ពិធីនេះមានការចូលរួមពីសំណាក់លោក លោកស្រី សមាជិក សមាជិកា គណៈចលនាមហាជន ប្រធានគណៈចលនាជំនាញ អគ្គលេខាធិការ អគ្គលេខាធិការរង ប្រធានគណៈចលនាមហាជនរាជធានី-ខេត្ត និង សិក្ខាកាមដែលបានទទួលវគ្គបណ្តុះបណ្តាលប្រមាណ ១.០២១ នាក់ នៅទីស្នាក់ការគណបក្សប្រជាជនកម្ពុជា ខេត្តកណ្តាល។

ជាកិច្ចចាប់ផ្តើម លោក គួច ចំរើន ប្រធានគណៈចលនាមហាជនខេត្តកណ្តាល បានថ្លែងសុន្ទរកថាស្វាគមន៍ និងរបាយការណ៍ជូនអង្គពិធី។ លោកបានលើកឡើងថា វគ្គបណ្តុះបណ្តាលនេះទទួលបានជោគជ័យ ដោយមានការស្នើសុំបន្ថែមសមាសភាពពីរចនាសម្ព័ន្ធមូលដ្ឋាន រហូតទៅ ១៨១ រូបផងដែរ។

ជាមួយគ្នានេះប្រធានគណៈចលនាមហាជនខេត្តកណ្តាល
បានបន្តទៀតថា ជនបង្គោលលើការងារមហាជនទាំងអស់ ដែលបានទទួលការបណ្តុះបណ្តាលនាពេលនេះ នឹងបានយល់ដឹងច្បាស់ពីតួនាទី ភារកិច្ច និងរចនាសម្ព័ន្ធគណៈចលនាមហាជន និងក្រុមចលនាមហាជន យកទៅអនុវត្តការងារនៅតាមមូលដ្ឋាន បានកាន់តែប្រសើរឡើងថែមទៀត។

សូមជម្រាបជូនថា វគ្គបណ្តុះបណ្តាលនេះ មានសិក្ខាកាមសរុបចំនួន ១.០២១ រូប ដោយបែងចែកជា ១៤វគ្គ សម្រាប់ ខេត្តកណ្តាល ។ ក្នុងនោះ វគ្គនីមួយៗ បានប្រព្រឹត្តទៅរយៈពេល មួយថ្ងៃពេញ ដោយសិក្ខាកាមនៃវគ្គនីមួយៗ បានទទួលនូវមេរៀនសំខាន់ៗពាក់ព័ន្ធនឹង ទី១. តួនាទី ភារកិច្ច និងរចនាសម្ព័ន្ធគណៈចលនាមហាជន ទី២. វិធីសាស្រ្តគោលក្នុងការប្រឈម និងគ្រប់គ្រងសមរភូមិសតិអារម្មណ៍ ទី៣. ការគ្រប់គ្រងប្រព័ន្ធផ្សព្វផ្សាយ និងវិធីសាស្ត្រផ្សព្វផ្សាយ និង ទី៤. យុទ្ធសាស្ត្របញ្ចកោណ ដំណាក់កាលទី១ និងសមិទ្ធផលសម្រេចបានរបស់ រាជរដ្ឋាភិបាល។ ជនបង្គោលដែលបានទទួលការបណ្តុះបណ្តាលនាពេលនេះ នឹងទទួលបានសម្បទាគ្រប់គ្រាន់សម្រាប់បើកវគ្គបណ្តុះបណ្តាលការងារចលនាមហាជនដល់រចនាសម្ព័ន្ធគ្រប់ជាន់ថ្នាក់នៅមូលដ្ឋានរៀងៗខ្លួន៕

The post ឯកឧត្តម ហ៊ុន ម៉ានី អញ្ជើញបិទវគ្គបណ្ដុះបណ្ដាលជនបង្គោលលើ ការងារមហាជន ក្រុង -ស្រុក និង ឃុំ-សង្កាត់ នៃគណៈកម្មាធិការគណបក្សខេត្តកណ្តាល appeared first on Kampuchea Thmey Daily.

ក្នុងនោះនៅថ្ងៃទី១០ ខែមិថុនា សមត្ថកិច្ចចម្រុះ បានចុះត្រួតពិនិត្យផលិតផលសាច់បង្កកស្តុកទុកនៅឃ្លាំង ដែលស្ថិតនៅក្នុងភូមិសំរោងទាវ សង្កាត់ក្រាំងធ្នង់ ខណ្ឌសែនសុខ, ឃ្លាំងសង្កាត់គោករកា ខណ្ឌព្រែកព្នៅ និងនៅភូមិស្វាយប៉ាក សង្កាត់ស្វាយប៉ាក ខណ្ឌឬស្សីកែវ។ របាយការណ៍របស់អាជ្ញាធរឱ្យដឹងថា នៅក្នុងឃ្លាំងដែលស្ថិតនៅខណ្ឌសែនសុខ មិនមានទំនិញនាំពីថៃចូលមកកម្ពុជាឡើយ ប៉ុន្តែឃ្លាំងស្តុកសាច់បង្កកនៅខណ្ឌព្រែកព្នៅ និងខណ្ឌឬស្សីកែវ គឺមានសាច់បង្កក និងទំនិញនាំពីថៃជាង២០០តោន។

ចំពោះឃ្លាំងសាច់បង្កកនៅខណ្ឌព្រែកព្នៅ និងខណ្ឌឬស្សីកែវ នេះ របាយការណ៍របស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និង បង្រ្កាបការក្លែងបន្លំ «ក.ប.ប.» ឱ្យដឹងថា  ឃ្លាំងផលិតផលសាច់បង្កកស្តុកទុកនៅទីតាំងស្ថិតនៅសង្កាត់គោករកា ខណ្ឌព្រែកព្នៅ រាជធានីភ្នំពេញ មានទំនិញ២ប្រភេទដែលមានស្លាកសញ្ញាជាអក្សរថៃ បរិមាណ ២១៥កញ្ចប់ ស្មើនឹង ៤៣០គីឡូក្រាម។ចំណែកឃ្លាំងនៅភូមិស្វាយប៉ាក សង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ មានផលិតផលចំនួន២៥ ប្រភេទ ដែលមានស្លាកសញ្ញាជាអក្សរថៃ បរិមាណ ១,២០៩កេស ស្មើនឹង ២១៨តោន។

បន្ទាប់មកនៅថ្ងៃទី១១ ខែមិថុនា សមត្ថកិច្ចចម្រុះបានចុះត្រួតពិនិត្យទីតាំងឃ្លាំងសង្ស័យនាំចូល ស្តុក និងបង្កកទំនិញ ត្រី សាច់ គ្រប់ប្រភេទ ពីប្រទេសថៃ សរុបបានចំនួន៥១ទីតាំង។ អ្នកនាំពាក្យរដ្ឋបាលរាជធានីភ្នំពេញឱ្យដឹងថា ក្នុងចំណោមទីតាំងទាំងអស់នេះ កម្លាំងចំរុះបានរកឃើញទីតាំងឃ្លាំង និងសិប្បកម្មចំនួន ៤កន្លែង នៅខណ្ឌទួលគោក ខណ្ឌមានជ័យ និងខណ្ឌជ្រោយចង្វារ មានស្តុកសាច់ និងប្រហិតចម្រុះគ្រប់ប្រភេទជាច្រើនមុខ ដែលបាននាំចូលពីប្រទេសថៃ។ ក្រុមការងារបានសម្រេចបិទទីតាំងទាំងនោះបណ្តោះអាសន្ន និងបាននាំខ្លួនម្ចាស់ទីតាំងទាំងនោះមកស្នងការដ្ឋាននគរបាលរាជធានីភ្នំពេញដើម្បីបន្តនីតិវិធី។

ថ្មីៗនេះ សម្តេចតេជោ ហ៊ុន សែន  ប្រកាសឱ្យឈ្មួញខិលខូចបញ្ឈប់ការនាំទំនិញ សាច់បង្កកពីថៃពីចូលមកម្ពុជាជាបន្ទាន់ពីព្រោះ សាច់បង្កក និងទំនិញខ្លះប៉ះពាល់សុខភាពអ្នកប្រើប្រាស់។ ក្នុងឋានៈជាប្រធានគណបក្សប្រជាជនកម្ពុជា បញ្ជាឱ្យឃាត់ខ្លួនក្រុមមនុស្សដែលសហការលួចនាំទំនិញពីថៃចូលកម្ពុជា ក្នុងនោះមិនលើកឡើងចាប់តាំងពីអ្នកបើករថយន្តដឹកទំនិញនោះ។ សម្ដេច បញ្ជាក់ថា សម្ដេចនឹងសួរចម្លើយឈ្មួញធំដែលនាំចូលទំនិញពីថៃមកកម្ពុជាដោយផ្ទាល់ ដើម្បីដឹងច្បាស់ថា នាំទំនិញចូលមកមកដោយរបៀបណា និងស៊ូកប៉ាន់មន្ត្រីណាខ្លះ។

សម្ដេច ហ៊ុន សែន ថែមទាំងណែនាំឱ្យចាត់វិធានការក្ដៅលើឈ្មួញ និងអ្នកពាក់ព័ន្ធនឹងការចូលទំនិញពីថៃចូលមកកម្ពុជាទាំងដែលព្រំដែនបិទ ពោលគឺរឹបអូសទ្រព្យសម្បត្តិ និងយកទៅជីកដី រែកដី ធ្វើលេណដ្ឋានកងទ័ព នៅព្រំដែន៕

The post ប្រតិបត្តិការឆែកឆេរឃ្លាំងសាច់បង្កក៖ ថ្ងៃទី១០ ខែមិថុនារកឃើញជាង២០០តោន ថ្ងៃទី១១រកឃើញឃ្លាំងចំនួន៤នាំទំនិញពីថៃ និងឃាត់ខ្លួនម្ចាស់ទីតាំង appeared first on Kampuchea Thmey Daily.

ប្រតិបត្តិការចុះបង្ក្រាបរថយន្តខាងលើងនេះ ធ្វើឡើងដោយមានកម្លាំងសមត្ថកិច្ចសហការគ្នារវាងមន្ត្រីប្រចាំ​ការនៅស្ថានីយជញ្ជីងអចល័តកាំពី មន្ត្រីរដ្ឋបាលព្រៃឈើ និងសមត្ថកិច្ចស្រុកសំបូរ នៅត្រង់ចំណុចភូមិសង្គម ឃុំសណ្ដាន់ ស្រុកសំបូរ ខេត្តក្រចេះនាថ្ងៃទី៤ ខែមិថុនា ឆ្នាំ២០២៦។

តាមប្រភពព័ត៌មានបានឱ្យដឹងថា ម្ចាស់រថយន្តទាំង ៤ គ្រឿង ក្នុង​នោះ​រថយន្ត ៣ គ្រឿង បានទម្លាក់ឧសព្រៃមួយចំនួនចេញ មុនពេលបន្តដំណើរ ខណៈរថយន្ត ១ គ្រឿងទៀត ត្រូវបានមន្ត្រីស្ថានីយជញ្ជីង​អចល័តកាំពីឃាត់ និងធ្វើការត្រួតពិនិត្យទាន់ពេលវេលា។

ប្រធានមន្ទីរសាធារណការ និងដឹកជញ្ជូនខេត្តក្រចេះ លោក សាំង ប៊ុនថេន បានឱ្យដឹងថា មន្ត្រីស្ថានីយជញ្ជីងអចល័តកាំពី បានធ្វើការត្រួតពិនិត្យ និងរកឃើញរថយន្តខាងលើពិតជាបានដឹកលើសទម្ងន់កំណត់ ហើយបានអនុវត្តការផាកពិន័យស្របតាមច្បាប់ជាធរមានរួចរាល់ហើយ។

ប្រភពពីប្រជាពលរដ្ឋ រស់នៅក្នុងឃុំថ្មគ្រែថា ក្នុងមួយរយៈចុងក្រោយនេះ មានរថយន្តធុនធំមួយចំនួនដែលសង្ស័យថាដឹកលើសទម្ងន់ តែងតែបើកវាងឬគេចពីស្ថានីយជញ្ជីងអចល័តកាំពី ដោយប្រើប្រាស់ផ្លូវមាត់ទន្លេ ជាផ្លូវខេត្តលេខ ៣៧៧ និង ៣៧៧A ពីស្រុកសំបូរ ឆ្ពោះទៅកាន់ក្រុងក្រចេះ៕

អត្ថបទ៖ ប្រុញ វិធិន

The post ពិន័យរថយន្ត ១ គ្រឿង ដឹក​លើសទម្ងន់ ខណៈ ៣ គ្រឿងទម្លាក់ទំនិញចេញមុនឆ្លងកាត់ជញ្ជីង​នៅ​ខេត្តក្រចេះ appeared first on Kampuchea Thmey Daily.

គណៈបញ្ជាការឯកភាពរដ្ឋបាលខណ្ឌឫស្សីកែវ ដឹកនាំដោយលោក ជិន ប៊ុនធឿន អភិបាលខណ្ឌ កាលពីថ្ងៃទី២៩ ខែឧសភា ឆ្នាំ២០២៦ ខណៈត្រួតពិនិត្យជនបរទេសនៅបុរីវិមានភ្នំពេញ សង្កាត់ច្រាំងចំរេះទី២ ខណ្ឌឫស្សីកែវ ចំនួន២ផ្ទះ បានរកឃើញជនបរទេសស្នាក់នៅសរុបចំនួន១៥នាក់ ស្រី៣នាក់។ ក្នុង១៥នាក់នេះ មានជនបរទេសចំនួន៣នាក់ មិនមានឯកសារត្រឹមត្រូវ។ ក្រោយការត្រួតពិនិត្យជនបទបរទេសដែលខុសច្បាប់ត្រូវបានប្រគល់ជូនស្នងការដ្ឋាននគរបាលរាជធានីភ្នំពេញ ដេីម្បីបន្តនីតិវិធី។

ក្នុងករណីនេះ ក្រុមការងារមិនបានរកឃើញបទល្មើសទាក់ទងនឹង Scam online ទេ។ នេះបើតាមលោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យរដ្ឋបាលសាលារាជធានីភ្នំពេញ បានឱ្យដឹងនារសៀលថ្ងៃទី៣០ ឧស
ភា ២០២៦នេះ។

លោកស្រី បានបន្តថា ក្រោមការដឹកនាំបញ្ជាផ្ទាល់របស់លោក ឃួង ស្រេង អភិបាលរាជធានីភ្នំពេញ នាព្រឹកថ្ងៃទី២៩ ខែឧសភា ឆ្នាំ២០២៦ គណ:បញ្ជាការឯកភាពរដ្ឋបាលខណ្ឌចំនួន៣ មានខណ្ឌប្ញស្សីកែវ ខណ្ឌពោធិ៍សែនជ័យ និងខណ្ឌ ច្បារអំពៅបាន ចុះត្រួតពិនិត្យ និងបង្រ្កាបទីតាំងបទល្មេីសឆបោកតាមប្រព័ន្ធបច្ចេកវិទ្យា (Online Scam) ព្រមៗគ្នាតែម្ដង។

បើតាមលោកស្រី ក្នុងនោះគណ:បញ្ជាការឯកភាពរដ្ឋបាលខណ្ឌពោធិ៍សែនជ័យ ដឹកនាំដោយលោក សក់ ចន្ទកញ្ញារិទ្ធិ បានចុះត្រួតពិនិត្យនិងបង្រ្កាបទីតាំងមួយកន្លែង ស្ថិតនៅភូមិក្បាលដំរី១ សង្កាត់កាកាបទី១ ដោយរកឃើញមនុស្សសរុបចំនួន២នាក់ សង្ស័យជាទីតាំងជួសជុលសម្ភារ:កុំព្យូទ័រ បំរើការឱ្យបទល្មេីសតាមប្រព័ន្ធបច្ចេកវិទ្យា (Online Scam)។ ក្រោយការត្រួតពិនិត្យជនសង្ស័យ និងវត្ថុតាង ត្រូវបញ្ជូនទៅស្នងការដ្ឋាននគរបាលរាជធានី ដើម្បីបន្តនីតិវិធី។

លោកស្រីអ្នកនាំពាក្យ បន្តទៀតថា នាព្រឹកថ្ងៃទី២៩ ខែឧសភា ឆ្នាំ ២០២៦ដដែលនោះ គណៈបញ្ជាការឯកភាពរដ្ឋបាលខណ្ឌច្បារអំពៅ ដឹកនាំដោយលោក ម៉ូវ ម៉ានិត ជាអភិបាលខណ្ឌ និងមានការសម្របសម្រួលនីតិវិធីពីព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ចុះត្រួតពិនិត្យរដ្ឋបាល ដោយរកឃើញជនបរទេសស្នាក់នៅសង្ស័យប្រព្រឹត្តបទល្មើស Online Scam ចំនួន២ខ្នងផ្ទះ នៅបុរីសុង ឃុន ស្ថិតក្នុងភូមិស្វាយតាអុក សង្កាត់វាលស្បូវ។ ក្នុងនោះរកឃើញជនជាតិចិនភេទប្រុសសរុប១១នាក់ រួមនិងវត្ថុតាងមួយចំនួន។ នាពេលនេះទាំងមនុស្ស និងសម្ភារៈ បានប្រគល់ជូនស្នងការដ្ឋាននគរបាលរាជធានី ភ្នំពេញដេីម្បីបន្តនីតិវិធី៕ ស្រីរ័ត

The post ខណ្ឌចំនួន៣ ចុះត្រួតពិនិត្យនិងបង្រ្កាបបទល្មេីសឆបោកតាមប្រព័ន្ធបច្ចេកវិទ្យា ព្រមៗគ្នាឃាត់ខ្លួនមនុស្សជាច្រើននាក់ appeared first on Kampuchea Thmey Daily.

ប្រធានមន្ទីរធម្មការ និងសាសនាខេត្តបន្ទាយមានជ័យ   លោក បៀន ថាន ថ្លែងប្រាប់«កម្ពុជាថ្មី» នៅព្រឹកថ្ងៃទី១៨ខែឧសភា នេះ ថា លោកទើបតែទទួលបានព័ត៌មានជុំវិញករណីសង្ស័យព្រះសង្ឃ មានអគារជួលឱ្យក្រុមឧក្រិដ្ឋជនឆបោកតាមអនឡាញ ដែលសមត្ថកិច្ចបានចុះបង្ក្រាបកាលពីថ្ងៃទី ៦ ខែឧសភា កន្លងទៅថ្មីៗនេះ។ បើតាមប្រភពដដែល ព្រះសង្ឃដែលសង្ស័យថាជាម្ចាស់អគារមាន ព្រះនាម ភិក្ខុ គាត សីហា បច្ចុប្បន្នគង់នៅវត្តរតនារាម ផ្សារកណ្តាល ក្នុងខេត្តបន្ទាយមានជ័យ។

ប្រធានមន្ទីរធម្មការ និងសាសនាខេត្តបន្ទាយមានជ័យ​ អះអាងថា បន្ទាប់ពីទទួលបានព័ត៌មាននេះ លោកបានធ្វើរបាយការណ៍ជូនទៅក្រសួងធម្មការ និងសាសនា និងថ្នាក់ដឹកនាំខេត្តបន្ទាយមានជ័យ ដើម្បីសុំគោលការណ៍សម្រេចលើនីតិវិធីបន្តទៀត។

គួររម្លឹកថា កាលពីថ្ងៃទី៦ ខែឧសភា ថ្មីៗនេះ កម្លាំងសមត្ថកិច្ចបានចុះបង្ក្រាបទីតាំងឆបោកអនឡាញមួយកន្លែងនៅសង្កាត់អូរឬស្សី ក្រុងប៉ោយប៉ែត ខេត្តបន្ទាយមានជ័យ ដោយឃាត់ខ្លួនជនបរទេសប្រមាណ ១៣០នាក់ និងឧបករណ៍សង្ស័យមួយចំនួនទាក់ទងនឹងបទល្មើសឆបោកតាមអនឡាញ។ ក្នុងពេលសមត្ថកិច្ចចុះបង្ក្រាបអគារនេះ ព្រះអង្គ គាត សីហា បាននិមន្តទៅដល់ទីតាំងនេះ ក្រោយមកត្រូវបានសមត្ថកិច្ចសាកសួរ រួចទើបអនុញ្ញាតឱ្យនិមន្តត្រឡប់ទៅគង់នៅវត្តវិញ៕

ដោយ៖អពៅ

The post មន្ទីរធម្មការ និងសាសនាបន្ទាយមានជ័យ កំពុងចាត់វិធានការលើសង្ឃមួយអង្គ សង្ស័យជួលអគារឱ្យក្រុមឆបោកតាមអនឡាញ appeared first on Kampuchea Thmey Daily.

អស់រយៈពេល១៣ឆ្នាំហើយ កម្មវិធីប្រកួតគំនូរ និងស្មាដៃស្ត្រី Dream Girls Design Contest បានផ្តល់ឱកាសដល់អ្នករចនាវ័យក្មេងស្ត្រី និងអ្នកមានសមត្ថភាពច្នៃប្រឌិតថ្មីៗរាប់រយនាក់ ក្នុងការបង្កើតស្នាដៃសិល្បៈ ដែលអាចយកទៅប្រើប្រាស់លើផលិតផលពិតប្រាកដ ជាពិសេសផលិតផលផលិតនៅកម្ពុជា ដូចជា សូកូឡាគ្រាប់ស្វាយចន្ទី នំខូគី អាហារសម្រន់ ផលិតផលជាកាដូ និងផលិតផលខ្មែរផ្សេងៗទៀត។ តាមរយៈកម្មវិធីនេះ ការវេចខ្ចប់មិនមែនគ្រាន់តែជាប្រអប់ ឬសម្បកផលិតផលប៉ុណ្ណោះទេ ប៉ុន្តែជាមធ្យោបាយបង្ហាញរឿងរ៉ាវ អត្តសញ្ញាណ វប្បធម៌ និងភាពច្នៃប្រឌិតរបស់កម្ពុជា។

អ្នកស្រី WaKana Nukui ម្ចាស់កម្មវិធី បានលើកឡើងថា កម្មវិធីនេះចាប់ផ្តើមតាំងពីឆ្នាំ២០១០ ហើយស្មាដៃសិល្បិៈរបស់ក្មេងស្រីជាច្រើនត្រូវបានប្រើប្រាស់លើសម្បកវេចខ្ចប់ផលិតផល។

ផលិតផលខ្មែរជាច្រើន បានប្រើប្រាស់ស្មាដៃសិល្បៈច្នៃប្រឌិតដែលបានចូលរួមកម្មវិធីប្រកួតគំនូរ និងស្មាដៃស្ត្រី Dream Girls Design Contest ហើយបង្ហាញឱ្យឃើញថា សិល្បៈ និងការរចនាអាចជួយបង្កើនតម្លៃផលិតផលខ្មែរ ធ្វើឱ្យផលិតផលកាន់តែទាក់ទាញ ងាយចងចាំ និងមានសមត្ថភាពប្រកួតប្រជែងខ្ពស់ទាំងក្នុងទីផ្សារកម្ពុជា និងទីផ្សារអន្តរជាតិ។

ផលិតផលខ្មែរដែលបានប្រើប្រាស់ស្មាដៃសិល្បៈច្នៃប្រឌិតនេះ ក៏មានវត្តមានក្នុងហាង Amazing Cambodia ទាំងអស់ដែលមានទីតាំងនៅផ្សារទំនើប AEON និងអាកាសយានដ្ឋានអន្តរជាតិផងដែរ។

កម្មវិធីប្រកួតគំនូរ និងស្មាដៃស្ត្រី Dream Girls Design Contest ជឿជាក់ថា ការវេចខ្ចប់ល្អអាចជួយឱ្យផលិតផលខ្មែរមានភាពលេចធ្លោលើទីផ្សារ បង្កើតទំនាក់ទំនងអារម្មណ៍ជាមួយអតិថិជន និងជួយពង្រឹងអត្តសញ្ញាណម៉ាកផលិតផល។ ការរួមបញ្ចូលរវាងសិល្បៈខ្មែរ បេតិកភណ្ឌវប្បធម៌ និងការរចនាបែបទំនើប គឺជាមូលដ្ឋានសំខាន់ក្នុងការលើកកម្ពស់សេដ្ឋកិច្ចច្នៃប្រឌិតនៅកម្ពុជា។

អ្នកនាង ហ៊ាង វត្តី ជាអ្នករៀបចំកម្មវិធីនេះ បានលើកឡើងថា៖ «កម្មវិធីនេះមិនមែនគ្រាន់តែជាការប្រកួតគំនូរ និងស្នាដៃសិល្បៈស្អាតៗប៉ុណ្ណោះទេ ប៉ុន្តែជាឱកាសពិតប្រាកដសម្រាប់អ្នករចនាស្ត្រីវ័យក្មេង ក្នុងការឃើញស្នាដៃរបស់ខ្លួនត្រូវបានយកទៅប្រើប្រាស់លើទីផ្សារ ព្រមទាំងជួយឱ្យផលិតផលខ្មែរមានអត្តសញ្ញាណរូបភាពកាន់តែខ្លាំង និងទទួលបានការទទួលស្គាល់កាន់តែទូលំទូលាយ»៕

The post កម្មវិធីប្រកួតគំនូរ និងស្មាដៃស្ត្រី ចូលរួមលើកកម្ពស់ស្មាដៃសិល្បៈច្នៃប្រឌិតស្ត្រី ដើម្បីយកទៅធ្វើសម្បកវេចខ្ចប់ផលិតផលខ្មែរឱ្យកាន់តែមានភាពទាក់ទាញ និងគុណតម្លៃ appeared first on Kampuchea Thmey Daily.

​ប្រតិបត្តិការនេះ​ធ្វើ​ឡើង​នៅ​ថ្ងៃ​ទី​១៦​ ​ខែ​ឧសភា ​ឆ្នាំ២០២៦ ​ដឹក​នាំ​ដោយ​​លោក ​តុល រ៉េត​ មន្ត្រីទ​ទួល​បន្ទុក​គ្រប់​គ្រង​រួម​នៃ​ដែន​ជម្រក​សត្វ​ព្រៃ​ព្រៃ​ឡង់ ភូ​មិសាស្ត្រខេត្តព្រះវិហារ​ រួមជា​មួយ​មន្ត្រី​ឧទ្យានុរក្ស​ចំនួន ​០៧នាក់ ​សហការ​ជាមួយ​អាជ្ញាធរមូលដ្ឋាន ហើ​យទី​តាំង​នោះស្ថិតនៅ​ចំណុចដំបូក​ប្រាំ​ (និយាម​កា ៥១៥៣២១-១៤៩៥៨១១) ​ក្នុងភូមិពលកម្ម ​ឃុំរក្សា ស្រុករវៀង ខេត្តព្រះវិហារ។​

​អាជ្ញាធរបាន​រក​ឃើញឡ​ធ្យូងដែល​កំពុង​ដំណើរ​ការ​ដោយ​ខុសច្បាប់​ និង​បាន​សម្រេចវាយ​កម្ទេចចោល​ភ្លាមៗ​នៅ​នឹង​កន្លែង ​ដើម្បី​ទប់ស្កាត់សកម្មភាពកាប់​បំផ្លាញព្រៃឈើ​សម្រាប់​យក​មក​ធ្វើ​អាជីវកម្ម​ធ្យូង​។​​មន្ត្រី​ជំនាញ​បញ្ជាក់​ថា ​ការ​លួច​បង្កើត​ឡធ្យូង​នៅ​ក្នុង​តំបន់​ការពា​​រនេះ ​គឺជា​អំពើ​ល្មើស​ច្បាប់​យ៉ាង​ធ្ងន់ធ្ងរ ​ដែល​ផ្ទុយ​ស្រឡះ​ពី​បទប្បញ្ញត្តិនៃ ​«ក្រមបរិស្ថាន​ និង​ធនធាន​ធម្មជាតិ​»​ នៃ​ព្រះរាជាណាចក្រ​កម្ពុជា។​បទ​ល្មើស​ប្រភេទ​នេះ ​មិន​ត្រឹម​តែ​បំផ្លាញធនធាន​ព្រៃឈើដ៏​មាន​តម្លៃ​ប៉ុណ្ណោះទេ ​ប៉ុន្តែថែមទាំងបង្កជាហានិភ័យខ្ពស់ដល់ការបាត់បង់ទីជម្រកសត្វព្រៃ និងប៉ះ​ពាល់ដល់​ប្រព័ន្ធ​អេកូឡូស៊ីទាំងមូល​នៃតំបន់ព្រៃឡង់ ដែលជាព្រៃទឹកភ្លៀងក្ដៅដីគោកដ៏ធំ​មួយនៅក្នុង​តំបន់​អាស៊ីអាគ្នេយ៍។

​

អាជ្ញាធរដែនជម្រក​សត្វ​ព្រៃ​ព្រៃឡ​ង់​ បាន​បង្ហើប​ឱ្យ​ដឹង​ថា​ វិធាន​ការច្បាប់​ដ៏​​តឹង​រ៉ឹងនឹ​ង​ត្រូវ​បន្ត​អនុវត្ត​ជា​ប្រចាំ ​ដោយ​បង្កើន​ការ​ល្បាត ​និង​សហការជិ​​ត​ស្និទ្ធ​ជាមួយ​សហគមន៍​មូលដ្ឋាន​ ដើម្បី​លុប​បំបាត់រាល់​សកម្មភាព​ទន្ទ្រាន និងបំផ្លិចបំ​ផ្លាញ​ធនធានធម្មជាតិ​ ក្នុង​តំបន់​អភិរក្ស​ឱ្យ​បាន​ទាន់​ពេលវេលា៕

អត្ថបទ៖ជុន កុសល

The post កម្ទេច​ឡ​ធ្យូង​ខុស​ច្បាប់​ចំនួន ​៨កន្លែង ក្នុង​ដែន​ជម្រក​សត្វ​ព្រៃ​ព្រៃ​ឡង់​ appeared first on Kampuchea Thmey Daily.

លោក​បានអបអរសាទរ ស្វាគមន៍យ៉ាងកក់ក្តៅនិងអរគុណយ៉ាងជ្រាលជ្រៅ​ដល់បងប្អូន​ដែល​បាន​សម្រេច​ចិត្តយ៉ាងត្រឹមត្រូវ “ផ្អែកតាមហេតុផលជាក់ស្តែង”​ចូលរួមកសាងជីវភាពជាមួយ​នឹង​មហាគ្រួសារ​គណបក្សប្រជាជនកម្ពុជា។ ការសម្រេចចិត្តនេះប្រៀបដូចការជ្រើសរើសយក “កៅ​អីដែក​ដ៏​ស្អាតរឹងមាំ” មិន​ងាយ​ពុក​ផុយ​មក​អង្គុយ​ជា​បង្អែក​ និង​ជា​ការឆ្លើយតបទៅនឹងសច្ចធម៌​ជា​ប្រវត្តិសាស្ត្ររបស់គណបក្ស​ប្រជាជនកម្ពុជាដែលជាគណបក្ស​តែមួ​យ​គត់បានតស៊ូ​ផ្ដួល​រំលំ​របបប្រល័យ​ពូជសាសន៍​ប៉ុលពត សង្គ្រោះជាតិ​ឱ្យ​រស់​ឡើង​វិញ ​ស្តារ កសាងជាតិ ការពារឯករាជ្យ​អធិបតេយ្យ​​និងបូរណភាពទឹកដី ក​សាង​ និង​ថែ​រក្សាសន្តិភាព និងអភិវឌ្ឍសេដ្ឋកិច្ច-សង្គម​និង​ជួយឱ្យ​កម្ពុជា​រុងរឿង។

នាឱកាសនេះ ​លោក​បាន​ពាំនាំ​នូវ​ការ​ផ្តាំ​ផ្ញើ​សួរ​សុខទុក្ខ និងក្ដីនឹករឭកពីសំណាក់​ សម្ដេចអគ្គមហា​សេនាបតីតេជោ ​ហ៊ុន សែន ប្រធានគណបក្សប្រជាជន​កម្ពុជា សម្តេចអគ្គមហាពញាចក្រី​ ហេង សំរិន ប្រធាន​កិត្តិយស និង សម្តេចអនុប្រធានទាំង ៥ រូបជូនចំពោះគណៈកម្មាធិការគណបក្ស​ស្រុក​កំពង់​សៀមនិងសមាជិកគណបក្សទាំងអស់ ក្នុងមនោសញ្ចេតនាស្រលាញ់រាប់អា​ន​ដ៏ស្មោះ​ស្ម័គ្រ​និង​ជ្រាល​ជ្រៅ​ជា​ទី​បំផុត។ ថ្នាក់ដឹកនាំកំពូលៗសុទ្ធតែមានអត្តចរិត​គំរូ​គួរ​ឱ្យ​គោរពស្រឡាញ់ ខណៈ​ដែល​សមាជិកគ្រប់លំដាប់ថ្នាក់ប្រកាន់ខ្ជាប់តួនាទី គោលការណ៍ និងលក្ខនិ្តកៈបក្សប្រកបដោយស្មារតី​បុរេសកម្ម ​ជាពិសេសចេះរួមសុខរួមទុក្ខ ពង្រឹងការងារ​មូលដ្ឋាន និងផ្សព្វផ្សាយពីសច្ចភាព ប្រវត្តិ​ស្នាដៃ ​និង​កម្មវិធីគោលនយោបាយបក្សជាប្រចាំ។

ទន្ទឹមនឹងការកោតសរសើរ​ និង​វាយតម្លៃខ្ពស់ចំពោះគណៈកម្មាធិការគណបក្ស​ស្រុកកំពង់សៀម​ដែល​បាន​ខិត​ខំបំពេញតួ​នាទី ពង្រឹងស្មារតី​សមាជិក​តាមរយៈ​អភិក្រម​ “រក្សាចាស់ បង្កើនថ្មី”​ ដែល​សម្តេចតេជោ និង ​សម្តេចធិបតី តែងតែរំឭកឯកឧត្តម ហេង សួរ បានរំលេចពីលក្ខន្តិកៈ និងបទ​បញ្ជាផ្ទៃ​ក្នុងបក្សដែលមានគោលបំណងប្រមូលកំលាំងនៃជនជាតិខ្មែរ ដែលមានឧត្តមគតិ​ស្នេហា​ជាតិ ស្រឡាញ់លទ្ធិប្រជាធិបតេយ្យនិងសន្តិភាព មិនប្រកាន់ឋានៈ ជនជាតិ ជំនឿសាសនា អតីត​កាលដើម្បីរួមគ្នាការពារសមិទ្ធផលជាតិ និងកសាងកម្ពុជាមួយ, ឯករាជ្យ សន្តិភាព សេរីភាព ប្រជាធិប​តេយ្យ អព្យាក្រឹត និងវឌ្ឍនភាពសង្គម។ ជាមួយនឹងការរំលឹកពីប្រវត្តិ​គណបក្ស​ប្រកប​ដោយអត្ថន័យ ឯកឧត្តមបានជំរុញឱ្យសមាជិកថ្មីចងចាំពីប្រវត្តិបក្ស បុព្វហេតុនៃការបង្កើត រូបសញ្ញ បាវចនា និង​គណបក្សប្រជាជនកម្ពុជាមាន សម្តេចតេជោ ហ៊ុន សែន ជាប្រធាន សម្តេចអគ្គ​មហាពញាចក្រី ហេង សំរិន ជាប្រធានកិត្តិយស និងមានអនុប្រធាន ៥ រូប។

លោក​បានបញ្ជាក់ជូនអង្គពិធីថា ជោគជ័យរបស់គណបក្សកើតចេញពីភាព​ត្រឹមត្រូវ​នយោបាយ​គ្រប់កាលៈទេសៈ ការផ្សារភ្ជាប់នឹងប្រជាជន អនុវត្តគោលការណ៍ សមូហភាពដឹកនាំ បុគ្គល​ទទួល​ខុសត្រូវ រចនាសម្ព័ន្ធចាត់តាំងរឹងមាំគ្រប់ជាន់ថ្នាក់តាមសមត្ថភាព ជំហរស្មោះត្រង់ មាន​គុណធម៌​និង​សីលធម៌ ការគិតគូរយ៉ាងល្អិតល្អន់ក្នុងការកសាងជំនាន់បន្តវេន និងសាមគ្គីភាព ឯកភាពផ្ទៃ​ក្នុង​រឹង​មាំ​ឥត​រង្គោះរង្គើ។ ដើម្បីឱ្យជោគជ័យនេះស្ថិតស្ថេរគឺចាំបាច់ត្រូវការបន្តរក្សា​សន្តិភាពដែលថ្នាក់ដឹកនាំ​គណបក្សជាពិសេស សម្តេចតេជោបានយកជីវិតទៅប្តូរ។ លើសពីនេះ ក្មួយៗជាសមាជិកថ្មីត្រូវខិតខំ​អនុវត្តឱ្យបានពេញលេញនូវការប្តេជ្ញាចិត្ត មានសីលធម៌ល្អ បង្ហាញគំរូល្អក្នុងការ​អនុវត្តកម្មវិធី​នយោបាយ ​លក្ខន្តិកៈគណបក្ស និងច្បាប់រដ្ឋ ដើម្បីបង្កើនជំនឿនិងការគាំទ្រពីពលរដ្ឋបន្ថែមទៀត ហើយ​យុវជនក៏ត្រូវគោរពឱ្យតម្លៃស្នាដៃរាមច្បងជំនាន់មុនផងដែរ។

ទន្ទឹមនេះ សមាជិកបក្សថ្មីបានប្តេជ្ញាចិត្តក្នុងការអនុវត្តតាមកម្មវិធីនយោបាយ និងលក្ខន្តិកៈគណបក្ស បោះឆ្នោតជូនគណបក្សប្រជាជនកម្ពុជាឱ្យបាន១០០% ស្មោះត្រង់រួមរស់ជីវភាពនឹងគណបក្សជា​រៀងរ​ហូត បំផុសចលនាសមាជិកគណបក្ស អោយចូលរួមគាំទ្រគណបក្ស និងបោះឆ្នោតជូន​គណបក្សឱ្យ​ទទួលបានជ័យជំនះ ដែលគណបក្សឃុំនីមួយៗ ក្នុងស្រុកកំពង់សៀមនឹងទទួលបាននូវ​លើកទឹកចិត្ត​បន្ថែមទៀត។

លោក​ អ៊ុន ចាន់ដា ប្រធានគណៈកម្មាធិការគណបក្សប្រជាជនកម្ពុជា​ខេត្តកំពង់ចាមបាន​ជំរុញឱ្យការ​ប្តេជ្ញា​ចិត្តនេះក្លាយជាការពិតជារៀងរហូតដោយត្រូវ “ដាក់បេះដូង” បោះឆ្នោតជូនគណបក្សប្រជាជន​កម្ពុជា ដោយឥតងាករេ ជាពិសេសដណ្តើមបានប្រៀបឈ្នះសម្រាប់ការបោះឆ្នោត​ជ្រើសរើស​ក្រុម​ប្រឹក្សា​ឃុំ សង្កាត់ នាថ្ងៃទី៦ ខែមិថុនា ឆ្នាំ២០២៧ ខាងមុខនេះ៕

The post លោក​ ហេង សួរ ​​បញ្ចូល​​​​សមាជិកថ្មី​ជាង ​១,៤០០​នាក់ ​ចូល​រួម ​CPP​ នៅ​ស្រុក​កំពង់​សៀម​ បង្ហាញ​ជំនឿ​លើ​​បុព្វហេតុជាតិ មាតុភូមិ appeared first on Kampuchea Thmey Daily.