ប្រវត្តិ​សាស្ត្រ​កម្រ​មាន! សេណេហ្គាល់ លើកពានទ្វីប អាហ្វ្រិក ២ ខែហើយ ត្រូវគេដកឱ្យទៅ ម៉ារ៉ុក វិញ

សហព័ន្ធបាល់ទាត់ទ្វីប អាហ្វ្រិក (CAF) បានធ្វើឱ្យអ្នកគាំទ្រទូទាំងពិភពលោកមានការភ្ញាក់ផ្អើលជាខ្លាំង បន្ទាប់ពីពួកគេបានដកហូតពានទ្វីប អាហ្វ្រិក (AFCON 2025) ចេញពីក្រុមជម្រើសជាតិ សេណេហ្គាល់ ដោយប្រគល់ឱ្យទៅក្រុមជម្រើសជាតិ ម៉ារ៉ុក វិញ។

ក្រុមជម្រើសជាតិ សេណេហ្គាល់ បានលើកពាន AFCON 2025 នេះបានរយៈពេល ២ ខែហើយ ពោលតាំងពីថ្ងៃទី ១៨ ខែ មករា ឆ្នាំ ២០២៦ បន្ទាប់ពីយកឈ្នះលើក្រុមម្ចាស់ផ្ទះ ម៉ារ៉ុក នៅវគ្គផ្តាច់ព្រ័ត្រក្នុងលទ្ធផល ១-០។ ទោះបីជាយ៉ាងណា នៅថ្ងៃទី ១៨ ខែ មីនា នេះ សហព័ន្ធបាល់ទាត់ទ្វីប អាហ្វ្រិក បានសម្រេចដកពានពី សេណេហ្គាល់ ដោយផ្តល់ពាន និងជ័យជម្នះ ៣-០ ទៅ ម៉ារ៉ុក វិញ។

មូលហេតុដែល CAF សម្រេចចិត្តបែបនេះ ដោយសាររកឃើញកំហុសធ្ងន់ធ្ងររបស់ក្រុមរហស្សនាម តោនៃរ៉ាងហ្គា បានដើរចេញពីទីលានអំឡុងការប្រកួតនោះ ព្រោះមិនពេញចិត្តនឹងការកាត់ក្តីរបស់អាជ្ញាកណ្តាល ដែលបានផ្តល់បាល់ប៉េណាល់ទីឱ្យក្រុម ម៉ារ៉ុក ប៉ុន្តែកីឡាករ Brahim Diaz ស៊ុតមិនចូល។ ប្រការនេះ សហព័ន្ធបាល់ទាត់ទ្វីប អាហ្វ្រិក បានចោទប្រកាន់ក្រុមជម្រើសជាតិ សេណេហ្គាល់ ថា បានប្រព្រឹត្តកំហុសត្រង់មាត្រា ៨២ និង ៨៤ នៃលក្ខន្តកៈការប្រកួតបាល់ទាត់ទ្វីប អាហ្វ្រិក។

ដូច្នេះចុងក្រោយ CAF ក៏សម្រេចឱ្យក្រុម សេណេហ្គាល់ ចាញ់ការប្រកួតវិញ ហើយបានផ្តល់ជ័យជម្នះ និងពានទៅឱ្យក្រុមជម្រើសជាតិ ម៉ារ៉ុក ជាផ្លូវការ៕

ប្រែសម្រួល៖ សេម កុសល
ប្រភព៖ Sportskeeda