ជាក់ស្ដែងនៅព្រឹកថ្ងៃទី១០ ខែមិថុនា ឆ្នាំ២០២៦ លោកស្រី មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោកកម្ពុជា តំណាងលោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានចុះពិនិត្យសកម្មភាពដំឡើងបរិក្ខាសុវត្ថិភាពចរាចរណ៍បន្ថែមលើដងផ្លូវជាតិលេខ៥(ចំណុចសាលាលេខ៥)រួមមាន៖ ភ្លើងសញ្ញាដាស់តឿនអ្នកបើកបរ, គំនូសសញ្ញាចរាចរណ៍ និងផ្លាកសញ្ញាចរាចរណ៍ ដើម្បីដាស់ស្មារតីអ្នកបើកបរឱ្យគិតគូរពីសុវត្ថិភាពលើដងផ្លូវ។

ការចុះពិនិត្យធ្វើឡើងដោយមានចូលរួមពីក្រុមការងារគម្រោងផ្លូវជាតិលេខ៥,  ក្រុមការងារJICA ,ស្នងការនគរបាលខេត្តកំពង់ឆ្នាំង, មន្ទីរសាធារណការ និងដឹកជញ្ជូនខេត្តកំពង់ឆ្នាំង,អាជ្ញាមូលដ្ឋាន និងភាគីពាក់ព័ន្ធដទៃទៀត។

គួរបញ្ជាក់ថា ភ្លើងស្តុបថ្មីចំនួន២៤ទីតាំង ត្រូវដាក់ពង្រាយតាមបណ្តោយផ្លូវជាតិលេខ៥(កំពង់ឆ្នាំង,ពោធិ៍សាត់,បាត់ដំបង និងបន្ទាយមានជ័យ) រួមទាំងបរិក្ខាសុវត្ថិភាពចរាចរណ៍ដទៃទៀត ដើម្បីសម្រួលដល់ការធ្វើចរាចរណ៍ និងបញ្ចៀសគ្រោះថ្នាក់ចរាចរណ៍ជាយថាហេតុ។ សម្ភារៈទាំងនោះបានដឹកទៅកាន់ទីតាំងដំឡើង ដោយបំពាក់តាមទីតាំងកំណត់ ដែលមានការសិក្សាត្រឹមត្រូវច្បាស់លាស់ ពីក្រុមការងារបច្ចេកទេសក្រសួងសាធារណការ និងដឹកជញ្ជូន និងភាគីមិត្តជប៉ុន៕

The post ក្រសួងសាធារណការ សហការជាមួយ JICA ចុះពិនិត្យការងារដំឡើងភ្លើងស្តុបថ្មី២៤ទីតាំង និងបរិក្ខាសុវត្ថិភាពតាមផ្លូវជាតិលេខ ៥ appeared first on Kampuchea Thmey Daily.

ជំនួយបន្ទាន់របស់ JICA នេះ ធ្វើឡើងក្នុងគោលបំណងកាត់បន្ថយការលំបាកក្នុងសហគមន៍នៅតាមតំបន់ព្រំដែន ជួយឱ្យមានស្ថិរភាពដល់ការរស់នៅរបស់ប្រជាជន និងធានាសុខុមាលភាពក្នុងសហគមន៍។ បន្ថែមពីនេះ JICA បានកំពុងជួយគាំទ្រលើវិស័យផ្គត់ផ្គង់ទឹកស្អាត ដោយអភិវឌ្ឍន៍សម្ភារៈបរិក្ខាជាច្រើនតាមរតៈជំនួយហិរញ្ញវត្ថុ និងការពង្រឹងសមត្ថភាពប្រតិបត្តិការផ្គត់ផ្គង់ទឹកស្អាត តាមរយៈកិច្ចសហប្រតិបត្តិការបច្ចេកទេស។

ជាមួយគ្នានេះ ការផ្តល់ជំនួយនេះ ក៏ជាផ្នែកមួយនៃកិច្ចសហប្រតិបត្តិការរយៈពេលវែងរវាង JICA និង ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ផងដែរ។ ក្នុងឱកាសនេះ JICA បានប្តេជ្ញាក្នុងការបន្តធ្វើការងារជាមួយរាជរដ្ឋាភិបាលកម្ពុជា និងដៃគូផ្សេងទៀត ក្នុងការលើកកម្ពស់កិច្ចសហប្រតិបត្តិការដើម្បីឱ្យការរស់នៅរបស់ប្រជាជនមានភាពល្អប្រសើរបន្ថែមទៀត៕

The post JICA ផ្តល់ធុងចម្រោះទឹកស្អាត ២២០ឈុត ដើម្បីជួយគាំទ្រវិស័យផ្គត់ផ្គង់ទឹកស្អាតដល់ពលរដ្ឋតាមព្រំដែន appeared first on Kampuchea Thmey Daily.

នៅ​ក្នុង​ជំនួប​សម្ដែង​ការ​គួរសម និង​ពិភាក្សា​ការងារ​ជាមួយ​លោក​វេជ្ជបណ្ឌិត យ៉ូ​តា យ៉ូ​កូ​បូរី ទីប្រឹក្សា​គោល​នយោបាយ​សុខាភិបាល​របស់​ទីភ្នាក់ងារ​សហ​ប្រតិបត្តិការ​អន្តរជាតិ នៃ​ប្រទេស​ជប៉ុន (JICA) ប្រចាំ​នៅ​ក្រសួងសុខាភិបាល នៃ​ប្រទេស​កម្ពុជា នៅ​ព្រឹក​ថ្ងៃទី​ ២៤​ មេសា នៅ​ទីស្នាក់ការ​កណ្ដាល ប​.​ស​.​ស​. រាជធានី​ភ្នំពេញ​ លោក​បណ្ឌិត ហេង សុផាន់​ណា​រិ​ទ្ធ បាន​បន្តថា ​ការបន្ត​សហការ​ជាមួយ ​JICA​ នឹង​ជួយ​ឱ្យ​ការ​អនុវត្ត​របប​សន្តិ​សុខ​សង្គម​នៅ​កម្ពុជា​កាន់តែ​ប្រសើរ​ឡើង​បន្ថែម​ទៀត។

លោក​វេជ្ជបណ្ឌិត យ៉ូ​តា យ៉ូ​កូ​បូរី ទីប្រឹក្សា​គោលនយោបាយ​សុខាភិបាល បាន​ថ្លែង​ការ​កោតសរសើរ​ចំពោះ​ការ​អនុវត្ត​ការងារ​របស់ ប​.​ស​.​ស​. ដែលជា​ផ្នែក​មួយ​ដ៏​សំខាន់​ក្នុងការ​គាំទ្រ​សេវា​សុខភាព​របស់​ប្រជាពលរដ្ឋ​កម្ពុជា និង​ក៏​ជា​ចំណែក​មួយ​ដ៏​ចាំបាច់​ក្នុង​ការ​រួមចំណែក​លើ​ការពង្រីក​ការ​គ្របដណ្ដប់​សុខភាព​ជា​សកល​នៅ​កម្ពុជា​ផង​ដែរ។

ជាមួយ​គ្នា​នេះ លោក​វេជ្ជបណ្ឌិត យ៉ូ​តា យ៉ូ​កូ​បូរី ក៏បាន​ធ្វើ​បទ​បង្ហាញ​អំពី​អាទិភាព​របស់​ទីភ្នាក់ងារ JICA លើ​ការ​គាំទ្រ​កិច្ច​សហ​ប្រតិបត្តិការ​នៅ​ក្នុង​វិស័យ​សុខាភិបាល​ផង​ដែរ៕

អត្ថបទ ៖ សំអឿន

The post អគ្គនាយករង ប.ស.ស ៖ ការបន្តសហការជាមួយ JICA នឹងជួយឱ្យការអនុវត្ត របបសន្តិសុខសង្គមនៅកម្ពុជា កាន់តែប្រសើរឡើង appeared first on Kampuchea Thmey Daily.

លោក យុន លីនណេ បានឱ្យដឹងថា ដំណាក់កាលទី១ បានចាប់ផ្តើមឡើងក្រោមជំនួយកិច្ចសហប្រតិបត្តិការបច្ចេកទេសពីទីភ្នាក់ងារសហប្រតិបត្តិការអន្តរជាតិជប៉ុន JICA ដោយដំណាក់នោះ JICA បានជួយសិក្សាស្វែងរកបញ្ហាប្រឈមដែលកំពុងកើតមានឡើងនៅក្នុងក្រុងសៀមរាប និងបានរៀបចំជាផែនទីបង្ហាញផ្លូវសម្រាប់ការរៀបចំក្រុងសៀមរាបជាទីក្រុងឆ្លាតវៃ ដែលផែនទីបង្ហាញផ្លូវនេះ ត្រូវបានដាក់ឱ្យប្រើប្រាស់ជាសាធារណៈកាលពីខែមីនា ឆ្នាំ២០២៣។ 

លោកបានបន្តទៀតថា នៅក្នុងតំណាក់កាលនេះ រដ្ឋបាលខេត្តសៀមរាប និងទីភ្នាក់ងារសហប្រតិបត្តិការអន្តរជាតិជប៉ុន JICA បានសហការអនុវត្តនូវគម្រោងសាកល្បងចំនួន៨ រួមមាន ១.ការកែលម្អការប្រមូលសម្រាម ,២.ការត្រួតពិនិត្យការចតយានយន្តខុសច្បាប់ ,៣.ឌីជីថលនីយកម្មនៃស្ថិតិទេសចរណ៍ ,៤.ប្រព័ន្ធតាមដានលំហូរឯកសារផ្ទៃក្នុងរបស់រដ្ឋបាល ខេត្ត ,៥.គម្រោងត្រួតពិនិត្យបរិស្ថានទីក្រុងដោយប្រើប្រាស់ឧបករណ៍ចាប់សញ្ញា(Sensor) ,៦.កិច្ចសហការរវាងរដ្ឋ និងឯកជនក្នុងវិស័យទេសចរណ៍,៧.ការប្រមូលនិងដឹកជញ្ជូនសម្រាមឆ្លាតវៃ និង៨.ថ្នាលទិន្នន័យទីក្រុងឆ្លាតវៃសៀមរាប (SSDaP)។

លោកអភិបាលរងខេត្ត បញ្ជាក់ថា ក្នុងចំណោមគម្រោងទាំង ៨នោះ មានគម្រោងចំនួន៦ កំពុងត្រូវបានអនុវត្តបំពេញឱ្យទៅជាគម្រោងពេញលេញ និងពង្រីកមុខងារបន្ថែម។ ជាមួយគ្នានេះ ដើម្បីជំរុញឱ្យផែនទីបង្ហាញផ្លូវអនុវត្តកាន់តែមានប្រសិទ្ធភាព រដ្ឋបាលខេត្តក៏បានបង្កើតនូវវេទិកាទីក្រុងឆ្លាតវៃ ដែលមានការចូលរួមពីវិស័យឯកជនផងដែរ ដែលយន្តការនេះ ត្រូវបានគេរំពឹងថា នឹងជំរុញឱ្យក្រុងសៀមរាប ក្លាយជាក្រុងគំរូសម្រាប់រាជធានី និងក្រុងផ្សេងទៀតរបស់កម្ពុជា ដែលជាសមាជិកទីក្រុងវៃឆ្លាតអាស៊ាន។

ប្រធានក្រុមការងារទី២ ទទួលបន្ទុកការអភិវឌ្ឍទីក្រុង និងតំបន់នៃនាយកដ្ឋានគ្រប់គ្រងហេដ្ឋារចនាសម្ព័ន្ធ នៃទីភ្នាក់ងារសហប្រតិបត្តិការអន្តរជាតិជប៉ុន JICA លោក អាបេ ម៉ាសាណូរីអូ (ABE Masanorio) បានបង្ហាញថា យន្តការវេទិកាទីក្រុងឆ្លាតវៃ ដែលបង្កើតឡើងដោយរដ្ឋបាលខេត្តសៀមរាប ពិតជាបានបង្កើតឱកាស និងកិច្ចសហប្រតិបត្តិការរវាងវិស័យសាធារណៈ និងវិស័យឯកជន រួមជាមួយសហគមន៍ ហើយយន្តការនេះក៏ជំរុញទីក្រុងសៀមរាប កាន់តែមានមុខមាត់ទាំងនៅឆាកជាតិ និងអន្តរជាតិ។ លោករំពឹងថា យន្តការនេះក៏នឹងជួយឱ្យក្រុងសៀមរាប ក្លាយជាក្រុងគំរូមួយរបស់កម្ពុជាផងដែរ។

ចំណែក លោក ហ៊ីរ៉ូណុ តំណាងក្រុមទីប្រឹក្សាទីភ្នាក់ងារសហប្រតិបត្តិការអន្តរជាតិជប៉ុន JICA បានលើកឡើងដែរថា «បើគិតពីប្រាំឆ្នាំមុន យើងបានចាប់ផ្តើមគម្រោងដោយការលំបាកបំផុត ព្រោះវាកំពុងស្ថិតនៅក្នុងតំណាក់កាលនៃការរីករាលដាលជម្ងឺកូវីដ-១៩ ប៉ុន្តែដោយបានការប្តេជ្ញាចិត្តយើងសម្រចបានការងារយ៉ាងច្រើនប្រកបដោយភាពបត់បែន»។ ដូច្នេះការធ្វើឱ្យទីក្រុងសៀមរាប ក្លាយជាក្រុងឆ្លាតវៃ វានៅមិនទាន់បញ្ចប់ទេ វាគ្រាន់តែជាការចាប់ផ្តើមប៉ុណ្ណោះ។ លោកបន្តថា ជប៉ុននឹងមិនទៅណានោះទេ គឺជប៉ុននៅតែនៅជិតយើងជានិច្ច៕

ដោយ៖ គឿន វេត

The post ជប៉ុននឹងបន្តជួយដល់ខេត្តសៀមរាប លើការអនុវត្តគម្រោងទីក្រុងសៀមរាបឆ្លាតវៃ ដំណាក់កាលទី២ appeared first on Kampuchea Thmey Daily.

សិក្ខាសាលានេះ មានការចូលរួមពីនិស្សិតដែលកំពុងសិក្សានៅមហាវិទ្យាល័យ ឆ្នាំទី២  ទី៣ និងទី៤ មានដូចជា ផ្នែកអក្សរសាស្ត្រខ្មែរ អក្សរសាស្ត្រអង់គ្លេស អក្សរសាស្ត្រចិន ព័ត៌មានវិទ្យា  និតិសាស្ត្រ  កែច្នៃអាហារ វិទ្យាសាស្ត្រសត្វ គណនេយ្យ ធនាគារ និងចិត្តវិទ្យា។  គោលបំណងក្នុងការរៀបចំ គឺដើម្បីផ្តល់នូវចំណេះដឹងមូលដ្ឋានដល់និស្សិត អំពីជំនួយអភិវឌ្ឍន៍ផ្លូវការរបស់ប្រទេសជប៉ុន ក្នុងកិច្ចការរួមចំណែកដល់ការអភិវឌ្ឍវិស័យមីនរបស់ប្រទេសកម្ពុជា។

សិស្សនិស្សិត បានបង្ហាញពីក្តីចាប់អារម្មណ៍យ៉ាងខ្លាំងចំពោះសិក្ខាសាលានេះ និងថ្លែងអំណរគុណដល់ប្រទេសជប៉ុន និង JICA ដែលរៀបចំសិក្ខាសាលា និងដំណើរទស្សនកិច្ចសិក្សាដែលជួយបង្កើនការយល់​ដឹងរបស់ពួកគេលើសកម្មភាព​បោសសម្អាតមីន និងការអភិវឌ្ឍប្រទេសកម្ពុជាដោយមានការចូលរួមពីបុគ្គលិក JICA  ក្រុមការងារជំនាញស៊ីម៉ាក់ ក្នុងដំណើរការនៃការដោះមីន។

ជាមួយគ្នានេះ ទស្សនកិច្ចសិក្សាបានជ្រើសរើសនិស្សិតចំនួន២៥រូប ធ្វើដំណើរទៅភូមិចម្លងរមាំងលើ ឃុំអូរសមរិល ស្រុកសំឡូត ខេត្តបាត់ដំបង ដែលមានចម្ងាយប្រមាណ៧៥គីឡូពីទីរួមខេត្ត ដោយសារការឆ្លង​កាត់សង្រ្គាម​កំឡុងឆ្នាំ១៩៧០ ជាហេតុធ្វើអោយភូមិនេះមាននៅសេសសល់គ្រាប់មីន និងគ្រាប់យុទ្ធភ័ណ្ឌមិនទាន់ផ្ទុះ​នៅរាយប៉ាយស្ទើរតែពាសពេញភូមិ។ ក្រោមការដឹកនាំទស្សនកិច្ចសិក្សាដោយក្រុមការងារជំនាញរបស់ស៊ីម៉ាក់  និងការបង្ហាញបានអោយដឹងមាន ១៤៥ចំការមីន នៅក្នុងភូមិ ក្រោយការបោសសម្អាតមីនក្នុងឆ្នាំ២០០០ ដល់ឆ្នាំ២០២២ ការបោសសម្អាតមីនបានចំនួន ១២៥ចំការមីន ហើយនៅមានចំការមីននៅសល់ចំនួន២០ទៀតដែលមានផ្ទៃដីសរុបចំនួន ១៦៥ ហិតា កំពុងអនុវត្តផែនការបន្តបោសសម្អាតឆ្នាំ២០២៣នេះ៕

The post JICA ផ្សព្វផ្សាយពីវិស័យមីននៅកម្ពុជា ដល់និស្សិតខេត្តបាត់ដំបង appeared first on Kampuchea Thmey Daily.

តាមរបាយការណ៍ គម្រោងនេះ មានគោលបំណងរួម ពង្រឹងប្រព័ន្ធសុខាភិបាលនៅក្នុងខេត្តសៀមរាប តាមការចូលរួមចំណែកធ្វើឱ្យប្រសើរឡើងនូវស្ថានភាពសុខភាពទូទៅក្នុងតំបន់ រួមទាំងខេត្តជិតខាង។ ផ្ទៃដីសរុបក្នុងការសាងសង់អគារសង្គ្រោះបន្ទាន់មាន ៨៤៥៨.៦៣ម៉ែត្រការ៉េ មានកម្ពស់៤ជាន់ និងមានគ្រែចំនួន ២២៦ ជាមួយនិងមបន្ទប់សម្រាកថ្មីជាច្រើន។ មានទាំងផ្នែកសង្គ្រោះបន្ទាន់ ផ្នែករូបភាពរោគវិនិច្ឆ័យ ផ្នែកជំងឺទូទៅ ផ្នែកវះកាត់។ បន្ថែមពីនេះ ក៏បានបំពាក់ឧបករណ៍ទំនើបៗជាច្រើនដូចជា ម៉ាស៊ីនថតកាំរស្មីអ៊ិច ម៉ូនីទ័រអ្នកជំងឺ បរិក្ខារសម្រាប់ប្រតិបត្តិការក្នុងការថត និងគ្រឿងបរិក្ខារទំនើបៗជាច្រើនត្រូវបានបំពាក់នៅទីនោះ ព្រមទាំងបានជួយផ្តល់ទៅមន្ទីរពេទ្យក្នុងស្រុកចំនួន ៤ផ្សេងទៀត។ ចំពោះអគារជំនួយរបស់ជប៉ុននេះ ចាប់ផ្តើមសាងសង់ឆ្នាំ២០២១ ហើយនៅពេលនេះបានបញ្ចប់ការសាងសង់រួចរាល់ហើយ នៅតែរង់ចាំបើកសម្ពោធឱ្យប្រើប្រាស់ជាផ្លូវការប៉ុណ្ណោះ។

លោកវេជ្ជបណ្ឌិត ក្រុស សារ៉ាត បានលើកឡើងថា នៅពេលដែលអគារនេះ ត្រូវបានសម្ពោធ និងដាក់ឱ្យប្រើប្រាស់ជាផ្លូវការ នឹងផ្តល់ភាពងាយស្រួលកាន់តែខ្លាំងក្នុងការផ្តល់សេវាកម្មជូនប្រជាពលរដ្ឋ។ លោកបាននិយាយថា៖ “យើងសង្ឃឹមថា អគារធំនេះ អគារថ្មី៤ជាន់នេះ អាចនឹងបម្រើសេវាជូនបងប្អូនប្រជាពលរដ្ឋ មិនចំពោះតែអ្នករស់នៅក្នុងខេត្តសៀមរាប ក៏ប៉ុន្តែអ្នកមកពីខេត្តក្រៅទៀត ក៏បានដូចយើងធ្លាប់ធ្វើកន្លងមក”។

ប្រធានមន្ទីរសុខាភិបាលរូបនេះ បានបញ្ជាក់ទៀតថា រហូតមកដល់ពេលនេះ ខាងមន្ទីរពេទ្យមានវេជ្ជបណ្ឌិតឯកទេសចំនួន ៣៩រូប ដែលបានបញ្ចប់ការសិក្សាពីប្រទេសបារាំង និងប្រទេសកូរ៉េខាងត្បូង ដែល៩០ភាគរយ សុទ្ធតែជាអ្នកមានកំណើតនៅក្រុងខេត្តសៀមរាបតែម្តង ដើម្បីផ្តល់ភាពងាយស្រួលក្នុងវិស័យនេះ។ សម្រាប់បន្ទប់វះកាត់ គឺត្រូវបែងចែកទៅតាមឯកទេសនីមួយៗ។ សម្រាប់តម្លៃវិញ លោកបញ្ជាក់ថានៅមន្ទីរពេទ្យបង្អែកខេត្តសៀមរាប គឺមានតម្លៃថោកជាងមន្ទីរពេទ្យឯកជន ហើយអ្នកជំងឺដែលទៅទទួលសេវាព្យាបាលនៅទីនោះ ប្រមាណជា៧០ភាគរយ ជាអ្នកជំងឺដែលបង់ប្រាក់។

សូមជម្រាបថា ក្នុងទឹកប្រាក់ជាង១៩លានដុល្លារដែលផ្តល់ដោយជប៉ុននេះ មិនត្រឹមតែផ្តល់ជូនសម្រាប់សាងសង់អគារ និងគ្រឿងបរិក្ខារនៅមន្ទីរពេទ្យនេះទេ ក្នុងនោះ ក៏បានផ្តល់គ្រឿងបរិក្ខារទៅដល់មន្ទីរពេទ្យក្នុងស្រុកចំនួន៤ ផ្សេងទៀតដូចជា ស្រុកក្រឡាញ់ អង្គរជុំ សូទ្រនិគម និងស្រុកពួកផងដែរ៕

The post ក្រោមជំនួយជប៉ុន មន្ទីរពេទ្យបង្អែកខេត្តសៀម​រាប បំពាក់គ្រឿងបរិក្ខារទំនើបៗបម្រើដល់ពលរដ្ឋ appeared first on Kampuchea Thmey Daily.

លោក ឈឹម ផល្លា ប្រធាននាយកដ្ឋានផ្លូវថ្នល់ បានប្រាប់ក្រុមអ្នកសារព័ត៌មាននៅព្រឹកថ្ងៃទី០៣ ខែតុលា ឆ្នាំ២០២៣ ថា គម្រោងនេះ រដ្ឋាភិបាលកម្ពុជា និងជប៉ុនបានគិតគូរល្អិតល្អិនណាស់ចំពោះការចំណាយ ហើយប្រើប្រាស់ថវិកានេះជាថវិកាយ៉េន ដែលមានការឡើងចុះទៅតាមទីផ្សារលុយរបស់ជប៉ុន។ ប្រសិនបើគិតសរុបមួយគម្រោងនេះ លោកមិនអាចបញ្ជាក់ច្បាស់បានឡើយ ប៉ុន្តែ ប្រសិនជាគិតមកដល់រយៈពេលនេះ គិតជាប្រាក់ដុល្លារ គឺចំណាយប្រហែលជាង ៦០០លានដុល្លារ។

គម្រោងនេះ គឺអភិវឌ្ឍន៍ពីព្រែកក្តាមទៅដល់ប៉ោយប៉ែត និងមានប្រវែងរហូតដល់ ៣៦៦គីឡូម៉ែត្រ មានកម្រាស់ក្រាស់ជាងគេនៅកម្ពុជា គឺ១៥សង់ទីម៉ែត្រដែលទ្រទម្ងន់បានច្រើន និងប្រើប្រាស់បានយូរ។ ផ្លូវជាតិលេខ៥ ដែលស្ថិតក្រោមគម្រោង ជាផ្លូវប្រភេទហាយវ៉េ អភិវឌ្ឍន៍២គន្លង ទៅជា៤គន្លង ហើយនៅតាមទីប្រជុំ និងទីរួមខេត្តគឺធ្វើជាផ្លូវវាង និងថ្មីទាំងអស់។ នេះបើតាមការបញ្ជាក់របស់លោក ឈឹម ផល្លា ។

ចំពោះគម្រោងសម្រេចបាន លោកនិយាយថា៖ “រហូតមកដល់ពេលនេះ បើនិយាយជារួមសរុប គឺពីព្រែកក្តាមរហូតដល់បន្ទាយមានជ័យ គឺយើងរួចរាល់ហើយ។ យើងនឹងរៀបចំគម្រោងសម្ពោធដាក់ឱ្យប្រើប្រាស់នៅចុងខែ១១ (ខែវិច្ឆិកា)នេះ ក៏ប៉ុន្តែយើងនៅសល់មួយកំណាត់ទៀត ប្រហែលជា៣៦គីឡូម៉ែត្រទេ ពីបន្ទាយមានជ័យទៅដល់ប៉ោយប៉ែត”។

បើតាមរបាយការណ៍ ក្នុងគម្រោងធ្វើឱ្យប្រសើរឡើងវិញនូវកំណាត់ផ្លូវជាតិលេខ៥ នៅលើកំណាត់ផ្លូវពីខេត្តបាត់ដំបងដល់ស្រីសោភ័ណ្ឌមានប្រវែង ៨៤.៧៤គីឡូម៉ែត្រ ចាប់ផ្តើមសាងសង់ឆ្នាំ២០១៧ និងបញ្ចប់ឆ្នាំ២០២១។ កំណាត់ផ្លូវពីព្រែកក្តាមដល់ធ្លាម្អមមានប្រវែង ១៣៥,២៥គីឡូម៉ែត្រ ដោយសាងសង់ឆ្នាំ២០១៨ និងរួចរាល់ឆ្នាំ២០២៣។ ចំណែកកំណាត់ផ្លូវពីធ្លាម្អម ទៅខេត្តបាត់ដំបង និងស្រីសោភ័ណ្ឌ ទៅប៉ោយប៉ែត មានប្រវែងសរុប ១៤៦.០៤គីឡូម៉ែត្រ សាងសង់ពីឆ្នាំ២០១៩ ហើយបច្ចុប្បន្នសាងសង់កញ្ចប់ទី២ ទី៣ រួចរាល់ហើយ ខណៈការសាងសង់កញ្ចប់ផ្សេងៗកំពុងបន្តដំណើរការ៕

The post មកដល់ពេលនេះ គម្រោងអភិវឌ្ឍន៍ផ្លូវជាតិលេខ៥ ចាយថវិកាជាង ៦០០លានដុល្លារ appeared first on Kampuchea Thmey Daily.

បើតាមលោកស្រីរដ្ឋលេខាធិការ មឹន មាណវី គម្រោងនេះ គឺជាការជួយដោយរដ្ឋាភិបាលជប៉ុន និងមានការរៀបចំត្រឹមត្រូវតាមស្តង់ដាបច្ចេកទេស មានទាំងផ្លូវទៅ-មក ព្រមទាំងមានពុះទ្រូងផ្លូវផងដែរ ដើម្បីសម្រួលកុំឱ្យមានគ្រោះថ្នាក់ចរាចរណ៍ ហើយការពុះទ្រូងផ្លូវនេះហើយ បានជួយកាត់បន្ថយមិនឱ្យមានគ្រោះថ្នាក់បានមួយកម្រិត។

លោកស្រីរដ្ឋលេខាធិការ បាននិយាយថា៖ «ផ្លូវហ្នឹងជួយសម្រួលមិនឱ្យមានគ្រោះថ្នាក់ចរាចរណ៍ ប្រសិនជាយើងមិនមានទ្រូងពុះទ្រូងផ្លូវទេ យើងចេះតែប្រជ្រៀតគ្នាទៅមក អាចស្ទះ អាចនឹងមានគ្រោះថ្នាក់។ ដល់ពេលយើងមានផ្លូវពុះទ្រូងអ៉ីចឹង រួចផុតពីគ្រោះថ្នាក់ចរាចរណ៍ច្រើន»។

មន្ត្រីជាន់ខ្ពស់រូបនេះ បានលើកឡើងថា កត្តាគ្រោះថ្នាក់ចរាចរណ៍កើតឡើងធំបំផុត គឺកើតចេញពីកត្តាមនុស្សជាចម្បង ដែលក្នុងនោះ ៨០% គ្រោះថ្នាក់កើតឡើងលើអ្នកជិះម៉ូតូច្រើនជាងរថយន្ត។ មូលហេតុដែលនាំឱ្យមានគ្រោះថ្នាក់ គឺកើតចេញពីកត្តាជាច្រើន មានដូចជា ៣៨% កើតចេញពីល្បឿនលឿនខ្លាំងពេក ២៥% ទៅ ២៦% ផ្តើមពីការមិនគោរពសិទ្ធិអាទិភាពគ្នា ជាង១០% ជិះវ៉ាជែងគ្នា និងក្រោម១០% កើតចេញពីកត្តាផ្សេងទៀត។

តែយ៉ាងណា លោកស្រី បានបញ្ជាក់ថា ក្រសួងស្ថាប័នពាក់ព័ន្ធ ក៏ដូចជាអាជ្ញាធរមានសមត្ថកិច្ច បានចុះណែនាំដល់ប្រជាពលរដ្ឋឱ្យយល់កាន់តែច្បាស់អំពីច្បាប់ចរាចរណ៍ ជាពិសេស រាជរដ្ឋាភិបាល នៅតែបន្តការរឹតបន្តឹងច្បាប់ ដើម្បីកាត់បន្ថយគ្រោះថ្នាក់ចរាចរណ៍។

ជុំវិញបញ្ហានេះ លោកស្រីរដ្ឋលេខាធិការ ក៏បានស្នើដល់ប្រជាពលរដ្ឋគ្រប់រូប គប្បីគោរពច្បាប់ឱ្យបានល្អ និងសិក្សាស្វែងយល់អំពីច្បាប់ចរាចរណ៍ឱ្យបានច្រើន ហើយត្រឹមត្រូវបន្ថែមទៀត ចៀសវាងមានករណីគ្រោះថ្នាក់ចរាចរណ៍កើតឡើងនៅតាមដងផ្លូវថែមទៀត។

សូមជម្រាបថា គម្រោងធ្វើឱ្យប្រសើរឡើងវិញនូវកំណាត់ផ្លូវជាតិលេខ៥ គឺជាគម្រោងរបស់អង្គការ JICA ក្នុងការអភិវឌ្ឍផ្លូវជាតិលេខ៥ ដោយចាប់ផ្ដើមពីចំណុចស្ពានព្រែកក្តាម រហូតដល់ក្រុងប៉ោយប៉ែត ខេត្តបន្ទាយមានជ័យ ជាមួយនឹងការអភិវឌ្ឍប្រកបទៅដោយស្តង់ដាត្រឹមត្រូវ ដើម្បីធានាដល់សុវត្ថិភាពរបស់អ្នកដំណើរ៕

The post មន្ត្រីក្រសួងសារធារណការ៖ គ្រោះថ្នាក់ចរាចរណ៍ ថយចុះ៣២% តាមរយៈគម្រោងផ្លូវជាតិលេខ៥ appeared first on Kampuchea Thmey Daily.