ព័ត៌មានអន្ដរជាតិ

អង់គ្លេសគាំទ្រអាមេរិកលើកកម្ពស់សន្តិភាពនៅមជ្ឈិមបូព៌ា បន្ទាប់ពីកិច្ចចរចាសន្តិភាពរុស្ស៊ី-អ៊ុយក្រែន

បានផុស

៣ ខែ មុន

នៅ

ថ្ងៃពុធ ១៨ កុម្ភៈ ២០២៦

ដោយ

នាយករដ្ឋមន្ត្រីអង់គ្លេស លោក Keir Starmer បានពិភាក្សាជាមួយលោក ដូណាល់ ត្រាំ កាលពីយប់ថ្ងៃអង្គារ ពីការចរចាឱ្យមានសន្តិភាពរវាងរុស្ស៊ី-អ៊ុយក្រែន ដែលសម្របសម្រួលដោយសហរដ្ឋអាមេរិកនៅទីក្រុងហ្សឺណែវ ក៏ដូចជាការចរចារវាងអាមេរិកនិងអ៊ីរ៉ង់លើជម្លោះនុយក្លេអ៊ែរ។ នេះបើតាមរដ្ឋាភិបាលអង់គ្លេសតាមរយៈគេហទំព័រ Downing Street ។

លោក ត្រាំ និង លោក Keir Starmer ។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋាភិបាលអង់គ្លេសតាមរយៈ Downing Street និយាយថា៖ « លោក Starmer ក៏បានពិភាក្សាពីតំបន់ហ្គាហ្សាជាមួយលោក ត្រាំ និងបានសង្កត់ធ្ងន់ពីសារៈសំខាន់នៃការបន្តធានាឱ្យមានជំនួយមនុស្សធម៌»។

យោងតាមរ៉យទ័រនៅថ្ងៃទី១៨ ខែកុម្ភៈ ប្រទេសអង់គ្លេសបង្ហាញការគាំទ្រ ចំពោះការងារដែលកំពុងដំណើរការ អនុវត្តផែនការសន្តិភាពដឹកនាំដោយសហរដ្ឋអាមេរិក។

រដ្ឋាភិបាលអង់គ្លេសថា៖ «មេដឹកនាំទាំងពីរបានបញ្ជាក់ពីការប្តេជ្ញាចិត្តរួមរបស់ពួកគេក្នុងការលើកកម្ពស់ស្ថិរភាព និងសន្តិភាពនៅមជ្ឈិមបូព៌ា។ ជាពិសេសបានពិភាក្សាពីការចរចាលើកម្មវិធីនុយក្លេអ៊ែររបស់អ៊ីរ៉ង់

ដែលកំពុងដំណើរការរវាងសហរដ្ឋអាមេរិក និងអ៊ីរ៉ង់ដែលធ្វើឡើងនៅទីក្រុងហ្សឺណែវ»។

គេហទំព័រ Downing Street បន្តថា៖ «អ្នកទាំងពីរបានឯកភាពគ្នាថា អ៊ីរ៉ង់មិនអាចអភិវឌ្ឍអាវុធនុយក្លេអ៊ែរបានឡើយ ហើយបញ្ជាក់ជំហរជាថ្មីពីតម្រូវការ និងការធ្វើការយ៉ាងជិតស្និទ្ធក្នុងចំណោមសម្ព័ន្ធមិត្ត និងដៃគូដើម្បីកែលម្អសន្តិសុខក្នុងតំបន់»។

ក្រុមអ្នកចរចាមកពីអ៊ុយក្រែន និងរុស្ស៊ី បានបញ្ចប់កិច្ចចរចាសន្តិភាពលើកដំបូងក្នុងរយៈពេលពីរថ្ងៃ ដែលសម្របសម្រួលដោយសហរដ្ឋអាមេរិក នៅទីក្រុងហ្សឺណែវ កាលពីថ្ងៃអង្គារ។
លើសពីនេះ លោក ដូណាល់ ត្រាំ បានជំរុញឱ្យទីក្រុងគៀវ ធ្វើសកម្មភាពឱ្យបានឆាប់រហ័ស ដើម្បីឈានដល់កិច្ចព្រមព្រៀង។

ដោយឡែក រដ្ឋមន្ត្រីការបរទេសអ៊ីរ៉ង់ លោក Abbas Araqchi បាននិយាយថា៖ «ទីក្រុងតេអេរ៉ង់ និងទីក្រុងវ៉ាស៊ីនតោន បានឈានដល់ការយោគយល់គ្នាកាលពីថ្ងៃអង្គារស្តីពីគោលការណ៍ណែនាំដែលមានគោលបំណងដោះស្រាយជម្លោះនុយក្លេអ៊ែរដ៏យូរអង្វែងរវាងប្រទេសទាំងពីរ ប៉ុន្តែនោះមិនមានន័យថាកិច្ចព្រមព្រៀងមួយនឹងកើតឡើងឆាប់ៗនោះទេ»។

គួររំឭកថា មេដឹកនាំកំពូលរបស់អ៊ីរ៉ង់ លោក Ali Khamenei បានគំរាមបាញ់ពន្លិចនាវាផ្ទុកយន្តហោះអាមេរិកទៅបាតសមុទ្រ បន្ទាប់ពីកិច្ចចរចាបានបញ្ចប់នៅថ្ងៃអង្គារ៕

ប្រែសម្រួល៖ ណឺ មិនា