ព័ត៌មានជាតិ

អគ្គនាយករង ប.ស.ស ៖ ការបន្តសហការជាមួយ JICA នឹងជួយឱ្យការអនុវត្ត របបសន្តិសុខសង្គមនៅកម្ពុជា កាន់តែប្រសើរឡើង

បានផុស

១ year មុន

នៅ

ថ្ងៃព្រហស្បតិ៍ ២៤ មេសា ២០២៥

ដោយ

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស បានលើកឡើងថា ប.ស.ស នៃក្រសួងការងារ និងបណ្ដុះបណ្ដាលវិជ្ជាជីវៈ នៅតែបន្តកិច្ចសហការយ៉ាងជិតស្និទ្ធជាមួយទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA) ដើម្បីឈ្វេងយល់អំពីចំណុចអាទិភាព នៃការអនុវត្តរបបសន្តិសុខសង្គមនៅកម្ពុជា ជាពិសេសរបបសន្តិសុខសង្គមផ្នែកថែទាំសុខភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងជំនួបសម្ដែងការគួរសម និងពិភាក្សាការងារជាមួយលោកវេជ្ជបណ្ឌិត យ៉ូតា យ៉ូកូបូរី ទីប្រឹក្សាគោលនយោបាយសុខាភិបាលរបស់ទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA) ប្រចាំនៅក្រសួងសុខាភិបាល នៃប្រទេសកម្ពុជា នៅព្រឹកថ្ងៃទី ២៤ មេសា នៅទីស្នាក់ការកណ្ដាល ប.ស.ស. រាជធានីភ្នំពេញ លោកបណ្ឌិត ហេង សុផាន់ណារិទ្ធ បានបន្តថា ការបន្តសហការជាមួយ JICA នឹងជួយឱ្យការអនុវត្តរបបសន្តិសុខសង្គមនៅកម្ពុជាកាន់តែប្រសើរឡើងបន្ថែមទៀត។

លោកវេជ្ជបណ្ឌិត យ៉ូតា យ៉ូកូបូរី ទីប្រឹក្សាគោលនយោបាយសុខាភិបាល បានថ្លែងការកោតសរសើរចំពោះការអនុវត្តការងាររបស់ ប.ស.ស. ដែលជាផ្នែកមួយដ៏សំខាន់ក្នុងការគាំទ្រសេវាសុខភាពរបស់ប្រជាពលរដ្ឋកម្ពុជា និងក៏ជាចំណែកមួយដ៏ចាំបាច់ក្នុងការរួមចំណែកលើការពង្រីកការគ្របដណ្ដប់សុខភាពជាសកលនៅកម្ពុជាផងដែរ។

ជាមួយគ្នានេះ លោកវេជ្ជបណ្ឌិត យ៉ូតា យ៉ូកូបូរី ក៏បានធ្វើបទបង្ហាញអំពីអាទិភាពរបស់ទីភ្នាក់ងារ JICA លើការគាំទ្រកិច្ចសហប្រតិបត្តិការនៅក្នុងវិស័យសុខាភិបាលផងដែរ៕

អត្ថបទ ៖ សំអឿន