គុយបាស្ថិត​ក្នុងភាពងងឹត ក្រោយ​សម្ព័ន្ធមិត្ត​ដ៏​សំខាន់​ត្រូវ​អាមេរិក​ផ្ដួល​រលំ

បន្ទាប់ពីការចាប់ខ្លួនលោក នីកូឡាស ម៉ាឌូរ៉ូ ដោយយោធាសហរដ្ឋអាមេរិកកាលពីដើមខែមករា (ដែលគេស្គាល់ថាជា ប្រតិបត្តិការ Absolute Resolve) ប្រទេសគុយបាបានឈានចូលដល់ដំណាក់កាលដ៏លំបាកបំផុតមិន​ធ្លាប់​មាន​ក្នុងរយៈពេលជាច្រើនទសវត្សរ៍។ ជាច្រើន​សិប​ឆ្នាំ​មកហើយ វ៉េណេស៊ុយអេឡាគឺជា «មិត្តល្អបំផុត» របស់គុយបា ដោយបានផ្តល់ប្រេងក្នុងតម្លៃថោក។ ប៉ុន្តែឥឡូវនេះ ប្រភពជំនួយដ៏សំខាន់នេះត្រូវបានកាត់ផ្តាច់ក្នុង​ពេល​ត្រឹមតែ​មួយ​យប់។

យោងតាមរបាយការណ៍ពី The New York Times និង CSIS ផលប៉ះពាល់កំពុងកើតមាន​គ្រប់ផ្ទះសម្បែងក្នុង​ប្រទេស​គុយបា។ ដោយសារវ៉េណេស៊ុយអេឡាមិនអាចផ្ញើប្រេងមក​ឲ្យ​បាន ម៉ាស៊ីនផលិតអគ្គិសនីរបស់គុយបាកំពុងតែខូចខាត។ បច្ចុប្បន្ន តំបន់ភាគច្រើនកំពុងប្រឈមមុខនឹង «ការដាច់ចរន្តអគ្គិសនី» ដែលមានរយៈពេលរហូតដល់២០​ម៉ោងជារៀងរាល់ថ្ងៃ។ នៅពេលយប់ ទីក្រុងជាច្រើនត្រូវស្ថិតក្នុងភាពងងឹតសូន្យឈឹង។

រដ្ឋាភិបាលសហរដ្ឋអាមេរិកក៏កំពុងបង្កើនសម្ពាធផងដែរ។ កាលពីថ្ងៃទី១១ ខែមករា ប្រធានាធិបតី ដូណាល់ ត្រាំ បានបង្ហោះលើបណ្តាញសង្គម Truth Social ថា នឹងគ្មានប្រេង ឬលុយកាក់សម្រាប់គុយបាទៀតទេ ពោលគឺ «សូន្យ» តែ​ម្ដង។ លោកបានជំរុញ​ឲ្យ​រដ្ឋាភិបាលគុយបា «ធ្វើការចរចា​ឲ្យ​បានឆាប់ មុនពេលអ្វីៗហួសពេល»។ ភ្នាក់ងារសារព័ត៌មាន Reuters និង Politico ក៏បានរាយការណ៍ដែរថា អាមេរិកបានដាក់សម្ពាធលើប្រទេសម៉ិកស៊ិក​ឲ្យបញ្ឈប់ការបញ្ជូនប្រេងទៅកាន់កោះនេះ ដែលធ្វើ​ឲ្យគុយបាស្ទើរតែគ្មានប្រេងប្រើប្រាស់ទាល់តែសោះ។

រដ្ឋាភិបាលគុយបាបានបង្ហាញការខឹងសម្បារយ៉ាងខ្លាំង។ យោងតាមសារព័ត៌មាន The Guardian ប្រធានាធិបតី Miguel Díaz-Canel បានដឹកនាំការតវ៉ាដ៏ធំមួយនៅជិត​ស្ថានទូត​អាមេរិកក្នុងទីក្រុង Havana។ ពួកគេកំពុងកាន់ទុក្ខដល់មន្ត្រីគុយបាចំនួន ៣២នាក់ដែលបានស្លាប់ក្នុងអំឡុងពេលការវាយឆ្មក់របស់អាមេរិកនៅវ៉េណេស៊ុយអេឡា។ ខណៈពេលដែលរដ្ឋាភិបាលនិយាយថា ពួកគេមិនចុះចាញ់ ប្រជាពលរដ្ឋសាមញ្ញជាច្រើនមានការព្រួយបារម្ភអំពីការដួលរលំទាំងស្រុង ខណៈដែលស្បៀងអាហារ និងថ្នាំពេទ្យកាន់តែពិបាករកខ្លាំងឡើងៗ ព្រោះគ្មានប្រេងសម្រាប់ដឹកជញ្ជូន៕

ដោយ៖ ឈាង