ្សែ​ ប្រវែងជាង​ ៤៧៤ គីឡូម៉ែត្រ បញ្ចប់​ការ​សាងសង់ តែ​​មិនទាន់សម្ពោធជា​ផ្លូវការ appeared first on Kampuchea Thmey Daily.

ស្ពាននេះបាន​បើកការដ្ឋានសាងសង់ជាផ្លូវការនៅថ្ងៃទី១៩ ខែកុម្ភៈ ឆ្នាំ២០២៤ ក្រោមអធិបតីភាពសម្តេចធិបតី ហ៊ុន ម៉ាណែត នាយករដ្ឋមន្ត្រី។

លោក ផន រឹម មន្រ្តី​អ្នកនាំពាក្យ​ក្រសួង​សាធារណការ​និង​ដឹកជញ្ជូន​បាន​បញ្ជាក់​ថា ពេលនេះការដ្ឋានស្ថាបនា​ស្ពាន​កំពុងសម្រុកខ្លាំង ដោយគោរពតាមបទដ្ឋានបច្ចេកទេស និងកិច្ចសន្យាបច្ចេកទេស ប្រកបដោយគុណភាពនិងសោភណ័្ឌភាព។

បច្ចុប្បន្នការងារផ្នែកខាងកើតស្ពានសម្រេចបាន ផ្នែកគ្រឹះស្ពាន សម្រេចបានប្រមាណ ៦១,៥០% ក្នុងនោះសសរគ្រឹះចំនួន ១៥៦ ដើមសម្រេចបាន ១៣៧ដើម ២០ ជើងតាង សម្រេចបានចំនួន ៩ និងធ្នឹមភ្ជាប់ក្រោមចំនួន ១២ សម្រេចបាន ៨ ធ្នឹម។ រចនាសម្ព័ន្ធក្រោមស្ពានសម្រេចបាន ២៦,១២% រួមមាន៖ តួសរសរស្ពាន ១២ សម្រេចបាន ៦ សរសរ, សរសរស្ពាន ៥២ សម្រេចបាន ២៤ និងធ្នឹមភ្ជាប់ក្បាលសរសរទទឹងស្ពានចំនួន ៣៤ សម្រេចបាន ១០ ធ្នឹម ព្រមទាំងការងារសំខាន់ៗ​មួយចំនួនទៀត។

បើតាមលោក ផន រឹម គិតត្រឹមដើមខែសីហា ឆ្នាំ២០២៥នេះ ការងារសម្រេចបាន ១៧ ខែហើយ ស្មើនឹង ៤០% នៃផែនការសាងសង់ ៤២ ខែ ដោយមិនយឺតយ៉ាវជាងកម្មវិធីការងារដែលគ្រោងទុកទេ ខណៈគម្រោងត្រៀមបញ្ចប់នៅដើមឆ្នាំ ២០២៨ ខាងមុខ។

មន្រ្តីក្រសួង​សាធារណការ​និងដឹកជញ្ជូន​បានអះអាង​ថា ពេលលសាងសង់រួចស្ពាននេះនឹងជួយ កាត់បន្ថយការកកស្ទះចរាចរណ៍លើស្ពានព្រះមុនីវង្សឆ្លងកាត់ទន្លេបាសាក់ ភ្ជាប់ផ្លូវជាតិលេខ១ ខណ្ឌច្បារអំពៅ។ ជួយពង្រឹងដល់ទំនាក់ទំនងសេដ្ឋកិច្ចសង្គម រវាងរាជធានីភ្នំពេញប៉ែកខាងត្បូង ព្រលានយន្តហោះអន្តរជាតិតេជោក្រុងតាខ្មៅ ជាពិសេសធ្វើឱ្យប្រសើរឡើងដល់ប្រសិទ្ធភាពនៃការដឹកជញ្ជូន និងភស្តុភារកម្មនៅក្នុងតំបន់រាជធានីភ្នំពេញ និង​កាត់បន្ថយការកកស្ទះចរាចរណ៍នៅតាមដងទន្លេបាសាក់ និងជួយពន្លឿនការអភិវឌ្ឍតំបន់នោះផងដែរ។

បន្ថែមពីនេះ បើ​តាមលោកផន រឹម អង្គភាពគ្រប់គ្រងគម្រោងក៏​បានពន្លឿនការងារសាងសង់ផ្លូវតភ្ជាប់ទៅផ្លូវជាតិលេខ ១ និងបន្តពង្រឹងសុវត្ថិភាពការងារ ដោយ​ហេតុថារដូវវស្សាទឹកទន្លេចាប់ផ្តើមឡើង និងបន្តថែទាំ ដោយបំពាក់បន្ថែមពោងសុវត្ថិភាព លើទឹកធានាបីសុវត្ថិភាពអ្នកប្រើប្រាស់មធ្យោបាយដឹកជញ្ជូនតាមផ្លូវទឹក ឆ្លងទីតាំងការដ្ឋាននោះ៕

The post ស្ពានឆ្លងទន្លេបាសាក់​នៅ​ចាក់អង្រែ សាង​សង់​​​សម្រេច​បាន​ជាង ៤១% បញ្ចប់​ដើមឆ្នាំ ២០២៨ appeared first on Kampuchea Thmey Daily.

លោក ផន រឹម មន្រ្តី​អ្នកនាំពាក្យ​ក្រសួង​សាធារណការ​ និង​ដឹកជញ្ជូន​បាន​ឲ្យ​កម្ពុជា​ថ្មី​ដឹង​ថា ស្ពាន​ឆ្លង​កាត់ទន្លេ​មេគង្គ​ដីឥដ្ឋ​ថ្ម​គរ ​នៅ​ស្រុក​កៀនស្វាយភ្ជាប់ទៅផ្លូវ​ល្បឿនលឿន​ភ្នំពេញ​បាវិត មាន​វឌ្ឍនភាព​ការងារ​តាម​ផែនការ​ដោយ​បច្ចុប្បន្ន​សម្រេច​លទ្ធផល​​បាន​ប្រមាណ ២០%។

លោក​ថា ស្ពាន​នេះ​តភ្ជាប់ទៅ​គម្រោង​ផ្លូវ​ល្បឿន​លឿន​ភ្នំពេញ​បាវិត ដែល​កំពុង​ដំណើរការ​សាងសង់​។ យ៉ាងណាមិញ ពាក់ព័ន្ធ​វឌ្ឍនភាព​នៃ​ផ្លូវ​ល្បឿន​លឿន​ភ្នំពេញ​បាវិត ដែល​បាន​បើក​ការដ្ឋាន​សាងសង់​ជាង ២ ឆ្នាំ លោក​មិន​ទាន់​អាច​ផ្តល់​ព័ត៌មាន​លម្អិត ខណៈ​ដែល​លោក​នៅ​តែ​អះអាង​ថា ការដ្ឋាន​ផ្លូវ​នេះ​កំពុង​តែ​ដំណើរការ​ និង​ឈាន​ទៅ​បញ្ចប់​តាមផែនការ​ដែល​បាន​គ្រោង​ទុក។

កាល​ពី​ម្សិលមិញ​នេះ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បាន​​ដឹកនាំកិច្ចប្រជុំ ដើម្បី​ពិនិត្យ​ពិភាក្សាលើវឌ្ឍនភាព​នៃការ​អនុវត្ត​គម្រោង​សាងសង់​ផ្លូវល្បឿនលឿនតភ្ជាប់ពីរាជធានីភ្នំពេញ ទៅកាន់ក្រុងបាវិត និង​ស្ពានឆ្លង​កាត់​ទន្លេ​មេគង្គ (ដីឥដ្ឋ-ថ្មគរ)។ កិច្ចប្រជុំនេះ​​មាន​ការ​ចូលរួម​ពី​រដ្ឋមន្រ្តី​ក្រសួង​សាធារណការ​និង​​ដឹកជញ្ជូន លោក ប៉េង ពោធិ៍នា ថ្នាក់ដឹកនាំ​ក្រសួងសេដ្ឋកិច្ចនិងហិរញ្ញវត្ថុ ប្រធាន​ក្រុមហ៊ុន​សាជីវកម្ម​ស្ពាន​និង​ថ្នល់​ចិន (China Road and Bridge Corporation-CRBC) ដែល​ជា​ភាគីអនុវត្តគម្រោង។

​កិច្ចប្រជុំ​រៀបចំ​ឡើង​នៅ​​ក្នុងគោលបំណង​ដើម្បីពិនិត្យ​លើវឌ្ឍនភាព និង​ផែនការ​សកម្មភាព​បន្ទាប់​នៃ​ការអនុវត្តគម្រោងផ្លូវល្បឿន​លឿន​តភ្ជាប់ពីរាជធានីភ្នំពេញទៅកាន់ក្រុងបាវិត និង​ស្ពាន​ឆ្លងកាត់​ទន្លេមេគង្គ (ដីឥដ្ឋ-ថ្មគរ)៕

The post ស្ពាន​ឆ្លង​កាត់ទន្លេ​មេគង្គ​ ភ្ជាប់​ទៅ​​ផ្លូវ​ល្បឿន​លឿន​​​ទៅ​បាវិត​ សម្រេច​បាន​ប្រមាណ ២០% appeared first on Kampuchea Thmey Daily.