ឃាត់ខ្លួនបុគ្គលក្លែងបន្លំជាសង្ឃចំនួន ៩ នាក់ និង អប់រំព្រះសង្ឃ ១ អង្គ

នៅព្រឹកថ្ងៃទី ២២ ខែឧសភា ឆ្នាំ ២០២៦ នេះ សាលាអនុគណខណ្ឌពោធិ៍សែនជ័យ សហការជាមួយរដ្ឋបាលសង្កាត់ចោមចៅទី ៣ រដ្ឋបាលសង្កាត់សំរោងក្រោម ប៉ុស្តិ៍នគរបាលរដ្ឋបាលសំរោងក្រោម រដ្ឋបាលសង្កាត់ត្រពាំងក្រសាំង ឃាត់ខ្លួនបុគ្គលក្លែងបន្លំភេទជាបព្វជិតចំនួន ៩ នាក់ និង អប់រំព្រះសង្ឃ ១ អង្គ ដោយណែនាំតាមធម៌វិន័យ និង ធ្វើកិច្ចសន្យាជាមួយសាលាអនុគណអំពីការបិណ្ឌបាតតាមទីអគោចរដ្ឋាន។

សមត្ថកិច្ចឃាត់ខ្លួនបុគ្គលក្លែងបន្លំភេទជាបព្វជិតដែលឈរបិណ្ឌបាតនៅមុខរោងចក្រក្នុងភូមិសាស្ត្រសង្កាត់ត្រពាំងក្រសាំង ចំនួន ៣ នាក់ និង នៅសង្កាត់ចោមចៅទី ៣ ចំនួន ៦ នាក់ ព្រមទាំងព្រះសង្ឃ ១ អង្គ ផងដែរ។

តាមការបញ្ជាក់ពីសាលាអនុគណខណ្ឌពោធិ៍សែនជ័យ បុគ្គលទាំង ៩ នាក់ ខាងលើ ត្រូវបានរកឃើញថា បានក្លែងបន្លំភេទជាបព្វជិត ដើម្បីធ្វើសកម្មភាពបិណ្ឌបាតនៅតាមទីសាធារណៈ ដែលអាចបង្កឲ្យមានការយល់ច្រឡំដល់ពុទ្ធបរិស័ទ និង ប៉ះពាល់តម្លៃរបស់ព្រះពុទ្ធសាសនា។

បន្ទាប់ពីសាកសួរ និង ពិនិត្យអត្តសញ្ញាណ សាលាអនុគណ បានប្រគល់បុគ្គលក្លែងបន្លំទាំង ៩ នាក់ ជូនសមត្ថកិច្ច ដើម្បីបន្តនីតិវិធីស្របតាមច្បាប់។ ចំណែកព្រះសង្ឃ ១ អង្គ ត្រូវបានអប់រំណែនាំអំពីធម៌វិន័យ និង ធ្វើកិច្ចសន្យាជាមួយសាលាអនុគណ ដោយស្តីពីការបិណ្ឌបាតនៅតាមទីអគោចរដ្ឋានដែលមិនសមស្របតាមព្រះធម៌វិន័យ៕
អត្ថបទ ៖ សំណាង