តើសង្គ្រាម៤ឆ្នាំមកនេះ រុស្ស៊ី-អ៊ុយក្រែន ត្រូវខាតបង់ប៉ុន្មាននិងខ្ទេចខ្ទីប៉ុនណា?

៤ឆ្នាំកន្លងផុតទៅ ផ្នែកខ្លះនៃប្រទេសអ៊ុយក្រែននិងរុស្ស៊ី ត្រូវខ្ទេចខ្ទាំដោយសារភ្លើងសង្គ្រាម ដែលមិនទាន់ឃើញសញ្ញារលត់សោះ។

ពាក្យថាសង្គ្រាម គ្មានអ្វីចំណេញទេ គឺមានតែការខាតបង់ ភាពសោកសៅ ក្តីឈឺចាប់ និរាសព្រាត់ប្រាសនិងវិនាសកម្មប៉ុណ្ណោះ។

យោងតាមទិន្នន័យពីស្ថាប័នធំៗដូចជាអង្គការសហប្រជាជាតិ (UN), ធនាគារពិភពលោក (World Bank) និងស្ថាប័នស្រាវជ្រាវអន្តរជាតិ (CSIS), រយៈពេល៤ឆ្នាំមកនេះ ទាំងរុស្ស៊ីនឹងអ៊ុយក្រែន សុទ្ធតែត្រូវខាតបង់ធ្ងន់ធ្ងរ និងមានទាំងមនុស្សស្លាប់យ៉ាងច្រើនដោយសារសង្គ្រាម។

បើនិយាយពីការខាតបង់ផ្នែកសេដ្ឋកិច្ចនិងហេដ្ឋារចនាសម្ព័ន្ធ, ទិន្នន័យពីស្ថាប័នខាងលើបង្ហាញថា គិតត្រឹមចុងឆ្នាំ២០២៥ អ៊ុយក្រែនត្រូវខូចខាតអាគារ ផ្លូវថ្នល់ និងប្រព័ន្ធថាមពល គិតជាទឹកប្រាក់មានតម្លៃប្រហែល ១៩៥ ពាន់លានដុល្លារ។ ចំណែកឯការចំណាយលើសង្គ្រាមវិញ រុស្ស៊ីបានចាយលើអាវុធ គ្រាប់រំសេវ និងប្រាក់ខែទាហាន ជាង ៤៥០ ពាន់លានដុល្លារទៅហើយ។

ងាកមកមើលការខាតបង់គ្រឿងយុទ្ធោបករណ៍វិញ របាយការដដែលបង្ហាញថា ៤ឆ្នាំមកនេះ រុស្ស៊ីខ្ទេចអស់រថក្រោះនិងរថពាសដែកប្រហែល ១៣ ៨០០គ្រឿង, យន្តហោះ ៣៦១ គ្រឿង និងនាវាចម្បាំង ២៩ គ្រឿង រីឯអ៊ុយក្រែនខ្ទេចរថក្រោះនិងរថពាសដែកប្រហែល ៥ ៥៧០ គ្រឿង, យន្តហោះ ១៩៤ គ្រឿង និងនាវា ៤២ គ្រឿង។

សម្រាប់តួលេខជនរងគ្រោះវិញ រុស្ស៊ីត្រូវគេប៉ាន់ស្មានថាមានទាហានស្លាប់និងរបួសសរុបចន្លោះពី ៦០០ ០០០ ទៅ ៧៥០,០០០ នាក់ ខណៈអ៊ុយក្រែន អាចស្លាប់និងរបួសទ័ព ក្នុងរង្វង់ ៣០០ ០០០ ទៅ ៤៥០ ០០០ នាក់ ដ្បិតតួលេខទាំងនេះ មិនអាចបញ្ជាក់ច្បាស់បានក៏ដោយ។

អ្វីដែលគួរឲ្យកត់សម្គាល់ក្នុងរបាយការណ៍ខាងលើគឺថា បើតាមការប៉ាន់ស្មានរបស់ធនាគារពិភពលោក, អ៊ុយក្រែនត្រូវការថវិកាប្រហែល ៥៨៨ ពាន់លានដុល្លារ ក្នុងរយៈពេល ១០ ឆ្នាំខាងមុខ ដើម្បីកសាងប្រទេសឡើងវិញ៕

អត្ថបទ៖ សុខ សុវណ្ណ