ព័ត៌មានជាតិ

ប៉ុស្តិ៍នគរបាលរដ្ឋបាលសង្កាត់កាកាបទី ២ បន្តផ្សព្វផ្សាយអប់រំសិស្សអំពី គ្រោះថ្នាក់គ្រឿងញៀន និងបារីអេឡិចត្រូនិក

បានផុស

៩ ខែ មុន

នៅ

ថ្ងៃព្រហស្បតិ៍ ៣០ តុលា ២០២៥

ដោយ

នាព្រឹកថ្ងៃទី ៣០ ខែតុលា ឆ្នាំ ២០២៥ នេះ ប៉ុស្តិ៍នគរបាលរដ្ឋបាលសង្កាត់កាកាបទី ២ នៃអធិការដ្ឋាននគរបាលខណ្ឌពោធិ៍សែនជ័យ បានបន្តចុះផ្សព្វផ្សាយកម្មវិធីអប់រំសាធារណៈ ស្ដីពី“ផលប៉ះពាល់ នៃការប្រើប្រាស់គ្រឿងញៀន និងបារីអេឡិចត្រូនិក ក្មេងទំនើង ច្បាប់ចរាចរណ៍ និងការរួមចំណែករក្សាភូមិ-ឃុំ មានសុវត្ថិភាព” ដល់សិស្សសាលាមីគីវ៉េ ស្ថិតនៅភូមិក្បាលដំរី ២ សង្កាត់កាកាបទី ២ ខណ្ឌពោធិ៍សែនជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្មវិធីនេះបានប្រព្រឹត្តឡើងក្រោមការចង្អុលបង្ហាញពីលោកវរសេនីយ៍ឯក ម៉ន វុធី អធិការនគរបាលខណ្ឌពោធិ៍សែនជ័យ និងការដឹកនាំផ្ទាល់ពីលោកវរសេនីយ៍ត្រី ជឿន សារ៉ុម អធិការរងទទួលបន្ទុកផ្នែកគ្រឿងញៀន។

នាឱកាសនោះ លោកវរសេនីយ៍ត្រី ជ្រេង ធី នាយប៉ុស្តិ៍នគរបាលរដ្ឋបាលសង្កាត់កាកាបទី ២ បានឲ្យដឹងថា លោកបានដឹកនាំក្រុមមន្ត្រីប៉ុស្តិ៍ចូលរួមផ្សព្វផ្សាយ និងអប់រំសិស្សអំពីគ្រោះថ្នាក់ នៃការប្រើប្រាស់គ្រឿងញៀន និងបារីអេឡិចត្រូនិកដែលបណ្ដាលឲ្យប៉ះពាល់ដល់សុខភាព និងអនាគតរបស់យុវជនជាតិ។

ក្រៅពីនេះ លោកនាយប៉ុស្តិ៍ បានផ្តល់ការអប់រំសិស្សអំពីការបង្កើតទំនៀមទម្លាប់ល្អ ការអភិវឌ្ឍស្មារតីទំនួលខុសត្រូវចំពោះសង្គម ការគោរពច្បាប់ចរាចរណ៍ និងការចូលរួមជាសហប្រជាជនល្អក្នុងការរក្សាសុវត្ថិភាពសង្គមតាមគោលនយោបាយ “ភូមិ-ឃុំ មានសុវត្ថិភាព”។

លោកក៏បានអំពាវនាវឲ្យសិស្សទាំងអស់ប្រកាន់ខ្ជាប់លើអត្តចរិតល្អ រួមទាំងជៀសវាងពីអាកប្បកិរិយាមិនល្អ និងការរួមចំណែកក្នុងការការពារសុវត្ថិភាពសាលា សហគមន៍ និងសង្គមទាំងមូល ផងដែរ។

គួរជម្រាបថា កម្មវិធីនេះមានការចូលរួមពីលោកស្រីនាយកសាលាមីគីវ៉េ លោកគ្រូ អ្នកគ្រូ លោកនាយរងប៉ុស្តិ៍ និងមន្ត្រីប៉ុស្តិ៍នគរបាលសង្កាត់កាកាបទី ២ ព្រមទាំងមានសិស្សសាលាមីគីវ៉េ ចំនួន ២៨ នាក់ ស្រី ១៦ នាក់ ឲ្យមានការយល់ដឹងថ្មីៗ អំពីគ្រោះថ្នាក់ នៃគ្រឿងញៀន និងបារីអេឡិចត្រូនិក៕

អត្ថបទ ៖ សំណាង