កាល​ពី​ថ្ងៃ​ទី​២៧ ខែ​មេសា ឆ្នាំ ២០២៦ សហព័ន្ធកីឡា​បាល់ទាត់​អាស៊ី​ បាន​ផ្តល់​ដំណឹង​ថា កម្ពុជា ទទួល​បាន ១​កៅអី​កន្លះ​សម្រាប់​ការ​ចូល​រួម​ប្រកួត​ពាន​រង្វាន់​​ក្លិប​អាស៊ី​កម្រិត​ទី​២ AFC Champions League Two ។ ១​កៅអី​សម្រាប់​ក្លិប​បាល់ទាត់របស់​កម្ពុជា ប្រកួត​នៅ​វគ្គ​សន្សំ​ពិន្ទុ​ក្នុង​ពូល និង​កន្លះ​កៅអី ទៀតសម្រាប់​ក្លិប​មួយ​ប្រកួត​ជម្រុះ។ ការ​ប្រកួត​ជម្រុះ​នេះ​មាន​ន័យ​ថា បើ​ជោគជ័យ​គឺ​ឡើង​ទៅ​វគ្គ​សន្សំពិន្ទុ​ក្នុង​ពូល ប៉ុន្តែ​ប្រសិន​បើ​ចាញ់ ត្រូវ​ធ្លាក់​ទៅ​​ប្រកួត​វគ្គ​សន្សំពិន្ទុ​ក្នុង​ពូល​ពាន​រង្វាន់​អាស៊ី​កម្រិត​ទី៣ AFC Challenge League។

ប្រការ​នេះ​មាន​ន័យ​ថា នៅ​រដូវ​កាល ២០២៦-២៧ កម្ពុជា​មាន​ក្លិប​ចំនួន ២ ប្រកួត​ក្នុង​ពាន​រង្វាន់​ទ្វីប​អាស៊ី។

រហូត​ដល់​ពេល​នេះ ព្រះ​ខ័​ន​រាជ​ស្វាយរៀង ទទួល​បាន​កៅអី ដើម្បី​ប្រកួត​ក្នុង​ពាន​រង្វាន់ AFC Champions League Two ​នៅ​​វគ្គ​សន្សំ​ពិន្ទុ​ក្នុង​ពូល ក្នុង​នាម​ជា​ម្ចាស់​ជើង​ឯក​លីគ​បាល់ទាត់​កំពូល​កម្ពុជា​រដូវ​កាល ២០២៥-២៦។ ចំណែក​ក្លិប​ដែល​​ត្រូវ​ប្រកួត​ជម្រុះ​​គឺ​​ជា​ក្រុម​ចំណាត់​ថ្នាក់​លេខ ២ នៃ​លីគ​បាល់ទាត់​កំពូល​កម្ពុជា បុន្តែ​​នៅ​មិន​ទាន់​រក​ឃើញ​ទេ។

ក្លិបរបស់​កម្ពុជាមាន​តែ ៤ ប៉ុណ្ណោះ​ដែល​ត្រូវ​បាន​ទទួល​ស្គាល់​ក្នុង​ការ​បំពេញ​ទៅ​តាម​លក្ខខណ្ឌ​អាជ្ញា​ប័ណ្ណ​ក្លិបអាស៊ី​សម្រាប់​ការ​ចូល​រួម​ប្រកួត​ពាន​រង្វាន់​អាស៊ី គឺ ព្រះ​ខ័ន​រាជ​ស្វាយរៀង ភ្នំពេញក្រោន បឹងកេត និង វិសាខា៕

អត្ថបទ៖ វិរបុត្រ

The post AFC ​ផ្តល់​ដំណឹង​ផ្លូវ​ការ ដល់​​កម្ពុជា ពី​ការទទួល​បាន ២ ក្លិប​ លេង​ពាន​អាស៊ី រដូវ​កាល​ក្រោយ appeared first on Kampuchea Thmey Daily.

ក្រុម ព្រះខ័នរាជស្វាយរៀង បានកក់កៅអីឡើងទៅវគ្គ​ផ្តាច់ព្រ័ត្រពាន AFC Challenge League រដូវកាល ២០២៥-២០២៦ ជាផ្លូវការ បន្ទាប់ពីយកឈ្នះលើក្រុម Manila Digger សរុបលទ្ធផលទាំង ២ ជើង ៤-១។ ជើងទី ១ ធ្វើនៅទឹកដី កម្ពុជា ក្រុម ព្រះខ័នរាជស្វាយរៀង និង Manila Digger ស្មើគ្នា ១-១។ ចំណែកជើងទី ២ នៅទឹកដី ហ្វីលីពីន ក្រុម ព្រះខ័នរាជស្វាយរៀង ទទួលជ័យជម្នះក្នុងលទ្ធផល ៣-០។

យោងតាម Footy Ranking ដែលជាគេហទំព័រផ្លូវការរបស់ AFC ដើម្បីគណនាពិន្ទុក្លិបក្នុងទ្វីបអាស៊ី បានធ្វើបច្ចុប្បន្នភាពនៅល្ងាចថ្ងៃ សៅរិ៍ ទី ១៨ ខែ មេសា ឆ្នាំ ២០២៦ នេះ ក្រោយ ព្រះខ័នរាជស្វាយរៀង ឈ្នះ Manila Digger គឺ កម្ពុជា បានឡើងមួយចំណាត់ថ្នាក់សម្រាប់តំបន់ អាស៊ី ទាំងមូលពីលេខ ១៩ មកលេខ ១៨ និងសម្រាប់តំបន់អាស៊ីខាងកើតឡើងពីលេខ ១០ មកលេខ ៩ ។

លីគ កម្ពុជា បានកើន ១.៣៧៥ ពិន្ទុ បើធៀបពិន្ទុកាលពីខែ មីនា ដែលមានចំនួន ២៦.២២៥ ពិន្ទុ ជាមួយនឹងពិន្ទុបច្ចុប្បន្ន ដែលទទួលបានចំនួន ២៧.៦០០ ពិន្ទុ។ តាមរយៈស្ថិតិនេះ បានធ្វើឱ្យលីគ កម្ពុជា ទម្លាក់លីគ ឥណ្ឌូណេស៊ី ទៅកាន់ចំណាត់ថ្នាក់លេខ ១០ វិញ ដែលបច្ចុប្បន្នមាន ២៧.២៩៩ ពិន្ទុ។

គួរបញ្ជាក់ផងដែរ ថា ប្រសិនបើ កម្ពុជា នៅរក្សាចំណាត់ថ្នាក់ប៉ុណ្ណេះ នោះនឹងទទួលបាន ១ កៅអីកន្លះ ដើម្បីលេងពានលំដាប់ទី ២ AFC Champions League Two នៅរដូវកាល ២០២៧-២០២៨៕

អត្ថបទ៖ សេម កុសល

The post កម្ពុជា វ៉ា ឥណ្ឌូណេស៊ី ឡើងមកលេខ ៩ ក្នុងចំ​ណាត់ថ្នាក់ក្លិប AFC ក្រោយ ព្រះខ័នរាជស្វាយរៀង ឈ្នះ Manila Digger appeared first on Kampuchea Thmey Daily.

នៅរដូវកាល ២០២៦-២០២៧ ក្លិបក្នុងលីគកំពូល កម្ពុជា ត្រូវបានសហព័ន្ធបាល់ទាត់ទ្វីប អាស៊ី (AFC) ផ្តល់ជូន ១ កៅអីកន្លះ ដើម្បីចូលរួមប្រកួតក្នុងពានក្លិបអាស៊ីលំដាប់ទី ២ AFC Champions League Two។ យ៉ាងណាមិញ សហព័ន្ធបាល់ទាត់ កម្ពុជា បានកំណត់រួចរាល់ហើយ អំពីកៅអីក្រុមត្រូវចូលរួមប្រកួត ដោយក្រុមជើងឯកលីគទទួលបាន ១ កៅអី (ចូលប្រកួតក្នុងពូលស្វ័យប្រវត្តិ) និងក្រុមជើងឯករងទទួលបានកន្លះកៅអី (ប្រកួតជម្រុះ playoffs)។

ទោះបីជាយ៉ាងណា មានករណីមួយ ដែលក្រុមជើងឯក ឬជើងឯករងលីគ មិនអាចឡើងទៅលេងពានរបស់ AFC បាន ប្រសិនបើពួកគេមិនទទួលបាន «អាជ្ញាប័ណ្ណក្លិបទ្វីប អាស៊ី»។ នេះបើតាមកញ្ញាជា ស្រីលីស ប្រធានផ្នែកអាជ្ញាប័ណ្ណក្លិបនៃលីគកម្ពុជា ប្រាប់ «កម្ពុជាថ្មី»។ កញ្ញាបានឱ្យដឹង ថា ក្លិបទាំងអស់ចាំបាច់ត្រូវតែបំពេញអាជ្ញាប័ណ្ណក្លិបទ្វីប អាស៊ី ឱ្យបានត្រឹមត្រូវ ទើបអាចមានកៅអីចូលលេងពានរបស់ AFC បាន។

កញ្ញាបានបញ្ជាក់ ថា មិនមែនក្លិប ដែលទទួលបានជើងឯក ឬជើងឯករង សុទ្ធតែបានកៅអីចូលលេងពាន AFC នោះទេ គឺពួកគេត្រូវតែមានអាជ្ញាប័ណ្ណក្លិបទ្វីប អាស៊ី ជាមុនសិន។ ប្រការនេះ មានន័យ ថា ទោះបីជាក្រុមជើងឯក ឬ ជើងឯករងលីគក៏ដោយ បើគ្មានអាជ្ញាប័ណ្ណក្លិបទ្វីប អាស៊ី ទេ នោះកៅអីលេងពាន AFC នឹងត្រូវផ្ទេរទៅក្រុមនៅចំណាត់ថ្នាក់បន្ទាប់ ឬ ក្រុមម្ចាស់ពានសម្តេចតេជោ តាមការកំណត់របស់សហព័ន្ធបាល់ទាត់ កម្ពុជា។

តាមរយៈការលើកឡើងនេះ បានបង្ហាញ ថា អាជ្ញាប័ណ្ណក្លិបទ្វីប អាស៊ី ពិតជាសំខាន់សម្រាប់ក្លិបបាល់ទាត់អាជីពទាំងអស់។ បច្ចុប្បន្នក្រុមហ៊ុនលីគ កម្ពុជា (CPL) កំពុងតែមមារញឹកយ៉ាងខ្លាំង ក្នុងការចុះត្រួតពិនិត្យក្លិបបាល់ទាត់ទាំង ១១ របស់ កម្ពុជា ដើម្បីវាយតម្លៃផ្តល់អាជ្ញាប័ណ្ណក្លិបទ្វីប អាស៊ី។ ការប្រកាស ក្លិបទទួលបានអាជ្ញាប័ណ្ណក្លិបទ្វីប អាស៊ី នឹងធ្វើឡើងជាផ្លូវការនៅថ្ងៃទី ២៤ ខែ មេសា ឆ្នាំ ២០២៦៕

អត្ថបទ៖ សេម កុសល

The post ក្រុមជើងឯក ឬជើងឯករងលីគ នឹងគ្មានសិទ្ធិ​លេងពាន AFC បើមិនបានបំពេញលក្ខខណ្ឌនេះ appeared first on Kampuchea Thmey Daily.

ជាការពិត ក្លិបទាំងអស់ ចាំបាច់ត្រូវតែមានអាជ្ញាប័ណ្ណក្លិបបាល់ទាត់ទ្វីបអាស៊ី ទើបអាចទទួលបានកៅអីប្រកួតពានទ្វីប អាស៊ី ទាំង ៣ កម្រិតនៅរដូវកាលក្រោយ។ ជាពិសេស ពាន AFC Champions League Two ដែល កម្ពុជា នឹងទទួលបាន ១ កៅអី​កន្លះ។

ក្លិបទាំងអស់ត្រូវតែបំពេញលក្ខន្តិកៈ ៥ យ៉ាងជាចាំបាច់ ទើបទទួលបាន អាជ្ញាប័ណ្ណក្លិបបាល់ទាត់ទ្វីបអាស៊ី។ នេះបើតាមកញ្ញា ជា ស្រីលីស ប្រធានផ្នែកអាជ្ញាប័ណ្ណក្លិបនៃលីគកម្ពុជា ថ្លែងនៅក្នុងកិច្ចសម្ភាសជាមួមសារព័ត៌មាន «កម្ពុជាថ្មី»។

ទី ១. លក្ខខណ្ឌវិនិច្ឆ័យផ្នែកកីឡា៖ ក្លិបនីមួយៗត្រូវផ្តោតលើការអភិវឌ្ឍកម្មវិធីអប់រំរបស់យុវជន ដោយតម្រូវឱ្យក្រុមយុវជនមាន ៤ កម្រិតជាចាំបាច់ ក្នុងនោះមានយុវជនអាយុក្រោម ១០ ឆ្នាំ, ១៤ ឆ្នាំ, ១៦ ឆ្នាំ និង ១៩ ឆ្នាំ។ ជាមួយគ្នា ក្រុមយុវជនទាំង ៤ កម្រិត ត្រូវមានការប្រកួតប្រជែងដណ្តើមពានជាផ្លូវការ ដែលរៀបចំដោយសហព័ន្ធបាល់ទាត់ កម្ពុជា។ ចំណែកផ្នែកនារីវិញ ត្រូវតម្រូវឱ្យមានយ៉ាងហោចណាស់ ១ កម្រិត។

ទី ២. លក្ខខណ្ឌវិនិច្ឆ័យហេដ្ឋារចនាសម្ព័ន្ធ៖ លក្ខខណ្ឌនេះ គឺផ្តោតសំខាន់លើកីឡដ្ឋានប្រកួត និងទីលានហ្វឹកហាត់ ដែលត្រូវតាមស្តង់ដាកំណត់របស់ AFC។ លក្ខខណ្ឌស្តង់ដា គឺត្រូវមានទីលានតាមការកំណត់ ប្រព័ន្ធសុវត្ថិភាព ពន្លឺភ្លើង ស្មៅ និង បន្ទប់កីឡាករ ជាដើម។

ទី ៣. លក្ខខណ្ឌវិនិច្ឆ័យបុគ្គលិក និងរដ្ឋបាល៖ លក្ខខណ្ឌនេះផ្តោតទៅលើរចនាសម្ព័ន្ធរបស់ក្លិប និងការគ្រប់គ្រងរបស់ក្លិប។ ជាចាំបាច់ ក្លិបត្រូវតែមានបុគ្គលិក ដែលមានសមត្ថភាព ហើយអាចធានាបាន ថា ការបំពេញការងារទាំងឡាយ ប្រកបដោយវិជ្ជាជីវៈ។ លក្ខខណ្ឌវិនិច្ឆ័យបុគ្គលិក និងរដ្ឋបាល គឺត្រូវបាន AFC ចែងដល់ទៅ ១៨ ចំណុច ប៉ុន្តែចំណុចដែលសំខាន់ ក្លិបត្រូវមានទីស្នាក់ការ​ដើម្បីឱ្យបុគ្គលិកបំពេញការងារ។

បន្ថែមពីនេះទៀត ក្លិបត្រូវមានអ្នកចាត់ការ អ្នកគ្រប់គ្រងទូទៅ ឬអគ្គលេខាធិការក្លិប អ្នកទទួលបន្ទុកផ្នែកហិរញ្ញវត្ថុ ផ្នែកទីផ្សារ ផ្នែកព័ត៌មាន ផ្នែកច្បាប់ និងផ្សេងៗទៀត។ រឿងដ៏សំខាន់មួយទៀត ក្លិបនីមួយៗត្រូវមានផ្នែកបច្ចេកទេសស្តង់ដា​ដែលតម្រូវឱ្យមានគ្រូបង្វឹកកាន់សញ្ញាបត្រកម្រិតខ្ពស់ (AFC Pro License, UEFA Pro License…) ហើយត្រូវមានទាំងគ្រូជំនួយ គ្រូកាយសម្បទារជាដើម។

ទី ៤. លក្ខខណ្ឌវិនិច្ឆ័យផ្នែកច្បាប់៖ ជាជំហានដំបូង ក្លិបទាំងអស់ត្រូវតែជានីតិបុគ្គលស្របច្បាប់ ដែលបានចុះបញ្ជី​នៅ​ក្រសួងមហាផ្ទៃ ឬជាក្រុមហ៊ុនមួយនៅក្រសួងពាណិជ្ជកម្ម។ រឿងដ៏សំខាន់មួយទៀត ផ្នែកនេះត្រូវមានការបំពេញត្រឹមត្រូវចំពោះកិច្ចសន្យារបស់កីឡាករ កីឡាការិនី ក្រុម​ការងារ​គ្រូ​បង្វឹក និងបុគ្គលិក។

ទី ៥. លក្ខខណ្ឌវិនិច្ឆ័យហិរញ្ញវត្ថុ៖ លក្ខខណ្ឌនេះហាក់មានភាពស្មុគស្មាញ​ច្រើន​ ដោយក្លិបនីមួយៗត្រូវធ្វើសវនកម្មហិរញ្ញវត្ថុជាប្រចាំឆ្នាំ។ ក្លិបត្រូវមានរបាយការណ៍ច្បាស់លាស់អំពីចំណូល ចំណាយ ហើយត្រូវធ្វើសវនកម្មដោយក្រុមហ៊ុនឯកជន។ សម្រាប់គម្រោងថវិកា​ប្រចាំឆ្នាំ ក្លិបត្រូវមានផែនការហិរញ្ញវត្ថុ មិនមែនត្រឹមតែ ១ ឆ្នាំទេ គឺទៅដល់ ៣ ឆ្នាំ។ រឿងដ៏សំខាន់មួយទៀត គឺក្លិបមិនមានបញ្ហាហិរញ្ញវត្ថុ ដោយជាប់បំណុល ឬជំពាក់ប្រាក់ខែបុគ្គលិក និងកីឡាករ៕

អត្ថបទ៖ សេម កុសល

The post ក្លិបលីគ កម្ពុជា ត្រូវបំពេញលក្ខខណ្ឌ ៥ ចំណុច​នេះដាច់ខាត ទើបទទួលបានអាជ្ញាប័ណ្ណក្លិបអាស៊ី appeared first on Kampuchea Thmey Daily.

រឿង​ក្តី​របស់​កីឡាករ​បរទេស ៧ នាក់​ដែល​​ទទួល​បាន​សញ្ជាតិ​ម៉ាឡេស៊ី និង​បាន​ចូល​រួម​ជា​មួយ​ជម្រើស​ជាតិ​ម៉ាឡេស៊ី លើ​ឆាក​អន្តរជាតិ​អស់​រយៈ​ពេល​ជា​ច្រើន​ខែ​មក​ហើយ ពេល​នេះ​បាន​សម្រេច​ជា​ផ្លូវ​ការ​។ សហព័ន្ធ​កីឡា​បាល់ទាត់​ម៉ាឡេស៊ី ត្រូវ​បាន​រក​ឃើញ​មាន​កំហុស​តាម​មាត្រា ៥៦ នៃវិន័យ និង​​ក្រមសីលធម៌ របស់​សហព័ន្ធ​កីឡា​បាល់ទាត់​អាស៊ី។ កីឡាករ​ទាំង ៧ នាក់ ដែល​ទទួល​បាន​សញ្ជាតិ​ម៉ាឡេស៊ី​គឺ​គ្មាន​ប្រភព​ដើម​នៃ​ជីដូន​ជីតា​ជា​សញ្ជាតិ​ម៉ាឡេស៊ី​ឡើយ។

តាម​រយៈ​ការ​រក​ឃើញ​កំហុស​នេះ ក្រុម​បាល់ទាត់​ជម្រើស​ជាតិ​ម៉ាឡេស៊ី ត្រូវ​បាន​កាត់​សេចក្តី​ឲ្យ​ចាញ់ ក្រុម​បាល់ទាត់​ជម្រើស​ជាតិ​នេប៉ាល់ ០-៣ ដែល​ការ​ប្រកួត​កាល​ពី​ថ្ងៃ​ទី​២៥ ខែ​មីនា ឆ្នាំ ២០២៥ ម៉ាឡេស៊ី ឈ្នះ នេប៉ាល់ ២-០។ ការ​ប្រកួត​មួយ​ទៀត ម៉ាឡេស៊ី ត្រូវ​ឲ្យ​ចាញ់ វៀតណាម ០-៣ ដែល​ការ​ប្រកួត​នេះ​កាល​ពី​ថ្ងៃ​ទី​១០ ខែ​មិថុនា ឆ្នាំ ២០២៥ ដែល ពេល​នោះ ម៉ាឡេស៊ី ឈ្នះ វៀតណាម ៤-០។

បន្ទាប់​ពី សម្រេច​នេះ វៀតណាម ទទួល​បាន​កៅអី ឡើង​ទៅ​ជុំ​ចុង​ក្រោយ ដោយ​មាន ១៥ ពិន្ទុ​ស្ថិត​នៅកំពូល​តារាង​ពូល F ខណៈ ម៉ាឡេស៊ី ស្ថិត​នៅ​លេខ ២ មាន ៩ ពិន្ទុ ហើយ ឡាវ លេខ ៣ មាន ៣ ពិន្ទុ និង​នេប៉ាល់ លេខ ៤ មាន ៣ ពិន្ទុ។

ជា​មួយ​គ្នា​នេះ សហព័ន្ធ​កីឡា​បាល់ទាត់​ម៉ាឡេស៊ី ត្រូវ​បាន​ពិន័យ​ជា​ប្រាក់ចំនួន​ ៥​ម៉ឺន​ដុល្លារអាមេរិក ដែល​ត្រូវ​បង់​ប្រាក់​ក្នុង​រយៈ​ពេល ៣០ ថ្ងៃ បន្ទាប់​ពី​សេចក្តី​សម្រេច។ ចំណែក​​កីឡាករ​​ក៏​ទទួល​រង​ពិន័យ​ដែរ​គឺ ផ្អាក​ពី​ការ​ចូល​រួម​ប្រកួត​​រយៈ​ពេល ១២ ខែ និង​ជា​ទឹក​ប្រាក់​ផង​ដែរ៕

ប្រែ​សម្រួល៖ វិរបុត្រ

The post ម៉ាឡេស៊ី ត្រូវ​បាន​ពិន័យ​ជា​ផ្លូវ​ការ​ហើយ ជុំ​វិញ​កីឡាករ​បរទេស​ចូល​សញ្ជាតិ appeared first on Kampuchea Thmey Daily.

កាលពីថ្ងៃទី ២៣ ខែ កុម្ភៈ ឆ្នាំ ២០២៦ AFC បានប្រកាសលទ្ធផលផ្លូវការ នៃតារាងចំណាត់ថ្នាក់ក្លិបក្នុងទ្វីបអាស៊ី (AFC Club Competitions Ranking) សម្រាប់ពាក់កណ្តាលរដូវកាល ២០២៥/២៦ ដែលចំណាត់ថ្នាក់នេះ ពិតជាមានសារៈសំខាន់សម្រាប់ការរៀបចំបែងចែកកូតាក្រុមចូលរួមប្រកួតក្នុងពានរង្វាន់ទ្វីបអាស៊ី រដូវកាល ២០២៧/២៨។

លទ្ធផលបង្ហាញថា ប្រទេស កម្ពុជា ឈរនៅលេខ ២២ ក្នុងទ្វីបអាស៊ីទាំងមូល និងឈរនៅលេខ ១១ ក្នុងតំបន់ អាស៊ីខាងកើត ដោយមានពិន្ទុសរុប ២២.៨៥០ ពិន្ទុ។ តាមរយៈទន្នន័យនេះ គឺ កម្ពុជា បានធ្លាក់ ១ ចំណាត់ថ្នាក់ ពីលេខ ១០ ក្នុងតំបន់ អាស៊ីខាងកើត មកកាន់លេខ ១១ វិញ។ ដោយឡែក ឥណ្ឌូណេស៊ី បានឡើងរហូតដល់ ២ ចំណាត់ថ្នាក់មកឈរលេខ ៩ ខណៈ ហុងកុង ឈរនៅលេខ ១០ លើ កម្ពុជា ១ ចំណាតថ្នាក់។

បើក្រឡេកមើលចំណាត់ថ្នាក់រវាង កម្ពុជា និង ហុងកុង គឺមានពិន្ទុលើសខ្វះគ្នាត្រឹមតែ ១ ពិន្ទុជាងប៉ុណ្ណោះ។ ដូច្នេះ កម្ពុជា នៅមានឱកាសឡើងមកកាន់ចំណាត់ថ្នាក់កំពូលទាំង ១០ វិញ ដោយសារ កម្ពុជា នៅសល់ក្លិប ២ ត្រូវប្រកួតប្រជែងក្នុងពាន AFC Challenge League ខណៈ ហុងកុង វិញ គឺអស់ក្រុមចូលរួមប្រកួតហើយ។

គួរបញ្ជាក់ផងដែរ ថា ប្រសិនបើ កម្ពុជា អាចឡើងមកកាន់ចំណាត់ថ្នាក់លេខ ១០ វិញ ក្រោយបញ្ចប់រដូវកាល ២០២៥-២៦ នេះ នោះនឹងទទួលបានកៅអីចំនួន ១ កៅអីកន្លះ ដើម្បីលេងក្នុងពានរង្វាន់ AFC Champions League Two នៅរដូវកាល ២០២៧-២០២៨ ប៉ុន្តែបើរក្សានៅចំណាត់ថ្នាក់ដដែលដូចនេះ នោះនឹងទទួលបានកៅអីត្រឹមតែ ១ កៅអីគត់ប៉ុណ្ណោះនៅពាន AFC Champions League Two និងកន្លះកៅអីទៀតនៅពាន AFC Challenge League៕

អត្ថបទ៖ សេម កុសល

The post កម្ពុជា ធ្លាក់ ១ ចំណាត់ថ្នាក់ បន្ទាប់ពី AFC ធ្វើបច្ចុប្បន្នភាពតារាងចំណាត់ថ្នាក់ក្លិបទ្វីប អាស៊ី appeared first on Kampuchea Thmey Daily.

ពាន​រង្វាន់​​ជា​ច្រើន​នឹង​ត្រូវ​ផ្តល់​ទៅ​សមាជិក​នៅ​តាម​តំបន់​ផ្សេង​ៗ​គ្នា​របស់​សហព័ន្ធ​កីឡា​បាល់ទាត់​ទ្វីប​អាស៊ី ដូច​ជា​ តំបន់​អាស៊ីកណ្តាល តំបន់​អាស៊ី​ខាង​លិច និង​តំបន់​អាស៊ី​ខាង​កើត​ជា​ដើម។ ក្នុង​នោះ សហព័ន្ធ​កីឡ​បាល់ទាត់​អាស៊ី​អាគ្នេយ៍ (AFF) ក្រោម​ការ​ដឹក​នាំ​បុរស​ជន​ជាតិ​ខ្មែរ លោក ខៀវ សាម៉េត ​ជា​ប្រធាន និង​​សមាជិក​របស់​ខ្លួន​ក៏​​​ទទួល​បាន​ពាន​រង្វាន់​កម្រិត​អាស៊ី​​ជា​ច្រើន​ផង​ដែរ។

សហព័ន្ធ​កីឡា​បាល់ទាត់​អាស៊ាន និង​សមាជិក​របស់​ខ្លួន​ទទួល​បាន​ពាន​រង្វាន់​ដូច​ខាង​ក្រោម

• សហព័ន្ធ​កីឡា​បាល់ទាត់​អាស៊ាន​ ទទួល​ពាន​រង្វាន់សហព័ន្ធ​​កីឡា​បាល់ទាត់តំបន់​​ល្អ​ប្រចាំ​ឆ្នាំ​របស់ AFC
• ថៃ ទទួល​បាន​ពាន​រង្វាន់​សមាជិក​ AFC ល្អ​ប្រចាំ​ឆ្នាំ (ថ្នាក់​ពេជ្រ)
• វៀតណាម ទទួល​បាន​ពាន​រង្វាន់​សមាជិក​ AFC ល្អ​ប្រចាំ​ឆ្នាំ (ថ្នាក់​ពេជ្រ)
• ឡាវ ទទួល​ពាន​ពាន​រង្វាន់​សមាជិក AFC ល្អ​ប្រចាំ​​ឆ្នាំ (ថ្នាក់​ត្បូង​ទទឹម)
• ម៉ាឡេស៊ី ទទួល​បាន​ពានបណ្តុះ​បណ្តាល​ថ្នាល AFC ល្អ​ប្រចាំ​ឆ្នាំ (ថ្នាក់​មេដាយ​ប្រាក់)
• វៀតណាម ទទួល​បាន​ពានបណ្តុះ​បណ្តាល​ថ្នាល AFC ល្អ​ប្រចាំ​ឆ្នាំ (ថ្នាក់​មេដាយ​សំរិទ្ធ)

ខាង​លើ គ្រាន់​តែ​ពាន​រង្វាន់​សម្រាប់​សមាជិក​របស់ AFC ប្រចាំ​តំបន់​អាស៊ាន​ប៉ុណ្ណោះ ប៉ុន្តែ​មាន​ពាន​រង្វាន់​ជា​ច្រើន​ទៀត​សម្រាប់​តំបន់​ទូទាំងអាស៊ី​មាន​ដូច​ជា ពាន​កីឡាករ កីឡាការិនី​ឆ្នើម​ ពាន​កីឡាករ កីឡាការិនី​​ផ្នែក​ផ្នែក​ហ្វូត​សាល ពាន​គ្រូ​បង្វឹក​ផ្នែក​បុរស​ ពាន​​គ្រូ​បង្វឹក​ផ្នែក​នារី​ ពានកីឡាករ​ល្អ​លើ​ឆាក​អន្តរជាតិ​ ព្រម​ទាំង​ពាន​រង្វាន់​ជា​ច្រើន​ទៀត៕

អត្ថបទ៖ វីរបុត្រ

The post AFF ក្រោម​ការ​ដឹក​នាំ​​លោក ខៀវ សាម៉េត ទទួល​បាន​ពានសហព័ន្ធ​ល្អ​ប្រចាំ​តំបន់​របស់ AFC ឆ្នាំ ២០២៥ appeared first on Kampuchea Thmey Daily.

នៅរដូវកាលថ្មី ២០២៥-២០២៦ កាន់តែពិសេសថែមទៀត ដោយ​កម្ពុជា​ មានក្លិបចំនួន ២ គឺ​ ព្រះខ័នរាជស្វាយរៀង និង ភ្នំពេញក្រោន បានទទួលកៅអីឈានចូលវគ្គចែកពូលពានក្លិបកម្រិតទី ៣ របស់ទ្វីប អាស៊ី AFC Challenge League។

យ៉ាងណា អ្នកគាំទ្រក៏ចង់ដឹងផងដែរ ថា តើក្រៅអំពីក្លិប ២ ខាងលើ មានក្លិបកម្ពុជា​ណាខ្លះទៀត ធ្លាប់ទទួលបានកៅអីចូលលេងក្នុងពានរបស់ AFC ហើយក្លិបណា ដែលធ្លាប់បានចូលលេងច្រើនគេ? ចម្លើយនោះ បើរាប់ចាប់ពីក្រោយសម័យសង្គ្រាមមក គឺមានក្លិប កម្ពុជា ចំនួន ៦ មានប្រវត្តិបានចូលលេងពានកម្រិត អាស៊ី ខណៈ ភ្នំពេញក្រោន ជាក្លិប ដែលមានប្រវត្តិបានចូលលេងច្រើនជាងគេបំផុត។

១. ក្លិ​បភ្នំពេញក្រោន៖ ក្លិបដែលមានមូលដ្ឋាននៅ រាជធានីភ្នំពេញ មួយនេះធ្លាប់បានចូលលេងពានកម្រិតអាស៊ីច្រើនជាងគេ សរុបចំនួន ៨ លើក។ ក្នុងនោះពានកម្រិតទី ២ AFC Cup ៣ លើក និងពានកម្រិតទី ៣ AFC President’s Cup/ AFC Challenge League ចំនួន ៥លើក។

+ពាន AFC President’s Cup/ AFC Challenge League៖

• ឆ្នាំ ២០០៥ (ត្រឹមវគ្គចែកពូល)
• ឆ្នាំ ២០០៩ (ត្រឹមវគ្គចែកពូល)
• ឆ្នាំ ២០១១ (ឈានចូលវគ្គផ្តាច់ព្រ័ត្រ)
• ឆ្នាំ ២០១២ (ឈានដល់វគ្គក្នុងពូលនៃជុំផ្តាច់ព្រ័ត្រ)
• រដូវកាល ២០២៥-២០២៦ (បាននឹងកំពុងឈានចូលវគ្គចែកពូល…)

+ពាន AFC Cup ដែលបច្ចុប្បន្នប្រែឈ្មោះមកជា AFC Champions League Two៖

• ឆ្នាំ ២០១៧ (ត្រឹមវគ្គជម្រុះបឋម playoffs)
• ឆ្នាំ ២០២២ (ត្រឹមវគ្គចែកពូល)
• រដូវកាល ២០២៣-២០២៤ (ឈានដល់វគ្គពាក់កណ្តាលផ្តាច់ព្រ័ត្រប្រចាំតំបន់ អាស៊ាន)

២. ក្លិបព្រះខ័នរាជស្វាយរៀង៖ ក្លិបមានមូលដ្ឋាននៅខេត្តស្វាយរៀង មួយនេះធ្លាប់បានចូលលេងក្នុងពានកម្រិត អាស៊ី សរុបចំនួន ៤ ដង ក្នុងនោះពានកម្រិតទី ២ AFC Cup ១ លើក និងពានកម្រិតទី ៣ AFC President’s Cup/ AFC Challenge League ៣ លើក។

+ ពាន AFC President’s Cup/ AFC Challenge League៖

• ឆ្នាំ ២០១៤ (ត្រឹមវគ្គចែកពូល)
• រដូវកាល ២០២៤-២០២៤ (ឈានដល់វគ្គផ្តាច់ព្រ័ត្រ)
• រដូវកាល ២០២៥-២០២៦ (បាននឹងកំពុងឈានចូលវគ្គចែកពូល…)។

+ ពាន AFC Cup ដែលបច្ចុប្បន្នប្រែឈ្មោះមកជា AFC Champions League Two៖

• ឆ្នាំ ២០២០ (ឈានដល់វគ្គចែកពូល)។

៣. ក្លិបណាហ្គាវើលដ៍៖ ក្លិបដែលមានមូលដ្ឋាននៅខេត្តកំពង់ស្ពឺមួយនេះ បានចូលលេងពានកម្រិតទ្វីប អាស៊ី ចំនួន ៤ លើក ក្នុងនោះពានកម្រិតទី ២ AFC Cup ២ លើក និងពានកម្រិតទី ៣ AFC President’s Cup/ AFC Challenge League ២ លើក។

+ ពាន AFC President’s Cup/ AFC Challenge League៖

• ឆ្នាំ ២០០៨ (ត្រឹមចូលវគ្គចែកពូល)
• ឆ្នាំ ២០១០ (ត្រឹមវគ្គចែកពូល)

+ ពាន AFC Cup ដែលបច្ចុប្បន្នប្រែឈ្មោះមកជា AFC Champions League Two៖

• ឆ្នាំ ២០១៧ (ត្រឹមវគ្គជម្រុះបឋម playoffs)
• ឆ្នាំ ២០១៩ (ត្រឹមវគ្គចែកពូល)

៤. ក្លិបបឹងកេត៖ បឹងកេត ក៏ជាក្រុមមួយធ្លាប់បានលេងក្នុងពានកម្រិត អាស៊ី ច្រើនផងដែរ ដោយពួកគេធ្លាប់បានចូលលេងសរុបចំនួន ៣ លើក ក្នុងនោះពាន ពានកម្រិតទី ២ AFC Cup ២ លើក និងពានកម្រិតទី ៣ AFC President’s Cup/ AFC Challenge League ១ លើក។

+ ពាន AFC President’s Cup/ AFC Challenge League៖

• ឆ្នាំ ២០១៣ (ត្រឹមវគ្គចែកពូល)

+ ពាន AFC Cup ដែលបច្ចុប្បន្នប្រែឈ្មោះមកជា AFC Champions League Two៖

• ឆ្នាំ ២០១៧ (ត្រឹមវគ្គចែកពូល)
• ឆ្នាំ ២០១៨ (ត្រឹមវគ្គចែកពូល)
• ឆ្នាំ ២០២១ ពួកគេក៏ទទួលបានកៅអីចូលលេងពាននេះផងដែរ ប៉ុន្តែត្រូវបានគេរំសាយ។

៥. អតីតក្លិបខេមរាកីឡា៖ ក្លិបខេមរាកីឡា គឺជាអតីតក្លិបដ៏ចំណាស់មួយរបស់ កម្ពុជា។ មុនពេលរំសាយនៅឆ្នាំ ២០១១ ពួកគេធ្លាប់បានលេងក្នុងពានកម្រិតអាស៊ី ២ លើក ក្នុងនោះគឺពានកម្រិតទី ៣ AFC President’s Cup/ AFC Challenge League ទាំង ២ លើក។

+ ពាន AFC President’s Cup/ AFC Challenge League៖

• ឆ្នាំ ២០០៦ (ឈានចូលវគ្គពាក់កណ្តាលផ្តាច់ព្រ័ត្រ)
• ឆ្នាំ ២០០៧ (ត្រឹមវគ្គចែកពូល)។

៦. ក្លិបវិសាខា៖ ក្នុងចំណោមក្លិបទាំង ៥ ខាងលើ វិសាខា រាប់បានជាក្លិបក្មេងខ្ចីជាងគេ ប៉ុន្តែពួកគេហាក់បង្ហាញនូវសន្ទុះនូវការអភិវឌ្ឍក្លិបសឹងមិននឹកស្មាន ខណៈបច្ចុប្បន្នពួកគេកំពុងត្រូវបានគេចាត់ទុកជាក្លិបលំដាប់កំពូលមួយប្រចាំលីគកំពូលកម្ពុជា។ ក្លិប វិសាខា ធ្លាប់ទទួលបានកៅអីលេងក្នុងពានកម្រិតទី ២ AFC Cup ២ លើក ប៉ុន្តែនៅឆ្នាំ ២០២១ ត្រូវបានគេរំសាយ ដោយសារបញ្ហាជម្ងឺឆ្លងកូវីដ-១៩ និងនៅឆ្នាំ ២០២២ បានឈានចូលត្រឹមវគ្គចែកពូល។

+ ពាន AFC Cup ដែលបច្ចុប្បន្នប្រែឈ្មោះមកជា AFC Champions League Two៖

• ឆ្នាំ ២០២១ (ត្រូវបានគេរំសាយ)
• ឆ្នាំ ២០២២ (ត្រឹមវគ្គចែកពូល)។

ខាងលើនេះ គឺជាទន្នន័យត្រួសៗអំពីក្លិបបាល់ទាត់ កម្ពុជា ទាំង ៦ ដែលធ្លាប់ទទួលបានកៅអីចូលលេងក្នុងពានកម្រិតទ្វីប អាស៊ី (AFC)។ យ៉ាងណា គិតមកដល់បច្ចុប្បន្ន AFC បានធ្វើបច្ចុប្បន្នភាព ដោយបានបែងចែងពានជា ៣ កម្រិត ដោយពានកម្រិតទី ១ គឺពាន AFC Champions League។ ពានកម្រិតទី ២ មានឈ្មោះថា AFC Champions League Two និងពានកម្រិតទី ៣ គឺពាន AFC Challenge League។

ទោះបីជាយ៉ាងណា ក្លិបរបស់ កម្ពុជា ពុំដែលមានក្លិបណាមួយបានចូលលេងពានកម្រិតទី ១ នោះទេ ដោយបទពិសោធកន្លងមក ធ្លាប់បានចូលលេងត្រឹមពានកម្រិតទី ២ និងទី ៣ ប៉ុណ្ណោះ៕

អត្ថបទ៖ សេម កុសល

The post តើក្លិប​បាល់ទាត់​កម្ពុជា ណាធ្លាប់បានកៅអីចូលលេងពានទ្វីបអាស៊ី (AFC) ច្រើនជាងគេ? appeared first on Kampuchea Thmey Daily.