Connect with us

ព័ត៌មានអន្ដរជាតិ

ត្រាំ គំរាមវាយអ៊ីរ៉ង់ កាន់តែខ្លាំង បើមិនព្រមចុះកិច្ចព្រមព្រៀងសន្តិភាព ឆាប់ៗ

បានផុស

នៅ

ប្រធានាធិបតីអាមេរិក ដូណាល់ ត្រាំ បានព្រមានវាយអ៊ីរ៉ង់ជាបន្តទៀតនិងកាន់តែខ្លាំង លុះត្រាតែមានកិច្ចព្រមព្រៀងសន្តិភាព។

លោក ត្រាំ ថ្លែងសុន្ទរកថាទៅកាន់ប្រទេសជាតិ (រូបថត៖ Reuters)
សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកព្រមានបែបនេះក្នុងសុន្ទរកថាទៅកាន់ប្រទេសជាតិនៅថ្ងៃអាទិត្យទី២២ខែមិថុនាឆ្នាំ២០២៥ ដោយនិយាយថា «បើពួកគេមិនព្រម ការវាយប្រហារនៅថ្ងៃមុខនឹងខ្លាំងជាងនេះឆ្ងាយណាស់។ អាចនឹងមានសន្តិភាព ឬនឹងមានសោកនាដកម្មសម្រាប់អ៊ីរ៉ង់ លើសពីអ្វីដែលយើងបានឃើញក្នុងរយៈពេលប្រាំបីថ្ងៃចុងក្រោយនេះទៅទៀត»។

លោកត្រាំ បន្តថា «ត្រូវចាំថា មានគោលដៅនៅសល់ច្រើនទៀត។ យប់នេះគឺជាយប់លំបាកបំផុត សម្រាប់ពួកគេ ហើយក៏ប្រហែលជាយប់សាហាវបំផុតដែរ។ ​ប៉ុន្តែ​ប្រសិនបើ​រកសន្តិភាព​មិន​បាន​លឿន​ទេនោះ យើង​នឹង​ឆ្ពោះទៅ​កាន់​គោលដៅ​ផ្សេង​ទៀត​ដោយ​ភាពជាក់លាក់ ល្បឿន និង​ជំនាញ​»។

ការគំរាមរបស់លោកត្រាំ កើតឡើងមិនយូរប៉ុន្មានបន្ទាប់ពី សហរដ្ឋអាមេរិក វាយប្រហារកម្ទេចទីតាំងនុយក្លេអ៊ែរចំនួនបីនៅក្នុងប្រទេសអ៊ីរ៉ង់។

លោក ត្រាំ ថ្លែងសុន្ទរកថាទៅកាន់ប្រទេសជាតិ (រូបថត៖ Reuters)

នៅលើបណ្តាញសង្គម Truth Social លោកត្រាំបញ្ជាក់ថា «យើងបានបញ្ចប់ការវាយប្រហារដោយជោគជ័យ លើទីតាំងនុយក្លេអ៊ែរចំនួនបីក្នុងប្រទេសអ៊ីរ៉ង់ រួមមាន Fordow, Natanz និង Esfahan ហើយឥឡូវនេះ យន្តហោះទាំងអស់កំពុងស្ថិតនៅក្រៅលំហអាកាសអ៊ីរ៉ង់»។

ជុំវិញការវាយប្រហារនេះ មន្ត្រីអាមេរិកម្នាក់បានឲ្យដឹងថា យន្តហោះទម្លាក់គ្រាប់បែក B-2 ក៏បានចូលរួមដែរ។ 

អ៊ីរ៉ង់ ក៏ទទួលស្គាល់ការវាយប្រហារនេះដែរ ដោយអ្នកនាំពាក្យភ្នាក់ងារគ្រប់គ្រងវិបត្តិខេត្ត Qom លោកMorteza Heydari និយាយថា រោងចក្រនុយក្លេអ៊ែរ Fordo ពិតជារងការទម្លាក់គ្រាប់បែកពីអាកាសមែន៕

អត្ថបទ៖ សុខ សុវណ្ណ

ចុចអាន៖ អាមេរិក វាយប្រហាររោងចក្រនុយក្លេអ៊ែរ ៣កន្លែងនៅអ៊ីរ៉ង់

Helistar Cambodia - Helicopter Charter Services
Sokimex Investment Group
Sokha Hotels

ព័ត៌មានពេញនិយម