អ្នកឧកញ៉ា គួច ម៉េងលី ប្រាប់ថា គិតពី៥ចំណុចនេះសិន មុននិយាយដើមគេ

វេជ្ជបណ្ឌិត គួច ម៉េងលី អគ្គនាយកប្រតិបត្តិ នៃក្រុមហ៊ុន ម៉េងលី គួច អេឌ្យូខេសិន បានពន្យល់ណែនាំទៅសាធារណជនទូទៅនូវមូលហេតុ ៥ចំណុច មុននឹងមនុស្សគ្រប់រូប ចាប់ផ្តើមនិយាយមិនល្អ ឬ និយាយរិះគន់ (និយាយដើម) ទៅលើនរណាម្នាក់។

ចំណុចទាំង៥នេះ គឺចំណុចទី១ តើរឿងដែលអ្នកនិយាយនោះ វាជារឿងចាំបាច់សម្រាប់អ្នកទេ? ចំណុចទី២ តើវាចំណេញឬទេ ក្រោយពីនិយាយរួច? ចំណុចទី៣ តើរឿងទាំងនោះ ជាការពិតឬទេ? ចំណុចទី៤ រឿងដែលអ្នកបាននិយាយហើយអាចប៉ះពាល់ ឬ ជះឥទ្ធិពលមិនល្អដល់អ្នកដទៃទេ? ចំណុចទី៥ ចុងក្រោយ គឺអ្នកត្រូវសួរខ្លួនឯងថា តើអ្នកបានផលប្រយោជន៍ពីរឿងដែលអ្នកបាននិយាយនោះទេ?

ប្រសិនជាអ្នកមិនបានប្រយោជន៍អ្វីសោះ ឬ ធ្វើឱ្យប៉ះពាល់ដល់អ្នកដទៃ សូមអ្នកកុំនិយាយដើមគេ ឬ និយាយអាក្រក់ពីអ្នកដទៃ ព្រោះពាក្យសម្តីរបស់អ្នកមួយម៉ាត់ និងពាក្យមិនពិតដែលអ្នកបាននិយាយចេញ ដើម្បីតែភាពសប្បាយ អាចសម្លាប់ ឬ អាចបិទផ្លូវរបស់គេអស់មួយជីវិត។ នេះបើតាមការលើកឡើងរបស់អ្នកឧកញ៉ា គួច ម៉េងលី៕

ដោយ៖ អុន ស្រីមាន