ហ្វឹកហាត់ Archives - Kampuchea Thmey Daily

នគរបាលពន្លត់អគ្គិភ័យ ទទួលបានការហ្វឹកហាត់ប្រើប្រាស់រថយន្តប្រភេទជណ្ដើរ ពីសមាគមអ្នកពន្លត់អគ្គិភ័យជប៉ុន

អ៊ិន ពិសី — Fri, 21 Mar 2025 07:35:44 +0000

កាលពីព្រឹកថ្ងៃទី ២១ ខែមីនា ឆ្នាំ ២០២៥ នេះ កម្លាំងសមត្ថកិច្ចជំនាញរបស់ការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានហ្វឹកហាត់រៀនអំពីវិធីប្រើប្រាស់រថយន្តប្រភេទជណ្ដើរ និងប្រើប្រាស់ទឹកទុយោបាញ់ទឹក ពីសមាគមអ្នកពន្លត់អគ្គិភ័យជប៉ុន។

ការហ្វឹកហាត់នេះមានការអញ្ជើញចូលរួមពី លោក KATSUAKI GODA ប្រធានក្រុមការងារសមាគមអ្នកពន្លត់អគ្គិភ័យជប៉ុន ព្រមទាំងក្រុមការងារសមាគមអ្នកពន្លត់អគ្គិភ័យជប៉ុន ដែលតែងតែបង្ហាត់បង្រៀនដល់មន្ត្រីជំនាញការិយាល័យនគរបាលបង្ការពន្លត់អគ្គិភ័យ និងសង្គ្រោះ ដើម្បីធានាបាននូវការជួយសង្គ្រោះប្រជាពលរដ្ឋ និងឆ្លើយតបតាមតម្រូវការចាំបាច់ នៃការងារពន្លត់អគ្គិភ័យផងដែរ។

លោក KATSUAKI GODA បានណែនាំដល់មន្ត្រីជំនាញការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ ត្រូវតែបង្កើនការយកចិត្តទុកដាក់ខ្ពស់បំផុត ជាពិសេសត្រូវធ្វើការស្វែងយល់ និងរៀនសូត្របន្ថែមទៀត ក្នុងការងារជួយសង្គ្រោះប្រជាពលរដ្ឋឲ្យបានទាន់ពេលវេលា។

ជាមួយនេះ ប្រធានក្រុមការងារសមាគមអ្នកពន្លត់អគ្គិភ័យជប៉ុន ក៏បានអរគុណដល់មន្ត្រីជំនាញការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ ដែលបានយកចិត្តទុកដាក់ខ្ពស់ក្នុងការហ្វឹកហាត់រៀនសូត្រអំពីការប្រើប្រាស់រថយន្តជណ្តើរ ក៏ដូចជាវិធីជួយសង្គ្រោះមនុស្សដែលជាប់ក្នុងអគារ។

គួរជម្រាបថា តាមការសង្កេត នៅរាជធានីភ្នំពេញ តែងតែមានអគារខ្ពស់ៗ ដែលចាំបាច់ត្រូវធ្វើការហ្វឹកហាត់ឲ្យបានត្រឹមត្រូវនៅពេលមានអគ្គិភ័យកើតឡើង ហើយត្រូវការអន្តរាគមន៍ភ្លាមៗ៕

អត្ថបទ ៖ សុភា

The post នគរបាលពន្លត់អគ្គិភ័យ ទទួលបានការហ្វឹកហាត់ប្រើប្រាស់រថយន្តប្រភេទជណ្ដើរ ពីសមាគមអ្នកពន្លត់អគ្គិភ័យជប៉ុន appeared first on Kampuchea Thmey Daily.

ហ្វឹកហាត់នៅចិន អាចជាហេតុផលមួយធ្វើឲ្យក្រុមជម្រើសជាតិនារីកម្ពុជា មិនចូលរួមជម្រុះអូឡាំពិក ឆ្នាំ ២០២៤

អ៊ិន ពិសី — Fri, 13 Jan 2023 08:49:41 +0000

ការប្រកួតជម្រុះជុំទី ១ បាល់ទាត់នារី ដើម្បីដណ្ដើមកៅអីទៅចូលរួមប្រកួតក្នុងព្រឹត្តិការណ៍កីឡាអូឡាំពិក ឆ្នាំ ២០២៤ (AFC Women’s Olympic Qualifying Tournament) នៅប្រទេសបារាំង បានសម្រេចការចាប់ពូលប្រចាំទ្វីបអាស៊ីរួចរាល់ហើយ។

ការចាប់ឆ្នោតបែងចែកពូល ត្រូវបានធ្វើឡើងកាលពីរសៀលថ្ងៃទី ១២ ខែមករា ឆ្នាំ ២០២៣ ម្សិលមិញ ដោយមានទាំងអស់ ៧ ពូល ស្មើនឹង ៣១ ក្រុម ចូលរួមប្រកួត ប៉ុន្តែអ្វីដែលគួរឲ្យចាប់អារម្មណ៍នោះ ក្រុមជម្រើសជាតិនារីកម្ពុជា មិនមានឈ្មោះចូលរួមប្រកួតជម្រុះឡើយ ខណៈការប្រកួតគ្រោងជម្រុះនៅអំឡុងខែមេសា ពោលគឺមុនស៊ីហ្គេមនៅកម្ពុជាប្រហែល ១ ខែ។

អ្វីដែលគេឃើញមាន គឺក្រុមនៅអាស៊ានមួយចំនួនដូចជា វៀតណាម, ថៃ មីយ៉ាន់ម៉ា ហ្វីលីពីន ឥណ្ឌូណេស៊ី សិង្ហបុរី និងសូម្បីតែ ទីម័រខាងកើត មានឈ្មោះចូលរួម ខណៈ កម្ពុជា ឡាវ ម៉ាឡេស៊ី និង ព្រុយណេ មិនមានឈ្មោះឡើយ ខណៈសមាសភាពក្រុមមានដូចខាងក្រោម ៖

ចំពោះការដែលក្រុមនារីកម្ពុជា មិនចូលរួមប្រកួតផងដែរនោះ អាចត្រូវបានដឹងថា ដោយសារមានហេតុផលជាប់ពាក់ព័ន្ធនឹងការហ្វឹកហាត់នៅប្រទេសចិន ដើម្បីត្រៀមស៊ីហ្គេម ឆ្នាំ ២០២៣។ បច្ចុប្បន្នក្រុមជម្រើសជាតិនារីកម្ពុជា កំពុងស្ថិតនៅប្រទេសចិន ដើម្បីប្រមូលផ្ដុំហ្វឹកហាត់ តាំងពីខែកញ្ញាមកម្ល៉េះ ហើយគម្រោង នៃការហ្វឹកហាត់គឺគ្រោងនឹងធ្វើដល់រហូតស៊ីហ្គេមមកដល់តែម្ដង ពោលគឺអាចនៅអំឡុងខែមិនា ឬដើមខែមេសា ទើបបញ្ចប់ការបោះជំរំហ្វឹកហាត់ ដែលនេះគឺជាហេតុផលមួយនាំឲ្យការត្រៀមខ្លួនសម្រាប់ព្រឹត្តិការណ៍ខាងលើស្ថិតក្នុងភាពប្រកៀកប្រកិត នៃពេលវេលា។

ចំពោះការប្រកួតស៊ីហ្គេម ឆ្នាំ ២០២៣ នៅកម្ពុជា ប្រភេទកីឡាបាល់ទាត់នារី អាចនឹងចាប់ផ្ដើមនៅចុងខែមេសា ពោលគឺត្រូវធ្វើនៅមុនពិធីបើកដែលគ្រោងធ្វើនៅថ្ងៃទី ០៥ ខែឧសភា ឆ្នាំ ២០២៣។

គួរបញ្ជាក់ថា ក្រោយមានការកែទម្រង់ ក្រុមបាល់ទាត់ជម្រើសជាតិនារីកម្ពុជា ទើបតែត្រូវបានបង្កើតឲ្យមានឡើងជាលើកដំបូងក្នុងឆ្នាំ ២០១៨ ប៉ុណ្ណោះ ហើយក៏បានបង្ហាញខ្លួនលើកដំបូងក្នុងការប្រកួតដែលទទួលស្គាល់ដោយ FIFA ក្នុងឆ្នាំជាមួយគ្នានោះ កម្ពុជា បានប្រកួតយកឈ្នះ ទីម័រខាងកើត ១២-០ ក្នុងពានរង្វាន់ជើងឯកនារីអាស៊ាន ឆ្នាំ ២០១៨ (AFF Women’s Championship) កត្តានេះផងដែរ ក៏អាចជាមូលហេតុ ដោយសារក្រុមនារីកម្ពុជា ទើបតែកសាងក្រុមបានល្អនាប៉ុន្មានឆ្នាំចុងក្រោយនេះផងដែរ៕

អត្ថបទ ៖ មន្នីរ័ត្ន

The post ហ្វឹកហាត់នៅចិន អាចជាហេតុផលមួយធ្វើឲ្យក្រុមជម្រើសជាតិនារីកម្ពុជា មិនចូលរួមជម្រុះអូឡាំពិក ឆ្នាំ ២០២៤ appeared first on Kampuchea Thmey Daily.

ទោះបីហ្វឹកហាត់ទាំងបិទខ្ទប់ តែអត្តពលិកជម្រើសជាតិ នៅតែខំប្រឹងសម្រាប់ស៊ីហ្គេមខាងមុខ

Sorn Phanith — Tue, 23 Nov 2021 01:38:25 +0000

សហព័ន្ធកីឡាទូកកានូ និងរ៉ូអ៊ីងកម្ពុជា បានបញ្ជាក់ថា កីឡាករ កីឡាការិនីជម្រើសជាតិចំនួន ២៨ រូប កំពុងទទួលបានការហ្វឹកហាត់បំប៉នសមត្ថភាពត្រៀមចូលរួមប្រជែងដណ្តើមមេដាយស៊ីហ្គេម លើកទី ៣១ នៅប្រទេសវៀតណាម នាឆ្នាំ ២០២២។

លោក ស្រ៊ុន លាង អគ្គលេខាធិការរងទទួលបន្ទុកបច្ចេកទេស សហព័ន្ធកីឡាទូកកានូនិងរ៉ូអ៊ីង បានអះអាងថា ការហ្វឹកហាត់ត្រៀមរបស់អត្តពលិក គឺក្នុងជំរំប្រមូលផ្តុំហ្វឹកហាត់បិទខ្ទប់តាមផែនការក្រសួងអប់រំ យុវជននិងកីឡា នាក្រុងតាខ្មៅ ខេត្តកណ្តាល ដោយការហ្វឹកហាត់នេះ សហព័ន្ធបង្កើនការប្រុងប្រយ័ត្នខ្ពស់បំផុត អនុវត្តតាមគោលការណ៍ S O P ដើម្បីបង្កការពារទប់ស្តាត់ការរីករាលដាលជំងឺកូវីដ-១៩។

សូមបញ្ជាក់ថា ជម្រើសរើសជាតិកីឡាទូកចំនួន២៨នាក់ ដែលកំពុងហ្វឹកហាត់បិទខ្ទប់ នៅក្រុងតាខ្មៅ ខេត្តកណ្តាលនេះ ធ្វើការហ្វឹកហាត់តែលើ៣ប្រភេទទូកប៉ុណ្ណោះ គឺទូកកានូទូកកាយ៉ាក់និងទូករ៉ូអ៊ីង ខណៈទូកប្រពៃណីខ្នាតអន្តរជាតិពុំមានការហ្វឹកហាត់ប្រមូលផ្តុំនោះទេ ដោយសារម្ចាស់ផ្ទះ វៀតណាម មិនដាក់បញ្ចូល ក្នុងវិញ្ញាសា។

អគ្គលេខាធិការរងរូបនេះ បញ្ជាក់ទៀតថា ការហ្វឹកហាត់បិទខ្ទប់ នៅខេត្តកណ្តាលនេះ មានរយៈពេលតែមួយប៉ុណ្ណោះ បន្ទាប់ក្រុមអត្តពលិកកីឡាជម្រើសជាតិទូកទាំអ២៨រូប និងគ្រូបង្វឹកគ្រូជំនួយ៥រូប នឹងត្រូវចេញទៅហ្វឹកហាត់ នៅខេត្តកំពត បន្តទៀត ដើម្បីត្រៀមស៊ីហ្គេម នៅប្រទេសវៀតណាម នាឆ្នាំ២០២២ និងស៊ីហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ៕

អត្ថបទ៖ វិសិទ្ធ

The post ទោះបីហ្វឹកហាត់ទាំងបិទខ្ទប់ តែអត្តពលិកជម្រើសជាតិ នៅតែខំប្រឹងសម្រាប់ស៊ីហ្គេមខាងមុខ appeared first on Kampuchea Thmey Daily.

ខេត្តសៀមរាបជាជំរំហ្វឹកហាត់ និងប្រកួតរបស់អត្តពលិកប្រណាំងកង់ សម្រាប់ត្រៀមស៊ីហ្គេមវៀតណាម និងកម្ពុជា

Sorn Phanith — Tue, 31 Aug 2021 03:24:32 +0000

សហព័ន្ធកីឡាទោចក្រយាន បានសម្រេចជ្រើសរើសយកខេត្តសៀមរាបធ្វើជាជំរំហ្វឹកហាត់ និងប្រកួត ដើម្បីបង្កើននូវកម្លាំងកាយ និងបច្ចេកទេសកីឡាករ កីឡាការិនី ដើម្បីត្រៀមស៊ីហ្គេមលើកទី៣១នៅប្រទេសវៀតណាម និងស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។

នេះជាយុទ្ធសាស្ត្រដ៏សំខាន់មួយ ដើម្បីពង្រឹងសមត្ថភាពអត្តពលិក ជាមួយនឹងការបន្ថែមនូវការអប់រំផ្លូវចិត្ត។ ការអប់រំសុខភាពផ្លូវចិត្តជាយុទ្ធសាស្ត្រអាចជួយជំរុញឲ្យអត្តពលិក ដែលខ្ចីបទពិសោធន៍មានទំនុកចិត្តខ្ពស់អាចប្រជែងលើឆាកអន្តរជាតិ ដោយជោគជ័យ។

លោក អ៊ុច សុខវិបុល គ្រូបង្វឹកជម្រើសជាតិកីឡាទោចក្រយានបានអះអាងថា ការដាក់ចេញនូវយុទ្ធសាស្ត្រការអប់រំសុខភាពផ្លូវចិត្តបន្ថែមលើការហ្វឹកហាត់បង្កើនបច្ចេកទេស គឺជាយុទ្ធសាស្ត្រសំខាន់ជួយជំរុញឲ្យអត្តពលិកដែលខ្ចីបទពិសោធន៍អាចអភិវឌ្ឍន៍សមត្ថភាពរីកចម្រើនខ្លាំង អាចចូលរួមប្រកួតប្រជែងនៅលើឆាកអន្តរជាតិ ដោយពុំមានភាពភ័យខ្លាច។

គ្រូបង្វឹករូបនេះ ពន្យល់ថា កីឡាការិនីជម្រើសជាតិកីឡាទោចក្រយាន២រូប ដែលកំពុងទទួលការបណ្តុះបណ្តាលក្នុងជំរំហ្វឹក ហាត់នៅខេត្តសៀមរាប ត្រៀមចូលរួមស៊ីហ្គេមលើកទី៣១ នៅប្រទេសវៀតណាមជាលើកដំបូង។ ដូច្នេះហើយយើងត្រូវបន្ថែមការអប់រំសុខភាពផ្លូវចិត្ត លើការហ្វឹកហាត់បង្កើនបច្ចេកទេស ដើម្បីអភិវឌ្ឍសមត្ថភាពឲ្យរីកចម្រើនខ្លាំង នឹងមានភាពជឿជាក់ ជួយកីឡាករកីឡាការិនីបន្សាំខ្លួនជាមួយកីឡាករក្នុងតំបន់អាស៊ី៕