អង់គ្លេស ផ្តល់ជំនួយយោធា ៥៨០លានដុល្លារទៀត ឲ្យ អ៊ុយក្រែន

ចក្រភពអង់គ្លេស បានប្រកាសកញ្ចប់ជំនួយយោធាថ្មីតម្លៃ៤៥០លានផោន (៥៨០លានដុល្លារអាមេរិក) ដើម្បីពង្រឹងសមត្ថភាពការពាររបស់អ៊ុយក្រែន ចំពេលជម្លោះជាមួយរុស្ស៊ី នៅតែពុះកញ្ជ្រោលខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC នៅថ្ងៃសុក្រទី១១ខែមេសាឆ្នាំ២០២៥ ជំនួយនេះនឹងផ្តល់មូលនិធិដល់ការជួសជុលនិងថែទាំឧបករណ៍យោធា ប្រព័ន្ធរ៉ាដា មីនប្រឆាំងរថក្រោះ និងយន្តហោះគ្មានមនុស្សបើករាប់ម៉ឺនគ្រឿង។

ការ​ប្រកាស​នេះ ​ធ្វើ​ឡើង​ក្នុង​អំឡុង​កិច្ច​ប្រជុំ​ក្រុម​ទំនាក់ទំនង​ការពារ​ជាតិ​អ៊ុយក្រែន​ នៅ​ទីក្រុង​ព្រុចសែល ដែល​មាន​រដ្ឋមន្ត្រី​ការពារជាតិ​អង់គ្លេស John Healey និង​សមភាគី​អាល្លឺម៉ង់ Boris Pistorius ជាសហប្រធាន។

ក្នុងអំឡុងពេលនោះ លោក John Healey បានសង្កត់ធ្ងន់លើសារៈសំខាន់នៃការបន្តជំនួយ ដើម្បីដាក់សម្ពាធលើប្រធានាធិបតីរុស្ស៊ី វ្ល៉ាឌីមៀរ ពូទីន និងចៀសវាងការខ្វែងគំនិតគ្នាក្នុងចំណោមសម្ព័ន្ធមិត្ត ដែលអាចបំផ្លាញដល់កិច្ចខិតខំប្រឹងប្រែងសន្តិភាព។

ជំនួយនេះ គឺស្របតាមការប្តេជ្ញាចិត្តយ៉ាងធំធេងរបស់ចក្រភពអង់គ្លេសចំពោះអ៊ុយក្រែន ដោយក្នុងនោះរួមមានទាំងការវិនិយោគទំហំទឹកប្រាក់ ១.៦ពាន់លានផោនលើខែលការពារដែនអាកាស និងប្រាក់កម្ចី២.២ពាន់លានផោន ដែលយកពីទ្រព្យសម្បត្តិបង្កករបស់រុស្ស៊ីផងដែរ។

សូមជម្រាបថា ចាប់តាំងពីប្រធានាធិបតីអាមេរិក ដូណាល់ ត្រាំ ឡើងកាន់អំណាចអាណត្តិទី២មក ទីក្រុងវ៉ាស៊ីនតោន បានដកខ្លួនលែងដើរតួនាទីឈានមុខជួយអ៊ុយក្រែន ដើម្បីតទល់ជាមួយរុស្ស៊ីទៀតហើយ ហើយអង់គ្លេសនេះឯងដែលចេញមុខមាត់ជាងគេក្នុងការគាំទ្រទីក្រុងកៀវ។

ចាប់តាំងពីរុស្ស៊ីបើកការវាយលុកលើអ៊ុយក្រែនក្នុងខែកុម្ភៈឆ្នាំ២០២២មក ចក្រភពអង់គ្លេសបានផ្តល់ជំនួយសរុប១២.៨ពាន់លានផោនដល់អ៊ុយក្រែន។ នេះរួមបញ្ចូលទាំងជំនួយយោធាចំនួន៧.៨ពាន់លានផោន និង៥ពាន់លានផោន នៅក្នុងជំនួយមិនមែនយោធាដែលគ្របដណ្តប់លើជំនួយមនុស្សធម៌ សេដ្ឋកិច្ច និងការកសាងឡើងវិញផងដែរ៕

អត្ថបទ៖ សុខ សុវណ្ណ

ចុចអាន៖ អង់គ្លេស បញ្ជូន​ប្រមុខ​យោធា​ និង​រដ្ឋមន្ត្រី​ពាណិជ្ជកម្ម​ទៅ​ប្រទេស​ចិន​ក្នុង​ពេល​ដំណាលគ្នា