លោកត្រាំ គំរាមដាក់ពន្ធលើបណ្តាប្រទេស​ណា​ ដែល​ហ៊ាន​ផ្គត់ផ្គង់ប្រេងឲ្យគុយបា

ប្រធានាធិបតី​អាមេរិក លោក ដូណាល់ ត្រាំ បានចេញបទបញ្ជាប្រតិបត្តិមួយ ដោយគំរាមដាក់ពន្ធលើប្រទេសណាដែលផ្គត់ផ្គង់ប្រេងដល់ប្រទេសគុយបា ដែលនេះគឺជាការបង្កើនសម្ពាធយ៉ាងខ្លាំងពីសំណាក់ទីក្រុងវ៉ាស៊ីនតោន ប្រឆាំងនឹងប្រទេសដែនកោះក្នុងតំបន់ការីប៊ីនមួយនេះ។

យោង​តាម​​ការ​ចុះផ្សាយ​ថ្ងៃទី​៣០​មករា​២០២៦​របស់​សារព័ត៌មាន BBC ទោះបីជាបទបញ្ជានេះមិនទាន់បានបញ្ជាក់លម្អិតអំពីអត្រាពន្ធ ឬឈ្មោះប្រទេសគោលដៅជាក់លាក់ក៏ដោយ ប៉ុន្តែវាគ្របដណ្តប់យ៉ាងទូលំទូលាយលើអង្គភាពទាំងឡាយណា ដែលពាក់ព័ន្ធនឹងការផ្គត់ផ្គង់ប្រេងដល់ទីក្រុងឡាហាវ៉ាន មិនថា​​ដោយ​ផ្ទាល់ ឬ​ប្រយោលក៏​ដោយ។ លោកត្រាំ បានហៅសកម្មភាពរបស់រដ្ឋាភិបាលគុយបាថាជា «ការគំរាមកំហែងមិន​ធម្មតា និងគួរឲ្យកត់សម្គាល់» ដល់ផលប្រយោជន៍អាមេរិក ហើយបានចោទប្រកាន់ប្រទេសនេះថាបានផ្តល់ជម្រកដល់សត្រូវបរទេសដ៏គ្រោះថ្នាក់។

វិធានការនេះ បានកើតឡើងបន្ទាប់ពីកងកម្លាំង​អាមេរិកបានចាប់ខ្លួនប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ ដែលនាំ​ឲ្យ​មានការកាត់ផ្តាច់ការនាំចេញប្រេងប្រមាណ ៣៥ ០០០បារ៉ែលក្នុងមួយថ្ងៃពីវ៉េណេស៊ុយអេឡាទៅកាន់គុយបា។ ការរំខានដល់ការផ្គត់ផ្គង់នេះ រួមផ្សំនឹងយុទ្ធសាស្ត្ររបស់អាមេរិកក្នុងការរឹបអូសនាវាដឹកប្រេងដែលរងទណ្ឌកម្ម បានធ្វើឲ្យវិបត្តិថាមពលនៅគុយបាកាន់តែធ្ងន់ធ្ងរឡើង ដែលបណ្តាលឲ្យមានការដាច់ចរន្តអគ្គិសនីជាបន្តបន្ទាប់ និងកង្វះខាតប្រេងឥន្ធនៈយ៉ាងខ្លាំង។

ជាការឆ្លើយតប មន្ត្រីគុយបាបានប្រកាន់ជំហរថា ប្រទេសខ្លួនមានសិទ្ធិពេញលេញក្នុងការនាំចូលប្រេងឥន្ធនៈដោយគ្មានការជ្រៀតជ្រែក ហើយបានទាត់ចោលវិធានការរបស់​អាមេរិកថាជាការបង្ខិតបង្ខំឯកតោភាគី និងគ្មានសីលធម៌៕

ប្រែសម្រួល៖ ឈាង