ការផ្សព្វផ្សាយព័ត៌មានក្លែងក្លាយជះឥទ្ធិពលអ្វីខ្លះដល់សង្គមទាំងមូល?

សង្គមមួយត្រូវការព័ត៌មានពិតដើម្បីអភិវឌ្ឍប្រទេស ប៉ុន្តែបើព័ត៌មានក្លែងក្លាយបំពុលច្រើនពេក តើវាជះឥទ្ធិពលអាក្រក់បែបណាខ្លះ? នេះជាអ្វីដែលអ្នកគួរដឹងនិងស្វែងយល់ក្នុងនាមជាប្រជាពលរដ្ឋ ដើម្បីកាត់បន្ថយព័ត៌មានប្រឌិតលើបណ្តាញសង្គម និងវប្បធម៌អានតែចំនងជើងហើយចុចស៊ែរ។

អ្នកជំនាញក្នុងប្រព័ន្ធផ្សព្វផ្សាយដែលកំពុងបំពេញតួនាទីជាអ្នកសារព័ត៌មានបានចូលខ្លួនមកបកស្រាយ និងអធិប្បាយយ៉ាងក្បោះក្បាយដល់សាធារណជនឱ្យបានជ្រាបច្បាស់ជាចំណេះដឹងទូទៅ។

លោក ម៉ៅ សំណាង ការីនិពន្ធ និងផលិតករ បានចែករំលែកថា ការផ្សព្វផ្សាយព័ត៌មានគឺជាតួនាទីរបស់អ្នកកាសែតនិងអ្នករាយការណ៍ ដូច្នេះកាលណាព័ត៌មានក្លែងក្លាយត្រូវបញ្ចេញទៅកាន់មហាជន វាអាចបង្កើតជាចលាចល នៅក្នុងសង្គម។ នៅក្នុងដំណាក់កម្ពុជាកំពុងរាតត្បាតដោយជំងឺសកលកូវីដ-១៩ នេះ ការដែលផ្សព្វផ្សាយព័ត៌មានមិនពិតបណ្តាលឱ្យប្រជាពលរដ្ឋមានភាពព្រួយបារម្ភ និងភ័យខ្លាច ជាពិសេសគឺពិបាកនៅក្នុងការសម្រេចចិត្ត។

យោងតាមការហ្វឹកហាត់ដោយ Agence Science-Presse បានឱ្យដឹងថា ការផ្សព្វផ្សាយព័ត៌មានក្លែងក្លាយបង្កផលប៉ះពាល់ដល់សុខភាពរបស់មនុស្ស។ ឧទាហរណ៍ការផ្សាយផលិតផលសុខភាពដែលមិនបានឆ្លងកាត់ការអនុញ្ញាតពីក្រសួងសុខាភិបាលជាដើម។ កាលណាអ្នកអានមិនបានពិនិត្យមើលប្រភពឱ្យបានច្បាស់លាស់ ធ្វើឱ្យអ្នកតាមដានព័ត៌មាននោះអនុវត្តនិងទទួលបានលទ្ធផលខុស។

មួយវិញទៀត បើផ្សព្វផ្សាយព័ត៌មានទាក់ទងនិងសាសនាវិញ នាំឱ្យមានការរើសអើងជាតិសាសន៍ ដែលទង្វើនេះកំពុងក្លាយជាចំនុចគួរឱ្យព្រួយបារម្ភជុំវិញពិភពលោក។ លើសពីនេះ បណ្តាលឱ្យមានសកម្មភាពតិះដៀលលើបណ្តាញសង្គមធ្ងន់ធ្ងរ ចលាចលក្នុងប្រទេស បង្អាក់ការអភិវឌ្ឍប្រទេសជាតិ។

អង្គភាពសារព័ត៌មានកម្ពុជាថ្មីកំពុងអនុវត្តយុទ្ធនាការបញ្ឈប់ព័ត៌មានក្លែងក្លាយ ចូលរួមចំណែកជួយសង្គមខ្មែរឱ្យយល់ដឹងអំពីផលប៉ះពាល់ព័ត៌មានក្លែងក្លាយ និងមធ្យោបាយទប់ស្កាត់ការចាញ់បោកព័ត៌មានក្លែងក្លាយ។ លោកអ្នកអានតាមដានតាមរយៈ https://www.facebook.com/watch/210982625602535/4273164449384594 ទស្សនានូវបណ្តុំវីដេអូចែករំលែកចំណេះដឹង និងបង្ហើបគន្លឹះសំខាន់ៗជាច្រើនទៀត៕

អត្ថបទដោយ៖ Jacqueli