ក្រសួងសាធារណការ សហការជាមួយ JICA ចុះពិនិត្យការងារដំឡើងភ្លើងស្តុបថ្មី២៤ទីតាំង និងបរិក្ខាសុវត្ថិភាពតាមផ្លូវជាតិលេខ ៥

ដោយមានការគិតគូរខ្ពស់ និងការយកចិត្តទុកដាក់ជាប្រចាំរបស់ លោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន ពីសុវត្ថិភាពប្រជាពលរដ្ឋតាមដងផ្លូវ ជាពិសេសតាមដងផ្លូវដែលមានចរាចរណ៍មមាញឹក និងហានិភ័យខ្ពស់លើបញ្ហាគ្រោះថ្នាក់ចរាចរណ៍។

ជាក់ស្ដែងនៅព្រឹកថ្ងៃទី១០ ខែមិថុនា ឆ្នាំ២០២៦ លោកស្រី មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោកកម្ពុជា តំណាងលោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានចុះពិនិត្យសកម្មភាពដំឡើងបរិក្ខាសុវត្ថិភាពចរាចរណ៍បន្ថែមលើដងផ្លូវជាតិលេខ៥(ចំណុចសាលាលេខ៥)រួមមាន៖ ភ្លើងសញ្ញាដាស់តឿនអ្នកបើកបរ, គំនូសសញ្ញាចរាចរណ៍ និងផ្លាកសញ្ញាចរាចរណ៍ ដើម្បីដាស់ស្មារតីអ្នកបើកបរឱ្យគិតគូរពីសុវត្ថិភាពលើដងផ្លូវ។

ការចុះពិនិត្យធ្វើឡើងដោយមានចូលរួមពីក្រុមការងារគម្រោងផ្លូវជាតិលេខ៥,  ក្រុមការងារJICA ,ស្នងការនគរបាលខេត្តកំពង់ឆ្នាំង, មន្ទីរសាធារណការ និងដឹកជញ្ជូនខេត្តកំពង់ឆ្នាំង,អាជ្ញាមូលដ្ឋាន និងភាគីពាក់ព័ន្ធដទៃទៀត។

គួរបញ្ជាក់ថា ភ្លើងស្តុបថ្មីចំនួន២៤ទីតាំង ត្រូវដាក់ពង្រាយតាមបណ្តោយផ្លូវជាតិលេខ៥(កំពង់ឆ្នាំង,ពោធិ៍សាត់,បាត់ដំបង និងបន្ទាយមានជ័យ) រួមទាំងបរិក្ខាសុវត្ថិភាពចរាចរណ៍ដទៃទៀត ដើម្បីសម្រួលដល់ការធ្វើចរាចរណ៍ និងបញ្ចៀសគ្រោះថ្នាក់ចរាចរណ៍ជាយថាហេតុ។ សម្ភារៈទាំងនោះបានដឹកទៅកាន់ទីតាំងដំឡើង ដោយបំពាក់តាមទីតាំងកំណត់ ដែលមានការសិក្សាត្រឹមត្រូវច្បាស់លាស់ ពីក្រុមការងារបច្ចេកទេសក្រសួងសាធារណការ និងដឹកជញ្ជូន និងភាគីមិត្តជប៉ុន៕