ទឹកជំនន់បំផ្លាញដីស្រែចំការរាប់សិបហិកតា ក្នុងខេត្តភាគឦសានប្រទេសថៃ

ភ្លៀងធ្លាក់ខ្លាំងបណ្តាលឱ្យទឹកទន្លេមេគង្គ និងដៃទន្លេនានាហូរហៀរបង្កការជន់លិចវាលស្រែជាង ២,៤០០ ហិកតាយ៉ាងធ្ងន់ធ្ងរនៅក្នុងខេត្ត Nakhon Phanom ប្រទេសថៃ។ នេះបើយោងតាមការចេញផ្សាយរបស់កាសែត Bangkok Post នៅថ្ងៃទី ១១ ខែ កក្កដា។

ស្រុកចំនួន៦ ក្នុងខេត្ត Nakhon Phanom ត្រូវបានប្រកាសជាតំបន់គ្រោះមហន្តរាយ ដោយក្រុមសង្គ្រោះបន្ទាន់ត្រូវបានគេដាក់ពង្រាយតាមតំបន់លិចទឹក។ តំបន់​ដែល​រង​គ្រោះ​ខ្លាំង​ជាង​គេ​គឺ​ស្រុក Na Wa ដោយមានរបាយការណ៍​ថា​ទឹកជំនន់​បានបំផ្លាញផ្ទៃដី​កសិកម្ម​ជាង ១,៤៤០ ហិកតា។

លើសពីនេះកម្ពស់ទឹកទន្លេមេគង្គបានហក់ឡើងយ៉ាងលឿនដល់ ៨,២ ម៉ែត្រ ទោះបីទាបជាងសញ្ញាប្រកាសអាសន្ន១២ ម៉ែត្រក៏ដោយ ក៏វាខ្ពស់ល្មមអាចជន់លិចដីស្រែទំនាបបាន។

នៅខេត្តជិតខាងដូចជាខេត្ត Sakon Nakhon ដំណាំជាង ៨០ ហិកតាក៏ត្រូវបានលិចលង់ផងដែរ ខណៈកសិករ​នៅ​ស្រុក Sawang Daen Din មិន​បាន​ទទួល​សំណង​អ្វី​ទេ ដោយសារ​ពួកគេ​ខកខាន​ថ្ងៃ​កំណត់​ក្នុង​ការ​ចុះ​ឈ្មោះ។ ឥឡូវនេះ ពួកគេជាច្រើនកំពុងស្នើសុំឱ្យរដ្ឋាភិបាលផ្លាស់ប្តូរច្បាប់នេះដើម្បីទទួលបានជំនួយ ទោះបីជាពួកគេខកខានកាលបរិច្ឆេទកំណត់ក៏ដោយ។

ដើម្បីគាំទ្រដល់ការស្តារឡើងវិញ រដ្ឋមន្ត្រីក្រសួងកសិកម្ម ថៃបានចាប់ផ្តើមកម្មវិធីមួយដើម្បីជួយស្តារដីដែលខូចខាតដោយទឹកជំនន់ជាង ១៤,៨០០ ហិកតាតាំងពីឆ្នាំឆ្នាំ ២០២៤ ។

បើតាមនាយកដ្ឋានឧតុនិយមថៃថានឹងមានភ្លៀងធ្លាក់ខ្លាំង និងផ្គររន្ទះនៅក្នុងផ្នែកជាច្រើននៃប្រទេស រួមទាំងទីក្រុងបាងកក ចាប់ពីថ្ងៃទី ១០ ដល់ថ្ងៃទី ១៦ ខែកក្កដា។ តំបន់ប្រហែល ៦០-៨០% រំពឹងថានឹងមានភ្លៀងធ្លាក់ក្នុងអំឡុងពេលនេះ៕

អត្ថបទ៖ ប៊ុន សុភាព