អាមេរិក ព្រមានឲ្យកងទ័ពត្រៀមទទួលការសងសឹករបស់អ៊ីរ៉ង់ ខណៈអ៊ីស្រាអែល កំពុងប្រុងជើងការខ្ពស់

សហរដ្ឋអាមេរិក បានព្រមានឲ្យកងទ័ពរបស់ខ្លួននៅតំបន់មជ្ឈិមបូព៌ា ត្រូវត្រៀមខ្លួនទប់ទល់នឹងការសងសឹករបស់អ៊ីរ៉ង់ ខណៈអ៊ីស្រាអែលឯណោះ ក៏កំពុងប្រុងជើងការខ្ពស់ដែរ បន្ទាប់ពីលោក ដូណាល់ ត្រាំ វាយប្រហារទីតាំងនុយក្លេអ៊ែរអ៊ីរ៉ង់ចំនួន៣កន្លែង កាលពីថ្ងៃសៅរ៍ទី២១ខែមិថុនាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីប្រកាសមួយ បណ្តាមេទ័ពអាមេរិក បានប្រាប់ឲ្យទាហានរបស់ខ្លួនថា អ៊ីរ៉ង់នឹងឆ្លើយតបដោយកំណត់គោលដៅលើមូលដ្ឋានទ័ពក៏ដូចជាទ្រព្យសម្បត្តិអាមេរិកនៅតំបន់មជ្ឈិមបូព៌ា ហើយក៏ប្រហែលជានឹងមានក្រុមសកម្មប្រយុទ្ធឬបក្សពួកអ៊ីរ៉ង់នៅបរទេសរួមទាំងនៅសហរដ្ឋអាមេរិកផងដែរ អាចនឹងវាយប្រហារលើជនជាតិអាមេរិកព្រមទាំងទីតាំងនានារបស់អាមេរិក។

ចំណែកអ៊ីស្រាអែលឯណោះ ក្រោយអាមេរិកទម្លាក់គ្រាប់បែកនុយក្លេអ៊ែរអ៊ីរ៉ង់, អ៊ីស្រាអែល បានបង្កើនកម្រិតប្រុងជើងការកាន់តែខ្ពស់នៅក្នុងប្រទេស ពោលគឺអនុញ្ញាតឲ្យប្រជាជនធ្វើតែសកម្មភាពណាដែលចាំបាច់ប៉ុណ្ណោះ។

បើយោងតាមសេចក្តីថ្លែងការណ៍របស់យោធាអ៊ីស្រាអែល, អ៊ីស្រាអែលបានសម្រេចចិត្ត ផ្លាស់ប្តូរការដាក់កំហិតលើសកម្មភាពនានាមួយផ្នែក ទៅជាការដាក់កំហិតទាំងស្រុងតែម្តងរួមទាំង «ការហាមឃាត់លើសកម្មភាពអប់រំ ការជួបជុំ និងកន្លែងធ្វើការ លើកលែងតែវិស័យសំខាន់ៗប៉ុណ្ណោះ»។

ការព្រមាននេះក៏កើតឡើងផងដែរស្របពេលលោក ត្រាំ ព្រមានវាយអ៊ីរ៉ង់ជាបន្តទៀតនិងកាន់តែខ្លាំង លុះត្រាតែមានកិច្ចព្រមព្រៀងសន្តិភាពឆាប់ៗ។

ក្នុងសុន្ទរកថាទៅកាន់ប្រទេសជាតិនៅថ្ងៃអាទិត្យទី២២ខែមិថុនាឆ្នាំ២០២៥ លោកត្រាំនិយាយថា «បើពួកគេមិនព្រម ការវាយប្រហារនៅថ្ងៃមុខនឹងខ្លាំងជាងនេះឆ្ងាយណាស់។ អាចនឹងមានសន្តិភាព ឬនឹងមានសោកនាដកម្មសម្រាប់អ៊ីរ៉ង់ លើសពីអ្វីដែលយើងបានឃើញក្នុងរយៈពេលប្រាំបីថ្ងៃចុងក្រោយនេះទៅទៀត»។

លោកបន្តថា «ត្រូវចាំថា មានគោលដៅនៅសល់ច្រើនទៀត។ យប់នេះគឺជាយប់លំបាកបំផុត សម្រាប់ពួកគេ ហើយក៏ប្រហែលជាយប់សាហាវបំផុតដែរ។ ​ប៉ុន្តែ​ប្រសិនបើ​រកសន្តិភាព​មិន​បាន​លឿន​ទេនោះ យើង​នឹង​ឆ្ពោះទៅ​កាន់​គោលដៅ​ផ្សេង​ទៀត​ដោយ​ភាពជាក់លាក់ ល្បឿន និង​ជំនាញ​»៕

អត្ថបទ៖ សុខ សុវណ្ណ

ចុចអាន៖ ត្រាំ គំរាមវាយអ៊ីរ៉ង់ កាន់តែខ្លាំង បើមិនព្រមចុះកិច្ចព្រមព្រៀងសន្តិភាព ឆាប់ៗ