សម្រាប់ចំណាត់ថ្នាក់ក្នុងពូល C បច្ចុប្បន្ន ក្រុម U17 អូស្ត្រាលី កំពុងឈរកំពូលតារាង ដោយឆ្លងកាត់ ២ ប្រកួត ឈ្នះទាំង ២ មាន ៦ ពិន្ទុពេញ។ ចំណែក U17 កម្ពុជា ឈរលេខ ២ មាន ៤ ពិន្ទុ, ក្រុម U17 សិង្ហបុរី ឈរលេខ ៣ មាន ១ ពិន្ទុ និងក្រុម U17 ប្រ៊ុយណេ នៅបាតតារាង មាន ០ ពិន្ទុ។

ការប្រកួតចុងក្រោយនៃវគ្គចែកពូលពានយុវជនអាស៊ាន ២០២៦ ថ្ងៃនេះ គឺហាក់តឹងតែងខ្លាំងគ្រប់ពូលតែម្តង ទាំងពូល A, B និង C។ នៅក្នុងពូល C គឺក្រុម U17 កម្ពុជា ត្រូវការឈ្នះលើក្រុម U17 អូស្ត្រាលី រសៀលនេះ ទើបអាចឡើងទៅវគ្គពាក់កណ្តាលផ្តាច់ព្រ័ត្រជាលើកទី ២ ក្នុងនាមជាក្រុមលេខ ១ ក្នុងពូល។

យ៉ាងណា ប្រសិនបើការប្រកួតបញ្ចប់ទៅដោយលទ្ធផលស្មើគ្នា ក៏ក្រុម U17 កម្ពុជា មានឱកាសឡើងផងដែរ ប៉ុន្តែត្រូវរង់ចាំអ៊ុតមើលតំណែងលេខ ២ ល្អ។ ការរង់ចាំអ៊ុតមើលតំណែងលេខ ២ ល្អនេះ ពិតជាមិនងាយស្រួលនោះទេ ព្រោះត្រូវពឹងលើសំណាងទាំងស្រុង។

ប្រការនេះមានន័យ ថា U17 កម្ពុជា អាចឡើងក្នុងនាមជាក្រុមលេខ ២ ល្អបាន ទាល់តែប្រកួតចុងក្រោយនេះ ពូល A ឥណ្ឌូណេស៊ី ចាញ់ វៀតណាម ហើយ ម៉ាឡេស៊ី ចាញ់ ទីម័រ។ ចំណែក ពូល B ថៃ ចាញ់ ឡាវ ហើយ មីយ៉ាន់ម៉ា ចាញ់ ហ្វីលីពីន។ ដូច្នេះ បើ U17 កម្ពុជា ចង់ឡើងទៅវគ្គបន្ត ត្រូវតែយកឈ្នះលើ U17 អូស្ត្រាលី រសៀលនេះដាច់ខាត ទើបអាចមានសុវត្ថិភាពឈរនៅចំណាត់ថ្នាក់លេខ ១ ហើយឡើងទៅវគ្គពាក់កណ្តាលផ្តាច់ព្រ័ត្របាន។

គួរឱ្យដឹង ថា ចាប់តាំងពីពានយុវជនអាស៊ានអាយុក្រោម ១៧ ឆ្នាំនេះបង្កើតឡើងដំបូងពីឆ្នាំ ២០០២ ក្រុម U17 អូស្ត្រាលី ធ្លាប់ចូលរួមបានចំនួន ៩ លើក ក្នុងនោះលទ្ធផលល្អបំផុត ធ្លាប់ឈ្នះជើងឯក បីលើក ជើងឯករង ១ លើក លេខបី ៣ លើក និងធ្លាក់វគ្គក្នុងពូល ២ លើក ។ ចំណែក U-17 កម្ពុជា វិញធ្លាប់បានចូលរួមចំនួន ១២ លើក ក្នុងនោះលទ្ធផលល្អបំផុត ធ្លាប់បានចំណាត់ថ្នាក់លេខ ៤ កាលពីឆ្នាំ ២០១៦៕

អត្ថបទ៖ សេម កុសល

The post U17 កម្ពុជា ត្រូវឈ្នះ U17 អូស្ត្រាលី ថ្ងៃនេះ ទើបអាចឡើងវគ្គ ១/២ ពានយុវជនអាស៊ាន ជាលើកទី ២ appeared first on Kampuchea Thmey Daily.

សម្រាប់ពូល C ក្រុម U17 ប្រ៊ុយណេ បានបើកឆាកការប្រកួតពានយុវជនអាស៊ានអាយុក្រោម ១៧ ឆ្នាំ ដោយចាញ់ក្រុម U17 អូស្ត្រាលី យ៉ាងចាស់ដៃក្នុងលទ្ធផល ០ ទល់នឹង ១២។ ចំណែកក្រុម U17 កម្ពុជា វិញ បានស្មើគ្នាជាមួយនឹងក្រុម U-17 សិង្ហបុរី ក្នុងលទ្ធផល ០ ទល់នឹង ០។

បច្ចុប្បន្នក្រុម U17 អូស្ត្រាលី កំពុងឈរនៅកំពូលតារាងក្នុងពូល C។ រីឯ U17 កម្ពុជា ឈរនៅលេខ ២, U17 សិង្ហបុរី ឈរនៅលេខ ៣ និង U-17 ប្រ៊ុយណេ ឈរនៅលេខ ៤ ដែលជាចំណាត់ថ្នាក់បាតតារាង។ ក្នុងស្ថានភាពបច្ចុប្បន្ន ក្រុម U17 កម្ពុជា កំពុងស្ថិតនៅតំណែងលេខ ២ ល្អ ដែលអាចមានឱកាសឡើងទៅវគ្គពាក់កណ្តាលផ្តាច់ព្រ័ត្រពានយុវជនអាស៊ាន។

យ៉ាងណាមិញ ការប្រកួតក្នុងពូល គឺនៅសល់ ២ ប្រកួតទៀត។ ដូច្នេះបើ កម្ពុជា ចង់ឡើងទៅវគ្គបន្ត ត្រូវតែឈ្នះការប្រកួតទាំង ២ ដែលនៅសល់ ឬយ៉ាងហោចណាស់ឈ្នះ ១ និងស្មើ ១។ ការប្រកួតរសៀលនេះ ក្រុម U-17 កម្ពុជា ត្រូវតែយកឈ្នះលើក្រុម U-17 ប្រ៊ុយណេ ដាច់ខាត ទើបអាចមានសង្ឃឹម។ ប្រសិនបើការប្រកួតនេះទទួលបានលទ្ធផលមិនល្អនោះទេ នោះនឹងពិបាកណាស់ ដើម្បីឡើងទៅវគ្គពាក់កណ្តាលផ្តាច់ព្រ័ត្រ ដោយសារប្រកួតចុងក្រោយ ត្រូវជួប U17 អូស្ត្រាលី ដែលជាក្រុមខ្លាំងប្រចាំពូល។

គួរឱ្យដឹង ថា ចាប់តាំងពីពានយុវជនអាស៊ានអាយុក្រោម ១៧ ឆ្នាំនេះបង្កើតឡើងដំបូងពីឆ្នាំ ២០០២ ក្រុម U17 ប្រ៊ុយណេ ធ្លាប់ចូលរួមបានចំនួន ១០ លើក ក្នុងនោះធ្លាក់ក្នុងវគ្គចែកពូលទាំងអស់។ ចំណែក U-17 កម្ពុជា វិញធ្លាប់បានចូលរួមចំនួន ១២ លើក ក្នុងនោះលទ្ធផលល្អបំផុត ធ្លាប់បានចំណាត់ថ្នាក់លេខ ៤ កាលពីឆ្នាំ ២០១៦៕

អត្ថបទ៖ សេម កុសល

The post U17 កម្ពុជា ត្រូវការឈ្នះ U17 ប្រ៊ុយណេ ថ្ងៃនេះដាច់ខាត ដើម្បីក្តីសង្ឃឹមក្នុងពានយុវជនអាស៊ាន appeared first on Kampuchea Thmey Daily.

មុនការប្រកួតនេះមកដល់ គ្រូបង្គោលលោកខែក ខេមរិន្ទ បានបង្ហាញការតាំងចិត្តជាខ្លាំង ដើម្បីនាំក្រុមឡើងទៅវគ្គបន្ត។ លោកបានមានប្រសាសន៍ ថា៖ «ការប្រកួតពានរង្វាន់នេះពិតជាមានសារៈសំខាន់ សម្រាប់ការអភិវឌ្ឍបាល់ទាត់ កម្ពុជា និងកីឡាករក្មេងៗរបស់យើង ឱ្យមានការប្រកួតកម្រិតអន្តរជាតិ។ ក្រុមទាំងអស់នៅក្នុងពូលជាមួយយើង សុទ្ធតែជាក្រុមខ្លាំង ដែលមិនអាចមើលស្រាលបាន ប៉ុន្តែពួកយើងនឹងប្រឹងប្រែងឱ្យអស់ពីសមត្ថភាព ដើម្បីប្រជែងកៅអីវគ្គបន្ត»។

ជំនួបរវាងក្រុម U17 កម្ពុជា ទល់នឹង U17 សិង្ហបុរី ថ្ងៃស្អែកវេលាម៉ោង ៧:៣០ យប់ គឺជាការប្រកួតនៅក្នុងពូល D។ ក្នុងថ្ងៃជាមួយគ្នានេះ ពូល D ក៏មានមួយគូទៀតដែរត្រូវប្រកួត គឺក្រុម U17 អូស្ត្រាលី ត្រូវជួបគ្នាជាមួយក្រុម U17 ប្រ៊ុយណេ នៅវេលាម៉ោង ៣:៣០ រសៀល។

ក្រុមយុវជន U17 គោព្រៃ កម្ពុជា និងក្រុម U17 សិង្ហបុរី ត្រូវបានគេមើលឃើញ ថា ជាក្រុមមានសមត្ថភាពប្រហាក់ប្រហែលគ្នានៅក្នុងការប្រកួតប្រជែងពានមួយនេះ។ ចាប់តាំងពីពាន ASEAN U17 Boys’ Championship បង្កើតឡើងពីឆ្នាំ ២០០២ មក ក្រុមទាំង ២ មិនដែលបានឈ្នះពាននេះឡើយ ដោយមានលទ្ធផលល្អបំផុតទទួលបានត្រឹមចំណាត់ថ្នាក់លេខ ៤។

ពានយុវជនអាស៊ានអាយុក្រោម ១៧ ឆ្នាំនេះ បានរៀបចំឡើង ១៦ លើកហើយ ប៉ុន្តែ កម្ពុជា បានចូលរួមចំនួន ១២ លើក។ ក្នុងចំណោមការចូលរួមទាំង ១២ លើក គឺ U17 កម្ពុជា ភាគច្រើនបានធ្លាក់ត្រឹមវគ្គជម្រុះក្នុងពូល លើកលែងតែនៅឆ្នាំ ២០១៦ មួយប៉ុណ្ណោះ ដែលបានឡើងដល់វគ្គពាក់កណ្តាលផ្តាច់ព្រ័ត្រ ប៉ុន្តែបានចាញ់ វៀតណាម ០-១។ ដោយឡែកឈានចូលវគ្គដណ្តើមចំណាត់ថ្នាក់លេខ ៣ បានចាញ់ ថៃ ០-៣។

ចំណែកយុវជន សិង្ហបុរី វិញ ក៏មិនខុសពីយុវជន កម្ពុជា ច្រើនដែរ ដោយពួកគេធ្លាប់បានចូលរួមសរុបចំនួន ១២ លើក។ តាមរយៈប្រវត្តិកន្លងមក U17 សិង្ហបុរី ភាគច្រើនធ្លាក់នៅវគ្គចែកពូល លើកឡើងតែនៅឆ្នាំ ២០០៨ និង ២០១១ ដែលពួកគេធ្វើបានល្អបំផុត ទទួលបានចំណាត់ថ្នាក់លេខ ៤ ពីរលើក។

គួរបញ្ជាក់ ថា ការប្រកួតពាន ASEAN U17 Boys’ Championship 2026 នឹងចាប់ផ្តើមពីថ្ងៃទី ១១ ខែ មេសា ដល់ថ្ងៃទី ២៤ ខែ មេសា ឆ្នាំ ២០២៦៕

អត្ថបទ៖ សេម​ កុសល

The post ក្រុម U17 កម្ពុជា ត្រូវបើកឆាកជួប U17 សិង្ហបុរី ក្នុងពានយុវជនអាស៊ានល្ងាចនេះ appeared first on Kampuchea Thmey Daily.

ក្រុម​ព្រះ​ខ័ន​រាជ​ស្វាយរៀង ត្រូវ​ប្រកួត​ជា​មួយក្រុម Manila Digger ជើង​ទី១ វគ្គ​ពាក់​កណ្តាល​ផ្តាច់​ព្រ័ត្រ ពាន​រង្វាន់ AFC Challenge League នៅ​ថ្ងៃ​​ព្រហស្បតិ៍ ទី​៩ ខែមេសា ឆ្នាំ ២០២៦ នៅ​ពហុកីឡដ្ឋាន​ជាតិ​អូឡាំពិក។ បន្ទាប់​មក នៅ​ថ្ងៃ​ទី​១២ ខែ​មេសា​ ពួក​គេ​ត្រូវ​ប្រកួត​ជា​មួយ​ក្រុម អឹមអូអាយ កំពង់ដេវ៉ា ក្នុង​លីគ​បាល់ទាត់​កំពូល​កម្ពុជា ហើយ​ត្រូវ​ធ្វើ​ដំណើរ​ទៅ​ប្រទេស​ហ្វីលីពីន ដើម្បី​ប្រកួត​​ជើង​ទី​២ ជា​មួយ Manila Digger នៅ​ថ្ងៃ​ទី​១៦ ខែ​មេសា ឆ្នាំ ២០២៦។

ដូច្នេះ​ កីឡាករ និង​ក្រុម​ការងារ​គ្រូ​បង្វឹកគ្មាន​ពេល​វេលាសម្រាក​​ជួប​ជុំ​ក្រុម​គ្រួសារ​ក្នុង​ឱកាស​ពិធី​បុណ្យ​ចូល​ឆ្នាំ​ថ្មី ប្រពៃណី​ជាតិ​ខ្មែរ​ពី​ថ្ងៃ​ទី ១៤ ដល់ ថ្ងៃ​ទី​១៦ ខែ​មេសា​ ឡើយ ហើយ​សូម្បី​តែ​ពេល​វេលា​​សម្រាប់​ការ​​ត្រៀម​ខ្លួន​ក៏​តិច​ថែម​ទៀត។

ចំណែក ក្រុម​បាល់ទាត់​ជម្រើស​ជាតិ​កម្ពុជា​អាយុ ១៧ ឆ្នាំ បាន​ចេញ​ដំណើរ​ទៅ​ប្រទេស​ឥណ្ឌូណេស៊ី នៅ​ថ្ងៃ​ទី​៨ ខែ​មេសា ឆ្នាំ ២០២៦ ដើម្បី​ត្រៀម​ខ្លួន​​ប្រកួត​ពានយុវជន​អាស៊ាន ASEAN U-17 Boys’ Championship ពី​ថ្ងៃ​ទី​១១ ដល់ ទី​១៧ ខែ​មេសា។ ពេល​វេលា​នេះ​គឺ​ចំ​ថ្ងៃ​ពិធី​បុណ្យ​ចូល​ឆ្នាំ​ថ្មី ប្រពៃណី​ខ្មែរពេញ​តែ​ម្តង។

ក្រុម U17 កម្ពុជា ស្ថិត​នៅ​ពូល C ជា​មួយ អូស្ត្រាលី សិង្ហបុរី និង ព្រុយណេ។ ពាន​រង្វាន់​នេះ​មាន ៣ ពូល ហើយ​​ក្រុម​ដែល​ទទួល​បាន​​លេខ ១ ក្នុង​ពូល​ទាំង ៣ និងក្រុម​​លេខ ២ ល្អ​បំផុត​ ១ ក្រុម ​ត្រូវ​ឡើង​ទៅ​កាន់​វគ្គ​ពាក់​កណ្តាល​ផ្តាច់​ព្រ័ត្រ។

កម្មវិធី​ប្រកួត​របស់​ក្រុម U17 កម្ពុជា

• កម្ពុជា ប៉ះ សិង្ហបុរី នៅ​ថ្ងៃ​ទី​ ១១ មេសា
• កម្ពុជា ប៉ះ ព្រុយណេ នៅ​ថ្ងៃ​ទី​១៤ មេសា
• កម្ពុជា ប៉ះ អូស្ត្រាលី នៅ​ថ្ងៃ​ទី១៧ មេសា

អត្ថបទ៖ វិរបុត្រ

The post ព្រះ​ខ័ន​រាជ​ស្វាយរៀង និង U17 កម្ពុជា ត្រូវឃ្លាត​ឆ្ងាយ​ពី​គ្រួសារ​ក្នុង​ឱកាស​បុណ្យ​ចូលឆ្នាំ​ថ្មី appeared first on Kampuchea Thmey Daily.

តាមរយៈលទ្ធផលចាប់ឆ្នោត គឺពានយុវជនអាស៊ានអាយុក្រោម ១៧ ឆ្នាំក្នុងឆ្នាំ ២០២៦ នេះ គឺពូល A មានក្រុមជម្រើសជាតិអាយុក្រោម ១៧ ឆ្នាំ ឥណ្ឌូណេស៊ី វៀតណាម ម៉ាឡេស៊ី និង ទីម័រ។ ពូល B មាន ថៃ ឡាវ មីយ៉ាន់ម៉ា និង ហ្វីលីពីន។ ចំណែកពូល C មាន អូស្ត្រាលី កម្ពុជា សិង្ហបុរី និង ប្រ៊ុយណេ។

គួរបញ្ជាក់ ថា ការប្រកួតពាន ASEAN U17 Championship 2026 នឹងធ្វើឡើងនៅប្រទេស ឥណ្ឌូណេស៊ី ពីថ្ងៃទី ១១ ដល់ថ្ងៃទី ២៣ ខែ មេសា ឆ្នាំ ២០២៦៕

អត្ថបទ៖ សេម កុសល

The post ក្រុម កម្ពុជា អាយុក្រោម ១៧ ឆ្នាំ ស្ថិតនៅពូល C ក្នុងពាន ASEAN U17 Championship 2026 appeared first on Kampuchea Thmey Daily.