ហ្សេលេនស្គី សុំឲ្យ ត្រាំ នៅខាងអ៊ុយក្រែន ក្នុងសង្គ្រាមជាមួយ រុស្ស៊ី

ក្នុងកិច្ចសម្ភាសផ្តាច់មុខជាមួយ CNN ផ្សាយនៅថ្ងៃអង្គារទី២៤ខែកុម្ភៈឆ្នាំ២០២៦ ដែលជាខួប៤ឆ្នាំនៃសង្គ្រាមរុស្ស៊ី-អ៊ុយក្រែន មេដឹកនាំរដ្ឋាភិបាលទីក្រុងកៀវ វ៉ូឡូឌីមៀរ ហ្សេលេនស្គី បានអំពាវនាវឲ្យប្រធានាធិបតីអាមេរិក ដូណាល់ ត្រាំ ឈរខាងអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចសម្ភាសនោះដែលធ្វើឡើងក្នុងទីក្រុងកៀវ ប្រធានាធិបតីអ៊ុយក្រែន និយាយថា៖ «ខ្ញុំគិតថា មេដឹកនាំអាមេរិកនិងក្រុមការងាររបស់លោកត្រាំ ចង់បញ្ចប់សង្គ្រាមនេះណាស់។ ខ្ញុំចង់ឲ្យគាត់បន្តឈរនៅខាងយើង។ យើងមានទំនាក់ទំនងល្អរវាងក្រុមរបស់យើង និងក្រុមការងារអាមេរិក»។

លោកលើកឡើងថា សហរដ្ឋអាមេរិកធំនិងមានសារៈសំខាន់ខ្លាំងណាស់ មិនអាចដកខ្លួនចេញពីជម្លោះនេះបានឡើយ។ ហើយលោកសង្ឃឹមថា លោក ត្រាំ នឹងបន្តគាំទ្រអ៊ុយក្រែន ខណៈប្រទេសនេះកំពុងវាយបកតបតទៅនឹងរុស្ស៊ី។ អាមេរិកត្រូវតែនៅជាមួយប្រទេសប្រជាធិបតេយ្យមួយដែលកំពុងប្រយុទ្ធប្រឆាំងនឹងបុគ្គលម្នាក់ ពីព្រោះបុគ្គលម្នាក់នេះគឺជាសង្គ្រាម។ លោកពូទីន គឺជាសង្គ្រាម! អ្វីៗទាំងអស់គឺដើម្បីខ្លួនគាត់ផ្ទាល់។

កិច្ចសម្ភាសនេះផ្សាយចំថ្ងៃតែមួយដែល លោកហ្សេលេនស្គីបានអះអាងនៅលើបណ្តាញសង្គម Telegram ថា ពូទីន មិនអាចសម្រេចបានគោលដៅសោះឡើយ។

ក្នុងសារបង្ហោះនោះ ប្រមុខដឹកនាំទីក្រុងកៀវសរសេរថា៖ «ថ្ងៃនេះគឺជាខួបគម្រប់៤ឆ្នាំ ចាប់តាំងពីលោក ពូទីន បើកការវាយលុក ជាមួយគោលដៅ៣ថ្ងៃដណ្ដើមយកទីក្រុងកៀវឲ្យបាន ហើយរឿងនេះបានសបញ្ជាក់យ៉ាងច្បាស់អំពីការតស៊ូរបស់យើង និងអំពីរបៀបដែលអ៊ុយក្រែនបានប្រយុទ្ធតស៊ូអស់រយៈពេលជាយូរមកនេះ»។

លោកបន្តថា៖ «នៅពីក្រោយសម្ដីទាំងនេះគឺជាការឈរជើងរបស់ប្រជាជនយើងរាប់លាននាក់ សេចក្ដីក្លាហានដ៏មហិមា ការខិតខំប្រឹងប្រែងយ៉ាងខ្លាំងក្លាបំផុត ការតស៊ូអត់ធ្មត់ និងមាគ៌ាដ៏វែងឆ្ងាយដែលអ៊ុយក្រែនបានដើរ ចាប់តាំងពីថ្ងៃទី ២៤ ខែកុម្ភៈឆ្នាំ ២០២២ មក។ ក្រឡេកទៅមើលដើមទីនៃការឈ្លានពាន និងឆ្លុះបញ្ចាំងពីថ្ងៃនេះ យើងមានសិទ្ធិពេញលេញក្នុងការនិយាយថា៖ យើងបានការពារឯករាជ្យភាពរបស់យើង យើងមិនបានបាត់បង់រដ្ឋរបស់យើងឡើយ ហើយលោក ពូទីន ក៏មិនបានសម្រេចនូវគោលដៅរបស់គាត់ដែរ។ គាត់មិនអាចបំបាក់ស្មារតីជនជាតិអ៊ុយក្រែនបានទេ ហើយគាត់ក៏មិនបានឈ្នះសង្គ្រាមនេះដែរ។ យើងបានរក្សាការពារអ៊ុយក្រែន ហើយយើងនឹងធ្វើគ្រប់យ៉ាងដើម្បីសម្រេចបាននូវសន្តិភាព និងយុត្តិធម៌។ ជ័យយោ! អ៊ុយក្រែន»៕

អត្ថបទ៖ សុខ សុវណ្ណ