អ៊ុយក្រែន អះអាងថា ខ្លួនជាអ្នកវាយប្រហារមូលដ្ឋានកងទ័ពរុស្ស៊ី នៅ Crimea (មានវីដេអូ)

កងទ័ពអាកាសអ៊ុយក្រែននិយាយថា យន្តហោះរុស្ស៊ីចំនួនប្រាំបួនគ្រឿងត្រូវបានបំផ្លាញក្នុងការផ្ទុះដ៏ធំ នៅឯមូលដ្ឋានទ័ពអាកាសនៃតំបន់ Crimea។

ស្របពេលជាមួយគ្នានោះដែរ មន្ត្រីជាន់ខ្ពស់អ៊ុយក្រែនម្នាក់បានប្រាប់ Sky News ថា កងកម្លាំងពិសេសអ៊ុយក្រែន បានបើកប្រតិបត្តិការនៅលើមូលដ្ឋាននោះ។

មនុស្ស​ម្នាក់​ត្រូវ​បាន​សម្លាប់​​ក្នុង​ការ​បំផ្ទុះ​ជា​បន្តបន្ទាប់ ​ជិត​រមណីយដ្ឋាន​មាត់​សមុទ្រ​នៅ​ឧបទ្វីបដែលត្រូវរុស្ស៊ីកាត់បញ្ចូលជាឧបសម្ព័ន្ធ។

ទោះបីជាយ៉ាងណាក៏ដោយ រុស្ស៊ី​បាន​បដិសេធ​ថា គ្មានយន្តហោះ​ណា​មួយ ​ត្រូវរងការ​ខូចខាត​ក្នុង​ការ​បំផ្ទុះ​កាលពី​ថ្ងៃ​អង្គារ ឬ​ថា​ការ​វាយ​ប្រហារ​ណា​មួយ​បាន​កើត​ឡើងនោះទេ។

សារព័ត៌មាន Crimea Today News បានផ្សាយនៅលើ Telegram ថា សាក្សីក៏បានរាយការណ៍ថាមានភ្លើងឆេះនៅលើផ្លូវយន្តហោះ និងខូចខាតផ្ទះនៅក្បែរនោះផងដែរ។

នាយកដ្ឋានសុខាភិបាលនៅ Crimea និយាយថា ជនស៊ីវិលម្នាក់ត្រូវបានសម្លាប់ ខណៈម្នាក់ទៀតត្រូវបានព្យាបាលនៅក្នុងមន្ទីរពេទ្យ និងប្រាំនាក់ទៀតរងរបួសស្រាល។

គួរបញ្ជាក់ថា រុស្ស៊ី​បានកាត់យកតំបន់ Crimea ​ពី​អ៊ុយក្រែន​ក្នុង​ឆ្នាំ ២០១៤ ហើយ​បាន​ប្រើទីនោះ ​ជាចំណុចស្នូលសម្រាប់​ការ​លុកលុយ​ប្រទេស​ជិតខាង​ក្នុង​ខែកុម្ភៈ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Sky

ចុចអាន៖ ការផ្ទុះច្រើនលើក វាយប្រហារមូលដ្ឋានកងទ័ពតំបន់ Crimea របស់រុស្ស៊ី មានអ្នកស្លាប់និងរបួស