ឧកញ្ញ៉ា ម៉ុង ឬទ្ធី Archives - Kampuchea Thmey Daily

អ្នកឧកញ៉ា ម៉ុង ឫទ្ធី៖ ដូងប្រេងអាចចម្រាញ់យកទៅចាក់ប្រើលើរថយន្ត ជំនួសប្រេងឥន្ធនៈបាន

Dy Bunnara — Sun, 17 May 2026 07:38:38 +0000

អ្នកឧកញ៉ា ម៉ុង ឫទ្ធី បានឲ្យដឹងថា បច្ចុប្បន្នមានបច្ចេកវិទ្យានិងម៉ាស៊ីន ដែលអាចចម្រាញ់ដូងប្រេងជាប្រេងឥន្ធនៈសម្រាប់ចាក់លើរថយន្ត ហើយដែលគេចាត់ទុកជាប្រេងលើដីនិងដែលអាចប្រើជំនួសឱ្យការនាំចូលប្រេងក្រោមដីពីបរទេស។

យ៉ាងណាមិញ អ្នកឧកញ៉ា ម៉ុង ឫទ្ធី បានបញ្ជាក់ថា ទោះបីជាដំណាំដូងប្រេងក្នុងប្រទេសកម្ពុជាមានសក្តានុពលខ្លាំង ក្នុងការកែច្នៃជាផលិតផលប្រើប្រាស់ប្រចាំថ្ងៃនិងប្រេងឥន្ធនៈ ប៉ុន្តែឧបសគ្គចម្បងគឺកង្វះខាតទំហំដីដាំដុះ ដើម្បីផ្គត់ផ្គង់ដល់ខ្សែចង្វាក់ផលិតកម្មខ្នាតធំ។

«បញ្ហាកង្វះខាតផ្ទៃដីដាំដុះ ទោះបីជាមានសក្តានុពលក៏ដោយ ក៏កម្ពុជាមិនទាន់មានវត្ថុធាតុដើមគ្រប់គ្រាន់នោះទេ ដោយសារផ្ទៃដីចម្ការដូងប្រេងសរុបបច្ចុប្បន្នមានត្រឹមតែជាង ២ ម៉ឺនហិកតាប៉ុណ្ណោះ»។ អ្នកឧកញ៉ាបញ្ជាក់។

ដោយសារទំហំនៃការដាំដុះនៅមានកម្រិត ការបង្កើតរោងចក្រផលិតប្រេងឆា ក៏មិនទាន់អាចធ្វើទៅរួចដែរ ដោយត្រូវការផ្ទៃដីដាំដុះបន្ថែមចំនួន ១ ម៉ឺនហិកតាទៀត ទើបអាចមានលទ្ធភាពបង្កើតរោងចក្រប្រេងឆាបាន។ អ្នកឧកញ៉ា បន្ថែម។

បើតាមអ្នកជំនួញកសិកម្មដែលមានប្រភពមកពីខេត្តតាកែវរូបនេះប្រាប់ថា នាពេលបច្ចុប្បន្ននេះកម្ពុជាមានត្រឹមតែរោងចក្រចម្រាញ់ប្រេងដូងឆៅ និងរោងចក្រកិនគ្រាប់ដូងប៉ុណ្ណោះ។ ហើយដោយសារបរិមាណប្រេងនៅមានតិចតួច កម្ពុជាក៏មិនទាន់អាចយកប្រេងដូងទៅកែច្នៃជាផលិតផលសម្រេចផ្សេងៗដូចជា សាប៊ូ ទៀន ឡេលាបស្បែក ព្រមទាំងមិនទាន់អាចយកទៅប្រើប្រាស់ក្នុងការផលិតនំចំណីផ្សេងៗបាននៅឡើយដែរ។

បើប្រៀបធៀបជាមួយប្រទេសជិតខាងដូចជា ម៉ាឡេស៊ី និងថៃ ដែលមានដូងប្រេងប្រភេទដូចគ្នា សេដ្ឋីកសិកម្មរូបនេះអះអាងថា ប្រទេសទាំងនោះបានធ្វើការកែច្នៃ និងទាញយកប្រយោជន៍ពីឧស្សាហកម្មនេះយ៉ាងជោគជ័យជាយូរណាស់មកហើយ ខណៈដែលប្រទេសកម្ពុជានៅមានកម្រិតនៅឡើយដោយសារខ្វះទិន្នផល៕

The post អ្នកឧកញ៉ា ម៉ុង ឫទ្ធី៖ ដូងប្រេងអាចចម្រាញ់យកទៅចាក់ប្រើលើរថយន្ត ជំនួសប្រេងឥន្ធនៈបាន appeared first on Kampuchea Thmey Daily.

មួយឆ្នាំៗ ក្រុមហ៊ុន ម៉ុង ឫទ្ធី ចំណាយថវិកា ៤០ លានដុល្លារ ប្រមូលទិញផលកសិករមកផលិតជាចំណីសត្វ

Dy Bunnara — Mon, 23 Feb 2026 03:02:05 +0000

រោងចក្រផលិតចំណីសត្វរបស់ក្រុមហ៊ុន ម៉ុង ឫទ្ធី នៅស្រុកព្រៃនប់ ខេត្តព្រះសីហនុ បានចំណាយថវិកាប្រមាណ ៤០ លានដុល្លារ លើការប្រមូលទិញកសិផលរបស់កសិករដើម្បីផលិតចំណីសត្វផ្គត់ផ្គង់ទីផ្សារក្នុងស្រុក។ នេះបើតាមអ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី ថ្លែងប្រាប់អ្នកសារព័ត៌មានក្នុងដំណើរទស្សនកិច្ចតំបន់អភិវឌ្ឍកសិឧស្សាហកម្មរបស់ក្រុមហ៊ុន ម៉ុង ឫទ្ធី គ្រុបនៅស្រុកព្រៃនប់ ខេត្តព្រះសីហនុ។

អ្នកឧកញ៉ា ម៉ុង ឫទ្ធី បានថ្លែងថា បច្ចុប្បន្នរោងចក្រផលិតចំណីសត្វរបស់ក្រុមហ៊ុនមានសមត្ថភាពផលិតបាន ២២ ម៉ឺនតោនក្នុងមួយឆ្នាំ និងបង្កើនសមត្ថភាពដល់ ៣៥ ម៉ឺនតោននៅពេលដំណើរការពេញលេញ។

លោកថា តាមរយៈខ្សែសង្វាក់ផលិតកម្មរបស់រោងចក្រ ក្រុមហ៊ុនត្រូវការប្រមូលទិញផលពីកសិករមានដូចជាដំឡូងមី ពោត រាប់សិបលានតោនដើម្បីផ្គត់ផ្គង់ខ្សែសង្វាក់រោងចក្រ។

ពាក់ព័ន្ធការប្រមូលទិញផលកសិកម្ម អ្នកឧកញ៉ាបានគូសបញ្ជាក់ថា កសិករក៏អាចនាំយកមកលក់ដោយផ្ទាល់នៅរោងចក្រ ដើម្បីកុំឲ្យខាតបង់ថ្លៃកំមីស្យុង ឬការស៊ីពីលើពីឈ្មួយកណ្ដាល។

បើតាមអ្នកឧកញ៉ា ម៉ុង ឫទ្ធី តាមរយៈរោងចក្រផលិតចំណីសត្វរបស់ក្រុមហ៊ុន បានជួយកាត់បន្ថយការហូរចេញវត្ថុធាតុដើមក្នុងស្រុកទៅក្រៅប្រទេសនាំឲ្យខាតបង់ដល់តម្លៃសេដ្ឋកិច្ចជាតិ ខណៈដែលកន្លងមកលោកមើលឃើញថា កសិករតែងតែនាំចេញវត្ថុធាតុដើមទៅលក់ទៅក្រៅប្រទេសក្នុងតម្លៃថោក ហើយត្រឡប់មកវិញត្រូវទិញចំណីសត្វដែលកែច្នៃរួចក្នុងតម្លៃខ្ពស់គុណជាពីរគុណជាបីដែលនាំឲ្យខាតបង់ច្រើន៕

The post មួយឆ្នាំៗ ក្រុមហ៊ុន ម៉ុង ឫទ្ធី ចំណាយថវិកា ៤០ លានដុល្លារ ប្រមូលទិញផលកសិករមកផលិតជាចំណីសត្វ appeared first on Kampuchea Thmey Daily.

ដាំកូនត្នោត ១ ០០០ ដើម តាមផ្លូវល្បឿនលឿនក្នុងខេត្តព្រះសីហនុទាក់ទាញទេសចរ

Dy Bunnara — Fri, 03 Nov 2023 07:50:01 +0000

កូនត្នោតចំនួន ១ ០០០ដើម ត្រូវបានធ្វើការដាំដុះនៅតាមបណ្តោយផ្លូវល្បឿនលឿនក្នុងក្នុងភូមិសាស្ត្រស្រុកស្ទឹងហាវ និងស្រុកព្រៃនប់ ខេត្តព្រះសីហនុ។ ពិធីដាំកូនត្នោតនេះ បានធ្វើឡើងនៅព្រឹកថ្ងៃទី៣ ខែវិច្ឆិកា ឆ្នាំ២០២៣ ដោយមានការចូលរួមពីលោក ម៉ុង ឬទ្ធី សមាជិកព្រឹទ្ធសភា លោក វង្ស ផាណាត ប្រធានក្រុមប្រឹក្សាខេត្ត និងលោន គួច ចំរើន អភិបាលខេត្តព្រះសីហនុ។

លោក ម៉ុង ឬទ្ធី បានឲ្យដឹងថា តាមការគ្រោងទុកឆ្នាំនេះមានផែនការដាំកូនត្នោតចំនួន ៥ ០០០ ដើម ខណៈថ្ងៃនេះបានធ្វើការដាំកូនត្នោតចំនួន ១ ០០០ ដើម នៅតាមបណ្តោយផ្លូវល្បឿនលឿនពីរាជធានីភ្នំពេញខេត្តព្រះសីហនុ។ ការដាំនេះ គឺដាំក្នុងចន្លោះពីដើមមួយទៅដើមមួយមានចម្ងាយ ៥ ម៉ែត្រ ដើម្បីឲ្យដើមត្នោតលូតលាស់ធំធាត់បានលឿន។

បើតាមលោក ម៉ុង ឬទ្ធី បច្ចុប្បន្នមានថ្នាលបណ្តុះកូនត្នោត គ្រោងបណ្តុះកូនត្នោតឲ្យបានចំនួន ១៤ ០០០ ដើម សម្រាប់ដាំដុះនៅពេលខាងមុខ ប្រសិនបើការដាំដុះបានល្អនឹងមានគម្រោងបណ្តុះបន្ថែមទៀត ដោយសារបច្ចុប្បន្ននៅក្នុងកសិដ្ឋានមានដំណាំកសិឧស្សាហកម្ម និងដំណាំ ហូបផ្លែជាច្រើនមុខមានដូចជា ដូងប្រេង កៅស៊ូ ក្រៅពីនោះមានដាំដំណាំហូបផ្លែមានដូចជាដូងក្រអូប សៅម៉ាវ ធុរ៉េន ស្វាយ និងដំណាំជាច្រើនប្រភេទផ្សេងទៀត។

លោក គួច ចំរើន អភិបាលខេត្តព្រះសីហនុបានថ្លែងថា ការបណ្តុះកូនត្នោតនិងរៀបចំកម្មវិធីដាំកូនត្នោតនៅលើទឹកដីឃុំកែវផុស និងស្រុកព្រៃនប់ស្របនឹងផ្លូវល្បឿនលឿន ដើម្បីបង្កើនសោភណភាព បរិស្ថានបន្ថែមទៀតសម្រាប់បំរើឲ្យវិស័យទេសចរណ៍ ពិសេសអ្នកធ្វើដំណើរតាមផ្លូវល្បឿនលឿនពីរាជធានីភ្នំពេញមកកាន់ខេត្តព្រះសីហនុ ហើយដើមត្នោតនេះក៏ជាសមិទ្ធិផលថ្មីមួយបន្ថែមទៀតនៅលើទឹកដីនៃខេត្តព្រះសីហនុ សម្រាប់កូនចៅជំនាន់ក្រោយផងដែរ។

ជាមួយគ្នានេះដែរលោកអភិបាលខេត្តព្រះសីហនុ ក៏បានធ្វើការអំពាវនាវឲ្យយុវជន សិស្សានុសិស្ស និងបងប្អូនប្រជាពលរដ្ឋចូលរួមថែរក្សា ការពារដើមត្នោតឲ្យបានល្អ ព្រោះនេះជាសម្បត្តិរបស់ជាតិទាំងអស់គ្នា ដែលត្រូវរួមគ្នាការពារ ថែរក្សាឲ្យបានគង់វង្ស។ ម្យ៉ាងទៀតដើមត្នោតក៏ជាកេរ្តិ៍តំណែលរបស់ដូនតារបស់យើងដែលបានបន្សល់ទុកសម្រាប់កូន ក្មួយជំនាន់ក្រោយ ព្រោះដើមត្នោតវាមានផលប្រយោជន៍ជាច្រើនយ៉ាងណាស់ សម្រាប់ឲ្យប្រជាពលរដ្ឋយកមកធ្វើការកែច្នៃប្រើប្រាស់មានដូចជា ស្លឹកយកទៅប្រកផ្ទះ ផ្កាកៀបចេញជាស្ករ។ ចំណែកផ្លែខ្ចីហូប ផ្លែទំុអាចយកទៅធ្វើជានំ និងដើមអាចច្រៀកធ្វើជាសម្ភារ: ឬគ្រឿងសង្ហារឹមផ្សេងៗជាច្រើនមុខផ្សេងទៀតទៅតាមតម្រូវការទីផ្សារនាពេលបច្ចុប្បន្ន៕

អត្ថបទ៖ ស៊ុយ ចាន់ធា

The post ដាំកូនត្នោត ១ ០០០ ដើម តាមផ្លូវល្បឿនលឿនក្នុងខេត្តព្រះសីហនុទាក់ទាញទេសចរ appeared first on Kampuchea Thmey Daily.

ក្រោយចិនប្រកាសនាំចូលដូងក្រអូប ឧកញ៉ា ម៉ុង ឫទ្ធី ថា ព័ត៌មាននេះ លោកទន្ទឹងរង់ចាំជាយូរមកហើយ

Din Thary — Thu, 21 Sep 2023 09:45:08 +0000

បន្ទាប់ពីចិត្តចិនបានប្រកាសពីការនាំចូលផ្លែដូងស្រស់ទៅកាន់ទីផ្សារប្រទេសចិន ឧកញ៉ា ម៉ុង ឫទ្ធី ដែលជាអគ្គនាយកក្រុមហ៊ុន ម៉ុងឫទ្ធីគ្រុប ដែលជាក្រុមហ៊ុនកសិ-ឧស្សាហកម្មនៅកម្ពុជា បានបង្ហាញថា ព័ត៌មាននៃការអនុញ្ញតនាំចេញដូងក្រអូបទៅកាន់ទីផ្សារក្រៅប្រទេសនេះ លោកបានទន្ទឹងរង់ចាំមកជាយូរណាស់មកហើយ ព្រោះលោកបានរួមចំណែកដាំដូងក្រអូបរហូតដល់ ១៥៥ហិតា ដោយមិនមានប្រើប្រាស់ជីគីមី។

តាមរយៈហ្វេសប៊ុកផ្លូវការ ឧកញ៉ា ម៉ុង ឫទ្ធី បានលើកឡើងថា «នៅព្រឹកថ្ងៃពុធទី២០ ខែកញ្ញា ឆ្នាំ២០២៣ នេះ ពេលកំពុងតែបើកមើលហ្វេសប៊ុកស្រាប់បានឃើញ ព័ត៌មានគួរឲ្យភ្ញាក់ផ្អើលមួយដែលរូបខ្ញុំបានទន្ទឹងរង់ចាំជាយូរណាស់មកហើយនោះគឺ ប្រទេសចិនបានអនុញ្ញាតអោយព្រះរាជាណាចក្រយើងនាំចូលផ្លែដូងស្រស់ ដែលសមស្របនឹងលក្ខខណ្ឌពាក់ព័ន្ធ ទៅកាន់ទីផ្សាររបស់ខ្លួនចាប់ពីពេលនេះតទៅ»។

លោកបានបន្តថា បើទោះបីជាពិភពលោកកំពុងប្រឈមមុខ និងវិបត្តិកូវិត១៩ ក៏ដោយក្តី ប៉ុន្តែសម្រាប់រយៈពេល ៣ឆ្នាំកន្លងមក លោកក៏បានរួមចំណែកនៅក្នុងការដាំដំណាំដូងក្រអូបតាមធម្មជាតិ ដើម្បីអាចរួមចំណែកក្នុងការលើកកម្ពស់ទីផ្សារកម្ពុជា។

លោកបានគូសបញ្ជាក់ថា «ដំណាំដូងក្រអូបដែលខ្ញុំបានដាំក្នុងរយៈពេល ៣ឆ្នាំកន្លងមកនេះ មានផ្ទៃដីដាំដុះសរុប ១៥៥ ហិតា ហើយស្មើនិងចំនួន ៤៣.៤០០ដើម ហើយការដាំដុះដូងនេះ ខ្ញុំមិនប្រើប្រាស់ជីគីមីនោះទេ គឺដើម្បីចូលរួមចំណែកបម្រើទីផ្សារក្នុងប្រទេស និងអាចបានចូលរួមចំណែកនាំចេញមួយផ្នែកតូចផងដែរ»។

គួរជម្រាបថា នាថ្ងៃទី២០ ខែកញ្ញា ឆ្នាំ២០២៣ នេះ ក្រសួងកសិកម្ម រុក្ខាប្រមាញ់ និងនេសាទ ជាមួយអគ្គរដ្ឋបាលគយចិន បានចុះហត្ថលេខាលើពិធីសារស្ដីពីលក្ខខណ្ឌតម្រូវភូតគាមអនាម័យសម្រាប់ការនាំចេញផ្លែដូងស្រស់ពីកម្ពុជាទៅកាន់ប្រទេសចិន កាលពីថ្ងៃទី១៥ កញ្ញា កន្លងទៅ។ ជាក់ស្ដែង គិតត្រឹមឆ្នាំ២០២២ នៅប្រទេសកម្ពុជាសព្វថ្ងៃ មានផ្ទៃដីដាំដុះដំណាំដូងចំនួន ១ម៉ឺន ៧ពាន់ហិកតា ក្នុងនោះ ផ្ទៃដីប្រមូលផលមានចំនួន ១ម៉ឺន ៤ពាន់ ហិកតា។ ចំណែកទិន្នផលសរុបនៅក្នុងឆ្នាំ២០២២ នៅទូទាំងប្រទេស មានចំនួនសរុប ២៤ម៉ឺន ៨ពាន់តោន៕

The post ក្រោយចិនប្រកាសនាំចូលដូងក្រអូប ឧកញ៉ា ម៉ុង ឫទ្ធី ថា ព័ត៌មាននេះ លោកទន្ទឹងរង់ចាំជាយូរមកហើយ appeared first on Kampuchea Thmey Daily.

ឧកញ្ញ៉ា ម៉ុង ឬទ្ធី បញ្ជាឲ្យម្ចាស់អាខោនហ្វេសប៊ុកចំនួន២លប់រូបលោក ចេញជាបន្ទាន់ ករណីយករូបលោកដើម្បីផ្សព្វផ្សាយលក់ដំណាំហូបផ្លែ

Sokhom Khon — Thu, 27 Oct 2022 03:29:41 +0000

លោកឧកញ្ញ៉ា ម៉ុង ឬទ្ធី បានប្រកាសឲ្យម្ចាស់អាខោនហ្វេសប៊ុកចំនួន២ដែលបានយករូបលោក និងភរិយាទៅដាក់ដើម្បីធ្វើការផ្សព្វផ្សាយលក់ដំណាំហូបផ្លែ២ប្រភេទ ដែលលោកឧកញ្ញ៉ាបានបញ្ជាក់ថា គឺជាការបោកប្រាស់។

នៅក្នុងហ្វេសប៊ុកផេករបស់លោកឧកញ្ញ៉ា ម៉ុង ឬទ្ធី បានសរសេរកាលពីថ្ងៃទី២៦ ខែតុលា ឆ្នាំ២០២២នេះថា សូមប្រីយមិត្តកុំជឿអោយសោះ ទន្លាប់នេះខ្ញុំបះនៅកាលីហ្វ័រញ៉ាទេ ខ្ញុំដាំ១០ឆ្នាំនៅស្រុកយើងហើយអត់មានផ្លែទេ។ ស្វាយណាំដកម៉ៃនេះ ដាំនៅចំការខ្ញុំ នៅក្នុងតំបន់រមណីយដ្ឋានអភិវឌ្ឍន៍កសិទេសចរណ៍ ម៉ុង ឫទ្ធី សែនជ័យ ទៅមើលសិនទៅ Free ។

ជាមួយគ្នានេះដែរ លោកឧកញ្ញ៉ា ម៉ុង ឬទ្ធី ក៏បានបញ្ចាឲ្យម្ចាស់អាខោនហ្វេសប៊ុកចំនួន២ ដែលឈ្មោះ Ah Ya និងឈ្មោះ Veng Sokkea ដែលបានយករូបលោក និងភរិយា ទៅដាក់ភ្ជាប់ជាមួយរូបដើមរុក្ខជាតិជាដំណាំហូបផ្លែដើម្បីធ្វើការផ្សព្វផ្សាយលក់បោកប្រាស់អតិថិជន។ លោកឧកញ្ញ៉ា បានសង្កត់ធ្ងន់ថា អ្នកទាំងពីរត្រូវតែលប់រូបខ្ញុំចេញពី facebook របស់ខ្លួន ដើម្បីកុំអោយមានរឿងវែងឆ្ងាយ សូមប្រីយមិត្តយើងកុំចាញ់ការបោកប្រាស់នេះអោយសោះ។

សូមបញ្ជាក់ថា លោកឧកញ្ញ៉ា ម៉ុង ឬទ្ធី គឺជាអ្នកជំនួញមួយរូបនៅក្នុងប្រទេសកម្ពុជា ដែលផ្ដោតលើកសិកម្ម ហើយបច្ចុប្បន្ន លោកឧកញ្ញ៉ា ម៉ុង ឬទ្ធី មានក្រុមហ៊ុនជាច្រើននៅក្នុងនៅដៃតាមបណ្ដាខេត្តមួយចំនួន ជាពិសេសនៅខេត្តព្រះសីហនុ៕

អត្ថបទ៖ សុខុម

The post ឧកញ្ញ៉ា ម៉ុង ឬទ្ធី បញ្ជាឲ្យម្ចាស់អាខោនហ្វេសប៊ុកចំនួន២លប់រូបលោក ចេញជាបន្ទាន់ ករណីយករូបលោកដើម្បីផ្សព្វផ្សាយលក់ដំណាំហូបផ្លែ appeared first on Kampuchea Thmey Daily.

ឧកញ្ញ៉ា ម៉ុង ឬទ្ធី Archives - Kampuchea Thmey Daily

អ្នក​ឧកញ៉ា ម៉ុង ឫទ្ធី៖ ដូងប្រេង​អាច​ចម្រាញ់​យក​ទៅ​ចាក់​ប្រើ​លើ​រថយន្ត​ ជំនួស​ប្រេង​ឥន្ធនៈបាន

មួយ​ឆ្នាំៗ ក្រុមហ៊ុន ម៉ុង ឫទ្ធី ចំណាយ​ថវិកា ៤០ លាន​ដុល្លារ ប្រមូល​ទិញ​ផល​កសិករ​មក​ផលិត​ជា​ចំណី​សត្វ

ដាំកូនត្នោត ១ ០០០ ដើម តាម​ផ្លូវល្បឿន​លឿន​ក្នុង​ខេត្តព្រះសីហនុ​ទាក់ទាញ​​ទេសចរ

ក្រោយចិនប្រកាសនាំចូលដូងក្រអូប ឧកញ៉ា​ ម៉ុង ឫទ្ធី ថា ព័ត៌មាននេះ លោកទន្ទឹងរង់ចាំជាយូរមកហើយ

អ្នកឧកញ៉ា ម៉ុង ឫទ្ធី៖ ដូងប្រេងអាចចម្រាញ់យកទៅចាក់ប្រើលើរថយន្ត ជំនួសប្រេងឥន្ធនៈបាន

មួយឆ្នាំៗ ក្រុមហ៊ុន ម៉ុង ឫទ្ធី ចំណាយថវិកា ៤០ លានដុល្លារ ប្រមូលទិញផលកសិករមកផលិតជាចំណីសត្វ

ដាំកូនត្នោត ១ ០០០ ដើម តាមផ្លូវល្បឿនលឿនក្នុងខេត្តព្រះសីហនុទាក់ទាញទេសចរ

ក្រោយចិនប្រកាសនាំចូលដូងក្រអូប ឧកញ៉ា ម៉ុង ឫទ្ធី ថា ព័ត៌មាននេះ លោកទន្ទឹងរង់ចាំជាយូរមកហើយ