អនុប្រធានព្រឹទ្ធសភា ថា កម្ពុជាស្រឡាញ់សន្តិភាព តែមិនបោះបង់សិទ្ធិការពារទឹកដីឡើយ

កម្ពុជាស្រឡាញ់សន្តិភាព តែមិនមានន័យថា បោះបង់នូវសិទ្ធិការពារដែនអធិបតេយ្យ និងបូរណភាពទឹកដីរបស់ខ្លួននោះឡើយ។ នេះជាការថ្លែងរបស់អនុប្រធានទី១ព្រឹទ្ធសភា លោក អ៊ុច បូររិទ្ធ ក្នុងពេលចុះជួបសំណេះសំណាលជាមួយក្រុមប្រឹក្សាឃុំ មន្រ្តីរាជការ និងប្រជាពលរដ្ឋ នៅក្នុងខេត្តត្បូងឃ្មុំ។

លោក អ៊ុច បូររិទ្ធ បានលើកឡើងអំពីសភាពការណ៍នៅតាមបណ្តោយព្រំដែនកម្ពុជានិងថៃដែលបាននិងកំពុងអូសបន្លាយមកដល់ពេលបច្ចុប្បន្ននេះ​ ដោយលោកបានអះអាងពីមូលហេតុដែលបង្កឱ្យមានជម្លោះព្រំដែននេះ គឺដោយសារតែការមិនគោរពតាមស្មារតីឯកសារគតិយុត្តអន្តរជាតិ ដែលប្រទេសទាំងពីរបានឯកភាពគ្នា ជាពិសេសសន្ឋិសញ្ញាឆ្នាំ១៩០៤ និងអនុសញ្ញាឆ្នាំ១៩០៧ ដោយត្រូវបានបដិសេធដោយភាគីថៃ។ ខណៈភាគីថៃ បានជ្រើសរើសការប្រើកម្លាំងប្រដាប់អាវុធក្នុងការធ្វើសកម្មភាពឈ្លានពានយ៉ាងគឃ្លើនព្រៃផ្សៃលើបូរណភាពទឹកដីកម្ពុជា។

លោក អ៊ុច បូររិទ្ធ បន្តអះអាងថា បើទោះជាមានកិច្ចព្រមព្រៀងគ្នាលើបទឈប់បាញ់ និងគោលការណ៍មួយចំនួន ដើម្បីបន្ធូរបន្ថយភាពតានតឹង សំដៅរិះរកដំណោះស្រាយដោយសន្តិវិធីយ៉ាងណាក៏ដោយ ក៏ប៉ុន្តែភាគីថៃនៅតែបន្តប្រើប្រាស់កម្លាំងគំរាមកំហែង ក្នុងការចូលកាន់កាប់ដោយខុសច្បាប់អន្តរជាតិលើទឹកដីរបស់កម្ពុជា។

ជាជំហររបស់កម្ពុជា លោកអនុប្រធានព្រឹទ្ធសភា បានបញ្ជាក់ថា កម្ពុជា ជាប្រទេសដែលស្រឡាញ់សន្តិភាព ចង់រស់នៅប្រកបដោយសន្តិសហវិជ្ជមានជាមួយបណ្តាប្រទេសទាំងអស់ក្នុងពិភពលោក។ ក៏ប៉ុន្តែសូមកុំយល់ច្រឡំថា ការស្រឡាញ់សន្តិភាពរបស់កម្ពុជា មិនមានន័យថា ជាការបោះបង់សិទ្ធិអធិបតេយ្យក្នុងការការពារបូរណភាពដែនដីរបស់ខ្លួននោះទេ។

ក្នុងន័យនេះ លោក បានផ្តាំដល់អាជ្ញាធរ និងប្រជាពលរដ្ឋទាំងអស់នៅមូលដ្ឋានឱ្យមានការប្រុងប្រយ័ត្នខ្ពស់ចំពោះវោហារសាស្រ្តអុជអាលបំបែកបំបាក់សង្គមជាតិរបស់ជនអគតិមួយចំនួនជុំវិញបញ្ហាជម្លោះព្រំដែនពេលនេះ។ ផ្ទុយទៅវិញ លោក បានលើកទឹកចិត្តឱ្យពង្រឹងមហាសាមគ្គីជាតិកាន់តែរឹងមាំបន្ថែមទៀតក្នុងកាលៈទេសៈប្រទសជាតិដែលកំពុងប្រឈមទៅនឹងហានិភ័យនៃអំពើឈ្លានពានរបស់ប្រទេសជិតខាង៕