លោក ហ៊ុន ម៉ានី ប្រតិកម្ម​ដាក់ជន​អគតិម្នាក់​ធ្វើ​សកម្មភាព​ប្រមាថ​មកលើ​សម្ដេចតេជោ​

លោក ហ៊ុន ម៉ានី កូនប្រុសពៅរបស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែង​ប្រតិ​កម្ម និងចាត់ទុក​ទង្វើប្រមាថមកលើសម្ដេចតេជោ របស់ពួកជ្រុលនិយម ជារឿងដែលមិនអាច​បន្ធូរ​បន្ថយ ឬសម្រាលទោសកំហុសបាននោះទេ។

លោក ហ៊ុន ម៉ានី លើកឡើងតាមរយៈសំណេរសម្ដៅដល់ជនអគតិម្នាក់ ដែលបានបោះស្បែកជើងសម្ដៅរកសម្ដេច ពេល​កំពុងទទួលនូវការស្វាគមន៍ពីអ្នកគាំទ្រ នៅទីក្រុងវ៉ាស៉ីនតោន សហរដ្ឋអាមេរិក។​​

លោក ហ៊ុន ម៉ានី លើកឡើងតាមរយៈផេកហ្វេសប៊ុកផ្លូវការនូវខ្លឹមសារទាំងស្រុងថា «ទង្វើដែល​ប្រមាថ​មកលើពុក មកលើនាយករដ្ឋមន្ត្រី មកលើប្រធានគណ​បក្សប្រជាជនកម្ពុជា គឺជាទង្វើ​ដែល​មិនអាចទទួលយកបានជាដាច់ខាត។ ទង្វើនេះ ពួកយើងទាំង​អស់គ្នា ជាសមាជិកគណបក្ស និងជា​ប្រជាជនខ្មែរដែលគាំទ្រគណបក្សប្រជាជនកម្ពុជា មិនអាច​បន្ធូរបន្ថយ ឬសម្រាលទោសកំហុស​ដល់ពួកជ្រុលនិយមទាំងអស់នោះបានទេ។ ពួកយើង​ត្រូវចាំ និងមិនត្រូវភ្លេច​ចរិតជ្រុលនិយម​របស់​ពួកនេះឡើយ។ អស់លោកក៏ត្រូវចាំថា អ្នកណាធ្វើ អ្នកនោះទទួល»៕

អត្ថបទ៖ ឡេង ដេត