អ៊ីតាលី Archives - Kampuchea Thmey Daily

រដ្ឋមន្រ្តីអ៊ីតាលី៖ សង្គ្រាមនៅអ៊ីរ៉ង់ធ្វើឱ្យភាពជាអ្នកដឹកនាំសកលអាមេរិកស្ថិតក្នុងភាពគ្រោះថ្នាក់

Minea Neu — Tue, 07 Apr 2026 14:00:00 +0000

រដ្ឋមន្ត្រីក្រសួងការពារជាតិអ៊ីតាលី លោក Guido Crosetto បានលើកឡើងថា សង្គ្រាមនៅអ៊ីរ៉ង់បានធ្វើឱ្យភាពជាអ្នកដឹកនាំសកលរបស់សហរដ្ឋអាមេរិកស្ថិតក្នុងភាពគ្រោះថ្នាក់ ដោយទីក្រុងវ៉ាស៊ីនតោនបានបង្ហាញពីភាពភ័យខ្លាចដ៏ឆ្កួតលីលាពីការកើនឡើងនៃអាវុធនុយក្លេអ៊ែររបស់ក្រុងតេហេរ៉ង់។

យោងតាមភ្នាក់ងារសាព័ត៌មានរ៉យទ័រ ផ្សាយថ្ងៃទី៧ ខែមេសា ឆ្នាំ២០២៦ ប្រទេសអ៊ីតាលីក៏ដូចសម្ព័ន្ធមិត្តណាតូ(NATO) ដទៃទៀត គឺស្ទាក់ស្ទើរក្នុងការចូលរួមជាមួយប្រធានាធិបតីអាមេរិក លោក ដូណាល់ ត្រាំ ក្នុងការវាយប្រហារលើអ៊ីរ៉ង់។ កាលពីសប្តាហ៍មុនអ៊ីតាលីបដិសេធចំពោះយន្តហោះយោធាអាមេរិកចុះចតនៅមូលដ្ឋានទ័ពអាកាស Sigonella ក្នុងទីក្រុង Sicily ក្នុងដំណើរទៅកាន់មជ្ឈិមបូព៌ា។

រដ្ឋមន្ត្រីក្រសួងការពារជាតិអ៊ីតាលី លោក Guido Crosetto ។ រូបភាព៖ Reuters

លោក Crosetto ប្រាប់កាសែតអ៊ីតាលី Corriere della Sera ក្នុងបទសម្ភាសន៍មួយចេញផ្សាយកាលពីថ្ងៃអង្គារថា៖ « សង្គ្រាមនេះ(នៅអ៊ីរ៉ង់) កំពុងធ្វើឱ្យសហរដ្ឋអាមេរិកស្ថិតក្នុងហានិភ័យនៃការដឹកនាំពិភពលោក»។

លោក Crosetto ជាមនុស្សជិតស្និទ្ធរបស់នាយករដ្ឋមន្ត្រីអ៊ីតាលី លោកស្រី Giorgia Meloni ដែលមានទំនាក់ទំនងល្អជាមួយ លោក ត្រាំ លើកឡើងថា ខ្លួនមានការព្រួយបារម្ភពីជម្លោះនៅអ៊ីរ៉ង់អាចនឹងកាន់តែអាក្រក់ទៅៗ ហើយអាចដូចការទម្លាក់គ្រាប់បែកនុយក្លេអ៊ែររបស់សហរដ្ឋអាមេរិកនៅឆ្នាំ១៩៤៥ លើប្រទេសជប៉ុនក្នុងសង្គ្រាមលោកលើកទី២ដែរ។

លើកលើកឡើងថា៖ « សាកគិតមើល៌! មនុស្សជាតិដូចជាពួកយើងនេះឯងដែលបានសម្រេចចិត្តថា ទម្លាក់គ្រាប់បែកសូម្បីតែនៅលើទីក្រុង Hiroshima និង Nagasaki ក៏ជាមធ្យោបាយអាចទទួលយកបានក្នុងការបញ្ចប់ជម្លោះ។ ជាអកុសល! យើងនៅតែមានអាវុធនុយក្លេអ៊ែរ ហើយអ្នកដែលគ្មានវា កំពុងស្វែងរកដើម្បីទទួលបានទៅវិញ។ យើងមិនបានរៀនអ្វីទាំងអស់(ពីសង្រ្គាមលោកទី២) ។ ហានិភ័យដ៏អាក្រក់! អ្វីដែលយើងកំពុងចួបប្រទះគឺជម្លោះមួយធ្វើឱ្យសកម្មភាពនីមួយៗ បង្កឱ្យមានប្រតិកម្មកម្រិតខ្ពស់ជាងនេះ»។

លោក Crosetto ថ្លែងទៅកាន់សភាអ៊ីតាលីពីសង្គ្រាមអ៊ីរ៉ង់នៅថ្ងៃអង្គារនេះថា៖ « លោក ត្រាំ គួរតែមានទីប្រឹក្សាក្លាហានជាងនេះ។ បញ្ហាមួយក្នុងចំណោមបញ្ហានៃអាណត្តិប្រធានាធិបតីនេះគឺថាគ្មាននរណាម្នាក់ហ៊ានប្រឆាំងនឹងចៅហ្វាយនោះទេ»៕

ប្រែសម្រួល៖ ណឺ មិនា

The post រដ្ឋមន្រ្តីអ៊ីតាលី៖ សង្គ្រាមនៅអ៊ីរ៉ង់ធ្វើឱ្យភាពជាអ្នកដឹកនាំសកលអាមេរិកស្ថិតក្នុងភាពគ្រោះថ្នាក់ appeared first on Kampuchea Thmey Daily.

អ៊ីតាលី ដុនដាបខ្លាំង ដោយរយៈពេល ១២ ឆ្នាំ មិនបានឡើង World Cup ជុំចុងក្រោយ

chean virakbot — Wed, 01 Apr 2026 03:30:23 +0000

ក្រុមបាល់ទាត់ជម្រើសជាតិ អ៉ីតាលី បានធ្លាក់ពីព្រឹត្តិការណ៍ជើងឯកពិភពលោក World Cup ឆ្នាំ ២០២៦ បន្ទាប់ពីចាញ់ក្រុមជម្រើសជាតិ បូស្នៀ និងហឺហ្សេហ្គោវីណា ក្នុងជម្រុះដោយលទ្ធផលប៉េណាល់ទី ៤-១ ក្រោយស្មើគ្នា ១-១ នៅយប់ថ្ងៃទី៣១ ខែមីនា ឆ្នាំ ២០២៦។

អ៉ីតាលី ជាក្រុមខ្លាំងមួយប្រចាំតំបន់អឺរ៉ុប ដោយពួកគេធ្លាប់ឈ្នះជើងឯកពិភពលោក ៤ លើកគឺ ឆ្នាំ ១៩៣៤ ១៩៣៨ ១៩៨២ និង ២០០៦។ គិតចាប់តាំងពីឆ្នាំ ១៩៣០ រហូតដល់ ឆ្នាំ ២០១៤ ពួកគេ ធ្លាក់ក្នុងវគ្គជម្រុះតែម្តងគត់គឺ ឆ្នាំ ១៩៥៨ ខណៈរដូវកាលផ្សេងៗទៀតសុទ្ធតែបានឆ្លងផុតវគ្គជម្រុះ និងបានឡើងជុំចុងក្រោយ។

ទោះបីជាយ៉ាងណា គិតចាប់តាំងពីឆ្នាំ ២០១៨ រហូតដល់ ឆ្នាំ ២០២៦ ដែលជាព្រឹត្តិការណ៍បាល់ទាត់ពិភពលោក ៣ រដូវកាល ស្មើនឹង ១២ ឆ្នាំចុងក្រោយ អ៉ីតាលី បានធ្លាក់ត្រឹមវគ្គជម្រុះរហូត។ នេះជាប្រវត្តិសាស្ត្រដ៏អាក្រក់បំផុតសម្រាប់ជម្រើសជាតិ អ៉ីតាលី ដែលបានធ្លាក់ពីជម្រុះ World Cup ៣ លើកជាប់គ្នា។

អ្វីដែលគួរឲ្យចាប់អារម្មណ៍បំផុតនោះគឺ ការប្រកួតជម្រុះចុងក្រោយ នៅឆ្នាំ ២០២៦ នេះ ពួកគេបានជួប បូស្នៀ ដែលជាប្រទេសមួយមិនសូវល្បីល្បាញខាងបាល់ទាត់។ ការប្រកួត ១២០ នាទីពេញ ពួកគេបានស្មើគ្នា ១-១ ហើយការទាត់ប៉េណាល់ទីកាត់សេចក្តី អ៉ីតាលី បានចាញ់ ១-៤។

បច្ចុប្បន្ន ក្រុមជម្រើសជាតិ បូស្នៀ ស្ថិតនៅលេខ ៧១ នៃតារាងចំណាត់ថ្នាក់ពិភពលោក FIFA Ranking ខណៈ អ៉ីតាលី ស្ថិតនៅលេខ ១៣ ដែលខុសឆ្ងាយមែនទែន។

ក្រុមបាល់ទាត់ជម្រើសជាតិ បូស្នៀ ជាលើកទី ២ ក្នុងប្រវត្តិសាស្ត្ររបស់ខ្លួនដែលបានឈានដល់ជុំចុងក្រោយ ជើងឯកពិភពលោក បន្ទាប់ពីបានឈានដល់ជុំចុងក្រោយលើកដំបូងកាលពីឆ្នាំ ២០១៤។ ពួកគេទើបចូលរួមប្រកួតជើងឯកពិភពលោក នៅឆ្នាំ ១៩៩៨ បន្ទាប់ពីបំបែកខ្លួនចេញពីប្រទេសយូហ្គោស្លាវី៕

អត្ថបទ៖ វិរបុត្រ

The post អ៊ីតាលី ដុនដាបខ្លាំង ដោយរយៈពេល ១២ ឆ្នាំ មិនបានឡើង World Cup ជុំចុងក្រោយ appeared first on Kampuchea Thmey Daily.

ប្រទេសធំៗនៅអឺរ៉ុប និងជប៉ុន ត្រៀមចូលរួមធានាសុវត្ថិភាពច្រកហ័រមូហ្ស តាមសំណើ ត្រាំ

Huon Dina — Fri, 20 Mar 2026 03:47:38 +0000

បណ្តាប្រទេសធំៗនៅអឺរ៉ុប និងជប៉ុន បានចេញសេចក្តីថ្លែងការណ៍រួមមួយកាលពីថ្ងៃព្រហស្បតិ៍ ដោយនិយាយថា ពួកគេត្រៀមខ្លួនរួចជាស្រេចដើម្បីចូលរួមកិច្ចខិតខំប្រឹងប្រែងធានាសុវត្ថិភាពសម្រាប់ការដឹកជញ្ជូនតាមរយៈច្រកសមុទ្រហ័រមូហ្ស ហើយនឹងចាត់វិធានការដើម្បីធ្វើឱ្យទីផ្សារថាមពលមានស្ថិរភាព។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ការប្រកាសយ៉ាងដូច្នេះ ធ្វើឡើងក្រោយមានការទាមទារជាបន្តបន្ទាប់ពីប្រធានាធិបតីអាមេរិក លោក ដូណាល់ ត្រាំ ឱ្យបណ្ដាប្រទេសផ្សេងៗរួមដៃគ្នាជួយអាមេរិកក្នុងការធានាសុវត្ថិភាពច្រកហ័រមូហ្ស ដែលជាផ្លូវដឹកជញ្ជូនប្រេងដ៏សំខាន់របស់ពិភពលោក។ កន្លងមក មានសេចក្ដីរាយការណ៍ថា បណ្ដាប្រទេសមួយចំនួន រួមទាំងអាល្លឺម៉ង់ បានច្រានចោលសំណើរបស់ ត្រាំ ដែលធ្វើឱ្យ ត្រាំ ហៅពួកគេថា «រមិលគុណ»។

ប្រទេសធំៗទាំងនោះ រួមមាន ចក្រភពអង់គ្លេស បារាំង អាល្លឺម៉ង់ អ៊ីតាលី ហូឡង់ និងជប៉ុន។

ពួកគេបាននិយាយក្នុងសេចក្ដីថ្លែងការណ៍យ៉ាងដូច្នេះថា៖ «យើងសូមអំពាវនាវដល់អ៊ីរ៉ង់ឱ្យបញ្ឈប់ជាបន្ទាន់នូវការគំរាមកំហែង ការដាក់មីន ការវាយប្រហារដោយដ្រូន និងមីស៊ីល និងការប៉ុនប៉ងផ្សេងទៀតដើម្បីបិទច្រកសមុទ្រចំពោះការដឹកជញ្ជូនពាណិជ្ជកម្ម និងអនុវត្តតាមសេចក្តីសម្រេចលេខ ២៨១៧ របស់ក្រុមប្រឹក្សាសន្តិសុខអង្គការសហប្រជាជាតិ»។

ពួកគេបន្តថា៖ «សេរីភាពនៃការធ្វើនាវាចរណ៍គឺជាគោលការណ៍ជាមូលដ្ឋាននៃច្បាប់អន្តរជាតិ រួមទាំងក្រោមអនុសញ្ញាអង្គការសហប្រជាជាតិស្តីពីច្បាប់សមុទ្រផងដែរ»។

ការបិទច្រកសមុទ្រហ័រមូហ្ស បានក្លាយជាអាវុធដ៏សំខាន់មួយសម្រាប់អ៊ីរ៉ង់ ក្នុងការឆ្លើយតបទៅនឹងការវាយប្រហាររបស់សហរដ្ឋអាមេរិក និងអ៊ីស្រាអែល។ ការបិទនេះ បានបង្កការរាំងស្ទះដល់ដំណឹកជញ្ជូនទំនិញសំខាន់ៗពីមជ្ឈិមបូព៌ា រួមទាំងប្រេងកាត ដែលធ្វើឱ្យថ្លៃដឹកជញ្ជូន និងថាមពល ហក់ឡើងទូទាំងសកលលោក។

បណ្ដាប្រទេសអឺរ៉ុបធំៗ និងជប៉ុនដដែល បាននិយាយដោយមិនទម្លាក់កំហុសលើសហរដ្ឋអាមេរិក និងអ៊ីស្រាអែលថា៖ «ឥទ្ធិពលនៃទង្វើរបស់អ៊ីរ៉ង់ នឹងប៉ះពាល់ដល់ប្រជាជនគ្រប់ផ្នែកទាំងអស់នៃពិភពលោក ជាពិសេសអ្នកងាយរងគ្រោះ»។

ពួកគេបន្តថា៖ «យើងសូមបង្ហាញការត្រៀមខ្លួនរួចជាស្រេច ក្នុងការរួមចំណែកដល់កិច្ចខិតខំប្រឹងប្រែងធានាបាននូវការធ្វើដំណើរឆ្លងកាត់ច្រកសមុទ្រដោយសុវត្ថិភាព។ យើងសូមស្វាគមន៍ចំពោះការប្តេជ្ញាចិត្តរបស់ប្រទេសនានា ដែលកំពុងចូលរួមក្នុងការរៀបចំផែនការនេះ»។

ក្រៅពីនោះ ប្លុកដដែលបានស្វាគមន៍ចំពោះការសម្រេចចិត្តរបស់ទីភ្នាក់ងារថាមពលអន្តរជាតិ (IEA) ដើម្បីអនុញ្ញាតឱ្យមានការបញ្ចេញទុនបម្រុងប្រេងកាតជាយុទ្ធសាស្ត្រ។ ពួកនិយាយយ៉ាងដូច្នេះថា៖ «យើងនឹងចាត់វិធានការផ្សេងទៀត ដើម្បីធ្វើឱ្យទីផ្សារថាមពលមានស្ថេរភាព រួមទាំងការធ្វើការជាមួយប្រទេសផលិតមួយចំនួន ដើម្បីបង្កើនផលិតកម្ម»៕

The post ប្រទេសធំៗនៅអឺរ៉ុប និងជប៉ុន ត្រៀមចូលរួមធានាសុវត្ថិភាពច្រកហ័រមូហ្ស តាមសំណើ ត្រាំ appeared first on Kampuchea Thmey Daily.

អ៊ីតាលី Archives - Kampuchea Thmey Daily

អ៊ីតាលី ដុន​ដាប​ខ្លាំង ដោយ​​រយៈ​ពេល ១២ ឆ្នាំ​ មិន​បាន​ឡើង World Cup ជុំ​ចុង​ក្រោយ

ប្រទេសធំៗនៅអឺរ៉ុប និងជប៉ុន ​ត្រៀមចូលរួម​ធានាសុវត្ថិភាព​ច្រកហ័រមូហ្ស ​តាមសំណើ ត្រាំ

អ៊ីតាលី ដុនដាបខ្លាំង ដោយរយៈពេល ១២ ឆ្នាំ មិនបានឡើង World Cup ជុំចុងក្រោយ

ប្រទេសធំៗនៅអឺរ៉ុប និងជប៉ុន ត្រៀមចូលរួមធានាសុវត្ថិភាពច្រកហ័រមូហ្ស តាមសំណើ ត្រាំ