អាកាសធាតុ Archives - Kampuchea Thmey Daily

ប្រធានសភាថា ប្រជាជនគឺជាស្នូលនៃការគិតគូរទាំងអស់ដោយមិនត្រូវបោះបង់អ្នកណាម្នាក់ចោលឡើយ

hun sirivadh — Tue, 26 May 2026 09:14:36 +0000

ប្រធានសភាកម្ពុជា សម្ដេចសភាធិបតី ឃួន សុដារី បានជំរុញឱ្យមានការពង្រឹងតួនាទីរបស់ស្ថាប័ននានាធ្វើឱ្យការប្ដេជ្ញាចិត្តផ្នែកបរិស្ថានទៅជាសកម្មភាពជាក់ស្ដែង។ សម្ដេចថាច្បាប់និងគោលនយោបាយនានាដែលអនុវត្តដាច់ខាតត្រូវយកប្រជាជនជាស្នូល ធានាការពារជីវភាពរស់នៅ គាំទ្រសហគមន៍ងាយរងគ្រោះបំផុត ដើម្បីលើកកម្ពស់កំណើនបៃតង និងមិនបោះបង់នរណាម្នាក់ចោលឡើយ។

សម្ដេចលើកឡើងបែបនេះក្នុងជំនួបមួយជាមួយប្រតិភូនៃសមាជិកអាយប៉ា និងវាគ្មិនអន្តរជាតិដែលបានចូលជួបសម្ដែងការគួរសម មុនពេលបើកសន្និសីទសភាជាតិស្ដីពីអភិបាលកិច្ចអាកាសធាតុដែលរៀបចំឡើងដោយរដ្ឋសភាកម្ពុជានៅព្រឹកថ្ងៃទី២៦ ខែឧសភា ឆ្នាំ២០២៦នេះ។

ក្នុងជំនួបនោះសម្ដេចសភាធិបតី ឃួន សុដារី បានទាញចំណាប់អារម្មណ៍លើសកម្មភាពឆ្លើយតបនឹងការប្រែប្រួលអាកាសធាតុដោយថាគ្រប់ការអនុវត្តទាំងអស់គឺដាច់ខាតត្រូវយកប្រជាជនជាស្នូល។ សម្ដេចបន្ថែមថាសម្រាប់ស្ថាប័នសភាតំណាងឱ្យប្រជាពលរដ្ឋ ការរួមចំណែកជួយដល់ពលរដ្ឋ គឺធ្វើឡើងតាមរយៈការរៀបចំនិងអនុម័តច្បាប់ស្ដីពីការប្រែប្រួលអាកាសធាតុប្រកបដោយប្រសិទ្ធភាព ការអនុម័តនិងតម្រង់ទិសកញ្ចប់ថវិកាជាតិឆ្ពោះទៅរកការវិនិយោគបៃតង ការពង្រឹងការត្រួតពិនិត្យ ការលើកកម្ពស់តម្លាភាពលើការអនុវត្តរបស់រដ្ឋាភិបាល ព្រមទាំងការកសាងទំនុកចិត្ត និងកៀរគរការចូលរួមយ៉ាងទូលំទូលាយពីសាធារណជន។

សម្ដេចថា៖ «សកម្មភាពឆ្លើយតបនឹងការប្រែប្រួលអាកាសធាតុមិនអាចជោគជ័យបានឡើយ ប្រសិនបើគ្មានការរួមគ្នារវាងរដ្ឋាភិបាល វិស័យឯកជន សង្គមស៊ីវិល សហគមន៍មូលដ្ឋាន និងយុវជន។ ភាពជាដៃគូដ៏រឹងមាំនេះ គឺជាគន្លឹះក្នុងការប្រែក្លាយច្បាប់ និងគោលនយោបាយនានា ទៅជាការអនុវត្តជាក់ស្តែង ដោយដាច់ខាតត្រូវយកប្រជាជនជាស្នូល ធានាការការពារជីវភាពរស់នៅ គាំទ្រសហគមន៍ងាយរងគ្រោះបំផុត លើកកម្ពស់កំណើនបៃតង និងមិនបោះបង់នរណាម្នាក់ចោលឡើយ»។

អនុប្រធានសភាប្រឹក្សាប្រជាជននៃសាធារណរដ្ឋឥណ្ឌូណេស៊ី និងជាតំណាងឱ្យគណៈប្រតិភូអាយប៉ាដែលបានចូលជួបសម្ដេចសភាធិបតីព្រឹកថ្ងៃអង្គារនេះលោក Eddy Soeparno បានគាំទ្រចំពោះទស្សនវិស័យសម្ដេចប្រធានសភាដោយថាពេលនេះបណ្ដាប្រទេសនៅតំបន់អាស៊ានត្រួវទទួលស្គាល់ថាបញ្ហាអាកាសធាតុក្នុងតំបន់នេះវាបានឈានហួសពីពាក្យថាការប្រែប្រួលអាកាសធាតុហើយ។

លោកថា៖ «បញ្ហាអាកាសធាតុនៅក្នុងតំបន់អាស៊ីអាគ្នេយ៍បច្ចុប្បន្ន បានឈានហួសពីពាក្យ «ការប្រែប្រួលអាកាសធាតុ» ហើយវាបានក្លាយជា «វិបត្តិអាកាសធាតុ» ដ៏ស្រួចស្រាវ ដែលទាមទារឱ្យគ្រប់បណ្តាប្រទេសក្នុងតំបន់អាស៊ានទទួលស្គាល់ការពិត និងដាក់ចេញនូវភារកិច្ចពិសេសរៀងៗខ្លួនដើម្បីជម្នះវិបត្តិនេះ»។

លោក Eddy ក៏វាយតម្លៃខ្ពស់ចំពោះគំនិតផ្ដួចផ្ដើមរបស់សភាកម្ពុជាក្នុងការរៀបចំសន្និសីទស្ដីពីអភិបាលកិច្ចអាកាសធាតុនៅថ្ងៃនេះដោយថាជាវេទិកាដ៏មានតម្លៃក្នុងការបន្តកិច្ចសន្ទនា និងពង្រឹងកិច្ចសហប្រតិបត្តិការក្នុងតំបន់ទាំងលើការបន្ស៊ាំ និងការកាត់បន្ថយ ឥទ្ធិពលនៃវិបត្តិអាកាសធាតុជាសាកលនេះផងដែរ។

សូមជម្រាបថា សន្និសីទសភាជាតិស្តីពីអភិបាលកិច្ចអាកាសធាតុ មានការអញ្ជើញចូលរួមពីសមាជិក សមាជិកាព្រឹទ្ធសភា រដ្ឋសភា ដៃគូអភិវឌ្ឍន៍ស្ថាប័នស្រាវជ្រាវ គ្រឹះស្ថានឧត្តមសិក្សា និងថ្នាក់ដឹកនាំ និងមន្រ្តីជំនាញនៃអគ្គលេខាធិការដ្ឋានសភាទាំងពីរ ក្រោមកិច្ចសហការរៀបចំ និងឧបត្ថម្ភដោយអគ្គលេខាធិការដ្ឋានរដ្ឋសភា លេខាធិការដ្ឋានអាយប៉ា និងមូលនិធិប្រែប្រួលអាកាសធាតុ (Tara Climate Change) ៕

អត្ថបទដោយ ហ៊ុន សិរីវឌ្ឍន៍

The post ប្រធានសភាថា ប្រជាជនគឺជាស្នូលនៃការគិតគូរទាំងអស់ដោយមិនត្រូវបោះបង់អ្នកណាម្នាក់ចោលឡើយ appeared first on Kampuchea Thmey Daily.

ខេត្តរតនគិរី នឹងមានភ្លៀងធ្លាក់លាយឡំខ្យល់កន្ត្រាក់ ចំនួន ២ ថ្ងៃទៀត

អ៊ិន ពិសី — Sat, 07 Mar 2026 02:26:14 +0000

ភ្លៀងចាប់ផ្ដើមធ្លាក់នៅល្ងាចថ្ងៃទី ០៦ ខែមីនា ឆ្នាំ ២០២៦ រហូតដល់ថ្ងៃទី ០៨ ខែមីនា ឆ្នាំ ២០២៦។ ការមានភ្លៀងធ្លាក់នេះ នឹងបន្តអូសបន្លាយចំនួន ០២ ថ្ងៃ បន្តទៅមុខទៀត ដែលបណ្ដាលមកពីខេត្តរតនគិរីទទួលរងទ្រនុងសម្ពាធខ្ពស់ បាននិងកំពុងមានឥទ្ធិពលមកលើខេត្តនេះ។ នេះបើយោងតាមការព្យាករណ៍ធាតុអាកាសរបស់មន្ទីរធនធានទឹក និងឧតុនិយមខេត្តភូមិភាគឦសាននេះ។

យោងតាមសេចក្ដីជូនដំណឹងរបស់មន្ទីរធនធានទឹក និងឧតុនិយមខេត្តរតនគិរី ស្ថានភាពអាកាសធាតុបែបនេះ នឹងធ្វើឲ្យសីតុណ្ហភាពស្ថិតនៅចន្លោះ ពី ២១ °C ទៅ ៣២ °C ខ្យល់បក់មកពីទិសបូព៌ និង មានល្បឿនពី ១ ទៅ ៤ ម៉ែត្រ/វិនាទី ដែលមិនត្រឹមតែមានភ្លៀងធ្លាក់ប៉ុណ្ណោះទេ ក៏លាយឡំជាផ្គររន្ទះ និងខ្យល់ផងដែរ។

ស្ថានភាពជាក់ស្ដែង នៅព្រឹកថ្ងៃទី ០៧ ខែមីនា ឆ្នាំ ២០២៦ នេះ មេឃស្រទំ មុនមានខ្យល់បក់ មេឃមានពពកតិចតួច ព្រះអាទិត្យរះល្អ បញ្ចេញពន្លឺក្តៅខ្លាំងរហូតដល់ថ្ងៃត្រង់។ ចំណែករសៀល ធាតុអាកាសប្រែប្រួល មេឃមានពពកច្រើន មានខ្យល់បក់បោកខ្លាំង រហូតដល់ពេលយប់ នឹងមានភ្លៀងធ្លាក់នៅតាមក្រុងបានលុង និងបណ្ដាស្រុកមួយចំនួនទៀត។

អាកាសធាតុបែបនេះ អាជ្ញាធរ ក៏បានអំពាវនាវដល់ប្រជាពលរដ្ឋរស់នៅខេត្តរតនគិរីទាំងអស់ សូមមេត្តាថែរក្សាអនាម័យ រស់នៅស្អាត និងប្រុងប្រយ័ត្នចំពោះការហូបចុកម្ហូបអាហារ ដើម្បីបង្ការការកើតជំងឺរាករូស និងកើតជំងឺឆ្លងផ្សេងៗ ជាពិសេសត្រូវប្រុងប្រយ័ត្នចំពោះភ្លើងឆេះផ្ទះសម្បែង ឬ ឆេះដីចម្ការ និងខ្យល់កន្ត្រាក់ជាដើម៕

អត្ថបទ ៖ ខៀវ ចាប

The post ខេត្តរតនគិរី នឹងមានភ្លៀងធ្លាក់លាយឡំខ្យល់កន្ត្រាក់ ចំនួន ២ ថ្ងៃទៀត appeared first on Kampuchea Thmey Daily.

ខេត្តរតនគិរី ភាគឦសាននឹងមានភ្លៀងធ្លាក់កក់ខែ៣ថ្ងៃជាប់គ្នាជាមួយផ្គររន្ទះ

Samean Lay — Sat, 28 Feb 2026 02:22:34 +0000

ខេត្តរតនគិរី ដែលស្ថិតនៅភូមិភាគឦសាននៃប្រទេសកម្ពុជា នឹងមានភ្លៀងធ្លាក់លាយឡំជាមួយផ្គររន្ទះរយៈពេល ៣ថ្ងៃជាប់គ្នា ចាប់ពីថ្ងៃទី២៨ ខែកុម្ភៈ ដល់ថ្ងៃទី០២ ខែមីនា ឆ្នាំ២០២៦ ខណៈអាជ្ញាធរបានអំពាវនាវឲ្យប្រជាពលរដ្ឋថែរក្សាសុខភាព និងបង្កើនការប្រុងប្រយ័ត្ន។

យោងតាមសេចក្តីជូនដំណឹងរបស់មន្ទីរធនធានទឹក និងឧតុនិយមខេត្តរតនគិរី ស្ថានភាពអាកាសធាតុនេះនឹងធ្វើឲ្យសីតុណ្ហភាពស្ថិតនៅចន្លោះពី ២៣°C ដល់ ៣៣°C ខណៈខ្យល់បក់ប្រែប្រួលទិស មានល្បឿនពី ១ ដល់ ៤ ម៉ែត្រ ក្នុងមួយវិនាទី ដែលអាចបង្កឲ្យមានភ្លៀងផ្គររន្ទះកម្រិតស្រាល។ ស្ថានភាពជាក់ស្តែង នៅព្រឹកព្រលឹមថ្ងៃនេះ ផ្ទៃមេឃមានពពកច្រើន និងមានចុះអ័ព្ទ ព្រះអាទិត្យបញ្ចេញពន្លឺតិចតួច និងមានខ្យល់ប៉ក់។

អាកាសធាតុបែបនេះ អាជ្ញាធរអំពាវនាវទៅដល់ប្រជាពលរដ្ឋទាំងអស់ ត្រូវមានការប្រុងប្រយ័ត្នចំពោះ គ្រោះថ្នាក់ធម្មជាតិ ខ្យល់កន្ត្រាក់និងផ្គររន្ទះ ដោយត្រូវបិទឧបករណ៍អេឡិចត្រូនិច ដើម្បីការពារពីមានគ្រោះថ្នាក់ដោយរន្ទះបាញ់ ហើយថែរក្សាសុខភាព តាមរយៈការផឹកស្អាត រស់នៅស្អាត នៅអំឡុងភ្លៀងធ្លាក់ ដើម្បីចៀសផុតពីជម្ងឺរាគរួស ម្យ៉ាងទៀត ការពារខ្លួនពីការត្រូវទឹកភ្លៀង ដើម្បីបង្ការពីជម្ងឺផ្តាសាយជាដើម។

តាមសេចក្ដីប្រកាសរបស់ក្រសួងធនធានទឹក និងឧតុនិយម កម្ពុជា នឹងមានភ្លៀងកក់ខែចាប់ពីថ្ងៃទី២៦ ខែកុម្ភៈនេះ ដល់ថ្ងៃទី៣ ខែមីនា ឆ្នាំ២០២៦ ដោយសារសម្ពាធទាប បានគ្របដណ្តប់លើសមុទ្រចិនខាងត្បូង អាងទន្លេមេគង្គ សមុទ្រកម្ពុជា និងលើព្រះរាជាណាចក្រកម្ពុជា៕

ដោយ៖ ខៀវ ចាប

The post ខេត្តរតនគិរី ភាគឦសាននឹងមានភ្លៀងធ្លាក់កក់ខែ៣ថ្ងៃជាប់គ្នាជាមួយផ្គររន្ទះ appeared first on Kampuchea Thmey Daily.

ថៃរងគ្រោះព្រោះព្យុះទីហ្វុង Ragasa រយៈពេល១០ថ្ងៃជាប់គ្នា

Chheang — Mon, 22 Sep 2025 03:19:14 +0000

នាយកដ្ឋានឧតុនិយមថៃ (TMD) បានចេញការព្យាករទឹកភ្លៀងរយៈពេល១០ថ្ងៃ ដោយព្រមានពីភ្លៀងធ្លាក់ខ្លាំងជាបន្តបន្ទាប់នៅទូទាំងប្រទេសក្រោមឥទ្ធិពលនៃខ្យល់មូសុងនិរតី និងព្យុះទីហ្វុង Ragasa។

យោងតាមគំរូអាកាសធាតុរបស់ TMD ចាប់ពីថ្ងៃទី២២ខែកញ្ញា ដល់ថ្ងៃទី១ខែតុលា ខ្យល់មូសុងនឹងបក់កាត់តំបន់ភាគខាងជើង និងភាគឦសានផ្នែកខាងលើ ដោយបង្កើនឥទ្ធិពលរបស់វាក្នុងរយៈពេលប៉ុន្មានថ្ងៃខាងមុខ។ មន្ត្រីថៃបានជំរុញឲ្យប្រជាពលរដ្ឋក្នុងខេត្ត Mae Hong Son, Tak, Bueng Kan, Amnat Charoen និង Ubon Ratchathani ទប់ស្កាត់ទឹកជំនន់ភ្លាមៗ និងការបាក់ដី ជាពិសេសនៅតំបន់វាលទំនាប អាងទន្លេ និងសហគមន៍ទំនាប។

នៅថ្ងៃចន្ទនេះ TMD ក៏បានព្រមានអំពីភ្លៀងធ្លាក់ខ្លាំងនៅក្នុងខេត្តចំនួន៤៥ ដែលបង្កើនហានិភ័យនៃការជន់លិចក្នុងអាងទន្លេចៅប្រាយ៉ា ខណៈដែលកម្ពស់ទឹកបន្តកើនឡើង។

ភាគខាងត្បូងត្រូវបានគេរំពឹងថានឹងមានភ្លៀងធ្លាក់តិចជាងតំបន់ផ្សេងទៀត ប៉ុន្តែអ្នកព្យាករណ៍កត់សម្គាល់ពីប្រេកង់ខ្ពស់នៃសកម្មភាពព្យុះត្រូពិច។

គិតត្រឹមថ្ងៃទី២២ខែកញ្ញា ព្យុះទីហ្វុង Ragasa មានទីតាំងនៅជិតតំបន់ Luzon ក្នុងប្រទេសហ្វីលីពីន ដោយរំកិលទៅភាគពាយព្យ ឆ្ពោះទៅសមុទ្រចិនខាងត្បូង។ ព្យុះនេះត្រូវបានគេរំពឹងថានឹងតាមដានឆ្លងកាត់ទីក្រុងហុងកុង រំលងឆ្នេរសមុទ្រភាគខាងត្បូងរបស់ប្រទេសចិន ហើយនឹងចុះខ្សោយទៅជាព្យុះត្រូពិច មុនពេលដែលបោកបក់នៅភាគខាងជើងប្រទេសវៀតណាមប្រហែលថ្ងៃទី២៥-២៦ខែកញ្ញា។

TMD បាននិយាយថា វត្តមានរបស់ព្យុះនេះនឹងធ្វើឲ្យលំហូរខ្យល់មូសុងកាន់តែខ្លាំងលើសមុទ្រ Andaman ប្រទេសថៃ និងឈូងសមុទ្រថៃ ដោយនាំមកនូវភ្លៀងធ្លាក់ខ្លាំងដល់តំបន់ភាគខាងជើង និងកណ្តាលរបស់ប្រទេស៕

ដោយ៖ ឈាង

The post ថៃរងគ្រោះព្រោះព្យុះទីហ្វុង Ragasa រយៈពេល១០ថ្ងៃជាប់គ្នា appeared first on Kampuchea Thmey Daily.

ខេត្តថៃចំនួន៤៦ រងការព្រមានពីព្យុះភ្លៀង និងហានិភ័យនៃទឹកជំនន់ភ្លាមៗ

Chheang — Fri, 11 Jul 2025 03:59:07 +0000

នាយកដ្ឋានឧតុនិយមថៃ បានចេញការព្រមានអំពីអាកាសធាតុជាបន្ទាន់ ខណៈដែលខ្យល់មូសុងដ៏ខ្លាំងក្លាបាននាំមកនូវភ្លៀងធ្លាក់ខ្លាំងដល់ទៅ ៧០%នៃទូទាំងប្រទេស ដែលប៉ះពាល់ដល់ខេត្តចំនួន៤៦ និងបង្កើនហានិភ័យនៃទឹកជំនន់ភ្លាមៗ ការរអិលបាក់ដី និងការរំខានដល់ការដឹកជញ្ជូន ចាប់ពីថ្ងៃសុក្រទី១១ ដល់ថ្ងៃសៅរ៍ទី១២ខែកក្កដា។

(រូបថត៖ Thaiger)

ខ្យល់មូសុងលាតសន្ធឹងពីប្រទេសមីយ៉ាន់ម៉ា កាត់ភាគខាងជើង និងភាគឦសានប្រទេសថៃ ចូលទៅក្នុងប្រទេសវៀតណាម ហើយទន្ទឹមនោះ ប្រព័ន្ធសម្ពាធទាបនៅភាគខាងត្បូងប្រទេសចិន ក៏កំពុងរំកិលតាមគន្លងតែមួយ ដែលហេតុធ្វើឲ្យខ្យល់មូសុងកាន់តែមានឥទ្ធិពលខ្លាំង ហើយនៅតែបន្តប៉ះពាល់ដល់សមុទ្រអាន់ដាម៉ាន់ ប្រទេសថៃ និងឈូងសមុទ្រថៃ។

ប្រជាពលរដ្ឋថៃដែលរស់នៅតាមតំបន់ភ្នំ ក្បែរមាត់ទន្លេ និងតំបន់ទំនាប ត្រូវបានមន្ត្រីមូលដ្ឋានប្រាប់ឲ្យត្រៀមលក្ខណៈទប់ទល់នឹងទឹកជំនន់ភ្លាមៗ និងទឹកជំនន់ហូរធ្លាក់ពីលើភ្នំ។ ចំណែកឯតំបន់សមុទ្រ មានការព្យាករពីកម្ពស់រលកហក់ឡើងដល់២ម៉ែត្រនៅសមុទ្រអាន់ដាម៉ាន់ និងខ្ពស់ជាង២ម៉ែត្រនៅឈូងសមុទ្រថៃ។ ប្រជានេសាទ និងប្រតិបត្តិករទូក ត្រូវបានណែនាំឲ្យឡើងមកលើគោក ឬអនុវត្តការប្រុងប្រយ័ត្នខ្ពស់ ដើម្បីជៀសវាងគ្រោះថ្នាក់នៅសមុទ្រ៕

ដោយ៖ ឈាង

ចុចអាន៖ ទឹកជំនន់បំផ្លាញដីស្រែចំការរាប់សិបហិកតា ក្នុងខេត្តភាគឦសានប្រទេសថៃ

The post ខេត្តថៃចំនួន៤៦ រងការព្រមានពីព្យុះភ្លៀង និងហានិភ័យនៃទឹកជំនន់ភ្លាមៗ appeared first on Kampuchea Thmey Daily.

កម្ពុជាបន្តធ្លាក់ភ្លៀង ជាមួយផ្គររន្ទះ និងខ្យល់កន្ត្រាក់ ដល់ថ្ងៃទី១០ ខែមិថុនា

Ken Malis — Sun, 08 Jun 2025 02:38:05 +0000

នាថ្ងៃទី៨ ខែមិថុនា នេះ ក្រសួងធនធានទឹក និងឧតុនិយម បានប្រកាសថា ខ្យល់មូសុងនិរតីជាមួយសម្ពាធទាបដែលគ្របដណ្តប់ លើឈូងសមុទ្រថៃ អាងទន្លេមេគង្គ និងសមុទ្រចិនខាងត្បូង មានឥទ្ធិពលមកលើព្រះរាជាណាចក្រកម្ពុជា។ ស្ថានភាពបែបនេះនឹងធ្វើឱ្យ ចាប់ពីថ្ងៃទី៨ ដល់ថ្ងៃទី១០ ខែមិថុនា ឆ្នាំ២០២៥ ប្រទេសកម្ពុជាអាចមានភ្លៀងធ្លាក់ ជាមួយផ្គររន្ទះ និងខ្យល់កន្ត្រាក់ គ្របដណ្តប់លើផ្ទៃដីពី ២៥%-៣៥%។

ក្នុងនោះ តំបន់វាលទំនាប សីតុណ្ហភាពមធ្យមអប្បបរមា២៤°C និងសីតុណ្ហភាពមធ្យមអតិបរមា៣៦°C។ ខ្យល់បក់មកពីទិសនិរតី និងអាគ្នយ៍មានល្បឿនមធ្យម ៤ម៉ែត្រ/វិនាទី។ ខេត្តបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង សៀមរាប កំពង់ធំ កំពង់ចាម ត្បូងឃ្មុំ ព្រៃវែង កណ្ដាល តាកែវ ស្វាយរៀង និងភ្នំពេញ អាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់គ្រប ដណ្តប់លើផ្ទៃដី៣៥%។

តំបន់ខ្ពង់រាប សីតុណ្ហភាពមធ្យមអប្បបរមា២៥°C និងសីតុណ្ហភាពមធ្យមអតិបរមា៣៧°C។ ខ្យល់បក់មកពីទិសនិរតីនិងអាគ្នយ៍មានល្បឿនមធ្យម ៥ម៉ែត្រ/វិនាទី។ ខេត្តកំពង់ស្ពឺ ប៉ៃលិន ឧត្ដរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ជួរភ្នំដងរែក និងតំបន់ជួរ ភ្នំក្រវាញ អាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់គ្របដណ្តប់លើផ្ទៃដី២៥%។

ចំណែក តំបន់មាត់សមុទ សីតុណ្ហភាពមធ្យមអប្បបរមា២៥°C និងសីតុណ្ហភាពមធ្យមអតិបរមា៣៦°C។ ខ្យល់បក់មកពីទិសនិរតី និងបស្ចឹម មានល្បឿនមធ្យម ៣ម៉ែត្រ/វិនាទី។ ខេត្តកោះកុង ព្រះសីហនុ កំពត កែប និងជួរភ្នំបូកគោ អាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់គ្រប ដណ្តប់លើផ្ទៃដី៣៥%។ រលកសមុទ្រមានកម្ពស់មធ្យមអប្បបរមា ០,៥០ម៉ែត្រ និងកម្ពស់មធ្យមអតិបរមា ០,៧៥ម៉ែត្រ៕

The post កម្ពុជាបន្តធ្លាក់ភ្លៀង ជាមួយផ្គររន្ទះ និងខ្យល់កន្ត្រាក់ ដល់ថ្ងៃទី១០ ខែមិថុនា appeared first on Kampuchea Thmey Daily.

អំឡុងកូវីដវាយលុកខ្លាំង ថៃក៏នឹងប្រឈមភ្លៀងធ្លាក់ខ្លាំងទូទាំងប្រទេសរហូតកើតជំនន់

Bun sopheap — Wed, 21 May 2025 04:04:46 +0000

យោងតាមការចេញផ្សាយរបស់សារព័ត៌មាន The Nation នៅថ្ងៃទី២១ខែឧសភានេះ នាយកដ្ឋានឧតុនិយមថៃ បានព្យាករណ៍ថា ទូទាំងប្រទេសថៃនឹងមានភ្លៀងធ្លាក់ខ្លាំង និង បានព្រមានអំពីលទ្ធភាពនៃការកើតមានទឹកជំនន់ភ្លាមៗនៅក្នុងតំបន់មួយចំនួនទៀតផង។

(រូបភាព៖ The Nation)

នាយកដ្ឋានឧតុនិយមថៃ បានព្យាករណ៍នៅថ្ងៃពុធនេះថា សម្ពាធខ្យល់បក់ពីទិសនិរតីបានបោកបក់លើភាគខាងជើង ភាគ ឦសាន ភាគកណ្តាល (រួមទាំងទីក្រុងបាងកក) និងតំបន់ភាគខាងកើត។ ឥទ្ធិពលនេះ នឹងធ្វើឲ្យមានភ្លៀងធ្លាក់ខ្លាំងនៅទូទាំងប្រទេសថៃ ខណៈរលកសមុទ្រ ត្រូវបានគេរំពឹងថា នឹងឡើងដល់កម្ពស់លើសពី ២ម៉ែត្រនៅតំបន់ដែលមានផ្គររន្ទះ។

លើសពីនេះចាប់ពីថ្ងៃទី២៣-២៧ ខែឧសភា ខ្យល់បក់នឹងមានកម្លាំងកាន់តែខ្លាំងនៅឈូងសមុទ្រ ខណៈភ្លៀងធ្លាក់កាន់តែច្រើនទំនងជានៅទូទាំងប្រទេសថៃក្នុងអំឡុងពេលនោះ។

ថៃក៏បានណែនាំប្រជាពលរដ្ឋឲ្យមានការប្រុងប្រយ័ត្នខ្ពស់ចំពោះគ្រោះទឹកជំនន់ដែលអាចកើតមាន ជាពិសេសនៅតាមផ្លូវទឹក ក្បែរជើងភ្នំ និងតំបន់ទំនាប។ ដោយសារអាកាសធាតុប្រែប្រួល ប្រជាពលរដ្ឋត្រូវក៏បានណែនាំឲ្យថែរក្សាសុខភាពឲ្យបានល្អ ហើយត្រូវជំរុញឲ្យកសិករចាត់វិធានការពារដំណាំរបស់ពួកគេកុំឲ្យខូចខាតផងដែរ៕

(រូបភាព៖ The Nation)

អត្ថបទ៖ ប៊ុន សុភាព

The post អំឡុងកូវីដវាយលុកខ្លាំង ថៃក៏នឹងប្រឈមភ្លៀងធ្លាក់ខ្លាំងទូទាំងប្រទេសរហូតកើតជំនន់ appeared first on Kampuchea Thmey Daily.

ធ្លាក់ភ្លៀងលិចលង់ផ្ទះប្រជាពលរដ្ឋនៅក្រុងប៉ោយប៉ែត

deth leng — Sun, 11 May 2025 04:47:38 +0000

សង្កាត់ចំនួន ២ នៅក្នុងក្រុងប៉ោយប៉ែតរងការជន់លិចខ្លាំងជាងគេ ដោយសារភ្លៀងធ្លាក់ច្រើនម៉ោង កាលពីល្ងាចថ្ងៃទី ១០ ខែឧសភា ឆ្នាំ ២០២៥។

យោងតាមប្រជាពលរដ្ឋ មានសង្កាត់ចំនួន ២ គឺសង្កាត់ប៉ោយប៉ែត និងសង្កាត់អូរជ្រៅ ក្នុងក្រុងប៉ោយប៉ែត លិចទឹកខ្លាំងជាងគេ ដោយសារភ្លៀងមួយមេធំរយៈពេល ៤ម៉ោង អមទៅដោយខ្យល់កន្ត្រាក់បណ្តាលឲ្យលិចក្រុងប៉ោយប៉ែត្រស្ទើរទាំងស្រុង។

តាមប្រជាពលរដ្ឋមូលហេតុដែលលិចនេះ ទំនងដោយសារក្រុមហ៊ុនដាក់លូកន្លងមក មានមុខកាត់តូច ហើយប្រជាពលរដ្ឋដែលរស់នៅក្នុងសង្កាត់ប៉ោយប៉ែត បានដណ្តើមគ្នាចាក់ដីលើកផ្ទះបិតផ្លូវទឹកហូរ ពិសេសនៅចំណុចក្រុងប៉ោយប៉ែតតែម្តង ម្ចាស់សំណង់ធ្វើផ្ទះ៣ជាន់នាំគ្នាចាក់បិតមុខលូពីធំមកតូចសម្រាប់យកមុខផ្ទះធ្វើអាជីវកម្ម។

ប្រជាពលរដ្ឋបាននិយាយបន្តឲ្យដឹងទៀតថា កន្លងមករដ្ឋបាលខេត្ត និងរដ្ឋបាលក្រុងប៉ោយប៉ែត បានសហការគ្នាដាក់ប្រពន្ធលូជាច្រើនខ្សែដើម្បីរំដោះទឹកជំនន់ទឹកភ្លៀង នៅក្នុងទីប្រជុំជន ដើម្បីបញ្ជៀសពេលមានភ្លៀងធំធ្លាក់មកម្តងៗមានទឹកជន់លិចលង់ខ្លាំងលើទ្រូងផ្លូវ ហូរឲ្យបានទាន់ពេលវេលា។

ជាមួយនឹងដំណោះស្រាយនៃការបញ្ចៀសការស្ទះប្រព័ន្ធលូនៅក្នុងប៉ោយប៉ែត្រនេះ ដែររដ្ឋបាលក្រុងប៉ោយប៉តបានជំរុញឲ្យក្រុមជំនាញយកគ្រឿងចក្រកាយប្រឡាយដាក់ប្រព័ន្ធលូជាច្រើនកន្លែងកន្លងមកដែរដើម្បីឲ្យហូរចាក់ចូលទៅក្នុងអូរជាប់និងប្រទេសថៃ ព្រមជាមួយនឹងការស្តារប្រព័ន្ធលូ ដែលត្រូវធ្វេីមកដល់ពេលនេះខាងក្រុមហ៊ុនធ្វើរួចរាល់អស់ហើយ។

ក្រោយពីផ្ទះប្រជាពលរដ្ឋរាប់រយគ្រួសារត្រូវរងគ្រោះដោយទឹកភ្លៀង លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បានដឹកនាំកម្លាំងអធិការដ្ឋាននគរបាលក្រុងប៉ោយប៉ែតចុះប្រតិបត្តិការបន្ទាន់ ដើម្បីជួយប្រជាពលរដ្ឋរាប់ពាន់គ្រួសារដែលកំពុងតែរងការជន់លិចដោយជំនន់ទឹកភ្លៀង កងកម្លាំងបានជួយដឹកជញ្ជូនទ្រព្យសម្បត្តិ សត្វពាហនៈគ្រប់ប្រភេទ ជម្លៀសពួកគាត់ទៅកាន់ទីទួលមានសុវត្ថិភាព ពិសេសចាស់ជរា ជនពិការ អ្នកជំងឺស្រ្តីមានផ្ទៃពោះ និងកុមារតូចៗ ដើម្បីបញ្ចៀសការជួបគ្រោះថ្នាក់ផ្សេងៗជាយថាហេតុផងដែរ៕

អត្ថបទ៖ វ៉ាន់ ណាង

The post ធ្លាក់ភ្លៀងលិចលង់ផ្ទះប្រជាពលរដ្ឋនៅក្រុងប៉ោយប៉ែត appeared first on Kampuchea Thmey Daily.