Gabi បាន​ទម្លាយ​ថា ខ្លួន​ជា​អ្នកស្នើ​​សុំ​ក្លិប Terengganu ផ្តាច់កុងត្រា​ដើម្បី​ចាក​ចេញ

អតីតខ្សែប្រយុទ្ធស្លាបរបស់ក្រុម ព្រះខ័នរាជស្វាយរៀង កីឡាករ Gabriel Silva បានទម្លាយមូលហេតុពិតនៅពីក្រោយការចាកចេញពីក្លិបលីគកំពូល ម៉ាឡេស៊ី Terengganu FC ដោយសាររូបគេស្នើសុំក្លិប ដើម្បីផ្តាច់កិច្ចសន្យាមុនពេលកំណត់ដោយខ្លួនឯង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃ អាទិត្យ ទី ៤ ខែ មករា ឆ្នាំ ២០២៦ ក្លិប Terengganu FC បានប្រកាសជាផ្លូវការ អំពីការចែកផ្លូវគ្នាជាមួយកីឡាករ ប្រេស៊ីល Gabi បន្ទាប់ពីរួមរស់ជាមួយគ្នាបានកន្លះរដូវកាល។ ក្រោយការប្រកាសនេះ Gabi បានចេញសារទម្លាយហេតុផលនៅលើ IG ថា ការចាក​ចេញនេះ គឺរូបគេស្នើសុំក្លិបផ្តាច់កិច្ចសន្យាដោយខ្លួនឯង ដោយសារមានធុរៈចាំបាច់ជាមួយគ្រួសារនៅ​ស្រុក​កំណើត។

ជុំវិញរឿងនេះ Gabi បានបង្ហោះសារនៅលើ IG ដូច្នេះ ថា៖ «ថ្ងៃនេះ ខ្ញុំសូមនិយាយលា ដែលវាពិតជាលឿនជាងការរំពឹងទុក ហើយនេះមិនមែនជាការសម្រេចចិត្តងាយស្រួលនោះទេសម្រាប់ខ្ញុំ។ ដំបូង ខ្ញុំចង់សូមទោសទៅកាន់គ្រប់គ្នា សម្រាប់ការចាកចេញរបស់ខ្ញុំមុនពេលកំណត់នៃកិច្ចសន្យាជាមួយក្លិប។ វាមិនដែលកើតឡើងពីមុនមកទេ នៅក្នុងអាជីពរបស់ខ្ញុំ ដែលខ្ញុំចាកចេញពីក្លិបមុនកំណត់នៃកិច្ចសន្យា ឬស្នើសុំផ្តាច់កិច្ចសន្យាបែបនេះ។ នេះជាលើកដំបូងហើយ។ ខ្ញុំចង់បញ្ជាក់ឱ្យច្បាស់ផងដែរ អំពីហេតុផល។ វាមិនមានរឿងអ្វីជាមួយក្លិប ឬកីឡាករនោះទេ។ វាជាការសម្រេចចិត្តមួយ ដែលខ្ញុំធ្វើឡើងសម្រាប់គ្រួសាររបស់ខ្ញុំ ហើយគ្រួសាររបស់ខ្ញុំ គឺជាអទិភាពដំបូង។ ខ្ញុំសង្ឃឹមថាគ្រប់គ្នានឹងយល់។…»។

គួរឱ្យដឹងថា Gabi បង្ហាញខ្លួនសរុបជាមួយក្រុម Terengganu FC បានចំនួន ១២ ប្រកួត ក្នុងនោះរកបាន ៣ គ្រាប់ និង ១ បញ្ជូន (assist)៕

អត្ថបទ៖ សេម កុសល