សម្ដេចធិបតី បានមានប្រសាសន៍ថា «រាជរដ្ឋាភិបាលមិនមានការកាត់បន្ថយចំណាយវិស័យអប់រំ និងវិស័យសុខាភិបាល ទៅបំពេញឱ្យតម្រូវការវិស័យការពារជាតិទេ បើទោះវិស័យការពារជាតិត្រូវកើនក៏ដោយ»។ ប្រសាសន៍របស់សម្ដេចធិបតីដូច្នេះ គឺជាការឆ្លើយតបទៅនឹងសារព័ត៌មានមួយចំនួន ដែលបានផ្សព្វផ្សាយថា រាជរដ្ឋាភិបាលកម្ពុជា នឹងកាត់ចំណាយទៅលើវិស័យអាទិភាពមួយចំនួន ដូចជាវិស័យអប់រំ និងវិស័យសុខាភិបាល ដើម្បីយកទៅបំពេញឱ្យវិស័យការពារជាតិ។

ព័ត៌មាននេះ ត្រូវបានសម្ដេចធិបតី ហ៊ុន ម៉ាណែត ប្រកាសបដិសេធ ហើយបានអះអាងថា «អត់មានការដកលុយពីអប់រំ និងសុខាភិបាល យកទៅបង្កើនឱ្យកងទ័ពនោះទេ»។

សម្ដេចនាយករដ្ឋមន្ត្រី បានគូសបញ្ជាក់ក្នុងពិធីសម្ពោធសមិទ្ធផល និងប្រគល់សញ្ញាបត្រដល់គរុសិស្ស-គរុនិស្សិតអប់រំកាយ នាព្រឹកថ្ងៃទី៣ ខែមិថុនា ឆ្នាំ២០២៦នេះថា អប់រំ និងសុខាភិបាល នៅតែជាវិស័យអាទិភាពចម្បងបំផុតរបស់រាជរដ្ឋាភិបាល បើទោះរាជរដ្ឋាភិបាលបង្កើនចំណាយទៅលើវិស័យការពារជាតិក៏ដោយ។ សម្ដេចបញ្ជាក់ច្បាស់ៗថា វិស័យទាំងពីរនេះ គឺមានតែបង្កើនបន្ថែមសម្រាប់ឆ្នាំ២០២៧ ដល់ឆ្នាំ២០២៩។

ដោយឡែកវិស័យការពារជាតិ សម្ដេចធិបតី ថា ក៏ជាអាទិភាពសំខាន់សម្រាប់ការពង្រឹងខឿនការពារប្រទេស ដែលត្រូវតែបង្កើនការចំណាយផងដែរ សម្រាប់ការអនុវត្តច្បាប់កាតព្វកិច្ចយោធា និងការកំណែទម្រង់កងទ័ព។ ក្នុងន័យនេះ សម្ដេចអះអាងថា រដ្ឋមានថវិកាគ្រប់គ្រាន់សម្រាប់បង្កើនការចំណាយលើវិស័យដែលមានសារៈសំខាន់ ហើយចាំបាច់ ពោលគឺមិនទាន់មានតម្រូវការដកការចំណាយចេញពីវិស័យអប់រំ និងសុខាភិបាលឡើយ៕

ដោយ៖ ធឿន វ៉ាន់សុង

The post សម្ដេច ហ៊ុន ម៉ាណែត ថា គ្មានការកាត់ចំណាយពីវិស័យអប់រំ និងសុខាភិបាល ទៅបង្កើនឱ្យវិស័យការពារជាតិឡើយ appeared first on Kampuchea Thmey Daily.

សមត្ថកិច្ចឃាត់ខ្លួនបុគ្គលក្លែងបន្លំភេទជាបព្វជិតដែលឈរបិណ្ឌបាតនៅមុខរោងចក្រក្នុងភូមិសាស្ត្រសង្កាត់ត្រពាំងក្រសាំង ចំនួន ៣ នាក់ និង នៅសង្កាត់ចោមចៅទី ៣ ចំនួន ៦ នាក់ ព្រមទាំងព្រះសង្ឃ ១ អង្គ ផងដែរ។

តាមការបញ្ជាក់ពីសាលាអនុគណខណ្ឌពោធិ៍សែនជ័យ បុគ្គលទាំង ៩ នាក់ ខាងលើ ត្រូវបានរកឃើញថា បានក្លែងបន្លំភេទជាបព្វជិត ដើម្បីធ្វើសកម្មភាពបិណ្ឌបាតនៅតាមទីសាធារណៈ ដែលអាចបង្កឲ្យមានការយល់ច្រឡំដល់ពុទ្ធបរិស័ទ និង ប៉ះពាល់តម្លៃរបស់ព្រះពុទ្ធសាសនា។

បន្ទាប់ពីសាកសួរ និង ពិនិត្យអត្តសញ្ញាណ សាលាអនុគណ បានប្រគល់បុគ្គលក្លែងបន្លំទាំង ៩ នាក់ ជូនសមត្ថកិច្ច ដើម្បីបន្តនីតិវិធីស្របតាមច្បាប់។ ចំណែកព្រះសង្ឃ ១ អង្គ ត្រូវបានអប់រំណែនាំអំពីធម៌វិន័យ និង ធ្វើកិច្ចសន្យាជាមួយសាលាអនុគណ ដោយស្តីពីការបិណ្ឌបាតនៅតាមទីអគោចរដ្ឋានដែលមិនសមស្របតាមព្រះធម៌វិន័យ៕
អត្ថបទ ៖ សំណាង

The post ឃាត់ខ្លួនបុគ្គលក្លែងបន្លំជាសង្ឃចំនួន ៩ នាក់ និង អប់រំព្រះសង្ឃ ១ អង្គ appeared first on Kampuchea Thmey Daily.

លោក លី សារី បានឲ្យដឹងថា ការចុះអប់រំផ្សព្វផ្សាយ នាពេលនេះ ដើម្បីពញ្ញាក់ស្មារតីដល់អ្នកប្រើប្រាស់ផ្លូវទាំងឡាយឲ្យយល់ដឹងអំពីផលប៉ះពាល់ នៃគ្រោះថ្នាក់ចរាចរណ៍ និង ត្រូវយកចិត្តទុកដាក់គោរពច្បាប់ស្តីពីចរាចរណ៍ផ្លូវគោកឲ្យបានខ្ជាប់ខ្ជួន សំដៅរួមគ្នាកាត់បន្ថយគ្រោះថ្នាក់ចរាចរណ៍ឲ្យមកនៅកម្រិតទាប ដែលនេះគឺជាផ្នែកមួយដ៏សំខាន់ ដើម្បីឈានទៅចូលរួមលុបបំបាត់សកម្មភាពអនាធិបតេយ្យ នៃការធ្វើចរាចរណ៍តាមដងផ្លូវសាធារណៈ និង ជំរុញការអនុវត្តច្បាប់ឲ្យទទួលបានលទ្ធផលជាវិជ្ជមាន។

លោក លី សារី ក៏បានណែនាំដល់អ្នកបើកបរយានយន្តគ្រប់ប្រភេទដែលធ្វើដំណើរនៅលើដងផ្លូវឲ្យចូលរួមគោរពច្បាប់ចរាចរណ៍ , បើកបរគោរពស្លាកសញ្ញា , គំនូសសញ្ញា , ភ្លើងសញ្ញាចរាចរណ៍ , ពាក់មួកសុវត្ថិភាព , ខ្សែក្រវាត់សុវត្ថិភាព ឲ្យបានត្រឹមត្រូវគ្រប់ពេលធ្វើដំណើរ។ លោកបន្ថែមថា ដើម្បីចូលរួមកាត់បន្ថយអត្រាគ្រោះថ្នាក់ចរាចរណ៍ផ្លូវគោក សូមសាធារណជនដែលជាអ្នកប្រើប្រាស់ដងផ្លូវទាំងអស់ សូមយកចិត្តទុកដាក់ និង ប្រុងប្រយ័ត្នឲ្យបានខ្ពស់គ្រប់ពេលដែលធ្វើដំណើរនៅលើដងផ្លូវ ចូលរួមគោរពច្បាប់ចរាចរណ៍ដោយស្មារតីទទួលខុសត្រូវ ដើម្បីសុវត្ថិភាពផ្ទាល់ខ្លួន និង អ្នកដទៃ។

លោកអភិបាលរងខេត្ត បានបន្តថា យុទ្ធនាការចែកមួកសុវត្ថិភាពដល់ប្រជាពលរដ្ឋធ្វើដំណើរតាមដងផ្លូវ គឺជាសកម្មភាពសង្គមដ៏សំខាន់មួយ ដើម្បីកាត់បន្ថយអត្រាគ្រោះថ្នាក់ចរាចរណ៍ និង លើកកម្ពស់ការយល់ដឹងអំពីច្បាប់ចរាចរណ៍នៅកម្ពុជា។ សកម្មភាពទាំងនេះ មានគោលដៅសំខាន់ក្នុងការការពារអាយុជីវិត និង កាត់បន្ថយការរងរបួសក្បាលធ្ងន់ធ្ងរនៅពេលមានគ្រោះថ្នាក់ចរាចរណ៍។

ដោយឡែក លោក ឆែម ពេ តំណាងក្រុមហ៊ុន Ganzberg (ហ្គែនប៊ឺក) បានឲ្យដឹងដែរថា ក្រុមហ៊ុន Ganzberg (ហ្គែនប៊ឺក) មានយុទ្ធនាការចែកមួកការពារសុវត្ថិភាពចំនួន ១ ម៉ឺនមួក ដោយឥតគិតថ្លៃ ដល់ប្រជាពលរដ្ឋ ដើម្បីចូលរួមចំណែកកាត់បន្ថយគ្រោះថ្នាក់ចរាចរណ៍នៅក្នុងប្រទេសកម្ពុជា។ ការចែកមួកសុវត្ថិភាពដល់ប្រជាពលរដ្ឋ គឺជាផ្នែកមួយ នៃការចូលរួមចំណែកផ្សព្វផ្សាយពីសារៈសំខាន់ នៃការពាក់មួកសុវត្ថិភាពអំឡុងពេលបើកបរ និង ធ្វើដំណើរទាំងជិត និង ឆ្ងាយ។ ក្នុងការផ្តល់មួកសុវត្ថិភាពនេះ មានគោលបំណងបញ្ជ្រាប និង លើកកម្ពស់ចំណេះដឹងអំពីសុវត្ថិភាពចរាចរណ៍ដល់ប្រជាពលរដ្ឋ កាត់បន្ថយហានិភ័យគ្រោះថ្នាក់ នេះគឺជាសកម្មភាពសង្គមដ៏សកម្មមួយរបស់ក្រុមហ៊ុនក្នុងការជួយកាត់បន្ថយអត្រាគ្រោះថ្នាក់ផងដែរ៕
អត្ថបទ ៖ គឿនវេត

The post អនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប ចុះអប់រំផ្សព្វផ្សាយច្បាប់ចរាចរណ៍ និង ចែកមួកសុវត្ថិភាពជូនពលរដ្ឋ  appeared first on Kampuchea Thmey Daily.

លើកឡើងនៅក្នុងពិធីសម្ពោធដាក់ឱ្យប្រើប្រាស់អគារមត្តេយ្យសិក្សា ដែលស្ថិតក្នុងភូមិពោធិអណ្តោត ឃុំជើងភ្នំ ស្រុកបាភ្នំ ខេត្តព្រៃវែង នាព្រឹកថ្ងៃទី៧ ខែមេសា ឆ្នាំ២០២៦ ឧបនាយករដ្ឋមន្ត្រី ស សុខា បានបង្ហាញការកត់សម្គាល់ថា កុមារដែលបានចូលរៀនចាប់ពីថ្នាក់មត្តេយ្យសិក្សាឡើងទៅ គឺភាគច្រើនបានប្រឡងជាប់សញ្ញាបត្រមធ្យមសិក្សាទុតិយភូមិ ព្រោះថា ពួកគេមានមូលដ្ឋានគ្រឹះនៃការយល់ដឹងតាំងពីតូច ដែលធ្វើឱ្យការបន្តការសិក្សានៅថ្នាក់ខ្ពស់ៗមិនមានភាពរអាក់រអួល។

លោក បានសង្កត់ធ្ងន់ថា ការណ៍នេះក៏បានថែមទាំងជួយឱ្យកុមារមានភាពក្លាហាន និងមានវិន័យរឹងមាំក្នុងការសិក្សាជាងកុមារដែលមិនបានឆ្លងកាត់ថ្នាក់មត្តេយ្យសិក្សាផងដែរ។

ផ្អែកលើហេតុផលនេះ លោកឧបនាយករដ្ឋមន្ត្រី បានអំពាវនាវយ៉ាងទទូចដល់អាណាព្យាបាលគ្រប់រូប ដែលមានកូន ប្អូន ឬក្មួយគ្រប់អាយុចូលរៀន ត្រូវបញ្ជូនទៅចុះឈ្មោះចូលរៀនកុំបីខាន ដើម្បីកសាងមូលដ្ឋានគ្រឹះចំណេះដឹង និងអនាគតដ៏ភ្លឺស្វាងសម្រាប់កុមារគ្រប់រូប ជាពិសេសនោះដើម្បីប្រែក្លាយពួកគេឱ្យទៅជាធនធានមនុស្សដ៏មានសក្ដានុពល ដែលជាការចូលរួមចំណែកអភិវឌ្ឍសហគមន៍ ក៏ដូចជាសង្គមជាតិឱ្យកាន់តែរីកចម្រើនរុងរឿង និងប្រកបដោយសេចក្ដីថ្លៃថ្នូរ ស្របតាមយុទ្ធសាស្ត្របញ្ចកោណរបស់រាជរដ្ឋាភិបាល។

តាមការគូសបញ្ជាក់របស់លោក ស សុខា ការបញ្ជូនកូន ប្អូន ឬក្មួយ ដែលគ្រប់អាយុចូលរៀន គឺជាកាតព្វកិច្ចដ៏សំខាន់សម្រាប់អាណាព្យាបាលគ្រប់រូប ព្រោះកុមារប្រៀបដូចជាក្រដាសសមួយផ្ទាំង ដែលងាយនឹងទទួលយកនូវការអប់រំ និងការបណ្ដុះបណ្ដាល។ «បើសិនជាយើងអាចផ្ដល់នូវចំណេះដឹង និងគុណធម៌ដល់ពួកគាត់បានទាន់ពេលវេលា នោះពួកគាត់នឹងក្លាយជាពលរដ្ឋល្អ ជាសសរទ្រូងដ៏រឹងមាំដែលមានទាំងសមត្ថភាព និងសីលធម៌ ដើម្បីបន្តវេនក្នុងការដឹកនាំ និងការពារមាតុភូមិទៅថ្ងៃអនាគត»។ លោក ស សុខា លើកឡើងបន្ថែមដូច្នេះ៕

The post ការកត់សម្គាល់របស់រដ្ឋមន្ត្រីមហាផ្ទៃ កុមារបានឆ្លងកាត់ការរៀនពីថ្នាក់មត្តេយ្យ គឺភាគច្រើនប្រឡងជាប់បាក់ឌុប appeared first on Kampuchea Thmey Daily.

ការណ៍នេះ ធ្វើឡើងនៅថ្ងៃទី ២៣ ខែមីនា ឆ្នាំ២០២៦ ក្នុងឱកាស លោក ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានទទួលជួបសម្តែងការគួរសម និងសំណេះសំណាលការងារជាមួយក្រុមគណៈប្រតិភូនៃសាកលវិទ្យាល័យជុងវ៉ុន (Jungwon University) ដឹកនាំដោយលោក JANG Kiwon សាកលវិទ្យាធិការនៃសាកលវិទ្យាល័យជុងវ៉ុន នៅស្ថានទូតកម្ពុជាក្នុងទីក្រុងសេអ៊ូល។

ក្នុងជំនួបនោះ ឯកអគ្គរាជទូតកម្ពុជាប្រចាំកូរ៉េខាងត្បូង បានគូសបញ្ជាក់អំពីសារៈសំខាន់នៃវិស័យអប់រំសម្រាប់ប្រទេសកម្ពុជា ដែលប្រទេសកម្ពុជាបានយកប្រទេសកូរ៉េជាគំរូក្នុងការអភិវឌ្ឍ ពិសេសការអប់រំ ដែលវាជាវិស័យគន្លឹះក្នុងការផ្សារភ្ជាប់ទំនាក់ទំនងប្រជាជន និងប្រជាជន។ លោក ក៏បានថ្លែងអំណរគុណចំពោះសាកលវិទ្យាល័យដែលបានផ្តល់អាហារូបករណ៍ដល់និស្សិតកម្ពុជា ហើយលោក ក៏បានស្នើទៅកាន់ លោក JANG ពិចារណារផ្តល់ចំនួនអាហារូបករណ៍បន្ថែមទៀតដល់និស្សិតកម្ពុជាលើវគ្គជំនាញ វគ្គបណ្តុះបណ្តាលវិជ្ជាជីវៈ និងវគ្គសិក្សាខ្លីជាដើម។

ឆ្លងតបនេងសំណើនេះ លោក JANG បានឯកភាពនឹងសំណើរបស់ឯកអគ្គរាជទូតកម្ពុជា ក្នុងការបន្ថែមចំនួនអាហារូបករណ៍សម្រាប់និស្សិតកម្ពុជា និងបានថ្លែងអំណរគុណដល់ស្ថានទូតដែលបានភ្ជាប់ទំនាក់ទំនងរវាងសាកលវិទ្យាល័យ និងក្រសួងសំខាន់ៗចំនួន ៣ របស់ប្រទេសកម្ពុជានាពេលកន្លងមក។ លោកសាកលវិទ្យាធិការ JANG ក៏បានបង្ហាញអំពីការប្តេជ្ញាចិត្តក្នុងការពង្រឹងទំនាក់ទំនងកិច្ចសហប្រតិបត្តិការទ្វេភាគីរវាងស្ថានទូត និងសាកលវិទ្យាល័យផងដែរ៕

The post សាកលវិទ្យាល័យជុងវ៉ុន ឯកភាពនឹងសំណើក្នុងការបន្ថែមចំនួនអាហារូបករណ៍សម្រាប់និស្សិតកម្ពុជា appeared first on Kampuchea Thmey Daily.

ថ្លែងក្នុងកម្មវិធី “Building Thinking Classrooms”រៀបចំឡើងដោយ U-Book Educations Cambodiaសហការជាមួយ McGraw-Hill ដែលជាស្ថាប័នបោះពុម្ពសៀវភៅអប់រំឈានមុខគេនៅសហរដ្ឋអាមេរិកក្រោមអធិបតីភាពលោក ស្រ៊ី ថាមរុង្គ ទេសរដ្ឋមន្ត្រីទទួលបន្ទុកបេសកកម្មពិសេសនៅព្រឹកថ្ងៃទី១ វិច្ឆិកានេះ លោក បណ្ឌិត សាន វឌ្ឍនា រដ្ឋលេខាធិការក្រសួងអប់រំយុវជននិងកីឡាបានបន្តថា «ការផ្លាស់ប្តូរការអប់រំមិនមែនកើតឡើងតែម្នាក់ឯងទេ។ វាត្រូវការការខិតខំប្រឹងប្រែងរួមគ្នារបស់រដ្ឋាភិបាល សាលារៀន សហគមន៍ និងដៃគូឯកជនទាំងអស់រួបរួមគ្នាដោយជំនឿតែមួយ៖ នៅពេលដែលយើងបណ្តុះគំនិតវ័យក្មេងយើងកសាងអនាគតរបស់ប្រទេសជាតិ»។

លោកបានបន្តទៀតថា« យើងមើលឃើញថាវត្តមាន McGraw-Hill សហការជាមួយU-Book Educations Cambodiaនឹងក្លាយជាដៃគូថ្មីសម្រាប់ការចូលរួមអភិវឌ្ឍវិស័យអប់រំនៅកម្ពុជាដោយសារMcGraw-Hill មានប្រវត្តិជាយូរលង់ក្នុងការអភវឌ្ឍន៍ការសិក្សានិងមានកេរ្តិ៍ដំណែលដ៏មានមោទនភាពក្នុងការផ្តល់នូវធនធានសិក្សាលំដាប់ថ្នាក់ពិភពលោកពីសៀវភៅសិក្សាគណិតវិទ្យា និងវិទ្យាសាស្ត្រ ដែលសិស្សជំនាន់ក្រោយធំឡើងជាមួយនឹងវេទិកាឌីជីថលទំនើបដែលលើកកម្ពស់ការគិតប្រកបដោយការត្រិះរិះនិងការច្នៃប្រឌិត។ នេះជាការចូលរួមចំណែកក្នុងការបង្កើនធនធានសិក្សានៅកម្ពុជាឱ្យកាន់តែមានជម្រើសច្រើនជាងមុននិងថ្មីហើយនេះជាឱកាសអាចចាប់ដៃគូជាមួយគ្រឹះស្ថានសិក្សានៅកម្ពុជា»។

លោកបានបន្ថែមថាព្រឹត្តិការណ៍នេះ គឺជាការរម្លឹកមួយថា នៅពេលដែលយើងមកជួបជុំគ្នា នៅពេលដែលយើងគិតរួមគ្នា យើងមិនត្រឹមតែកសាងថ្នាក់រៀនដែលប្រសើរជាងមុនប៉ុណ្ណោះទេ ប៉ុន្តែកម្ពុជាកាន់តែរឹងមាំព្រោះថាភាពរុងរឿងរបស់ប្រទេសកម្ពុជាចាប់ផ្តើមពីការអប់រំ។ ប៉ុន្តែការអប់រំខ្លួនឯងចាប់ផ្តើមដោយការគិត។

លោកបានពន្យល់ថា« នៅពេលដែលយើងធ្វើឱ្យថ្នាក់រៀនគិត យើងធ្វើឱ្យការអប់រំពិតជាចាប់ផ្តើម ព្រោះការរៀនមិនចាប់ផ្តើមពីការទន្ទេញចម្លើយនោះទេ។ វាចាប់ផ្តើមដោយភាពក្លាហានក្នុងការសួរសំណួរ »។

លោកបានបញ្ជាក់ថាលើសពីនេះទៀតវាក៏នាំមកនូវបទពិសោធន៍អន្តរជាតិ និងចំណង់ចំណូលចិត្តក្នុងស្រុក ជួយគ្រូបង្រៀន និងសិស្សកម្ពុជាឱ្យទទួលបានឧបករណ៍ដែលបំផុសគំនិតមិនត្រឹមតែការសិក្សាប៉ុណ្ណោះទេ ប៉ុន្តែថែមទាំងការស្រមើស្រមៃទៀតផង។ជាមួយគ្នានេះដែរព្រឹត្តិការណ៍នេះជាការកសាងថ្នាក់រៀនគិតគឺទាន់ពេលវេលា និងប្រកបដោយចក្ខុវិស័យ។វាជំរុញឱ្យយើងផ្លាស់ប្តូរថ្នាក់រៀនទៅជាកន្លែងដែលសិស្សសហការ ចូលរួម និងគិតពិចារណា។

លោករដ្ឋលេខាធិការបានបន្ថែមទៀតថា« វារំឭកយើងថា ការរៀនសូត្រពិតប្រាកដមិនកើតឡើងនៅពេលដែលសិស្សនិយាយឡើងវិញនូវអ្វីដែលយើងនិយាយនោះទេ ប៉ុន្តែនៅពេលដែលពួកគេចាប់

ផ្តើមគិតដោយខ្លួនឯង។ខ្ញុំជឿថាស្មារតីពិតនៃព្រឹត្តិការណ៍នេះដើម្បីកសាងថ្នាក់រៀនដែលជាកន្លែងដែលការគិតមិនមែនជាឯកសិទ្ធិមួយ, ប៉ុន្តែជាទម្លាប់មួយ; កន្លែងដែលការរៀនមិនមែនអំពីចម្លើយទេ ប៉ុន្តែជាការរកឃើញ។

លោក អេរីក ហោ, នាយក U-Book Educations Cambodiaបានលើកឡើងថាព្រឹត្តិការណ៍នេះរៀបចំឡើងក្នុងគោលបំណងបង្កើតការយល់ដឹងទៅវិញទៅមកដោយផ្អែកទៅលើបញ្ហាប្រឈមចម្បងនិងជាក់ស្ដែងដោយអ្នកអប់រំនៅជុំវិញពិភពលោកំពុងជួបប្រទះហើយជាឱកាសដ៏កម្រ សម្រាប់អ្នកដឹកនាំសាលាជាតិ និងអន្តរជាតិ ព្រមទាំងអ្នកជំនាញក្នុងវិស័យអប់រំនៅអាស៊ី ក្នុងការផ្លាស់ប្ដូរបទពិសោធន៍ និងពង្រឹងគុណភាព វិស័យអប់រំនៅកម្ពុជាឱ្យកាន់តែប្រសើរឡើង។

លោកបានបន្តទៀតថាលើសពីនេះទៀតការរៀបចំព្រឹត្តិការណ៍នេះ ក៏ជាជំហានសំខាន់មួយព្រោះវាមិនត្រឹមតែជួយណែនាំប្រទេសកម្ពុជាដល់ស្ថាប័នបោះពុម្ពសៀវភៅឈានមុខគេលើពិភពលោកប៉ុណ្ណោះទេ ហើយថែមទាំងផ្តល់ឱកាសដ៏ពិសេសសម្រាប់គ្រូបង្រៀន និងអ្នកជំនាញក្នុងវិស័យអប់រំក្នុងការចែករំលែកបទពិសោធន៍ហើយមិនត្រឹមតែប៉ុណ្ណោះអ្នកអប់រំទាំងអស់អាចស្វែងយល់អំពីសៀវភៅនិងឧបករណ៍សម្រាប់សិក្សារថ្មីៗនិងទំនើបៗ ដែលអាចឆ្លើយតបតាមតម្រូវការរបស់ពួកគេបានផងដែរ៕

អត្ថបទ៖សំអឿន

The post មន្ត្រីជាន់ខ្ពស់៖ ការផ្លាស់ប្តូរការអប់រំមិនមែនកើតឡើងតែម្នាក់ឯងទេ ត្រូវការការប្រឹងប្រែងរួមគ្នាទើបទទួលបានជោគជ័យ appeared first on Kampuchea Thmey Daily.

កម្មវិធី​នេះ​បាន​ប្រព្រឹត្ត​ឡើង​ក្រោម​ការ​ចង្អុលបង្ហាញ​ពី​លោក​វរសេនីយ៍ឯក ម៉ន វុធី អធិការ​នគរបាល​ខណ្ឌ​ពោធិ៍​សែន​ជ័យ និង​ការ​ដឹកនាំ​ផ្ទាល់​ពី​លោក​វរសេនីយ៍ត្រី ជឿន សារ៉ុម អធិការ​រង​ទទួល​បន្ទុក​ផ្នែក​គ្រឿងញៀន។

នា​ឱកាស​នោះ លោក​វរសេនីយ៍ត្រី ជ្រេង ធី នាយ​ប៉ុស្តិ៍​នគរបាល​រដ្ឋបាល​សង្កាត់​កាកាប​ទី ២ បាន​ឲ្យ​ដឹង​ថា លោក​បាន​ដឹកនាំ​ក្រុម​មន្ត្រី​ប៉ុស្តិ៍​ចូលរួម​ផ្សព្វផ្សាយ និង​អប់រំ​សិស្ស​អំពី​គ្រោះថ្នាក់ នៃ​ការ​ប្រើប្រាស់​គ្រឿងញៀន និង​បារី​អេឡិចត្រូនិក​ដែល​បណ្ដាល​ឲ្យ​ប៉ះពាល់​ដល់​សុខភាព និង​អនាគត​របស់​យុវជន​ជាតិ។

ក្រៅពី​នេះ លោក​នាយ​ប៉ុស្តិ៍ បាន​ផ្តល់​ការ​អប់រំ​សិស្ស​អំពី​ការ​បង្កើត​ទំនៀមទម្លាប់​ល្អ ការ​អភិវឌ្ឍ​ស្មារតី​ទំនួល​ខុសត្រូវ​ចំពោះ​សង្គម ការ​គោរព​ច្បាប់​ចរាចរណ៍ និង​ការ​ចូលរួម​ជា​សហ​ប្រជាជន​ល្អ​ក្នុង​ការ​រក្សា​សុវត្ថិភាព​សង្គម​តាម​គោលនយោបាយ “​ភូមិ-ឃុំ មាន​សុវត្ថិភាព​”។

លោក​ក៏បាន​អំពាវនាវ​ឲ្យ​សិស្ស​ទាំងអស់​ប្រកាន់ខ្ជាប់​លើ​អត្តចរិត​ល្អ រួម​ទាំង​ជៀសវាង​ពី​អាកប្បកិរិយា​មិនល្អ និង​ការ​រួមចំណែក​ក្នុង​ការ​ការពារ​សុវត្ថិភាព​សាលា សហគមន៍ និង​សង្គម​ទាំងមូល ផង​ដែរ។

គួរ​ជម្រាប​ថា កម្មវិធី​នេះ​មាន​ការ​ចូលរួម​ពី​លោកស្រី​នាយក​សាលា​មី​គី​វ៉េ លោកគ្រូ អ្នកគ្រូ លោក​នាយ​រង​ប៉ុស្តិ៍ និង​មន្ត្រី​ប៉ុស្តិ៍​នគរបាល​សង្កាត់​កា​កាប​ទី ២ ព្រមទាំង​មាន​សិស្ស​សាលា​មី​គី​វ៉េ ចំនួន ២៨ នាក់ ស្រី ១៦ នាក់ ឲ្យ​មាន​ការ​យល់ដឹង​ថ្មីៗ អំពី​គ្រោះថ្នាក់ នៃ​គ្រឿងញៀន និង​បារី​អេឡិចត្រូនិក៕

អត្ថបទ ៖ សំណាង

The post ប៉ុស្តិ៍នគរបាលរដ្ឋបាលសង្កាត់កាកាបទី ២ បន្តផ្សព្វផ្សាយអប់រំសិស្សអំពី គ្រោះថ្នាក់គ្រឿងញៀន និងបារីអេឡិចត្រូនិក appeared first on Kampuchea Thmey Daily.

សាកលវិទ្យាល័យភូមិន្ទភ្នំពេញ បានបញ្ជាក់លើទំព័រហ្វេសប៊ុកផ្លូវការថា សិស្សដែលមានបំណងបន្តការសិក្សាក្នុងរូបភាពបង់ថ្លៃ ថ្នាក់បរិញ្ញាបត្រ ឆ្នាំសិក្សា២០២៥-២០២៦ នេះ សាកលវិទ្យាល័យមាន កម្មវិធី ១+៣ ផ្ដល់នូវវគ្គសិក្សាថ្មីមួយដែលសិក្សាឆ្នាំមូលដ្ឋាន (ឆ្នាំទី១) នៅសាកលវិទ្យាល័យភូមិន្ទភ្នំពេញ និង ៣ឆ្នាំបន្ទាប់នៅសាកលវិទ្យាល័យ Angelo State រដ្ឋតិចសាស សហរដ្ឋអាមេរិក។ ចំណែក កម្មវិធី ២+២ គឺសិក្សានៅ ស.ភ.ភ.ព. រយៈពេល ២ឆ្នាំ និងនៅ Angelo State រយៈពេល ២ឆ្នាំ លើមុខជំនាញ ចំនួន១៨។

ដើម្បីទាញយកពាក្យ អាចចូលតំណកញ្ចប់ព័ត៌មាន ៖ (bit.ly/intake2526asu-rupp) ១.ពាក្យស្នើសុំប្រឡង ២.សលាកបត្រឯកត្តជន ៣.ព័ត៌មានទូទៅទាក់ទងនឹងជំនាញ និងមុខវិជ្ជាសិក្សា និង ៤.សេចក្តីជូនដំណឹងផ្លូវការ។

បើនិយាយពីលក្ខខណ្ឌចុះឈ្មោះប្រឡងចូល បេក្ខជនត្រូវមានសញ្ញាបត្រមធ្យមសិក្សាទុតិយភូមិ ឬមានតម្លៃស្មើ។ មានកម្រិតភាសាអង់គ្លេស IELTS 6.0/TOEFL ITP: 550/TOEFL iBT:60/Doulingo:96  ឡើងទៅ (បេក្ខជនអាចផ្តល់ពិន្ទុកម្រិតភាសាអង់គ្លេសនៅពេលក្រោយដាក់ពាក្យទៅសិក្សាឆ្នាំទី២ ឬទី៣ នៅអាមេរិក)។ បេក្ខជនត្រូវឆ្លងកាត់ការប្រឡងជ្រើសរើស។ ចំពោះការដាក់ពាក្យសុំសិទ្ធប្រឡង ត្រូវបង់ប្រាក់ ៤០០,០០០រៀល។

សូមអានខាងក្រោម ដើម្បីដឹងពីព័ត៌មានលម្អិត និងមុខជំនាញសិក្សា រួមទាំងការបង់ថ្លៃសិក្សានៅសាកលវិទ្យាល័យភូមិន្ទក្នុងកម្មវិធីនេះ ៖

The post សាកលវិទ្យាល័យភូមិន្ទភ្នំពេញ ប្រកាសរើសនិស្សិតចូលរៀន និងបន្តទៅសិក្សានៅអាមេរិកតាមរយៈការបង់ថ្លៃ appeared first on Kampuchea Thmey Daily.