​យោងតាមរបាយការណ៍ដែលបានផ្សព្វផ្សាយ ចាប់ពីខែកក្កដា ឆ្នាំ២០២៥ ដល់ពាក់កណ្តាលខែមេសា ឆ្នាំ២០២៦ សកម្មភាពបង្ក្រាបទទួលបានលទ្ធផលគួរឱ្យកត់សម្គាល់ដូចខាងក្រោម៖

-​ការបង្ក្រាបផ្ទាល់៖ បង្ក្រាបបានជាង ២៥០ករណី ក្នុងនោះរួមមានទីតាំងកាស៊ីណូ ៩១កន្លែង។

-​ការចាប់ខ្លួន៖ ជនសង្ស័យចំនួន ១,០៨៩នាក់ (មានទាំងជនជាតិខ្មែរ និងបរទេស) ត្រូវបានបញ្ជូនទៅតុលាការ។

-​ការបណ្តេញចេញ៖ ជនបរទេសចំនួន ១៣,០៣៩នាក់ (៣៣សញ្ជាតិ) ត្រូវបានបណ្តេញចេញពីកម្ពុជា ពាក់ព័ន្ធនឹងបទល្មើសអនឡាញ។

​ការចាកចេញដោយស្ម័គ្រចិត្ត៖ ជនបរទេសសរុប ២៤១,៨៨៨នាក់ បានចាកចេញពីកម្ពុជា ចាប់ពីដើមឆ្នាំ២០២៦ រហូតមកដល់បច្ចុប្បន្ន។

​ក្នុងកិច្ចប្រជុំពេញអង្គគណៈរដ្ឋមន្ត្រី កាលពីថ្ងៃទី២៣ ខែមេសា ឆ្នាំ២០២៦ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានដាក់បទបញ្ជាយ៉ាងម៉ឺងម៉ាត់បំផុតឱ្យកងកម្លាំងសមត្ថកិច្ចបន្តយុទ្ធនាការនេះដោយ «គ្មានការបង្អង់ដៃ និងគ្មានការលើកលែង»។ 

សម្តេចធិបតីបានសង្កត់ធ្ងន់ថា យុទ្ធនាការនេះមិនមែនធ្វើឡើងត្រឹមតែមួយឆាវក្នុងឱកាសបុណ្យចូលឆ្នាំនោះទេ ប៉ុន្តែជាការអនុវត្តច្បាប់ជាប្រចាំ និងយូរអង្វែង។

​ដើម្បីធានាប្រសិទ្ធភាពក្នុងការលុបបំបាត់ឧក្រិដ្ឋកម្មឆ្លងដែននេះ រាជរដ្ឋាភិបាលបានដាក់ចេញនូវក្របខ័ណ្ឌច្បាប់ថ្មីៗ រួមមាន៖

១. ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ដែលបង្កើតបទល្មើសព្រហ្មទណ្ឌថ្មីចំនួន ៥ និងបង្កើនទោសទណ្ឌឱ្យធ្ងន់ជាងមុន។

២. អនុក្រឹត្យ និងប្រកាសអន្តរក្រសួង ស្តីពីការគ្រប់គ្រងសន្តិសុខនៅតាមទីតាំងរស់នៅប្រមូលផ្តុំ និងការផាកពិន័យម្ចាស់ទីតាំងដែលបណ្តោយឱ្យមានបទល្មើស។

​បន្ថែមលើសកម្មភាពក្នុងស្រុក កម្ពុជាក៏បានពង្រឹងកិច្ចសហប្រតិបត្តិការអន្តរជាតិយ៉ាងជិតស្និទ្ធជាមួយប្រទេសដៃគូ ដើម្បីផ្លាស់ប្តូរព័ត៌មាន និងជួយសង្គ្រោះជនរងគ្រោះ។

 រាជរដ្ឋាភិបាលកម្ពុជា ក៏បានអំពាវនាវដល់សហគមន៍អន្តរជាតិ ឱ្យបន្តគាំទ្រ និងសហការចែករំលែកព័ត៌មានឱ្យបានទាន់ពេលវេលា ដើម្បីរួមគ្នាបំផ្លាញឫសគល់នៃបណ្តាញឧក្រិដ្ឋកម្មឌីជីថលនេះឱ្យអស់ពីតំបន់៕

The post រាជរដ្ឋាភិបាលកម្ពុជាបង្ហាញលទ្ធផលធំៗ ក្នុងការបោសសម្អាតបទល្មើសឆបោកតាមប្រព័ន្ធបច្ចេកវិទ្យា (Online Scams) appeared first on Kampuchea Thmey Daily.

ក្នុង​សេចក្ដីប្រកាស​ព័ត៌មាន​ថ្ងៃ​ទី​២៤ ខែ​មេសា ឆ្នាំ​២០២៦​នេះ អ្នកនាំពាក្យ​រាជរដ្ឋាភិបាល​កម្ពុជា​បាន​បញ្ជាក់​ពី​ការ​ខិតខំ​ទាំង​អំបាលម៉ាន​របស់​រដ្ឋាភិបាល​ក្នុង​ការ​ប្រយុទ្ធ​ប្រឆាំង​ឧក្រិដ្ឋកម្ម​ឆបោក​អនឡាញ និង​ការ​ប្ដេជ្ញា​ខ្ពស់​ក្នុង​ការ​ការ​បំផ្លាញ​បណ្ដាញ​ឧក្រិដ្ឋកម្ម​ទាំង​មូល​។

​​​ក្នុង​លិខិត​នោះ​បាន​សរសេរ​ថា៖ «កម្ពុជា​មិន​មែន​ជា​គោលដៅ​ឧក្រិដ្ឋកម្ម​ទេ​ ប៉ុន្តែ​ជា​ប្រទេស​ដែល​កំពុង​ដឹក​នាំ​ការ​ប្រយុទ្ធ​ប្រឆាំង​យ៉ាង​តឹងរ៉ឹង​ និង​សកម្ម​បំផុត​មួយ​ក្នុង​តំបន់»។

អ្នកនាំពាក្យ​រាជរដ្ឋាភិបាល​កម្ពុជា​ក៏​បាន​រៀបរាប់​ពី​សកម្មភាព​មួយ​ចំនួន​របស់​រដ្ឋាភិបាល​ក្នុង​ការ​ប្រយុទ្ធ​ប្រឆាំង​ការ​ឆបោក​អនឡាញ​នេះ​ផង​ដែរ​ដោយ​មាន​ទាំង​បទ​បញ្ជា​ មាន​ទាំង​ឆន្ទៈ និង​ការ​ប្ដេជ្ញា​ចិត្ត​របស់​នាយករដ្ឋមន្ត្រី ព្រម​ទាំង​ការ​បង្កើត​នូវ​លិខិត​បទដ្ឋាន​គតិយុត្តិ​ជាច្រើន​ដើម្បី​ធានា​ដល់​ការ​អនុវត្ត​របស់​អាជ្ញាធរ សហការ​ជាមួយ​បណ្ដា​ប្រទេស​ជា​ដៃ​គូរ អង្គការ​អន្តរជាតិ និង​យន្ត​ការ​ពហុភាគី​ដើម្បី​ស្រាវជ្រាវ​បង្ក្រាប​ បញ្ជូន​ជន​សង្ស័យ និង​ជួយ​សង្គ្រោះ​ជនរងគ្រោះ​ពី​អំពើ​ឧក្រិដ្ឋ​នេះ​ថែម​ទៀត​។

​ក្នុង​សេចក្ដី​ប្រកាស​នោះ​បាន​បញ្ជាក់​បន្ថែម​ថា៖ «សម្ដេច​ធិបតី​ បាន​បញ្ជាក់​ថា​ច្បាប់​មាន​ហើយ ដូច្នេះ​ត្រូវ​តែ​អនុវត្ត​ឱ្យ​បាន​ម៉ត់ចត់​ និង​ឱ្យ​មាន​ប្រសិទ្ធភាព​ដោយ​មិន​បន្ធូរ​ដៃ និង​ដោយ​គ្មាន​ការ​លើក​លែង​ឡើយ ពោល​គឺ​មិន​បញ្ឈប់​ត្រឹម​ពិធី​បុណ្យ​ចូល​ឆ្នាំ​ថ្មី​ប្រពៃណី​ជាតិ​ខ្មែរ​នេះ​ ដូច​ដែល​មាន​មតិ​មួយ​ចំនួន​បាន​លើក​ឡើង​នោះ​ឡើយ​»។

ជា​ការ​កត់​សម្គាល់​ការ​ឆ្លើយ​តប​របស់​អ្នកនាំពាក្យ​រាជរដ្ឋាភិបាល​កម្ពុជា​ពេល​នេះ​គឺ​បន្ទាប់​ពី​ស្ថាប័ន​ព័ត៌មាន​អន្តរជាតិ​មួយ​ចំនួន​បាន​ចុះផ្សាយ​ពី​ឧក្រិដ្ឋកម្ម​ឆបោក​អនឡាញ​នៅ​កម្ពុជា ដោយ​ក្នុង​នោះ​មាន​ទាំង​ហៅ​ឈ្មោះ​ប្រទេស​កម្ពុជា ថា​ជា​ Scambodia ​។ ដោយ​ឡែក​រតនាគារ​សហរដ្ឋអាមេរិក​កាលពី​យប់​ថ្ងៃ​ទី​២៣ ខែ​មេសា បាន​ប្រកាស​ដាក់​ទណ្ឌកម្ម​សមាជិក​ព្រឹទ្ធសភា​មួយ​មួយ​រូប និង​បណ្ដាញ​ពាក់ព័ន្ធ​ផ្សេង​ទៀត​ជុំវិញ​ឧក្រិដ្ឋ​កម្ម​ឆបោក​អនឡាញ​សំដៅ​ទៅ​ពលរដ្ឋ​អាមេរិក​ផង​ដែរ​។

បើ​តាម​អ្នកនាំពាក្យ​រាជរដ្ឋាភិបាល​ចាប់​តាំង​ពី​ខែ​កក្កដា ឆ្នាំ​២០២៥ រហូត​មក​ដល់​ពាក់​កណ្ដាល​ខែ​មេសា ឆ្នាំ​២០២៦ សមត្ថកិច្ច​កម្ពុជា​បាន​បង្ក្រាប​អំពើ​ឆបោក​តាម​ប្រព័ន្ធ​បច្ចេកវិទ្យា​បាន​ជាង​២៥០​ករណី ក្នុង​នោះ​បង្ក្រាប​ទី​តាំង​កាស៊ីណូ​បាន​៩១​ទីតាំង កសាង​សំណុំ​រឿង​បញ្ជូន​ទៅ​តុលាការ​ចំនួន​១១២​ករណី ពាក់ព័ន្ធ​នឹង​ជន​សង្ស័យ​ ១០៨៩នាក់។ បន្ថែម​លើ​នោះ​បាន​អនុវត្តន៍​នីតិវិធី​បណ្ដាញ​ជន​បរទេស​ចេញពី​ប្រទេស​បាន​ជាង ១ម៉ឺន៣ពាន់នាក់ ខណៈ​ជន​បរទេស​ដែល​ស្ម័គ្រ​ចិត្ត​ចេញ​មាន​ជាង​២៤​ម៉ឺន​នាក់​៕

អត្ថបទដោយ ហ៊ុន សិរីវឌ្ឍន៍ ​​

The post អ្នកនាំពាក្យ​រដ្ឋាភិបាល​ថា ​កម្ពុជា​ជា​ប្រទេស​ដែល​ប្រយុទ្ធ​ប្រឆាំង​ឧក្រិដ្ឋកម្ម​ឆបោក​អនឡាញ​យ៉ាង​សកម្មបំផុត​ appeared first on Kampuchea Thmey Daily.

ក្នុងសេចក្តីបំភ្លឺដែលចេញផ្សាយនៅថ្ងៃអង្គារ ទី១០ មីនានេះ លោក ប៉ែន បូណា បានបញ្ជាក់យ៉ាងច្បាស់ថា សម្តេចធិបតី ហ៊ុន ម៉ាណែត ពុំដែលមានប្រសាសន៍ ឬបង្ហោះសារតាមបណ្តាញសង្គមណាមួយ អំពីការចរចាតាមរយៈគណៈកម្មការចម្រុះខណ្ឌសីមាព្រំដែនគោក (JBC) នៅក្រោយពិធីបុណ្យចូលឆ្នាំថ្មី ដូចការលើកឡើងនោះឡើយ។

លោកអ្នកនាំពាក្យបានបញ្ជាក់ពីជំហរដ៏ច្បាស់លាស់របស់រាជរដ្ឋាភិបាលកម្ពុជា ដែលតែងតែគោរព និងអនុវត្តយ៉ាងម៉ឺងម៉ាត់តាមស្មារតីនៃសេចក្តីប្រកាសរួមថ្ងៃទី២៧ ខែធ្នូ ឆ្នាំ២០២៥ និងកិច្ចព្រមព្រៀងពាក់ព័ន្ធផ្សេងទៀត។ រាជរដ្ឋាភិបាលបានសម្តែងនូវឆន្ទៈក្នុងការអនុញ្ញាតឱ្យគណៈកម្មការចម្រុះខណ្ឌសីមាព្រំដែនគោក (JBC) បន្តការងារឱ្យបានឆាប់រហ័សបំផុត ដើម្បីដោះស្រាយបញ្ហាព្រំដែន និងធានាសន្តិភាពយូរអង្វែង ដោយមិនចាំបាច់រង់ចាំដល់ក្រោយពិធីបុណ្យចូលឆ្នាំនោះទេ។

លោក ប៉ែន បូណា បានឱ្យដឹងទៀតថា ជាក់ស្តែងគិតចាប់ពីពេលដែលបទឈប់បាញ់លើកទី២ ចូលជាធរមានកាលពីថ្ងៃទី២៧ ខែធ្នូ ឆ្នាំ២០២៥ មក រដ្ឋលេខាធិការដ្ឋានកិច្ចការព្រំដែនកម្ពុជា ក្នុងនាមតំណាង JBC កម្ពុជា បានដាក់សំណើទៅកាន់ភាគីថៃចំនួន ៥លើករួចមកហើយ ដើម្បីស្នើសុំឱ្យភាគីថៃចាត់បញ្ជូនក្រុមការងារវាស់វែងចម្រុះ ចុះធ្វើការងារនៅលើដីជាក់ស្តែង។

ទីបំផុត អ្នកនាំពាក្យរាជរដ្ឋាភិបាលបានអំពាវនាវដល់សាធារណជនទាំងមូល មេត្តាជ្រាបជាព័ត៌មានត្រឹមត្រូវ និងកុំភាន់ច្រឡំចំពោះព័ត៌មានមិនពិតដែលអាចប៉ះពាល់ដល់ទំនាក់ទំនងរវាងប្រទេសទាំងពីរ និងដំណើរការដោះស្រាយបញ្ហាព្រំដែនដែលកំពុងបន្ត៕

The post លោក ប៉ែន បូណា បំភ្លឺ ៖ សម្តេចធិបតី ហ៊ុន ម៉ាណែត មិនបានបង្ហោះសារពន្យារពេលចរចាបញ្ហាទឹកដីជាមួយថៃទេ appeared first on Kampuchea Thmey Daily.

ក្នុងវេទិកា Press Briefing នៅថ្ងៃទី២ ខែមីនា ឆ្នាំ២០២៦នេះ អ្នកនាំពាក្យរាជរដ្ឋាភិបាល លោក ប៉ែន បូណា បានថ្លែងថា រាជរដ្ឋាភិបាល ដែលមានសម្តេចធិបតី ហ៊ុន ម៉ាណែត ជានាយករដ្ឋមន្ត្រី បានយកចិត្តទុកដាក់ខ្ពស់ចំពោះប្រជាពលរដ្ឋ និងនិស្សិតខ្មែរដែលកំពុងស្ថិតនៅក្នុងបណ្តាប្រទេសដែលមានសង្គ្រាមនៅមជ្ឈិមបូព៌ា និងបានអំពាវនាវឱ្យភាគីជម្លោះមានការអត់ធ្មត់ជាអតិបរមា។

បើតាមលោក ប៉ែន បូណា មាននិស្សិតខ្មែរចំនួន២៣៩នាក់កំពុងសិក្សានៅប្រទេសអ៊ីស្រាអែល និងមាន២៧នាក់កំពុងសិក្សានៅប្រទេសគុយវ៉ែត។ ក្រៅពីនោះ ក៏មានពលរដ្ឋខ្មែរមួយចំនួនទៀតកំពុងស្នាក់នៅ ធ្វើការ ឬធ្វើដំណើរកម្សាន្តក្នុងបណ្តាប្រទេសមជ្ឈិមបូព៌ាផងដែរ។

លោក ប៉ែន បូណា បាននិយាយថា បណ្តាស្ថានទូតកម្ពុជាទាំងអស់ដែលទទួលបន្ទុកទំនាក់ទំនងជាមួយប្រទេសនៅមជ្ឈិមបូព៌ា បានទទួលការណែនាំឱ្យប្រកាសប្រាប់ប្រជាពលរដ្ឋ និងនិស្សិតកម្ពុជាទាំងអស់ឱ្យមានការប្រុងប្រយ័ត្ន និងផ្ដល់លេខទាក់ទង ដើម្បីសម្របសម្រួលក្នុងករណីមានអាសន្ន។

អ្នកនាំពាក្យរាជរដ្ឋាភិបាលខាងលើ អះអាងថា រហូតមកដល់ពេលនេះនៅមិនទាន់មានព័ត៌មានស្តីពីប្រជាជនខ្មែរទទួលរងគ្រោះដោយសារសង្គ្រាមនេះនៅឡើយទេ។

ជុំវិញសង្គ្រាមដែលកំពុងផ្ទុះនៅតំបន់មជ្ឈិមបូព៌ានេះ រាជរដ្ឋាភិបាលកម្ពុជា តាមរយៈក្រសួងការបរទេសក៏បានចេញសេចក្តីថ្លែងការណ៍មួយ កាលពីថ្ងៃទី២៨ ខែកុម្ភៈ ឆ្នាំ២០២៦ ដោយបង្ហាញក្ដីបារម្ភចំពោះស្ថានការណ៍នៅមជ្ឈិមបូព៌ានាពេលនេះ ហើយកម្ពុជាក៏បានអំពាវនាវដល់គ្រប់ភាគីពាក់ព័ន្ធទាំងអស់ឱ្យរក្សាការអត់ធ្មត់ជាអតិបរមា ធ្វើយ៉ាងណាជៀសវាងកំណើនស្ថានការណ៍កាន់តែធ្ងន់ធ្ងរបន្ថែមទៀត ដែលនឹងប៉ះពាល់ដល់អាយុជីវិតជនស៊ីវិល និងប៉ះពាល់ដល់សន្តិភាព៕

ដោយ៖ ធឿន វ៉ាន់សុង

The post អ្នកនាំពាក្យរដ្ឋាភិបាល បានអះអាងពីសុវត្ថិភាពពលរដ្ឋ និងនិស្សិតខ្មែរដែលនៅមជ្ឈិមបូព៌ា ខណៈសង្គ្រាមកំពុងផ្ទុះ appeared first on Kampuchea Thmey Daily.

បន្ទាប់ពីកិច្ចខិតខំស្វះស្វែងរកបទឈប់បាញ់ ដើម្បីបញ្ចប់សោកនាដកម្មមកលើប្រទេសជាតិ និងប្រជាជន លោក ប៉ែន បូណា បាននិយាយថា រាជរដ្ឋាភិបាល និងថ្នាក់ដឹកនាំដែលមានសម្តេចតេជោ ហ៊ុន សែន ប្រធានព្រឹទ្ធសភា និងសម្តេចធិបតី ហ៊ុន ម៉ាណែត នាយករដ្ឋមន្ត្រី បានផ្តោតការយកចិត្តទុកដាក់ខ្ពស់បំផុតទៅលើគ្រួសារយុទ្ធជនពលី និងយុទ្ធជនរងរបួស ក៏ដូចជាការស្តារឡើងវិញនូវជីវភាពជនភៀសសឹក និងហេដ្ឋារចនាសម្ព័ន្ធដែលរងការខូចខាតដោយសារសង្គ្រាមឈ្លានពានរបស់យោធាថៃលើកម្ពុជា។

លោក សង្កត់ធ្ងន់ថា ដៃម្ខាងដោះស្រាយបញ្ហាជូនពលរដ្ឋ ដែលរងផលប៉ះពាល់ពីសង្គ្រាមរំលោភបំពានរបស់ថៃ ឯដៃម្ខាងទៀត រាជរដ្ឋាភិបាល ក៏កំពុងខិតខំយ៉ាងខ្លាំងលើនយោបាយការទូត ដើម្បីដោះស្រាយបញ្ហាព្រំដែនជាមួយប្រទេសថៃដោយសន្តិវិធី ផ្អែកតាមអនុសញ្ញា សន្ធិសញ្ញា និងច្បាប់អន្តរជាតិ។

តាមការឱ្យដឹងពីលោក ប៉ែន បូណា ឆ្លើយតបនឹងការអំពាវនាវរបស់សម្តេចធិបតី ហ៊ុន ម៉ាណែត គ្រឹះស្ថានមីក្រូហិរញ្ញវត្ថុដែលជាសមាជិករបស់សមាគមមីក្រូហិរញ្ញវត្ថុកម្ពុជា បានសម្រេចលើកលែងការប្រាក់សរុបមានចំនួន ១០,៦លានដុល្លារអាម៉េរិកសម្រាប់គ្រួសារដែលជាជនភៀសសឹក និងបានលុបចោលបំណុល ទាំងប្រាក់ដើម ទាំងការប្រាក់ ចំនួនប្រមាណ ១លានដុល្លារអាម៉េរិកសម្រាប់យោធិនជួរមុខ យោធិនរងរបួស និងគ្រួសារយោធិនពលី។ ក្នុងនោះ គ្រឹះស្ថានមីក្រូហិរញ្ញវត្ថុ ក៏បានរៀបចំឥណទានឡើងវិញក្នុងទំហំទឹកប្រាក់ប្រមាណ ៥០០លានដុល្លារអាម៉េរិក ដើម្បីសម្រាលសំពាធហិរញ្ញវត្ថុដល់ជនភៀសសឹក និងអតិថិជនដែលរងផលប៉ះពាល់ផ្សេងៗទៀត។

សម្រាប់ភៀសសឹក ដែលមិនទាន់អាចវិលទៅកាន់ផ្ទះសម្បែងវិញបាន អ្នកនាំពាក្យ ថា រាជរដ្ឋាភិបាល តាមរយៈក្រសួងស្ថាប័នពាក់ព័ន្ធកំពុងគិតគូរពីការពង្រឹងជម្រកបណ្តោះអាសន្ន ឬ ក៏អាចផ្លាស់ប្តូរជម្រកបណ្តោះអាសន្នទៅកាន់ទីតាំងថ្មី ដែលមានភាពប្រសើរជាងបច្ចុប្បន្នក្នុងករណីចាំបាច់។ លោក ប៉ែន បូណា ថា ទាំងនេះសបញ្ជាក់ពីការយកចិត្តទុកដាក់ដោះស្រាយតាមគ្រប់មធ្យោបាយរបស់រាជរដ្ឋាភិបាល ដើម្បីជួយប្រជាពលរដ្ឋភៀសសឹក ក៏ដូចជាគ្រួសារវីរយុទ្ធជនពលី និងវីរយុទ្ធជនរបួស៕

ដោយ៖ ធឿន វ៉ាន់សុង

The post លោក ប៉ែន បូណា អះអាងពីការយកចិត្តទុកដាក់របស់រដ្ឋាភិបាលចំពោះយុទ្ធជន និងពលរដ្ឋភៀសសឹក appeared first on Kampuchea Thmey Daily.

​លោក ប៉ែន បូណា ​បានលើកឡើងនៅក្នុងសន្និសីទសារព័ត៌មាន​នៅរសៀលថ្ងៃទី ០១ ខែមករា ឆ្នាំ ២០២៦ថា ​អ្វីដែលកំពុង​កើត​ឡើងនៅពេលនេះ ​មិន​មែន​ជារឿង​ធ្វើឱ្យប្រជាពលរដ្ឋខ្មែរ​បាក់ទឹកចិត្តនោះឡើយ​ ​ផ្ទុយទៅវិញ​វាគឺជាវិញ្ញាសាមួយ​ដែលជំរុញឱ្យ​យើងរួប​រួមគ្នា​កាន់​តែខ្លាំង​ ដើម្បីការពារអធិបតេយ្យភាពជាតិ និងជំរុញទៅរកដំណោះស្រាយ​ដោយ​សន្តិវិធី​ ផ្អែកលើច្បាប់​ដែលជាគោលជំហរច្បាស់លាស់របស់រាជរដ្ឋាភិបាល។​

អ្នកនាំពាក្យ​រាជរដ្ឋាភិបាលកម្ពុជា ​បានលើកឡើងថា ​ការដោះលែងយោធិនកម្ពុជាទាំង ១៨ រូប​ ជា​ជំហាន​សំខាន់មួយ​ បន្ទាប់ពីបទឈប់បាញ់​ដែលកម្ពុជា​កំពុងអនុវត្តបានខ្ជាប់ខ្ជួនល្អ​។

លោក ប៉ែន បូណា បន្ថែមថា៖ «នេះជា​សញ្ញា​វិជ្ជមាន​នៅក្នុងការស្ដាទំនុកចិត្ត​ ​និងការឈានទៅស្ដារសន្តិភាព​ និងធ្វើឱ្យសន្តិភាពស្ថិតស្វេរយូរអង្វែង​រវាង​ប្រទេសទាំងពីរ​ស្របតាម​ស្មារតីដែលបានព្រមព្រៀងគ្នា»។​

​ជំហានបន្ទាប់ដែលកម្ពុជា-ថៃ ​ត្រូវធ្វើ ​គឺការដោះស្រាយបញ្ហាព្រំដែនដោយសន្តិវិធី តាមយន្តការ​បច្ចេកទេស និងច្បាប់អន្តរ​ជាតិស្របតាមស្មារតីនៃ​សេចក្ដីប្រកាសរួមនៃកិច្ចប្រជុំពិសេស​លើកទី៣ នៃគណៈកម្មាធិការព្រំដែនទូទៅ (GBC) ចុះថ្ងៃទី ២៧ ខែធ្នូ ឆ្នាំ ២០២៥។

​អ្នកនាំពាក្យរាជរដ្ឋាភិបាលបញ្ជាក់ថា ​សកម្មភាពទាំងឡាយណា ដែលប្រព្រឹត្តខុសពីការឯកភាពគ្នា នៅ​ក្នុងសេចក្ដីប្រកាស​រួមនេះ ​ក៏ដូចជា​សេចក្ដីប្រកាសរួមកន្លងមកនោះគឺជាសកម្មភាពខុសច្បាប់​ និង​រំលោភបំពានលើកិច្ចព្រមព្រៀង​លើបទឈប់បាញ់។​

កម្ពុជាប្រកាន់ជំហរម៉ឺងម៉ាត់ក្នុងការការពារខ្សែព្រំដែនអន្តរជាតិ កម្ពុជា-ថៃ ដែលបន្សល់ទុកដោយគណៈកម្មការឥណ្ឌូចិន-សៀម ដោយគោរពគោលការណ៍ច្បាប់​អន្តរជាតិ គោលការណ៍ខ្សែបន្ទាត់ព្រំដែនមិនកែប្រែ។​

​កម្ពុជា​គោរពអនុសញ្ញា ​សន្ធិសញ្ញាបារាំង-សៀម ​ផែនទី ​និង​កំណត់ហេតុបោះបង្គោល​ព្រំដែនរបស់​គណៈកម្មការបោះ​បង្គោល​ព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធ​នា​នា​ ដែលភាគីទាំងពីរបានឯកភាពគ្នា នាពេលកន្លងមក។

​អ្នកនាំពាក្យរាជរដ្ឋាភិបាល បន្ថែមថា កម្លាំងចលករដ៏សំខាន់ នៅក្នុងការឈានទៅសម្រេចគោល​ដៅ​ដោះ​ស្រាយ​បញ្ហាព្រំដែន ដោយសន្តិវិធី និងយុត្តិធម៌នៅពេលខាងមុខនេះគឺ៖

១.ជំហរកាទូតច្បាស់លាស់ និងចាស់ទុំរបស់ថ្នាក់ដឹកនាំយើង ដែលឈរលើកិច្ច​សន្ទនា​ដោយ​សន្តិវិធី ​និងផ្អែកលើច្បាប់។​២.កម្ពុជាមានឯកសារផ្លូវច្បាប់រឹងមាំ ដែលទទួលស្គាល់ជាអន្តរជាតិ។ ៣.ជំហររបស់សហគមន៍អន្តរជាតិដែលគាំទ្រដំណោះ​ស្រាយដោយសន្តិវិធី​ដោយផ្អែកលើច្បាប់​ស្រប​ជា​មួយនឹងជំហររបស់រាជរដ្ឋាភិបាលកម្ពុជា។ ៤. កម្លាំងមហាសាមគ្គីជាតិដ៏រឹងមាំ ក្នុងចំណោមប្រជាពលរដ្ឋដែលផ្ដល់ទំនុក​ចិត្តទាំង​ស្រុង​លើរាជ​រដ្ឋាភិ​បាលក្នុងការដោះស្រាយបញ្ហា គឺជាកម្លាំងជំរុញដ៏ខ្លាំងក្លា ដើម្បីឈានទៅដោះស្រាយ​បញ្ហា​ព្រំដែន​រវាងកម្ពុជា-ថៃ ដោយសន្តិវិធី៕

អត្ថបទ៖ ឡេង ដេត

The post អ្នកនាំពាក្យ​រាជរដ្ឋាភិបាល​បញ្ជាក់ឡើងវិញ​ថា​​ កម្ពុជា​មិន​ទទួល​ស្គាល់​ការកែប្រែព្រំដែន​ ដោយ​ការ​ប្រើ​កម្លាំងនោះទេ appeared first on Kampuchea Thmey Daily.

ក្នុង​សេចក្ដីថ្លែងការណ៍​នៅ​ថ្ងៃទី​៧ ខែ​តុលា ឆ្នាំ២០២៥​នេះ អង្គភាព​អ្នកនាំពាក្យ​បាន​លើក​ឡើង​ថា ការ​យក​រូប​ប្រធាន​ព្រឹទ្ធសភា នាយករដ្ឋមន្ត្រី និង​ថ្នាក់​ដឹក​នាំ​កម្ពុជា​ ធ្វើ​ជា​ផ្ទាំង​ស៊ីប ធ្វើ​ទីង​ម៉ោង ដោយ​បាន​វាយ​ប្រហារ និង​ប្រមាថ​ជា​សាធារណ​ជា​ដើម​ គឺ​ជា​ទង្វើ​ដែល​មិន​អាច​ទទួល​យក​បាន។

ក្នុង​សេចក្ដី​ថ្លែង​ការណ៍​បាន​សរសេរ​ថា៖ «អ្នកនាំពាក្យ​រាជរដ្ឋាភិបាល​កម្ពុជា សង្កេត​ឃើញ​ថា​នៅ​ប្រទេស​ថៃ​អំពើ​អសីលធម៌ និង​ការ​ប្រមាថ​គ្រប់​បែប​យ៉ាង​ចំពោះ​ថ្នាក់​ដឹក​នាំ​កម្ពុជា​ បាន​ប្រព្រឹត្ត​ទៅ​ដោយ​ចំហ ដោយ​គ្មាន​វិធាន​ការ​អ្វី​ទាំង​អស់។ អ្នកនាំពាក្យ​រាជ​រដ្ឋាភិបាល​កម្ពុជា​សូម​សម្ដែង​ការ​សោក​ស្ដាយ​យ៉ាង​ខ្លាំង​ចំពោះ​ការ​បណ្ដែត​បណ្ដោយ​ឱ្យ​អំពើ​ប្រមាថ​បែបនេះ​កើត​មាន​ដោយ​សេរី​នៅ​ក្នុង​ប្រទេស​ថៃ»។

អង្គភាព​ដដែល​នេះ​បាន​កោត​សរសេរ​ពី​ «គុណធម៌​របស់​សម្ដេច​តេជោ ហ៊ុន សែន» ដែល​តាំង​ពី​ដើម​មក​រហូត​មក​ដល់​ពេល​នេះ​សម្ដេច​នៅ​តែ​អំពាវ​នាវ​កុំ​ឱ្យ​ពលរដ្ឋ​ខ្មែរ​ធ្វើ​សកម្មភាព​ប្រមាថ​លើ​ព្រះមហាក្សត្រ និង​ថ្នាក់​ដឹក​នាំ​ថៃ ព្រម​ទាំង​សូម​កុំ​ឱ្យ​មាន​ការ​រើស​អើង​ចំពោះ​ជនជាតិ​ថៃ​ដែល​កំពុង​ស្នាក់​នៅ​និង​ប្រកប​មុខ​របរ​នៅ​កម្ពុជា​ផង​ដែរ។

ក្នុង​លិខិត​នោះ​សរសេរ​ថា៖«នេះ​ស​បញ្ជាក់​អំពី​គុណធម៌​ដ៏​ប្រពៃ​របស់​ថ្នាក់​ដឹកនាំ​កម្ពុជា​ចំពោះ​អង្គ​ព្រះ​មហាក្សត្រ និង​ថ្នាក់​ដឹក​នាំ​ថៃ​»។

​​​​អ្នកនាំពាក្យ​រាជរដ្ឋាភិបាល​កម្ពុជា​ បញ្ជាក់​ថា​ទោះ​បី​កម្ពុជា​តូច ប្រជាជន​តិច និង​មាន​សេដ្ឋកិច្ច​ទន់​ខ្សោយ​ ប៉ុន្តែ​ថ្នាក់ដឹកនាំ​កម្ពុជា​តែង​ប្រកាន់​ខ្ជាប់​នូវ​គោលការណ៍​ស្រឡាញ់​សន្តិភាព ការ​ដោះស្រាយ​បញ្ហា​ដោយ​សន្តិវិធី និង​ចង់​បាន​ព្រំដែន​សន្តិភាព មិត្តភាព កិច្ច​សហប្រតិបត្តិការ និង​ការ​អភិវឌ្ឍ​ ដោយ​មិន​ចាត់​ទុក​ប្រទេស​ជិត​ខាង​ ឬ​ប្រទេស​ណាមួយ​ជា​សត្រូវ​ឡើយ​។

កាលពី​ថ្ងៃទី​៦ ខែ​តុលា សម្ដេច​តេជោ ហ៊ុន សែន បង្ហោះ​នូវ​សារ​មួយ​លើ​បណ្ដាញ​សង្គម​ហ្វេសបុក​របស់​សម្ដេច​ដោយ​បង្ហាញ​វីដេអូ​ដែល​ពលរដ្ឋ​ថៃ​យក​រូប​សម្ដេច​យក​ធ្វើ​ជា​ផ្ទាំង​ស៊ើប​ជា​ការ​ប្រមាថ​ ខណៈ​សម្ដេច​បាន​ចោទ​ជា​សំណួរ​ថា​តើ​នេះ​គឺ​ជា​ជនជាតិ​ស៊ីវិល័យ​មាន​គុណធម៌ សីលធម៌ និង​អរិយធម៌​ខ្ពស់? យ៉ាងណា​ក្ដី​សម្ដេច​បាន​សំណូមពរ​ដល់​ពលរដ្ឋ​ខ្មែរ​សូម​កុំ​ធ្វើ​ទង្វើ​អាក្រក់​បែបនេះ​ដែល​សម្ដេច​ថា​ជា​ទង្វើ​អមនុស្ស និង​អន់​ជាង​សត្វ មិន​ថា​វីដេអូ​នេះ​ធ្វើ​ដោយ​មនុស្ស​ផ្ទាល់ ឬ​ដោយ AI គឺ​សុទ្ធ​តែ​បង្ហាញ​នូវ​អំពើ​អាក្រក់​ទាំងអស់​មិន​ថា​ជនជាតិ​ណា ឬ​ក្រុម​ណា​នោះ​ទេ៕

អត្ថបទ​ដោយ ហ៊ុន សិរីវឌ្ឍន៍ ​​

The post អ្នកនាំពាក្យ​រាជរដ្ឋាភិបាល​សោកស្ដាយ​ដែលអំពើ​ប្រមាថ​នៅ​តែ​កើតមានដោយសេរីនៅប្រទេសថៃ appeared first on Kampuchea Thmey Daily.

លោក ប៉ែន បូណា បន្ថែមថា ខ្មែរយើងធ្លាប់កំសត់ពេកហើយ ធ្លាប់បែកបាក់គ្នាអស់ចិត្តហើយ ហើយប្រទេសយើងធ្លាប់ ធ្លាក់ដល់ចំណុចទាបបំផុតក្នុងប្រវត្តិសាស្ត្ររួចហើយ។ យើងក៏ធ្លាប់ត្រូវគេមើលងាយគ្រប់គ្រាន់ហើយដែរ។ដូច្នេះ នេះជាពេលវេលាល្អណាស់ដែលខ្មែរត្រូវរួមគ្នាជាធ្លុងមួយនៅពីក្រោយថ្នាក់ដឹកនាំ និងកងទ័ពដើម្បីផ្លាស់ប្តូររូបភាពប្រទេសយើងនៅក្នុងក្រសែភ្នែកនិងផ្នត់គំនិតរបស់បរទេស។

ការលើកឡើងរបស់អ្នកនាំពាក្យរាជរដ្ឋាភិបាល គឺបានកើតឡើងខណៈដែលប្រជាពលរដ្ឋខ្មែរពេញមួយនគរនាំគ្នាក្រោកឈរយ៉ាងស្រុះគ្នារួមជាកម្លាំងជាមួយរាជរដ្ឋាភិបាល និងកងទ័ពដ៏អង់អាចក្លាហាន ដើម្បីការពារនូវបូរណភាពទឹកដីចេញពីការឈ្លានពាន ប៉ុន្តែស្រាប់តែមានមនុស្សប៉ុន្មាននាក់ដែលអះអាងថា ខ្លួនជាខ្មែរដែរ តែបែរជាហុចដងដាវឱ្យសត្រូវទៅវិញ។

អ្នកនាំពាក្យរាជរដ្ឋាភិបាល ថា រឿងអ្វីផ្សេងយើងអាចជជែកគ្នាបាននិងចាំជជែកពេលក្រោយ តែកាលៈទេសៈនេះ ខ្មែរត្រូវរួមកម្លាំងកាយ ចិត្ត បញ្ញា ស្មារតី ដើម្បីការពារអធិបតេយ្យភាពជាតិ បូរណភាពទឹកដី និងសេចក្តីថ្លៃថ្នូររបស់ជាតិសាសន៍យើង។

លោក បន្តថា ពេលនេះយើងនៅលើទូកតែមួយ ហើយកំពុងបោះពួយទៅមុខដើម្បីកសាងប្រវត្តិសាស្ត្រថ្មីសម្រាប់កម្ពុជាសម័យទំនើប។ ដូច្នេះ សូមខ្មែរគ្រប់គ្នាទុកចិត្តលើថ្នាក់ដឹកនាំហើយជួយចូកជួយចែវ និងសូមកុំយកជើងរាទឹក៕

The post លោក ប៉ែន បូណា៖ នេះជាពេលវេលាដែលខ្មែរគ្រប់គ្នាជួយចូកជួយចែវ កុំយកជើងរាទឹក appeared first on Kampuchea Thmey Daily.