កាលពីថ្ងៃ អាទិត្យ ទី ៤ ខែ មករា ឆ្នាំ ២០២៦ ក្លិប Terengganu FC បានប្រកាសជាផ្លូវការ អំពីការចែកផ្លូវគ្នាជាមួយកីឡាករ ប្រេស៊ីល Gabi បន្ទាប់ពីរួមរស់ជាមួយគ្នាបានកន្លះរដូវកាល។ ក្រោយការប្រកាសនេះ Gabi បានចេញសារទម្លាយហេតុផលនៅលើ IG ថា ការចាក​ចេញនេះ គឺរូបគេស្នើសុំក្លិបផ្តាច់កិច្ចសន្យាដោយខ្លួនឯង ដោយសារមានធុរៈចាំបាច់ជាមួយគ្រួសារនៅ​ស្រុក​កំណើត។

ជុំវិញរឿងនេះ Gabi បានបង្ហោះសារនៅលើ IG ដូច្នេះ ថា៖ «ថ្ងៃនេះ ខ្ញុំសូមនិយាយលា ដែលវាពិតជាលឿនជាងការរំពឹងទុក ហើយនេះមិនមែនជាការសម្រេចចិត្តងាយស្រួលនោះទេសម្រាប់ខ្ញុំ។ ដំបូង ខ្ញុំចង់សូមទោសទៅកាន់គ្រប់គ្នា សម្រាប់ការចាកចេញរបស់ខ្ញុំមុនពេលកំណត់នៃកិច្ចសន្យាជាមួយក្លិប។ វាមិនដែលកើតឡើងពីមុនមកទេ នៅក្នុងអាជីពរបស់ខ្ញុំ ដែលខ្ញុំចាកចេញពីក្លិបមុនកំណត់នៃកិច្ចសន្យា ឬស្នើសុំផ្តាច់កិច្ចសន្យាបែបនេះ។ នេះជាលើកដំបូងហើយ។ ខ្ញុំចង់បញ្ជាក់ឱ្យច្បាស់ផងដែរ អំពីហេតុផល។ វាមិនមានរឿងអ្វីជាមួយក្លិប ឬកីឡាករនោះទេ។ វាជាការសម្រេចចិត្តមួយ ដែលខ្ញុំធ្វើឡើងសម្រាប់គ្រួសាររបស់ខ្ញុំ ហើយគ្រួសាររបស់ខ្ញុំ គឺជាអទិភាពដំបូង។ ខ្ញុំសង្ឃឹមថាគ្រប់គ្នានឹងយល់។…»។

គួរឱ្យដឹងថា Gabi បង្ហាញខ្លួនសរុបជាមួយក្រុម Terengganu FC បានចំនួន ១២ ប្រកួត ក្នុងនោះរកបាន ៣ គ្រាប់ និង ១ បញ្ជូន (assist)៕

អត្ថបទ៖ សេម កុសល

The post Gabi បាន​ទម្លាយ​ថា ខ្លួន​ជា​អ្នកស្នើ​​សុំ​ក្លិប Terengganu ផ្តាច់កុងត្រា​ដើម្បី​ចាក​ចេញ appeared first on Kampuchea Thmey Daily.

Gabi បានជួបបញ្ហារបួស បន្ទាប់ពីប៉ះទង្គិចគ្នាជាមួយខ្សែការពារ Backer Alexander នៅក្នុងការប្រកួតជើងទី ១ វគ្គពាក់កណ្តាលផ្តាច់ព្រ័ត្រពាន «សម្តេចអគ្គមហាសេនាបតីតេជោ ហ៊ុន សែន» កាលពីថ្ងៃ ពុធ ទី ២៣ ខែ មេសា កន្លងទៅ ដែលព្រះខ័នរាជស្វាយរៀង បានយកឈ្នះលើក្រុមម្ចាស់ផ្ទះ បឹងកេត ១-០ នៅពហុកីឡដ្ឋានជាតិ អូឡាំពិក ។

តាមរយៈរបួសនេះ Gabi ត្រូវបានគេសង្ស័យថា អាចនឹងមានបញ្ហារបួសសរសៃពួរ។ ចំណែកលោក Pep Munoz វិញ ក៏សង្ស័យបែបនេះដូចគ្នា ប៉ុន្តែកាលពីល្ងាចថ្ងៃទី ២៥ ខែ មេសា ម្សិលមិញ នៅក្នុងសន្និសីទកាសែតមុនការប្រកួតទល់នឹង Angkor Tiger លោកបានមានប្រសាសន៍អំពីបច្ចុប្បន្នភាពរបួស Gabi ថា ៖ «Gabi គឺច្បាស់ណាស់នៅក្នុងការប្រកួតនេះ (Angkor Tiger) គឺគាត់ចូលលេងអត់បានទេ។ ឥឡូវនេះយើងកំពុងរង់ចាំរបាយការណ៍ពីប្រទេសថៃ ប៉ុន្តែអ្វីដែលយើងឃើញ និងការសិក្សាកន្លងមក របួសរបស់គាត់ គឺមិនអាក្រក់ណាស់ណាពេកទេ។ អ៊ីចឹងសង្ឃឹមថា ប្រកួតក្រោយទៀត គាត់នឹងអាចចូលរួមវិញបាន»។

ស្ថានភាពរបួសលម្អិតរបស់ Gabi គឺកំពុងរង់ចាំរបាយការណ៍បញ្ជាក់ពីប្រទេសថៃ។ ឥឡូវគាត់កំពុងសម្រាកធ្វើការពិនិត្យនៅទីនោះ។ យ៉ាងណាក៏ដោយ ចំពោះបញ្ហារបួសនេះ ក៏បានផ្តល់ជាក្តីព្រួយបារម្ភដល់ក្រុម ព្រះខ័នរាជស្វាយរៀង ផងដែរ ដោយសារនៅថ្ងៃទី ១០ ខែ ឧសភា ខាងមុខ ពួកគេនឹងត្រូវមានភារកិច្ចជួបក្រុម FK Arkadag នៅពហុកីឡដ្ឋានជាតិ មរតកតេជោ វគ្គផ្តាច់ព្រ័ត្រពាន AFC Challenge League៕

អត្ថបទ៖ សេម កុសល

The post គ្រូព្រះខ័នរាជស្វាយរៀងលោក Munoz ចេញមកបញ្ជាក់អំពីបញ្ហារបួស Gabi appeared first on Kampuchea Thmey Daily.

​គ្រាប់​បាល់​ទាំង​៥​បាន​កើត​មាន​នៅ​វគ្គ​ទី​២ បន្ទាប់​ពី​វគ្គ​ទី១​គ្មាន​គ្រាប់​បាល់​កើត​ឡើង​សោះ។ អ្វី​ដែល​គួរ​ឲ្យ​ចាប់​អារម្មណ៍​គឺ​ខ្សែ​បម្រើ​ប្រយុទ្ធ​សញ្ជាតិ​ប្រេស៊ីល Gabriel​ Silva​ Costa​ បាន​បញ្ជូន​បាល់ (Assist) ឲ្យ​មិត្ត​រួម​ក្រុម​ស៊ុត​បាន​៣​គ្រាប់​ក្នុង​ជ័យជម្នះ​ដ៏​សំខាន់​នោះ។

កីឡាករ​ប្រេស៊ីល​ដែល​ទើប​ផ្លាស់​ពី​អង្គរ​ថាយហ្គឺរ​ចូល​ព្រះ​ខ័ន​រាជ​ស្វាយ​រៀងក្នុង​រដូវ​កាល​​២០២៣នេះ​បាន​បញ្ជូន​បាល់​ឲ្យខ្សែ​ប្រយុទ្ធ​កម្ពស់​ខ្ពស់ Marcus Haber ស៊ុត​គ្រាប់​ទី១​ នៅ​នាទី​៥២​ដែល​ជា​គ្រាប់​បាល់​បើក​ការ​នាំ​មុខ ០-១។ បន្ទាប់​មក រូប​គេ​បាន​បញ្ជូន​បាល់​ឲ្យ​ខ្សែ​ប្រយុទ្ធ​ដ​ដែល​ស៊ុត​បាន​២​គ្រាប់​ទៀត​គឺ​នាទី៦២ និង៧២។

ពាក់​ព័ន្ធ​នឹង​ការ​លេង​ស្លាប​ប្រយុទ្ធ​ដ៏​រស់​រវើក​នេះ លោក Conor Nester គ្រូ​បង្វឹក​ព្រះ​ខ័ន​រាជ​ស្វាយរៀងបាន​ប្រាប់​«កម្ពុជា​ថ្មី»​ថា ៖«សម្រាប់​ Gabriel ខ្ញុំ​គិត​ថា គាត់​ជា​កីឡាករ​ល្អ​ប្រចាំ​ការ​ប្រកួត​នោះ។ គាត់​បាន​បង្ហាញ​ទម្រង់​លេង​ដ៏​អស្ចារ្យ​គួរ​ឲ្យ​ចាប់​អារម្មណ៍»។

ការ​ពិត​បង្ហាញ​ឲ្យ​ឃើញ​ច្បាស់​នៅ​​លើ​​វាល​ស្មៅ​ថា Gabriel​ Silva​ Costa មាន​ល្បឿន​លឿន​ បូក​រួម​នឹង​បច្ចេកទេស​ញាក់​បាល់​ផង​បាន​អូស​ដាច់​ខ្សែ​ការពារ​របស់​អង្គរ​ថាយហ្គឺរ ហើយ​បញ្ជូន​បាល់​ឲ្យ​មិត្ត​រួម​ក្រុម​ស៊ុត​បញ្ចូល​ទី​ដោយ​ងាយ​ស្រួល។ ល្បឿន និង​បច្ចេកទេស​ញាក់​​បាល់​នេះ​ហើយ​ជា​ចំណុច​គួរ​ឲ្យ​ចាប់​អារម្មណ៍​របស់​គេ៕

អត្ថបទ៖ វីរបុត្រ

The post លោក​ Conor​ Nester​ សរសើរ​​​ខ្សែ​​បម្រើ​ Gabriel​ ពិត​​ជា​​អស្ចារ្យ​ appeared first on Kampuchea Thmey Daily.