ព័ត៌មានជាតិ

មុនពេលដេកស្លាប់នៅលើម៉ូតូ បុរសម្នាក់ទទួលទានស្រាច្រើនថ្ងៃជាប់គ្នា

បានផុស

៥ years មុន

នៅ

ថ្ងៃសៅរ៍ ២២ ឧសភា ២០២១

ដោយ

បុរសម្នាក់ត្រូវបានប្រជាពលរដ្ឋប្រទះឃើញដេកស្លាប់នៅលើម៉ូតូ នៅចំណុចមុខសណ្ឋាគារសុខាសៀមរាប ផ្លូវ៦០ម៉ែត្រ ស្ថិតនៅក្រុមទី៦ ភូមិបឹងដូនប៉ា សង្កាត់ស្លក្រាមក្រុងសៀមរាប។

លោកវរសេនីយ៍ទោ សុខ ម៉េងអ៊ាង នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តសៀមរាប បានឲ្យដឹងថា ដោយមានសេចក្ដីរាយការណ៍ពីពលរដ្ឋនិងសមត្ថកិច្ចមូលដ្ឋាន ទើបកម្លាំងសមត្ថកិច្ចជំនាញចុះ ស្រាវជ្រាវដល់កន្លែងកើតហេតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសសាក្សីឈ្មោះ កាយ ផល្លី រស់នៅភូមិកើតហេតុ បានឱ្យដឹងថាសាកសពមានឈ្មោះ សម្បត្តិ មុន្នី ហៅចិនបានផឹកស្រាថ្នាំជាមួយរូបខ្លួនតាំងពីវេលាម៉ោង១៤ រសៀលនៅទីថ្ងៃទី២១ខែឧសភាឆ្នាំ២០២១ ជានៅចំណុចភូមិបឹងដូនប៉ា រហូតដល់យប់ជ្រៅដោយខ្លួនទាំងពីរស្រវឹងខ្លាំងក៏បែកគ្នា លុះព្រឹកថ្ងៃទី២២ ខែឧសភាឆ្នាំ២០២១ ស្រាប់តែមានមិត្តភ័ក្កប្រាប់ថាឈ្មោះសម្បត្តិ មុន្នី ហៅចិន អាយុ ៤១ឆ្នាំ បានដេកស្លាប់លើម៉ូតូនៅចំណុចកើតហេតុខាងលើ ហើយសាក្សីរូបនេះក៏បានបញ្ជាក់បន្ថែមផងដែរថា សាកសពបានផឹកស្រាជាបន្តបន្ទាប់ប្រមាណបី-បួនថ្ងៃជាប់គ្នា ហើយទំនងមិនបានហូបអាហារគ្រប់គ្រាន់ទៀតផង។

ក្នុងនោះតាមការបញ្ជាក់ពីស្ត្រីឈ្មោះកែវ សំណាង ជាអ្នកលក់ដូរមានតូបជិតកន្លែងកើតហេតុបានឲ្យដឹងថា ខ្លួនបានក្រោកពីដេកបើកទ្វារដើរចេញពីតូបលក់ដូរ ស្រាប់តែឃើញសាកសពខាងលើបានដេកស្លាប់នៅលើម៉ូតូនៅកន្លែងកើតហេតុ ក្នុងនោះផងដែរក៏មានឈ្មោះមាស សំអន ភេទប្រុស អាយុ៤២ឆ្នាំបានកំពុងរត់ហាត់ប្រាណប្រទះឃើញករណីនេះផងដែរ ដោយគាត់បានយកឈើទៅចាក់ឃើញថាមនុស្សប្រុសនោះ មានសភាពរឹងទើបសន្និដ្ឋានថាត្រូវបានស្លាប់បាត់ទៅហើយក៏នាំគ្នាប្ដឹងរាយការណ៍ជូនសមត្ថកិច្ច។

តាមការសន្និដ្ឋានរបស់សមត្ថកិច្ចបុរសរូបនេះបានដេកស្លាប់នៅលើម៉ូតូដោយសារ គាំងបេះដូង (ខ្យល់គ)។ បន្ទាប់ធ្វើកោសល្យវិច័យរួចសមត្ថកិច្ចបានប្រគល់សពទៅក្រុមគ្រួសារចាត់ចែងធ្វើបុណ្យតាមប្រពៃណី៕

អត្ថបទ៖ កុសល

Related Topics:ករណីខ្យល់ គ