Frenzy Freestyle Archives - Kampuchea Thmey Daily

ការប្រកួតបាល់ទាត់ហ្វ្រីស្តាល៍ពិភពលោកមានព្រឹត្តិការណ៍ធំ ៤ ផ្សេងគ្នា ខណៈមានមួយមកដល់កម្ពុជាឆ្នាំនេះ

chean virakbot — Tue, 17 Mar 2026 08:03:08 +0000

សហព័ន្ធកីឡាបាល់ទាត់ហ្វ្រីស្តាល៍ពិភពលោក (WFFA) ត្រូវបានបង្កើតឡើងជាផ្លូវការកាលពីថ្ងៃទី១ ខែមករា ឆ្នាំ ២០១៧ ដែលដល់ពេលនេះមានរយៈពេល ៩ ឆ្នាំហើយ ប៉ុន្តែការលេងបាល់ហ្វ្រីស្តាយ៍បានកើតមានឡើងជាយូរមកហើយ។

បន្ទាប់ពីសហព័ន្ធត្រូវបានបង្កើតឡើងជាផ្លូវការ កម្មវិធីប្រកួតកីឡាបាល់ទាត់ហ្វ្រីស្តាល៍ ត្រូវបានរៀបចំឡើងជាច្រើនទាំងកម្រិតពិភពលោក ទ្វីប តំបន់ និងប្រទេស។ គិតត្រឹមដើមឆ្នាំ ២០២៦ មានប្រទេសប្រមាណ ១១៩ ជាសមាជិកដែលបានធ្វើសកម្មភាព និងចូលរួមប្រកួត។

រហូតដល់ពេលនេះ មានព្រឹត្តិការណ៍ប្រកួតលំដាប់ពិភពលោកសំខាន់ចំនួន ៤ ផ្សេងគ្នាដែលរៀបចំដោយសហព័ន្ធកីឡាបាល់ទាត់ហ្វ្រីស្តាល៍ពិភពលោក។

ព្រឹត្តិការណ៍ WFFA Super Ball World Open៖ នេះជាព្រឹត្តិការណ៍ប្រកួតកីឡាបាល់ទាត់ហ្វ្រីស្តាល៍ធំជាងគេបំផុតនៅក្នុងពិភពលោក ដែលត្រូវបានចំឡើងតាំងពីឆ្នាំ ២០០៩។
ព្រឹត្តិការណ៍ WFFA World Frestyle Football Championship (WFFC)៖ នេះជាការប្រកួតជើងឯកហ្វ្រីស្តាល៍ពិភពលោកដែលរៀបចំឡើងជារៀងរាល់មួយឆ្នាំម្តង។
ព្រឹត្តិការណ៍ WFFA Pulse Series៖ នេះជាកម្មវិធីប្រកួតជម្រុះផ្លូវការថ្នាក់ទ្វីប ដើម្បីជ្រើសរើសកីឡាករ កីឡាការិនីឆ្នើមៗតំណាងឲ្យទ្វីបនីមួយៗដើម្បីចូលរួមប្រកួតកីឡាបាល់ទាត់ហ្វ្រីស្តាល៍ជើងឯកពិភពលោក (WFFC)។ កម្មវិធីប្រកួតជម្រុះនេះត្រូវបានធ្វើឡើងទ្វីបទាំង ៥ គឺ ទ្វីបអាមេរិកខាងជើង ទ្វីបអាមេរិកខាងត្បូង ទ្វីបអឺរ៉ុប ទ្វីបអាស៊ីប៉ាស៊ី-ហ្វិក និងទ្វីបអាហ្វ្រិក។
ព្រឹត្តិការណ៍ WFFA NextGen World Championship៖ នេះជាព្រឹត្តិការណ៍លំដាប់ពិភពលោកដែលកំណត់ឲ្យកីឡាករ កីឡាការិនីត្រឹមអាយុ ១៦ ឆ្នាំ ចុះក្រោមប៉ុណ្ណោះចូលរួមប្រកួត។

ប្រទេសនីមួយៗដែលជាសមាជិក តំបន់ និងទ្វីបក៏ត្រូវបានរៀបចំការប្រកួតជើងឯករៀងៗខ្លួនដែរដូចជា ជើងឯកហ្វ្រីស្តាល៍ជប៉ុន ជើងឯកហ្វ្រីស្តាល៍អាល្លឺម៉ង់ ជើងឯកហ្វ្រីស្តាល៍ម៉ិកស៊ិក និងជើងឯកហ្វ្រីស្តាល៍ដាណឺម៉ាកជាដើម។

ងាកមកកម្ពុជាវិញ អ្នកគាំទ្រកីឡាបាល់ទាត់បានចាប់អារម្មណ៍ពីសកម្មភាពផុលផុសអំពីកីឡាបាល់ទាត់ហ្វ្រីស្តាល៍នាប៉ុន្មានឆ្នាំចុងក្រោយ។ តាមពិតទៅ អ្នកនិយមចូលលេងបាល់ទាត់ហ្វ្រីស្តាល៍នៅកម្ពុជា បានកើតមានជាយូរមកហើយ ប៉ុន្តែទើបតែចាប់អារម្មណ៍ខ្លាំង និងចាត់ទុកជាកីឡាដែលការប្រកួតប្រជែងតាមច្បាប់ទម្លាប់ត្រឹមត្រូវនៅពេល ក្លិបព្រះខ័នរាជស្វាយរៀង បានរៀបចំកម្មវិធីប្រកួត Frenzy Freestyle កាលពីឆ្នាំ ២០២៥។

ក្រោយមក កីឡាករ កីឡាការិនីដែលជាជ័យលាភី Frenzy Freestyle បានចេញសម្តែងក្នុងកម្មវិធីផ្សេងៗដូចជា នៅផ្លូវថ្មើរជើងមាត់ទន្លេ និងក្នុងកម្មវិធីប្រកួតបាល់ទាត់ធំៗជាដើម។ មិនត្រឹមតែប៉ុណ្ណោះ ពួកគាត់បានចេញទៅប្រកួតអន្តរជាតិក្នុងព្រឹត្តិការណ៍ប្រកួតជម្រុះតំបន់អាស៊ី-ប៉ាស៊ីហ្វិក WFFA Pulse Jakarta នៅប្រទេសឥណ្ឌូណេស៊ី កាលពីខែកញ្ញា ឆ្នាំ ២០២៥។

ពេលនេះ ព្រឹត្តិការណ៍ប្រកួតអាស៊ី-ប៉ាស៊ីហ្វិក បានឈានមកដល់ទីក្រុងភ្នំពេញ ប្រទេសកម្ពុជាហើយ។ នេះជាមោទនភាពមួយទៀតដែលកម្ពុជាទទួលធ្វើម្ចាស់ផ្ទះរៀបចំការប្រកួតទ្វីបអាស៊ី-ប៉ាស៊ីហ្វិក WFFA Pulse Phnom Penh នាថ្ងៃទី ៦-៧ ខែមិថុនា ឆ្នាំ ២០២៦ នៅសាលា The King’s School , Vattanacville រាជធានីភ្នំពេញ។ កីឡាករ កីឡាការិនីជំនាញហ្វ្រីស្តាល៍ផ្នែកបាល់ទូទាំងអាស៊ីនឹងមកចូលរួមប្រកួតនេះ៕

អត្ថបទ៖ វិរបុត្រ

The post ការប្រកួតបាល់ទាត់ហ្វ្រីស្តាល៍ពិភពលោកមានព្រឹត្តិការណ៍ធំ ៤ ផ្សេងគ្នា ខណៈមានមួយមកដល់កម្ពុជាឆ្នាំនេះ appeared first on Kampuchea Thmey Daily.

ឯកឧត្តម ឌី វិជ្ជា សម្រេចបញ្ជូនកីឡាករបាល់ទាត់ហ្វ្រីស្តាយ៍ ទៅប្រកួតអន្តរជាតិដ៏ធំ នៅឥណ្ឌូណេស៊ី

Kosal Sem — Mon, 01 Sep 2025 07:42:26 +0000

ឯកឧត្តមឌី វិជ្ជា ប្រធានក្លិបព្រះខ័នរាជស្វាយរៀង គ្រោងបញ្ជូនកីឡាករបាល់ទាត់ហ្វ្រីស្តាយ៍ (Freestyle) ដែលចេញពីកម្មវិធីប្រកួតហ្វ្រេនហ្ស៊ី ហ្វ្រីស្តាយ៍ (Frenzy Freestyle) តំណាងកម្ពុជា ទៅប្រកួតក្នុងកម្មវិធីប្រកួតហ្វ្រីស្តាយ៍ដ៏ធំប្រចាំតំបន់ អាស៊ីប៉ាស៊ីហ្វិក WFFA Pulse Jakarta 2025 នៅប្រទេស ឥណ្ឌូណេស៊ី។

ព្រឹត្តិការណ៍ WFFA Pulse Jakarta 2025 គឺជាកម្មវិធីប្រកួតជម្រុះកីឡាបាល់ទាត់ហ្វ្រីស្តាយ៍ដ៏ធំប្រចាំតំបន់ អាស៊ីប៉ាស៊ីហ្វិក ដែលស្ថិតក្រោមការគ្រប់គ្រងដោយសមាគមន៍បាល់ទាត់ហ្វ្រីស្តាយ៍ពិភពលោក (WFFA) ដើម្បីដណ្តើមកៅអីឡើងទៅប្រកួតព្រឹត្តិការណ៍លំដាប់ថ្នាក់ពិភពលោក World Freestyle Football Championship។

ការប្រកួតព្រឹត្តិការណ៍ WFFA Pulse Jakarta 2025 នឹងធ្វើឡើងនៅទីក្រុង ហ្សាកាតា ប្រទេស ឥណ្ឌូណេស៊ី រយៈពេល ២ ថ្ងៃ គឺនៅថ្ងៃទី ៤ និងទី ៥ ខែ តុលា ឆ្នាំ ២០២៥។ ព្រឹត្តិការណ៍នេះ នឹងប្រមូលម្តុំទៅដោយកីឡាករហ្វ្រីស្តាយ៍ខ្លាំងៗជាច្រើនប្រចាំតំបន់ អាស៊ីប៉ាស៊ីហ្វិក មកជួបជុំគ្នា ដើម្បីធ្វើការប្រកួតតាមរូបមន្ត ១ ទល់នឹង ១។

កីឡាករបាល់ទាត់ Freestyle ល្អបំផុតចំនួន ៦ នាក់ (ប្រុស ៣ នាក់ និងស្រី ៣ នាក់) ដែលឈ្នះក្នុងការប្រកួតនេះ នឹងទទួលបានកៅអីបន្តទៀត ឡើងទៅប្រកួតកម្រិតពិភពលោក World Freestyle Football Championship នាពេលខាងមុខ។

កីឡាករ សុំ សាន ជ័យលាភីលេខ១ និងកីឡាករ ប្រូ ម៉ាប់ ជ័យលាភីលេខ២នៃសកម្មវិធី ហ្វ្រេនហ្ស៊ី ហ្វ្រីស្តាយ៍ ព្រមទាំងលោក ឡុង គឹមហេង ជាគណៈកម្មការដែលត្រូវទៅចូលរួមនៅប្រទេសឥណ្ឌូណេស៊ី។

គួរបញ្ជាក់ថា នេះជាលើកដំបូងហើយ ដែលនឹងមានកីឡាករហ្វ្រីស្តាយ៍កម្ពុជាទៅចូលរួមការប្រកួតព្រឹត្តិការណ៍កម្រិតអន្តជាតិមួយនេះ។ សម្រាប់កីឡាករ ដែលនឹងទទួលបានឱកាសទៅចូលរួមកម្មវិធីនេះ គឺជាកីឡាករហ្វ្រីស្តាយ៍កម្ពុជា ដែលបានចេញពីការប្រកួតកម្មវិធីហ្វ្រេនហ្ស៊ី ហ្វ្រីស្តាយ៍ (Frenzy Freestyle)៕

រូបភាព

អត្ថបទ៖ សេម កុសល

The post ឯកឧត្តម ឌី វិជ្ជា សម្រេចបញ្ជូនកីឡាករបាល់ទាត់ហ្វ្រីស្តាយ៍ ទៅប្រកួតអន្តរជាតិដ៏ធំ នៅឥណ្ឌូណេស៊ី appeared first on Kampuchea Thmey Daily.

សុំ សាន ទម្លាយការហ្វឹកហាត់ដល់ម៉ោង២យប់រហូត ទើបឈ្នះជើងឯក Frenzy Freestyle

chean virakbot — Wed, 19 Feb 2025 02:08:25 +0000

ការទទួលបានជ័យលាភីលេខ១ក្នុងកម្មវិធីប្រកួតទេពកោសល្យបាល់ទាត់ Frenzy Freestyle លើកដំបូងនៅកម្ពុជា មិនមែនកើតឡើងដោយងាយស្រួលនោះទេសម្រាប់ សុំ សាន ប៉ុន្តែជាការខិតខំប្រឹងប្រែងហ្វឹកហាត់ស្ទើរគ្មានពេលសម្រាក។

ក្រោយចប់ការប្រកួត សុំ សាន បានប្រាប់ថា ៖«កត្តាដែលផ្តល់ឲ្យខ្ញុំទទួលបានជ័យលាភីលេខ១គឺការខិតខំប្រឹងប្រែងខ្លាំងមែន និយាយរួមខ្ញុំខំហ្វឹកហាត់ខ្លាំងណាស់។ ខ្ញុំបានហ្វឹកហាត់ដល់ម៉ោង២យប់រហូតក្នុងពេលជាងមួយអាទិត្យមុនការប្រកួត»។

ម្ចាស់ជ័យលាភីលេខ១បានរៀបរាប់ថា ៖«ឆ្លងកាត់ការប្រកួតក្នុងកម្មវិធី Frenzy Freestyle នេះបានធ្វើឲ្យគេស្គាល់ខ្ញុំច្រើន។ នេះជាកម្មវិធីប្រកួតប្រជែងត្រឹមត្រូវលើកទី១នៅកម្ពុជា។ កម្មវិធីនេះល្អមែនទែនសម្រាប់អ្នកមានទេពកោសល្យ ជាពិសេសយុវជនមានជំនាញ Freestyle។ កម្មវិធីបានផ្តល់ឲ្យខ្ញុំបង្ហាញសមត្ថភាពដែលខ្ញុំបានរង់ចាំរយៈពេល៧ឆ្នាំ។ ខ្ញុំតែងតែគិតថា ថ្ងៃណាមួយ វានឹងមាននៅកម្ពុជា ហើយទីបំផុតមានមែន»។

ប្រសិនបើមានកម្មវិធីនេះលើកក្រោយទៀត រូបគេនឹងកាន់តែខិតខំប្រឹងប្រែង និងត្រៀមខ្លួនឲ្យបានល្អប្រសើរថែមទៀត។ អ្វីដែលកាន់តែពិសេសទៀតនោះ ប្រសិនបើមានឱកាស រូបគេក៏ចង់បង្ហាញសមត្ថភាពក្នុងការប្រកួតប្រជែងលើឆាកអន្តរជាតិ។

ទោះបីជាទទួលបានជ័យលាភីលេខ១ ប៉ុន្តែម្ចាស់ជ័យលាភីលេខ១យល់ឃើញខ្លួនឯងមានចំណុចខ្វះខាតច្រើនទៀតដែលត្រូវខិតខំប្រែងហ្វឹកហាត់បន្ថែមដើម្បីឲ្យសមត្ថភាពកាន់តែរីកចម្រើន និងមានក្បាច់ពិសេសច្រើនសំបូរបែប។

ជាមួយគ្នានេះ សុំ សាន បានថ្លែងអំណរគុណដល់ឯកឧត្តម ឌី វិជ្ជា និងក្លិបបាល់ទាត់ព្រះខ័នរាជស្វាយរៀង ដែលបានបង្កើតកម្មវិធីដ៏មានសារសំខាន់នេះឡើង ហើយក៏សូមអរគុណដល់អ្នកគាំទ្រទាំងអស់ដែលបានតាមគាំទ្រតាំងពីដើមរហូតដល់ចប់។

ការប្រកួតបានបញ្ចប់កាលពីថ្ងៃអាទិត្យ ទី១៦ ខែកុម្ភៈ ឆ្នាំ២០២៥ បន្ទាប់ពីដំណើរការប្រកួតអស់រយៈពេលជាង២ខែ។ សុំ សាន បានយកឈ្នះបេក្ខជន នួន វណ្ណា ដើម្បីក្លាយជាម្ចាស់ជ័យលាភីលេខ១។ ជាមួយគ្នានេះ បេក្ខជន ផ្លម ធិញហួយ ទទួលបានចំណាត់ថ្នាក់លេខ៣ បន្ទាប់ពីយកឈ្នះ លន់ ឆៃយ៉ា។

លេខ១៖ សុំ សាន ទទួលបានមេដាយមាស ពាន និងប្រាក់រង្វាន់២លានរៀល
លេខ២៖ នួន វណ្ណា ទទួលបានមេដាយប្រាក់ និងប្រាក់រង្វាន់១លានរៀល
លេខ៣៖ ផ្លម ធិញហួយ ទទួលបានមេដាយសំរិទ្ធ និងប្រាក់រង្វាន់១លានរៀល
លេខ៤៖ លន់ ឆៃយ៉ា ទទួលប្រាក់រង្វាន់១លានរៀល

អត្ថបទ៖ វីរបុត្រ

The post សុំ សាន ទម្លាយការហ្វឹកហាត់ដល់ម៉ោង២យប់រហូត ទើបឈ្នះជើងឯក Frenzy Freestyle appeared first on Kampuchea Thmey Daily.

ប្រាក់ មុន្នីឧត្តម ស្ទើរមិនជឿ«កូនខ្មែរអាចធ្វើបាន ក្នុងកម្មវិធី Frenzy Freestyle»

chean virakbot — Mon, 17 Feb 2025 02:50:52 +0000

កីឡាករបាល់ទាត់ដ៏ឆ្នើម ប្រាក់ មុន្នីឧត្តម ត្រូវបានអញ្ជើញជាភ្ញៀវកិត្តិយសក្នុងកម្មវិធីប្រកួត Frenzy Freestyle វគ្គផ្តាច់ព្រ័ត្រ កាលពីថ្ងៃអាទិត្យ ទី១៦ ខែកុម្ភៈ ឆ្នាំ២០២៥ រៀបចំដោយក្លិបព្រះខ័នរាជស្វាយរៀង នៅស្ទួឌីយោបឹងស្នោរ។

មុនពេលប្រកាសលទ្ធផលជ័យលាភីវគ្គផ្តាច់ព្រ័ត្រ ប្រាក់ មុន្នីឧត្តម បានបង្ហាញចំណាប់អារម្មណ៍ថា ៖«សម្រាប់ខ្ញុំគឺប្លែកភ្នែកមែនទែន ពីព្រោះធ្លាប់តែមើលឃើញតាមទូរសព្ទ តាមទូរទស្សន៍ពីបរទេសគេធ្វើ ហើយពេលខ្ញុំមកមើលផ្ទាល់អីចឹងមានអារម្មណ៍ថា ប្លែកមែនទែន។ ខ្ញុំស្ទើរតែមិនជឿថា មានយុវជន ហើយកូនខ្មែរយើងអាចធ្វើបាន។ ខ្ញុំសូមសរសើរមែនទែនដល់ពួកគាត់ដែលមានទេពកោសល្យ មានជំនាញផ្ទាល់ខ្លួនពិតៗ។ ណាមួយជាកម្មវិធីចេញពីប្រទេសរបស់យើងផង»។

លទ្ធផលនៃការប្រកួតវគ្គពាក់កណ្តាលផ្តាច់ព្រ័ត្រ បេក្ខជន នួន វណ្ណា បានយកឈ្នះបេក្ខជន លន់ ឆៃយ៉ា ដើម្បីឡើងទៅកាន់វគ្គផ្តាច់ព្រ័ត្រ ជួបបេក្ខជន សុំ សាន ដែលបានយកឈ្នះបេក្ខជន ផ្លម ធិញហួស នៅវគ្គពាក់កណ្តាលផ្តាច់ព្រ័ត្រ។

នៅវគ្គផ្តាច់ព្រ័ត្រ បេក្ខួន សុំ សាន ធ្វើបានល្អខ្លាំងដោយបានយកឈ្នះបេក្ខជន នួន វណ្ណា ដើម្បីក្លាយជាម្ចាស់ជ័យលាភីលេខ១។ ជាមួយគ្នានេះ បេក្ខជន ផ្លម ធិញហួយ ទទួលបានចំណាត់ថ្នាក់លេខ៣ បន្ទាប់ពីយកឈ្នះ លន់ ឆៃយ៉ា។

ក្នុងពិធីបំពាក់មេដាយ និងប្រាក់រង្វាន់ក្រោមវត្តមានឯកឧត្តម ឌី វិជ្ជា ប្រធានក្លិបបាល់ទាត់ព្រះខ័នរាជស្វាយរៀងដែលផ្តួចផ្តើមឲ្យមានកម្មវិធីប្រកួត Frenzy Freestyle លើកដំបូងនៅកម្ពុជា និងចំណាយធន់ធានទាំងស្រុងដោយគ្មានដៃគូឧបត្ថម្ភ ប៉ុន្តែរៀបចំឡើងដើម្បីផ្តល់ឱកាសឲ្យយុវជនមានជំនាញផ្នែក Freestyle បង្ហាញសមត្ថភាព។ ជាពិសេសផ្នែកមួយដ៏សំខាន់ក្នុងជំរុញវិស័យនេះឲ្យក្លាយជាផ្នែកមួយនៃកីឡាបាល់ទាត់ពិតប្រាកដក្នុងការប្រកួតប្រជែងសមត្ថភាព។

ជ័យលាភី

លេខ១៖ សុំ សាន ទទួលបានមេដាយមាស ពាន និងប្រាក់រង្វាន់២លានរៀល
លេខ២៖ នួន វណ្ណា ទទួលបានមេដាយប្រាក់ និងប្រាក់រង្វាន់១លានរៀល
លេខ៣៖ ផ្លម ធិញហួយ ទទួលបានមេដាយសំរិទ្ធ និងប្រាក់រង្វាន់១លានរៀល
លេខ៤៖ លន់ ឆៃយ៉ា ទទួលប្រាក់រង្វាន់១លានរៀល

អត្ថបទ៖ វីរបុត្រ

The post ប្រាក់ មុន្នីឧត្តម ស្ទើរមិនជឿ«កូនខ្មែរអាចធ្វើបាន ក្នុងកម្មវិធី Frenzy Freestyle» appeared first on Kampuchea Thmey Daily.

តើបេក្ខជនរូបណានឹងក្លាយជាម្ចាស់ជ័យលាភីកម្មវិធី Frenzy Freestyle ដំបូងនៅកម្ពុជាថ្ងៃអាទិត្យនេះ?

chean virakbot — Tue, 11 Feb 2025 09:17:18 +0000

ការប្រកួតហ្វ្រីស្តាយល៍ (Frenzy Freestyle) ជាលើកដំបូងនៅកម្ពុជា បានឈានដល់ដំណាក់កាលដ៏ជក់ចិត្ត គឺវគ្គពាក់កណ្តាលផ្តាច់ព្រ័ត្រ រហូតដល់វគ្គផ្តាច់ព្រ័ត្រ។ តាមរយៈក្លិបបាល់ទាត់ព្រះខ័នរាជស្វាយរៀង កម្មវិធីប្រកួត ហ្រ្វេនហ្ស៊ី ហ្វ្រីស្តាយល៍ បាននឹងកំពុងបង្ហាញ ដោយបំផុសយុវជន ក៏ដូចជាប្រជាជនកម្ពុជាឱ្យស្វែងយល់ពីកីឡាបាល់ទាត់ ហ្រ្វីស្តាយល៍ រួមទាំងបង្ហាញដល់អន្តរជាតិពីកម្មវិធីប្រកួតលើកទី១នៅកម្ពុជាផងដែរ។

បន្ទាប់ពីការប្រកួតគ្នាយ៉ាងស្វិតស្វាញអស់រយៈពេលជាច្រើនសប្តាហ៍ បេក្ខជនដ៏មានទេពកោសល្យទាំង ៤រូបបានឈានជើងចូលទៅកាន់វគ្គកាត់សេចក្តីចុងក្រោយដែលកាន់តែជក់ចិត្តបន្ថែមទៀត។ ការប្រកួតប្រជែងគ្នា សម្រាប់អ្នកចូលចិត្តវិស័យកីឡាបាល់ទាត់ហ្វ្រីស្តាយល៍ បានទាក់ទាញទស្សនិកជនជាច្រើន តាមរយៈការបង្ហាញពីក្បាច់ប្លែកៗ លាយឡំជាមួយសិល្បៈ និងភាពច្នៃប្រឌិតដ៏ប៉ិនប្រសប់របស់បេក្ខជននីមួយៗ។

ឥឡូវនេះនៅសល់តែគូប្រជែងតែ ២គូប៉ុណ្ណោះ ដែលត្រៀមខ្លួនរួចជាស្រេច ដើម្បីប្រជែងក្លាយជាម្ចាស់ជ័យលាភីកម្មវិធី Frenzy Freestyle វគ្គពាក់កណ្តាលផ្តាច់ព្រ័ត្រ (ការប្រកួតបែបការសម្តែងតាមបទចម្រៀង – Routine)។

គូប្រកួតវគ្គពាក់កណ្តាលផ្តាច់ព្រ័ត្រ

បេក្ខជន លន់ ឆៃយ៉ា ប្រកួតជាមួយ នួន វណ្ណា
បេក្ខជន ស៊ុំ សាន ប្រកួតជាមួយ ផ្លម ធិញហួយ

អ្នកដែលឈ្នះក្នុងវគ្គនេះនឹងឡើងទៅកាន់វគ្គផ្តាច់ព្រ័ត្រ ដើម្បីដណ្តើមជ័យលាភី។ អ្នកដែលចាញ់ក្នុងវគ្គពាក់កណ្តាលផ្តាច់ព្រ័ត្រ នឹងត្រូវប្រកួតដណ្តើមយកចំណាត់ថ្នាក់លេខ៣។

នេះមិនមែនគ្រាន់តែជាការប្រកួតប្រជែងប៉ុណ្ណោះទេ វាក៏ជាការជំរុញភាពលេចធ្លោរបស់វិស័យកីឡាបាល់ទាត់ហ្រ្វីស្តាយល៍របស់ប្រទេសកម្ពុជាឱ្យកាន់តែឈានទៅមុខមួយកម្រិតទៀត។ គួររម្លឹកផងដែរថា កម្មវិធីប្រកួត ហ្វ្រេនហ្ស៊ី ហ្រ្វីស្តាយល៍ វគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រនឹងធ្វើឡើងនៅ ស្ថានីយ៍ទូរទស្សន៍បាយ័ន បឹងស្នោរ នៅថ្ងៃទី១៦ ខែកុម្ភៈ ឆ្នាំ២០២៥ ខាងមុខនេះ ហើយក៏មានការផ្សាយផ្ទាល់ នៅលើហ្វេសប៊ុកផេចផ្លូវការរបស់ក្លិបបាល់ទាត់ ព្រះខ័នរាជស្វាយរៀង។ រង់ចាំតាមដានទស្សនាទាំងអស់គ្នា!

The post តើបេក្ខជនរូបណានឹងក្លាយជាម្ចាស់ជ័យលាភីកម្មវិធី Frenzy Freestyle ដំបូងនៅកម្ពុជាថ្ងៃអាទិត្យនេះ? appeared first on Kampuchea Thmey Daily.

Frenzy Freestyle Archives - Kampuchea Thmey Daily

ឯកឧត្តម ឌី វិជ្ជា សម្រេច​បញ្ជូន​​កីឡាករ​បាល់ទាត់​ហ្វ្រីស្តាយ៍ ទៅប្រកួត​អន្តរជាតិដ៏​ធំ នៅ​ឥណ្ឌូណេស៊ី

សុំ សាន ទម្លាយ​ការ​ហ្វឹក​ហាត់ដល់​ម៉ោង​២​យប់​រហូត ទើបឈ្នះ​ជើង​ឯក Frenzy Freestyle

ប្រាក់ មុន្នីឧត្តម ស្ទើរ​មិន​ជឿ​«កូន​ខ្មែរ​អាច​ធ្វើ​បាន ក្នុង​កម្មវិធី Frenzy Freestyle»

តើបេក្ខជនរូបណានឹងក្លាយជាម្ចាស់ជ័យលាភីកម្មវិធី Frenzy Freestyle ដំបូងនៅកម្ពុជាថ្ងៃអាទិត្យនេះ?

ឯកឧត្តម ឌី វិជ្ជា សម្រេចបញ្ជូនកីឡាករបាល់ទាត់ហ្វ្រីស្តាយ៍ ទៅប្រកួតអន្តរជាតិដ៏ធំ នៅឥណ្ឌូណេស៊ី

សុំ សាន ទម្លាយការហ្វឹកហាត់ដល់ម៉ោង២យប់រហូត ទើបឈ្នះជើងឯក Frenzy Freestyle

ប្រាក់ មុន្នីឧត្តម ស្ទើរមិនជឿ«កូនខ្មែរអាចធ្វើបាន ក្នុងកម្មវិធី Frenzy Freestyle»