ការស្នើបែបនេះ បានធ្វើឡើងក្នុង​ឱកាស​ចូល​ជួបពិភាក្សាការងារជាមួយ លោក ​រដ្ឋ សារ៉ាវុធ រដ្ឋលេខាធិការ​ក្រសួង​ពាណិជ្ជកម្ម នៅ​ថ្ងៃ​ទី​០៤ ខែ​កញ្ញា ឆ្នាំ​២០២៥។

លោក ​រដ្ឋ សារ៉ាវុធ រដ្ឋលេខាធិការ​ក្រសួង​ពាណិជ្ជកម្ម បាន​ស្វាគមន៍​លោក​ឯកអគ្គរដ្ឋទូត​យ៉ាងកក់ក្តៅ និង​ជម្រាប​ជូនអំពី​ភាព​បំពេញ​បន្ថែម​ផ្នែក​ពាណិជ្ជកម្ម​រវាង​ប្រទេសទាំងពីរ និងយន្តការ​សំខាន់​ៗ​មួយ​ចំនួន​ដែល​ត្រូវ​អនុវត្ត សំដៅ​ពង្រីក​ទំហំពាណិជ្ជកម្មទ្វេភាគីឱ្យកាន់តែល្អប្រសើរបន្ថែមទៀត។

លោក​ឯកអគ្គរដ្ឋទូតបានលើកឡើងនូវ​សំណើ​បង្កើត​ឱ្យ​មាន​អនុស្សរណៈ​នៃ​ការ​យោគយល់​គ្នា ដើម្បី​បង្កើន​ការ​ដោះដូរ​ទំនិញ​​​សក្ដានុពល​ទៅវិញ​ទៅមក​រវាង​ប្រទេស​ទាំងពីរ នា​ពេលខាងមុខ ជាពិសេស​ការនាំ​ចេញ​ទំនិញ​កសិកម្ម​សក្ដានុពល​របស់​ខ្លួន​មក​កម្ពុជា រួមមាន ផ្លែប៉ោម ដូង សារី និងប៊្លូបឺរីជាដើម។

លោក​រដ្ឋលេខាធិការ បាន​ស្វាគមន៍​លើ​សំណើ​ទាំងនេះ និងស្នើភាគី​ទាំងពីរ​គួរ​ពិនិត្យ​លទ្ធភាព​សម្របសម្រួល​រៀបចំ​ជំនួប​ធុរកិច្ចរវាង​វិស័យ​ឯកជន និង​ពិព័រណ៍​ពាណិជ្ជកម្ម ជា​ពិសេស​ពាក់ព័ន្ធ​នឹង​ទំនិញអង្ករ ដែល​ជា​តម្រូវ​ការ​របស់​ភា​គីអាហ្វ្រិកខាងត្បូង។

រដ្ឋលេខាធិការ​ក្រសួង​ពាណិជ្ជកម្មក៏បានស្នើឱ្យ​ឯកអគ្គរដ្ឋទូតជួយ​ផ្សព្វផ្សាយ​អំពី​សក្តានុពល​វិនិយោគ និង​ធុរកិច្ច​នៅកម្ពុជា ជូន​ដល់​វិនិយោគិន និង​ធុរជន​អាហ្រ្វិកខាងត្បូង ដើម្បីអាចទាញ​យក​អត្ថប្រយោជន៍​ពាណិជ្ជកម្ម​ជា​អតិបរមា ពីការ​អនុវត្ត​កិច្ច​ព្រមព្រៀង​ពាណិជ្ជកម្ម​សេរីតំបន់ និងទ្វេភាគីរបស់កម្ពុជា៕

The post អាហ្រ្វិកខាងត្បូងស្នើចុះ MOU ជាមួយកម្ពុជា បង្កើនការដោះដូរទំនិញសក្តានុពល appeared first on Kampuchea Thmey Daily.

សត្វរមាសទាំងនេះ បានធ្វើដំណើរជាង ៣ ៤០០​គីឡូម៉ែត្រ​អស់​រយៈពេល​២​ថ្ងៃ ដោយឡានដឹកទំនិញ និងយន្តហោះ Boeing ៧៤៧ ពី តំបន់ Munywana Conservancy ទៅឧទ្យានជាតិ Akagera របស់ប្រទេសរវ៉ាន់ដា។

ការផ្លាស់ទីលំនៅនេះធ្វើឡើងជាពីរក្រុមក្នុងមួយក្រុមមានសត្វរមាស ៣៥​ក្បាល គឺជាផ្នែកមួយនៃគម្រោងការចិញ្ចឹមសត្វរមាសដ៏ធំមានគោលបំណងជំរុញចំនួនសត្វរមាស និងបង្កើតទីតាំងរឹងមាំនៃការបង្កាត់ពូជថ្មីនៅអាហ្វ្រិកកណ្តាល។ នៅ​ពេល​ទៅ​ដល់ សត្វរមាសត្រូវបានដោះលែងទៅក្នុងឧទ្យាន ដែលក្រុមពេទ្យសត្វនឹងតាមដានសុខភាព និងការសម្របខ្លួនរបស់វា។

គួរបញ្ជាក់ថា រមាស​នៅអាហ្វ្រិកខាងត្បូង​បច្ចុប្បន្ន​ត្រូវ​បាន​ចាត់​ថ្នាក់​ថាជា​សត្វ​​ជិតផុត​ពូជ​ ដោយ​សារ​ការ​បរបាញ់​ជា​ច្រើន​ឆ្នាំ​និង​ការ​បាត់​បង់​ទីជម្រក។ នៅសល់តែប្រហែល ១៧ ០០០​ក្បាលប៉ុណ្ណោះនៅក្នុងព្រៃ ខណៈគម្រោងផ្លាស់ប្ដូរនេះមានគោលបំណង​​ជំរុញ​ឲ្យ​ចំនួន​សត្វរមាស​កើន​ដល់​ជាង ២ ០០០​ក្បាលឡើងវិញនៅទូទាំងតំបន់ការពារក្នុងទ្វីបអាហ្រ្វិក ដើម្បីជួយធានាដល់អនាគតរបស់ពួកវាមិន​ឲ្យ​ផុតពូជ៕

អត្ថបទ៖ ប៊ុន សុភាព

The post រមាសសរាប់សិបក្បាលត្រូវបានផ្លាស់ទីលំនៅពីអាហ្វ្រិកខាងត្បូងទៅកាន់ប្រទេសរវ៉ាន់ដា appeared first on Kampuchea Thmey Daily.

កាល​ពី​ខែ​សីហា ប្រទេស​ណាមីប៊ី​ បាន​ប្រកាស​ថា ​ខ្លួន​បាន​សម្លាប់​សត្វ​​​ព្រៃ​​ចំនួន៧២៣ក្បាល​ក្នុង​នោះ​មាន​ដំរី ៨៣ ក្បាល ដំរីទឹក ៣០ និង​សេះ​បង្កង់ ៣០០ក្បាល។ ហើយនៅខែបន្ទាប់ ប្រទេសហ្ស៊ីមបាវេបានអនុញ្ញាតឲ្យសម្លាប់ដំរីចំនួន ២០០ក្បាលផងដែរ។

រដ្ឋាភិបាលប្រទេសទាំងពីរ បាននិយាយថា ការសម្លាប់សត្វនឹងជួយកាត់បន្ថយផលប៉ះពាល់នៃគ្រោះរាំងស្ងួតដ៏អាក្រក់បំផុត​ដែល​បាន​កើត​មាន​ក្នុងតំបន់នេះក្នុងរយៈពេល១០០ឆ្នាំ ដោយកាត់បន្ថយសម្ពាធលើ ដីនិងទឹក និងការពារជម្លោះនៅពេលដែលសត្វព្រៃចូលទៅទីលំនៅរបស់មនុស្ស។

ប៉ុន្តែ​វា​បាន​បង្ក​ឲ្យ​មាន​ការវែកញែក​ប្រកែក​គ្នា​យ៉ាង​ខ្លាំង ដោយក្រុម​អ្នក​អភិរក្ស​បាន​រិះគន់​ការ​សម្លាប់សត្វព្រៃទាំង​នេះ​ថា​ ជា​អំពើ​ឃោរឃៅ និងជា​គំរូដ៏អាក្រក់បំផុត។ អ្នកអភិរក្សក៏មានការព្រួយបារម្ភដែរ​ថា ការសម្លាប់សត្វព្រៃទាំងនេះនឹងរុញច្រានបរិស្ថានវិទ្យារបស់ប្រទេសទាំងពីរចេញពីតុល្យភាព ដែលធ្វើឲ្យពួកគេរងគ្រោះរាំងស្ងួតកាន់តែធន់ធ្ងរ។

ស្ថានភាព​គ្រោះរាំងស្ងួតដែល​​ប្រទេស​តំបន់​អាហ្វ្រិក​ខាង​ត្បូងកំពុង​ប្រឈម​មុខ​​​គឺ​ធ្ងន់ធ្ងរណាស់ ដោយសារការមិនអាចដាំដំណាំបាន សត្វពាហនៈបានបាត់បង់ជីវិត ហើយមនុស្សជិត ៧០លាននាក់កំពុងត្រូវការអាហារយ៉ាងខ្លាំង។

ប្រទេសហ្ស៊ីមបាវ៉េ បានប្រកាសថា​វា​ជាគ្រោះមហន្តរាយជាតិនៅក្នុងខែមេសា ខណៈប្រទេសណាមីប៊ីបានធ្វើតាមកាល​ពី​ខែ​ឧសភា ដោយបានប្រកាសដាក់រដ្ឋក្នុងគ្រាអាសន្ន ខណៈដែលគ្រោះរាំងស្ងួតបានបន្សល់ធ្វើឲ្យប្រហែលពាក់កណ្តាលចំនួនប្រជាជនរបស់ខ្លួនប្រឈមមុខនឹងអសន្តិសុខស្បៀងធ្ងន់ធ្ងរ។

គ្រោះរាំងស្ងួតដែលកំពុងនាំមកនូវវិបត្តិនេះត្រូវបានជំរុញដោយ ឥទ្ធិពលអែលនីណូ ដែលជាគំរូអាកាសធាតុធម្មជាតិ​នាំឱ្យមានការថយចុះយ៉ាងខ្លាំងនៃទឹកភ្លៀងនៅក្នុងតំបន់ និងកាន់តែធ្ងន់ធ្ងរឡើង​ដោយវិបត្តិអាកាសធាតុដែលបង្កឡើងដោយមនុស្ស៕

អត្ថបទ៖ ប៊ុន សុភាព

The post ប្រទេស​អាហ្រ្វិក​ពីរ​ប្រកាស​សម្លាប់​ដំរី​​ជា​អាហារ ខណៈអ្នក​រិះគន់​ថា​ជា​អំពើ​ឃោរឃៅ​និងមិន​គួរកើតឡើង appeared first on Kampuchea Thmey Daily.

យោងតាមប៉ូលិសបានឲ្យដឹងថា ផ្ទះពីរនៅលើផ្លូវតែមួយក្នុងទីប្រជុំជន Lusikisiki ភាគខាងកើត Cape ត្រូវ​បានរងការបាញ់ប្រហារដោយស្ត្រី១២នាក់ និងបុរសម្នាក់បានស្លាប់នៅក្នុងទីតាំងទីមួយ ហើយស្ត្រី៣នាក់និងបុរសម្នាក់នៅទីតាំងទីពីរ ខណៈជនរងគ្រោះទី១៨ បានស្លាប់នៅក្នុងមន្ទីរពេទ្យ។

ប៉ូលិស​មិនទាន់​បានកំណត់មូលហេតុពិតប្រាកដនៃការបាញ់ប្រហារនេះនៅឡើយទេ​ ដោយក្រៅពីការស្លាប់របស់មនុស្សទី ១៨ មិនមានការវិវត្តថ្មីផ្សេងទៀតទេ រហូត​មក​ដល់​ពេល​នេះនិងមិន​មាន​ការ​ចាប់​ខ្លួន​ទេ។

ប្រព័ន្ធផ្សព្វផ្សាយអាហ្រ្វិកខាងត្បូង បានរាយការណ៍ថា ជនរងគ្រោះជួបជុំគ្នានៅផ្ទះដើម្បីរៀបចំពិធីកាន់ទុក្ខតាមប្រពៃណីចំពោះ​ម្តាយនិងកូនស្រីដែលត្រូវបានសម្លាប់កាលពីមួយឆ្នាំមុន។ ពួកគេបានខ្ចប់ទំនិញ និងអំណោយ រួមទាំងរៀបចំគ្រឿងសង្ហារឹម។

ពេលដែលមានការបាញ់ប្រហារបានកើតឡើងកាលពីយប់ថ្ងៃសុក្រមានមនុស្សសរុបចំនួន១៩នាក់បានដេកនៅក្នុងផ្ទះពីរនៅក្នុងទីធ្លាតែមួយ។ អ្នក​នៅ​រស់​រាន​មាន​ជីវិត​ចំនួន៦នាក់​នៅ​ផ្ទះ​នោះ​ក្នុង​នោះ​មាន​ស្ត្រី ៤ នាក់ បុរស​ម្នាក់ និង​កូន​អាយុ ២ខែ ក្មេង​នោះ​មិន​មាន​របួស​ទេ ប៉ុន្តែ​ត្រូវ​បាន​គេ​បញ្ជូន​ទៅ​កាន់​មន្ទីរពេទ្យ​ដើម្បី​ត្រួតពិនិត្យ។

បន្ទាប់ពីកាតបាញ់ប្រហារដ៏សាហាវនេះ ក្រុមអ្នកស៊ើបអង្កេត និងអ្នកជំនាញផ្នែកកោសល្យវិច្ច័យ រួមទាំងអ្នកគ្រប់គ្រងកន្លែង​កើតហេតុឧក្រិដ្ឋកម្មមកពីទីក្រុង Pretoria ត្រូវបានគេដាក់ពង្រាយ ដើម្បីបំបែកភស្តុតាងទាំងអស់រួមគ្នាក្នុងគោល​បំណងដើម្បីចាប់ខ្លួនឧក្រិដ្ឋជនឃោរឃៅទាំងនេះ ខណៈដែលការសន្និដ្ឋានដំបូងជនដែដល់ទំនងជាស្គាល់គ្រួសារ​ជនរងគ្រោះនេះ។

អាហ្រ្វិកខាងត្បូងមានអត្រាឃាតកម្មខ្ពស់បំផុតមួយនៅក្នុងពិភពលោក នេះបើយោងតាមតួលេខចុងក្រោយពីការិយាល័យអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម។ ក្នុងនោះមានឃាតកម្មច្រើនជាង ២៧០០០ ករណីក្នុងឆ្នាំ ២០២២ ដែលស្មើនឹង៤៥នាក់ក្នុង ១០ម៉ឺន​នាក់ក្នុងចំណោមប្រជាជនជិត ៦០ លាននាក់បើប្រៀបធៀបអត្រារបស់សហរដ្ឋអាមេរិកគឺ៦នាក់ក្នុង១០ម៉ឺន​នាក់៕

អត្ថបទ៖ ប៊ុន សុភាព

The post ប៉ូលិសតាមប្រមាញ់ជនដៃដល់បាញ់សម្លាប់មនុស្ស ១៨នាក់នៅអាហ្វ្រិកខាងត្បូង appeared first on Kampuchea Thmey Daily.

បុរស​ទាំង​នោះ​បាន​បង្ហាញ​ខ្លួន​នៅ​តុលាការ​កាល​ពី​ថ្ងៃ​អង្គារ​ក្នុង​ខេត្ត Limpopo ភាគ​ខាង​ជើង ខណៈប្រជាពលរដ្ឋចង់ឱ្យពួកគេនៅជាប់ពន្ធនាគាររហូតដល់ការកាត់ក្តីរបស់ពួកគេត្រូវបានបញ្ចប់។

បុរសទាំង៣នាក់រួមមាន ម្ចាស់កសិដ្ឋាន Zachariah Johannes Olivier អ្នកគ្រប់គ្រង Andrian Rudolph de Wet និងបុគ្គលិកម្នាក់ទៀត William Musora ក៏ប្រឈមមុខនឹងការចោទប្រកាន់ចំនួនពីរ ពីបទឃាតកម្មគិតទុកជាមុន មួយករណីប៉ុនប៉ងមនុស្ស​ឃាត និងការកាន់កាប់អាវុធដែលគ្មានអាជ្ញាប័ណ្ណ។ លើសពីនេះ Musora ជាជនជាតិហ្សីមបាវ៉េ ក៏ប្រឈមមុខនឹងការចោទប្រកាន់បានស្ថិតនៅក្នុងប្រទេសដោយខុសច្បាប់ផងដែរ។

ហេតុការណ៍ដែលនាំឲ្យមានការកាត់ក្ដីនេះបានកើតឡើងកាលពីខែសីហា ខណៈពេលដែលឡានដឹកទំនិញដែលជាកម្មសិទ្ធិរបស់ក្រុមហ៊ុនទឹកដោះគោមួយបានបោះចោលទំនិញដែលផុតកំណត់នៅក្នុងកសិដ្ឋានរបស់ Olivier ដោយជំរុញឱ្យស្ត្រីពីរនាក់គឺ Locadia Ndlovu និង Maria Makgatho បំពានចូលទៅក្នុងកសិដ្ឋាន និងព្យាយាមប្រមូលផលិតផលខូចគុណភាពទាំងនោះ។

ស្ត្រីទាំងពីរត្រូវបានបាញ់សម្លាប់ ក្នុងនោះមានបុរស​ម្នាក់​ដែលបាននៅ​ជាមួយ​ពួកគេ​បាន​រង​របួស ហើយ​បាន​លូន​ទៅ​ផ្លូវ​ក្បែរ​នោះ​ដើម្បី​ស្រែក​ឱ្យ​គេ​ជួយ ហើយបុរសម្នាក់នេះបានប្រាប់ប៉ូលិសថាបានរកឃើញសាកសពស្ត្រីដែលរលួយនៅក្នុងទ្រុងជ្រូកមួយ។

ពាក់ព័ន្ធករណីនេះគណបក្សនយោបាយជាច្រើនបានតវ៉ានៅខាងក្រៅតុលាការ Mankweng Magistrates ដោយអំពាវនាវឱ្យបុរសទាំងនោះមិនឲ្យនៅក្រៅឃុំ និងប្រឈមមុខនឹងការកាត់ទោសដ៏ធ្ងន់ធ្ងរបំផុត។ ចំណែកគណៈកម្មាធិការសិទ្ធិមនុស្សអាហ្រ្វិកខាងត្បូងបានអំពាវនាវដល់សាធារណជនកុំឱ្យយកច្បាប់ទៅដាក់ក្នុងដៃរបស់ពួកគេដើម្បីជាការសងសឹក ខណៈការកាត់ទោសនិងបន្តនៅខែក្រោយទៀត។

គួរបញ្ជាក់ថាឧក្រិដ្ឋកម្ម​ហិង្សា​លើ​កសិដ្ឋាន​របស់​អាហ្រ្វិក​ខាង​ត្បូង​មាន​ការ​ព្រួយ​បារម្ភ​ជា​ច្រើន​ឆ្នាំ​មក​ហើយ រួម​មាន​ការ​សម្លាប់​កសិករ​ដោយ​ឧក្រិដ្ឋជន និង​ការ​រំលោភ​បំពាន​របស់​ម្ខាស់កសិដ្ឋាន​លើ​កម្មករជាដើម។

អត្ថបទ៖ ប៊ុន សុភាព

The post កសិករ​អាហ្រ្វិក​ខាង​ត្បូង​រងការ​ចោទ​ប្រកាន់​ពី បទ​សម្លាប់​ស្ត្រី​​២​នាក់​​និង​បោះសាកសពឲ្យជ្រូកស៊ី appeared first on Kampuchea Thmey Daily.