​ចំណូលពីប្រតិ​បត្តិការអាជីវកម្មរបស់រដ្ឋាករទឹកថយចុះ​ជាង២០% ក្នុងត្រីមាសទី១

រដ្ឋាករទឹកស្វយ័តក្រុងភ្នំពេញ(PWSA) ដែលជាក្រុមហ៊ុនពាក់កណ្តាលស្វយ័ត និងបានចុះបញ្ជីនៅផ្សារមូលបត្រកម្ពុជា បានរាយការណ៍ថា កាលពីត្រីមាសទី១ឆ្នាំ២០២៥ នេះ ​ខ្លួនរកចំណូលបានចំនួនជិត ៨៣ ពាន់លានរៀល​ ថយចុះ ២២,៦៤% ធៀបនឹងរយៈពេលដូចគ្នាឆ្នាំមុនដែលមានចំនួនជិត ១០៧ ពាន់លានរៀល ខណៈប្រាក់ចំណេញប្រតិបត្តិការចំនួនជិត ២៥ ពាន់លានរៀល បានថយចុះ​ ជាង ៥២​% ​។

PWSA បានលើកឡើងថា ៖«មូលហេតុចម្បងនៃការថយចុះនៃចំណូល ចំណេញប្រតិបត្តិការ និងចំណេញសុទ្ធ នៅក្នុងត្រីមាសទី១ ឆ្នាំ២០២៥ គឺបណ្តាលមកពី អត្រាទឹកបាត់បង់កើនឡើងចំនួន ១៧,២០% ពោលគឺពី ៩,៧៥% ទៅ ២៦,៩៥% បើធៀបទៅនឹងត្រីមាសទី១ ឆ្នាំ២០២៤ ដែលជាហេតុនាំឱ្យចំណូលពីការលក់ មានការថយចុះចំនួន ១៨.៧០០.៧៣៥.០០០រៀល ឬ ១៩,៧៦%។

យោងតាមរបាយការណ៍របស់ PWSA ក្រុមហ៊ុនបានផ្គត់ផ្គង់ទឹកទៅដល់ក្រុមគ្រួសារ ដែលមានទីលំនៅនៅទីក្រុងភ្នំពេញ និងតាមបណ្តាទីតាំងនានា ដែលនៅជុំវិញទីក្រុង។ ហើយដើម្បីទ្រទ្រង់អាជីវកម្មចែកចាយទឹកប្រើប្រាស់ PWSA ត្រូវតែផ្គត់ផ្គង់នូវបណ្តាញ ទឹកធ្វើ ជាសេវាកម្មទ្រទ្រង់។

នៅក្នុងឆ្នាំ២០២៤ នេះ PPWSA រកចំណូលបានចំនួនជិត ៣៤៨ ពាន់លានរៀល កើនឡើង​ ៤,២៩% ធៀបនឹងឆ្នាំ២០២៣ ខណៈប្រាក់ចំណេញប្រតិបត្តិការចំនួនជាង ៨៩ពាន់លានរៀល បានកើនឡើង​ ចំណេញសុទ្ធចំនួនជាង ៨៥ពាន់លានរៀល កើនឡើង​ ១៧​% បើធៀបនឹងឆ្នាំ២០២៣។

PWSA លើកឡើងថា ប្រាក់ចំណូលបានមកពីការតភ្ជាប់ទឹក (សេវាកម្មទ្រទ្រង់សម្រាប់ការផ្គត់ផ្គង់ទឹកប្រើប្រាស់) មានចំនួនតិចជាង ៣% (២០២៣៖ ៤%) នៃប្រាក់ចំណូលសរុបខណៈពេលដែលចំណូលដែលបានមកពីការ ផ្គត់ផ្គង់ទឹកប្រើប្រាស់មានចំនួន ៩៧% (២០១៩៖ ៩៦%) នៃប្រាក់ចំណូលសរុប​។

​កាលពីថ្ងៃទី១០ ខែមេសា ឆ្នាំ២០២៤.១.ស.ក និង ក្រុមហ៊ុន VINCI Construction Grands Projects បាន ចុះកិច្ចព្រមព្រៀងលើការសាងសង់រោងចក្រផលិតទឹកស្អាតបាក់ខែងដំណាក់កាលទី៣ ដែលមានសមត្ថភាព ផលិតទឹកបាន១៩៥ ពាន់ម៉ែត្រគូបក្នុងមួយថ្ងៃ។

«កិច្ចសន្យាសាងសង់នេះមានទឹកប្រាក់ចំនួន ១០៣លានដុល្លារ អាមេរិក ដែលបានពីផ្តល់កម្ចីហិរញ្ញប្បទានពីក្រសួងសេដ្ឋកិច្ច និងហិរញ្ញវត្ថុ ដែលផ្តល់មូលនិធិដោយដៃគូអភិវឌ្ឍន៍ បារាំងចំនួន ៦១លានដុល្លារអាមេរិក និងមូលធនរបស់ PWSA ចំនួន ៤២លានដុល្លារអាមេរិក។ ការសាងសង់ បានចាប់ផ្តើមនៅខែមិថុនា ឆ្នាំ២០២៤ និងបញ្ចប់នៅត្រីមាសទី៣ ឆ្នាំ២០២៧ »។ បេះបើយោងតាម PWSA​ ៕